2009 年 1 月 26 日 星期一 【乍雨乍晴】

發錢寒


唉....早午晚...唔係食年榚、蘿蔔榚、芋頭榚，想唔肥都幾
難，尤其係蘿蔔榚..一食就停唔到，要食到飽先肯停，年
榚又油淋淋咁，仲係咁食食食......食冇停口，我食完又唔使
郁先攞命呀，肥死喇今鋪一定。

今日返工好鬼煩，開中部唔識關實門既車，每一個站都
要重覆開關門的動作，撞正要對門拍得實先得，每個站
都要阻我一分鐘或以上，在車上不停咁重覆『請小心車
門Plesse mind the door......do do do do do do do do.....嘭..!!!!』又
開門重覆以上.....我係客..我真係想立即肢解個司機，咁鬼
煩係咁重播廣播.....!!!!只不過..我都唔想架...，我都好鬼煩，
咁變相比左好多機會比D人上車，擠到架車滿哂人，我又
驚成日開關門會夾到人喎，咁我就無辜喇.....，最後都安
全到站，收車返去維修.....完滿解決事件.....!!

今日收到好多同事既利是，有二十七封利是，哈哈，直到
年初二，我的進帳都不錯呀，數下數下都過左千五蚊喇，
還有D親戚未比我，我相信今年可以過二千蚊，果然係橫財
就手呀，2009年係個好的開始，收利是個勢要保持到年十五
先好呀...!!!自己真係發錢寒喇，無法喇...我冇幾多年可以收利
是喇，趁而家有得收，我真係不客氣喇....各方的親朋好友.....
請原諒我咁市檜兼發錢寒啦.....!!



.

>>January 27, 2009 at 3:51:40 PM GMT+8

2009 年 1 月 25 日 星期日 【乍雨乍晴】

順利過渡


訓醒之後已經係下午兩點幾喇，Irene一起身就叫好
口乾，好想飲水.....，是飲完酒後的side effect吧...!!!
飲完一大杯水，之後裝身，女友肯陪我出去多一次
，去到都成五點半，年初一第一時間向他們呢一班
長輩拜年，在航程中，女友主動向我講會知怎樣，
畢竟都不是第一次，有哂心理準備會很難受，去到
目的的我地去左買送禮用品，買左一小盒的燕窩，其
實唔係好貴，但為了討好他們，我們都去嘗試，去到
姑媽家中，已經好多人，可以話係人齊，我地只係接
利是已經每人有30幾封，但今次大家都好似冇咩咁，
無左上次果種惡頂的臉相，而姑媽都肯比利是同時祝
賀我們，而"女麻女麻"今次身子欠佳，無到姑媽家中，
Irene主動和我上老人院探她，雖然....無前女友咁熱情的
對待，但"女麻女麻"都終於同Irene講說話，"女麻女麻"的
語言唔係純正廣東話，語言帶鄉音，有時連我都唔明白講
咩，但我今日發覺，Irene反而懂聽得多過我，可能係Irene
工作上鍛鍊返來的技巧吧，今次"女麻女麻"行路時，亦都
肯比Irene扶著她，都叫鬆一口氣吧，去到食晚飯，共開了
三枱，慶幸可以和大伯分枱坐，我同Irene冇向佢正接交鋒
，少左一事...大家冇發生任何事，係除了比利是和他講聲
多謝....冇下一句了。我們呢枱主要係"女麻女麻"和我們呢班
孫仔孫女坐，在大家同咁上下年齡溝通，大家都好開心，
其實我地呢一代跟本冇話要邊個叻過邊個，是佢地攪到我
地在佢到面前"冇野好講"......，大家都係講下自己近況、做
D咩、點識自己另一半等等話題，而"女麻女麻"身在我們呢
枱，我地知道...其實"女麻女麻"看到我們呢班孫...已經好開心，
"女麻女麻"年年都講冇下一年囉，今年正話佢又咁講，唉....
大吉利是呀........唔好亂講啦...!!!其實咁多個孫中，"女麻女麻"
係最錫我的，因為小時候係"女麻女麻"帶大我的，所以感情
幾好，無奈我阿媽同佢D關係極度惡劣下，我要在我阿媽面
前要對"女麻女麻"冷淡點，我都唔知點解我阿媽唔鐘意我陪
"女麻女麻"一齊，但始終係阿媽，我兩者要取出平衡，在咩時
候要對邊個好D....人要學得好圓滑，其實唔知係唔係咁樣，當
年我在Office打工時，辦公室政治對我起唔到作用，因我個人一
定可以縱橫兩邊，在兩邊不妥的人中...我去邊去有計傾，哈哈...。
說返呢一頓晚飯，大表姐表哥問我，今次還有冇單單打打我女
友，我話冇呀......，原來之前大表姐表哥話過我姑媽唔好咁對
我地，事先替我們講左好多好多好說話，今次多得他們我先會
咁順利過關呀...很感激呀....!!!

好了...食完飯我們便走，我們大家坐同一班船，表兄弟姊妹我
們都會有計傾，說說笑笑，不經不覺到左中環，今次他們搭巴
士，而我和女友追尾班西鐵.....在西鐵上，我們拆睇利是D銀碼，
姑媽長輩給Irene的都係一百蚊，而自大闊綽乞人憎的大伯還給
我們各500蚊，而其他係50蚊多，20較少，10蚊紙未出見住暫時
，其實我不在乎錢要多少，而係他們肯比呢個數字即係表示佢
肯承認我女友，因為前女友的利是銀碼都係和Irene相同，今年
還多左一封500蚊的.....，今次拜年比想像中順利好多好多倍....
，Irene心情好左好多，起碼回程識得笑嘛，希望以後都可以咁
順利便好喇，我知道還要時間等他們接受我女友...我們會耐心
等的.....

最後希望"女麻女麻"還有下一個十年再十年，我都希望"女麻女麻"
可以抱下我們的孩子呀......

>>January 26, 2009 at 7:39:25 PM GMT+8

2009 年 1 月 24 日 星期六 【乍雨乍晴】

宿醉未醒的女友


返左一晚工，倦得我要命，不過都可憐我放我一日假
，其實初一二三係有班湧躉愛返工的，當中我在內啦
，哈哈...因為大家都向錢看嘛。年三十晚我無陪到女友
，女友都冇出去玩，點解...?因為D朋友來到反轉我屋企
嘛....唉，最令我意外係好少會飲酒的女友，昨晚都有飲
，而我諗佢諗得應該唔少，見佢在訓在沙發上，好明顯
是撻左落沙發...頂唔住起唔到身咁坐住訓，而頭就倚在
沙發扶手旁，怪唔知出面打電話比女友會唔接啦....唉..!!
醉成咁....連自己姓咩都唔會知。

唔想佢訓得咁唔舒服，搖佢冇咩反應，拍打佢先識得應
一應我，叫佢返房訓好嗎...?佢答"你返黎喇?"，扶她到床
訓期間，趁她有點意識我問佢，"妳咁樣..一陣點出去呀?"
女友答..."我唔想去....我想訓覺"!!!我不知道她是不是刻意飲
咁多，而去避唔想去的地方，如果真係為左咁，而去攪到
自己咁，我又唔忍心叫她去，因為一個人唔想做的事，你
要佢去做，將心比己，自己一定係咁開心，不過離出去的
時間尚早，計時間應該都醒到的，到時先再問多次佢意願
如何吧...!!

出到去收拾殘局，其實亂又唔係話好亂，只係地下有D食物
碎，枱上啤酒罐、三支梅酒樽、麻雀枱未拾好，咕O臣放到
一地係，廚房亂左吧，我都係執左半小時就清潔好(我終於
都有D用，識執屋喇今次)，入到房見到訓著，摸摸她手，
很冰冷，開左部暖風機給她，始終女友係個好怕好怕好怕凍
的人....!!

決定了，如果女友真係唔想去，便唔去喇，找天我放假而女友
返工，我先自己去吧!!!正話阿梅打來，問Irene有冇事，原來阿梅
係最後走的一個，我先知原來係有人睇住她，計時間我估阿悔走
左唔夠二十分鐘，我便返到來，而從她口中知，女友係嘔過，飲
得最多亦都係女友，唉.....平日好少會飲咁大，今日一反常態，我
估女友心想什麼吧大概.....!!!望著宿醉未醒的她，似是左右為難而
又想不到方法又找不到借口，才會咁做，話到尾都係我攪到女友
咁.......唉..!!

酒醉未醒的她，訓著時都咁討人喜歡，忍不住親親她，哈哈...
原諒我咁啦......當係給我執屋的獎勵好嗎?

>>January 26, 2009 at 12:46:56 AM GMT+8

2009 年 1 月 23 日 星期五 【乍雨乍晴】

來年...


第一次同Irene得年宵，足足行左三個場不特止，我地仲行
埋沙田市廣場、屯門市廣場、APM、其實女友仲未夠，仲
要話去朗豪坊，但我真係唔得喇，最終都冇去到朗豪坊，
真係要感激女友可以為我放棄唔行，因為我已經行到腳都
斷，行左咁多地方，買左好多東西，主要都係女友的衫褲
鞋，女仔始終都係女仔，鐘意換季，更何況係新年，梗係
大條道理要買買買啦，我自己本身對行街冇咩興趣，所以
買衫過年呢D事，細個時...阿媽買，而家就女朋友買，哈哈
，我好似冇個女性響身邊就會生存唔到咁，講真..我都幾倚
賴人，好似而家咁，連電話費都懶得去交，全部都係Irene攪
掂，家中的水電煤，我完全唔知係交幾多幾錢，和Irene一齊
我體內的懶根...係毫無保留地盡現......我成日話要返工嘛，其
實女友都係要返工，我唔郁只係去找藉口吧.....!!我真係太過
份喇，人神共憤及天怒人怨指數係10粒星星..，Irene..妳打死
我吧....!!!

我懶而其中一個藉口係，尾龍骨有點痛，其實呢個真係事實，
唔知幾時，有一日返工，響窄小的駕駛室內，我唔小心咁一
個轉身，就撞到條骨，開初真係唔覺痛，但過左幾日後就開
始穩穩作痛，直到而家係一掂佢就痛，大力D坐..果一下動作
又會痛到我彈返起身，真係好鬼煩，搵食真係..唉...就係為兩
餐咩都制，但當我辛苦時我會諗，她都為我們將來辛苦工作
中，辛苦不止我一個，我咁諗就會好甘心工作，如果有人問
我目標係咩，我會話"儲錢結婚"，我要錢呀......而且養一個BB
還要好多錢做Backup，我自己而家真係好吃力，兩個人搵錢
都唔係好足夠.....點算好...?要比幸福人談可容易....，但點都好
，我點都要2010年前娶我女朋友.....!!

新既一年，我要努力比心機，我要兌現承諾Irene的事，但我會
聽話，駕車要安全，唔可以出意外，我知女友每早晚都會祈禱
，雖然我無什麼的信仰，但當我知女友係為我的，我都會好開
心，因為我感覺到響每一方面，Irene都會好好咁為我，我有妳
的關心，還可以要求什麼..?我很滿足了.....

>>January 24, 2009 at 2:43:22 PM GMT+8

2009 年 1 月 22 日 星期四 【颳風】

三個女仔的戰鬥能力...


夜晚，約左女友同埋佢三個同學仔食飯，諗左好耐決定
去元朗食壽司，我地四人一齊由屯門搭西鐵到到朗屏站
時，車門一打開有個女人推住架孖仔用既BB車，都幾
大部下架車，就由車廂推出月台，可能係部車大部而且
又咁o岩個BB車個車轆卡住響個月台同車廂之間的空隙中
，唔上唔落，咁個女人又冇咩力，推極都推唔到，呢個
時候有個中年男人就比呢架車Click到，佢唔幫手之餘仲
罵個女人，好明顯個女人係怕左佢，唔多敢出聲，而個
男人都唔見肯罷休..係咁鬧，鬧都不特止，仲要阻住車門，
可能司機又睇唔到，呢個時候車門連幕門一齊關，夾住
架BB車，但個男人仲係咁鬧，女友三人看不過眼便上去
幫手推返部車，我亦都幫手推，男人仍然係咁鬧，結果
三人口戰，最後BB車我整到出來，可以推得返，那邊廂
仲係嘈緊，三個女仔+加上受害人VS一個男人，男人見到
唔夠班女人來，便想走(我睇佢個款似)，但今次輪到我班
女仔唔比佢走，三人圍住一個男人鬧......最後攪到有職員
調停....唉....!!班女仔要佢向個女人道歉，男人不敵咁多女
人，焗住就範，面黑黑..黑到想打人咁滯，轉身就走，女
友佢地最後陪佢出埋閘，我地由朗屏行去元朗，我好無辜
呀...!!!明明唔使行架嘛...!!要我行出元朗..我會死架...!!!

再一次證明唔可以睇少女人的能力，要口舌之爭，女人一定
會係嬴家，個男人本身都冇咁佔下風，佢衰在係咁講粗口，
在港鐵範圍講粗口可大可少呀，女友就用呢點捉住佢係咁打，
真係開眼界，原來女友惡起上來都唔係人咁品，呢件事我覺
得個男人係錯，但好似小題大做D，食飯時問佢地點解可以突
然咁兇悍，佢地答案係"發洩"，將平日返工比人鬧唔可以出聲的
氣，一次過爆佢個男人度，唉....個男人碰正佢地三個都唔好彩
喇.....

成件事我除左幫手推返架車之外，我都係做旁觀錄音者，呢件
時又証明..女人係唔得罪得，一旦得罪左佢地，一定冇好日子過
，噢......Irene妳真係有時都幾惡死，睇...睇..睇...唔..唔....出...出!!!!
我開始識驚喇....!!!

不過....那個男人真係好無品，女人都好鬧..?!!仲要在公眾地方
，呢條粉皮真係影衰哂D男人，我鬼唔望佢過唔到年，橫死街
頭，因為我見到都好想打佢，見到佢個樣仲理直氣壯咁，一D
都唔大方....好賤....賤到無人有....

>>January 23, 2009 at 2:17:42 PM GMT+8

2009 年 1 月 21 日 星期三 【炎熱】


過:肥"年


唔知今日發生咁事，可能返早未訓醒，放工後，去
左青衣買完少少左之後，便搭東涌線去南昌，我在
月台等左8分鐘，到列車來到我先知，我等錯相反
方向的列車，在月台上明明聽到廣播：『往東涌列
車即將到達，請小心月台幕門.............』，我還傻下
傻下的等佢開車門後，我先驚醒我等錯車，都好..我
仲未上車，一上左車便要去欣澳先有得落，來回都
唔知浪費幾多時間呀咁，但都算係咁，落去下一層月
台等香港線都係兩分鐘，唉......算吧....自己豬唔關人
事，講起...青衣站對我來講都係不祥之地，比人查完
票又等錯車...，風水唔多好啊..!!!

女友stand by完畢，無驚無險，傻瓜心情輕鬆左好多，
再唔使等個兇鈴，可能係開心的原因，傻瓜又開始在
廚房攪攪攪.....，為左唔阻住女友整餅，我都好識做，
就係等食，間中幫佢影相做食譜.....，今日女友整朱古
力慕司粟子蛋糕，女友話比上次個容易整，但我就覺
得今次已經好煩，如果佢果今次易整，咁上次果個蛋
糕咪......!!!不敢想像喇....，但係女友似乎好鍾意入廚房
，見親佢做每一件食物都好有心機，就算平時煮飯都
係咁...好開心的....，我覺得當女友好比心機..全心全意
在煮野食的樣子，真係好吸引呀，感覺係好似女仔話
男友好努力以赴做事的樣子一樣，不過，我今次倒轉
來形容女友吧...!!!

當完成品出來了，真係好靚，唔望住她做，還以為買
返來添....，其實新年在即，女友已經整左好多蘿蔔榚
，仲有兩盤椰汁年榚，真係有排食，體重像火箭升空
般咁向上飆升，腰圍像被吹緊氣的汽球一樣不斷漲大，
噢......肥死喇....!!!跟妳的都肥左喇，貓咪都係...肥左..!!!

好喇....差不多農曆新年喇，往年係無憂無慮去逗利是
，但今年有點兒擔心，好怕好怕Irene會唔開心，如果
又係咁比說話佢聽、比臉色佢睇，我便拖Irene走，到
此一遊便算喇，就當我怕左佢地，所以你過去都唔使怕
，有咩事我都會同妳一齊........走!! 唔使驚呀!!!




呢一個係餅底喎...唔講我真係唔知係囉!!


海綿蛋糕夾心??唔講真係唔知..!!


朱古力栗子mousse蛋糕雛型


可可粉鋪面..


加上栗子蓉..


再加上少少生果


做好了朱古力片來圍蛋糕邊


再灑上一點糖霜....完成


>>January 22, 2009 at 6:28:29 PM GMT+8

2009 年 1 月 20 日 星期二 【炎熱】

不打自己人..?


今日同我妹、女友出街，咁巧合阿妹張八達通冇錢
，我主動問我妹比張八達通我幫佢入錢啦，入完錢
，我又唔記得比返張八達通個妹，就張佢放左入銀包
，唉.....事情就發生喇，咁我銀包就有兩張八達通啦，
咁入地鐵青衣站閘口，我嘟八達通，一過便過左我妹
張八達通，自己都冇留意，照入閘，但我妹果張係學
生八達通，我入閘都唔夠五步就有兩個人叫停我，向
我查車票，其實我還不知道發生咩事，後來我先知自
己用錯學生八達通，比人攪左一大輪....唉......我又唔好
意思話係自己同事，就唯有由佢查我啦，等佢自己發現
吧，最後我當然冇事啦，但比人望住查票真係有點兒那
個，不過好在兩位都有禮貌，後來知道一場誤會就大家
笑笑口....其實佢兩個大概係笑我白痴吧....!!!最後和平散去....。

今次係我人生第一次比人響地鐵查票，講真....覺得幾得
意，可能知自己一定冇事啦，亦都比我知到原來傳說中
的便裝，響每一個站某一D時間便會出現，因為今日問過
佢地，所以要坐地鐵冒險號係比輕鐵冒險號危險，當然，
最危險係東鐵的頭等啦，接近九成機會係有人查票，要坐
冒險號的話要看時間小心小心呀.....!!

返到家比返張八達通比我妹...唉，呢張野真係麻煩，我幫妳
入左300蚊，仲要比人查.....，將件事話比女友知，佢不單止
冇同情我還話我抵死.......自己人打自己人.....!!

Irene...妳真係冇同情心呀..............................唯獨對我.....!!!唉...
好鬼心淡.......

>>January 21, 2009 at 2:21:23 PM GMT+8

2009 年 1 月 19 日 星期一 【炎熱】

什麼叫..接龍??今天我知道了..


今日和女友出買notebook，原因係而家出左D好細部，
好迷你既款，而呢D細細部正合Irene出Trip用，以後
可以唔使拿住部大牛龜喇，咁拉suitcase都輕好多啦
。自此之後個傻豬可以唔使抽咁大部機咁辛苦喇...!

去到豐澤，見到好多款式既，女友想要部顏色特別少
少的，所以佢睇中部粉紅色機款，望到Irene眼神，離
不開呢部，我已經知道佢一定係買呢部，女友選擇野，
比其他女仔不同的係，佢買野方向好清晰的，不會左睇
右睇都唔知買咩咁情況出現....，在女仔方面呢一個性
格，好少女仔會有，可能係佢天生係咁，人性格係果斷
一點，但為人脆弱些少，今日我問她，妳返工比客鬧，
會不會唔開心，會想喊架﹖女友話，開初做會有，但做
得多就會習慣比人鬧，師姐仲教佢地自得其樂，玩客鬧
人的接龍(吹漲=.=)，即係個客鬧你...牛肉飯都冇呀有冇攪
錯....佢地就會接...牛肉飯都冇..個冇呀..冇飯比你食個食呀
...食屎啦你去個去呀...去死啦個啦呀....拉你連人帶椅
扔你出飛機個機呀.....咁接下去.........!!!其實有時聽女友佢
地班Crew講呢D真係會笑死架....，加上女友D表情，唔
想笑真係好難....!!!再問下去....點解妳可以成日向我喊架..?
『你點同其他人..!!因為妳會哄我囉...!!!我唔會向你好似返
工咁"假笑"，我向你全部是真的，開心唔開心我想你知道，
但不知道我對著你便會很容易出眼淚...，係對你先係咁，其
他人點講我都可以忍受得到，唯獨你我最直接.......。』其實
我都深知女友不是喊....只係扭計，我覺得女友算係容易哄的
女孩子喇，天下間我相信冇一個女仔唔想自己個男友對佢好
吧....是嗎...?而哄是一個最直接而且係女孩子最接受的方法吧。

明天女友唔知要唔要開工，仲要Stand by中，唔係，應該話
下一分鐘Crew Contral會唔會打電話發出壞消息比你知道
，如果有..唯有返工冇計啦，係咪....?電話一響，喂!!!!親愛的
倒楣鬼，是妳喇，請你45mins內趕到魚翅城報到.........，今次
係飛超級黃金大爛班........算妳黑喇...嘩哈哈哈..........，我一定
嫌命長吧，Irene要我死得很難看....一定會...!!!!!

Irene呀，你知嘛，而家的我反而擔心響新年我唔知點帶你
去好，唔去又會比人話冇禮貌，但去我又怕你會唔開心，
咁....我應該點做先好呢?如果我要妳去多次..妳肯唔肯呀...?但
若果真係唔想去，我唔會夾硬要妳去的，我唔想妳難做、難
堪，我情願比人話冇禮貌都唔想妳唔開心多一次...。

>>January 20, 2009 at 3:22:36 PM GMT+8

2009 年 1 月 18 日 星期日 【炎熱】

有關我的16件事


今日其實冇咩事發生，所以我埋keyboard都唔知打d咩
，其實我係想今日唔打日誌，但唔打總係有件事冇做到
咁，邊身好唔舒服，好吧，怎麼都好打點字上去吧....

在Facebook流行了一種有趣的玩意，就係如果比人tag中
左，就要自己介紹自己16件有關自己既事，等其實人認識
得你更多....

1..由細到大我都好想有個家姐或者阿哥Care我，我好怕悶
，所以我好細過就成日同媽媽講，我想有多個人陪我，最
後阿媽都生左個妹陪我，而家大個左，我都係好怕寂寞的，
如果有朋友唔找我，我會諗係唔係我得罪左人呢...比較神經
質的，原諒我有咁既缺點吧...

2.我係一個散慢的人，做事好hea，只不過當我有個目標，我
會千方百計要做到它，我份人有時可以話無所不用其極....

3.有朋友話我係一個喜怒不形於色的人，諗下諗下，其實都講
得對的，因為我對一個人不滿，我還可以搭住他肩膀，比人感覺
係好好朋友，內心其實已經詛咒到你暈....

4.我係一個人對我好，我對會返人好的人，相反你對我差，我會
一百倍響無聲無色咁奉還....

5.我係一個對錢冇咁執著的人，錢財身外物係我其中一個格言，
當然，如果冇情情咁唔見錢，我都會鬼殺咁嘈，但我會好快好快
冇事.....，錢對我來說是一件不重要的事。

6.我喜歡幫朋友，尤其係別人財政出現問題，其實點解我會咁做
係，我讀小學果陣，見到同學有錢買野食，而我冇，最記得有一
次，應該係讀小二的時候，我買左一支2蚊的大可樂，買完在人群
出來後就唔見左，我當埸痛哭，因為冇得飲汽水，你可知道當年飲
汽水係一件大事呀，冇左錢又冇汽水，果陣有個同學借錢比我再買
過，我覺得佢好好人，到明天我還錢時，我給他後，佢反問我仲有
冇錢買野食呀?我唔出聲，之後...佢就收左我一蚊，另外一個一蚊係
當佢請我飲，我真係好感動呀......，自始..我見有朋友財政有難我好多
時都會主動出聲，因為我試過冇錢而又等錢救命的滋味，而開口問人
又係一件好困難的事，所以我大個左，我習慣會主動去幫人，而我呢
位同學就係"司俊"，直到現在我們還有聯絡呢.....

7.我係一個好遷就女仔的人，如果同一時間有一男一女要幫，我係會
幫女仔先，點解...?其實有段故的，有興趣知就問我啦....哈哈

8.如果對方係我女朋友，更加不用說啦，一定會將她排到頭一二位的。

9.我係算多朋友的人，如果問我有冇敵人?其實在我字典中﹐世界上係冇
絕對的敵人，只會有永遠的朋友，因為唔開心的事，會隨著時間沖淡，
但開心快樂的事，你會一世記在心中，而且我好細過已經知道"多一個朋
友..少一個敵人"的道理....

10. 我係一個錯一次，唔會再下一次都錯同一件事的人，我會成日同自己
講，再冇下次，當然有時人生路係會崎嶇少少，介唔使都會重覆犯錯，但
事係我一定會好認真反省....

11.我好唔甘心，在我家族中，無論係阿媽或老豆方面的人，我成日怨自
己出生係一個窮家庭，我記得有一次比人笑我連飛機都未坐過，我家中
冇錢，之後我發誓我點都要在我取得成人身分證後，我點都要坐一次飛
機，最終我都實現到，但我實現左呢個夢想後，好記得我捱每一天一個
香腸包的日子，足足捱左兩個幾月....，但我不後悔....!!!

12.我好相信世上有一個circle，就係當上天拿走你一樣野，同一時間佢會
比返一件事作補償，即係別人講的"雖然關了一扇門，但會開返一扇窗比
你"，我以前成日都怨自己點解會有呢一個遺傳病，但亦都係咁，在醫院
我認識好多到姑娘，有Ｄ還有聯絡的，咁即係上天比返好多朋友比我啦!!

13.我係一個對某一件事好討厭到極點的人，如果發生左冇好的解釋，我
係會內心好嬲，到呢個人印象會極差，呢件事就係唔接我電話，我覺得
手提的發明係大家聯繫大家變得更親密的工具......，呢一個真係希望大家
原諒我呢個自私...

14.我尚算係一個樂觀的人，其實我以前係好悲觀的，但自從那件事後我
就改變了，我記得當年我入左醫院，對面床有個阿伯，佢一個鐘頭前還
問我食唔食三文治，一個鐘後佢就去左，果刻我覺得人生好兒戲，原來人
生真係會唔知下一秒的事，可能我明天便會死，為什麼我要苦口苦臉過日
子呢?人生應該要開心過的，有時諗..我點解會出生在香港咁幸運，我竟然
可以出生在一個咁和平的社會，有得食有得住，原來呢一D無形態的珍貴
事物真係好值得我們去珍惜和樂觀美麗看.....當然有時悲觀的態度係冇可
厚非的，但我唔會把呢一個悲觀維持好長的時間.....，有人話﹕做物者點
解要把人的眼睛放在前面..?因為人要向前看嘛....，其實又真係有道理架。

15.我而家的目標係要儲錢，我要響呢兩年內娶我女友Irene....，我應承過
Irene好多好多事，我承諾過一定要為Irene做好，我還給了Irene一個終身
的承諾，有一日Irene問我，有得選擇你想我同你邊個離世先，我答...妳
囉，如果我去先，我知道Irene一定會好傷心同寂寞，如果妳先行一步，妳
不用傷心，我還可以為妳做妳最後的身後事，我要照顧妳一生一世嘛，我
要照顧到妳最後，聽完的那一天.....傻豬聽到我咁講，伏在我懷裡哭了.....

16.我到目前的人生已經好滿足，自己其貌不揚都可以找到一個好靚又好好
既女友，我亦都有好多朋友在身邊，最幸運係可以認識到和碰返我女友Irene
，其實仲有好多人，其中一個係我前女友，我覺得佢其實份人不差，我現在
回頭想，人各有志，女孩子有誰不想揀最好的呢...?我現在已經冇怪責女友當
天點解點解...。其實上天都幾好丫，我可以找到返Irene，而且前女友又找到
佢真愛的，呢個分手真係好完美我覺得....。而我都想講我另一個女仔，就係
我個妹，我自問係真係極之痛鍚和照顧我個妹....難得一生人中...佢永遠都係
我個妹妹，有今生冇來世，當然我希望有來世啦.........哈哈

打完16件事，其實打下打下我覺得仲有好多可以講的，但我相信如何我繼續
講下去，講到天光都不會完....，大家對我認識是不是深一點呢....，還覺得不
足夠的話，嘗試和我相處吧....你也許會體會得 更深，好喇...踏入2009喇，我
希望大家都會開開心心啦......謝謝你們耐心觀看..~~

>>January 19, 2009 at 8:16:26 PM GMT+8

2009 年 1 月 17 日 星期六 【微冷】

可惡既大伯..!!!


今日女友情願一個人留在家中，都不肯跟我出去，
其實我明白的，上兩次都比人冷冷相對，比我打死
都唔去，所以我都冇迫Irene去，由她吧....，唔去可
能還是一個明智的決定，因為今日我去長洲，竟然
可以見哂咁多親戚，當然有D係所謂『親戚』啦，今
次佢有個仔都帶住佢個女友出席....，而我今次就一個
人，比人暗串加有點骨的說話不絕耳啦...!!我兩個讀到
大學畢業的堂表姊，結左婚，冇做野，我很想串大伯，
你兩個女讀咁多書咪又係嫁左人唔使做，咁讀來又點..?
我個堂表哥，仲係一支公，似足佢老豆，即係我大伯啦
，食飯飲XO....哈哈又飲啤酒，再加多杯紅酒，兩仔爺都
係酗酒的傢伙，細仔好一點只係少少啤酒，我覺得可以
接受的，而細仔今次仲帶個女友出來，好彩唔係太靚女
，我覺得我女友靚過佢果個..哈哈...我贏左，佢既工作係
響眼鏡88度做Sales，咁我女友點睇都贏佢啦工作上，哈哈，
超賤格呀，職業無分貴賤，但我覺得我女友係好過佢吧
，原諒我的主觀啦，我都想讚美下我自己女友嘛.....，Irene
妳其實真係幾靚架，起碼冇人話過妳唔得丫..係咪..?!

仲有今日發生左一件令我好唔知點既事，由長洲返天水圍
嘉湖山莊最快一定係搭鐵路，其實我真係唔想同大伯一齊走
，人地問佢搭咩車返去?開初，佢話搭巴士，我心暗喜啦，可
以唔使同你一條路，真係好呀，點知表姐話拖住四個小朋友
怕搭巴士分開坐，睇唔住D小朋友，OK...人道立場，一齊搭
港鐵，我唔知我大伯係唔係太有錢，未試過搭鐵路，我由奧
運站叫定佢下一站係南昌，要落車，佢到站仲成碌葛咁，唔
識落車，我真唔知佢咁笨實，我還以為佢落左車，回頭望望
，個個落哂，係佢唔落車....究竟想點定還是欠揍呀?我見到你
仲要抱住個小朋友，岸居居咁，唉...我冇法子...唯有，當住咁
多人大叫落車呀，佢先識落車，咁車係會關門嘛，聽到必必必
必必必心聲佢就先識去衝門，其實衝門唔打緊，如果你身手敏
捷的話，但你又唔係...論論盡盡咁，仲要比車門加幕門夾住大
半個身，唉.......我果刻好想大叫，我唔識你架.......我覺得自己好
瘀呀......比咁多人望住我識既人比門夾住左....出唔到來.....，，好
在我唔係地鐵東涌線既人，如果唔係比人知道我身邊有咁既所謂
親戚存在.....我真係....無地自容，唉，又係衰既，係夾就夾大力D
嘛，最好卡住對門，打唔開，等消防黎救你!!!!我真係好鬼黑心呀，
係又點??鬼叫你話我女友做得呢D工都係壞女仔呀，仲用埋水性
揚花呢D詞語來形容，好彩女友冇咩點知道左之後，如果佢喊足咁
多日，我真係同你開火兼搏老命呀....!!!

回到家見到女友響度整緊.....芒果糯米滋同朱古力泡芺，返來有
野食....真係好開心呀，因為我呢一餐晚飯食得好辛苦呀對住佢，
望望Irene其實幾好丫，點解佢地唔肯接受佢...?Irene一開始又冇
得罪你地，講到尾都係一個女仔，你口中成日話大家係親戚親
戚，但你偏偏要咁對我...?我真係唔明，讀得書多一定係叻架咩..?
家下做司機你暗示我冇出色，我女友做空服，你有咁話佢，你到
底想點...?好.....竟然你覺得讀得書多就係叻，我家中有個妹，讀
書都OK，而家讀緊大學，我個妹都係一個讀到書既人，我發誓我
一定會供到我個妹讀書讀得多過你地咁多個仔女，到時我睇你有
咩好講.........唔得呀..我越打越激氣呀......唔打呢個話題喇.....!!!
Anyway我唔會衰比你睇，大家鬥長命丫....!!!

在去長洲的途中，響船上影左D相，我覺得都幾靚，哈哈，自己
讚自己，不知死活吧，比識影相的人見到，我呢D相真係笑死人，
但點都好啦，我眼中真係算係咁，我好少可可以影到黃昏日落景
架，構圖係單調D，但Irene同我都鍾意就得啦..係咪..?

全部都係船上影，當時都幾大浪，船搖晃得好勁，影到唔係好手振..我自己本人已經覺得好滿意。




以下果三張..係我最鍾意，我覺得有D懷舊感。






呢三張我純粹影個太陽打落海閃下閃下的感覺....我係唔係好無聊呢..?






>>January 18, 2009 at 7:16:00 PM GMT+8