2009 年 3 月 17 日 星期二 【炎熱】

心生妒忌著緊妳....


嗱.....Irene我好守承諾啦，係咪?話黎妳真係現身喇，
睇下我對妳幾好丫..哈哈，不過點都唔及妳對我咁好
，不知不覺我覺得自己已經習慣途人既目光，起初
我同妳一齊，只要妳著住套制服，我就好唔知點咁，
一來自己唔係靚仔啦，總係覺得襯托唔起妳，二來，
尤其係同妳等車的時候，總會有D男人打量妳，我真係
好唔鍾意，所以我好多時都遮住別人既視線，等佢望
唔到妳，但人得我一個，望既就同時有幾對眼一齊望
，我可以遮得幾多丫...??可能呢D係自私既心態啦，覺
得妳是我的女朋友，只有我先可以望，其他人唔准，而
家接送得妳多，我留意見到妳其他同事都係咁，同樣地比
其他男人打量!自己又諗，其實將心比己，有個咁突出既
女仔企出來，我都會望多兩眼啦，只要佢唔係過份，我
都算吧而家，畢竟我控制唔到其他人，另外令我加左點
點信心係，我有幾次響機場都見到妳們同事拖住的男朋
友，平心而論..比我更差的..都敢拖住佢女友手行，咁我
仲可以有咩擔心、顧忌呢...??只不過，今日呢樣野，妳
估下佢係唔係有心既...?我一定係話佢有心既、特登既...
，有咩理由巴士仲有咁多位，個男人係都要坐的旁邊呀..?
我只係用左幫妳放行李上巴士行李架上呢一段短時間，
佢就一個唔該坐左妳隔離，在公路上我仲見佢想訓覺挨
向妳，雖然佢始終個頭趺極都冇掂過妳挨到妳，但係我
覺得我女友好似比人搶左咁，妳知嘛..我全程都冇訓過，
我係咁看守住條友仔，我心裡諗，如果佢夠膽掂到妳，
我一定唔會放過佢呢，我果刻強烈感到自己好唔甘心呢，
明明係我坐過位，比其實男人坐左，明明係應該妳挨向
我的，而家差D比個陌生的男人挨返轉頭!!唔知道呢D係
唔係叫心生妒忌呢......??點講都好啦.....果刻好唔開心，
今次係我坐機場巴士坐得最耐最痛苦既一次，我下次唔
會再比妳上去先，一齊放工好行李先一齊上，免得再比
機會其他男人......『捷足先登』呀...!!!!!!!!!!!!!!!!

攪到我落車反而要妳逗我開心，妳覺得我其實係唔係好小
氣好敏感呀?只但係...落車後妳見到我咁妳仲咁開心，開
頭我真係比妳氣暈呀，但我而家先知道，我見我咁緊張..
妳仲開心(妳變態的嗎???)......，傻人呀...我唔緊張還可以
緊張邊個呢...?

落左機的妳，點解今日妳會咁精神呢....?有精神陪肥貓咪玩
，有時間去超級市場掃左600幾蚊野返來，睇下而家咩時間
?妳可以令到我而家就天光先寫今日既日誌，果然回程做左
轉Passenger duty係唔同D，今次妳贏哂喇，我唔夠妳來，
冇妳咁好精神呀，其實...呢篇日誌..我打打下有幾次我都恰
著左，不行喇...要訓喇，真係丫....如果唔係我明天放假，我
都不會同妳癲咁耐呀.......，妳差D攪到隻貓都冇得訓呀..唉......

>>March 18, 2009 at 9:07:05 PM GMT+8

2009 年 3 月 16 日 星期一 【晴】

已婚校花...!!



今日返天水圍家前，我去左下面街市買腸粉魚旦、粉果
、豆腐花食，響買豆腐花時我碰返以前紅十字會的舊同
校會員，數一數手指，都十幾年冇見喇，而家佢響一家
Technology公司做Engineer，都不錯的工作呀，而且仲有
自己既私家車添，很慚愧呀自己，其實佢同我都係住同一
座樓，舊時返學我地間中都會一齊返或者一齊放，算係幾
friend架，雖然我同佢唔同form，但果時人人都覺得佢大過
我，因為佢以前都係同而家一樣，牛高馬大king size.....!!!!!

晚上，約左佢出來食飯，女友飛走左，自己一個人食咩都
得，冇王管，而佢仲約埋阿熹出黎，講都唔信，原來阿熹
已為人妻，嘩...佢老公執到啦，當年的校花呀，我當年入
紅十字會都係為左近下個校花乍，果時可以攞到佢電話號
碼已經好巴閉呢，其實如無意外呢，Irene都應該識得佢，
講返阿熹，佢仍然都係咁標緻，問佢幾時會生仔，哈.....
佢只係傻笑，咁即係點呀...?趕工中定還要遲D先呀...?衰鬼..

阿熹食飯時都有問我呢十幾年有咩攪作，打探我既另一半，
唉........做左人老婆都係八八掛掛，應承阿熹來緊星期六，佢
帶佢老公出黎，我帶我女友出來，齊齊亮相，而家Irene都仲
未知，而家我反而想知Irene仲會唔會記得阿熹呢朵花呢...?

>>March 17, 2009 at 3:57:52 PM GMT+8

2009 年 3 月 15 日 星期日 【炎熱】

每日三片....知道..!!!!


今日在facebook度找返中學時代既同學，
開初對我冇咩印象，但講下講下就記得喇
，其實要認返我唔係好困難我覺得，事關
我以前都算係攪亂檔既學生，但雖然係咁，
我又從來冇試過記缺點、小過大過，而印
象中好似只係記過一個優點吧，講起優點，
有一日我放晏食飯去許留山食糖水果時，有
一對學生小情人，我聽到一段幾有趣既對話
，對話大概係咁...如下....
男學生﹕我今日執到個銀包呀
女學生﹕裡面有幾錢呀?
男學生﹕得40蚊...!!
女朋友﹕咁少...?咁你點呀?
男學生﹕交左去校務處喇....明天班主任會記一個優點比我呀..!!
女學生﹕上次你執到張八達通又係交去學校..已經記多左一個....
早知你比我..話係我執啦...等我都記個優點嘛..!!
其實咩而家D學校咁兒戲就記一個優點架喇...?
我覺得銀包執到記優點..合理既，但一張八達通
都有得記...??有冇攪錯呀..!!咁我比張八達通你，
你交比學校話係你執，咁咪有一個優點囉....!!!!!
我記得我讀書果陣，要記一個優點係好困難，但
我發覺而家少少野都會記一個，好容易咁，到學期
尾成績表變得好好睇，但事實上呢一個學生只係
純粹執左幾張八達通，準時交功課幾個月或者返學
冇遲到，查實呢D唔係學生應做既咩...?如果係咁，
當年我都可以記到好多個大功喇....!!而家我返工，
響放學時間當更時，見到有D學生講D好流利粗口，間
中又會見到D手攞住煙仔既學生，而我發覺佢地好得
意，攞住煙仔時佢地又唔敢當眾吸，見到佢地好快咁
扯左一口，隻手又縮返響後面，又要驚比人見，又要
學人煲，心態是什麼呢??不要說人地，連我個堂表弟
都係咁，佢老竇就食日響我面前大吹大擂佢D女幾叻，
讀大學咩咩咩，如果我當眾篤爆佢個仔出來，看來我
都有好戲睇..!!!只但係如果我係見到我阿媽果邊既親戚，
我果邊D表弟妹，我一定會出聲，我承認我係偏心我
阿媽果邊呢，我老竇果邊，佢死左都唔關我事...!!還
未向你計數話Irene水性陽花呢一筆呀...!!!我呢一世都記
得呀!!!!諗起都火起呀...，唉.......點解講下講下會講左
咁遠架...??查實今日真係冇咩事發生，無驚無險，如
果要講既係Irene唔知去邊度買左10幾樽，藍梅素既糖
片我食，每日服三片，奇係奇在係響我返左工先放出來
，我返到屋企妳又飛走左，留低便條妳就走左去返工喇
，Sorry呀....今日送唔到妳返工呀，但我知妳去好近地方
，個suitcase唔會好重，今次妳應該拉得輕鬆一點，同以
前一樣啦，那個地方等....等接妳放工呀，仲有....真係多謝
妳D糖呀，妳便條講得冇錯呀，我返工真係用好多眼力呀
，唔保養一下，萬一真係睇唔到野就真係.....大鑊喇!!!睇唔
到妳仲更加唔使講啦，怎捨得呢，放心啦...每日三片，我
會定時準時食架喇....!!

>>March 16, 2009 at 6:58:49 PM GMT+8

2009 年 3 月 14 日 星期六 【炎熱】

婚禮...開始籌備...



放工返到屋企，女友抱起隻肥貓咪開門比我，其實
我入門口第一眼只見到肥貓咪，唉....呢隻好可惡既
肥貓咪成日搶我女朋友，真係好想籐條炆貓肉咁處
置佢，但我相信，如果我咁做，女友一定會炆返我
轉頭，而家隻貓後台好大，Irene緃壞哂佢，成日比
好野佢食，又成日同佢玩，攪到隻貓咪開始只係跟
佢，唔跟我，唉...衰貓呀....我執你返來唔係用來搶
我女朋友架!!!記得開初我好怕隻貓會唔跟Irene，仲
會倒亂反轉屋企，誰不知佢竟然乖到出汁，好啦....
!!!!!!!而家佢仲可以比Irene抱抱，我就冇....我係唔係
連隻貓都不如呀??我好妒忌呀，勁呷醋呀.....!!!!我真
估唔到隻貓可以同Irene咁夾，有陣時仲一齊訓，完全
做哂我都可以做既野，我唔制呀...Irene，我都要妳鍚
我多D，要錫得多個隻肥、衰、懶、鈍既貓咪.....!!!!!

《↑投訴到呢度為止↑》

一陣同Irene行花展，仲記得上年花展我仲同舊女友一
齊，很開心呢，但今時今日，我拖的係Irene隻手，變
化真係大，回想起當日見到個大利是封，拍我叫我的
妳，而家成為我好愛好痛愛既女朋友，呢個女友真係比
到我一個好賢妻的感覺，認真講，我兩咁既生活，簡
直係結左婚相處程度，其實見到Irene在家中做家務，
我心中覺得真係好幸福架，試問...一睜開眼就見到每天
的她都整早餐我食，如果返4:44，更加會早過我起身準
備，兼且把我返工衣服熨得妥妥貼貼咁，有時真係好怕
妳會頂唔住會捱病，妳可知道妳一病就會好長手尾跟，
同我一樣，唉......我真係好擔心我同Irene生既仔女會唔
會係藥煲，如果有呢D遺傳真係有排煩喇......!!!


看著自己的身份證，我諗我都應該係時候結婚喇，粗略
估計如果要攪一攪婚禮，要成差唔多十萬，我應承會同
Irene去台灣影婚莎相，而介指已經有idea要買邊款，一
生人一次，所以呢對介指一定要Irene鐘意，我先會去買
，即使昂貴我都會甘願買比Irene妳呀，有朋友話我問我
，我同女友識左唔係好耐，會唔會唔夾，會分手甚至離
婚，其實我冇諗過呢個問題，況且我早好多年已經同Irene
相處過(差不多三年呀)，唔知點解我有種感覺，我同Irene
係會合得來.......，而Irene都有講過話佢都係有呢種感覺，
有人講女性的第六感係好準，既然Irene都feel到第六感
係可以，我相信我地係冇問題的....。同埋我相信幸福係
掌握自己手中，我知道怎樣做先係一個好老公....，我好
細過已經明白架喇....

放心啦，我會好鍚Irene，我唔會餓親我老婆既.....所以大家
都唔好再問我呢個問題喇，尤其係Irene班姊妹、女同事、
舊同學呀......!!!

>>March 15, 2009 at 6:55:23 AM GMT+8

2009 年 3 月 13 日 星期五 【微冷】

見識監倉


今日見識過何謂監獄，我諗如果身處其中，我寧願死左佢
，首先參觀過D囚倉，D床係80年代果款碌架鐵床，而每一
張床都好整齊，D床單被單都摺得好整齊，摺到起角，而且
每人都係摺得一模一樣，而廁所係開放式，可以話完全冇私
人可言，每天六點半起身，十點鐘熄燈，而飯堂係同做戲果
D一樣，我今日坐過其中，好不舒服，硬掘掘的，而食的飯
係好求其，最深刻係佢地真係每一攞住一個黃色的膠水杯，
一邊攞飯，一邊攞水，同拍戲一樣，我地仲參選佢地既工場
，洗衣場、木工場、車衣場，原來醫管局既污染衣物全部係
佢地D囚犯洗，上到去洗衣工場，D污染衣物怪味真係好惡頂
，我同Irene都聞到想嘔咁滯，去到木工場，一入去就有囚犯
排得好整齊咁迎接我地，其實唔係迎接，只係阿sir要佢地企
定定吧.....最後我地同兩位預先安排的囚犯傾計，我地10幾人
坐定定聽佢經歷，兩位用過來人身份警惕我地，其中一 個係
犯毒，見佢妳似好老咁，原來佢得20幾歲，毒品呢家野真係
唔係講笑，希望我帶果班D小朋友會記得今日佢地既說話啦....!!

而今日，以前中心既同事係第一次見Irene，而佢地又對我的過
往又感興趣，其實我唔係太想講比其他人知我同Irene既事，但
人始終都係八掛，班人竟然肯請我同Irene食飯，目的係八掛我
地，不過Irene真係對social好有方法，無論在車上對小朋友又好
，去到酒樓對住我D舊同事又好，都可以同他們有講有笑 ，很厲
害呀，哈哈.....原來Irene都算係小朋友殺手，對小朋友相處都有
一套，果然係鐘意小朋友既女性呀，他日我地結左婚後，我地D
仔仔女女點教，有妳我都會好放心喇....。後天Irene就要開工喇，
天氣持續寒冷，Irene真係又有災難喇，其實今日天氣已經令到
個傻妹雙手凍臉珠又凍鼻尖又凍，而平日我可以拖住傻妹行，比
點溫暖佢......但今日基於係工作關係，我唔可以拖住個傻妹，攪到
今日凍到傻妹振，Sorry呀..Irene...!!

>>March 14, 2009 at 2:13:10 PM GMT+8

2009 年 3 月 12 日 星期四 【微雨】

明天的參觀


明天可以返社區中心，女友都話有興趣去見識，
而我今日收既人名名單，有好多個我都唔識，睇
黎要重新認識呢D小朋友都唔係容易既事，但對
女友來說要認識小朋友，怎樣盡快同小朋友混熟
，簡直係輕易易舉，不過我覺得女性係吃香一點，
因為名單上大多數都係男仔，我去會不會多餘呢..?
但有件事係真既就係我真係好想見返以前D小朋友
，有的已經讀中學喇，時間真係過得好快呢。再講
不覺間我都做左呢份工有一段日子，我覺得自己都
好好彩，可以碰到D好既師兄，家下的我已經有同事
叫我師兄喇，仲懶係有料咁教人技術，簡直係誤人子
弟呀，但自己另一方面幸運係，每次我有意外，小小
的麻煩都會大步檻過，唔知係唔係Irene在日本祈求的
平安符包真係有效呢...?不過係唔係都好啦，每次Irene
給我呢D我都會好開心，當放工第一時間比我的時候
，我就會覺得有人好關心我，感覺到自己在她位置佔一
定的空間，相反..我好似咩野都冇為Irene做過咁，Irene
妳會唔會唔開心架...?

總之明天呢都叫拍拖吧，去遊監獄拍拖...我諗我都係第一
個，還有呀...明天不要穿得太過突出呀，因為話哂果度都
係一個嚴肅的地方呀...，化妝不用化得咁"行"呀....知道嘛?!

>>March 13, 2009 at 5:19:31 PM GMT+8

2009 年 3 月 11 日 星期三 【晴】

先"賭"為快....


好耐之前，我仲響觀塘做緊裝修暑期工時候，有一個
南亞裔既男人好似叫做阿Franke，同埋一個當時仲血
氣方剛既男仔，佢叫阿威，在埸既當然唔少得仲有阿
威佢個女朋友啦，互相打賭一件事，盤口係勝果方可
以拿走二千蚊，而比錢作賭果個係阿Franke，咁究竟
賭咩呢..?就係飲益力多，飲30支，限時係1個小時，當
時我都同阿威一樣，益力多咁細支，一陣間就飲完啦，
二千蚊食硬佢，所以當時阿威仲誇下海口話飲唔完，我
自己比多500蚊，即時盤口變左2500蚊，當時我人工一
個月得7000幾蚊，阿威用左三份一人工搏殺，真係可以
話賭今個月身家.....無幾耐，比賽開始，開頭果10幾支好
似倒水咁倒落肚，完全冇問題，但去到第15、6支，開始
慢下來，未夠二十支已經開始要休息，過左45分鐘左右
都飲得20支多DD，臨最後幾分鐘我記得阿威係強迫自己灌
落肚，見佢表情非常痛苦，其實我果陣諗，有冇真係咁辛苦
呀...?Franke見佢咁，比多15分鐘佢，結果都係一樣，完全
係飲唔落，擾擾攘攘左一段時間，最後佢用左個半鐘都係
得二十幾支，仲要當埸嘔，願賭服輸，最後阿Franke收左
佢2000蚊便算，連益力多錢都唔使佢比，果個月阿威慘囉
，窮到入骨髓，故事教訓我地，唔好咁輕易相信同人賭，人
地出咁既價都肯同你玩，就知一定有問題，對方一定係胸有
成竹先敢同你賭，旁觀戰況的我，從此就有多一樣野同人賭
，就係飲益力多。咁當然我做左實驗啦，有一年中秋，我同
光仔玩show hand，我地唔用錢玩，用益力多玩，我地買左四
十支返來，諗住飲住先唔夠先再買，我地玩法係首先放隻杯響
度，落首注係每一半支，即係如果一輸，果個人就一定要飲一
支以上，派牌加注係隨意倒幾多，到最後輸左飲哂佢，如事者
我地各有嬴輸，我地兩個飲唔夠一半，好似20幾支左右，兩個
已經嘔咁滯，果刻，我先知益力多威力係咁大，親身感受呢
個痛苦後，我學識呢樣玩意。今日有個幾串既同事，同我地
輸賭飲30支，我開係你贏既我比2000蚊你，你輸既比返1000
蚊我便算，唔經大腦既佢立即應承，歷史始終都會重演既，
不過今次佢劏得有品D，飛得切入洗手間嘔，哈哈，就係咁
我就贏左1000蚊，其實我真係冇諗過會輸，因為我真係試過
一個人飲16、7支已經係好辛苦，所以有咩朋友如果手緊，不
妨用呢個方法贏下人啦，人既心理總覺得益力多咁細支，容咩
易丫，每一個都係咁諗，所以先會輸，我暫時未見有人贏過。
呢個遊戲都幫我以前搵過唔少，次次1000蚊都有人落搭，唉....
小看每日一支，下埸就係咁，在此多謝Eric哥，唔係你我冇多
1000蚊洗，平日講野咁刻薄，個個人都憎你，唔係睇著你老屎
忽過我地，我地唔鬧鬼返你至奇呀，今次真係報仇成功...Yeah....!!

除此之外，今日舊時我做果間中心，打電話比我，問我肯唔肯返
去做義工，今次義工的工作係帶我以前管理的課託學生，去參觀
壁屋監獄，其實本身中心已經搵左人幫手，點知條友仔最後反口
話唔得閒去，臨時臨急找唔到人先會找我，其實都好既，我都好
耐冇見過班學生，不過我諗我無做咁耐，D學生會唔會變哂，我
唔識既人呢...?都算啦，問心呢..我都想參觀下呢一個地方，所以
我好快應承人，後天出發，我都期待到底一向重門深鎖的地方，
會係點，會唔會好以平時我睇電影的咁呢..?放心啦大家，我會去
完打一份報告比大家架喇....!!!

還以為D牛角包會食唔哂，點知係唔夠食，接近30個牛角包，兩
日唔使冇哂，真係好好味呀，下一次整加多舊牛油啦，會再香D
架，加啦加啦.....!!不如妳趁仲係Dayoff...快D再整啦，如果妳每一
次出Trip前都整定呢D手作飽點放響度比我食，咁就好喇....，聽到
嘛.....Irene....我話..咁就好喇.....明白嗎??

>>March 12, 2009 at 6:31:14 PM GMT+8

2009 年 3 月 10 日 星期二 【晴】

各方面的智慧


IQ EQ AQ...今日同Irene講起，玩過個遊戲，証實左
我全部都唔夠Irene妳來，連FQ都輸，都係正常既，
所以將來我全份人工都交比妳去打理喇，FQ而家唔
係太流行(Financial Quotient)，FQ係打理財政既能力
，我同妳最大的分別係....連咭數我都會唔記得交，如
果唔係有妳，我諗我比銀行罰到破產，唔知點解呢，
我覺得女性識煮野食、做家務、可以打理得個家井井
有條..係好吸引，某程度上比樣貌更具吸引力，更何況
Irene妳係靚呢，有妳真係已經好滿足喇....。不過，我
樣樣條件都低過妳，妳會唔會介意呢..?今日睇報紙，妳
間公司D空姐比機師性侵犯，頓時好擔心妳呀，妳知妳啦
細細聲，比人感覺好好蝦架嘛，我有諗過若果叫妳唔做份
工，我們生活會變成點呢，生活會很拮据嗎?好明顯啦，
事實擺在我們兩個眼前，兩個都係返工既金錢真係鬆動好
多，起碼唔使就住就住用，想食的都可以食得到，總算負
擔得起，但係講到未來結婚呢，我們都之前都計過啦，妳
提意的行的西式婚禮，Idea唔錯呀，咁樣可以唔使擺酒，
既可以慳錢之餘，分分鐘仲有得賺，很吝嗇呀，哈哈..是妳
先會諗到，但.....我都幾鐘意，黃金海岸真係一個好選擇
呀.......，只係而家都係得個諗字，何時實現...係未知數...!!

呀......!!!在妳本Schedule Book中，有一張書籤，是妳親手
做的，妳我都有一張，但我從來冇留意妳果張的英文句子
何解?寫乜?但今日我特登去留意，終於比睇到解到喇.......
Hope for the best, Prepare for the worst....真的很有意思啊，
可能妳就係咁攞住呢句說話宗旨去做人，所以樣樣事情都
會好成功呢，和妳一起真係不止拍拖咁簡單，我仲學到好
多野，哈哈........，第日...我地D仔女都要妳親手教呀......我
的未來都指意妳喇...。講埋啦..我張書籤上寫既係呢一句，
Laugh, and the world will laugh with you，妳知嘛，我開頭真
係唔知點解..!!但妳講得我啱既，可能我比較悲觀導致我真係
唔識點笑啦.....，我應該學下妳咁，成日傻呼呼的咁笑先係，
開開心心咁，EQ AQ高過我既.....真係唔同....

喂喂.....Irene呀，有人覺得妳好可怕呀，妳咩都識整既??老老
實實喇，妳仲識整咩呀??飛機??大炮??火箭??原子彈??嗱...呢
句真心的，妳真係好叻，真架....

>>March 11, 2009 at 3:30:35 PM GMT+8

2009 年 3 月 9 日 星期一 【微冷】

返工....地都要自己掃..!!


好耐之前，我話如果公司要裁員的話，為左唔被公司
裁，洗廁所都肯呀，因為我呢D得中五畢業既，找到
我而家呢D工，有福利、免費車坐，已經算係咁，所
以願意做......當然而家係咁講啦，埋身殺到做唔做就
唔知喇，但係今日發覺...我係願意既....，雖然未去到
洗廁所的程度，但都係清潔既一種，事源今日唔知點
解阿清潔阿姐唔知去左邊，留底份架餐響度人就唔知
去左邊..?!諗住仲有四分鐘，慢慢等下阿姐來啦，點知
三分幾鐘都唔見人，巡一巡架車，地下有數件垃圾，
唯有自己動手掃地，不偏不倚..你掃完阿姐就到喇，我
開始懷疑阿姐係有心玩野呢....!!算啦，幾件垃圾，不過
如果係嘔吐物的話，老老實實喇..我睬你都傻呀...!!!

回到家見到Irene在家中做緊阿茂，在門口已經傳出一D
味，估到係整麵包，但係就唔知整咩飽，打開門先知，
原來焗緊牛角飽，焗完試過幾好食，但係印象早牛角飽
牛油味應該係好重，但今次D唔覺，大廚回應...係呀，我
特登落少左牛油呀，食咁多牛油肥死你呀...!!!我今日先知
整麵包用既係肥皂型既牛油，即係全脂最肥果D，而今次
D牛角飽本身已經落左一舊肥皂型既牛油，已經足夠。睇黎
來緊兩三日早餐都係食呢D喇，唔緊要啦..妳整咩我都食架啦...!

今日焗既牛角飽....細細隻...三啖啱啱好.!!





>>March 10, 2009 at 3:42:10 PM GMT+8

2009 年 3 月 8 日 星期日 【暴雨】

女友令我心寒...!!


今日Irene問我知唔知係咩日子...?我估左好耐都估錯，
心裡開始有點擔心，難道今日係一D我和Irene的日子?
但係我真係冇記憶今日係咩特別日子...，都係認衰衰咁
唔知呀....係咩日子呀...?Irene話..其實係冇特別的日子，
哈哈....!!!!算啦......當我整估你吧...!!睇黎Irene真係玩到
冇野好玩，差點先嚇死之後係激死，嚇死係因為如果我
真係忘記左今日係咩日子，肯定會嬲死Irene，激死我既
原因係比佢咁嚇法，真係比佢窒左窒。

吃完晚飯，Irene向我講今日係相識的日子呀...!!!冇可能吧
!!!我地碰面都未夠一年，點會咁快有相識日呢...?然後Irene
話不是我，而係你前女友呀...!其實我心真係寒左半秒鐘，
因為連我都差點忘記的事，Irene竟然會知...!!好似好多事都
完全記得咁，追問為什麼妳會咁清楚...?到今日我先知道，
Irene有本2009 Schedule book，在2008年某一天已經寫左
記下今日係唔可以找我，因為我要陪女朋友，大概我明白
Irene點解咩都會咁清楚，我快快的咁翻開本Schedule，內
裡寫滿密密麻麻的字，記下每一天要做，咩唔可以做、返
工時間、我返工時間等等，細隻字得來好詳細，忽然我記起
以前有一天，Irene連我舊曆生日都記得，睇來都係呢本書
幫佢的吧....!!我諗我都要學下妳咁，寫下將要做的事，假如
真的有一天比妳問到口啞啞，我都可以找自己本Schedule，
睇答案....!!

講真架，今日妳咁向我講係ex既相識日，我個心真係寒左一
寒呀，下次唔好喇，我唔襟嚇架....!!!



>>March 9, 2009 at 7:29:13 PM GMT+8