2009 年 10 月 28 日 星期三 【晴】

人…該為什麼的原因而堅持？為生活、為名利、為將來或是為愛？沒有一個確實的答案，因為每個人都會有不同的目標、不同的生活指標和不同的際遇！爆咗兩日，終於可以深深的吸一口氣，可能可以繼續挨下去、也可能再爆多次、再崩潰多一次！想不到以前對住阿TART都未有崩潰的感覺，今次居然可以一發不可收拾…無他既…因為以前就算再辛苦，心中都知道附近總有一間避難所…可是這一次不管身邊的朋友多努力的幫助我，一切都只有靠自己！

說真的…以前有工作的時候就等待著放假的日子，現在有假期的時候就等待著有工作的日子！所以說…人總是自己矛盾的動物！

再這樣下去真的是好的嗎？是等待一個開始？或是等待一個結局？

心中有太多的陰影、有太多的顧慮、有太多的包袱！因為有些東西…是一輩子的！而其他人總是不明白，不管你有多努力，結果都是一樣！不管你有多在乎，結果也是一樣！雖然路…一直都在！而最終都只得自己一個人等待著或是繼續走下去…

>>October 29, 2009 at 1:58:19 PM GMT+8

2009 年 10 月 22 日 星期四 【晴】

呢個星期好唔願意咁去咗阿哥公司做part-time，自己對呢個行業的興趣不大，加上因為今次做的野係under阿哥，所以反感指數甚高，但馬死落地行，鬼叫自己仲未搵到份長工…

不過由細到大做好多野都因為阿哥的關係有很多限制，無論你做得有幾好，別人都總會說：「她是誰誰誰的細妹！」，如果做的事並沒有達到對方的要求，她們就會說：「她是誰誰誰的細妹！果然並沒有她哥咁好！」所以無論好與壞，對我都好似唔係好有關係咁，當人慢慢長大，很多時候我都會避開同阿哥共事的地方或生活圈子…

唯一避無可避的就係我生於這個家，所以無論我想點做、我想做什麼都好似要經過阿哥的同意才可實行，因為我家兩老覺得他說的話永遠是對的，尤其係阿娘…前幾天第一日去阿哥公司返工前，阿娘突然同我講：「你去到阿哥公司要禮貌D，因為你阿哥係公司的影像好好的！」聽完之後真係好唔開心，而家佢係明星咩？講咁多野咪又係叫我咪失禮你個仔，如果我有得揀，你估我好想去佢度做野咩！

雖然一星期返兩日，不過個心的確有十萬個唔開心兼唔鍾意，但咁又可以點？我呢兩日返到公司時佢地通常都仲係開會中，返到來就全部去食早餐，其他人客氣叫埋我，但佢就已經同人講我食嘢！無他既！因為佢叫我返工之前佢已經叫我自己食咗早餐先上去…

到今日收工，阿哥咁岩有出車咁佢就車我去葵芳，因為SQN有D問題，所以我就扮晒野問佢，點知佢就覺得係我的問題，仲話D Cadets唔聽我電話都係因為唔想Serve我﹝拜託！其實我根本就無直接搵個D cadets，次次都係出Email比佢地﹞，就係因為咁，所以我覺得無論我點做都佢，所謂的家人都係覺得我的manner 和 attitude有問題、無論我有幾努力去為SQN做野，其他人都只不過覺得係我佢個妹…咁何必仲要留我係度獻世呢？你地對對方有乜野不滿就只會同我講，咁我有不滿又可以對住邊個講，對住你地兩個嗎？你地兩個又做到D乜？再咁頂發，我都唔知我幾時會爆…

一直以來我都選擇沉默，係因為我有D野無得揀！但沉默並不代表我接受或同意，只是我知道無論我講D乜、做D乜係你地眼中都係應份的事…

真係想搵到份唔洗留係香港的工！

>>October 23, 2009 at 12:05:40 PM GMT+8

2009 年 10 月 7 日 星期三 【晴】

每天都會send好多application出去、每分都等緊一個interview的機會、每秒都等緊一個正正常常的offer…

所以呢五個月的生活，每天、每分、每秒都係在等待中渡過‧

>>October 7, 2009 at 6:17:01 PM GMT+8

2009 年 9 月 13 日 星期日 【寒冷】

當時間一分一秒地走，當每天訓醒再去期待一個答覆的時候，呢種的生活的確考起無乜EQ的我…係網上見到很多適合的POST，不過大部份都係AGENCY公司 / 無公司名，AGENCY公司都仍不是我的首選，因為每個電話都係同佢POST的職位 / 薪金 / 福利都完全不同。

不高不低的學歷、不多不少的經驗…結果都係呆在家裡等、等、等！

每個人的想法和期望的東西都不同，要找到一個平衡點的確是很困難，當我很努力去找這個平衡點的時候，我發覺本身的「我」不知不覺咁消失了，我很怕這種感覺，也不喜歡這個「我」，為什麼每一件事我都不可以說「不」、為什麼每一件事我都不可以「隨心所欲」、為什麼我不可以再「自私」一點、為什麼我要有咁多的「顧慮」？每個人都有權利去堅持自己的決定，但每個人的成長和生活背景都不同，環境和社會可以改變一個人，同時「回憶」都可以限制一個人…

而最重要的係每個人心中都有一個「不可被人侵犯的地方」，而這度牆由我懂事的時候就知道不管是什麼人也不能夠可以幫我拆下來…

>>September 14, 2009 at 5:59:48 PM GMT+8

2009 年 9 月 9 日 星期三 【乍寒還暖】

就來足四個月了，有很多事情都想做，但同時有很多限制；有很多想法，同樣有很多困難…

見咗幾份工，都遇過很多趣事…但真的很無奈…因為我發覺學歷同經驗是不能共存的。

其中有份工因為公司希望可以用10K請中五但就要五-六年的工作經驗

另一份工公司都希望可以用10K請人，不過就要有相關的學歷但就不著重經驗

無疑現在的市場的確多咗少少職位空缺，不過對方的要求都比以往更保守！同埋我發覺每間公司的HR都總會想請某D岩心水的人，所以搵工唔多唔少都要靠運氣…唉！想點丫？

>>September 9, 2009 at 6:54:33 PM GMT+8

2009 年 7 月 2 日 星期四 【陰】

同一條問題、同一個答案！我已經答過很多次、說過很多次、表達過很多次！但為何一次又一次咁問，到底是我講得唔清晰定係你根本就唔明我想要什麼！


既然咁辛苦，算吧啦！無謂再去強求什麼！

>>July 4, 2009 at 4:55:34 PM GMT+8

2009 年 5 月 12 日 星期二 【晴】

呢三日終於唔洗係屋企發霉，原因為阿哥話我日日咁係屋企食同瞓，不如去佢公司上下堂！無乜藉口SAY NO，結果就去上下果D保險業的Course…好彩上堂1030先開始，唔洗晨咁早就爬起身！其實我對保險業一D興趣都無，而且我又唔係咁鍾意對住人Sale野，所以考到個牌都唔會做呢行…

8點半左右就起身，去到TST大約10點正，之後同埋阿哥和笙笙係大家樂食早餐！食飽飽佢地同埋我一齊上去個HALL然後就返Office…今次的Lecturer我只可以用「吹水王」去形容，講咗成大半個鐘都未入到題，悶死我！終於挨到放飯，上咗去搵阿哥，雖然佢都係剛同我食完早餐，不過都同埋我食Lunch！真好！有人包2餐…食完就返上佢公司HEA咗一陣，然後我就又去上堂。而佢就繼續做佢要做的野！

其實個「吹水王」都盡量用一個好輕鬆的方法去講佢D Notes，不過有時講講吓就離提，結論都係得個「吉」！而呢三日我會上三份Paper，第一份Paper係關於「保險原理」、第三份Paper係「長期保險」和第五份Paper「投資相連長期保險」！而我都同一時間報埋下星期六一次過考晒三份Paper，向難道挑戰！1730放學，通常我都會直接上阿哥公司HEA一會先走，不過今日阿哥約埋C sqn D人係尖咀開飯，所以我都留底一齊食！

而第二日因為阿哥出咗去做嘢！所以最後我係佢個位訓到咁上下就自己走咗落CITY SUPER睇吓買咩食，本來想食Triple O’，不過成60蚊個Lunch對於失業的我都係太貴，而最後都係行咗去CITY SUPER買咗份沙律就上返去Lecture Room繼續聽「吹水王」吹水！夜晚就約咗埋細路開飯！

第三日阿哥因為剛食咗個cake所以無同我落街食，而我本來打算買M記，點知比我見到有KFC就馬上行咗去食KFC，自從葵芳間KFC無咗之後，真係好難先搵到間KFC食…夜晚就同埋小虫和阿康去深水灊u扒！叫飛鷹餐廳，一D舊式的茶餐廳，佢個餐包真係大到可以食得飽，不過個扒我就覺得一般而已。但都可以再去多次試其他野！

呢三日真係行程豐富，不過下個星期的考試就真係危！

>>August 6, 2009 at 3:28:33 PM GMT+8

2009 年 5 月 4 日 星期一 【晴】

雖然同KA告一段落，不過有D事都不是一下子就完結…事原我LAST DAY果日因為趕住要去CX開會，結果漏咗塊3M防偷窺板係公司個MON度無拎走。之後打電話返公司叫個同事幫我拎，但可能佢都好忙咁執野，最後無幫我拎到…而我都係今日先知，最後左問右問…Toby話佢見到Nikita好開心咁拎住一塊防偷窺板，所以我就send mail + MSN比Nikita叫佢幫我將塊板比Toby連埋我封reference letter，再由佢幫我pass係住我屋企附近的同事再比我…聽下來都覺得複雜！

講開Reference letter，真係比想打巴阿TART，佢居然用張A4紙print我封reference letter，仲要唔知用咩方法就咁paste公司的Logo係張紙度，結果個Logo咪打晒格lor，先生…一封咁的reference letter我點交比人睇丫！最後又搞咗一輪佢先肯再用公司的Letter head print多次比我，都唔知呢條友咩構造！好似我GM話的一樣，佢個腦係咪生係個「屎忽」度！

第二件事就係塊板，有禮貌的人都應該reply下email / MSN，尤其係人地問你問題的時候，乜都唔覆算什麼！以為自己好巴閉，係呢度只會D無品 / 無性格的人先會鍾意同就晒你！不過都好…反正呢個無品 + 無腦人做咗你的男朋友！絕配！之前都覺得你仲可以做同事，不過好似BB話一樣，三百幾蚊睇埋你人格…同人講係垃圾桶執的都得，唔多唔少我都覺得呢句野係佢心中的情人教，不過居然話無刻名又無指紋的說話我都覺得佢會講得出！全個部門都知道塊板我係問GM借既，全層5樓有邊個會用呢D板一隻手都數得出，個個都心裡有數！如果佢覺得真係拎得咁安心咁我真係要講聲「恭喜晒」！我成日都覺我咁的Manner的人呢生都會好幸運，尤其係咁有異性緣的人…加上負負得正，加埋果個白痴仔真係希望你地幸福啦！

我都有將呢件事同GM講，話晒我都係問人借咗野！而佢當然就唔需要我賠返比佢，不過始終塊板都用咗兩年，而最初我又真係半威脅咁要佢借比我，一直咁辛苦係度都係因為有塊板陪住我，感覺上就好似GM日日都睇住我咁！而家無咗唔多唔少都有種失落，因為無咗種依靠的感覺，無咗唯一的紀念！

至於封Reference letter最後又要麻煩的幾個同事先拎得到，呢件事我更加覺得原來同事真的只能做同事，甚至係當各散東西的時候連同事都不如！所以凡事都要靠自己才是最安全和穩陣！

>>May 31, 2009 at 3:04:39 PM GMT+8

2009 年 4 月 29 日 星期三 【晴】

拖拖拉拉又過咗兩年零四個月，想一想原來係KA都做咗4年…係呢4年見證住IM的興盛期，同樣也見證住IM的衰落期…好似我GM講的一樣，我是除了他之後唯一一個做過晒4個部門的人，而每一個部門的感覺都好唔同！每個人的做事手法、處事態度都係一代不如一代，無辦法啦！人係自私的，你對人好、就別期望對方都以同一個心態去對你…

講返今日，阿TART一早返來已經不停咁要我交晒D report比佢，而有D明明已經pass咗過CX，個PK居然拎返過來叫我做埋佢！你無野丫！第時人地唔識做或做的唔好果時你咪賴我仲乜無比機會人去做…未交monthly report又話要去discuss埋份Financial report，改到第十幾次的version最終因為時間關係而approve，都唔知佢想點！結果成個AM連水都無機會飲就過咗半日，而我身邊的同事就已經好開心就玩緊，真無奈！

食完Lunch又好趕咁整埋D野就過CX開會，哈哈！無錯！Last Day都仲要過CX開會，結果搞到5點鐘！而因為今晚1830要去到尖咀睇「遠望六號」測量船，所以我過CX前已經拎晒自己D野過CX，仲好老實不客氣咁夜係GM間房度，哈哈！最後趁半個鐘的時間係CX同D舊同事映相，咁當然包括Stephen同GM啦！最搞笑係我準備咗D巧克力比同事時，我GM居然拎多我幾粒話幫我派比果D今日無返工的同事，哈哈！結果我叫佢咪扮晒野落格！不過就算佢落格我都無咩異議，因為呢2年4個月，如果唔係因為佢給我的安全感和依賴，我連2個月都不想再留係度！雖然我知道佢一定唔會睇到呢篇日記，不過我都想係呢度再多謝佢一聲，以後無咗我係度煩你同同你搵腳食Lunch，都希望你每天活得開心！

1730就閃人，上到廠車成個人都好似散晒咁，感覺真的很累！自問自己要做的野都已經做晒，結果係點都唔到自己去控制了！只希望可以證明到比人睇我做野雖然未必做到100分，不過都起碼合格！同埋對GM都算係一個交代…

1820左右去到尖咀，上咗阿哥公司放底D包包先再去集合地點！第一次以ACC的身份去參觀，雖然一定無戰艦果D咁多野睇，不過都算係一個好的經驗。玩到8點就各自散水，同埋阿哥一齊返公司拎返D包包就去開飯！食包包就回家…

以為自己會忍不住喊出來，可惜最後連不惜的時間都沒有就匆匆離開！自問自己真的有盡力去做好手上要交代的事，但我知道無論點阿TART都一定會不滿意！而今次唯一興幸的就係自己一早已經打好咗篇Goodbye message，要多謝的人一定會on list，要ignore的人都不用去講什麼！只希望呢封email可以比CX果D無腦 + 無品的人知道，我GM一直都好有Taste，係你地唔知野！

PS：今日係「別人的女朋友」的生日！老婆！祝你每日都開開心心、要健健康康、無時無刻都要KEEP住你傻頭傻腦的性格，你份禮物已經準備好！睇下你幾時得閒我拎比你啦！

>>May 25, 2009 at 5:37:06 PM GMT+8

2009 年 4 月 22 日 星期三 【暴雨】

呢排返工日日都好似打仗咁，要將手上做咗4年的工作用5日時間handover晒比人的確有難道，但無奈我仍然都要努力去做，因為我唔想有藉口比人講我任何的事，但我發現無論自己有幾努力，到最後都會被人唱的…

今日真係好Angry，已經忙得不可開交，阿TART仲成日問埋D無sense的問題同埋叫你做埋D好無聊的事，搞到人都癲！今日本來將咗十點半過CX開會，點知又搞埋D野搞到11點先搭到車過CX，開完會都十二點半…

而今日Lunch約咗GM、Kevin、Toby、William、Bethia、Penny、Cathy、Roy、Stephen一齊去潮樓開飯，本來我今日係放PM的…但因為公司太多野仲未做晒，所以最後食完飯都照樣返公司做多少少野先走…一返到公司已經聽返D voice message，點知阿TART原來留咗Message say佢今日約左CEO食lunch，但佢個Meeting會over-run，所以叫我同CEO講聲。但當我聽到呢個Message時都已經過咗Lunch，心中都覺得今次又中招了。

過一陣就接到阿TART的電話，結果被TARTx咗一獲，但我最火的係佢話：「你唔係office都有責任打電話返公司聽voice message，你唔係唔識丫！呢D野好簡單你都做到咁………」聽完真係想CUT佢電話，你無野丫！我鬼知你今日約咗CEO，同埋你搵唔到我都應該直接打電話比CEO秘書啦！真係激死我，之後我行過去同CEO秘書講因為我miss咗阿TART的message搞到無通知到CEO 阿TART今日去到唔個Lunch，結果CEO的秘書一聽到就問點解唔直接打電話同佢講，真無腦！

唉！連人地都覺得你有問題啦！除咗呢樣仲有一單，之前叫我check吓公司的printer平均print一張紙出來要幾錢！先生，你無野丫！部部Printer都唔一樣好難計比你，最後我就是是旦旦搵咗幾部機compare計比佢，點知條友又話唔係要呢D的野！仲串我話唔洗指意我了，佢已經自己好roughly計咗！你個PK自己乜都唔講清楚你叫我點計比你，計完又話唔岩心水！係度搞事！真係士多啤梨蘋果橙…結果頂住度氣收工，搞到胃都痛埋！我今日明明放PM，食完Lunch都已經返公司整野整到3點半，早知發生咁多事就食完Lunch就走人。

係MTR度想來想去都係唔順氣，結果send咗個SMS比GM同囥D…點知佢既然reply咗句咁的野：「比著我係你，我一定會成張櫈車埋落去，洗乜比面佢」睇完之後真係笑咗出來！連氣都消咗一半，不過都係好唔開心…始終自己咁辛苦都係想做好D野，點解仲要係度搞三搞四，係咪真係搞到一獲粥留返比佢先安心…

成日都要我report我做緊D乜，但又唔體諒吓我係咪真係有能力解決到咁多事！真係激死我，對上層就成隻狗咁唔出聲，對我地就成日亂咁吠！不知所謂…

>>May 25, 2009 at 5:10:28 PM GMT+8