2009 年 3 月 7 日 星期六 【暴雨】

終於捱到放假喇...辛苦妳了...


Irene返到香港喇，今日接左佢放工，天氣變得好凍，同佢出發果日
差好遠，所以我都帶多件褸同多一條頸巾比Irene，怕佢凍親嘛，如
果Irene凍親的話，我就會冇飯食架喇，無法啦，我已經完完全全倚
賴Irene，冇佢睇怕我會餓死，接Irene時，接手拉suitcare，果兩個咁
既suitcase真係重到離哂譜，如果要一個女仔拉佢走上巴士，放搬上
巴士上的行李架上，真係一件好困難的事，上車坐好問Irene，果時冇
人幫妳抬件行李，妳會點算?Irene答頂硬上囉，都要搬架!!!好彩既遇上
D鬼佬咪會幫手囉，亦都試過巴士司機主動幫手，但係今次，Irene話，
你一定要幫我拉...幫我搬，我問點解??咪因為裡面好多野都係你囉，
問到買左咩咁重，原來係一大堆我好鍾意食既百力滋，Irene買左好多
隻味道，有好多我都未試過，今次我真係有排食喇，諗起都開心呀....!!

回程在巴士上，架車都未到東涌，Irene已經倦到訓著左，看著Irene睡覺
的樣子，清楚睇到佢化既化妝，其實望真D，Irene都幾靚女丫，點解成
日都話自己唔靚喎，在陽光反射下，見到Irene臉頰兩邊有D閃下閃下的
粉，應該係化妝品的效果，嗯.......妳好靚好吸引呀.....





我的最愛之一..百力滋，真係要多謝irene呀，今次我真係有排食喇.....!!













>>March 8, 2009 at 4:27:37 PM GMT+8

2009 年 3 月 6 日 星期五 【暴雨】

阿貞..唔係...要改口了，方太的婚宴



去左阿貞果婚宴，好開心，好熱鬧，阿貞三套婚紗都好靚
，而新娘本身已經係麗質，而今日係女性所謂最美麗的一
天，今日的她靚上加靚，在此再一次恭喜呢對新人白頭偕老
，永結同心，快快手生個BB出來，快D做媽咪啦....我有BB玩...

去果時發生左D事，我地應該係去九龍維景酒店，點知我同
阿傑像白痴一樣，去錯旺角維景酒店，去到仲要問個姐姐仔
，問姓方的婚宴在那，點知佢反問我地..我地冇人攪婚宴喎今
日，你地係唔係去錯地方呀??唉...兩個男人都會去錯地方，真
係瘀到振，走都走唔切，立即飛的士去正確地方，沿途仲要塞
下車，本來五分鐘車程坐足十五分鐘，車錢就....不要提了.!!!

去到真係好多人，阿傑話D姊妹質數不錯喎，咁講真又的確係
既，個個都幾好樣，我地係會場係咁飲飲食食，未上菜我地都
已經半飽了，酒店不同酒樓，餸菜來到係侍應生夾比分比大家，
大家唔使搶食，有好有唔好，好既係衛生，唔係夾來夾去，唔好
既係，自己想食多D既菜冇得隨心去夾， 我比較鐘意搶食多D

宴會完左，我同貞影多幾張相，我諗今次係最後一次，阿貞會捉
住我手影相喇，唔好誤會呀，我地冇野架，哈哈，最緊要Irene唔
好誤會呀，我知Irene 唔會唔相信我既，最多呢張相我遲D比妳檢查
啦..好嘛...?酒店仲有唔同之處，就係有専車送我地去地鐵站，服務
真係週到，我都想..如果我地的婚宴可以去酒店擺，都唔錯喎.....!!!!
Irene妳點睇呀...?

方太的結婚照呀....!!


杯什果賓治真係好好飲，酒店既係唔同D，美中不足係佢可能由高杯斟到低杯，攪到D杯好黏手....!!


結婚每人一份的禮物，係朱古力黎，幾好食......!!


比人隊左幾杯紅酒，其實不知不覺的，因為D紅酒幾好飲，果味好重好香，間中一次，飲醉都值得呀....!!


>>March 8, 2009 at 4:28:29 PM GMT+8

2009 年 3 月 5 日 星期四 【颳風】

一個人


今日夜晚陪左C4去食宵夜，女友不在家，一支公都
唔知可以做D咩，呢D朋友時間夾得啱啱好，不過我
冇諗過會食通頂、玩通頂，究竟係邊個無端端話去
唱K架...?

朝早先至回家，回家打開門，第一眼就見到肥貓咪伏
響餐枱上面，我一返來就跳過黎，知喇....未比早餐你嘛
，嗱....呢D咪比Irene縱慣囉，只係識食同訓，同我一樣，
即係比Irene經手的都會變懶，Irene唔知而家有冇打噴嚏
呢...?[嗯......Irene...妳而家在另一邊做緊咩呀??好掛住妳呀，
如果妳在家，我便不用出去陪朋友玩啦....!!我同肥貓咪都等
緊妳返來屋企..比糧我地食呀......

>>March 8, 2009 at 4:23:20 PM GMT+8

2009 年 3 月 4 日 星期三 【乍寒還暖】

雨景


唔知Irene果邊會唔會好似香港咁，突然咁大雨呢..?
Irene都算飛得合時呀，呢D天氣竟然唔響香港，但就
錯過左一個好可愛既畫面喇，唔知貓咪係唔係好少可
可以見到響，家中房間望街外雨景呢...?貓咪好少可真
係定格咁向街望，我響冇Irene陪我的日子裡，貓咪就
係陪我的伴，為左貓咪更舒服睇得，我將D貓糧放響佢
露台邊，等佢可以一邊食一邊睇，望落仲舒服過我，食
既又係空運到來的食物，比我更幸運呀真係.....

好耐都冇試過下雨戰喇，最憎..!!!因為刹車要算多一點點
時間，還有可能跣鋼轆，睇位又麻煩，要留意D乘客雨傘
有冇比門夾到，上落車時間又長左，我休息時間少左，最
唔習慣係冇左住家飯食，而家我深深發覺我真係愛上Irene
煮既飯盒....哈哈，借D耳讚下Irene先。我想妳快D放工回香
港呀，返工留遺下我，我好慘呀.......，妳果邊上網又好貴，
我只可以同妳講兩分鐘電話，我同貓咪好想妳快D返架，
也許我一定要接妳放工，下雨天妳一個人一定會好論盡，
像一個大傻瓜一樣，一邊拉住suitcase..一邊攞住把遮...唉.....
都係讓我等我接妳吧...

>>March 5, 2009 at 3:52:56 PM GMT+8

2009 年 3 月 3 日 星期二 【陰】

另類興趣


又得返自己一個人響屋企，無法....女友都要搵食，
但今次唔係去一兩日，而係去四日，我知道冇得怨
既，我認識女友時已經知道佢既工作係咁，無得話
唔鐘意，算數啦.....!!

返回天水圍訓返一晚，數數手指，真係好耐冇返娘家
訓喇，在自己家有細妹陪，冇咁悶，仲有人可以陪我
打機，不過見細妹左一楝右一楝paper要讀要做，我都
唔想阻佢要佢陪我打機，問到細妹讀社工都要讀咁多野
既咩...?睇到佢D書，我頭都暈，全部英文，本本成四五
吋厚，如果比我讀，我諗我讀七年都讀唔識，在我自己
統計中，女仔讀書係叻D，所以我希望生既..係囡囡呀。

今日去讀書館睇到本書，原來BB未出世，在肚裡面第一
個感知係聽覺，原來BB響肚內已經學習語言，唔怪得之
D有錢人要比自己個老婆聽音樂、聽英文等等，原來真係
有跟據既，睇黎第時Irene有BB的話，我都要學下先得喇
，反正BB在肚中都冇既做，聽下語言訓練下都好嘛，哈...
而家攪到我，對D育嬰書好有興趣添，同Irene相量下訂唔
訂閱好先.....訂既話會平D嘛，我都要學下Irene咁精打細算
先得....要慳錢呀.....!!

>>March 4, 2009 at 3:40:58 PM GMT+8

2009 年 3 月 2 日 星期一 【陰】

望著妳背影的感覺


放工陪Irene行街，因為佢明天又要返工喇，仲要走乒乓波
更，見佢講到乒乓波更就扁哂嘴就知呢一躺辛苦死Irene喇
一定，但係roster 又唔係自己訂，只好認命，其實都好好
運喇，我有D同學之前仲慘，走兩水都係呢D咁既roster，我
都係久唔久一次，算了吧，在街上Irene滴咕滴咕咁說著...!!

其實我知Irene返工係辛苦既，起初識她時總覺得她風風光光
咁，行出街總有人望，滿有自信...串串貢的架子咁，但一上機
後就要笑足全程，比客鬧冇得還擊，聽Irene講在初入行時，
真係受不了乘客的無理取鬧，唯有躲入廚房喊過夠，而現在
的她當然係百"鬧"不侵啦，所以我覺得Irene咁好脾氣都係從
機倉訓練返來的，練到EQ甚高，也有好處吧，用於感情上，
我地起碼冇鬧過交丫，當然...我既EQ都係從舊女友練返來的啦
，其實我都怕我們有冇一天會鬧交呢?我真係想像唔到我同妳
鬧交的樣子，咁我當然希望我地呢一世都唔會嘈交、鬧交啦.....
也許....妳對我太好喇，我覺得自己唔對返妳好一點，我會好對
妳唔住，或者呢D就係叫..妳對我好，我對妳好，妳對我再好，我
對妳更加好....!!原來呢D都適合用於雙方感情之上呀...

好喇..見Irene咁辛苦，找點東西逗她開心啦，其實Irene好容易
開心，好容易滿足，要女友開心都不一定送花送金銀鑽石既，
開心都係想女友可以笑笑笑，只要有樣事情可以令Irene開心咁
笑，我就覺得自己成功架喇，在商場上除左金銀手飾店時裝店
之外，仲有一處小朋友去到都好開心既糖果屋，明天Irene返工
，我任她夾糖夾過夠，響接近五十種糖果在她眼前任夾，Irene
笑喇...，呢個笑容同收花收頸飾手飾係一樣的，看見她同小朋友
一齊好似搶住夾個樣...有點好笑，比小朋友著數的係，Irene比小
朋友手長同腳長，夾糖處於有利位置，背著我係咁夾係咁夾，不
覺地夾左半包，還傻著氣講，明天帶上機食，所以夾多D啊..!!!

隨妳喜歡啦，只要妳鐘意就可以喇，從心底說，我同Irene一齊
好開心，雖然有時分開兩地少見面左，但我真係丁點要變心的
感覺都無，可能我怕妳喊的樣子啦，我會提自己唔可以令妳傷心
、失望、唔開心......，因為妳從來都未試過令我傷心、失望、唔
開心......我不敢去負妳呀....

今日夾得Irene好開心既糖....有半包架，已經食左一部份，順帶一題，呢一包糖係當時響糖果屋內夾得最大包既一包，人家媽咪邊肯比小朋友夾咁多呢，但我唔同，我會比妳任夾，只要妳開心!!



>>March 3, 2009 at 7:47:19 PM GMT+8

2009 年 3 月 1 日 星期日 【微冷】

好倦....


其實我最唔鍾意幫人駕車返來，既然預左出去飲酒
，就唔好駕車出去啦，做朋友一陣唔幫你你有事又
唔知我錯定你錯....，都唔係第一次啦..!!!下次麻煩你
搭的士好嗎??本來好地地可以訓覺，而家成四點都
黎，呵欠.........好倦呀訓喇......懶得打字...!!!!

>>March 2, 2009 at 7:58:22 PM GMT+8

2009 年 2 月 28 日 星期六 【炎熱】

早.....


好似好耐都試過返咁早喇..!!神人可以起身比我更早...!!
沖左杯好苦既咖啡，整好四件三文治放左響枱，等我
呢個懶人去食.......仲準備好雪櫃內的午餐飯盒比我帶
飯...，辛苦妳了......。現在的妳已經再入睡，現在呢一
刻的我除了打緊呢篇野外，還正準備飲完最後一口咖啡
，講真...好鬼苦.....妳去邊度買架...??還好...苦到我醒過
來..太棒喇。

應承妳..放工陪妳去邊都可以...

要返工了，614→751→11:00 - 12:00→13:30 pt430 (妳都要識睇我的呀)
真的要返工喇...

--------------------------------------------------------------------------------------------------------------------
籌備結婚...由零開始 【晚上】 《清涼》



真係估唔到妳可以咁醒，響車站等我落地，還以為
妳想坐車遊車河，原來黎到係想沒收我個午飯盒.?
再問下去先知道妳想在家蒸熱，到我食晏先再攞比
我食，妳對我太好喇，真係感動到暈，真係冇諗過
妳會忽然間響總站出現，還以為天氣涼左，返工妳
又倦，諗住妳會一覺睡到我回家，誰不知，妳會出
現，估妳唔到呀，講起，蒸熱的飯同叮熱的飯，真
係有出入，蒸既飯真係好食D，冇咁乾身，好好食。

Irene呀....妳唔好咁縱我啦，妳知唔知妳無時無刻都
遷就我呀，而妳就成日都辛苦自己，我見到妳頻頻
撲撲，我都唔知是心痛還是過意不去，望見妳返工
就真係返工，放假又響屋企返工，段估我都唔會將
我最愛的人當工人咁駛吧，我知....同妳講親妳一定
話我願意、我鐘意呢D話，但係....妳真係一D都唔辛
苦嗎?我清楚妳的，都係果句啦，如果有一天妳真係
唔想做，就唔好做喇，妳同我以前女友相比，有天壤
之別，妳做任何事都會井井有條，好有方向，真係唔
係個個女仔都會有呢D優點呀，能夠拖到妳手是我的
幸運，妳的不幸，看.....!!好多事都要妳執我手尾便知
道啦，有時我諗，我有咩可以為妳去做呢....?如果男人
可以代女人生BB，我會仆到去幫妳生。記得我們有一
晚講呢個話題嗎?妳話親身陀住自己同老公既BB，會
好開心，唔會怕痛、暈、嘔....呢D副作用，都會堅持住
直到生出來為止，嗯.....其實我點會不知道呢，妳一向都
好想有自己的家庭嘛，由同你拍拖第一個月已經同我講
，妳記得嗎...?所以上次....如果不幸我同妳都有同一個病
的話，我都不知點向妳講，妳說妳當日訓不到，那邊廂
的我都係一樣，我擔心的唔係有冇BB生，而係妳呀，
我怕妳當妳知道是壞消息....妳會失控..!!好彩..最後冇事.....
是妳每天祈禱，天父給妳的恩典吧....，你知嘛，我第一
次同妳食飯，見妳飯前祈禱..我覺得好怪架，而家....妳
間中都會向我叫我返教會...哈哈，我唔返....妳冇迫我，
但我知的，結婚行教堂的話，我要好似妳咁做一個受洗
既教徒先得，是嗎..?妳想咩心諗咩.....其實我大概估到既....。
無可否認，行教堂行禮真係幾特別的，人生中..我都想試一次。

阿貞已經將要結婚，我知我都不可以再拖下去，或者
我真係要開始問定結婚需要的事宜喇，我什麼都懶懶閒
咁，我的性格我真係怕攪唔到呢D野，諗到呢度，我發
覺有件事，我不知不覺間會唔會令到Irene妳唔開心，妳
每次經過婚紗店都會停步...望望
望...，而我則會拉妳走，
其實我應該一早要知道，我應該和妳一齊望先係，但我
冇理妳，我早知妳對結婚充滿著好多好多憧憬，為什麼
我果刻不肯為妳停下十分鐘，和妳商量，我係唔係好無誠
意呀?答應妳，如果妳想睇呢D野，我一定會陪妳看到夠，
其實我都應該要知妳心想要的婚禮是怎樣的，想著的婚紗
又是怎樣的等等事情，我既然認定妳是我老婆的話，我都
要開始著手籌備，因為...我真係好想同你結婚，真真正正
咁一齊過生活
，人生中有好多個目標，而我其中一個目標
就係娶妳為妻，我不需要像童話故事的灰姑娘、白雪公主
的咁浪漫偉大，只願Irene能夠將結婚當日銘記在心已經足
夠.....，容許我再講多次我愛妳..irene...。

>>March 1, 2009 at 6:59:06 PM GMT+8

2009 年 2 月 27 日 星期五 【陰】

紅色大炸彈



昨日碰到阿貞後，今日阿貞send message比我，話我
知，我要結婚喇，開頭我還以為睇錯，係邊個結婚呀
究竟?望真D真係阿貞，我頓時呆左半秒，連阿貞都結
婚喇，但自己仲.....毫無起色，很慚愧啊...!!約左個時間
阿貞親自比喜帖我之餘，我地仲一齊食個飯，傾下近
況，估不到只係冇見兩年左右，變化已經咁大，睇黎我
都要急起趕上喇..!!

今年我好多朋友都話結婚，已派炸彈的已經有兩個，我
相信有D仲未炸來住，不過中彈都係遲早的事，而每次收
喜帖時個個都會問我一個問題，就係...幾時到你呀??噢...
我真係答唔到你地呀，我只可以講來緊兩三年啦應該，我
都要等Irene肯嫁比我先得架?諗起要點求婚...我真係暈左
響度，要花、跪、求、介子??還要響咩地方求呀??在機場
十萬對眼望住?大叫"嫁比我啦"，女的我估會好開心，男
的一定前途盡毀啦，但係看電視劇衝上雲宵...當中有段戲係
響機場求婚，我在公仔箱看十分浪漫，的確真係好跨張，
唔知我做唔做得出呢...?不諗了.....我估真係咁求婚後，我永
遠都不會踏入機場.....Irene...呢D野在家中做可以嗎...?????

傍晚Irene返到來香港，響機場行左一陣食過野之後，就出
左去佐敦行街，之後又去左旺角、元朗、屯門，最後先返屋
企，我地今日買左好多野，又換左好多野，其中係信用咭禮
品、去莎莎買左支香水送比Irene，Irene又買左個飽..比我"食"
，而個飽真係做得好似，打開仲有飽的香味，我有衝動咬佢
一口，我嘗試比貓咪玩，點知佢真係想咬，攞走都差D攞唔切
，可想而知...隻"飽"像真度係幾高呢....?

我..........最後問左Irene.....有冇走到光??
Irene.....無呀..一定冇...
我..........真係??
Irene.....係呀...，因為我都冇除過件外褸...
我..........點解唔除呀??
Irene.....天氣涼嘛....放心啦...我冇蝕底比其他人呀....
我..........咁卷雙面膠紙...有冇??
Irene.....冇呀.......冇用呀.....
得啦得啦....我會攞返去公司整返好件衫架喇.....，我真係唔會
去蝕底比其他人....


其實..我知妳唔會蝕底比其他人睇到，但做得妳男友當然唔想
有其他人男人望住妳啦..係咪...!!!



兩張大炸彈....合共1500蚊


像真度極高...香味都一樣有既鮮奶球


信用咭禮品.多啦A夢杯、鬧鐘，仲有送比Irene既香水...


Irene..喜歡儲香水...櫃中的其中一堆


>>February 28, 2009 at 4:09:56 PM GMT+8

2009 年 2 月 26 日 星期四 【酷熱】

有緣千里能相會啊...!!



是日陪女友返工，我開始識得點拉佢個行李喇
，記得我開頭，我幫佢拉個suitcase時，我成
日都比佢個suitcase "click"到自己隻腳，總之
我係操縱唔到佢點行，但眼見個個空服都拉得
好自在，為什麼我會咁難拉呢...?之不過..而家我
拉多左喇，開始知點就位去拉，看來我頗有天份
呢，我一定要學識點拉，只因為她們覺得有人幫
佢拉呢個咁笨重既suitcase....，會很感動啊!!!!!!就
算在街上，見到一個你唔識佢既空服，你見佢拉
上樓梯，好辛苦，見到佢老鼠拉龜的樣子，如果
有男仔肯呢個時候出手幫佢的話，佢真係會覺得
你好man，或者就係咁，你可能會有一段與她的
情緣架，呢D說話係女友講我知的...，因為佢地
真係好渴望有人幫下佢，始終女孩子喜歡被人關
心痛錫啦.....!!

送完女友返工後，就到我返工喇，今日我總共見返
兩個以前在工作上認識的朋友，確實唔知撞左咩邪
，居然可以比我一日見返兩個認識的人 ，第一個比
我碰返的人，就係我在社區中心做野果陣時，我同
佢補習託管的小朋友既家長，真係估不到她仲認得
我，第一句....阿Sir...你瘦左好多呢，哈哈真的嗎...?
其實我而家已經係個肥仔一大個，假若佢話我瘦左
好多的話，咁我以前咪超級痴肥....?!噢.......不敢想像
喇，我問到佢個仔點呀而家?佢媽咪話，咪同以前一
樣咁懶散囉，而家冇人篤佢讀書，阿媽自己又唔識字
，唯有都要死慳死抵都要比錢請人幫佢補習，聽到咁
，我開始覺得為人父母真係辛苦又擔心，如果第日生
個仔或者女，好似Irene咁乖咁叻咁靚....就話o者...!!似
我...?真係死得，又唔靚又唔叻又唔乖....實行教死Irene
教到噴血都似呀...一定，哈哈....!!響傍晚.....開車途中又
響元朗豐年路站，我碰返阿貞，阿貞眼利呀，話比你地
知呀，我其實最怕係開車埋站時比人拍玻璃窗，無端端
比人嚇一嚇難聽D，真係如果急尿的話，瀨都有之呀...!!!
嚇鬼我果個阿貞係我響社區中心做時，第一個肯教我做
野既同事，記得第一天，我見到佢，我認定佢一定大過
我，因為佢做野D手腳一D都唔似，做起事有文有路，攪
到我直頭唔敢得罪佢咁，有問題都唔多敢問佢，當時我
咁junior，點敢問佢呢D問題喎，認識日子耐左，先知佢都
係一個好同事，一齊做事真係好鬼開心，響咁多同事中
，佢係最比自由我既一個，又唔會點我做野，反而幫返我
做，攪到我反而唔敢吞POP，有一次我比個另一個社工同
事點我做野，要我八小時內入好一千個會員，當時我以為
硬死，講真..我果刻真係想喊.......一千多個會員呀.....點嘔比
佢呀，好彩有阿貞幫我，我先冇比人玩死睇死。每次諗起
真係要跪地感謝佢呀....!!雖然而家我唔係太鐘意自己呢份工
作，因為壓力真係好大，但有時諗落做呢份工都會幾好(究
竟鐘意定唔鐘意呀??)，因為好費精神，但係有道好係，你
會有機會間唔中碰到D舊朋友、舊同學，試想想....我可以穿
梭兩邊咁多次，梗有一天會碰到面掛，Irene就係咁碰返來
呢...!!而家手機上又多左個朋友電話，找食飯對象又多一個
人喇...啱哂我呢D怕孤獨的人，出來做野總係要識多個朋友
好D既，正所謂在家靠父母、在街靠朋友嘛!!!!

>>February 27, 2009 at 8:32:08 PM GMT+8