2005 年 10 月 11 日 星期二 【微雨】

飲茶，總會與媽有點不快，可能真係飲食習慣唔同啦，希望可以努力迎合啦。
飯後與爸行，茶樓、荃灣西站、海皮，忽然我問：「爸，而家條路可以行去邊？」
爸：「你想行去屯門都得！」

「但係有D位係馬路喎。」
「就黎舖好晒喇。」
「係咩？」
「唔信咪行去睇下囉！」
「好呀！」

就咁一路閒聊，欣賞海景，一路行，過左屋企、灣景、九咪半、金麗苑、東方冬泳會、近水灣、汀九灣，不經不覺行近汀九橋，兩口子同時停低，知道已經走太遠，憑欄眺望馬灣一陣，就散步返去喇。我同爸講，搵日要試下行去屯門。
傻嗎？年輕就係有傻既本錢，何況係一個無業既人，更加大把貨。
回程時巧遇家志，心諗幾年來咁多同學仔住附近，至今先撞到一兩個，奇。

今日終於打爆「創世紀七」，十幾年既心願終於完成，順便將儲係電腦既game都清減掉，個人輕鬆晒，似乎忘記自己要搵工添。
(背景音樂：「創世紀七」我最喜愛的音樂)

>>October 12, 2005 at 7:52:34 PM GMT+8

2005 年 10 月 10 日 星期一 【晴】

今日單車同樂日，我、韜、晃、Pierre、船長同久違了既羅魚，終於「Let's Play~~~」
大圍、沙田、河畔、吐露港、大埔海濱公園至大尾篤，再回程，撫平左單車癮既同時，亦拼命將雙腳踩熟踩爛送俾人，而家對腳已經唔係自己架喇。

晚飯再Join埋布林、Kenix、Fucky、阿植到火炭食津津大排當，野食係有多少水準，而且價錢商宜，出名都係應該既。
去得火炭，當然順便到Band房玩下，Suckwing到Band房，結果都係玩啤牌，Suckwing與紙牌似乎結下不解之緣。

韜想係果度開個P，不過係有D難度既，第時睇下可唔可以租過另一個方便D既地方啦~~

>>October 11, 2005 at 6:57:37 PM GMT+8

2005 年 10 月 9 日 星期日 【晴】

「夢與想丟低很遠，但對返工厭倦，自小不會打算。」真係幾到肉，李峻一，曲、詞創作人。不過無轉折位，點解用個「但」字？「又」會唔會更好哩？

就係因為老朋友既一番說話，丟低左既夢想，我會努力去pick up返。
發覺自己根本唔係夾Band既料子，算！疊埋心水做個唱作人，樣衰，但係有料既唱作人都唔錯呀~

一首歌既版權收益，可以多到難以想像，所以，好歌，一首就足夠喇~
音樂人，努力吧~~~

>>October 11, 2005 at 7:01:25 PM GMT+8

2005 年 10 月 8 日 星期六 【晴】

約左中學同學打波，一行十來個，諗落都好耐無同佢地打波喇。都好，近排多左運動，仲 Keep 到，表現都算OK啦。不過，表現只可以維持一、兩個鐘，如果再打落去就唔掂喇。

打完喇喇臨返屋企沖個靚涼，就出去 join 舊生會會議喇。
我、韜、Kenix、秀秀、中山、低生、低嫂、Tomas同四四一齊去左打邊爐，chit chat左大半時間，之後開始傾會，黎緊我地C座舊生想係11月尾搞返個大聚餐。我同秀秀做左一世既C座蕊社聯絡人，哈，其實都係搵返佢地 D contact，日後希望多D老鬼一齊玩同sharing。

叫一個平時唔多聯絡人既人做聯絡人，似乎搞笑左D。

>>October 10, 2005 at 8:05:13 AM GMT+8

2005 年 10 月 6 日 星期四 【晴】

今日約左Simson去尖咀Shopping，結果佢空手而回，我就乘機揀下Suit。晚飯前加拿芬道巧遇Ball仔同佢女友Ivy，相請不如偶遇，一齊Dinner。飯後去左寶勒行Join 布林飲野，原來除左阿韜，仲有Pierre同阿Pan，猜枚隊酒吹水小不免。男仔既話題始終離不開女性，但係生活中無女伴既我，似乎令佢地無乜癮，但都不亦樂乎。
睇得出阿韜係果種有志氣既人，哈哈，咁自己哩？身邊既人似乎都比自己更有志氣。未「修身」，係唔會諗住「齊家」，所以一支公都係抵既。

愛情，有又煩，無又煩。
真愛可能就係睇你為佢放棄幾多，仲要係無求回報果隻，諗落有D似係父母的愛一樣，哈哈。
朋友們，唔好將自己果套放係另一半果套，唔work架，順其自然啦~

>>October 8, 2005 at 5:30:00 AM GMT+8

2005 年 10 月 5 日 星期三 【晴】

今日去左一間公司 Second In，歷時3個鐘，有D怪。12:00去到，個 interviewer 帶我同另一個candidate去Starbucks邊飲邊講，話會relax D。開頭聽佢講都無乜野，MT Programme 兩年，有 job rotation，一開始要幫手做 Road Show，聽落幾正常，之後又做 case study test。但係一講到人工，就話開頭要 base on Road Show 成績出糧，如果成績唔好咪豈不是白做？最後係咁意帶左我去一個 Road Show Booth 度睇兩眼就話叫我返去公司 Third In。返到去做左個 short question written test，見另一個 manager 吹左兩句水，我再問佢 salary 果度，佢都係好含糊咁話就算無result 都會有少少表現金。廢話！Train 一個MT好似唔駛本一樣。

之後去搵阿韜tea，佢都話怪啦。後來文傑放工，同佢講起先知佢都好似見過類似既工，白做居多。唉！徙左兩日時間 In，果撻，再努力搵啦~~

出得黎就順便過返尖咀搵阿Pan啦，佢個頭都電得ok啦，不過有d似女仔。

搭「丁丁」去搵阿韜時諗起幾年前瘀野，果陣第一次自己搭，做左三樣傻事：
1. 見唔到個站，「丁丁」一黎我以為要截，結果向「丁丁」揮左兩下手...
2. 「丁丁」停低既時候，我擒擒青衝去車頭上車，結果見到D客落緊車...
3. 去車尾上車啦，懶醒地拎定左個兩蚊，但係搵極都唔見個錢箱，恍然大悟，結果個兩蚊一直拎到落車...

連瘀三下，three hit combo，瘀到入肉。

>>October 6, 2005 at 5:45:16 PM GMT+8

2005 年 10 月 3 日 星期一 【晴】

副con爛左！？又要破費，乾塘喇......要快d搵到工先得喇...
今日做左件無聊事，就係將ICQ 300人既info都睇晒，有日記既就睇日記，相簿就真係唔可以睇晒喇，足足用左大半日時間。睇完歸納出幾樣野：
1. 1個link左去中學網頁聽校歌。
2. 3個人打粗口。
3. 4個人開左兩個icq，已將佢地唔常用果個deleted！
4. 10幾個人會提到「主」。
5. 20幾個人info空白，悶！
6. 過100人近一年都唔見online，info又唔改，又係悶！
7. 過半數人會間唔中update或者當info係日記。

慶幸個個都記得係邊個，不過會chat既可能十隻手指都數得晒。因為自己唔鍾意打電話，而家開icq，純粹係想唔打電話都知道d friends近況，真無稽。其實，我覺得如果一個人想所有識得既friend都keep contact同keep close，我諗佢唔駛返工都得喇...

係咁意發下牢騷，連同房都以為我爆，其實只係有感而發o者。估唔到我認真少少就嚇到人，真係有D反叛feel，其實獅子座既人唔係應該脾氣臭D先岩架咩？

Samuel 仔仔話尊重人就會係人地角度諗野，其實係「知易行難」呀，何況有時又會顧慮太多，顯得婆媽。諗諗下想人際關係好，其實只要下下認自己錯，咁就會好好架喇。同屋企人相處，只要抱住「爸媽的話永遠是對的」為宗旨，一定唔會有拗撬，呢方面家姐就做得好我好多喇。

其實唔幫suckwing搞war game既原因係我個friend話最少都要20人先可以成團，資料顯示我地每次function人數都不到20，亦有頗高既甩底率，為免個friend難做唯有唔搞啦。至於join唔join？時間，人數，地點都無，如何談得上join？

做人又何須太執著呢？你地既然war game想shoot我，我咪俾你地shoot囉，「我不入地獄，誰入地獄？」，但係都要你地有咁既能力先得架，組又組唔成，shoot都唔荒準啦，呵呵~~

>>October 4, 2005 at 6:23:29 PM GMT+8

2005 年 10 月 2 日 星期日 【晴】

今日起身，一個字：痛！
連續兩日運動得太多喇，不過玩得開心就值得啦！

Newsgroup既說話，令我諗起每當自己講錯野，一定會引人「群起而攻之」。
事實歸事實，Hall C 比 suckwing 更值得我付出心機去搞 War Game，原因係我真係覺得搞suckwing wargame有種挖個"tum"俾自己踩既feel。一班太熟既friends，說話做事總係忘記留有餘地，忘記朋友應該係點對待既。開始唔鍾意自己所謂「玩得」既性格，我要變返有牙既獅子！順我者昌，逆我者亡！

忽然覺得呢個問題同情侶既感覺都一樣，舊情侶比新情侶之所以有更多拗撬，原因就係到左太熟既時候，說話做事開始忘記顧及另一半既感受。有個friend講過，初相愛既情侶唔會係大家面前放屁，但係到左以後，甚至結婚，呢個顧忌就放寬晒。

自己雖非過來人，但亦幾認同呢種講法，希望自己d friends同另一半唔會咁樣啦~

>>October 3, 2005 at 7:33:08 PM GMT+8

2005 年 10 月 1 日 星期六 【乍寒還暖】

今日係船河之旅，地點係香港仔。成班Hall C人36個玩到癲晒，開頭仲以為咁多人出到去唔知會有咩玩，原來擔心係多餘既，中山準備既UNO都無玩，就已經聽到D人玩「辣辣壽司」，再影下相，chit chat一番，嘻嘻哈哈就到左目的地海面。船一停大家就玩跳水，我一路慫恿人跳，其實自己不知幾驚，因為第一次從遊艇頂跳落黎，都咪話唔高！第三個就猜輸左要跳，真係腳都陣晒，不過落海一刻真係幾爽。之後就一邊游水，一邊睇人慫恿人跳水。

原來今次包玩香蕉船，自己有幸第一批玩，玩完覺得好難玩，唔夠半分鐘就失平衡落水，都係返去船邊游下水。Lunch後本來想去附近個灘玩，同阿低，志偉，韜，婉婉，阿盛先游左去個浮床度玩摔角，結果其他人都無游黎。當我地六個游返去船時知道佢地等船載過去，最後我選擇左張浮床飄下訓下，因為真係幾累，不過真係Free~~

舊同事原定既BBQ因驟雨取消改dinner，我地好彩臨走先落左陣雨，落船都已經六點幾喇，最後同埋大班人打埋邊爐就閃喇~

嘩...真係可以卅幾個friends一齊出海！
嘩...D海水咸到嘔呀！
嘩...體力大勞動！抽筋！抽筋！
嘩...大雨加大風加無著衫原來真係好凍！
嘩...又多左Jess做出版喇！仍然係四屆出版！出版Power，No compare！
嘩...寫到而家個人仲好飄呀！
嘩...黐左線喇！

>>October 2, 2005 at 5:44:11 PM GMT+8

2005 年 9 月 30 日 星期五 【晴】

7:30pm「去打陣波」，結果同中學同學Brian，Keith，Jerry，Spencer(哈，故意的英文)打下打下，打到10點幾；坐低飲杯野，諗住11pm閃，最後11:30pm先走。我既一陣變左成晚，爸媽留既菜結果都涼晒，從佢地不悅既面色可見自己都過份左，不過呢個打波組合成一年無打喇，所以久別重逢，話題無窮。

國慶假期人太多，其實只係打左3場3 on 3，不過完全唔夠D十幾歲既「靚」仔鬥，輸左又要等，只怪自己懶練波，氣都無乜喇，真係fit晒叔叔呢個稱呼。估唔到體力耗損多左咁多，聽日船河遊水希望唔會虛脫啦~

小插曲，中學同學既GF原來係LU人，仲同埋應該係我果屆D校隊黎打波，可謂「到處都見嶺南人」。

>>October 1, 2005 at 5:20:22 PM GMT+8