2008 年 12 月 20 日 星期六 【炎熱】

舊生聚會


今日去左同班舊同學食飯，正確D講係比班友
玩左一餐先係，我和女友都尷尬到爆，你班友
將自己既快樂建築響我地痛苦身上呀，你地班人
比我知你結婚我一定玩殘你地，山水有相逢呀....
不過雖然係咁，我都知佢地係玩下我，我唔會
嬲既.....放心，實有仇報既我...!!!最令我意外係
連班主任都玩埋一份，唉.....不過整天感覺都係
開心既，今次個攪手都安排得不錯，大家都好開
心，抽獎交換禮物，我抽到一大盒朱古力，女友
就抽到一支2GB記憶手指....，我似乎冇咩抽獎既
運氣...。

可以見返咁多朋友，我和女友都很開心，因為個個
送上我們祝福，當中有個來緊09年還會結婚呢，可
喜可賀呀，問到我地何時.?哈哈..我諗來緊三年左右
啦，有足夠既錢支持先有得求婚嘛，唔好再催促我
地喇，今日個個都話我"你執到啦"....，咁我的確真係
覺得.."我執到既"。聚會到尾聲時，大家約定下一次
攪手是誰，約定下個聖誕節再聚在一起，其實我覺得
幾感動的，無幾多人可以成功聯絡到半班舊同學一起
，而我地可以，雖然唔係全班完整，但我覺得已經很
滿足喇.....!!!其實真係要多謝我女友呀，無佢當日肯帶
頭聯絡舊同學，都不會有今日的場面呀..。

今日去出去食飯既時間，發生段小插曲，響我地行緊
屯門吉之島果陣，女友發現左個小朋友獨自左望右望咁
，於是上前去睇下佢啦，點知一問個小朋友野果陣，個
小朋友就即刻喊，問小朋友媽咪同爸爸去左邊，個小朋
友咩都唔知，電話又唔知，一路喊一路喊，咁我就去找
職員叫廣播期間，我返來見到女友同個小朋友去左汽水
機前買果汁飲..!!!我返來一來一回都唔夠五分鐘，果小朋
友居然比佢攪得掂.....，過左冇耐佢屋企人接返走佢，原
來個小朋友自己行去洗手間之後唔識返去，越行越遠，
最後唔知去左邊，就係咁失散左..!!!而家D父母真係咁放
心比個小朋友一個人出去.....，真係丫.有冇攪錯呀..?

事後問女友點解可以咁快攪得掂個小朋友，女友話佢好服
侍過D飛機上人好多好多....!!聽女友語氣，我諗佢份工算不
上是一份令人羨慕既優差......!!

>>December 21, 2008 at 2:49:24 PM GMT+8

2008 年 12 月 19 日 星期五 【微冷】

環保袋


一望個鬧鐘，原來已經下晝一點幾，原來自己醒左
再訓過，不過我竟然可以訓咁多，可以話少有，女
友都唔弱，都有訓，仲訓多我半個鐘，或者佢太倦
掛，有D人話女仔好易會好倦喎...唔知係真唔係喇...

起身整好哂野出街，問去邊呀﹖唔知呀...?同女友走
去行APM..又係行APM，原來女友想買野，原來佢果
日買銀包比我時又幫自己睇埋野，又係睇中一個似曾
相識..一模一樣既手袋..即係又係好似"黑色環保袋"果
隻..!!!真係靚咩..?好似環保袋喎，千幾蚊買個咁既環保
袋??聽到女友講左句...比佢吹漲既說話，我駁唔到....
佢竟然話..『係呀..好環保架...我會用好耐架!!』唉....其
實我冇咩所既，不過我今次要佢買另一隻色，我唔想見
到隻黑色....!!我始終都要買一次.....上次走得甩..今次走唔甩
，買完個袋後..我講返以前D野比女友知，亦都話比佢知
我舊女友都有個同款袋，但唔緊要..因為唔同色架妳地，放
心......。女友食飯問，仲咩要講比我知?其實無他既....因為
我都想妳知道囉，然而我知女友無唔開心，從眼神可以睇得
出女友今次係冇介意的....，唔打緊啦，舊女友果個係佢自己
比錢買，妳今次呢個係我買既.......意義好唔同架....!!

>>December 20, 2008 at 3:33:25 PM GMT+8

2008 年 12 月 18 日 星期四 【颳風】

孤陋寡聞.....收多我兩蚊...


今日響Depot等等等.......諗住可以繞手睇電視
啦，點知有人話肚痛..!!係唔係真係痛架??頂
左兩轉半，阿師兄開大都開得幾耐時間，十成
去左歎茶啦，唔緊要，屯門線505少掂，當玩
兩轉啦，從前最多都係友愛返天水圍，今日有
得走下三聖...正!!係著件龜衣礙眼D，但屯門有
邊個會識得我丫...!!之後落又返去Depot，做下
烏龜，慢慢行5km真係，小朋友跑都會快過我，
仲要服待MT-Car，扭制都扭到我手軟，又拆又接
Car，慘過做泥工咁，今日沖左好多次涼，唔係我
自己啦當然，自己又好耐冇攪過支沙槍，差D連
點用都唔記得，好彩工程哥哥好人，如果唔係
一定要帶住"阿媽"返工喇..!!還記得對上一次返呢
D更，回家係往元朗方向，今天做同一樣工作，
我回家要往碼頭方向，好多事都變了，我好似都
好耐冇特登去過九龍塘果邊，或者真係冇咩需要
去果度吧!!!而家去東涌多過去葵涌，去機場多過
去球場，而家機場巴士全線搭熟到爛透，然而..我
今日先發現，我原來係未去過二號客運大樓，原來
果邊清靜過另一面好多，如果唔係女友約我等，我
真係唔知有咁既地方，點知自己又傻下傻下咁.....搭
車訓過龍，我落車都唔知有呢個地方。而果邊同樣有
食店商店，但我唯獨發現一樣野，原來果邊D便利店
係冇特價貨，支支飲品.份份食物都係原價，一支綠茶
要$9.9，出面街便利店唔特價都冇咁貴，後尾我比錢
我知喇，原來個店小二會問你係唔係機場員工呀..?誠實
既我當然話唔係啦...咁就即刻就收我原價...!!!!咁即係點
呀?唔係機埸做就要比多D錢呀...?頂...我一路行一路飲
又一路飲同事又一路諗.......我其實可以話係員工架喎，
我話我係機埸港鐵果邊D職員咪得囉，張咭又冇寫咩
職級....佢鬼知我係邊度既人咩，就係咁，比佢收多我
兩蚊，去到見到女友問佢知唔知有呢D事，知...我知呀
，有Pass係平D架嘛....咁即係我孤陋寡聞啦，女友竟然
點頭....!!!!好可惡呀......第一次覺得女友佢係咁可惡架.!!!!

之後我地返左屋企食飯.....又係咁好簡單咁又過左一日，
還有兩天女友要開始返工喇，好好地陪妳玩埋呢兩日喇...!
明天後天真係好難得大家可以完全碰正大家Off Duty架....，
明天想去邊呀?

>>December 19, 2008 at 4:12:11 PM GMT+8

2008 年 12 月 17 日 星期三 【颳風】

交換禮物


今日同女友去左觀塘APM行街，主要去買聖誕節
抽獎既禮物，一買就買左千幾蚊....，唉....用錢好
以倒水咁，我地分開三十分鐘，各自去買聖誕禮
物比對方，買完去迷你摩天輪度等，三十分鐘過後
，大家交換，女友送左個Agnes B銀包比我，而
我就去左Mabelle買左條手鏈比佢，得三十分鐘真
係唔知買D咩，好似即時考急才咁，但個過程都幾
得意和開心既....，玩完之後我地去左MUJI買禮物，
主要買實用一點既用品啦，而且要五十蚊以下，都
算係幾好買，好輕易就買齊哂，買完就去食晚飯，
去選擇食咩途中，女友碰到一位同事，我看她似係
剛飛完返屋企咁既款，我和她打左個招呼，女友同
佢傾左一陣，就分開喇，原來呢個同事係女友上次
同機既拍擋，難怪女友可以同佢咁好傾啦...!!我地食
完飯就搭巴士返屋企，好彩APM個巴士站近個總站，
上車都可以有位坐，女友一上左去睇條手鏈，幫她
帶上後，我覺得有點累贅咁，但都叫適合既，女友都
話好鐘意，哈哈....."都唔知係唔係真係鐘意既..."，Irene
呀，係唔係真係鐘意架....???

但我真係好鐘意個銀包，事實上我個銀包都殘舊了，
它亦都係前女友送的，是時候要換上新買給我那個喇....
多謝妳....!!


今日買左同收左既禮物


今個聖誕節女友送比我既禮物


>>December 18, 2008 at 4:33:49 PM GMT+8

2008 年 12 月 16 日 星期二 【微冷】

天生我材必有用?!


今日同女友出去超級市場，路途中唔知點講下講下講左
一樣野出來，女友話每個人在踏入呢個世界前，已經
展開一埸好激烈的比賽，就係鬥快游向媽咪既卵子度
.....!!所以每個人生出來前都應該係一個勝利者，天父咁
一定會賜與自己的長處既，所謂天生我材必有用嘛......
，哈哈，係妳先會諗到呢D咁既野，真係頂妳唔順呀....!!

女友﹕咩喎..!!咁你咁辛苦"力爭上游"都係想睇下個世界吧..!!
我話﹕我好後悔出左世呀，阿媽生我出來簡直係整估我呀
要我捱世界。
女友﹕咁你當時游咁快仲咩，抵你死..哈哈....，不過唔係
呀，你覺得自己冇長處架咩...?中文科讀書果陣都
有讀啦，『天生我材必有用』嘛....
我話﹕唔覺喎....況且我以前上堂都唔留心，我冇聽書呀，
妳都見我成績冇妳咁好架啦.....!!不過...當日中文堂
只不過間中我都會聽少少既，『天生我材必有用』
呢句說話係出自李白架嘛，李白佢當然可以咁講啦
，因為佢果D唔係才能，佢果D簡直係特異功能，佢
唔單止『天生我材必有用』呀，佢『天生我材比D
你用』都仲得..!!!
女友﹕耶.....你好冇文化呀..咁都講得出.!!!(後刪500字左右)
我話﹕如果我係叻呀，當年邊會有人墊妳底，頂妳上原校F.6丫，
咁事實上妳真係好鬼醒既，我唔夠你講喇，買妳既野
啦，到左百佳喇.....!!!

其實都係果句啦，由細到大妳成績都係好過我架啦，就算係
而家，比較起工作，人地一睇妳份工和我份工比，高低立見
啦，我唔識四國語言架，國語有限，英文普通，日文唔識，
就算講廣東話我都衰懶音啦，如果叫我夾硬諗有咩叻過妳呢，
唯一可以贏到妳既，而我又而家諗得到既才能咪係.....我識打倉頡，
妳打極都係速成囉，咁呢D算唔算長處呀?

在我心中...Irene妳真係好聰明好醒好叻，第日我地生既仔女一定要似
妳呀，如果似我就慘喇，如果係個女呢..我諗應該會似妳咁可愛...，
其實呢我鐘意囡多D，我覺得會乖D嘛..生仔似我咁會激死妳呀..哈哈....

>>December 17, 2008 at 2:41:02 PM GMT+8

2008 年 12 月 15 日 星期一 【颳風】

我.....做過....乜...?

食過晚飯, 不想回去....
Irene和我來了一轉夜遊屯門碼頭外的
海濱小徑散步 ，這亦是住屯門區的好
處，我們在便利店買左兩樽熱維他奶，
有了它兩個人手上都很溫暖，站在屯
門碼頭最篤的位置....直望可以看到黃
金海岸，而轉身90度便會見到機場部
分，但只見到閃閃燈光，間中還會見到
夜空有閃爍紅燈的飛機橫過....，不知不
覺都一起一段日子了， 大家都說出一起
的感覺，女友回說我的前度女友，問了
我有關她的問題，而我亦很樂意的向女友
講出一切.....無論係多麼親密或無聊的問題
，我都全答無保留....說出來...。

靜靜地我們兩個人都 靠在一起,冷風迎面而
來, 我倆靠得更緊，說說笑笑.........
我覺得, 現在也蠻好, 有Irene這個女朋友, 她疼
我, 照顧我..... 或許男人在外狂跑狂衝的工作後
，到底都需要女朋友的一點疼愛和支持,而Irene
正好給我這點支持和力量給我去跑、去衝....

Irene也要返工，我有給她任何東西嗎...﹖感覺上
我好多野都冇做過咁，女友則向我付出所有，家
中水電煤氣費、上網費、租金、信用咭交費、立
立雜雜的費用、就連我的手提電話費都是女友幫
我處理，而我只是放下一舊錢便咩都不用理會，
家中所有家務..連清潔洗手間都係女友做，然而女
友都冇怨言，到底我搬到這裡住，我有什麼貢獻，
怪不得連貓咪都喜歡纏住她啦.....!!




>>December 16, 2008 at 4:01:24 PM GMT+8

2008 年 12 月 14 日 星期日 【颳風】

低能中學生...


而家D中學生係唔係痴線架﹖響個月台打波...!!!自己D波又
屎，彈下彈下咁彈落路軌..!!!大佬呀，我架車來緊架，想點
呀﹖我真係睬你都傻，要我停車等你執波﹖我D休息時間好
寶貴呀，正一低能兒童，冇知識...連幼稚園生都知道要去打
波就去球場打啦，呢班咁既所謂中學生正飯桶...!!!果刻真係
比個波嚇一嚇，第一眼我還以為係跌個人落去，好彩我係埋
站..架車收慢哂，但我D乘客全部就為你一個波...跌哂落地啦
，到時中招又賴個司機問題啦...到時全部人都會話我白痴啦，
為個波去急停架車，我還需要份工呀，你想死...你既事，我
要賺錢開飯架....!!冇左收入..我之後D所有計劃就冇架喇，天
呀....求下你可唔可以響我返工時，可以避開班咁既低能中學
生呀...??

陰影之下...我總係覺得架車隨時又會踩波車，好不容易捱到
驚到放工，同女友呻，呻完好似好左少少，回到家，女友已
經準備定好要待整的飯菜，在家中...冇化妝、將把頭髮紮馬尾
、穿住圍裙仲有帶埋副黑框眼鏡既妳，真係好似一個媽咪咁...
，如果人地第一眼望到妳係咁既樣，我諗冇人可以估到妳係做
咩工作，呢個係Crew...?唔信....係唔係呀你話呢..!!不過..我真係
好鐘意妳呢個Look，比起著上制服的妳還要耀眼，或者我真係
好鐘意入到廚房既女仔啦..，就好似妳咁，可能呢D就係女性既
魅力啦....!!





>>December 18, 2008 at 10:49:46 PM GMT+8

2008 年 12 月 13 日 星期六 【颳風】

大花臉....

今日女友返左去國泰城，唔知佢去整D咩啦，但
當她返到來，女友就送左條電話繩比我，都幾得
意架，尤其係架飛機，好鬼Cute....多謝妳呀...!計
下計下，妳都不知不覺送左好多電話繩比我喇，
但我好似咩都冇點送過野比妳......，唔緊要啦，
我到聖誕時會送番一份好好睇睇既禮物比妳架喇，
妳等多一陣啦......哈哈..!

下午陪女友去她親戚家，佢親戚家中個女，即係女
友個細表妹，一來到就將我女友玩化妝，奇怪係女
友又會甘於比佢畫花臉貓，最終攪到塊面好似好"妖"
咁，哈哈，最後見妳自己又要執一大輪，咁為何妳又比
佢玩妳塊面呢?但看得出，妳的表妹很喜歡妳，好鐘
意同妳玩，睇得出妳都好錫佢地...果然係一個好表姊呀.....!!

夜晚，同女友去左食壽司，天氣咁凍我真係唔想
女友煮飯，我真係好怕會凍親妳，因為妳真係好怕
凍架嘛，一陣冷病左就不得了喇....!!!食完野我地去
左超市買野，主要係買早晨用既食物，其實只要有
妳在，我真係唔怕會餓得死啦...。

女友既公司今日送的電話繩..而家係我架喇..哈哈








正話到超市買早餐呀....要入既貨呀..!


呀......Irene呀..我地唔記得買『柔順劑』呀，我放哂衫洗先知呀....!!我諗..妳唔會鬧我架掛...係唔係呀?

>>December 14, 2008 at 2:14:17 PM GMT+8

2008 年 12 月 12 日 星期五 【颳風】

等出去


天氣對我女友來講真係有好大影響，身子弱不禁風
既佢，又病喇，一早起身就係咁不斷索個鼻，整天
都係手拿著紙巾放在鼻上，攪到自己個鼻紅扑扑咁
，見到佢咁，便著她留響屋企休息，但女友又要病
住扭出街，嚷著要去睇戲，因為我之前應承過女友
嘛，所以話呢，女仔真係好記得呢D事，一旦承諾左
就要做...係唔係呀Irene...，見妳咁堅持，好似非
去不可咁，唔帶妳去都唔得啦。不過而家都仲未出去
，因為睇五點半果場嘛，呢個時侯，妳估妳而家做緊
咩..﹖妳響張床度用棉被捲住左自己同隻豬訓緊呀，
我有考慮過偷影妳相...然後放上來比人睇架，不過
我諗如果我咁做，應該會比妳用手連環掌，拍都拍死
我，所以我最後都係放棄冇影到，但妳訓覺個樣真係
好得意架...哈哈，好啦等我返來再記低之後發生的事
啦....

----------------------------------------------------------------------------------
2008 年 12 月 13 日 星期六 【微冷】 《晚上》

過得很開心的一個週末


帶住病既女友，食左兩劑藥又好了點，明顯可以見到女友係冇咁辛
苦，訓左一陣起身又紮紮跳，其實佢只要早點可以醫..可以食到藥，
女友都會好快可以好得返，但如果一拖個病，唔去食藥睇醫生，佢
就會有排病，女友個身體結構真係好奇妙，點解成日都會病架...??

夜晚去屯門UA睇戲， 睇呢套『地球停轉日』，對呢套片有點失望
，女友都話麻麻地，因為我覺得戲同戲名拉不上關係咁，女友話最
初係諗住係睇個地球唔識轉會點嘛，唔識轉即係冇左四季和日夜啦
，咁人類會變成點?而又會諗住睇個主角點去阻止呢埸災難嘛，點
知原來係令一回事，但算啦，反正都係唔使比錢睇嘛，所以我地只
係呻左兩句就去找地方食飯，個個話經濟唔好，但我地去親間間都
要等位，終於我地決定食上海菜...，我地等位等左半個鐘先有得坐..
當然我地唔係呆等啦，女友響呢間食店附近行店鋪買衫，其實我唔
係太鐘意陪女仔買衫，因為成日問邊件好...邊件好.....，但當我比左
意見佢又唔買又或者買唔係我比意見果件，若果係咁妳問我仲咩呢..
?上一個女友就係呢D人，真激都激死你，但Irene有度好就係...佢買衫
會好有目的，知道要什麼，所以好快買到，就算要我比意見都係二選
一，我比完真係會照我意見去買，咁妳買衫我都會有心機睇D嘛......。
買完之後，無耐就有位，我地叫左幾個菜，其中個上海炒年榚真係..食
到我地好滯，冇想像中好食，而個蟹粉小籠飽..因為我心急食，只係等
左個外皮冇咁熱就食，點知內面D汁熱到我，將個飽由口跌落個碗度，
熱到我丫...!!!!!仲有個醉雞..哈哈，原來女友唔係好掂得酒，大家各食半
碟，食完之後望到佢塊臉紅哂，跟住同我講有少少天旋地轉既感覺呀....
，不過難怪既....事實上碟雞D酒味好濃好重，連我自己都覺得D酒精供
鼻...只不過佢又真係好好食，所以雖然係咁啃...我地都食哂。買單冇想像
中咁貴，只係二百幾蚊，行出店門口，在充足既燈光照射下，更見得女
友塊臉有點泛紅...，之後我地搭西鐵返屋企，而我搭中的呢一列列車有
另一個與她的故事，坐著呢一列車就會想起某些事。行返回家途中好大風
，吹到女友""振振振""，我一邊捉實佢手，而另一邊手挽實她的手臂，我
只感到她真係手好凍...臉珠都好凍......我講，如果妳返工要飛去天氣凍的
地方點算....??然而回到家妳便比我睇妳去天氣凍的地方，會帶的用品，
真係令我開眼界呀..哈哈

呢碟係上海炒年榚...舊舊都係麵粉咁，食到好滯...


呢籠係蟹粉小籠飽..熱到我叫救命...




呢碟係花雕醉雞...女友食完會暈眩啊...


M333呢一卡西鐵列車，曾經發生一D令我好深刻的事....


>>December 13, 2008 at 6:06:15 PM GMT+8

2008 年 12 月 11 日 星期四 【颳風】

令我...深刻的一刻


同女友好開心咁過左一日，雖然返早起身係辛苦
一點，但只要知道有個人會為你更早起身，幫你
準備好一切時，自己又會覺得..其實自己都唔係
太辛苦吧，今日有人向我講，佢話我女友Irene天
生母性好強，將來應該會係一個好既媽媽，哈哈
...怎麼樣無端端向我說這些呀﹖我們暫時還未有
小朋友呢......。不過遲D就...哈哈....

放工..女友今次調轉，到佢接我放工，到左交車的
站頭，不單止見到接我車的同事，仲有見到我女友，
傻傻咁坐左響長椅上，目光唔知望左去邊咁似的，
我估女友應該等左好耐兼且食左好耐風，凍到佢傻，
哈哈，不過女友一見到我交車時，佢又突然變得好精
靈，好鬼可愛....我其實最愛睇到就係佢呢個可愛
樣，十足十D小朋友好開心快樂的樣子咁..好抵死..

今日行超市，最令我深刻既就係，女友拿起兩盒士
多啤梨放響手上，舉起放在臉珠各一邊，正正遮住
個口，只係露出對眼、額頭既部分，跟住用好小朋
友既聲線問，『買邊盒好呀..?』如果..果一刻有用
相機影下，呢張相放響我銀包裡面，我諗我睇一次
心中就會笑一次，哈哈....其實我個女友都幾童真丫...

明天放假，約定女友去睇戲，我希望明天女友可以開
開心心和我過，其實我能夠拖住妳手，一齊行上長街
，我已經覺得很幸福，我真的無要求了，只要妳不要
離我而去，我可以為妳做的...我甘心為妳去做，仲有
呀...我真係有去背果張地方代號張紙架，下次好可以
抽問我架，係jet-lag我仲係唔係好計得到同記得到...
但我會比心機去記架喇...放心啦..!!

--------------------------------------------------------------------------------------
2008 年 12 月 12 日 星期五 【微冷】 凌晨

正話有個朋友向我說了番說話，我覺得我要比我女友清楚知道，我心是怎樣想....




Irene...我向住咁多人同妳講，我一定唔會離開妳，當我有足夠能力，我一定會向妳求婚，到果刻只是等妳說願意，往後的一切便交給妳手中，誓不會食言

>>2008年12月12日 Fri 0:27:38 (GMT+8)

>>December 12, 2008 at 6:23:07 PM GMT+8