2009 年 2 月 5 日 星期四 【炎熱】

誠徵女朋友乙名


今日放Lunch同George食飯，好難得可以同一條Line
同一個Duty同仲一個時間添，偉大的George為左可
以陪到我傾計，竟然買外賣陪我食住吹水....!!原來
George同女友散左喇，仲要散左一個月多，我居然
可以咩風都收唔到，仲話係最好的同學喎..唉.....失
禮呀真係，其實呢George係一個好好既男仔，唔煙
唔酒，粗口都唔講多一句，有份正職收入又穩定，
個樣都幾俊俏丫，望落都斯斯文文果庭，點會比人
飛架?更糟糕仲要問我有冇好女仔介紹.....我話..你開
玩笑吧....!!你點會冇人揀..?但見George的表情真係好
認真咁，講...."真係冇呀..我有點會唔講丫"....見到佢
真係極度無奈的樣子地咁，一路用筷子夾塊咖喱雞球
一邊夾...又放...夾又放咁，成個鐘頭都食唔哂半盒飯
，這時我終於忍不住問原因點解分手呢?原來又係有
第三者出現，又怪不了他，三年幾的長跑....就咁泡湯
，實在是可惜呢....!

其實以今日社會...他的條件點會冇女仔埋身丫..?放工和
女友講起George都認為他是個好男仔呀，女友提意找天
約大家出來玩，反正她的同學仔都係單身的，大家做朋
友亦無壞吧，其實....女友D同學仔都唔差架....化左妝之後
...哈哈..!!!開玩笑吧....不可以亂講野，呢度都有佢D同學仔
來睇，我都不想被她們五馬分屍咁死無全屍呀....!!!!

返來香港女友買了好幾樽蜜糖返來，有好多得意的味道
，而且還幾"的飾"呀....拿來做擺設真係一流呀....!!只不過
山長水又遠咁又係去買D"食"的返來......就連呢D擺設都可
以食既...服左妳咯......!!!

其中一樽既蜜糖..藍梅味


>>February 6, 2009 at 6:12:59 PM GMT+8

2009 年 2 月 4 日 星期三 【炎熱】

入院急症室檢查


今日返返下工期間，突然有好嚴重既胃痛，終於
都要入院檢查喇，醫院十大酷刑之一....胃鏡....唉
，終於都有機會再做喇，但要排期先有得照...，但
唔知今次份保險會唔會包埋我呢D呢..?如果可以去私
家醫院照胃鏡，可以麻醉冇咁痛苦呀.....!!不過而家都
仲未知要幾錢..!呀.........我仲諗幾錢..?諗下有冇事好過
啦....!!!我知女友一定會好擔心，以女友性格..我冇估錯
，已經過左七個留言喇，Sorry呀...醫院唔比打電話呀，
但我無事呀，仲識行識食識訓啊.....!!不得擔心那麼多呀..!
還有呀...我有錢找數架...哈哈...傻人..!!

醫生話不用留醫呀，醫院D床唔係比我呢D小病用架，唔使
再問我要唔要入院喇....!!只不過我返到家中唔敢食野，我怕
一食就會唔舒服，但其實我諗係心理作用吧，我怕一食野會
反胃..去嘔，先至唔敢食，不過我一陣點都會食少少野落肚的
，放心啦.....最多我有事就立即通知妳啦，好嗎...??安心做埋呢
轉先找我陪我啦......

>>February 5, 2009 at 12:23:17 PM GMT+8

2009 年 2 月 3 日 星期二 【晴】

地上執到寶


今日同女友搭小巴出去，車上既人已經落得七七八八
，我們坐在小巴最後排，響我同她傾計期間有電話響
，奇怪的係冇人接，係咁響，如事咁響左兩次，女友
好奇往椅的縫隙看看，原來係有人遺下電話，我地開頭
都好開心，哈哈...有新電話用...!!!!女友又好奇望下手機既
相片，原來係個中學女生，望落去係好乖巧的，最後經
過考慮都係物歸原主，最後我地等電話響，真的係一個
女生，仲要哭著求我們比返佢，如果唔係比阿媽鬧死打
打架....!!!女友聽到她聲線真係好可憐....，於是約個地方比
返佢，見到她真人時眼紅紅著......唉..!!只係唔見電話吧，
唔使咁緊張啊，面談左一會兒，原來部電話只係買左一個
月多，女友臨走時著她小心一點喇，個女生講左無數次多
謝、唔該........，其實如果電話係個唔順眼的人，我都唔會
心軟比返佢，或者人係真係好自私，地上執到寶..問天間地
攞唔到嘛，慶幸，內裡有她在學校的相，其中有段短片還
在朗誦中文詩歌，我估她都是一個好學的女生，給她一次
機會啦，小妹妹..下次要小心點喇...唔係個個人都會心軟架....

>>February 4, 2009 at 2:25:18 PM GMT+8

2009 年 2 月 2 日 星期一 【晴】

何年....才會..開?


今日放工睇一睇個信箱，又發現炸彈，都唔係驚奇既，
一早知架喇，預左比人炸，人情亦早就預左比架喇.....!!
我諗真係到我地呢一代喇，我好多朋友都已經結左婚或
者定左婚，有D就夾緊日子將會結婚，但自己好似咩都未
準備好咁，我真係天真呢...仲話要去旅行喎，有錢都要儲
住先啦...唉..!!!睇黎....去旅行既計劃又會泡湯喇...，不過，
若果真係唔去旅行而儲到錢的話，咁都值得既，旅行可以
遲D去，但結婚係要好好咁計劃既.....，我都想當日可以開
心...可以難忘嘛。但女友有要求係件婚紗要買....唔租..!!!其
實買都唔係問題，但小姐妳有冇諗過點安置佢呢...?妳會張
佢摺到四四方方咁收埋佢嗎...??而放假冇野做的她，今日大
執衣櫃同雜物，竟然比女友找返件已經變微黃同摺痕疊疊既
舊校服同其他細過既衫，嘩.......有如出土文物咁，據女友講
係特登留下來的，其中一件夏季校服仲簽到通身名，當然冇
我簽名啦，我唔係中七嘛.....嚘嚘.....知妳叻喇..!!!雜物箱內有幾
本紀念冊，係女友唔同FORM時的，咩原來我有寫比妳既咩，
毫無印象......況且我D字...邊有咁靚呀..?仲有...我以前個簽名咁
鬼死老土架..?!!而家叫我真係簽唔出呀.....!!!唉..我越睇越頂唔順
，再睇我噴血呀..!!但回憶小時候，真係好開心，無憂無慮，咩
都唔使諗，幾好呀，舊時總覺得大人仲咩點解唔比我"拍板"(自
己話事咁解)，到大過而家有得自己拍板話下事，我反而覺得好
煩，真係犯賤。睇完喇.....收返佢，唔知到下次取出來的時候，
會係咩時候呢...?

突然...女友話...不如落去買支紅酒放落去，等到我地個小朋友取
小童身份證時先飲.....!!!!

嘩...我...頂妳唔順呀....!!!!但始終我地都買左放下去.....

>>February 3, 2009 at 5:54:50 PM GMT+8

2009 年 2 月 1 日 星期日 【炎熱】

究竟發生咩事...?


一朝起身，把聲唔知點解沙哂，喉嚨更加係痛到不得
之了，去左睇醫生，診斷出感冒，唉....我夠知啦，廢
話..，本來諗住請一天病假，但只係感冒而請假，好像
有點兒那個，所以最後都係返工，女友則在家中抱頭大
睡，我陪不到她，唔知有冇唔開心呢....?

放工返到來，發覺到女友唔舒服喇，大都係我傳染比佢
，女友出名係一個好易病既人，我昨晚應該小心點先係，
不過我地大家都係一個唔小心既人，所以先會中左招....

夜晚..果餐，大家都怕怕....，為左唔會再交叉感染，買了
兩個外賣回來，一個坐在客廳食...一個坐在飯廳食，但我
要強調，客廳同飯廳只係一張梳化之隔，其實我只要反一
反手便可捉到佢碗粥過來，可以話多餘，但係心安理得....

食完仲要拿拿淋張D外賣碗、匙.....，打包掉出後樓梯垃圾
桶消滅，唉.........究竟發生咩事...?

>>February 2, 2009 at 3:55:22 PM GMT+8

2009 年 1 月 31 日 星期六 【微冷】

去伯母家拜年


今日到女友家中拜年，上去時我都唔知買咩送禮
好??去到萬寧我諗左好耐，買朱古力定係曲奇餅呢
D例牌好呢?最後我係買左盒燕窩上去，我諗伯母
應該會受呢D掛!!上去後，祝賀完伯母之後，立即
比利是我，原來女友個家姐知道我會來，通風報
信比伯母等佢準備利是...哈哈，其實女友既父母都
幾好，感覺幾親切，我覺得係傾到計既，伯母問我
食唔食飯，但我已經同女友話左一齊出去食，同伯
母講..下次啦，下次我會來架，我臨離開女友家時
，伯母會笑住向我講..下次再來食飯啦.....，好呀....!!
開初以為見家長係一件好難既事，唔知點解我見對
方家長，我會好緊張，我好怕佢地唔鍾意我，如果
係咁既話我會唔知點算好.....幸運地，今次是順利的....

夜晚和女友食壽司，之後再去食個甜品就返去，今日
對我來說真係幾難忙，還有今日有件令我好驚喜的事，
我阿姨比左1000蚊利是比我....哈哈....!!!!我真係冇諗過
會有咁大封.......我找天要親自多謝她喇.....


由年初一到而家既利是....其實有D已經用左去食飯，趁而家仲有剩，影相留念先..


>>February 1, 2009 at 3:38:10 PM GMT+8

2009 年 1 月 30 日 星期五 【微冷】

又再夜訪山頂



放工我又繼續我既無聊，我又去左山頂....，今次我帶左
相機，但係.....比人趕走，原來果度係餐廳範圍，冇幫襯
唔比影相，開初我都唔知，以為佢推我入去食野，佢用
國語問我，係人都知我D國語係超級超級爛，為左自己臉
子有問有答，我用英文答佢，因為英文我有信心一點，我
當然要扮哂遊客啦，之後大家都好落台一點嘛，就係咁，
我昨日冇相機有得影，今日有相機我比人趕...頂佢個肺丫
，其實我有諗過幫襯佢，但望一望餐牌咁鬼貴，我立即縮
沙，之後我去左Starbucks食左少少野當夜晚，便落山，行
程比預計早左成個鐘，搭巴士又有人用國語問我，巴士到
總站未..?我心諗...到站司機都會趕你地落車啦，問來多餘，
但我都用有限的國語答佢，"未呀...等一下啦...差不多喇"，
嘩....好有滿足感呀......!!!落車到中環碼頭，我就影相，由於
冇帶腳架關係，影十張先有一張叫過得去，我主要都係影
夜海景、馬路，呢D低技術既相，我食住風影，鬼打咁凍，
其實我覺得好怪，外國人影好正常，但自己本地人又影好
似好怪咁，所以我都係快快手影算了，點知影影下又有人問
路，又係國語，但今次係一個家庭來問，共四人，其中有個
小妹妹，我諗大約十歲左右，個樣好似劉旋咁，仲要化左妝
既臉孔，用左好多飾物紮起左個髮髻，五顏六色，好靚女，
佢地問天星小輪響咩方向...我答"在那邊"當然用埋身體語言
啦，手指指咁指去果個方向，哈哈..我又成功過關，又有滿足
感喇，冇女友在身邊我都可以答到呢D野，我覺得自己已經好
得.....當然..我知架..!!!在人眼中我係白痴啦，呢D國語三歲小朋友
都識...!!大家睇開D啦，我真係對國語一D興趣都冇，我答到人已
經好偉大喇.....。

明天放假，可以接她返來，經過我兩次夜訪山頂後，我都好想
可以帶埋女友一齊去，如果一齊去，咁上頂樓觀景台就有意思
喇，我真係行咁耐都冇見到一個人係單身遊山頂，我諗我係例
外的一個，還有一樣野感覺到好得意，我坐巴士下山或者上山，
我係同人唔同，其實呢條路線係遊客線，大多都係遊客上車，當
架巴士上到司徒拔道..山頂段時，遊客全部都係望維多利亞港，
而我就望山頂D豪宅，D豪宅真係好大好豪.....只係由窗望入去都
見到係幾咁大，我諗我呢一世都唔會有機會住到，真係好羨慕人
地間屋咁靚咁大，仲有埋自己泳池添......!!!

好喇.....遊左咁耐返屋企喇，我想下次可以女友陪我去...咁就開心喇.....


呢D就係今日影既相喇....!!!
















>>January 31, 2009 at 3:51:01 PM GMT+8

2009 年 1 月 29 日 星期四 【微冷】

一個人


放工..自己一個人好無聊唔知做咩，我又唔想咁快返屋企
，咁我就週圍遊盪，遊呀...遊...遊呀...遊....咁去左中環IFC，
一個人去City super度係咁買小食，買完食完之後我又亂咁
行，本來想坐果架開篷巴士遊走香港，點知又比D遊客坐
滿哂，我唯有等另一架上啦，但開篷巴士未到來，就有另
一架巴士駛過來係去山頂凌宵閣，我就唔理咁多就上車，
沿途可以欣賞到香港夜景，真係好靚，有時諗好多外國遊
客特登來香港，就係睇香港呢個夜景，而我就可以隨時來
欣賞，真係著數呀，望真D...其實香港真係幾靚，由山頂向
下望，見到既係萬家燈火，閃下閃下咁，我今次最衰冇帶
相機響身，如果唔係我一定會影好多相，雖然景好靚，但
係得自己一個人行真係好寂寞，眼見好多好多情侶一齊拍
拖，拖住一齊行，開開心心咁，但自己就一個人傻傻的咁用
手機影相，人地去山頂都會食D好少少既餐廳，而我就去食
麥當奴，食完後，我再行下，本來想坐纜車返中環，但鬼打
咁多人，我連等都冇等，就走返去搭巴士，返到中環又搭渡
海小輪去尖沙咀，海風勁大，架船晃下晃下咁先去到碼頭...
之後我又再是但咁搭車，今次我就搭中架車係去美孚，其實
我係想坐下"熱狗"吧，之後我先坐西鐵返去屯門，就係咁..我
無無聊聊咁就過左一日，其實..我真係好怕一個人咁寂寞，我
會漫無目的咁四處走，明天....我估都係咁，她又未返到，我
又會唔知去邊，或者去多次山頂，今次就真係要帶部相機去
影相先得喇。唉....一個人..無人陪..好慘呀...!!點解人地會咁多
年拜架...???而我就....一個人..好悶呀.....誰來打救我啊..?

>>January 30, 2009 at 7:43:41 PM GMT+8

2009 年 1 月 28 日 星期三 【微冷】

仍然係拜年.....


放工同女友出左北角拜年，拜完年後便一齊去
食飯...原來北角係冇想像中咁多野好食，始終
都係去左普普通通既餐廳，草草填飽肚子就陪
女友返工，北角得一架車可以出到機場，架車
仲要鬼打咁貴，40蚊一程，架車曉飛的嗎..?又唔
係喎，開到蟻冷咁慢，幾舒適都死啦，好彩遇多
左時間，如果唔係我落去勒死個司機呀!!!到左客運
大樓，便要等佢公司shuttle 返去報到，目送完後自
己一個人坐E33返去，唔知行咩運，黎左架特別車
，架車係有得調較坐位椅背的，龍運13.6蚊既車，
通常都係普通冷氣巴既位，今次可以用咁既價錢，
坐呢D車，抵呀....!!!只可惜.....我坐中個超級多嘴狗
前面，由客運大樓一路係咁講野嘈嘈嘈，講埋D一
D都唔好笑既爛gag，天呀........冚車人都靜靜地咁訓
哂，得你條契弟係咁嘈，好唔好意思架??早知我情
願坐得冇咁爽，去等下一班.....，唉...我在沿車途中
不斷咁嘴咒佢，你快D死...你快D死....死去收聲啦...!!!
雖然車程比人騷擾，但我都拆信睇，我都希望我們
將來都可以做到妳信中所說的期望吧!!

回到家一個人靜靜的，打開電視不想看，打開電腦
，妳未Online，咁當然啦，妳點會有可能半空中上線
丫，我訓醒啦，妳可能仲未Check-in呀...是嗎...??希望
幾天快D過，我還要拜訪伯母呀.....，嗯....我應該買咩
上去拜年好呢....??

>>January 29, 2009 at 6:38:03 PM GMT+8

2009 年 1 月 27 日 星期二 【暴雨】

利是不嫌多啊....


今日去左外婆家中拜年，女友和我娘果邊D人夾埋
真係多人到，我地要分兩架升降機上落，可想而知
係幾多人呢....，每年在外婆家食飯都係好好餸，而
且有D較貴既海味食既，今年係食翅.....我耐都冇試
過魚翅撈飯...咁折墮喇，對上一次係我還在社區中心
做的時候，中心主任請我們去澳門玩，去食飯，而果
日係食魚翅撈飯......諗起都覺得開心呀，好記得Dino講
咁大個仔都未試過一定要試下，咁當然啦，果時我唔
係一個人去，還帶多左一個人.....是誰..?不講喇....!!!!

天氣變得好凍，Irene唔知係唔係唔受得，加上身體好弱
，成日都病病地咁，近呢一排仲間唔中會作嘔吐....如果
持續係咁又要逼睇醫生，真係唔知發生咩事....成日都唔
舒服.....!點解呢..??咁多病既..?

今日收到我諗係最後一水既利是，最後一水意思係..預
計的利是...已經收左，跟住收果D係Bouns喇，其實今個
新年已經好好，因為而家已經過左二千，真係已經係好
好好好喇，我唔會望再多收，但你比我我當然有禮貌咁
講...多謝啦，之後即刻收歸閣有.....哈哈，總括來講頭年
初一二三都叫好開心，唔單單因為有利是收咁簡單，最
主要係實現左我期望的事嘛....!!

明天女友要返工喇，去CDG既Long haul，不過係夜機，放
左工同女友食完飯先送去返工都仲有時間，所以可以陪伴
她，放心吧，三天好快過，我都知妳都想去sightseeing呢個
地方，最緊要買野返來呀.....

最後...我收到信喇....待妳出trip

>>January 28, 2009 at 6:09:22 PM GMT+8