2009 年 1 月 7 日 星期三 【乍雨乍晴】

今日同女友出街，女友講...個袋好重.....，奇怪係個袋除左
放化妝袋、披肩、縮骨遮、手電、鎖匙、銀包、工作證等等
外，基本上係冇咩野帶出街，咁點解會重呢...?我望望個袋知
點解咁重喇，除了以上仲有，綠茶一支、童星點心麵一包、
蕃茄百加滋二小包、梳打餅幾包、果汁糖一條....咁有咩可能
唔重呀，問到點解會有咁多小食，原來係上次Long haul之後
既剩餘零食，唉......更加比妳氣壞係要我一齊食，等妳唔好揹
咁重，小姐呀...我已經夠肥喇，還要比我肥下去嗎...?男人有飽
飽面好核突架......!!!卒之最後妳竟然響我不知不覺間食哂，我
懷疑係妳掉左吧......哈哈，但妳話食左....好吧...我信妳...，係妳
食哂，真係叻女呀....，食極都係肥塊臉，最叻係妳，更爆係回
答我...『哼....使乜講』，我真係哭笑不得.....!!回到家妳比呢段
野我睇....，其實我N年前已經睇過，我即管答下妳...滿足下妳.......

1.向新朋友介紹女友時，請摟著她的腰，而不是站在一旁用手指點。 女孩子真的會介意呢D嗎?
2.在街上遇見美女凝視時間不超過５秒，並迅速指出那位美女與她相比較的美中不足。 我冇咩急才喎..點迅速指出相比呢?
3.如果她做錯了事，心裏已經很難過，請主動承擔起你應該甚至不應該承擔的責任吧。 唉....咁都得..我都應該要做嗎??
4.聽女友話的男人才會有出息，所以，你要乖乖聽她的話。 我自問都好聽女友的說話..算係咁喇....
5.她可以欺負你，但你絕對不可以欺負她，因為她雖然欺負你， 但是每次有什麼好東西，她第一個想到的就是你！ 女友算是個理智和講道理的人，我亦相信有什麼好東西女友都會想起我吧....
6.要是她朝你哭，你要不厭其煩地哄她，直到她破涕為笑！我盡力啦.....
7.把她的照片帖到錢包，手機……一切經常看到的地方。 冇問題...我有咁做的...
8.離開她絕對不超過十天以上 佢唔離開我去咁遠已經好好喇......哈哈
9.在她的朋友面前，希望你可以表現得比平時更疼愛她和緊張她的樣子。 我會記住的....
10.大男人不表示霸道. 呢句唔多明白想講D咩
11.溫柔不等於沒主見。 呢句都唔多明白想講D咩
12.瀟灑不等於沒交代 呢句亦都唔多明白想講D咩
13.不要老是在她問“去那裏比較好”，“吃什麼”等等的時候說“隨便”， 這不等於是你在遷就她，只表示你沒有心思搭理她。我不擔心....女友對食既地方好熟悉....唔使我操心....
14．要經常對她說“我愛你”，否則她會假設你不愛她我相信女友唔會咁諗既....如果女友要求..要我每日講我不介意的
15．永遠不要在公眾場合對她呼呼吼吼又或是撇下她一人。 記憶中我冇咁做過....
16．她做錯事情的時候教訓她不要緊，最重要的是在那之後要哄她。 基本上我唔會主動去教訓女友...因為教訓後要哄她是一件好艱難的事
17．發脾氣時不要不理她，不要給時間她讓她冷靜，其實她完全不需要時間冷靜。 我知....以前領教過好多次...我知點做的...
18．可以陪自己的朋友，但一定要重色輕友。 唉....已經冇同自己朋友出過去玩好耐喇.....我已經被朋友標籤左重色輕友
19．她看動畫片，你不但不准笑話她，還要跟她一起看。 我睇得多過女友好多，佢反而陪我睇....
20．在她想你時，爭分奪秒地擠出時間與她約會 我會架喇.....
21．看她的眼神無比專注。 女友會問...我塊臉有野嗎...?之後就不斷望個粉盒鏡....
22．說話的語氣情深意長。 何謂情深意長...?
23．能做到客觀的得看到其他優秀的女孩，但主觀認為她才是最好的 總之最好果個咪係自己女友囉....夠主觀啦...
24．有女孩和你說話，你要拉著她的手，如果她恰巧不在旁邊，那麼請你跟她們保持距離。 哦...我知道喇...
25．過馬路的時候牽著她的手。 唔過馬路都已經拖住她手啦....
26．要懂得珍惜和她在一起的每分鐘。 我會架喇.....
27．就算再忙，每天都不忘打一個問候的電話。 咁呢個係男友應份的...我都覺得
28．要常常唱情歌給她聽。 我有五音不全喎...天氣凍...不想再冷病妳呀...
29．兩個人都有發火的權利，但不能同一天, 如果那一天她發火了，那你就不可以發火了。 我會記住架喇....
30．女友生活中不順心，你要循循善誘、幫忙分析，提出建設性方案若干。 我平時都有咁做丫....
31．要非常愛你的女友---她，堅決擁護女友的決定，服從女友的領導。 聽妳話嘛....我知喇......
32．留意其他女生不得超過５秒鐘，看同一女生累計不得超過５次。 哈......呢個有D難....去一次機場我肯定死九千次喇咁...
33．即使全世界的人都不相信她，你也要無條件相信她。因為她也會同樣對你。 咁作為男朋友...應份的...
34．她穿了好看的衣服，你要衷心讚美。 我句說話係陷阱....女友會反問..咁昨天我穿都不好啦即係.....?!!
35．與女友吵架每次陳述不得超過３分鐘，音量不得超過２０分貝。 我好少會主動吵架....息事寧人多
36．要加強鍛煉，強健身體,一口氣抱她上到五樓。 呢個世界有升降機架....傻才會這樣做....
37．在她心情遭透，蠻橫發脾氣的時候，抱抱她，而不是和她理論。 哦......知道喇....!!
38．希望不會出現手機沒電而她又沒有其他辦法聯繫到你的現象， 如果能頻頻主動打電話告訴她“我想你了”並隨時彙報行蹤則更好。應該的....無電的確唔係借口....向女友報到會令女友放心，我做得到...
39．她身上有很多缺點，她已經夠苦惱了，請不必隨時向她提醒。 向自己女友講佢缺點....那個男人一定是想找死吧...!!!
40．女友不講理是撒嬌而不是撒野。 呢個我好早好早已經深深體會....不講理和撒嬌係掛鉤的....
41．她所有的事情都好想跟你分享、雖然你不一定會明白但是希望你會裝做你在聽。 其實我都好鐘意聽女友既事，尤其係每次女友放工的時候，總會有點有趣奇怪事會告訴我...

答覆滿意嗎..?其實我真係答架，有諗過架，有D野我係認同的
，最簡單...女仔喊，分撒嬌既喊同唔係撒嬌真係喊，前者女仔
都係想人哄哄...所以達到目的便會收聲...之後又會冇事發生....
，後者，我真係唔想見到，如果係咁我真係方吋大亂，我真係
會唔知點做，其實有人問過我，點解我可以對女仔咁遷就，咁
妳要多謝我老豆，如果唔係佢當年少少野都同我阿媽嘈，家無
寧日，成日家變.....的話，我諗我都唔會咁遷就女仔，那時我媽
同我講，可能是呻啦，話其實只要哄一哄我便無事囉，係你老
豆唔識做，成日要面大男人，在家中有鬼人見到你哄個老婆丫，
死要臉.........!!!!那時我知道...我第時唔會行返我老豆條路，我細
個時亦有一日聽收音機，當時係阿鄭丹瑞做主持，佢當日講左單
新聞，係關於個老公打個老婆.....當時鄭丹瑞話，女人係生出來比
男人打架咩...女人生出來係比男人錫架嘛.......，其實呢句話都幾
深刻....，仲加上我老豆又係咁對阿媽....不過衰極都冇郁手，那時
我真係好清楚我對女朋友、老婆的方向態度，應該係點，我不敢
話自己很好，最低限度我滿意自己既表現架，講真..有其他女仔羨
慕自己女友有個好男友，其實....做男友既都好開心...滿足架....!!

>>January 8, 2009 at 7:09:35 PM GMT+8

2009 年 1 月 6 日 星期二 【晴】

婚莎....


今日放左工，去應約前女友食飯，開頭都有點唔
自然，一方面怕Irene會亂諗，話就話Irene比我去
，但內心係唔係，我真係唔知，另一方面又擔心前
女友會對我想講D咩，所以自己心情當時都幾憂心，
別人講，你唔去咪仲好.，唔使諗咁多擔心咁多.!!也
許吧，但始終都係朋友一場嘛，難道分開左大家就
要混路走嗎﹖所以我情願見一見佢....。去到餐廳見
到佢已經到左，大家都係講大家的近況，果然..她係
有男友，還在醫院做的，我諗我當時估的係冇錯，
但算吧，一切都不關我事了...。到佢問返我如何，我
如實答，她又冇咩反應，比我的感覺係佢好似一早已
經知咁...。問到佢為什麼不比錢供個妹讀書，佢話有
D好私人既原因，我估佢係唔想講我知，也無關係啦，
妳的財政..我冇興趣知道，供妳妹讀書，都係供唔係好
多年，我還有能力，況且當年我的確有話過，如果有咩
問題，我會供住比佢讀先，即使我們關係不是以前咁，但
我都會一樣對妳妹好的，話到尾..我都由佢讀小六睇住佢
升學的，我都想佢好...唔想比妳媽咪攪到佢一事無成.....。

返到家同Irene講返今日的事，看到Irene都冇咩唔開心，
我亦唔想暪她任何，我相信只要我如實講出，女友會體
諒我的.....。Irene今日自己出街，竟然去行婚紗鋪，取了
一些套餐宣傳單返來，原來女友想出去外國一齊影，其實
我都不知道Irene著起婚莎的樣會係點，但我影相的話，我
真係唔識笑的，點算好...?真係要跟妳學習...點樣笑嗎...??

笑容....也是妳的強項啊....真笑和假笑...妳都一樣可愛...哈哈....

>>January 7, 2009 at 3:35:28 PM GMT+8

2009 年 1 月 5 日 星期一 【微冷】

捱世界~


今日在家中和女友一起做飯，當然..我只是出現在
廚房吧，唔阻手阻腳已經幫左佢一大忙，女友炒菜
的時候，一路炒一路向我問，『你估我地會唔會有
機會吵交呢?我想了一陣...答，實會有既，睇下多定
少同埋邊個會逗返邊個吧，女友點點頭又問，你會
逗返我嗎如果真係嗌交...?我話...我諗多數我會既，因
為以前女友我都係咁，我對妳都會係咁....，女友又講
，其實我好容易開心好易逗..哈哈..!!!我問仲咩問埋呢
D問題呀..?問下去先知原來女友個朋友，同佢男朋友吵
左一獲好勁好勁既，起因係男方覺得女友返工已經唔
理佢，放工又要回家訓，又係唔理佢，最致命的一句係
男方講左『妳地D工咪又係笑下派下餐咁.......去到果邊
又玩又.....有幾辛苦...』，女方完全覺得男友完全唔諒解
自己，就係咁吵了一次好勁既........

我問...妳同我講是想話我知呢句話係唔可以亂講嗎....?女
友笑笑說，如果你真係咁向我講......我只會好傷心失望囉
，你好似睇唔起我地咁嘛，講下講下....飯做好了，臨開飯
前向女友講，放心啦，我唔會對妳咁既，睇妳每次返到香
港搭巴士都係訓，就知妳係一定一定好辛苦啦.....

吵架會不會呢....我不敢說，但一定唔會為呢D野而向妳發
髀氣囉.....，其實我都好想錫住妳架，我都想妳唔使做，在
家中坐定定做家務便算，舒舒服服咁過每一天，但對唔住
呀，我真係還未有咁既能力，妳我都要捱一捱世界先，應
承妳，總有一天會做真真正正的家庭主婦....

還有...Sorry呀....下次..我的事都會告訴妳，不再要的估估下
去擔心我....，等妳可以安心的工作....

>>January 6, 2009 at 3:50:28 PM GMT+8

2009 年 1 月 4 日 星期日 【炎熱】

我的天呀...!!!


我的天呀..!!!!點解我又返呢D更架.....咁都抽得中...我
唔要駕呢D線呀!!我今日帶定止嘔袋上車都得喇.....!!!
早知係咁，我唔問時間喇....!!

今日發覺自己冇帶腦返工，放車返站頭唔記得轉
返個Run number，雖然外邊人唔知係咩，但如果
唔好彩比阿sir見到.....變左架影子輕鐵的話..哈哈哈
，唔死都一身煩.....，慶幸....影子列車無驚無險.....
過左關，下一次我一定會記得，返左咁耐工都唔得
呢D野，真係笑大人個口，如果比埋D新人知道....無
地自容呀.....我仲使出黎行..?!!!

返到家，見到女友陪隻貓咪玩緊，似乎隻貓已經完完
全全咁唔記得左我，唉.........真抵死..!!!



>>January 5, 2009 at 3:37:48 PM GMT+8

2009 年 1 月 3 日 星期六 【微冷】

恐嚇


今日除左放工係做野之外，放工後整天都hea住
咁過，女友一早返左魚翅學堂，唔知又要上D咩
課，而我放左工佢都未放學。今早我問...其實有
冇必要成日上堂呢..?不過...魚翅一向都話安全至
上，又的確係既，事實上好少佢地意外既新聞，我
記得女友問過我假若一天有意外...我會點....?呢句
問題..點答呀?其實公司仲驚過妳啦，佢炒一炒會冇
左數以過億既錢喎，不要咁問我啦.....，好假設的問
題呀，我估香港唔會激到會有911掛...?女友又向我
講，在訓練期間，公司比左一段空難既片比佢地睇
，當然D人已經散哂...面目全非，佢話呢一段片當時
簡直係恐嚇佢地，暗示冇心理準備走執包袱回家.....
，之後女友有又向我講，其實我頸飾手鏈如果真係
唔好彩有空難的話，都可以靠呢D認到我吧....應該燒
唔爛既.....!!!嘩.......妳講到咁妳似嚇我多D喎.....!!!妳都
係去魚翅學堂聽書吧....記住唔好訓覺添呀.....

聽完我而家仲怕過妳.....!!

>>January 4, 2009 at 2:46:55 PM GMT+8

2009 年 1 月 2 日 星期五 【颳風】

頭痛....


今日整天早上都頭痛著，由細到大我頭痛得
好奇怪，每次只係痛那一個位置，是好明顯
感覺到痛的位置，曾經去過醫院檢查，但無
論係X-Ray、電腦掃瞄、磁力共振、甚至係
用核子放射檢查都查不多任何原因，醫生都
係話找不到病源，我曾幾何時都見過心理醫
生，懷疑我係過度緊張因此產生種種痛楚感
覺，但都係無效，自始....我只有拿著一著醫
生開的藥紙，響感覺到痛頭時便去買藥食，
但食完我次次都會手震.....連拿起杯水都會震
瀉，問醫生....又話正常....因為有副作用，但
止痛藥係一種好邪惡既藥物，你只好越食越
多，因為身體會適應隻藥物.......我已經成為呢
隻藥的晨犧牲品，每次我痛都要食....好辛苦...
我已經抑制自己唔去食，但有時真係痛苦難當
，點都要食兩粒先可以稍微止痛......，今次係
女友第一次見到我呢個痛苦樣，我知道一定嚇
壞左妳吧....!!但放心啦...我有覆診的，幸運既係
藥物還可幫到我，而且..我半年都要返入醫院檢
查一次，既然我照過咁多野都check唔到我有咩
事，我估我會無事既，不用對我咁緊張啊....，不
要再為我少少事都喊先得架，我還在呀.....傻瓜....!!

>>January 3, 2009 at 12:20:28 PM GMT+8

2009 年 1 月 1 日 星期四 【乍雨乍晴】

無心委屈了妳....

今日一早起身，女友就整好早餐等我起身，
拍醒叫我食，我名副其實係一個廢人，咩都
唔做，我真係無鬼用.....要自己最愛既另一半
掂咁凍既水，做早餐，雖然女友話,,唔緊要，
但我自己真係覺得自己好懶洋洋。

食過早點，女友就去換衫，又再問我著咩好
?難到女孩子真係覺得儀容係咁重要嗎?但聰
明既係懂得穿上手織的冷外套，白色的，有
點似學校著果D，今次精明左喇，著平底鞋..
哈哈，上次.....不用再說啦，辛苦自己......

我地就去搭西鐵轉東涌線再轉新渡輪，我地還
刻意地咁搭慢船，因為一來平之餘還可以感受
一下海風.....，去到長洲後見到我大伯果邊D仔
女，出名串到爆既大伯，我由細到大都唔鐘意
佢，就算年年都係封500蚊利是比我都係咁話，
其實只係哂自己有錢過我地吧....我真係好憎佢...
我情願唔收都唔想見到佢，在我家人經常哂自己
D仔女讀大學咩咩....乜乜,.....!!咁你而家做咩呀?
講到尾都係想踩下我.....!!今日仲要比佢有位入，
還向我背後向我阿"女麻"中傷我女友..加鹽加醋，
我一生人最痛恨既親戚就係呢個大伯，若果知
佢今日黎我一定唔會到，諗起都火起....，令到
Irene仲尷尬過上次。其實都唔知咩親戚黎架，
次次見我都要踩下我先安樂，你仔女讀到大學又
點..?出到黎又咪係打工，我憎死佢地.....!!!!!

搭船返中環的時候，女友向我講唔敢再過去，又
向我講你邊D人好恐怖，又向我講我下次唔想再
黎，唉......諗住今次可以好好地再帶Irene出來，
點知越攪越衰，我農曆新年真係冇眼睇，去到
都唔知又發生咩事，Irene...今日因為我同我大伯
的關係而委屈了妳，令妳難受......對唔住呀....!!!

>>January 2, 2009 at 3:21:42 PM GMT+8

2008 年 12 月 31 日 星期三 【乍雨乍晴】

食到嘔...哈哈...


踏入2009年喇，其實都冇咩特別事發生，今日只係
同女友去左食壽司，我地因為要換到張2009年的八
折咭，換咭條件係要食夠500蚊以上，但兩個人點食
到500蚊...?不過為左2009年可以食野有八折，今日我
地唔貴唔食...會飽肚既唔食，食迴轉最平都要食16蚊
先得，兩個人就係咁食..其實都幾折墮，夾硬食左558
蚊，我地最後都得到張咭喇，我和女友食到想嘔咁滯....
之後同佢去行千色店，見到糖果屋就走左入去夾糖，
同我講唔會夾好多，點知..每一個箱都夾少少，夾下
夾下就好多好多，成包都係...磅一磅要成42蚊，跟住
就一路行一路食，個口未停過，妳知嘛...好肥架..食咁
多..，不過....妳係有個包包臉先好睇既...咁就由妳食啦...
無論妳變成咩身材...我都會要妳架，其實我觀察左妳好
耐，妳無論點食，都係咁身形，妳Long Haul時帶果D
零食多到，唔講還以為妳走難去鬧飢荒地方的飢民呢....

明天我們大家都係放假，諗住明天去長洲再看看他們
，因為姑媽之前打過電話比我，話"女麻女麻"想見下D
孫仔孫女，叫我地得閒就返下去喇，我去我女友都會去，
女友只講很擔心明天會不會像上次一樣，是一個很不受
歡迎的人物，而家女友為明天無論在心理、著衫、;買什
麼、講什麼等等好多好多問題.....都緊張和擔心著，正話
個傻妹先著住明天去既衫裙鞋來回換左四五轉問我...OK
嘛..?你"女麻女麻"會唔會唔鍾意架﹖唉.....不過我真係好
憂心的準備到咁，仍然得唔到佢地既認同，給予妳冷冷
淡淡的反應，我怕又會令到妳唔開心，不過點都好啦，
佢地點對妳，我都會在妳旁.....，最大不了便拖著妳走....

今日發生一件唔係令我好鍾意的事情，我個我自己班
朋友食晏晝飯時，friend搭friend咁一齊去食，大家都
講開自己個女朋友，咁人地問到我，我都會答，佢地
問我女友做咩工，我話空姐呀...，有兩個同佢唔係好
熟既朋友，即刻笑笑口..嘩....，跟住搭多句話，淨係
套制服都值三舊水呀....，開頭..我唔係好get到佢地想
講D咩，但後來我知道佢想講既係咩後，講真....好想
過去打佢一身，雖然我不知道他有心還是無意，但兜
口兜面咁向我講.....算是什麼..?

>>January 1, 2009 at 6:41:37 PM GMT+8

2008 年 12 月 30 日 星期二 【乍雨乍晴】

2009年

要返通宵班，所以一早就同女友去左玩先，約
左女友班同學去酒樓打邊爐，當然，食完佢地
當然有節目啦，就係食完去打牌，而最恐怖既
係，為左節省佢地一陣既食物和飯品錢，在酒
樓佢地竟然將任飲的罐裝汽水，靜雞雞咁放入
自己既手袋，當然汽水唔係佢地唯一的目標啦，
仲鬼埋人地D烏東，真係睇到我眼都突埋，原來
買自己化妝品就多多錢都肯比，而呢D數就....最
爆係埋單時還問張單要咁貴咩，要求Check單...
，呀.............我真係想走先呀，妳地班人又食又鬼
，仲好意思Check單，女大真係好恐怖呀，最可悲
係女友都走私左三罐汽水響手袋，噢.....無眼睇呀....
。我就要返工先喇，我走先喇......!!唉......講比人聽
都冇人信，呢班女人係空姐.....似師奶多好多喎.....

上到元朗站去截車，月台上人山人海，往南昌方向
簡直多人到....好似平日返工繁忙時間咁，唉.眼望年
年人地有得玩...我就要返工，真係想放棄今日人工算
了吧，其實真係好想陪女友過第一個2009年的開始，
但已經冇機會，但駕車途中收到女友的短訊.....，到放
工返屋企的時候，女友還在朋友家，放工和女友一起
食過早餐便返屋企，就係咁...就過左我地既2009開始...

>>January 1, 2009 at 6:16:40 AM GMT+8

2008 年 12 月 30 日 星期二 【雷雨】

我2008年的回顧


一月
1月1日
陪前女友在湘湘家..一齊倒數.....5、4、3、2、1、新年快樂...........
1月7 日
前女友返新工，我陪佢一齊去醫院，研究最快搭車方法同埋行路方向
1月10日
前女友鬼殺咁嘈咁話以前公司出多左糧，來緊幾天要返去補鐘
1月16日
比阿Sir提名上重鐵，可能有幾會上去...但無知之數.....
1月20日
比人投訴話我人到月台唔開門....大概係話我不近人情吧.....
1月27日
那天第一次放平日假期，同前女友去左赤柱玩......幾開心的一天..

二月

2月6日
Chloe生日...一班朋友同佢去左Neway CEO....玩左接近3000蚊......仲係暫時呢生人最貴的一天唱K..!!
2月7日
年初一同前女友去長洲拜年.......個個都好鍚佢呀....尤其係我祖母呢.....
2月8日
年初二同前女友去阿婆、四個阿姨家中拜年.......利是當日係最多呢.....
2月14日
情人節....和前女友去左荃灣食野，因為冇訂檯....找左好多間餐廳先有得坐，揚言下年要訂檯...!!
2月23日
同前女友去小寶新居打邊爐，慶祝佢地新居入伙

三月

3月4日
前女友比病人投訴話佢抽血抽瘀左病人隻手，返來向我痛訴....唔係我既錯..!!
3月18日
我內定了"重鐵"，開始要狂讀1900EMU生涯，全英文....讀死我.......
3月 22日
同前女友為了錦田家的事嘈....最後我屈服了，理由係...我唔想再嘈...

四月

4月4日
和全部表弟妹食Pizza Hut......當日食野連禮物用左1478蚊......記事本我仲寫住『點解我會咁多表弟妹架?』
4月7日
開始狂讀本書....只知呢個月查字典...查到我死下死下，埋怨點解女友唔係人肉字典機..?
4月9日
返工....因有個阿媽同個女玩...詐出去離開車廂...媽在月台..女在車廂...，我唔知關門..走左，最後幸好找到母親..我都冇事。
4月21日
前女友買左個1480蚊既銀包...結果...當然我銀包糟殃啦......
4月27日
小寶生日，和前女友的姐妹及姐妹班男友一齊食飯，記得那天玩夜到要搭的士返錦田呢....

五月
5月5日
同阿媽慶祝生日，當日我前女友都有出席呀....
5月13日
WR SP1900 EMU Pass左.......從此可以兩邊走....
5月15日
晴天霹靂呀...我個私人日誌唔知點解、無端端、忽然之間.....，比人delete左，網主話我D資料已經唔存在喇..!!
5月22日
在屯門碼頭3號月台撞到個利是封...很多事都在呢日開始慢慢改變
5月29日
駕駕下車挍肚痛....頂唔住...昨天亂食野吧...Call上Occ....全世界知....勁樣衰..

六月
6月2日
第四次比阿Sir跟車，雖然唔係第一次，但每次都手心冒汗....但都無驚無險....
6月4日
陪前女友睇牙醫，佢果然好驚睇牙科呀....!!!
6月6日
首次做攪手...舊生會聚會，Irene出得多力，找到的同學都過半數...
6月15日
親眼見到客運助理同阿婆唇槍舌劍戰，阿婆話：『兩個站都要比錢，你地咪好發』....，我想話...阿婆我都要出糧架...!!!
6月22日
老豆生日，一家人出去食左餐飯，我同妹夾錢，好記得那天望到老豆....真係老左好多喇，我果然係個衰仔呀....哈..!!
6月29日
舊生會聚會，見返好多同學仔，有D已經做人阿媽....，當日大家都好開心，係一個成功聚會的開始..
6月30日
我個妹生日，買左個手袋比佢，佢開心到暈啦，阿媽點會肯買野比佢呀....!!

七月
7月3日
First Aid 考試....合格，又可以續牌....
7月8日
前女友幫我放血，買左好多護膚品，我一切盡在不言中....!!!!
7月16日
同雪梅姨一齊食飯，還是當我小朋友，一手拿張單去比錢......，在她眼中，我是長不大的.....
7月19日
同C4、成、火麒、阿毛、劉生劉太加埋佢個仔食飯，唉....人地條命生得好，做左人爸爸喇，我...?!!!
7月24日
第一次見到Irene喊.......我不知如何是好...，我平生最怕女孩子喊......
7月26日
陪著情緒不穩的Irene返國泰城，那次係首次比膊頭Irene倚靠著睡的，同日...我收到我細過愛聽的兒歌CD
7月30日
駕車時.....我關門夾到人手指，好彩無事。同日，我跟Irene去左國泰城裡面，國泰城內部真係地大脈搏....咩都有..!!


八月
8月4日
駕車時撞死隻雀仔，同日有同事炒左車...!!!
8月5日
去左動漫展，迫人到死，約左小伊見一見面，第一次睇到佢Cosplay的打扮..哈哈....，Irene當日都有陪我去，那天和Irene吹著海風回程，印象深刻...
8月12日
陪前女友細妹找學校，趕來趕去終於都報到名，自己比住5000蚊出來比佢讀書....因為佢阿媽唔比錢佢讀，重男輕女..太可惡喇...
8月17日
去Food Expo行，同前女友行到隻狗咁，搭的士返錦田比司機厄錢.........!!!!
8月21日
比個77k巴士路線既司機，因我訓著冇下車，就咁困左我車內，比外邊D人見到瘀到爆.......
8月27日
同個妹出街半途放我飛機，之後約左Irene行街，買Sanrio禮物送M巾做贈品，比Irene笑到我死.....可惡。.

九月
9月6日
探嘉賢BB，那時還與前女友計劃生BB的事...
9月11日
呢日病到死下死下咁.......慘絕人寰的經歷.......
9月13日
前女友無情情為左D安排課程的事，向我發脾氣，自己事唔做去賴我問題......感情開始薄弱了
9月17日
為左趕住接Irene，著住制服去機場，中途遇到人問路，語言不靈光，Irene及時救我....我果陣覺得Irene好叻女...
9月21日
前女友因為排隊搭車，冇叫佢上車又同我嘈交.......為什麼會咁...那時百思不得其解...?
9月23日
前女友為左一隻雞亦又同我嘈......究竟發生咩事...天曉得..!!!!
9月27日
我打爛左隻碗...又可以同我嘈......我到底做錯咩事....?

十月
10月1 日
貨不對辦......
『拍拖時認識妳的.那個叫"辦"』，『同居後認識妳的.那個叫"貨"』....她為什麼會變成咁...?我唔明白...!!!
10月3日
差D炒車，或多或少都係心情被前女友攪成咁，差一呎....我就撞埋去喇....，但我滿意自己的應變...
10月7日
Irene記得我舊曆生日，我收到她的禮物，我好感動，那一刻很想緊緊的抱著Irene.....因為前女友對我好我冷淡...
10月12日
很想找阿慧訴苦，舊女友變成另一個人咁，我唔知點好....
10月16日
我會她....分手了，無想像中咁痛苦，反而覺得解脫....
10月17日
我和Irene一齊......Irene成為我女朋友....
10月19日
和Irene第一餐住家飯......落手做壽司.....同日發覺我原來係唔識做飯的.......完全在Irene面前失敗....
10月25日
我生日，Irene同日病左，但仍然陪我去迪欣湖....過Irene和我的第一個生日......十分難忘....!!
10月29日
隻肥貓咪要去Irene家過夜當考試，決定未來佢住邊，好彩Pass左......

十一月
11月5日
有乘客響我車度噴血又嘔.........我臭死左..!!!
11月10日
Irene發燒38.8度，辛苦死女友喇，我果時開始知..妳係一個大藥煲.....
11月13日
我整壞部洗衣機...好驚比女友趕出街.....因為自知做左破壞王....!!
11月16日
見到Irene撩小妹妹玩，望到Irene童真可愛的一面，我覺得我越來越愛妳....
11月22日
女友為左我一句話，連夜趕蛋糕，望住個蛋糕好心痛.....我點解要咁講...??
11月25日
自私的我..... Promise you........新年前和妳見我家長...!!!!!

十二月
12月1日
我發開口夢，講左D說話令到Irene好傷心，第一次見女友喊得咁厲害.....
12月3日
可能因發開口夢事件，女友問了我一件..我從來冇預計過女友問的問題......我不識反應...呆了.....見到女友失望的眼神....
12月4日
我怕女友嬲我...離開我，我整天冇食飯，晚上接女友機，原來一切都是我問題，女友比我大方，那天我叫左Irene做.....老婆...
12月5日
我承認Irene要向所有親人...認識Irene...我呢個女朋友.....
12月7日
見家長......一齊順利，只是老豆邊D人唔係太接受......但無論如何，我要定Irene的.......
12月10日
收到Irene的奇怪Message『你可以對我唔好，但你唔可以拋掉我』.......我呆若木雞...為什麼要咁苛刻自己...?
12月13日
帶病的女友.....去睇完戲，食花雕雞後，臉紅卜卜的，可愛死喇......
12月18日
我地交換聖誕禮物...女友送我一個銀包...我送她一條手鏈.....
12月21日
聖誕節舊生會聚會，比佢地玩死，要我當住咁多人錫我女友......好尷尬呀...
12月23日
我病到傻....多得女友唔訓覺咁照顧........多得女友煲粥我食.....
12月25日
舊女友Send短訊比我，我向誠實的向女友一五一十咁道出一切，同時.我向Irene作出不會離開她的承諾...
12月26日
女友因每月的生理病..痛到要睇急症，還要逗才肯打針食藥
12月28日
不知前女友是否出現問題，她的二妹要向我借錢交學費，女友叫我想做便做，我再次承諾我不會離開Irene
12月30日
打呢版我2008年的回顧，打左我差不多三個鐘.....終於打完了合共3038個中文字，但打落先發覺我呢年
發生不少事，有開心和唔開心......明天才打埋12月31的日誌，其實而家已經係31號了.....，要訓喇，我
雖然明天不用返早....但我真的倦喇....!!!

>>December 30, 2008 at 8:36:42 PM GMT+8