2009 年 2 月 25 日 星期三 【炎熱】

破壞之王

自從和Irene一起後，我已經好少做家務，
唔係...應該話，同佢一齊之後，佢覺得我
唔識做家務先啱，但佢又講得冇錯喎，今
次又攪左個破壞...!!原先今日諗住自己反正
都熨開自己件返工衫，其實以前我完全唔
好呢味野，熨衫喎....多餘啦，著左日又咪
係摺皺返，只不過呢，自從女友熨開左後，
我又習慣著住平平正正既返工，都算是其中
一個改變吧...!!好了...今日我得閒過頭，就諗
住幫下手熨衫，熨完自己果件，就順手熨埋
女友果件...，女友一共要熨三件，一件恤衫，
一件褸加一條裙，熨完之後就掛上房門後面
，食完晚飯後，女友執拾明天執勤的物品，
攪好埋D行李後，最後Check埋件制服，出事
了，我原來熨衫時響唔知咩時候整甩左白恤衫
其中一位鈕，但明天返工，另幾件制服又在寄
洗中，未取，唯有兩人地毯式搜索找一粒鈕，
咁當然...找唔到啦，唉........，唯一想到一個方法
只有係用返呢件白恤衫既鈕，取衫最下粒鈕去補
上面粒鈕，最後總算解決問題，但另一個問題又
提出喇.....，究竟會唔會走光呢...?經試驗後.....只
要著住件紅色外套便冇問題，而且唔講基本上係
唔覺眼，但如果真係去到真係熱到要除外套的話，
諗到用雙面膠紙頂檔，所以最後尾放落行李的東西
係一卷雙面膠紙.....!!原來我真係唔適宜做呢D咁細緻
的工作，嗯.......我都係乖乖地咁開車算了，家務呢家
野都係......女孩子擅長一點點，留返比妳做喇..!!



>>February 26, 2009 at 6:41:23 PM GMT+8

2009 年 2 月 24 日 星期二 【清涼】

肚痛死我喇.......!!!!

我已經冇食野喇，點解仲有得去茅廁架?
我feel到開始缺水咁，飲幾多出得仲多!!!
折磨左我幾個鐘..先能力行去睇醫生，有
衝動call白車.....，家中冇人幫我，貓咪愛
莫能助，唉....最過份今日係我放假嘛，要
肚痛都響返工日子先痛丫，白白冇左一日
假期，一諗起冇左日假，就好想指住自己
個肚同自己個肚講，你係唔係想我同你同
歸於盡呀....?

到左夜晚終於好返一點，諗住打電話比阿
芯芯問佢D野，點知佢又出左去....去左旅行
，唔怪得之近排度度地方都冇佢聲氣啦.....!!
D人真係有錢，成日都去旅行玩，我只係自
己數妳上年..都數到妳去左三次最少.....真係
教人羨十萬個慕呢......

臨訓前去沖涼，入到去洗頭，咁我按洗髮水洗
啦，放上頭洗呀洗，奇怪係點解D洗髮液打唔起
泡泡呢，不理了...我諗係洗髮液不足夠啦，按多
D再多D，結果都係一樣，開始懷疑是否用錯野喇
，望清楚支所謂洗髮液...原來係護髮素，唉.....!!!!
Irene..妳真係大整估呀......!!!今日已經病了傻，仲
要比洗髮水玩，我又一倒霉的代表作.....!!!

>>February 25, 2009 at 7:46:50 PM GMT+8

2009 年 2 月 23 日 星期一 【酷熱】

係咪正衰仔...?


今日放工返左去天水圍一陣，主要諗住攞D
野比我個妹，順便同佢打幾鋪機，已經不行
了，我完完全全唔係細妹個對手，輸得好慘
，呢個八婆都係靠反骨起家吧，當日唔係我
教妳玩，妳仲成碌木咁比我打吧.....，而家下
下炒我Perfect，喂.......過來比我打一下都好吧
，輸得冇咁難睇嘛，唉........唔玩喇...一D都唔好
玩，哈....好似好冇咩體育精神啊，又如何...輸左惡
哂嘛.....!!打完遊戲機，我媽命令我妹執房，我媽
我老豆都被我妹改左花名，阿媽叫武則天、老豆
叫秦始皇，有讀歷史唔使多講都大概估到佢地咩
性格，我以前還在家中住時，就係經常要屈服佢
地淫威之下，唔好誤會，輕則迫我比佢睇跑馬仔
，重則大刑伺候，所以我覺得孫中山係偉大的，
但我比佢更偉大，因為我起革命都起左無數次，多
過國父呀，到左十七歲先至有能力Say NO....，我最
鐘意講呢個比人知，因為咁先顯得我細個有幾咁PK
仔，即係我出街...阿媽問我你去邊...?我答﹕『咪出街
囉.........!!!』同咩人去呀??我又會答﹕『同朋友囉』，
阿媽第三句未問，我已經睬佢都傻，關門出去，日
子有功，阿媽都懶得理我.......呵呵，正一衰仔呀.!!!
點都好啦.......妹都係步我後塵，而家都係睬佢都有味
，但二十歲既佢，革命上還要努力呀，比阿媽喝執屋
就要執...唉，可憐呀，做阿哥既，捱下義氣幫妳執啦，
執下執下，執返以前我中學D功課簿出來，有中文習
作，數學工作紙、週記三本、中英默書簿都有仲有其
他不完整的Paper，嘩.........我收埋左佢十幾年，打開佢
開始浮現返D記憶喇，默書簿.....如無意外，呢兩本係唔
比得阿媽睇既......因為得10幾分....9成都係唔合格，而令
我印象深係...我係冇比阿媽簽名........，真係勁...我騙左阿
媽咁多年，今日攞返比阿媽睇，當然冇打我啦，但係就比
佢話我....正衰仔.....，好耐都冇比阿媽咁話過喇，但而家
阿媽都冇我乎..........，但如果早十幾年比阿媽發現，呢獲
打得甘囉.....一定....!!!

雖然我細個都唔係乖仔果種人，但都對得住父母丫，我自
己出去玩，但都冇學壞返來，十幾年後的我都幾好丫，有
份工，雖然唔係咩有名望的職業，但都叫養得起自己丫，
又找到個我喜歡既女朋友，我童年咁玩都有而家咁既回報，
嘩.................賺到喇......!!!

其實找到D舊週記，我睇返有好多野都有返記憶，走馬看花
咁睇，當中有睇到有D仲講到Irene的，等我認真睇返哂先寫
返我讀書時D經歷吧...!!

>>February 24, 2009 at 7:39:39 PM GMT+8

2009 年 2 月 22 日 星期日 【晴】

意外斷電....


返左工咁耐，今次第一次架車冇電，原本車內係
有後備電源的，但唔可以長時間使用，其實我唔
係太清楚電纜D電係點運作，但車廂無電只係暫時
性，好少可會長時間持續，但今次好奇怪，行左
大半車站都只係得幾支緊急燈著，間中仲完全熄
哂，響夜晚，架車冇燈著住行，比人見到真係以
為有鬼，完全冇燈持續左兩三秒左右便冇事，慶
幸係下一站就到總站，落左客講比上面知，只係
叫我嘗試放底集電弓再升返起試下，又比佢整得
返喎，哈哈...真係古怪，真係有鬼嗎...?響落集電
弓果陣，引來數十位人來睇，其實有咩咁好睇??
不過對D未見過人來講又真係可能幾有趣吧，話說
回頭，細個都試過坐緊架車斷電，得返三四支燈著
住，當時覺得架車突然冇電真係好過癮，而家關自
己事，原來要報上去攪好多野，一D都唔過癮......!!!
下次咪再來過就最好喇.......!其實我覺得一向自己都
係好黑.....，唔知點解我硬係覺得有單大大獲等住我
，假如.....Irene祈求的包包真的可以守護住我的話...
妳可唔可以每去一次都攞一個呀...?

>>February 23, 2009 at 2:57:07 PM GMT+8

2009 年 2 月 21 日 星期六 【微冷】

昂平一日遊


放假同女友去左昂平玩，我再一次坐360纜車，
對上一次坐係已經ex的事喇，當時係用職員身
份可以唔使比錢坐，果陣仲有四張免費票，比
敢死隊的人玩，如果大家冇唔記得，早陣子係
成架車跌到散哂，而冇人敢去玩，今次比上次
大風好多好多，架車係搖得好勁，有D就跌就跌
的感覺，但我而家先知.....坐360纜車D風景係完
完全全吸引唔到女友，因為..佢已經響更高空俯瞰
個香港機場無數次，反而之前因山泥傾瀉而沖爛
的山頭仲吸引佢睇.....一路望..."嘩....睇下....D山泥
可以蓋過段路，落雨去行死梗........."我真係冇佢咁
好氣，我都係望下個機場睇D飛機爬升同降落，眼
見下面的停機坪有好多架飛機...變到好似玩具咁，
好得意，對我呢D唔係成日坐飛機人來講，係最好
的風景區......。去到昂平市集，除了食之外咩都冇買
，總之..有得食都會入去食一食，經過便利店都要買
過支綠茶先安樂，唯一有得食而冇食係食齋，因為要
上到鬼咁高先有得食，懶人自然就........，回程時候，
360纜車好少人排隊，可能就來關門吧，我地可以兩
人一架纜車，爽呀，想睇下D風景啦....點知唔知大霧定
大塵，響纜車望下去，連個跑道都睇唔清，只係見到客
運大樓D點點燈光，回程風景有點失望呢，落纜車回到東
涌又東薈城食晚飯，又再食...飽到上心口，食完返去時，
大家心知呢個時候多夜機同時多人放工，要響裕東商埸
上機場巴士..一定企梗，而懶人搭車又話要訓覺，又做多
次傻仔搭S1去機場，再由機場訓返去屯門，整日行程就
係咁過，簡直充實到爆，回到家女友還講...下次去邊好..?
噢........!!鐵打的嗎妳...?我明天仲要返工呀....諗起都倦呀..唉....!!

昂平360纜車票兩大張...兩張價值二百唔記得幾多..!!


在纜車向下望既機場全景，好大霧..加上部相機ZOOM得唔遠....係咁上下，大家要求不要太高喇.!!


當日山泥傾瀉的其中一個山頭.....D泥土清晰可見，其實不止一處，女友望就係望呢D喇...!!!


珍珠奶茶、炸豆腐、炸餃子，本來一份兩人食，卒之食埋我份...我要買過之餘，仲要拮走我幾件...簡直無賴..!!


呢杯係三色雪榚...大家估下幾錢，係價值55大元......只係咁大杯...我又係食得少少，點解..?唔使講啦...!!!


靜宜、大雄..到此一遊


叮噹都有份去....下次啦，真正既叮噹在家訓緊..我估....，如果帶埋佢來，剛好一家三口，可惜纜車拒載叮噹、你都係在家看門口吧...!!


>>February 22, 2009 at 5:46:59 PM GMT+8

2009 年 2 月 20 日 星期五 【晴】

雪兒姑娘


好耐都冇見過雪兒喇，講起雪兒呢?究竟我地係邊度認識既
呢..?我諗冇人會估到，係診所，早幾年因為要長期出入診所
關係，我都可以話係果度既VIP....，即係可以過左時間可以買
飛睇醫生、趕時間可以打尖入去先，買飛唔記得帶任可文件
都可以買了飛...，當然唔止咁少啦，但我覺得有D係唔可以出
街既，你知我知佢知便算了，其實點解會同雪兒特別熟呢...?
我都唔知點解，果陣我係一個極度麻煩既Case，攪親我呢都
要用上差不多一個鐘，所以亦都可以講係姑娘都怕左我，而我
仲係要遲哂到先到診所，即係叫佢地唔使食飯，有時我都真係
幾討人厭....，可能雪兒係最junior關係啦，呢D爛Case都係雪兒
硬食，亦都係咁我同佢可能就特別熟，其實我都見證過好多野
架，雪兒結婚我有餅咭...哈哈，可知道一個病人同姑娘既關係，
可以去到咁，我覺得好難得，我覺對方已承認你是朋友，到新年
佢係第一個姑娘比利是我既.....果時開心死呀，因為諗都冇諗過去
診所都會收到紅封包呢.....!!而家我同雪兒少左見面好多喇，而我地
聯絡都係關email、好少用電話，難得今日可以大家碰到大家，真係
興奮呀....，大家一齊去食飯，還給我一封遲來的利是..哈哈...仲有得
收...估唔到呀，講起大家原來同一日都係去台灣玩，但地方唔同，
坐機時間前後腳，嘻....到時見到先算啦.....，其實我話成日見唔到佢
，係我自己懶得去找人吧，人家企定定在診所工作，要去碰她有幾難
，看來...和我做朋友都幾...."放飛機"呢....大家話係嘛..?

>>February 21, 2009 at 4:01:59 PM GMT+8

2009 年 2 月 19 日 星期四 【微冷】

有了妳......我...


整晚同Irene玩左三個幾鐘頭wii，打網球、
打保齡、打拳，打到我而家手鬼打咁痛，
女仔都唔講得笑，打起拳黎都幾狼死，我
都輸左三鋪比Irene，之後又一齊玩槍Game
，除左我同我個妹玩得咁開心外，Irene係
我第二個陪我玩咁耐咁開心既一個，我知
到我手明天一定一定會酸痛到會死，所以
我今次醒呀，我全程都用左手玩，如果係
右手玩，我明天真係連車都會開不動，好
了...Irene輸左遊戲比我，網球比我炒好多
隻蛋，明天我要妳請我出去食早餐，去最近
既老麥食，我好耐都冇食過佢果D早晨全餐、
薯餅....，我突然好想食呀，我們講起小時候
係唔係都係好幸去食麥當奴，係唔係細過都
係撒嬌要扭去食，原來我同Irene都係細個好
鐘意食.....，但我冇Irene咁幸福喇，我要食的
話，要默書合格有70分以上先有得去食一次，
想加大個餐阿媽都唔會比，諗起我小時候真
係心酸呀，而家D小朋友係幾咁幸福呢...，還有
我今日先知，Irene細個時有個願望，就係響麥
當奴開自己既生日會.....，哈哈，如果我肯攪呢
個生日會，妳會唔會去呀....?唔知有冇人肯陪妳
去呢而家....?我想像緊要D公關小妹妹為妳唱生日
歌，比玩具妳玩既樣會係點??諗起都好笑呀....!!

收到妳寄比我的信喇，老規舉...等妳飛走左先睇，
妳知道嘛，妳寫比我的所有信..加加埋埋真係足夠
我印本小說出來，其實內容都算得上愛情故事，有
時我亂抽一封睇番，我又會勾起好多事，畢竟我同
妳都一齊走過一段我深刻艱苦的路，看信的好處係
我可以憑信的字形，寫的力度，去推測當時妳的心
情，有幾封信紙的原子筆字跡係化開左的，加上信
的內容，我知道應該係眼淚的痕跡，是嗎?其實我以
前覺得寫信係好無聊，而家有E-mail為什麼還要比錢
寄呢?不過我現在看得多了，我感受到其不同之處，
難怪妳堅持要寫，原來意義在於這，所以我說....妳永
遠都係叻過我醒過我，因為以前真係唔識去感受呢種
感覺，是妳教曉我的......!不經不覺和妳都有一段日子，
慶幸我地還未試過不和要嗌交..不瞅不睬，我估是妳脾
氣太好了吧.....!!拍拖的日子裡......

有了妳...我永遠都會開心D...
有了妳...我懂得打算將來....
有了妳...我不會再唔記得交咭數...
有了妳...我唔怕比遊客問到我口啞啞...
有了妳...我好多好多的事都甘願去捱去做...
有了妳...我三餐不會成問題...
有了妳...我生活下去先感到趣味...

總之講到底...我唔可以冇左妳....!

>>February 20, 2009 at 7:26:02 PM GMT+8

2009 年 2 月 18 日 星期三 【暴雨】

大吃、渴、玩樂.......


報告出左顯示我冇事，即係我們生的下一代會有問題
的機會好低好低，同時，所有檢查已經做好，而今日
醫一講話"都可以出院"，Irene即係叫"咁我走喇"....!
我見到佢咁有決心要出院，便隨她喜歡吧，事實上要
再等一D較複雜的報告數據出，叫她住響醫院等的確對
佢好殘忍吧，用了兩個幾小時才完全攪好出院手續，
回到家後立即精神返哂，沖好涼休息多一陣更要嚷著
扭出街，果然又傻唔哂，還記得我之前應承過佢，出
院後任佢玩任佢食一天，首先去左買衫，看不中..反而
買左兩對鞋(仲貴...唉....)，之後捉左我陪佢去唱K，再之
後去左食壽司，最後再要我去埋許留山食甜品，一食食
左我兩碗(醫院是監倉嗎?妳啱啱放監出來嘛??)，本來還
要去睇電影，但冇咩電影好睇先擱置呢個節目，改去行
超級市場買日用品同埋佢最拿手既食物材料，一日用左
我.....嗚嗚.....連我隻蝦蟆散紙包都不能幸免，仙都唔仙下，
返到去，啱啱好睇綜藝節目，在醫院雖然她有得睇，但同
一個節目在醫院睇時，真係笑唔出喎，也許係啦，在醫院
睇感覺氣氛冷冰冰的係差一點吧...我明白的....!!因為我都住
過醫院，女友的感受我好明白好有共鳴的...我相信真係悶透
始終如他說...設施差不多，但不是返工比妳去住的下榻酒店嘛....

飯後回家之後，趁自己未眼訓又有心情有心機的時候，
正話Irene整理情人節的花，把扎花拆開後一看，原來花
托的部分全部都係紙、絲帶、花紙....，唉...呢度全部野都
可以響書局買了，而扎花去花店買的話，11支要得幾多錢..?
呢一鋪佢地花店都賺得我夠透了，唔怪得之我買完之後佢會
同我講情人節快樂呀，原來佢係同自己講......，我情人節真
係好快樂呀，我係咁收你地錢...幾百幾咁收....!!!好彩一年一次，
如果一個月一次就真係..我都去開花店喇.......!!!Irene拆開哂
11支花後就把佢一支一支咁修剪插入花樽，放在那裡??我
見到枱有幾支，廚房又有，洗手間都有一支，總之插到無處
不在，我真係佩服她的設計藝術。令我覺得錯愕的係，Irene
從出院返到屋企後完全兩個人，可謂....住院一條蟲..出院一條
龍.....由此可見...我相信妳真係冇病.......抖多一天出去再捱吧..!!

>>February 19, 2009 at 5:58:10 PM GMT+8

2009 年 2 月 17 日 星期二 【炎熱】

地中海貧血症


今日放工去睇Irene，見到個傻妹訓到隻豬咁
，唔想嘈醒佢，我由個傻妹繼續訓，點知佢
真係訓到唔識得醒，真係好懶訓，我忍不住
拍個傻妹起身，第一句就同我講..好肚餓呀!
隔離床個病人食D飯菜好香呀....不斷扭計要食
野，十足十個小朋友咁，唉...見佢咁可憐我幫
佢走去問個護士小姐，問佢幾時有得食返野，
唔使再吊針，只要個報告一出冇需要再做其他
大關檢查就可以食返野，但報告要晚上才send
到醫生度，大約8:00左右，報告出了，顯示初
步無大問題，但有地中海貧血症，是家族遺傳
的，亦都係咁原因，我都要檢血，因為如果我
和Irene要生BB的話，如果我同佢都有呢個病，
生出來個BB可能會有缺憾，不健康，Irene聽左
面色變了，我明白的，Irene好喜歡BB，一直好
想有自己既仔女，如果我都有病的話，咁生BB
的夢就會泡湯，而我深深感覺到Irene反而不緊張
自己身體，佢好緊張我的報告，其實....我都不知道
會點，我都估不到，既然係咁Irene呀..我地唔好擔
心咁多啦，我們向好的方面想啦，我相信我地會有
屬於我地既仔女，不要再唔開心喇，無論怎樣我都
們在妳身邊，妳知嘛，妳唔開心的樣子會顯得妳唔
靚女架，化妝袋我攞左比妳，悶悶的話自己玩下化
妝啦，等我可以見到一個靚靚既女朋友，好嗎.....

放心啦..我有信心....我會冇事的.....我真係有信心架

>>February 18, 2009 at 2:35:47 PM GMT+8

2009 年 2 月 16 日 星期一 【颳風】

入院檢查day 1


Irene今日見唔舒服，陪佢一齊睇醫生，其實女友已經係
成日都頭暈，或者女仔身體比較弱吧，而本身血糖過低
已經係已知道的事，所以女友身上總會有糖果朱古力等
等，但其實女友已經成日食甜野，點解仲會暈，醫生也
不知道，終於今次醫生要Irene去check，我知女友十萬
個不願意，但始終都入左去檢查，趁呢三日係G Day唔
使返工，乖乖咁做檢查吧，醫生都係話最多三日就可以
出院...比D耐性捱呢兩三日啦....

正話同女友傾完電話，不知不覺陪左妳成兩個幾，差唔
多三個鐘，而我在聽筒我聽得最多係..我好悶呀、冇野做
冇野食呀....唔比我食野呀!!!打針好驚呀!!!其實妳都唔係
打針，打來打去都係一針，果針係比妳落鹽水、葡萄糖
水，醫生話一食得返野就可以唔使吊針，只不過，我相
信女友真係好悶既，因為我都住過醫院，我仲要住政府
醫院，電視都冇得睇，電話都冇得聽，而家住私家已經
舒服好多喇...妳又唔比我話比妳父母知，如果佢地知，佢
地會陪下妳嘛，傻瓜，住私家同政府分別係咩呀?就係有
自由探病時間嘛，只係我來睇妳，下下等我放工，一定悶
到妳傻呀，傻瓜.....!!!不過妳如果聽話.....乖乖地捱多兩日呢
，出院比妳任食一餐啦..好嘛...?

其實....冇妳在家我都好悶呀，我都好想妳返屋企，但係妳
成日都頭暈，暈到跌落地，擔心妳唔知咩事嘛，雖然我知
妳驚...驗出既結果係唔知係咩，但只係普通詳細檢查，醫生
都話以防萬一，如果驗左冇事，妳就算暈..我都冇咁驚，放
心啦..下次到妳睇返我呀，我下次入院照鏡時......妳話就算要
詐病都會陪我架....!!我記得架......哈哈....!!好啦，三點幾喇，
我要訓喇，我都知妳訓唔著喇，好喇...睇完我呢篇日誌好試
下訓喇，最多比妳打多個留言，就好去訓喇..!!真係好想好想
傾計...又真係訓唔到....就打比我啦.....

早抖喇

>>February 17, 2009 at 7:40:01 PM GMT+8