2009 年 4 月 8 日 星期三 【晴】

出發去機埸


出發天，我地搭機鐵到機場，諗住可以快D去到
，順手可以快D取機票，入到去過關，第一個問
題來喇..!!!原來諗住上網Check in，點知我又以為
係Irene做..Irene又以為我做，卒之大家都冇做，結
果齊齊坐做爛的機位，但我覺得冇所謂啦，夜晚機
，起飛左咩都睇唔到，而Irene更加冇所謂啦，坐飛
機多過我坐的士，坐到一半突然比Irene既尖叫聲嚇
到彈起，原來岒T香港機場冇去ATM?錢，世事真
係好奇妙，原本我D錢係比哂Irene攪，基本上我係
應該冇錢響身，但唔知點解..前一天我神推鬼擁關係
，我竟然自己取左2000蚊出來放入銀包，就係咁，
我地未置於乞食街頭，去到桃園機場，我完全將問
路、搵食、搭車方面，我全部交比Irene，因為我唔
識普通話，只不過第一晚好順利去到台北捷運站，但
就唔識去酒店，去極找極都冇，最後行左半個鐘，大
家都放棄.....去搭的士，誰知的士一轉彎過多一條街，
就到左，而呢度我地正話係行過的，即係話....我地兩
個人八隻眼都睇唔到，盲架大家都係....!!上到酒店，去
Check in既時間，有一個中年男人加一個少女，抽住碗
糖水之類的東西問有冇房，我同Irene都諗.....來爆房的
嗎....???我們住的究竟係咩酒店呀.....??上到房之後，抖
左一陣間，我到去左士林夜市搵食，食左好多小食，食
飽飽後，行左一陣，諗住搭捷運，誰知尾車已開出，又
要搭的士，而夜晚的士仲要收多唔知幾多%附加費，而
我覺得坐的士台北同香港差不多價錢的，的士返到酒店，
我地就沖涼訓覺......到我訓果陣已經係清晨4點，而Irene
已經熟睡中，明天不知會幾點知醒呢....??

>>April 16, 2009 at 3:13:41 AM GMT+8

2009 年 4 月 5 日 星期日 【乍寒還暖】

恐嚇你......問你怕未...?!


下雨天，我最鬼討厭落雨開車載客，一來天氣咁會令我
個人會燥，二來呢D天氣...上車D客特別狼死，好似打交
咁，你爭我推咁，我倒後鏡又有水點濛濛地咁，難聽D講
句...靠估關車門，好彩我都算好幸運，未試過衰夾到人而
比人投訴，但呢D天氣真係好攞命，天公造美...下午時段
冇雨..仲有丁點陽光添......。所以...Irene都趁呢D天氣出街
，同朋友同抑或同事呀...?????我都分不清喇，一行就行
左大半天，而最驚奇，Irene只係買左個粉盒同埋一件連身
裙........算係好忍手架喇...據我知..!!!而我放工都有D事做，
要返一返天水圍，返娘家我係搭巴士既，我今次坐樓上，
而正值係放學時間，好多學生哥學生妹搭車，所以巴士可以
話坐無虛席，仲有仲有一度唔好既係....好鬼嘈。上左巴士
我坐左上層中間的位置，一坐下冇幾耐，已經feel到有人
用腳不停咁頂我椅背，大家知冷氣吧D坐椅係點啦，如果
你頂椅背...前面個人一定唔好受的，但今日有兩個中學生
坐我後面，係咁頂係咁頂...一路大大聲講粗口、吹水咁，
果死人中學生被我用眼神厲一厲都唔理，反而佢旁邊知道
叫佢唔會再頂，點知佢條粉腸仲講，無計啦，頂得舒服冇
辦法，仍然係咁頂我，我真係好鬼煩，成日係咁比佢頂椅
背，我唯有厲多佢兩野，都仲係冇變..係咁頂，今次我唔
忍佢，我轉身怒啤佢五秒，再問佢你頂夠未，我見佢都似係
D欺善怕惡的人，我唯有嚇佢，我同佢講，你夠膽再頂丫
喇，你就唔好落車，我擺明恐嚇佢，呢招有用呀，哈哈
，知驚未???其實我仲驚過你呀..哈哈...我在恐嚇他人呀，
我之所以咁夠膽係因為我仲有兩個站落車...哈哈，早知我
再兇悍一點啦，問佢係唔係想打啦...??呢回蝕水呀真係.....!!!

回到屯門家，執一執行李，發覺我原來好多野都冇買冇
準備，唉.......妳知啦.....我又唔似妳咁有出Trip經驗，帶咩
攞咩一清二楚，都係果句啦....哈哈.....我又係靠妳教我點執
行李喇，我要妳陪我先可以執到呀..我諗....!!!還有兩天去旅
行喇，心情大好呀......哈...!!!

>>April 6, 2009 at 6:52:25 PM GMT+8

2009 年 4 月 4 日 星期六 【乍寒還暖】

借Memory SD Card記


放假....訓到不醒人事咁，一起身時已經係食飯時間，
野食獻到身邊，我覺得...我同Irene一齊..我學識樣野
，就係飯來張口，真係冇得彈，哈......我好似殘廢咁，
我記得開頭我都會抗拒..唔想比自己咁"廢人"，但係時
間耐左，自己接受左自己咁懶，因為冇人鬧我嘛，講
真....同Irene咁耐，Irene真係冇試過好認真咁罵我，最
認真都係我上次睇醫生唔話過佢知，那次都係有點點
燥，我明白既，有事都唔話妳知，好似瞞妳咁 ，女仔
都係同大部分一樣，唔可以接受男友有事瞞住佢呢......!!

食完野我同Irene去左Philip家，主要唔係探佢，其實以我
地交情跟本唔使咁禮貌，所以Irene都展出佢粗魯既一面，
而我地今日目的係借記憶咭，兩人張咭都係Irene親自找到，
死Philip.......Irene講...『嘩...你真係有好多SD咭呀，8GB都
有3張，4GB有唔知幾多幾多.........2GB又係唔知幾多幾多
1GB......又係咁講.......數數數......』，臭串得你丫...『我果D
512KB 、 1GB、2GB...係用來墊底，墊住我D...8GB咭...16
GB咭，等佢唔會整花..用唔到.....!!!!死鬼丫......咭多都唔使咁
串既......只但係.....你D咭又係真係多到用唔完，唉....折墮呀...!!

夜晚陪Irene食壽司，我同Irene有同一喜好...就係鐘意食日本
菜，所以我地下一次旅行大多數都係日本，但係而家都係諗
下去台北玩咩、行咩仲好啦.....，其實後天出發，我一件行李都
冇執過，我睇黎都係大安旨意比我既Irene攪架喇...辛苦妳喇....!!

>>April 6, 2009 at 6:04:17 PM GMT+8

2009 年 4 月 3 日 星期五 【雷雨】

訓練...west rail

收到通知，我將要接受為期三星期既訓練，為將來做
West Rail做好準備，其實唔使訓練我都識，但礙於公
司要求，要有返一定既訓練時數先可以做司機，唉......
睇黎惡夢快要開始喇，但為左錢...冇法啦.....

Irene今日放假在家中，肥貓開心到振啦，有人陪佢玩，
隻貓抱起身重左，即係肥左啦，難怪既..好食好住，可
以食盡各國貓糧喎，唔肥就有鬼啦，睇黎真係要幫肥貓
減肥先得喇，哈.......!!不是第一天發現，肥貓好鐘意望景，
有一次有半個身跌出街咁望風景，真係嚇都嚇死呢，但
每到黃昏，我呢個窗台可以望到日落，原來貓都鐘意睇
呢D風景，真係識貨呀....!!!今日同Irene煩緊，去旅行隻
貓點算好....??要閉佢關5日4 夜嗎....??最緊要....女主人點
愛你都好，佢都帶唔到你上飛機..哈哈.....，我就得呢...!!!
衰貓...你都風騷得耐喇，今次仲唔輪到你食自己，哈哈....

>>April 6, 2009 at 5:36:42 PM GMT+8

2009 年 4 月 2 日 星期四 【陰】

硬萬與電話...

呢排有點忙..所以updata遲左，但其實我係有用筆記下
當日有咩特別事既，所以，要補打返並唔係太困難。
今日我放工去左天水圍家，因為天水圍家個寬頻出現左
D問題，變到越來越慢，簡直係寬頻變窄頻，56K都不如
，但令我激氣係佢Check完後話我部電腦問題，同埋條
LAN線壞左，接觸不良，要換就要比錢，電腦要150蚊
LAN線都係150蚊，合共300蚊...!!!其實300蚊唔緊要，之
但係我由始致終都冇郁過條LAN線，而電腦我反覆係咁用
Notebook試都係一樣，即係唔係我電腦問題啦，再者，我
用左你個台成差不多9年，由56k用到今時今日，壞都係正
常啦，損耗品嘛，唔係人為，你地保養唔過份啦........!!!為
什麼係都要打去鬧先會乖乖地維修呢....??難道你公司請班
人係要佢特登比人?架..??整左成個半鐘先症完，大工程呀，
D線要換哂...唉...!!!有排執手尾喇，好彩我個妹一手攪掂，果
然冇枉我一直都對妳咁好啊......。
夜晚....約左阿毛食晚飯，我地去左食大排檔，去到大排檔，
難免唔多唔少都飲D啤酒，一來叫左4支，啤酒女郎用一個
載滿冰既啤酒膠筒載住D啤酒，冰鎮住佢，但時間令到D冰
融化，變左一桶冰水，為左唔打爛D酒，我地放左佢響地下，
我地則談天說地，而阿毛係一個吸煙人士，包煙仔放在手提
電話下面，這時阿毛唔小心整跌包煙仔，跌得包煙，電話都
一齊跌，而不偏不倚就跌落個冰桶內，而阿毛當時反應係接
包煙仔..唔救電話，Dum...一聲.....電話響冰桶游水...唉，撈起
部手機，壞左，阿毛就大嘆，最X衰係個財爺，加咁X多煙稅
，攪到我寧願接住包煙..都反應唔切去接手機...........正一卜街
幸飽省......，下刪100字粗口。最後?左部機去賣，得返150蚊
，粗口又再滿天飛....唉，算啦..毛哥，當換手機吧啦.....，不過
阿毛果口粗口講得好鬼順口，聽到我..笑到肚都痛，阿毛不愧
係我地既大佬呀......我服你既..!!!

>>April 6, 2009 at 5:36:06 PM GMT+8

2009 年 4 月 1 日 星期三 【微冷】

我夠百厭星嗎??



返工放晏食飯，去左天水圍買D零食，十零蚊咁，買左
少少，買左一支奶茶，三包童星點心麵，童星點心麵係
我讀小學時已經有既零食，當年好似一蚊包定五毫一包
，係咁上下，以當年既我..可以一口氣買到兩大包左右啦
，印象中...好好食既，係食無停口果隻，今日我買左D返
工"偷"食，最初果一包真係食得好滋味，好期待下一站快
D到，等我可以落手抓住D麵放入口，可能D麵太乾，又
尖，有點點拮口，我食第二包開始有點不繼，我感到咬
麵咬到口軟，又口乾，總括咁講，第二包係食到我死下
死下，但又難忍佢既香口，口冇咁軟又咬過..唉..自己很
賤呀....!!但我食食下又諗起D野，其實應該不關點心麵事
，我記得我讀小學時，阿媽比得三蚊我返學，有一日小息
我冇錢，我大無私樣咁去問同學借，同學仔當然唔肯啦，
哈........我大佢呀.....【細個已經咁醒，識得大人兇人....哈哈】
，你唔借比我，我話比風紀知.....!!!!【嘩...咩世界呀??..無法
無天呢...】哈....慘得個同學在我淫威之下就範呀【真係好卜
街呀..我....!!!】我足足攞左佢三蚊呀...嘩哈哈....【超賤格】，
最後有冇還錢??我印象中冇呀，哈哈....在我淫威之下，耐
我咩何呀...哈哈【人地話三蚊留比你執藥呀...!!!!】，可能係
咁我真係成日都要食藥，哈哈.......!!!

迷信又好，笑話又好，的確係真人真事，我估自己大約
係二三年班左右啦，老實，我果陣唔知咁做係唔啱，細
個仲係個白痴仔，所以條命留到而家，因為白痴仔唔識
整炸藥嘛.....!!!講真....債主係咩名唔記得喇，我只記得係
有件咁既事，其實細個果陣我都幾鬼百厭，到中學都係，
集百厭倒蛋的一身，去玩殘坐我後面兩個女同學，當中一
個係Irene啦......!!!!!所以呢個世界係風水輪流轉...有報應架....!!!



>>April 2, 2009 at 6:36:56 PM GMT+8

2009 年 3 月 31 日 星期二 【微冷】

吹氣手信....


今日返工果陣發生左一件都唔知啱定錯既事，令到我好尷尬
好難做，事情係有個未夠一歲BB在車上大喊大叫，喊到車都
散咁滯，我都聽到好鬼煩，其實BB喊通常都係代表想話D野
你知，例如肚餓、大小便等等，而今次係後者，BB原來賴左
屎，所以先喊得咁淒涼，緊張既媽咪諗都唔諗，將個BB就地
正法，即係換尿片，咁架車當然頓時充滿異味啦，開始有D中
年男乘客投訴，最後都係拍我門，我出來看看，BB仲換緊，
其實我真係冇辦法，如果拒絕叫佢出去，好似好不近人情咁，
話哂佢都開哂壇換片，唯有要求媽咪快D攪掂啦，我亦都想方
法安撫班客，我主動話開大個冷氣抽走D異味同每個站都停耐少
少，等D新鮮空氣可以走入車廂，點知個媽咪勁大反應，大叫
唔好，話我咁會冷親個BB，仲話一冷一熱大人都會病啦，唔好
話BB啦，唉....心想，媽咪你想點呀??最後有D乘客投降自願等
下一班，但有D死硬派都係死都唔走，其實片都換好，我覺得異
味都冇咩，個班男人又玩野，咁攪一攪阻左我三分鐘，媽咪同BB
最後響屯門站落車，而個男人就市中心落車，唉....差一個站，大
家嘈咩丫，其實BB都唔想，況且我覺得BB果D大便都唔係太難
聞，男人老狗係都要蝦個女人先安樂，認真麻煩..唉.....!!!

放工接Irene機，Irene今次冇手信返來，因為呢個地方已經去過好
幾次，真係冇咩野好買喇，最後佢竟然買左公司既Q版吹氣飛機
，呢架咁野，為左吹漲佢，吹到我氣咳，只不過吹完左見到佢真
係好可愛，叫Irene下次再買埋港龍Q版飛機、國泰特別版Q版飛機
，Irene話其實仲有一個特別版，只可惜佢係唔會對外發售，Irene
咁講一講，攪到我好想要果架.....!!呀.....!!我好想要呀...我唔怕吹到
氣咳氣斷架，其實只要係妳買的，我都會鐘意架......!!仲有呀，我吹
完後連貓咪都對佢充滿興趣，只不過..我係唔會比佢玩，一陣比佢咬
爆部機呀....!!到時我真係同佢搏命呀....!!!!

我等妳下次買的另一架比我,..........



攞返來既吹氣Q版飛機.!!





>>April 1, 2009 at 3:22:16 PM GMT+8

2009 年 3 月 30 日 星期一 【晴】

都已變遷的人和物..


放左工.....約左小伊食飯，真係好耐都冇去過新世紀
廣場，雖然還未有認真的行，但係已經感覺到變左好
多好多，正如我對上一次來已經係同前女友的時候，
人變....事物都變，變到連我都認不到喇。今日講開結
婚如何去攪，我將Irene同我建議的idea講左比小伊知
，其實小伊唔係第一個知呢個idea既人，但大家共通點
都話係..行得通，work喎咁.....，其實呢有八成機會都係
諗住採用呢個idea，場地方面，暫時係黃金海岸....!!其實
我都想快快手手準備好個婚禮，我都好想好想有Irene做
我老婆呀...!!!!因為愛既得妳一個乍...，係喎...呢個時候妳
應該差不多出發返香港喇...是嗎...?總之....今日等妳放工
呀......

仲有..今日駕駕下車，半途中我駕駛室門突然發出，"嘭"
一聲，我比佢嚇親當堂，望倒後鏡先知原來係個細路玩
搖搖，我心想，你試下"嘭"多一次我丫嗱，我就比D記憶
你做留念....，不過....最後佢竟然冇嘭我門...最後仲落埋車
，算你好彩啦....!!!今日問過小伊先知，原來家下有套卡通
係講搖搖超人....."搖搖超人"???真係冇野好播嘛.....?!我估
呢D卡通..睇一次...同時跌智商一次...搖搖超人...唉...我真係
受不了呀..哈哈....

今日好彩有人陪下我食飯乍，不致於我發呆悶死在家中，無
Irene在家日子..好難過呢，少一個人....靜得太多喇，唔慣呀..
當然...要Thank you小伊肯等我咁耐陪我食一餐飯啦，妳白等
咁耐...請妳係應該既........，若果要等...下次仲肯出來嗎.....?哈
哈........!!今日意料之外的事係，認識到一個剛去完台北旅行的
人，講真....比佢D熱情嚇親，可能我人比較內向，我真係唔習
慣咁快同人可以混熟，那一刻....有點唔自然.....感覺到自己怪怪
的，最後我竟然會同佢一齊搭車走添，只但係唔係有佢的話，
我諗我唔會有起勁去期待呢個Tour....，Irene平日問我為什麼
去玩都唔係太興奮呀，我而家知咩原因喇，因為我唔知台北
有咩玩，只係得個食..我真係冇咩起勁可以提起呢，但當我聽
完佢講，又睇過佢一D台北影的相片，我而家又好想快D到9號
呢，各位...有咩要買....9號前留Email.....過期不侯...當放棄要手
信論呀.....

>>March 31, 2009 at 7:29:19 PM GMT+8

2009 年 3 月 29 日 星期日 【微冷】

約Ex-gf之飯局



放工約左前女友食飯，今次係第一次冇Irene看管下
出去見她，我覺得咁樣仲令我唔敢亂來，Irene飛走
左，反而令我更加小心...是心理的壓力吧..我估....!!

久久都未同佢食過飯喇，看佢樣好似生活得好開心咁
，都好既，大家都開心，証明當日大家分手係正確的
，今次我八掛問佢男友的事，果個係醫院果D既Senior
Staff，係既.....找佢同我比，冇得比啦，輸59條街...。只
真係估唔到佢都會問我有冇女朋友，我話有，佢已經知
係Irene.....點解會知既...??我想反問佢..但最後冇，硬生
生把說話吞返下去，送隻錶果陣，大家嘆著說，當時 打
鑼咁搵呢D錶又冇，而家唔搵佢又有......。世事就係咁，
往往都係玩弄大家...。食完個飯，大家分道揚鑣，原來
佢男友會駕車來接佢，我亦不久留，後會有期。

Irene...我完成任務喇，我冇穿冇爛咁返來呀，完壁歸趙
，放心啦，等妳開Notebook MSN呀。Irene而家身在悉
尼，唉...我都想去呢個地方呀，真係好想睇下真正既樹
熊，同埋出名既歌劇院，不過我知對Irene來講，去過三
次以上已經唔想再去，情願在酒店，沖九千次涼吧..對嗎??

好啦...我要訓喇，明天返早呀，星期四我會接妳放工呀....
始終都係掛住妳呀..!!!

>>March 30, 2009 at 6:01:47 PM GMT+8

2009 年 3 月 28 日 星期六 【晴】

相信、信心、考驗....



今日趁Irene放假最後一天，我地一齊去左山頂玩，
我地由屯門站搭去香港站，成人車資真係好貴，
而我當然係free pay啦，一出閘後Irene就係咁講...

Irene....﹕第時係唔係我都有免費車坐呀...?
我........﹕我話係呀，但我地未結婚嘛，所以妳冇住...
Irene....﹕車費真係好貴，如果搭車可以唔使錢，會慳到好多錢
我........﹕都係架，妳好想有Free Pass咩...?
Irene....﹕係呀......可以週圍去唔使錢，最重要係我返工可以搭機鐵嘛
我........﹕我都知機鐵快好多真係.....但講真唔趕時間都唔會上啦呢D車，係咪先....?
Irene....﹕『o爹o爹語氣』咁我幾時先有呀..?(算是逼婚嗎?哈哈)
我........﹕結左婚咪有囉....!!!!我唔會走左妳果份既...

突然.....傻妹彈左一句，聽了差點令我吐血.....

Irene....﹕不如我地註冊左先啦......擺酒遲D先後補...好唔好呀????
我........﹕『O』左嘴........妳呀為左張証搭車，同我結婚嘛...?
Irene....﹕『o爹o爹語氣』....不是呀...其實你都有著數架，我地一齊坐飛機會平好多架.....
我........﹕咁又係....好似我著數D呀......!!!但我個個月都搭飛機玩嗎...??傻瓜...!!
我倆....﹕哈哈......(同時上山頂的巴士來到喇)

上到巴士，巴士好快已經上到山腳下，山腳下途經港安醫院，
其實呢間醫院留左點點回憶比我，上一次我入去係做檢查，不知
點解Irene好有興趣知我發生咩事，當然內容係關前女友事啦，我
咩都講哂比Irene知，看來Irene冇介意我講起前女友，傾下傾下好
快我地已經到左山頂廣場，我地去左蠟像館參觀，之後我地做左
個蠟做既『雙手抱心形』的擺設，幾靚...真係好特別，睇完我地去
左行山頂廣場，行下行下我地行左一間精品店，內裡比我找到一件
當時我同前女友都找不到的護士錶，今日竟然比我見到，那一刻我
望住呢一隻護士錶，Irene都留意到我望咩，我便將我和前女友的事
話比Irene知，聽完後，Irene竟然叫我買左去，還叫我送比佢，其實
我心中想，Irene係唔係想試我呢......??我當然唔買啦，但Irene係都要
我買，並講...你之前應承左她萬一見到呢一款護士錶就買比佢架嘛...
而家妳見到就買返比人啦..!!!我話...我前女友黎架喎，你唔會唔開心嗎?

很開心感動聽到Irene咁講，以前我真係唔信，好冇信心....但係我信
你唔會為左一件小禮物就會同佢復合，當給我一個考驗的機會啦，
測試我自己對你的信心，好嘛...?最後..我買左隻錶，Irene出左一半
錢添，Irene叫我打電話比前女友，講佢知..我買了呢隻錶給她.....，當
然..我照做啦，果然前女友很開心，電話內講，我而家用呢隻好難用
，仲係夾硬扣上衫上，我強調隻錶係我同女朋友夾錢買比妳的，前女友
叫我代佢講Thank You....!!!並約了明天給前女友....，順手給她.....!!!

在行去食晚餐時，我問Irene...為什麼..要我咁做...??都係那一句，很
想知道自己對你的信心，如果今次我和前女友冇事的話，我心會安心
放心好多，以前係好怕一齊會分手，如果可以過到呢一關...我信心會
堅固好多，當給我一個證明和考驗吧....!!!我果刻無言中，心中只講，我
不會比Irene對我失望的，因為我知而家我最愛最愛最愛的係Irene.....!!!

去到餐廳..我地叫左一個石頭鍋飯、一個酥皮雜菜湯、一碟海鮮白汁意粉
、兩杯士多啤梨特飲，而今餐係Irene請客呢....，餐飯好好味，好想再食多
一次，講真....山頂地方，二百蚊多D真係算係咁，飲飽食醉後，我地回程
返屋企，成十一點幾先返到來，明天Irene仲要返工呢，回到家幫Irene
執好個Suitcase，明天送她返去魚翅城。Irene臨訓前我向她說，我會完完
整整的回來，絶對唔會做D對妳唔住的事架.......Irene報以微笑說『我知喇』

在此我要多謝Irene咁 相信我......Irene妳放心啦...我會乖乖的回到妳身邊的。

*****精品係有相片睇的，但時間太夜喇...唔upload住，遲D補回相片上來我會*****

>>March 29, 2009 at 7:58:43 PM GMT+8