2009 年 2 月 15 日 星期日 【晴】

忍.....!!!


今日..我搭左一程好辛苦既巴士，好鬼難忘，而家
仲覺得急..好急咁...!!!!話說今日同女友去行街買野
，即係買野食啦.....，回程返屋企時考慮搭巴士定係
西鐵好，咁我地大家都係懶開，當然選擇搭巴士啦，
問題來了，我之前因為飲左好多野既關係，已經成
日想去洗手間，其實臨搭車我地都好醒目，各自都
去一去洗手間先搭車，好了....等到巴士.我坐唔夠兩
個站又開始急...!!!但冇理由落車架?13.6一程，兩個人
廿幾三十蚊喎，當然忍啦，因為我覺得自己係忍得到
，但係架巴士唔知點解鬼咁死振.....振一振..我就急一
急，我要忍過小蠔灣公路、青馬、汀九橋、屯門公路
，沿途我越黎越急....，為左分散注意力，Irene不斷同
我傾計，仲要出動埋支筆，玩接龍........好不容易先忍
到返屯門..唉.......返到屋企立即衝入洗手間，唉.....先解
決到問題....，呢程車真係搭得慘呀，如果搭鐵路就冇咁
煩啦，下站落車就得，自己又要貪舒服.....真係抵死..!!!!
我當然比Irene笑了佢肚痛啦，仲幻想我忍不住響巴士要
點做........真係可惡之極....哼..!!!

回到家Irene食佢買返黎既朱古力，大大粒，佢食得好滿足
，我食得好辛苦，因為真係好甜好甜，而家15粒大大粒朱
古力益哂個傻妹........，我就睇下幾時屋企唔止有隻肥貓、
遲D仲有個肥妹駐守先...哈哈..!!!




就係呢舊朱古力，甜到死，Irene竟然可以話好食!!


>>February 16, 2009 at 2:30:44 PM GMT+8

2009 年 2 月 14 日 星期六 【暴雨】

小時候另一件惡行



昨晚睡前同Irene傾計，講起小時候點過情人節，
講開先知，原來女友讀中學時有去花店賣過花，
而情人節係佢既惡耗，因為意味住佢要包花包到
手都會斷，而最多人送的係玫瑰花，而玫瑰花有
刺係大家都知道，而好多時候Irene包花時都會拮
傷手，因為佢自己講自己輪盡的關係，所以對花
可叫又愛又恨.....，而情人節時還會走到去尖沙咀
海旁兜售一支支既玫瑰花，而當時係1995年，因為
果時市道好好，情侶都唔會介意買一支價值100蚊
既花，所以冇講價呢回事.....，但我估而家就...，如
果叫到我...我都會買既，畢竟都係情人節，人地叫
到買支花比女朋友，你因為貴而唔買，我諗個女仔
向個男仔分手都有之呀.....，所以，情人節賣花都係
一個心理戰，可謂叫到...在女友面前好歹都會買一支
吧，所以細個既Irene點解讀書時會有咁多錢響學校買公
仔麵食、汽水飲、零食咬，出到去有錢買靚靚既文具用、
可以有錢買唇膏?今日同Irene傾計時我講講下又好似有D印
象，我記得好似好似我同Philip在課室玩佢，玩咩?我地倒佢
書包裡面D野出來，倒出物件有書、文具等等，而我有印
象係倒到佢支潤唇膏出來(我記得係有顏色既)，其實我點
解會有印象呢，係因為..你攞左支唇膏好自然會打開睇下
，當時Philip好衰咁整鬼我就特登用手推我手上支唇膏響
我個嘴度，我係食到支唇膏，而支唇膏亦冇左一忽，(大家
知道，當時的年紀，如果你用嘴掂過佢貼身用過既野之後，
同學們大家會有咩反應呢...?)唔使講...緊係有近半班人都知
我掂過佢既野啦...個個都嘩嘩聲...你........同佢....!!但支唇膏
最後有冇比返Irene呢..我就真係冇咩印象，到底係掉左定物
歸原主，天曉知喇，真係唔記得，因為連Irene都唔係好記得
，諗返起...我同Philip細過都幾鬼破壞王、搗蛋王.....，仲有
一次勁核突既事發生響我地三個人上，最終引到全班哈哈大
笑......，呢件事唔出得街呀(呢件事我真係好唔啱好鬼賤，我
覺得Irene應該嬲我，但佢冇，都係笑笑笑不了了知)，但唔可
以寫出來....哈哈，如果唔係我相信而家既Irene一定會把我幹
掉......，不過呢，Irene都幾好脾氣，比我地咁玩都冇嬲過，諗
真D我都做左好多衰野響佢身上，夾佢頭髮呢D小傷害只係冰山
一角.....，諗返起Irene都真係幾可憐，雖然當時佢好男仔性格，
比人感覺係好玩得，但始終都係一個女仔，我地都真係幾過份做
得，Irene呀...原諒我小時候的無知和天真啦..!!!不過小時候真係
好，冇咩要擔心，而最重要，我的戀人，原來在我小時候已經出
現，上天制做左好多機會、事情、最重要係我地永遠都係坐埋一
齊，唔係前就後左就右，課室比我倆好多回憶，令到大家對大家
都有深刻的印象，我離校分別後，在街上可以碰見，而大家又有
共鳴地咁認到對方是誰，有時事情真係好奇妙，如果你未找到自
己另一半，我覺得不用心急，會來的它一定會找你，避不了......是嗎...?

Irene一個很爛的笑話，我的初吻早就給了Irene...點解..?
因為我間接用嘴掂到佢用過支唇膏.....!!! (是不是很爛呢)
哈哈.....

怎麼都好，我覺得今個情人節很滿足，我都要多謝我女朋友呀
，冇佢...我點會得到快樂、開心、滿足呢.....願我們天天都時情人節...

>>February 15, 2009 at 6:07:46 PM GMT+8

2009 年 2 月 13 日 星期五 【暴雨】

今天是情人節


今次係我同Irene第一個情人節，但今日女友先至由外
地返來，雖然唔係全日假期，但都足夠我們一齊慶祝，
而今日我為左比驚喜佢....其實我不知算不算上係驚喜
，但我仍然手捧住一大束花去機場等女友放工，其實扎
花真係幾重手，可能佢包裝得太多紙，再加上一扎花既
水份，唔講得笑...真係『重手』，不過向來人人都話女
仔係喜歡收花，而扎花無可否認真係好鬼貴，再加上係
訂既....仲要貴多一點，但係見到女友開心捧住佢行，我
都覺得值得既，我們走出機場.........我幫佢拖住兩大件既
suitcase，而女友就滿心歡喜咁捧著扎花行，其他女同事
見到都顯得羨慕吧....因為當時機場還未有一個人係捧住花
的，當然係我視線範圍內啦，而其他同事都報以...『嘩..』
、『好靚呀』、『開心死妳喇』呢D說話，可能情人節都係
女孩子以扎花的大小，作為自己男友對自己的愛的多寡，用
花向陌生人宣告，同時亦向人講我係有男朋友的吧...!!其實
我好怕一個人攞住咁大扎花通街走，我覺得女仔攞住就好地地
，男仔攞住就.....最好果時唔好碰到我任何朋友，如果撞到，
感覺係千年道行一朝喪、我以後仲使出黎行既，前途盡毀啦...

話雖如此，當我見女友開心的樣子時，花的價錢、臉子...頓時會
拋諸腦後，所以男仔點解會死響女仔手中，就係咁....，我都死在
Irene手上...哈哈，不過點都好，一年一次，無關係吧，只要Irene
開心..我都會開心.....

Irene....妳今天開心嗎...?

今年情人節送比我女友Irene既花....!!





臨回家前到元朗食甜品，全場爆滿，很多一對對的小情人....!!


>>February 14, 2009 at 5:43:31 PM GMT+8

2009 年 2 月 12 日 星期四 【晴】

情人節前一天


放工約左小伊食飯，哈哈，找到D好既野食
，好既野飲，又唔係貴，哈...情人節去果度
食都好喎....，果度都有咖啡..奶茶飲，我諗都
適合妳架，而且我今日飲果杯都OK架....明天
帶個為食貓去吧......!!!

妳返左工.....家中好靜呀，好想妳響度，又再
一次感覺到妳的重要喇，好了...明天情人節，
給妳一個驚喜吧.....

>>February 13, 2009 at 3:28:30 PM GMT+8

2009 年 2 月 11 日 星期三 【晴】

與師姐聚舊..



今日出左去同以前中學師姐食飯，師姐而家全家搬左
去澳洲定居，幾年先返來一次，記得對對上次係師姐
去澳洲讀書，仲記得因為師姐果陣帶得太多書上機，
行李過重而唔比上，攪到要響機埸地下搬哂D書出來，
比我地去寄比佢....哈哈，不覺已經差不多十年前的事
，而對上一次就帶左個外籍朋男朋友過來，之後仲結
埋婚返來，而今次直頭帶多個仔返來，不知下一次回
來情況又會係點，會唔會BB已經識係開始讀書呢..?師
姐生完..身材有點走樣呀，哈哈，但多左一份慈母的感
覺，見到佢咁就知湊仔唔係一件容易事，BB一喊...就要
不斷估佢想要咩....換片、飲奶、飲水、扭玩、想食BB餅
干?係咁比佢選擇...直到佢唔喊為止，我望著她就很有趣
，媽咪一定係辛苦得要死，但我睇得出媽咪係好願意為BB
做任何事...母愛是偉大的嗎....??今日雪梅都有和我一齊去，
雪梅要抱BB時講，"來....比姨姨抱下先，跟住笑著講，不敢
再叫自己係姐姐喇....老喇，雪梅姨咁講..我真係唔知比咩反
應呢?去食飯時碰到以前社區中心的同事，哈哈.....比我睇到
斷正佢同男朋友一齊..呵呵，心暗叫，妳終於都有人要喇，
心理會正常點吧，不會像以前咁，日日都為難我地D小職員
吧....!!!

好喇..師姐......我二十一號要送妳機先得呀，不知呢一別，妳
幾多年先會返來香港，而二十一號都係Irene飛返來的同一日，
送機同時接機，真係完美既行程組合呀...!!




媽咪與混血BB...，可惜手機質數真係差，影到咁....!!


>>February 12, 2009 at 1:53:10 PM GMT+8

2009 年 2 月 10 日 星期二 【晴】

懲罰...?!


正話夜晚同女友出去超級市場入貨，去緊朗屏
西鐵站途中，女友話想食美心西餅內其中一杯
jelly布丁什果果凍(其實我係亂比個名佢)，點知我
落左去諗住買果時，間餅店已經下半閘，咁即
係冇得買啦，本來開開心心諗住有得食，一見
到咁就即刻失望咁扁嘴，死死氣爬返上月台，就
係呢個時候，有另一架列車到站，車站頓時變得
人山人海，乘客由月台往下走，而我地就反方向
上去，就係呢一個時候，我在樓梯上行到一半....
見到Philip從旁邊扶手電落，我地果一刻四目交投
，大家見到大家，Philip後來上返來同我地傾左一
陣，就提議去食野，女友一聽到大叫..."好呀"......!!
又立即變番開心樣，我同Philip都唔知食咩好...茶餐
廳?吉野家?心粥館?美心快餐?麥當奴?元氣?最後女
友自把自為咁入左元氣...叫.."三位"，哈哈..個傻瓜真
係對食係不會客氣，好在大家都係好熟既朋友，如
果比其他人見到Irene係咁...唉..失禮死人呀。入到去
Irene主動洗食具，分給我們芥辣、豉油.....，然後自
己就係咁叫壽司食，很流利，叫壽司時心中好似有
一份List咁，我同Philip跟本冇機會叫食物..哈哈，真
係無佢收呀，最後Philip賣單萬歲，真係多謝Philip呀...!!

食完野大家一野行，Philip大嘆Irene食極都肥唔到條腰
，得天獨厚，講講下我地又講返中學時候點點點，係
咁回顧以前，因為Philip都係夾頭髮幫兇之一，其實....
Philip先係夾Irene的主謀呀我係幫兇乍.....，真係架........，
不過件事都過左咁耐啦，點解妳仲會記得架，點知又係
呢一句"因為好痛呀，我果時蠢左，我應該喊等妳地比
Miss罰先係...哼....!!"Philip立即警告我...妳條女好記仇呀...
小心夜晚對你不利呀..!!!.......我頓時比你兩條友仔吹漲....!!!

仲有呀Irene....我已經將我自己比你看管啦，上天已經比
左好大既懲罰比我喇.....還想我如何做才平妳的氣啊..?我
好慘呀...嗚嗚....

>>February 11, 2009 at 3:44:25 PM GMT+8

2009 年 2 月 9 日 星期一 【晴】

拆利是......



新年不覺咁就過左，深知應該唔會再有利是
逗吧，所以今日將全部利是開封結數，嘻嘻
...今年成績不錯呀，都有三字頭，真係三字
個開頭乍，三千零幾十，都好丫，都叫有三
千蚊，不過又係上繳中央.....唉，算吧，我心
甘情願比佢保管的，因為我好相信，女性係
有管理財政既天份，講真....如果比我袋，我
又係唔知洗左去邊，與其係咁，我比女友存
戶好過....!!

今日返工果陣，我真係好深信終有一次，我
會比D外賣仔害死，次次都同我鬥快，是睇死
我唔會撞過來嗎...?我要強調係外賣"仔"，即係
果D踩住架改裝單車個染哂金毛變哂DNA果庭，
最恐怖係佢地唔會用手捉緊單車去踩，而係一
路踩一路潑佢果把引以為傲既金髮，好明顯...
係懶有型啦，可能D外賣仔對輕鐵個響咹有抗體
，而家砵佢地係唔會驚，仲會用挑戰既眼神向
我講...."有種就撞過黎"，唉.......好彩而家少行七
字頭既路線，如果唔係..我一定噴血...再黎一個
同佢『同歸於盡.....』

夜晚.....Joan打電話比我，哈哈，原來年三十晚已
經返到香港，留港四星期，嗯....今月二十一號就
返番去澳洲，我為左要見佢個混血B，我誓死出席
星期四下晝既飯局。好..!!!冇見年幾，唔知佢老公D
廣東話有冇進步先，約定雪梅一齊去....Oh....弊....
我唔記得通知Joan改時間..改去1點食而唔係12點，而
家呢一刻先記得，明天一定要提自己去通知佢先得，
哈哈....咁耐冇見，好想快D到星期四呀......期待期待著.....!!!

>>February 10, 2009 at 6:48:56 PM GMT+8

2009 年 2 月 8 日 星期日 【晴】

後悔..細個..返學..點解..!!



今日放工去左阿姨屋企，去教表弟妹做數學功
課，其實我真係好怕計數，由細到大D數都也
也嗚咁.....，我仲好記得我好似佢地咁大果陣，
我計數都仲要數手指，幾咁失敗呢，今日仲要
我去教喎，雖然話係小學既數，但係已經足夠
玩死我喇，今日要我計咩速率、百份比、利息
，唉，計利息都可以同你計下丫，因為同我生
活有關嘛....叫我計速率?我計來仲咩??計來用於
飛車呀??睇下開幾快可以多D休息時間呀??百份
比..我又記來仲咩，生活上有幾可用到丫...??但係
功課始終係功課，唯有硬著頭皮睇教科書自己試
做，做好做到先用個方式教班表弟妹...唉，真係仲
慘過我讀書呀，有時真係教到我發癲，又教極都唔
識，一題數講左9000幾次係咁計，到計落功課作業
時又會計錯，好喇...到算式寫得正確喇，又計錯數，
進錯位，小數點又點錯隔離，我已經對數學係盲架
啦，估唔到有人仲屎過我，阿老表呀.....你地返學到
底有冇聽書架...?份數除法要上下癲倒，竟然可以反
問我點解......Oh...My God呀...如果我個仔係咁，咁點
算好...??今日見識過你地之後，我對小朋友好有陰影
，點解而家D教育會咁差......?

我本身在英文中學讀書，基本上除左中文、中史、聖經
唔係英文外，全部科目都係英文教授，我好痛恨童年點
解咁流行母語教學，就係因為課課英文我聽唔明我先會
原校升不到，但得著係..我英文衰極都有個底，有時我會
發覺，我英文會好過而家D中五、中六生，只要同傾幾句
便知到佢咩程度，我個妹...響中文中學讀書，佢成日向我
講話當年我讀得掂，你而家一定係好勁D英文，咁當然啦,,
讀得掂的話嘛，睇Irene便知，原校上係咩料...(我真係失敗)
，但講真，細個自己又真係唔係點讀書既又真係.....，唔怪
得其他野，而家有報應囉.....，正所謂，細個唔讀書，大個
做運輸.....(講緊我呀)，希望今日嚇過佢地後會真係比D心機
讀啦，步我後塵，真係做死一世運輸..冇好結果呀...唉...又
再自己不斷短嘆長嗟，好後悔呀.................!!!!!

>>February 9, 2009 at 7:31:36 PM GMT+8

2009 年 2 月 7 日 星期六 【酷熱】

執到寶之二



呢排D人真係有錢，可能新年後的關係吧，個個都
想『送舊迎新』，我真係冇諗過可以一星期執到兩
部電話，今日又比女友再執多一部，又係一部不錯
的機款，SONY ERICSSON WALKMAN機，而且呢部仲
係我曾經考慮買的其中一部...。今次係見住果男人
跌，我和女友在巴士上層見到鈄對面的男人，大概
係一訓醒睜大眼便到站，就衝去下面落車，而部電
話就比自己D電話繩，卡住響位同位之間，我諗係
一起身便由自己個褲袋扯出來，自己又不知道，個
金毛男真係慘呀...哈哈。唔知係唔係天意呢?硬係要
比一部電話比佢，之前比返部機主，而家又來多一
部，但今次都照舊諗住比返佢本人，但係佢部機得
返一格電，自動熄機後，佢SIM卡有鎖，開唔返，想
比返佢都唔得，我都唔明..既然都Lock得Sim Card，點
解唔Lock埋機...?我覺得個機主真係多鬼餘，而家又
多左部電話用，可以慳返幾千蚊，真係好，可以幫補
下為結婚、旅行經費....好野..!!!

夜晚陪女友D同學仔食飯，問到下次帶個男仔，即係
我同事George出來時，成班女仔好似發男人寒咁，叫
好呀好呀好呀..幾時呀...叫佢出來一齊玩啦?唉......我都
睇到呆左，呢班女仔返工同放工真係兩個人，很恐怖
呀.....，不過我個人認為阿Fiona同我個同事很幾相襯.....
嗱...呢D純粹個人意見，得個講乍....唔好插我呀...!!

今日食食下飯時Doris、Hazel、Karida、Fiona、Yvette(呢個
唔知有冇串錯名)，妳地班女仔D英文名都唔知點解咁難
讀又難記.!!唯獨係Doris、Fiona本人覺得正常一點.。正話
講到.....係.......係講到話下次旅行有咩好去處，本來想去
我和女友想去的地方，即係倫敦、荷蘭果邊地方，但那
邊消費指數太高，怕夠玩唔夠食，真係得個行字，冇得
買野，大家都認為去台灣好，連女友都點頭示意好....點
解呀?因為果邊好多好既野食囉.....!!!又係食野，Irene..妳真
係好為食..食唔停、食唔厭，不過就係咁，我先覺得妳可
愛，哈哈.....其實當妳每次返來都會帶食物返來時，妳個
樣會好開心，我亦都好鐘意睇到妳拆食物包裝時候，期待
將會食既樣，好似個小朋友咁，而最令我深刻係有次在巴
士上食草餅，我問妳仲食咁多時，當時妳口仲擔住半舊草
餅時講，指住巴士地下下面個行李架講，我仲有三盒呀...!!
我記得果次比妳D態度...笑到我噴口水咁滯，雖然我口中叫
妳唔好成日買，但其實我每一次我都好期待妳買，等我有機
會睇到妳的小動作..，或者呢個係其中一個原因令我好鐘意
妳，雖然情人節妳要返工，但我都希望我們情人節快樂.....。
妳向我講不如唔好送禮物，慳錢去旅行等等....，只不過今年
係第一年，我想妳有個好的回憶，算啦..有時D日子，一年一
次，唔好慳果一天啦，所以我都會買野比妳，買咩呢...?我而
家唔講....到果日好咪知囉..係咪..?




>>February 8, 2009 at 5:08:43 PM GMT+8

2009 年 2 月 6 日 星期五 【晴】

時運高......冇人查到....


今日我去左旺角，屎忽痕咁兜路行，其實兜路
個原因係想用最平個方法去遊走九龍，去到上
水鐵路站之後，我等東鐵去旺角東站，但我學
人坐頭等車.....，但我唔記得過頭等機，好彩沿
途冇人查票，如果唔係比人截到就.....唉.....!!

原來尖沙咀開左間崇光，我竟然而家先知道，今
日同女友行過都幾大幾好行架，以後可以多一個
地方去喇，唔使行來行去都係APM喇，不過..個傻
瓜只要有超市或者有野食買就開心就會滿足，我
羨慕係妳點解食極都係...飽塊臉...唔肥條腰.....!!!..我
嫉妒..好嫉妒..好鬼死嫉妒......

>>February 7, 2009 at 3:02:53 PM GMT+8