2005 年 12 月 9 日 星期五 【晴】

今日奢侈地訓到中午，本來約左水銀入去拎返我支結他同amp，結果意料之外拎唔到。反正已經約左入去Lunch，就去探探朋友啦。
LU中菜廳內Hall C人飯局，yr 1既Kinki、yr 2既夢蘅、yr 3既水銀同埋Alumnar既我，配搭前所未有，一邊嘆住精美既點心同靚茶，一邊吹水，幾開心呀！

p.s. 唔該晒夢蘅~

再p.s. 下次一定要約到小苦妹食飯！

>>December 10, 2005 at 8:37:17 PM GMT+8

2005 年 12 月 8 日 星期四 【晴】

返工至今，足足一個月，算係開始上手，同事都好好，做錯野都唔會鬧。一個月來，見到好多人，朋友們都會問公司有無靚女，其實都有唔少，Sales要見客，當然要presentable啦，所以返工見到都可以養下眼，搭訕就唔會喇，望下總少不免。

朋友們亦會問自己有無Target，卻總換來沉悶的答案，有時真係想俾D驚喜滿足下佢地，但係諗深一層都係覺得太無謂。我諗終有一天都會有唔同既，放心，因為我「沒有想陪同鄰家男孩跳舞」。成日覺得鍾意自己搵野玩，玩自閉，拍得拖就要有責任陪人，暫時仲未想背起呢種責任，哈哈，太任性。

i-Cable還算係好用，仲要平左D，續約罷啦。哈，幾enjoy同個sales壓價既過程，佢大我話我屋企得i-Cable同Netvigator揀only，Netvigator無可能做平到俾我，但係可惜佢遇到我呢個異數，結果我終於換到一個仲俾員工Plan更平既月費。

Dinner後去搵Damon練下結他，發覺一星期入面唔玩真係會心掛掛，可惜scale仍然係弱項，幾時可以隨心所慾Free Jam哩？朋友，練習多D啦。

>>December 10, 2005 at 11:52:00 AM GMT+8

2005 年 12 月 5 日 星期一 【乍雨乍晴】

今日返工，凍！我要冬天快走！很討厭！
上班時間竟然不斷瞌眼訓，要改！

dl了Eason國語碟和側田新碟，不錯！

回家心血來潮睇返之前無睇既Batman Begin，好鍾意「俠」呢種精神，多謝唔駛講出口，好型呀！我直到呢一刻仍然冀望「俠」能夠出現，那怕係幾咁天馬行空。

聽到一首歌，忽然令我湧起無窮懷念，就利用首歌黎喚起身上冰冷既血...

>>December 6, 2005 at 5:46:47 PM GMT+8

2005 年 12 月 4 日 星期日 【乍雨乍晴】

今早van仔出奇地快，15mins已到目的地，令我有機會去M記買個早餐，返到公司仲有十分鐘，慢慢享受~

今朝無飲咖啡，精神似乎一厥不振，連帶心情都唔多好，可能係天氣關係。
唔鍾意冬天，還我秋天呀......

心情唔靚，完全無心機plan聖誕既活動......
忽然對任何事都提不起勁...
夜晚damon來電，做左個幾重要既決定，唔知自己係咪有認真諗過...

>>December 5, 2005 at 2:13:03 PM GMT+8

2005 年 12 月 2 日 星期五 【晴】

今朝8點，人地起身返工，我先訓覺，真搞笑。
1pm起身就準備出發去LU喇，2:45pm到，見到大班helpers已經準備好喇，Briefing 完就一齊拎物資去社區學院個場喇。第一次踏足個Function Hall，覺得出面個位都幾Grand，不過入面個佈置就相對地差左少少喇，個台無想像中咁高，D凳仍然係Canteen款式，不過都算係咁上下啦。去到放低D物資後，我地就急不及待去成龍玩舊生宿生籃球賽。好開心可以係返呢個場比賽，自己雖然打波唔係叻，但係好享受一大班Friend一齊鬥波，係場外吶喊果種感覺，我打第二節，仲有波入添，其餘時間都係吶喊助威，把聲差D叫拆左。
打完波之後就要去Function Hall準備百人宴喇，去到即刻同Chamber試咪同amp，布林keyboard skill果然係勁，第一次夾落去，感覺好smooth；接住再同阿韜試下兩支結他既聲，So far so good；最後再搵Fanny、Kinki臨場夾多次稿，百人宴就開始喇。

今晚我、Fanny同Kinki既表現我覺得都唔錯啦，其實自己只係負責左晚宴既半個部份，其餘都係Fanny同Kinki頂住。做MC無想像中咁緊張，反而到我同阿韜perform自己既作品就有D驚，用返《3 words》同首次公開既《傑青》，反應都算唔錯。好開心我地D作品有人欣賞，尤其觀眾聽到第二首既歌詞都會笑，証明我同阿魚諗既詞尚可聊博一笑。跟住就係Hall既Chamber同祖明Perform，最後Chamber X Chuttles，事前從未齊人rehersal，出黎既感覺「估你唔到」咁smooth同正，希望今日呢個performance，可以為個宴會生色多少啦。

百人宴用舊生名義搞，可惜咁多年畢業既舊生都唔及來臨宿生人數既一半，我係其中一年既聯絡人，點都要負少少責任，亦同時明白中山German佢地搞舊生會既難處。不過無所謂啦，人少少仲易control，如果每屆廿個黎都唔知點算。其實主動搞舊生活動唔係因為對個Hall有無心，其實係depends on自己鍾唔鍾意玩，成日返工放工，有時間既都會想玩，可能自己真係大唔透。哈，況且有得玩高調，娛人娛己，何樂而不為？

Function完左有人提議唱K，可惜為C您係屯門唱，Suckwing係MK唱，如果唔係就可以會一會Becky呢個傳說既歌后嘛。Suckwing好耐無咁多人一齊唱K喇，仲要有阿低、肥添、大忙人阿南同Michelle。唱K小插曲係去到間K房遇到Police查牌，其中一個仲要係Hall C既大佬江，不過個樣真係變左好多。

好耐無試過一日入面忙碌咁玩，累都係值得既。

>>December 4, 2005 at 3:02:43 PM GMT+8

2005 年 12 月 1 日 星期四 【晴】

今日背住結他，便裝返工，一返到去就俾人問我係咪一陣要落去展貿個場「秘勞」，真搞笑。
無風無浪6pm就彈閘離開公司，出發返Hall。原來九龍灣果頭去嶺南真係幾辛苦，體會到211當年既苦況。

去到Hall已經見到Chamber練緊歌喇，同佢地練左幾次，夾得幾好，美中不足係唔可以同佢地既keyboard手布林Jam下。夾完個flow，臭鐘夠鐘要走先，我地其實都仲未dinner，好彩connie佢地係屯市幫我買左個麥記，好味！

跟住就要同Fanny、Kinki夾MC稿喇，其實自己無咩經驗，所以負責既野都唔係好多。但係傾下傾下都成點幾，再接力同阿韜落去Common Room夾返我地果Part Performance。要阿韜呢個無乜點彈開結他既鼓手做結他伴奏兩首歌，的確有D難度，希望佢Handle到啦。

深夜3點，都practice得七七八八喇，Fanny、Becky同埋Otto出去買宵夜俾我地，忽然覺得好有被照顧既感覺，哈哈。為左報答佢地，食完就彈左幾首歌佢地聽。可惜道行唔夠，記性唔好，only記得幾首咁大把...Otto似乎最識貨，都係鍾意Jay，希望唔會唱衰左D歌啦...

開頭諗住finish D宵夜就走，點知傾下傾下唔記得左睇時間，不段同「劇社」吹水，結果同韜離開宿舍已經係7am喇...

>>December 4, 2005 at 11:16:58 AM GMT+8

2005 年 11 月 30 日 星期三 【晴】

工作雖沉悶，總比忙碌好。今日同我一齊training既同事遞信辭職，one day notice，有更好offer當然會走，無可厚非，自己又會如何哩？明天的事明天想。

有時做緊一樣野，或者講左句說話，不其然個腦會諗起左一兩秒後既結果，結果係同結果一樣。自少就覺得人係不斷係度重覆緊自己既人生，雖然無根無據，但係呢個感覺就好強烈。

同屋企人相處每次傾偈少不免會為一個演員有無同另一個演員同時出現係古裝戲而拗一餐，今日忽然識得收，係我開始唔鍾意拗頸？anyway，拗贏道理，掉失感情，都係唔係好值得。放唔低既人仍然好多，隨手翻起Beatles年曆12月，見到有句說話好岩用，《Let It Be》。年歷用到12月，亦表示一年又過喇......

>>December 1, 2005 at 4:52:56 PM GMT+8

2005 年 11 月 28 日 星期一 【晴】

兩日來的工作表現時好時壞，我看還要一段熟習時期。

今日約了舊同事dinner，細說公司趣事，不亦樂乎。飯後，一起到一個舊同事的鞋店逛逛，全都是女裝鞋，價錢倒是十分商宜，而且款式亦很新穎。不其然有點羨慕她可以「開舖頭做生意」，再想想，自己根本不是那些材料。

回家時不斷想：「人生一直在虛耗健康的身體來換取金錢，然後再虛耗金錢來換取健康的身體。」值嗎？

值得不值得，只因開心不開心，循心而做啦。

>>November 29, 2005 at 5:39:19 PM GMT+8

2005 年 11 月 26 日 星期六 【晴】

今日plan左返LU搵Chamber傾下performance既野，之前梗係搵人陪下我食dinner啦~~
哈，結果打左幾個電話都call唔到人，最後捉左為C您josephine同Kelly食dinner。今晚忽然好想食M記，結果就去享受左一餐豐富同快樂既dinner喇~

傾野之前問josephine拎番出版歷來既大小出品黎睇，當中見到自己果年既產品。哈哈，雖然感覺被比下去，但係好開心，証明我地D野越來越好。(又或者係我拉低左個質素...)

同Chamber傾完野，知道佢地其實都好忙，不過有得jam下歌總會開心D既，希望大家可以忙得快樂，期望大家Good Show~

>>November 27, 2005 at 7:07:11 PM GMT+8

2005 年 11 月 25 日 星期五 【晴】

今日舊生會開會，之前打電話confirm左少少人數，暫時成績算係理想啦，9點半出左去傾下12月3號既流程細節，又confirm左會加入表演環節，希望可以提昇百人宴氣氛。得悉阿植唔想做MC，我同韜都覺得舊生function點都要有個舊生做MC，想搵阿低做，最後展轉間竟然碌左落黎俾我做，我only識吹水，做MC經驗就唔多，希望唔會有問題啦。

返到屋企都已經點半，但係都係想update埋個hp。
見到自己homepage既野越來越豐富，真係好滿足~~

>>November 26, 2005 at 9:02:45 PM GMT+8