2005 年 9 月 18 日 星期日 【酷熱】

昨晚都也預期的早咗回府，哈哈！理論上係應該訓夠的，不過對於任何時候對睡眠都那麼執著的我，點都係可以無時無刻、何時何地咁去找周公子的，無辦法啦！我對佢始終都是從一而終的。

我開始嘗到放假就會生病的滋味了，雖然只是短短的3天，但蘊釀了很久的感冒終於發出來了…如果唔係因為今日約咗阿康睇戲的話，我想都係會留在家做返我基本上會做的事 – 訓15個鐘。11點半就出門口，點知落到樓下送車尾，結果要在烈日當空的太陽下等巴士，幸好剛去到的時候阿康先到，Yeah！

因為呢個係優先場，所以不設劃位，雖則坐旁邊，但都唔係太差，最搞笑係連廣告都無賣就開始。呢套『超級無敵掌門狗之世紀大騙兔』都唔錯，有笑點！但對於年齡較小的小朋友有D都會嚇一嚇佢地，哈哈！因為我聽到有個小朋友話：「好驚丫！」

睇完戲就同阿康行返去浪豪坊食Lunch，因為奧海城果邊太多人等位食飯…臨走時有Fashion Show睇，哈哈！咁多個Model只係識得樂基兒和Rosemary，評語？夠高lor！

今晚阿娘和阿哥都各自各精彩，所以回到府都係決定補返個靚眠先，都唔記得總共眠咗幾耐，但起碼一定有12個鐘，哈哈！如果唔係對眼邊有可能撐得大…

>>September 19, 2005 at 3:32:23 PM GMT+8

2005 年 9 月 17 日 星期六 【雨】

同『舊同事』兼『新朋友』傾天到今朝3點幾先找周公子，唔洗問今日就梗係遲返屯門啦！仲要係送車尾果隻，所以返到去都成12點半可以去開飯了。不過後來聽返佢地講就算返到去都未必望到Mass，唉！

今日Lunch同鄒姐、梁生、阿康、阿睿、子健和趙道去海霸飲茶，成餐飯都係梁生不斷咁講佢D偉論，唉！仲係越講越【屈突】果隻，連阿康都忍不住叫佢Off，只可惜佢仍然好起勢地講，真係OMG！之後我地幾個後生仔就在吉之島逛了一會，後來穎風原來入咗來屯門剪頭髮，所以就同埋阿康佢地搭車過去找佢。哈哈！經過一輪研究終於找到果間Salon了，唉！如果唔係因為阿康帶路的話，我將會又在屯門迷路的。

5點幾就同埋佢一齊出MK，因為今日到我同屋企人做節，唔洗問咪又係『泉章居』，不過太多人等位的關係，我同穎風決定又逛一會先返去。阿娘都有叫埋佢一齊食飯的，不過佢約咗阿Chris所以等我食完先Join返佢，但最後的結論係我食完飯阿Chris都未到，哈哈！等埋阿Chris就提議佢地去『越興園』食佢地的Dinner，之後先再行潮流特區陪阿Chris睇Watch…佢今日簡直大出血啦！買咗勁多野丫！如果唔係因為我地兩個喝住佢，都唔知佢點收科…看來今次的事對佢的打擊都幾大！

初時打算3條友返銅鑼灣落Pub的，不過後來有人的男朋友話去元朗睇孔明燈喎。其實我都想去的，不過我又唔想佢專登又要送返我回家，所以咪唔跟埋一齊去，哈哈！老實講係因為周公子Call所以先打道回府，Yeah！

PS：今日係小鵬哥和蘇媽媽的舊曆生日，嘻嘻！祝佢地身體健康，每天都開開心心…

>>September 18, 2005 at 6:05:38 PM GMT+8

2005 年 9 月 16 日 星期五 【雨】

由0200到1200＝10個鐘
再由1430到1930＝5個鐘


今日終於可以訓足15個鐘啦！嘻嘻！如果唔係因為肚餓的話我都會繼續和周公子長談的，畢竟自從返咗工都無乜時間同佢好好咁培養感情。有D衝動想打破睡15個鐘的慣例~𢡟A嘻嘻！

PS：「別人的女朋友」昨天比人傳咗D感冒比佢，搞到佢訓得唔係咁好~𢡟A唉！自己要小心D啦！飲多D水、休息多D…要快D好返，如果唔係有人會23號找我晦氣的…

>>September 17, 2005 at 4:48:35 PM GMT+8

2005 年 9 月 15 日 星期四 【晴】

這個星期的生活也沒什麼特別，早上返工遲到、放工盡量也回家補眠。有人說：「你是真的疲倦，還是在逃避？」也許吧！反正人每天在長大，要面對的事情也越來越多了，如果每件事也可以那麼容易就解決的話，這個世界就不會有人選擇去自殺吧！

晨早流流就收到一個非常無奈兼唔開心的消息，原來阿邦昨天突然回來，仲要係差不多2點就到咗，咁巧合的是昨天我和IT的同事出咗東涌食飯。相比平日呢段時間我應該還在機場而且有可能會撞到佢的，唉！唔開心丫！難得今次的Timing咁好，只可惜到最後還是無緣相見，最衰阿邦學人玩Surprise！

Lunch同ITS食中秋節飯，發生咗D小插曲…好在有證人，如果唔係真係比人「冼」一腳！又到咗Happy Friday，不過今晚要去阿Jan的婚宴，所以都打消了夜浦的念頭。放咗工就自己搭MTR過上環找Lover攞禮卷，中間又發生咗好多誤會…唉！今日都唔知發生咩事！一言難盡…

後來知道William自己一個就同埋佢一齊上去先，個場都OK啦！對住成個維園，我地自己KA就佔咗4圍，我和Nikita就離棄兩位男子坐返自己INF果圍，哈哈！成場最嘈的都莫過於我地自己同事啦！但個氣氛都算唔錯。不過最慘的都係Nikita比人擺上台，看來佢今次真係『有冤無得伸』。

散場後打電話比穎風，佢先剛睇完『五月天』在九龍灣食野，咁都係打道回府了，畢竟自己都覺得累！

【由什麼時候開始，自己會變得那麼沉默？】

>>September 17, 2005 at 12:31:35 PM GMT+8

2005 年 9 月 13 日 星期二 【晴】

近來食得太多零食和煎炸野，喉嚨有D痛…加上又唔係幾夠訓，D感冒的徵兆又開始發出來了。因此臨訓前啪咗粒『必利痛＋傷風藥』打返個底先…如果唔係中秋無啖好食。

今日返工仍然是對著D多到嘔而又唔係好明的Payment Bill，唉！最抵死係阿姐講咗句：「乜呢D唔係Finance做咩？點解要我地做埋？」咪玩啦！據聞好似係你自己攞返來做的，就算唔係呢D野在歷史記載中都係我地做ka啦！你自己都簽咗成年現在先問呢個問題係咪有點兒玩我呢？

挨到差不多6點9先閃人，嘭嘭聲出旺角，因為今日約咗21909T/A的同學仔食飯，無見咁耐…大家都無乜點變。佢地揀咗間有得玩的Café坐兼打算開飯，可能我很累啦！所以都無同佢地玩，同阿德齌坐等食，呢間野D食物和飲品都唔係好掂，而且又唔係真係咁多野玩，所以後來佢地等我食埋碗比較正常D的「雞翼腸仔麵」就閃水去掃街，而我就決定散水打道回府。畢竟星期3都唔係咁想太夜回府，加上又有好多野未搞掂。

呢個星期都唔知仲乜，日日都上唔到網，就算上到都係得果1Mbps，唉！唔開心丫！搞到我同穎風有D距離感，嗚！

>>September 15, 2005 at 8:33:44 AM GMT+8

2005 年 9 月 12 日 星期一 【晴】

昨天請了假的關係，今日整天都Keep住做野，加上阿姐又去咗Training…所以我可以注心做我的工作，唔洗比佢成日叫來叫去。都唔明為什麼我只是無返一日工成張台好似打風咁，唉！但睇真D要做的野又唔係咁好多，哈哈！

有時覺得有野做好過無野做，最辛苦係自己搵野去做…唉！對於現在的工作都略知一二，起碼無初期的時候無從入手。唯一今日唔係咁開心的係我姨媽又發揮她的野蠻本色，真係越來越怕呢D女人…成日得把口，又唔見佢落手落腳去做？腰骨痛又會去美國玩兩個星期，真係@#$%^&*^$@!#$^^&！

準時收工搭廠車過CityU做Registration，頂！佢張野寫由1900開始，所以走咗去PageOne轉返個圈先過去，原來佢1830已經開始做Registration。咁好心咪寫1900啦！整晒D野都7點半了，去咗Taste行咗個圈，買咗2盒沙律For明天的早、午餐，哈哈！要節制吓個食量先，已經撐大咗個胃了…

今日打電話比穎風話咗比佢知姨媽的野蠻事件，哈哈！因為實在好唔順氣嘛！你估女人真係太晒咩？仲要係呢D咁小器的女人…

>>September 15, 2005 at 8:33:25 AM GMT+8

2005 年 9 月 11 日 星期日 【晴】

因為今日要去北區覆診，所以已經在星期5時請了病假。話雖如此，但要起床的時間和平日返工都差無幾…而且路程仲比返工遠咗D！唉…

過到上水9點半，好準時咁去Reception攞返張登記紙時先發覺比阿娘騙咗！原來我係睇10點半果批，唉！早知就唔洗咁早過來啦！好景不常，因為下個星期一係公聚假期，所以今日比平時更加多人。我由9點幾坐到12點半先到我睇，真係坐到腰都痛埋。唔洗問個肥佬醫生又無來睇我啦！不過今次Pass去果個醫生都幾好，好到要我照張X-Ray！哈哈！咁又好似嚴重咗D咁。嗱嗱臨咁衝過去X-Ray果邊照埋張片，如果唔係就要等到2點先有得照。離開北區醫院都已經成點幾了，打電話比阿娘點知佢又走咗出街風流快活！唉！激死我啦！

無奈咁自己打道回府，順便去埋2間銀行整埋D手續都已經成4點了！在美心食返個下午茶就回家補眠，咪講笑！今日要用的Energy同平日返工真係無乜分別，唯一唔同的咪就係可以著條短褲仔、波鞋周街走…

PS：今日聽緊穎風的時候居然見到子霖、阿邦和寶龍哥！哈哈！真係估佢唔到，但為什麼每次都是見不到我最想見到的人呢？

>>September 13, 2005 at 8:18:41 AM GMT+8

2005 年 9 月 10 日 星期六 【晴】

11點幾先起身，嗱嗱臨換衫、梳洗出門返屯門…返到去都12點半，所以就直接去『小巴黎』搵位開飯…不過因為阿康、熊貓和趙道都要在聖堂整埋D手尾先過來到，搞到我一個人好樣衰咁霸著張台…

好耐都無食過『小巴黎』了，佢D烤牛肉檬都仲係咁好食…食飽飽、行咗個圈就去咗『仙跡岩』飲野兼吹水，阿康因為有事先走，而我們3個就走咗去扭蛋鋪。熊貓呢個Cheap幣等趙道走咗先扭，哼！佢係怕比趙道笑佢同我一樣玩埋D小朋友野…我們今次終止扭到車卡啦！雖則不是自己果款，但都好過無丫！呵呵！

熊貓又好有義氣咁陪到我5點半先走，因為今日要過Lover家，但佢又無話比我知exactly個Time比我知，所以唯有又在『吉之島』行來行去。臨過去前經過見到一間書攤有『4子Tokyo的寫真集』，仲係＄42…我馬上打電話比「別人的女朋友」，哈哈！阻住佢同子霖拍拖~𢡟I不過經過我們的商議後都係無買到，嘩哈哈！

過到Lover家都6點幾，佢地都差不多人齊兼開始開飯…等埋「小林」到7點幾就食得， Ann姐整的咖啡牛腩好好咪丫！我又好無節制咁由頭帶到尾，個嘴都無停過！嘻嘻！減肥計劃又失敗了。食飽飽就正式今天的主題 – 聖屋

儀式都好咁完成，哈哈！因為「小林」不停咁問幾時有糖水食，我地真係對佢又愛又恨。到10點幾我就走先，不過「小林」話車埋我返九龍，哈哈！所以就5個人一齊搭順風車回家…

PS：差D唔記得咗今日係『小鵬哥』西曆生日…哈哈！唔經唔覺都已經30有2了！老實說我好似只跟你一齊過了一次的生日，誰叫你那麼忙常都沒空理我們！Anyway…希望你「珍惜」每一天；每分每秒都掛著好的心情工作！

>>September 11, 2005 at 5:16:02 PM GMT+8

2005 年 9 月 9 日 星期五 【晴】

有D精神緊張的先兆~𢡟I嘻嘻！因為自己今朝8點幾就醒咗，初時仲以為自己遲大到，點知見到無掛到公司衫在窗台時才想起今日是星期六…所以二話不說又躂返上床繼續睡。

訓到12點幾就起身，哈哈！因為肚餓丫，近來無節制咁食，搞到暴肥咗好多…加上又無做過運動，都係時候要收吓嘴啦！唉！真係易肥難瘦…同阿娘食完個Lunch就返屋企整吓D野先，到5點幾先出門Join Lover去MK行街…點知在等緊Lover的同時唔知係咪因為企正在燒味鋪外，覺得好肚餓~𢡟A仲係餓到腳軟果隻。所以當Lover一到就去咗食D野先再行街…

行咗『潮流特區』、『兆萬』和『瓊華』…真係估唔到『潮流特區』的Miffy公仔會平過『瓊華』的，結果就行返去『潮流特區』和Lover買公仔…本來打算送比佢的，不過佢又話唔洗喎…最搞笑係行返去途中見到聰聰，原來佢今日收工同家姐行街，怪不得無Call我啦！而當佢想打電話比我時就見到我了，哈哈！咁夾的？佢和我們一齊買完野就殺去尖咀會埋班「展翔」…

今日終於去食尖咀間【Friday Restaurant】，哈哈！其實我生日果日佢地都已經想去呢間，不過我果排食西餐食到怕，所以先去返【和花亭】。估唔到我地3個最準時到達…今次的飯局有：康、睿、揚、婷、聰＋女朋友、盈、聰聰、趙道和我…我都忘了叫了幾多樣野，不過唔知係咪因為個個都肚餓，所以好快就清倉了。到我們差不多食完想閃的時候黎氏兩姊妹先到，初時打算落Pub的，不過因為婷要打道回府，所以全世界散水，各自各精彩…而揚和我就陪Lover行去尖東等男朋友，無無聊聊又走咗入【杏花樓】食甜品，哈哈！個嘴都未停過…

搭緊巴士狂收到佢地D電話，呵呵！放心喎，又唔係第一次自己返屋企…

>>September 11, 2005 at 3:12:16 AM GMT+8

2005 年 9 月 8 日 星期四 【綿綿細雨】

唔知點解近來都想埋D無謂的事，搞到日日都晨咁早先找周公子…唔洗問就梗係懶床返工遲到啦！下個星期中秋節了…我想「他」今年也是跟工作一起過吧！

返工時見到Patrick…他給我有種「哥哥」的感覺，哈哈！好似搞到個IM有好多家人出來咁…有「阿公」、「西門爸爸」、「Uncle加納豆」和「哥哥」…如果穎風都入埋來就多個「情人」或「老公」…呵呵！神經病…

Lunch Time同INF一齊食中秋節飯，因為我要去銀行打簿的關係，所以後來先到，點知佢地留返老闆旁的位比我…哼！因為食公司的…所以個個都好豪咁叫，哈哈！今次唔洗食下午茶啦！好彩趕得切搭尾班車返公司，如果唔係就要搭S1了…

基本上今日都Keep住工作，由早到收工都無停過…但又唔係忙到透唔到氣，咁的工作量都不錯。6點半時比GM招咗入房，真係比佢嚇一跳，哈哈！原來佢叫我揀個【金箔咖哩金華火腿瑤柱月餅】，呵呵！記得去年我曾經食過一個叫【金箔咖啡月餅】的…

臨走前同「Uncle加納豆」吹咗幾句水就搭車過機場坐巴士，嘻嘻！因為想訓覺，點知有個阿叔起勢咁講電話，仲係荒死無人聽到果隻…搞到無覺好訓，如果唔係因為佢有朋友在附近真係想叫佢Off…不知所謂！

PS：今日打簿發覺唔對勁~𢡟I下期學費有嚴重的危機，看來這個月要想一想辦法先。唉！仲要在月尾前換咗部電話…

>>September 9, 2005 at 3:27:10 PM GMT+8