2008 年 12 月 10 日 星期三 【颳風】

不惜一切


今日和女友一齊食麥當奴..哈哈...，女友食左個
類似兒童餐既餐，我就要個加大....仲要加多個
蘋果批，女友一句食鬼肥你呀，食咁多...，但其
實妳平的整咁多好味既飯菜，我係咁食，都唔會
好得好多啦，無可否認女友的廚藝真係好勁，可
以有妳做我太太...嘩....一定唔怕餓死喇...,所以我
決定訓身愛死妳....

食完野，我們去行街，當作散步，天氣太涼太凍
喇，她要捉著我倚靠我去行，在海濱花園的小路上
，女友問我......好多有關未來的問題，我知道女友
係好鐘意小朋友，著我們未來定要生最少兩個出來
，跟住我不會再做Crew，一定會轉做地勤，要每一天
都可以陪到家人，我望著她亦感覺到她...對未來的生
活充滿著憧憬，很想很想擁有一個美好的家庭，或許
天下所有女孩子的願望只是這樣，所以我想未來都可
比到這些佢，每一個人都講Irene係一個很好很好的女
仔，大家亦相信我們可以一定結到婚，一齊走埋下半
生，而家我既願望都係一樣，希望我可以有能力做到
以上吧........

女友真係對我很好，這樣細心的女孩子，還給自己這樣
苛刻的要求比自己，有時我想不清點解女友會咁諗，問
過人，女性若果重視呢段感情的話可以不惜一切，我諗
呢D就係Irene的『不惜一切』的表現，而我也應該像她
一樣....給妳最好f的....

>>December 11, 2008 at 2:47:31 PM GMT+8

2008 年 12 月 9 日 星期二 【颳風】

若我應選的去向.....


女友今日開始放假喇，每天都會在家中攪攪震，
一係整下餅一係行下街一係同貓咪玩、一係就
訓覺，再唔係再無聊D就係坐我車遊車河...哈哈，
好多好多節目，其實我唔明點解妳地會咁鐘意跟
車，我開車都頭暈，難道妳會好享受嗎..?不過，
妳都冇所謂，前個女友要我開簾比佢睇，比佢睇
即係比全部人睇，攪到我好唔自然，Irene乖好多..
真係只係坐，到站頭先會拍我傾計，所以...而家女
友跟我車，我覺得完全冇問題，只要女友唔怕悶，
我可以到總站見一見，我點會唔想呢...?

今日放工返到家就見到妳整野食，響度煮緊飯，他
日同你結左婚，個廚房要整大D比妳發揮，因為我
發覺妳真係好鐘意自己煮野食，我同妳每次出街食
飯，當我讚呢D好食，妳就會話...『我夠識整囉』..
之後，妳就會有一日就將佢整返出來，冇八成似都有
七成似，所以在我心目中，妳真係好厲害好可怕....
響呢一方面，所以而家有時有同事見到我個飯盒都
會好讚嘆....係妳成日令我比人羨慕，呢D係妳給我的....

今日收到妳Message.....為什麼要咁苛刻自己呢...?我真
係會咁差嘛做得...?什麼叫..『你可以對我唔好，但你唔
可以拋掉我』.....我看到真係呆了，邊有人會咁要求自己
願做呢D事架??有人問我....如果我前度返來找我，我會點..
有一段時間我真係答不到自己和發問者，因為我冇點想
過會有呢D問題發生，如果..假若真的發生妳所講的預感
，我會點去向呢....?

***我會都係留在妳身邊唔走...妳記得我地讀書學過的英文
時式嗎...現在式...過去式...將來式.....，她是過去式，妳係
現在式，我期盼和妳會有將來式，但世界上係冇回到過去
式的.....所以我會堅守妳身邊，我話過不會離開妳，當日是
她拋棄我在先，妳才會同我一起，名正言順的正式一起，
妳由頭到尾冇破壞我們，呢段五年幾的感情是她一手破壞
的，找到好的便走，難道她玩完要回來要妳讓位給她嗎...?
世上沒有輸打嬴要的，所以我覺得我應該係留在妳身邊，
如果真的要講我們要分開的人，只有一個...就係妳，只有妳
有資格說唔要我....我覺得自己冇資格去拋棄妳..應該話..我跟
本冇得講我會唔要妳，妳待我太好了，若我不要妳，我應該
會變得好孤獨，因為個個都知我掉下妳....我一定會冇哂所有
好朋友......***





今日妳買既生果，呢個西瓜真係好得意..似妳呀...!!但係夠妳食還是夠我食呀?


>>December 10, 2008 at 4:23:13 PM GMT+8

2008 年 12 月 8 日 星期一 【颳風】

今日‧忌水..!!


今日唔知發咩事，好鬼死"論盡"，買左支飲
品，明明已經關緊個蓋，但唔知點解都係漏
水，流到我個袋都係，激死我，之後去站頭
裝水飲，自己到交通燈前打開樽飲水，都未
放入口，又要開車，自己又白痴...今次冇關好
蓋，跌左半支水，成個駕駛室都係水漏到...仲
要流到出外面，我諗D乘客見到在駕駛室有水
漏出來，還以為我瀨尿呀...!!!!!!呢D都係其次，
最麻煩係D水漏D去控制桿到咁滯，臨急臨忙
用件風衣索水，唉......狼狽得很，以上動作阻
左我幾廿秒，攪到我行車燈著左都開唔到車，
去到下一站又要找紙巾，唉.........今天到底攪什
麼飛機呀?????是犯水災嗎?明明自己係唔怕凍
，唔知點解今日我會覺得凍，凍又冇風衣著，
因為索滿水唔著得....!!!!

Irene呀...今日我好運滯呀，度度都水災...係個銀
包唔會氾濫，而家妳在那裡呀，我望望個鐘，妳
而家應該做緊Passenger Duty，我估妳訓緊覺吧
，妳會唔會影D相比我睇下天空既雲呀..?妳成日
都咁做架喎，每次都比我睇下....今次我見到乜乜
乜咁.....好靚呀...!!!!但而家又諗到...妳返來時應該
係天黑...咩都影唔到先係.......!!妳今程放得太凌晨
喇，冇車出去，有都係三班通宵車，仲要唔夾妳
返港時間，妳都係Call自己相熟的士返來，在樓下
等妳啦.....間中一次接妳唔到,,,妳唔會詐形嘛...!!

今次返來可以放一段長假喇妳，替妳開心噢.....但
我呢....當然要捱啦.....


妳今次出走係HKG→BOM→HKG......唉..!!!!
而對上一次係HKG→NRT→HKG....我上次冇打出來...

>>December 9, 2008 at 4:08:40 PM GMT+8

2008 年 12 月 7 日 星期日 【颳風】

又再次証明我的粗心大意..


女友今日問我，我明天返工呀...
我..........：我知呀，飛Turn Around嘛
女友......：你知唔知我飛邊呀...?有冇睇過我個 roster呀..?
我..........：有呀，由HKG飛去→BOM飛返→HKG嘛...，我記得喎!!
女友.......：咁BOM係咩地方你知唔知呀??
我...........：................(諗....其實我係唔記得咩地方)，事實上地方代號太多，我跟本冇完全記哂...
女友.......：有冇睇新聞架你?有冇留意時事架...?
我...........：仲係傻下都唔知講咩......!!
女友........：印度911呀，對象係我地D外國人呀，明白未呀? 女友歎氣....

點解我會諗唔起呢D事..?女友曾經比份List我背
，讀熟D代號，但我冇去睇熟佢，原來只係記幾
時飛幾時返...係唔足夠，或許這些關心，會比接
返放工更重要，雖然女友冇嬲我，只係拍打我一
下講左句『冇記性』就算了，不過....將心比己，
連呢D都唔關心，另一半去D咁高危地方，自己郤
完全不知道，比我....我都會唔開心吧.......

之前返工..我差點撞車，她就不作一聲給我一道護身
小符包給我，最近又給我另一個守護健康的小符包給
我，其實我冇出過任何聲，為什麼女友會做到呢D事，
而我可以知都不知道，我真係粗心大意得離譜吧.....唉...!!

對唔住呀，一時間我真的不知道可以做什麼來保護著
妳，而家我想到可以做的只有學妳向天父祈禱祈求妳
能平安回來，其實..我還有什麼可以做....?我會努力去
諗......原諒我今次對妳的漠不關心.....

>>December 8, 2008 at 1:56:26 PM GMT+8

2008 年 12 月 6 日 星期六 【颳風】

見家長.見長輩


今日帶左Irene去見我屋企人，另外仲帶左佢去
長洲見我姑媽、姑姐、表姐、表哥等等，亦順便
帶女友去長洲玩下行下...都算是快樂的一日，因
為我見女友都玩得好開心，唯獨有點失策係女友
穿著得太莊重...，著住對3吋高既鞋，去東灣果邊
個沙灘玩..同埋買豆沙飽食有點困難....雖然係咁，
女友都好快樂咁吹住冷風陪住我一齊行...不過東灣
真係好凍，連我覺得凍，何況係怕凍既女友呢..!。

今日一早便返天水圍去見我家人，其實我好緊張，因
為突然轉左另一個女仔，比人諗的感覺一定會話個男
既負心吧，一入到門口，大家都好似好冷靜咁，跟住
就比阿媽講:『肯帶人上來喇終於..!!!!』原來到果時我
先知我一早已經比人知道左，只係阿媽見我唔講先唔問
我，感覺上阿媽都幾鐘意Irene，而我個妹更加同佢係咁
講野，問女友返工飛日本的情況，又問她日文點講點寫..
一刻間好似個個都無視我存在似的...，到下午我媽煮飯，
女友又入去幫手煮...咁我呢度就唔知佢地講咩喇...，就
係咁Irene就食左我家的第一餐飯，一切都好順利...。

之後同女友出去搭船去長洲，姑媽佢地應該第一次先知我
轉左女友，不知是否姑媽同我阿"女麻"比較喜歡之前果個，
而且一知道女友係空姐就反應話要成日出去外國飛，比我感
覺係話Irene係會出去找其他男仔咁，不過好彩大表姐幫我
口，大家先慢慢咁接受她，姑媽拉了我出去問我，之前那個
仲咩..?點解會變左另一個，我把全件事說出，但姑媽都係唔
係好相信，或者他們果邊真係鍾意前任多一點，姑媽又問我放
心給她一個在外地工作...?我知道佢地應該唔係咁接受到她暫
時，也難怪的，因為前一個的確好討我果邊的親人歡心，尤其
係我"阿女麻"但點都好啦，我唔會為左佢地而放棄Irene...，
到夜晚大家去食飯時，我阿"女麻"都唔係幾理會她，我知Irene
已經盡力打開話題，但都好似不得要領咁，坐船返香港途中，
Irene問我，是不是自己做得不好?你"女麻女麻"不喜歡我哩..!`

其實妳已經很好做得，但有時事情不會咁順利吧，不過有件事實
可以肯定係，「就算全部人都不接受妳，我都唔會為了佢地而去
掉底妳..放棄妳..拋棄妳...」，我會相信妳份工作，不會像佢地
那般懷疑妳，所以冇必要為了佢地去做地勤，向佢地屈服...!!

我覺得今日妳算係受歡迎，我D表弟表妹甚至我親妹，都很喜歡妳，
我不用擔心新年怎樣過了，我來年可以拖住妳去一齊收紅封包呀，
仲有呀.....今日妳好靚呀!我真的很喜歡這麼可愛的妳...

>>December 7, 2008 at 2:22:59 PM GMT+8

2008 年 12 月 5 日 星期五 【颳風】

麥兜騙我二百蚊.!!!

**其實妳冇嬲我已經好開心喇，使咩向我sorry喎，其實我怕妳唔要我就真....**


女友一早就出左去國泰城聽D唔知咩講座，只係
見佢著住套好整齊黑色既Suit，女友話呢D係冇
死的配搭喎，哈哈....配搭..?其實在我眼中只係一
套既套裝，看不出有什麼秲別，所以激到女友反
白眼....!!!冇我咁好氣出左去，給了我張八達通女友
，等佢可以縱橫港鐵全線，始終搭機鐵係最快嘛，
而我就攞左佢張麥兜豬公仔圖案的八達通，我就要
比錢搭車.....，可惡既女友張咭只有十元七毫子餘額
，等我搭一野已經負錢，一定是女友的詭計，騙我入
佢張八達通之餘，自己又唔使錢搭車，女友累我冇左
二百蚊，唉...!!!我出到旺角，去左朗豪坊買公仔比我
妹，之後去左搭巴士出機場，點知，原來彌敦道得一
架巴士去，仲要係A線...即係特快車，仲要係城巴，
貴上貴上貴..!!!!一程要33蚊..?!!當然唔肯就範啦，坐巴
士出去美孚搭東涌線，巴士去到Sham Shui Po就塞車，
原來電腦節封路，攪到我三點都仲響荔景站，去到機場
成三點八九個字，約左女友響機埸大家樂等，聽完講座
的女友由國泰城坐専車去機場，真係巴閉，有証先上得，
我呢D閒人唔使旨意，我地見到面食左個tea，就返去屯
門市中心行左一陣，女友買左D材料返屋企煮飯，天氣凍
凍女友嚷著話要去煲熱辣辣既湯飲，其實天氣咁凍，我真
係唔想女友沾水煮飯，但女友係要堅持，我又幫唔到手，
所以我既作用就係幫佢手洗菜洗碗，幫佢做要沾到水既工
序，望見女友穿住圍裙扎住把頭髮煮飯時，突然覺得佢好
賢淑咁，原來識得入廚房既女仔真係真係好吸引，我打死
都唔放妳走呀.....!!而家呢個時候既我只係等食.....哈哈....!!!

Irene呀，明天帶妳返我屋企，講真..我真係有點緊張，但
遲早都要比人知，我話過唔再收埋你響親人面前，妳經常
話自己膽小如鼠加心血少血糖低，妳會唔會緊張到暈低呢?
不過唔驚得咁多喇....我地一齊拼出去啦..



>>December 6, 2008 at 10:52:08 AM GMT+8

2008 年 12 月 4 日 星期四 【晴】

靠著她....


今日被調到去八鄉返工，即係West Railway Line，如果冇
記錯，應該係合併後我首次上West Railway，今次亦都係
第一次特登有個人陪坐我車係咁兜，那個當然係我女朋友啦，
她坐在D Car，第一行個位，我每次出來開關門都見到她，每
一個站都向我揮手笑笑，其實知道有個人陪著我，我都很開
心，妳有幾次還向我扮鬼臉..戚戚鼻咁，有點哭笑不得，因為
真係好可愛，我很喜歡她夾隻髮夾的樣子，真係好似個小妹妹
咁，女友陪我兜了幾轉..我都放工了，其實她都坐得很辛苦我
知道，因為一轉來回都要一個鐘，坐了三轉車，而且到南昌站
仲要跑去另一個月台上車，真難為女友呀，放工..我們到荃灣西
坐船去柏麗灣，我們到左沙灘坐了一陣子，太凍關係，她要靠著
我身邊，抱著她時， 我覺得有種幸福的感覺，我知道我自己真的
很鍾意她，我真的唔想失去她，我情願聽從她說話都唔願意去氣
她，我發覺而家反而更需要她，彷彿無左她我會生存不到咁，以
前那個舊女友在熱戀期都不能給我呢種感覺，可以靠近她觸摸到
她，自己才會開心快樂，經過這件事，我懂得再更加珍惜妳，只
有妳才會令我茶飯不思，就像昨天一樣，心情跌到谷底，心裡怕
得要死咁，我不想再有呢D感覺...真的很恐怖呢......!!

>>December 5, 2008 at 3:10:53 PM GMT+8

2008 年 12 月 4 日 星期四 【微冷】

很想立即講的說話

點解我要介懷女友向我的則問...?其實我應該
有責任有義務必須讓妳知道的，況且並不是什
麼秘密，說話竟要女方向我提問，自己有冇攪
錯呀?!還要在心中去埋怨妳.....點解我會咁小器?
點解我要咁在意呢D問題??好多個點解...!!!!!回想
起妳昨天的徵笑，很深刻，因為當時我目無表
情對著妳，自己更加可惡，點解要讓自己最愛
的人向自己道歉.....!!昨晚在床上，我想了很久，
去諗自己之後應該要做D咩來對妳...，最後我發
現，我在家中原來真係冇貢獻的，食的又係女友
安排照顧，還要對方逗自己開心，身與心都係女
友顧護我的，原來最傻瓜的人真係我................!

對唔住..Sorry....我發誓我今生今世都會跟著妳走
，妳想我做什麼我都會去做，妳叫我去左我不會
行右，言聽計從.....我甘心願意交給妳看顧，我知
道女朋友一定會對我好的，,是嗎?

我的早餐妳又為我準備好，怕冷的妳還是肯願意早
過我起身去整早餐，而之前一定環會準備我返工
前，掛定一件熨好的衫比我，反而我,,一直都冇為妳
熨過制服，做任何細微的家政，妳說妳比不上我
以前女友的標緻，但我越來越覺得妳才是最完美
的。我唔會得寸進尺，我仍然依舊都係咁喜歡妳，
我不會讓妳的眼淚白白的流出來.....我應承妳我不會
再咁小氣，我應承妳我會在呢幾天內，帶妳見我
屋企人和其他親人，因為我覺得以前係錯的，我真
係唔應該去收埋妳唔比妳見我家人，這是我暫時現
在唯一可以為妳做到的事....

要出門口返工了....

>>December 5, 2008 at 12:14:17 AM GMT+8

2008 年 12 月 3 日 星期三 【颳風】

2008 年 12 月 4 日 星期四 【微冷】

無聲無色的...


要返工的妳一早便出左去，還是不開心嗎?
但檯面上又放好早點，雪櫃內又準備好待翻
熱的午飯，我估妳是不想嘈醒我定還是內心
仍然不快樂呢?而家妳又在做什麼呢..? 感情
的建立需要心機、心思、時間、精神、而我
們由相識、相遇、相處、以至了解、到信任
都唔係一天兩天，一朝一夕可以做得到，試
問點會因這般事將之破壞呢...?今日時間好似
過得好慢，何時先會到夜晚....?

2008年12月04日 Thu 14:15:28 (GMT+8)

---------------------------------------------------------------------------------------------------
2008 年 12 月 4 日 星期四 【微冷】 晚上

過了大半天的孤魂野鬼的生活


還以為女友嬲左我，搞到自己連兩餐也吃不下，早餐連下午飯也原封不動，
真的...原來我真係害怕女友嬲我，女友一早就出左去返工，我完全不知道，
為的只係不想嘈醒我，讓我假期好好的睡，而我竟然會去想她嬲了我，才
粒聲不響地走，是我太小器嗎?到達機場，心中很懼怕女友會不理睬我，當
見到她時，有點不知所措，直至見到她微笑，我才知自己是多麼的多如，反
而女友向我說對不起，還送上小禮物給我，這一刻我才知.真真正正知，最傻
的原來真係只係我一個，上到巴士，我靠著她，心中一片空白似的，我今日
究竟做了什麼...?從夜晚黑在車廂玻璃窗...我看到她的反影，她倦得訓著了，
再看看自己倒影，倒影好似責罵自己咁，原來我比一個女孩子更加小家....說
對唔住的是我才對啊........機場巴士到屯門市中心總站下車，下車後..我向她講
了一句『老婆..我好肚餓呀..我冇食過野今日，帶我去食點野好唔好呀?』

以前我聽講過，地球上的生物"人類"，有男有女，但兩種是不同的動物，男的
係未進化，女的係進化D，所以.....若果全世界都係女人，呢個世界係唔會有打
仗的，因為女人係文明好多好多，今日事實亦都証明呢個理論係對的.....


女友今天在日本買的..有祈求的一道護身符和一條電話繩，個多啦A夢變左個橙...很可愛呀







>>December 4, 2008 at 4:33:23 PM GMT+8

2008 年 12 月 2 日 星期二 【微冷】

口....啞.....啞.....


第一次被妳問到無言......很認真的樣子，真的無比認真，
似是忍耐很久想知的答案，是勢我都估不到妳會問我呢D
問題，我亦從來無想過我會答呢D問題，我從來無嫌棄
什麼，亦都冇諗過我必須得到什麼，我相信問十個十個
都同答案，但妳知我怕是什麼，妳又怕我究竟想著什麼，
大家都不敢說才會到而家我們還在原地.....是不是得不到
才令妳一直處於猜疑狀態...?用情是真的這又有何難..?

>>December 3, 2008 at 3:39:36 PM GMT+8