2009 年 6 月 7 日 星期日 【酷熱】

手信


今日返左天水圍?左妹買比我既手信，衰妹
果然冇枉我咁錫妳呀，買得最多手信既人係我
，哈哈.....個個都有份，女友就有個化妝袋，
媽有個鎖匙扣，老豆有個掛飾，其他人全部都
係食，只不過我比較鐘意食果D，去到東京淺草
買D野，果然同機埸免稅不同，生鬼好多，見到
D相片，我都想玩下富士急，好想同佢D機動遊戲
死過，幾十層樓兩秒跌落黎..??我恨左好耐，所
以我都好想去澳門笨豬跳，比個妹SALE左個富士
急咩1.7秒達到時速173公里高速咁跌落去，心郁
郁呢....，下次我一定捉人陪我去呢?可惜身邊
那個無膽....聽左形容已經嚇破膽...妳好無用呀..!
哈哈


考喇明天.....祝自己好運吧，天呀，話哂我讀左咁耐
，可憐下我比我PASS啦，講到尾無一隻中文字全英
文，仲要考我普通話對話，難道要我死嗎..?來讓我合
格吧..

>>June 8, 2009 at 7:49:25 PM GMT+8

2009 年 6 月 6 日 星期六 【清涼】

捱....


唉....咩叫臨老入書叢，我而家體會到喇，
廿幾歲人都仲要開夜車溫書，瞄咪...你就好
啦...唔使做有得住有得食有人睇，你望住我
都冇用架，我都唔想嘈住你，捱多幾日啦，過
多兩日就一天光哂，合唔合格就...盡力而為啦....

好辛苦呀捱得...真係好眼訓

>>June 7, 2009 at 7:11:57 PM GMT+8

2009 年 6 月 5 日 星期五 【酷熱】

願此生不再相見



今日放工去左元朗買野，經過元朗廣場，天氣奇熱，
飲左杯珍珠奶茶消消暑，便繼續行繼續我既行程，到
左元朗西巴士站諗住靜靜咁聽下歌等我既巴士，唔知
968係唔係響非繁忙時間真係少車到20分鐘都唔開一班
，早知我就唔咁瀟灑咁睇住班車走啦....!!之後我走
入7-11度買支雪條食，天氣咁熱配合雪條直頭係一絶..
正當我舐左兩舐既時候，有個阿嬸走來問我68X係唔係
呢度搭，我諗左諗....其實我都要諗諗，響元朗區巴士
路線中68X係變得最多，要比D時間我諗諗先知教妳走咩
方向....

我...﹕唔係響度搭呀，呢度冇車出九龍架...
嬸...﹕係呀...正話個男人教我行到呢度有得搭喎..!!
我...﹕冇架....呢度車只係出荃灣、大埔、中環....冇九龍車，九龍既車要出去元朗廣場邊巴士站搭
嬸...﹕但係頭先個人真係話呢度有車架....!
我...﹕冇架..(你聾的嗎...?我都話冇車囉)
嬸...﹕下....正話個巴士佬都話係呢度有車去喎...!!
我...﹕阿嬸..冇呀，呢度得68M出荃灣968出天后54出上村77K粉嶺64K出大埔....邊有車出九龍呀...??(我心有點不耐煩)
嬸...﹕係...我識字...我睇到，之但係個巴士司機係咁教我架喎..佢話係呢度搭架..!!
我...﹕(要我講幾多次呀.....雪條都溶喇..)唉....阿嬸咁你去問下其他巴士司機啦..!!(過主啦...頂.!!)
嬸...﹕咁......咁呢度無我去邊度搭呀...??
我...﹕(幹妳嗎...??又要我講多次嗎..?好...忍妳..!!)我強加點笑容教佢果度果度之後..手指指...咁行行行....!
嬸...﹕唉吔....真係麻煩呀，明明話呢度有車嘛...又要我行多次..!!
我...﹕(妳試下再話我知呢度係有車坐丫再...!!我一拳打到妳肚臍幾尺深...你信唔信丫)真係冇車架呢度...行去果邊啦..
嬸...﹕唉吔..唔該啦...唉...麻鬼煩..又要我行...行左好多次嘛(阿嬸人影漸遠)

我支雪條溶左一半，D汁滴哂落地下，冇左大半支，仲要
流到我一手都係，我一個人等車，我等就排第一個，而
家攪到我焗住去洗手，我一離隊洗手，我就要排隊排最尾
，上車本來可以揀位坐，而家要揀人坐，咁我比錢坐巴士
仲咩??真係多得個阿嬸唔少，邊有人咁炆塞架，冇車就係
冇車啦，又要問路又要駁我嘴，唉....呢D阿嬸，但願此生
不再相見，當我買妳怕吧....

6月6日..星期六...三個六，難到我今日見到那個是魔鬼嗎...?
比魔鬼還要可怕的人類呀真係....!!!!!!!!!!

>>June 6, 2009 at 6:16:55 PM GMT+8

2009 年 6 月 4 日 星期四 【酷熱】

擔心什麼呢...?


又要去上堂，好鬼煩、好討厭，究竟幾時先
會完呀...?快D到6月9日就好喇，我真係好擔
心呀，要死快D死，我唔想好似等死咁，其實
我都盡力溫左書，點解仲咁擔心呢...?

>>June 5, 2009 at 4:28:57 AM GMT+8

2009 年 6 月 3 日 星期三 【酷熱】

回想課託的日子


今日返番去舊時做既社區中心，發覺好多人
都唔同左，好多都好生面口，舊時去到的話
，接待處一定會開門比我，而今次竟要問我
原因，咁梗係啦，連接待處果個都係新人黎
，當然唔會識得我啦，好彩simon仲響度，仲
有人係我識既，入到去課託仲運作中，家樂仔
大個左好多好多，差不多高過我了，其實我真
係好想問我阿媽，點解生得我咁矮，中學時候
我成日比人改花名叫"豬儒軒"，上課室排隊我
永遠都係頭三個，只可惜成績又唔係頭三個先
死，算啦....我都冇讀書天份，但我小學考過
全班第一名全校第三名，係真係冇天份定冇心機，
我都唔知喇....!不過，果本"千九淑女"真係好
難讀，數據又難記，我都唔知點入手讀，點入場
去考，你話點算..!

家樂仔，你大個左好多喇，雖然成績都係咁，同
以前一樣，但係你行為同以前一樣，一見到我就
撲向我度問我攞PSP玩，呢個係家樂仔可愛之處..!!
呢個亦都係我情願返早開門都要做課託既原因，如
果有得比我選擇，我都想做返課託，諗返起我幫個
有讀寫障礙小朋友背誦乘數表時，由口窒窒到背到
流利，果種滿足感真係好大，不過亦都因為佢，我
好怕第時我D仔女會有佢呢D毛病，見到佢媽媽咁帶
住佢咁生活，我真係覺得佢好辛苦，所以人地話母愛
係偉大既，當見到佢媽咪的時候就會明白喇....!!!
唔知浩楓而家讀書讀成點呢...?今日見唔到佢，或者
下次有時間我早點返去，見下佢啦，唔知佢仲會唔會
記得我呢...??我諗應該唔會吧，我係唯一一個罰佢抄
乘數表抄40次既人....係浩楓既仇人..哈..!!

>>June 4, 2009 at 7:04:46 PM GMT+8

2009 年 6 月 2 日 星期二 【乍寒還暖】

四件事..



今日下雨天，每當呢d天氣，肥貓最鐘意望
雨景，可能係某D野令佢咁留意吧，但係佢
成日都睇到好似跳樓咁，我真係驚有一日響
家中找搵唔到佢，咁就弊一弊都無咁弊喇...

要考試喇，有點緊張，雖然已經讀過，但係
要考得更深入，仲要全英文作答，最弊既係
，仲有考我普通話，我呢一生人最怕數學之
外..仲有就係普通話，講真，有點擔心呢...!

快要到期睇報告了，是生是死呢??等去見醫生
果刻，真係最難頂，雖然有人陪我，但係驚還
是驚，畢竟家族有一個旱有既遺傳病嘛...

今日聽到我個Friend個笑話，佢話有個客去佢
舖頭整電腦，大叫我個Hello kitty死左呀...
當然係邊個聽錯定係邊個講錯...天曉得喇，而
事實上只係Hard Disk 死左而唔係Hello Kitty
死左....千萬唔好誤會啊..!!

>>June 3, 2009 at 2:46:48 PM GMT+8

2009 年 6 月 1 日 星期一 【陰】

懷舊歌..懷舊事


今日回家執下天水圍間屋，我發覺間屋已經放棄
我的存在咁，無論係抽屜衣櫃床頭櫃等等都比我
妹霸佔哂用，我回到家都唔知可以執D咩，唯一一
個小櫃仔放置住我既CD係完封不動的，我取出所有
CD看又看，又飛來聽，發覺原來有好多舊歌，我聽
完會好有"上一次聽的感覺"，例如我攞左陳百強的
CD聽，我有強烈感覺，我上一次聽應該係讀緊小六
果陣，因為我好記得當年我地一家人食飯都會開歌
一路聽一路食，之後還有張學友的餓狼傳說大碟，
當中有一首歌叫天與地，聽完我又會好似返番去中學
考試果陣，果次係考MATHS，我一向都對數字白痴，
所以我份卷好快做好(因為唔識嘛所以咪快囉)，我
就響張草稿紙上寫哂呢首歌既歌詞上去，夠無聊呢...
之後我又找返張學友果首歌叫"留住這時光"，中學
既時候我有份幫呢首歌重新填詞(只係上半段部分)，
可知嘛，呢首歌當年係1992年旅遊發展局的主題曲呢
，我真係幾鐘意呢首歌呢.....!!細個..張學友係我
偶像呀，以前佢出既碟我都買齊，我最記得我買佢第
一樣野係.....愛火花既錄音帶呀，哈哈...咩喎，當
年興WALKMAN嘛，我到出來做野先有錢買DISCMAN呀..
好喇....等我聽下D舊歌比自己懷舊一下先...

>>June 2, 2009 at 7:03:49 PM GMT+8

2009 年 5 月 31 日 星期日 【陰】

苦口良藥



政府醫院開既藥水真係好難飲，自問自己對藥
水果種非筆墨所形容的又苦又怪既味道都唔怕
，但係今次果支藥水簡直係女士門扣喉恩物，
一飲自己會自動扣.....，但老人家講苦口良藥
的話是不是真的呢..?又吹佢唔漲，我飲左幾次
已經好返好多喇，美中不足係飲完好鬼眼訓，好
彩果幾日都係病假，如果返工先係咁，我就聽死
喇，話返轉頭，病真係好辛苦，響床上點訓都係
訓唔到，身體話我自，你冇一個位係可以比自己
訓得舒服既，加上自己又辛苦，如果我訓到，訓
著都可以當咩都唔知丫，遍遍又訓唔到，就算訓
，都係個零鐘就醒，光著眼望天光，其實點解人
會病呢...?今次病我用左差不多千蚊睇醫生，的
士錢都用左幾百蚊，唉......算啦，呢D錢都係要
比人賺既，諗起呢幾日的士去的士返，真係覺得
自己發左達咁...好鬼豪啊...!!

>>June 2, 2009 at 7:03:10 PM GMT+8

2009 年 5 月 30 日 星期六 【晴】

H1N1的驚魂


整晚都在床上典來又典去，手腳酸軟冇力
，有37度的接近fever的邊緣，有喉嚨痛，
有點點鼻水，難到真的中左H1N1...?越去咁
諗越訓不到..會死嗎...?還有很多事未做呢..!
考慮到AED求診，但疑似都要被捉，我會被
捉嗎...?但不去....若果真係中左，傳比其他人
咁我咪仲衰，死就死啦，去左AED，攪左一
大輪，冇事...!!!謝天謝地呢，叫醫生開點有咁
眼訓得咁眼訓的藥比我，因為我好耐都冇訓
過，藥力果然強勁，我終於可以訓到覺，謝
謝醫生的幫忙，人有事都應該要睇下醫生，
睇完冇事心安得，雖然排AED係好耐，但都
係值得，起碼我知道自己安全的..冇事的，藥
力生效了，我都要休息下，明天先補回下一篇...

>>June 1, 2009 at 5:32:46 PM GMT+8

2009 年 5 月 29 日 星期五 【晴】

豬流感疑雲


返工無耐已經感覺極不自在，可能我真係唔習慣
帶口罩開工，悶焗的二氧化碳充斥住個口罩內，
本來唔多暈的我，都開始頭暈，沿途我都好擔心
，我不是中招嘛...?心諗如果中招可真大件事，
我不想成為確診個案呀，不想這樣成為新聞報導
的人物，更不想被人隔離呀，但是如果真的中招
可大可小呢，心中掙扎著，看醫生還是買成藥便
算呢，最後都係決定睇醫生，被診斷係普通感冒
，打支針食過藥後，好左好多喇，但係仲有點占
寒占凍，不過被診斷出不是豬流感已經好開心，
明天休息...要爭取休息，不想身邊的人擔心....

>>May 30, 2009 at 3:31:08 PM GMT+8