2009 年 3 月 27 日 星期五 【微雨】

另一類車長


今日返工時，我收到信箱的一封信，內容係我會調職到
MTR West Rail 做車長，其實之前我都收到少少風架喇，
，知道來緊有機會將會成為MTR West Rail既全職車長，
但到底高興還是不高興呢...?高興係可以加多點人工，不
高興係失去一班熟悉的同事們，還有...我係一個極度怕
悶的人，要我一個人『火車捐山窿』，我一定悶死，況
且全線得九個車站，列車仲要係電腦駕駛，我只係做應變
同埋開關門等等，我一定悶死響車度..。相比下Light Rail真
係活動式好多，起碼架車係自己控制，快慢由我決定，沿途
仲可以睇下風景，真係唔會覺得悶，最多都係眼倦、手軟
，手軟原因係長期控緊支操控桿，而眼倦原因就不用多講
啦.....!!如果有得比我揀，我想駕駛Airport Express，因為我
真係好想試下開到140km/h的滋味係點，Light Rail永遠冇得
快，唯一可以有快既感覺係去塘坊村至坑尾村之間的一段
路，可以全速前進，但礙於安全問題，我極少會開快車，
唯一開快車係晚上不載客的時候，每一次都好似要打破自己
紀錄咁，但都係果句，能開得快的地方不多，始終都係放
安全上第一位，就算快我都只會響Light Rail的專用路軌上才
會做，有時做事都要過得自己吧......!!

Irene對我轉MTR West Rail表示贊成，因為在她眼中，唔使
好似Light Rail咁要人車加鐵路..一齊爭路，安全好多好多倍
，而且工資增加左呢，唉....我就唔係咁諗喇，但如果都已成
定局我都要接受啦，安撫自己內心，對自己講，人工高左，
結婚都會順利一點，算啦......當為我們將來...悶就悶吧...!!

*昨天在Irene娘家過夜..有電腦用，而家要我打兩篇日誌，打
字不是問題，問題係我冇咩記性，好多事我過左一冷河我就
會唔記得，而家要我打.....憶起前日事的確不易....!!!!*

>>March 29, 2009 at 6:38:45 PM GMT+8

2009 年 3 月 26 日 星期四 【綿綿細雨】

娘家住一天


第一次到Irene娘家過一晚夜，有得不自在，
張床細到不得之了，無奈啦，伯母驚Irene
又病過，同埋又想煲點好既食物比佢，唯有
住一天，食到Irene足磅為止，開始知咩叫有
其父母..必有其女，原來世怕怕母D廚藝還要
比Irene好，唔係見住佢地兩老煮，我極有理
由相信係外賣囉....，好喇.Irene將會要返工
，希望佢會遇到好D既客同Set Crew啦....講
真病完就要妳返工，實在唔係好想，但為左
保住自己飯碗，

>>March 29, 2009 at 6:38:17 PM GMT+8

2009 年 3 月 25 日 星期三 【颳風】

病.......


朝早返工還好地地，都唔覺有唔舒服，點知放工
返來又黎料....，但怎樣都好，我都要去睇一睇Irene
，姑娘話報告出左，數據出來係ok既，但血糖偏得
幾低下，其實Irene一向都血糖低，而其他深入既檢
查，會響覆診後再講，畢竟有D數據要時間長一點先
出到，但如無意外明天醫院應該都會比佢回家休息，
問到Irene會唔會請sick leave，CX都係一間唔係點比人
請假既公司，就算請左下次要炒人都只係多一個理由，
所以內面D人唔想死既都會乖乖返工，看來Irene都係乖乖
的一群，算啦，我相信佢知道咩倩況，請唔請假我都無咩
意見，最緊要量力而為嘛，我呢...好似冇咁好彩，而家
度完又係發燒，明天返唔返得成工都成問題，其實我公司
有度好，若你真係病佢主張要你請sick leave，可能我地繫
著幾百人生命，公司都唔願意比我地冒險......如果明天都
係好似而家咁，我一定會請sick leave.......，其實而家頭暈到
不知怎說，還有半小時才食藥，寫住咁多吧....手腦開始不
協調....我今日投降了....

似乎Irene姐姐冇事...而家我有事多一點啊.....!!

>>March 26, 2009 at 5:32:22 PM GMT+8

2009 年 3 月 24 日 星期二 【晴】

醫院病菌多...!!


放工去探Irene，問左姑娘知道抽血報告未出
，仲有一兩日訓，雖然已經可以食野，但係
醫院既餐對佢來講邊度食得落丫，稍為妳返
點就一日對黑走去地下...再唔係就去二樓既
canteen搵食，同前一天既病樣真係兩個人，
精神左好多，不過，我就好似冇咁好彩，病
房內有幾個阿婆一日到黑咳到要生要死咁，
我唔知係唔係中左招，回家就開始唔舒服，
頭又痛，四肢又軟，據我經驗話我知，我應
該作發燒，果然真係，夜晚開始已經唔係好得
，自己搵左少少藥食，雖然好左一點，但係好快
就打回原形，唉......明天點返工呀...?真係唔知
點好..........

>>March 26, 2009 at 4:05:39 PM GMT+8

2009 年 3 月 23 日 星期一 【乍寒還暖】

漏夜睇急症


看見妳的表情都辛苦，嘔足幾個鐘，咩都嘔哂
出來，入洗手間入左數十次，見到妳咁有一刻
我有衝動打電話白車，但內心有好掙扎，妳又
唔算係非常急症，叫白車我怕比人暗鬧，但坐
的士又怕妳沿途嘔吐大作，最後唯有睇妳好似
好一點先帶妳去屯門醫院急症室，我扶起妳去
搭車的時候，感覺到妳手係凍之外，仲好乾，
我諗應該係上吐下瀉致開始脫水，上的士..司機
都見到唔妥已經問係唔係去急症室，司機都好識
做，開得算好快，仲衝左兩支黃燈，司機很落
力飛車，坐左接近30蚊，比左40蚊唔使找，其
實係唔想等司機再錢，放好Irene響坐位後幫佢
登記，不久去到分流站，此刻望見她臉色比之
前還嚴重，完全係一個好病好病既樣，分流成
為第二急症，等不到半小時已經有得見醫生，
被判斷係急性腸胃炎，我還比醫生鬧，問我點解
咁遲先帶佢入急症，因為已經開始脫水，有趣係
醫生叫我一齊望下Irene個口條脷，乾架...!!醫生問
一星期內有冇到第二D國家，答有...，醫生話當係
外地傳染病CASE，要Check得清楚D，最後始終都
要入院，先到觀察病房打滴注吊鹽水，因有嚴重腹
痛打左支止痛針，其後都有腹瀉又打多支針，我估
大既係止瀉針吧，又等左半小時有多先安排到上病
房，此時已經係凌晨3點幾，安頓好等見醫生，只見
Irene全身冇力軟軟的咁躺在床上，又等左成20分鐘先
有當值醫生檢查，因她食咩飲咩都會嘔，所以禁食，
其實都冇所謂啦，就算比佢食都唔會食得到，病房都
有病房規舉，我唔可以留響她身邊太耐，人地始終都
係女病房，我臨走出病房前安心點係見佢冇嘔冇再瀉，
我諗係打針發揮到功效，只係可能止痛針，打完後，
佢暈暈地，我就算叫她都冇咩反應，怎樣都好啦，我
留在她身邊都係冇用，病房都唔會批准我留下，離開前
我見她訓左，拍一拍她話我走喇，但見她有冇反應呢??
我估應該冇，或許我走左佢都唔知喇，今日問她知不知
我昨晚幾時走先....!!!攪了一整夜，回家都有早班輕鐵坐，
回來訓了一陣，而家先打日記，一陣煲點粥給她吧，其
實我都唔知佢食得野未，即管帶比佢啦，食到就食，食
唔到就睇住我食啦.....哈哈.!!點都好啦.....希望一陣見佢
，佢會精神好一點啦..!!

>>March 25, 2009 at 12:55:13 AM GMT+8

2009 年 3 月 22 日 星期日 【微雨】

點食呀...?



今日放工同Irene去左小魚家中食飯，由於我放早關係
Irene又放假，我地早到左，而我地都去街市買定D材料
，為一陣還有一大班人上來食飯而做準備，買完來，
返到小魚家，已經見到小魚老公返到來，原來諗住返來
食少少野便再去開工，誰知...我同Irene差點比小魚老公
所食既食物嚇暈，嚇親原來唔係佢食D咩古怪奇食，而
係佢食既方式，小魚老公枱上放上一碗出前一丁，一碗
燕麥片，看來很普通，但望真一點，出前一丁係冇味粉
咁食，燕麥片又係只用熱水沖，不加糖奶...!!!眼見佢老公
咁食，我同Irene眼都凸埋，可知道出前一丁最好食都係
包味粉呀......嘩....總之嘆為觀止，我望住佢食都覺得好難
食，講真...點食呀..??到晚上，大部份D朋友都到齊，小魚
Irene兩個玩美女廚房煮12人既飯餸，但唔知點解，無論眼
前D飯菜有幾好食，當我夾起餸放入口時，就諗起小魚老公
果兩味，即刻咩胃口都冇哂，不過...好彩仲有幾個食肉壯男
執手尾食哂佢，如果唔係食剩都唔知點好，留比小魚老公都
唔會食啦，哈哈...攪笑係個個以為我唔食係減肥，有個仲過
份話係唔係比女友強迫節食...唉....!!!其實我好想食架...諗起
佢....真係吃不下呢...

>>March 24, 2009 at 1:08:08 AM GMT+8

2009 年 3 月 21 日 星期六 【炎熱】

尋人..Cynthia姐姐在那裡呀??



今日我開返以前個ICQ，真係估唔到，當年風行一時既
聊天室今日會比人淘汰，講真丫，到而家我都係覺得ICQ
好用過MSN，我自己本身唔想轉，但係個個朋友都轉左，
我唔轉的話就同人溝通唔到，其實ICQ吸引之處係可以隨
意Add人，只要打齊想找對象的要求，就會有數百個我唔
識既網友出來，其實我而家有D朋友都係ICQ認識，有D到
而家仲有聯絡添，我最記得係一個姐姐，響ICQ識既，今
日我睇返佢D Info.....真係好掛住佢，果時2001年我仲係細
，無咩零用錢，而呢位姐姐叫Cynthia，在廣華醫院做護士
既，我認識左佢之後，大家都好多野傾，雖然年紀佢大我
四年有多，但我地真係咩都會講，大家熟左自然會約出來
見面，果陣大家講著左咩衫咩衫，去相認大家，一看之下
Cynthia真係幾靚女，那刻有點不好意思，由於本人其貌不
揚關係，有點怕羞......我唔多出聲，但相反她竟然主動同我
開話題，我記得第一次食飯係去青衣城既扖王之王，當時
一餐食左佢300幾蚊，我真係冇心食佢咁貴，但佢建議我叫
的套餐真係咁貴，我食完當然話比返錢佢啦，第一次出來，
好似騙人錢咁，點知佢話，我做野架嘛，有工作，等你大個
D先請返我啦......，只可惜同佢關係隨住一D原因慢慢少左傾
計，我估大既佢唔得閒，因為佢要照顧佢個繼仔，難聽一點
佢係做一個後母角色，加上我開始要工作又少Online，再加上
ICQ末落，我同佢失左聯絡，早兩年我們過時過節都仲有電話
Send message比大家，但近呢年就真正失蹤喇，我知...其實我
要找她一定會找到，只係茂然去找人似乎有點兒那個，但我而
家真係好想找到她，好好咁請返佢食一餐飯，諗返當時我真係
當佢係家姐咁，咩都心事都講佢知，而佢真係幫過我好多好多
，我昨日開返ICQ舊Account，見到佢個Nick名，真係好掛住呢
個家姐，真的好想好想同佢講而家我可以有能力請返妳食飯喇
，只可惜我用Facebook又找唔到佢，Email佢又冇覆，留言板佢
又冇Check，我真係冇辦法，唯一可以係去廣華醫院碰佢吧，又
或者可以既話有緣在街上碰到佢，回想起我真係幾幸運，ICQ只
係比人騙過一次，那次差點比人騙我整份身家2000蚊呀...!!!!至於
其他的都可以做到朋友，可惜而家有D真係失去哂聯絡喇，我真
係好希望會有一天..ICQ會興返，大家會開返個舊Account，大家再
相認大家呢...??但而我我最想都係想碰返Cynthia Mak.....，唉........
妳而家到底生活好嗎...?同個繼仔的關係好嘛?他的前妻又對妳點
呀??真係好想知道妳既生活近況，我真係好希望可以趁我腦海仲
有她的樣貌前相認到她，我怕萬一找不到日子過下去淡忘妳的樣貌
，我會很失望的呀，女友每天早晚飯前都會祈禱，如果祈禱真係湊
效的話，我每天都會願意跟隨女友祈禱呀，也許小時候的我很渴望
有個關心我Backup我的家姐，我真係唔想冇左呢個家姐，天呀....教
我可以怎樣先可找到她啦....!!


仲有...好懷念絞盡腦汁打ICQ info的日子呀....



>>March 22, 2009 at 6:22:28 PM GMT+8

2009 年 3 月 20 日 星期五 【晴】

玩死班靚仔....問你下次仲敢嗎...??


放工前都要比D野我嘆....你班死靚仔，成十幾歲都
要響車玩，玩還玩丫，又要錯手按左緊急通話，單
卡都冇咩所謂，今日開拖卡你先整D咁野我嘆，要
去後面解Lock要幾麻煩你知嘛...??不過...我今次唔
會好似以前咁，咁順攤......幾大都嚇嚇你地班死靚
仔.......

我 ﹕咩事要按呢個制呀??有緊急事...??(懶有禮貌...心暗中知你地一定係玩野出事啦)
班靚仔﹕呢班人...你眼望我眼，答唔出，終於有個人出聲，
唔小心按到呀，冇心呀.....點知背後有乘客督佢地
響車玩，你推我推咁錯按.....
我 ﹕我幾大..都打蛇隨棍上，咁講....咁呀..咁我要找同事
處理喇，非緊急使用要罰錢兼有機會坐監呀，我指
住張使用緊急通話張貼紙..下面細細隻字既規定.....
非緊急用係要....咁咁咁......
班靚仔﹕呢班人...立即嚇到傻...(我見住個個臉色變哂)

當堂嚇到佢地死......我條氣順左好多，心想都係算吧
，其實我知佢地冇心既，但係唔比D教訓佢，佢下次
又係麻煩到我地......終於有客運助理接手，當然我講
左比佢知係無心既.....客運助理警告左佢地就記下少少
資料走左喇.....。其實年中都有唔少人按到呢個制，算
係一件麻煩事中的小事..，都慣喇..!!

放工回到家，Irene已經返左來，將件事話佢知，回我一
句...『你好鬼衰』，哈哈，而家諗返的確有少少既..哈!!
而夜晚陪左Irene睇戲，睇左套一百萬零一夜，都OK好
睇呀，之後..一心諗住去餐廳食個晚飯，點知間間都咁多
人，最後我地去左條"為食街"...由頭食到尾，仲飽過食飯
，而今日我地咁拮拮拮野食，有D似去左台灣呢，不過，
來緊四月頭真係去台灣玩一星期左右，唔知到時行程會
如何呢...??

>>March 21, 2009 at 4:13:07 PM GMT+8

2009 年 3 月 19 日 星期四 【酷熱】

胃痛...



今日返工唔舒服.....好唔舒服呀，果刻又係胃痛，
都唔係第一次喇，每次都突然痛我一陣間咁，毫
無先兆，在家中痛都無所謂，好似今日咁返返下
工先痛，真係好難頂，忍痛撐落去真係好辛苦，
排期等睇醫生又有排排，唉....點算好，Irene又唔
響屋企，我冇人睇住好似唔識生活咁，如果平時
佢響到既話，藥呀、野食......就會送到面前，等我
食，嗚嗚....Irene呀...妳而家係唔係仲係機上面呀..?
我.....胃.......好.....痛....呀...!!!!!

>>March 20, 2009 at 4:53:31 PM GMT+8

2009 年 3 月 18 日 星期三 【炎熱】

黑面神同事


今日返工見到一個好鬼生臉口既同事，其實我都冇咩野
既，我見到係同事，無論識得唔識得，我都會打個招呼
，禮多人不怪嘛，響社會上工作有D遊戲規則係要遵守
既我覺得，但今日呢條友仔，其實開706線都預左麻煩
架喇，每一轉都要Set野，每一次都要落一落車接下一
架車，咁變相轉車期間，要同全線706同事碰面，打個
招呼都難避免既，不過呢個新仔...我同佢迎頭打招呼，
佢竟然，瞄瞄我就走，一粒聲唔出，點點頭都冇，第一
次我算，可能你見唔清楚我向你打招呼，到下一轉又見
到佢，佢都係一樣，好不屑咁瞄一瞄我，算什麼呀咁...?
食飯同其他同事打聽佢的背景，原來佢唔算係新人，只
係轉左來呢一個"箍"度，不過佢唔止對我一個係咁既態
度，好多同事都話佢係咁，黑口黑面，可能佢靚仔D啦，
講真...佢真係幾靚仔既!!!!嘩......咁都係丫...使唔使咁串呀?
我真係好怕D呢人，拍佢轉更就真係麻煩，唉......從此以後
又多個咁既同事，唉.........麻鬼煩..!!!

仲有...今日放工去左旺角，主要係去攞PCCW既贈品，分
別係200蚊惠康現金劵同埋一部好Cheap Cheap既手機，
一部得百三萬像，仲要內置記憶既Sony Ericsson手機，
之後我去左電話舖睇過，部機價係680蚊，抵到爛，而
家發覺攞左返來冇用，因為冇人肯用，哈哈...早知係咁
我就唔攞啦.....!!!

>>March 19, 2009 at 8:07:58 PM GMT+8