2005 年 7 月 27 日 星期三 【清涼】

終於回家了，真的很累丫！整天的狀態都是釣魚中，加上晨早流流比阿姐招見。唉！佢又叫我做埋D唔明的野…後來到10點幾佢去咗開會，我才可以鬆一鬆…

然後就同Nikita落Canteen買外賣早餐，點知見到2個Summer Intern，結果我地4個決定在Canteen食埋個早餐先返上去…哈哈！比『阻往』發現咗，不過佢都無乜所謂的。今日因為要去郵政局買郵票寄信，所以早咗D搭Shuttle Bus過機場…其實果時個早餐仲未消化完的，但唔食又怕個胃唔舒服，結果食剩半碗拉麵。下午仍處於半釣魚、半工作的狀態，中間又比『加納豆』玩我。太過份啦！個個都只係鍾意『整』我，哼！事情是我在文具櫃搵緊野，咁佢要Fax（Fax機在文具櫃上面），佢個大隻佬居然拉咗我起身推我出去（咁當然輕輕力啦！），仲話我阻住佢，真係丫！牛高馬大大晒咩…不過當然佢都係玩弄我而已，找天屈返佢一筆先…

放心啦！在公司整埋D手尾就急急閃人，嘻嘻！因為約咗「別人的女朋友」、子霖和穎風慶祝我們的4週年紀念日。哈哈！在Neway唱K唱到差不多10點先走，然後就去咗兆萬商場睇『Stitch』。各位唔洗擔心，我最愛仍然是個樣蠢蠢地的龍貓，只不過現在多多一樣就係『Stitch』，呵呵！愛屋及烏嘛！而且今日仲扭咗3隻關於『Stitch』的蛋蛋，如果知有另一邊部扭蛋機係睇到的話就唔會去第一間扭的，搞到現在有2隻『Swirly X-383』…Anyway，我都係會放返公司的，Yeah！

除咗扭蛋，今日仲收到一份好特別的小禮物，嘻嘻！我真的真的很鍾意丫！謝謝「你」丫…我一定會好好咁放返公司比人睇的，等佢地羨慕吓都好嘛！哈哈！

【今天的收獲…】

>>July 28, 2005 at 5:59:32 PM GMT+8

2005 年 7 月 26 日 星期二 【清涼】

雖則昨天好乖咁早咗D去見周公子，但今日返工仍然常處於釣魚的狀態。唉！到底怎麼搞？要找天同周公子大戰15個鐘先…

做夾心人真係好辛苦，阿姐有阿姐的想法、丹尼爾又有佢自己的想法，結果就搞我都唔知做好定唔做好…其實他們最終都目標都係一樣，只不過是彼此的做法不同而已，但咁就足夠玩死我啦！唉！真係好鬼忟，整埋D手尾差不多7點先走...

點知呢個阿娘打電話來話無買R煮飯，而阿哥又返屋企開飯，結果真係山長又水遠咁去旺角買雞…返到屋企都接近9點，呢兩母子仲過份…阿哥訂咗場在Club House放火，今日之內要落訂…咁又要我去Club House同佢去比＄，因為呢個阿娘話要煮飯。好唔滿意咁又落過街，終於返到去時阿娘先話原來阿哥仲訂咗打Bowling…【士多啤梨蘋果橙】…來來回回又行多獲，真係想爆粗！自己訂咗場就好心自己去比＄啦！咁忙就唔好學人Book場啦！當佢返到屋企呢個阿哥原來Book埋乒乓球場，頂！想點丫...又唔講清楚，打電話比你又唔聽…麻叉煩…

總之今日忟到爆…

>>July 27, 2005 at 3:34:43 PM GMT+8

2005 年 7 月 25 日 星期一 【清涼】

流感高峰期，公司D人輪住咁病，仲係無乜邊個係好返果隻…唉！今日又頭痛了，都唔知自己想點…唔可以病ka，因為星期四是『我們』一個特別的日子。『我們』今年一定要一起好好去慶祝的…

To阿邦：感情是兩個人之間的事，外人是很難跟你說什麼是對、什麼是錯，畢竟最終的感覺和結果都是你們親身感受的。老實講…在咁多個之中，你是最不用我們擔心的人，你很有自己的想法，因為你很清楚知道你想走的路是什麼、該如何去走，或許在這個過程中遇到很多困難和孤寂，但你仍然咬緊牙關、努力地走過去。這也是我跟「他」是學習的地方！不管怎樣，我的Recommendation仍然都是果句：『只是你覺得需要的時候，一個電話。第一時間、隨傳隨到…』

>>July 26, 2005 at 3:02:46 PM GMT+8

2005 年 7 月 24 日 星期日 【清涼】

又到星期一了，為什麼總覺得期頭的日子比較難過？不過都好，因為上星期留咗好多野都未做，今日可以唔洗在公司【齌坐】了…

今朝起身發覺成個背脊都好似唔係自己咁，怪不得阿康星期日幫我按摩時問我係咪去咗【擔泥】啦！真係好酸痛…返到公司就同個同事走咗去Canteen買外賣早餐食，點知搞到成11點幾先開始食…

Lunch同埋西門爸爸去東涌飲茶，本來想上個星期同佢食飯慶祝的，不過大家都夾唔到時間，所以延期到今日…同以往一樣我都係無乜野講果個，但對住西門爸爸個感覺係好舒服的，開心、唔開心都可以對佢表現出來…或許無人可以保證這份感覺是永遠，但起碼在這一刻的我就是這樣…

今日GM送咗罐印有KA飛機的可口可樂比我丫，Yeah！都唔知點解佢會知我鍾意儲可樂罐？不過唔理啦！據聞上海遲D會正式發售，HK有無我就唔知啦！呵呵！等我找天買部DC返公司映低佢放上網比大家睇吓！

>>July 25, 2005 at 5:07:56 PM GMT+8

2005 年 7 月 23 日 星期六 【清涼】

連續浦咗4日，掛著疲倦的身體離開我最愛的床返屯門望Mass。本來阿康他們是約好唱K的，不過後來唔知咩原因無去到…不過對我來說都無乜所謂，反正一開始我都無打算一齊去…

因為無唱K的關係，我地同埋鄒姐一齊去飲茶，而我今日最主要的目的就是同「佢」一齊行吓街…阿康佢好有義氣咁陪我等埋「佢」來到先閃人，而我們都係只逛了一會就決定回「佢」的家，因為吉之島都蠻多人…臨走前我們去咗玩扭蛋機，嘻嘻！「佢」扭到隻「史迪仔」比我丫！

本打算在「佢」屋企補眠的，不過後來兩個掛著睇套紀錄片都無眠到。原來今日係「佢」阿哥生日，哈哈！我話送其中一個扭蛋比佢的，但佢唔要，哈哈！慳返…今晚餐飯加咗R之餘仲有雪糕蛋糕食，阿哥因為知我要走，結果就預早砌蛋糕大家一齊食，呵呵！呢個蛋糕係阿哥的女朋友買的…不過如果係士多啤梨味就更好！食完Cake就乖乖打道回府了…

返到屋企佢地都訓晒，點知呢個老豆趁我沖澡時好無良咁走去開洗衣機洗衫，然後自己走咗去訓。頂！我已經眼訓到爆啦！結果又要等成個鐘浪埋衫先可以見周公子，呢個Moment真係好想『大巴大巴星落去』…好彩阿娘唔知點解起咗身仲浪埋衫，結果我就馬上走上床會我的周公子了…

>>July 24, 2005 at 5:35:06 PM GMT+8

2005 年 7 月 22 日 星期五 【晴】

行咗2日書展都咪話唔攰，昨晚搞埋D手尾都成3點幾，本打算同周公子大戰15個鐘，但唔知點解晨早9點幾就醒咗一次、11點幾再醒第二次，到點幾就再睡不了，所以就乖乖咁爬起床…

到4點左右就出門過『威記』探阿公，因為昨天回到家阿娘話佢入咗醫院…今次見佢的精神明顯無咁好，呢個阿公乜都死撐，明明有事都唔肯去睇醫生，真令人擔心！難得過開沙田就順便出埋去探阿婆，唔知點解覺得佢好似又瘦咗、對眼無乜神采！坐咗一陣去返沙田新城市行吓街，帶咗阿娘好豪咁去食『翡翠拉麵小籠包』…（唔知點解好想再入去行『書展』~𢡟I）



好兄弟近來有D煩惱，老實講…人的能力始終有限，或許這不是你期望的結果、或許你後挴當初的容忍，但細心去想…這可能是天主給你一個考驗。目的是讓你從過程中學習人與人之間是需要互相相處過才決定是否適合建立另一種關係，總之一句到尾，每個人都有自己的選擇，身邊的人最多只能給你意見而已，畢竟感覺是自己的！

>>July 23, 2005 at 6:13:39 PM GMT+8

2005 年 7 月 21 日 星期四 【綿綿細雨】

挨埋今日就可以放假了，返到公司都係整埋返昨天未完成的工作，咁搞一搞都搞咗佢個朝早…嘻嘻！辦事能力好慢~𢡟A要比心機加快返個Speed…

今日係西門爸爸的大日子，但因為找唔到他，所以Lunch同D同事去咗食『美心小廚』，點知架Shuttle Bus去到機場時停咗，原來我地本身落車個位比【紅魔鬼】架大巴泊咗！結果無奈咁等佢地班【魔鬼】上晒車我地先落到車，比佢地咁搞一搞！成點幾先去到餐廳開飯…

今日公司某D人都幾躁，都唔知發生咩事！而我無端端都比另外Department的人X咗兩獲，唉！不過算啦！人地要咁做你都無辦法…放工後又要馬上換衫，因為約咗穎風去『書展』，呵呵！今日入到去都成7點半，所以只行咗2個半鐘就要走。雖則昨天入咗去一次，但我地都行唔晒…可能是因為我地今次入去真係要『搵書』，所以有好多野都無睇。到最後無意發現到賣精品的鋪都無時間入去，只在外面速睇咗一眼就比人趕了，因為要收場…

好彩之前同穎風Share咗一個M記飽，如果唔係又好似之前咁挨餓。出到去我地都係去返『老地方』食我們的Dinner…

今年的收獲都OK啦！ 2本英文書、1本小說、2本醫生寫的書；小小的文具和小小的禮物，嘻嘻！

PS：「別人的女朋友」話佢近來都開始寫屬於佢和子霖的故事，哈哈！比心機丫！我同穎風都會撐你的，嘻嘻！今次實開心死子霖啦！佢等你呢日等咗好耐，唔洗再羨慕風了…









>>July 23, 2005 at 5:52:11 PM GMT+8

2005 年 7 月 20 日 星期三 【晴】

每逢期尾我都開始會有D野做，嘻嘻！無辦法啦！係到期尾佢地先有時候教我，而且將近Weekend，每個人的心情也開始放鬆一點！

本來今天和西門爸爸食Lunch的，不過因為其他人有事，所以延至到下個星期。結果就和自己部門的同事去『蕉葉』開飯…都唔明點解我公司D人咁關心我們的年齡之類的事，成餐飯都在討論這個話題…而我在這方面都無乜意見，反正到現在我在成個IMD都係排在尾5甲的位置…

終於挨到放工，馬上去換返套Casual Wear就趕去會展睇『書展』。本來打算Join埋Herman佢地的，但後來想過都係自己一個行，到走先找佢地。畢竟我今次想找某D冷門的書，太多人一齊行反而唔好意思找咁耐…行到10點收場就找埋佢地去『海王』開飯。Herman見到我咁累就主動幫我背著我個包包，後來我發現佢個背包仲重過我，所以都係自己攞返，唉！都唔知佢同子健係買書定搬書…

返到屋企放底晒D野、洗埋白白都差不多兩點，然後急速找周公子了…

>>July 23, 2005 at 7:11:42 AM GMT+8

2005 年 7 月 19 日 星期二 【清涼】

今日約埋新同事一齊返工，唉！都預咗佢地又多多野講，不過都唔理得咁多，反正解釋都無用，而我又唔想因為咁唔識朋友仔…嘻嘻！

GM終於返來了，不過我估佢應該都幾忙，所以成朝都好乖咁留在個位度發呆。下午同埋個Summer Intern一齊去『居酒屋』食Lunch，哈哈！其實今晚都約咗「他」食日本野！可能漏咗單，所以等咗好耐先有得食，仲係要食得好趕果隻。So最後返到公司有D胃痛…下午的時候發生了一些小意外，就係帶錯咗個Client去錯房，唉！真失敗…結果急急咁搵Rebecca求救。也因為咁比GM發現咗我啦！唯有整好晒D野就入去自首！例牌又比佢『指導』咗一會咁啦！不過佢同阿姐兩個比，我情願對佢好過對阿姐啦！呵呵！

晚上約咗「他」，本來打算搭公司車的，不過後來有人來接送，所以就無同佢搭公司車。嘻嘻！耍咗William~𢡟A真係唔好意思！食完飯都差不多11點，返屋企時行雷閃電和吹大風，幸好回到家先倒水，如果唔係實濕身！但唔知點解又開始頭痛…

>>July 20, 2005 at 3:31:57 PM GMT+8

2005 年 7 月 18 日 星期一 【清涼】

近來坐S1的人越來越多，而且在MTR又多咗個【欣澳站】，唔多唔少都會用多咗時間返工。不過對於愛懶床的我，都已經好努力咁爬起床的…

簡單上今日仍然無乜特別，唯一是多咗個新同事，呵呵！佢細我一個月的。所以我不再是全個IMD最細果個啦！Yeah！在介紹同事比佢認識時，我自己都順便咁認吓D人名，哈哈！雖則返咗學個星期工，但仍未認得所以的同事名，反而佢地就認得我。結果一邊介紹一邊比佢地瘀我，哼！

本來今日打算買飛機的，不過太多人啦！插針都插唔入，最後都係決定放棄了。但就睇中咗隻『KA毛毛飛機公仔』，感覺好似『小布海豚的』。嘻嘻！睇吓出咗糧，交埋D雜費後有無＄買先，畢竟都要成＄100…

食Lunch時同新來的同事傾計先知道佢係IMD其中一位同事的表妹，哈哈！又會咁岩的，更巧合是我同新同事都係住荔枝角，所以今日一齊收工打道回府。因此，公司班多嘴怪又多個話題講啦！唉！都過咗咁耐，咩都變啦！好彩「他」仲未入來做，如果唔係實日日都要我交份Explanation Report，到時佢唔死我死…

嗚！新同事可以申請禁區證，入去睇飛機…而我就仍然只能待在外面無得睇。嗚！

>>July 19, 2005 at 11:44:15 AM GMT+8