2005 年 10 月 24 日 星期一 【微冷】

在昔日的時候，我和「別人的女朋友」聽到「小鵬哥」說以下的說話的時候，並不覺得是怎麼樣，但現在的再想返的時候，其實我們現在面對的困難，他也曾經經歷過、辛苦過、甚至是『哭』過…

【升三年級的暑假，認識了一個住在我家附近的同學，由於住得近，性情也合得來，就養成了常常去那位同學家唸書的習慣。 有一次，本來已經約好去他家唸書的，因為我心情不好，母親就騎機車載我到他家大聲招呼說今天晚上不一起讀書了。在回家的路上，細心的媽媽買了一些滷味和酒，回到家，家人都在客廳，我縮在長沙發裡，腦子裡一團混亂，眼睛直楞楞瞪著嘈雜的電視。家人試著和我說笑聊天，弟弟還說了些當期少年快報的漫畫內容。但我什麼也沒聽進去，筷子夾一兩下，喝了一點酒之後，雙手支著頭，靠在橢圓形茶几上就開始毫無目的地抽泣，接著倒在沙發上大哭，媽媽什麼也沒說，就是把我扶在她懷裡，我的嘴裡一直喃喃念著，好苦啊！好苦啊！真想去死。雖然當時哭一哭就昏過去了，第二天醒來又是一條好漢，但是無論如何，這次大哭的經驗印象深刻，連自己都嚇一跳。】

「小鵬哥」也曾經說過：「逃避壓力是沒有用的，只會讓壓力更囂張，勇敢的去面對壓力吧！」我不知道這條路應該怎麼走，也不知道是不是應該要放棄，但我知道無論如何！在我和「別人的女朋友」心中因為有「你」才讓我們有勇氣的走下去。無疑我們現在走的路真的覺得很累、很多障礙和困難，不過就像Lay說的一樣：「這條路很長、很直，我不會開快車，也不會停車，直至走到路的盡頭。」

『盡頭』是我們的終點，雖然我不知道當我走到那裡的時候你是否還在那裡，但我也希望我可以努力地走下去看這個結局最終是什麼？

>>October 25, 2005 at 4:58:02 PM GMT+8

2005 年 10 月 23 日 星期日 【颳風】

比人「冼」咗獲… 講又死唔講又死，都唔知佢地想點…又要玩但又要慳，頂……唔該你兩隻『雙黃蓮蓉』講掂數先好叫我做野啦！一個字 -『火』

>>October 24, 2005 at 8:35:11 AM GMT+8

2005 年 10 月 21 日 星期五 【微冷】

本打算今日會好好咁訓返15個鐘，可惜事與願違…晨咁早樓下試Mic，不停咁Testing、Testing and Testing…唉！難得本帥哥今日放假，放過我啦！結果9點幾醒咗、11點幾又醒咗、到12點幾就訓唔返，真係士多啤梨蘋果橙…

無奈咁起身整理吓D野，左搞右搞就等阿康上來整機…結果因為隻碟Load唔到所以唯有要辛苦阿康下次再上來整多獲…唉！我都唔知點解會搞成咁的，無奈啦！近來都好鬼黑仔的…整整吓就又收到一個仲無奈的消息。其實呢排都醒水留意住佢的，不過到最後都係失敗咗！

「鄭建邦…」：你咪以為你牛高馬大我就唔敢打你，次次都係咁！你估我係狗仔隊咩都知丫，真的是！好心你光明正大D、大搖大擺D得唔得丫，再係咁真係唔理你地㗎啦！仲有就係唔該下次寫中文之前問一問隔離左右的人先好寫，完全唔明你想寫果幾隻字的Meaning係咩！到低你係次序調轉咗定寫漏字…快D解釋吓啦唔該！

>>October 22, 2005 at 6:30:49 PM GMT+8

2005 年 10 月 20 日 星期四 【微冷】

哎呀！都唔知點解打咗的日記突然無晒，又要重新打過~𢡟I唉~~~算吧啦！唯有重新打過。比人投訴話我無Keep住打日記~𢡟I呵呵！無辦法啦！日日返到屋企都散晒咁的樣，搞埋D手尾都成2點幾，仲唔嗱嗱臨去找周公子咩…

其實日記最主要的目的都是想給身邊的「人」知道我每天發生的事或是近況，畢竟人越大有很多事情都很難即時告訴身邊的「人」…所以這或許一個很好的渠道吧！

講返今日，朝早返到公司一陣就聽到班八公圍埋一齊唔知搞乜，後來佢地話原來有架S1想轉入公司馬路前死火停低咗！而巴士上有2位同事打電話回來做即時報導，哈哈！證明我公司D人幾無聊…到Lunch Time就大圍去東涌飲茶，差不多成點幾先人齊出到去，唔洗問就梗係會遲返公司啦！雖然未飽，不過我食到2點就走先，因為要幫SDR買西餅…返到公司佢地都仲未返到。後來Nikita突然比袋野我，原來佢同阿Ben去咗搵「舊同事」攞手信，哈哈！第一次就自動奉獻，唔錯唔錯，不過就唔知會保持到幾耐啦！Anyway，多謝你啦！

差不多5點左右比人捉咗上去開Internal Meeting，頂…平時呢D野都唔洗我開的，仲打算叫我Take Minutes，咪玩啦！我聽得明你地講咩就奇啦！更何況Take Minutes…開到差不多成6點幾先走得，臨走前見到「神哥」仲努力中咪同佢吹吓水，哈哈！吹到連Kenneth都做完野回來，結果就益咗我勞煩個壽星仔載埋我回家…

>>October 22, 2005 at 6:11:27 PM GMT+8

2005 年 10 月 19 日 星期三 【微冷】

真奇怪！又不是財多，為什麼近來的身體都唔係咁好….…加上夜晚又要趕住去返學都無乜機會回家補眠！唉！幸好呢個星期六調咗堂唔洗返，Yeah！要計劃吓有幾多眠幾多的時間表先…呵呵！

又轉天氣，所以鼻敏感又發作…昨夜成晚流鼻水搞到無覺好訓，所以今朝決定返工前睇吓醫生先，係時候用吓公司的Benefit啦！睇完醫生都成11點幾，返到公司都放Lunch，所以決定打道回府食埋個Lunch Box先返下午……

返到去個個都問我仲咩返來，哈哈！雖則我都有醫生紙，但今個月已經請咗2日Sick Leave，如果今日又全日都唔返就費事啦！我又唔係病到起唔到身果D…佢地以為我成日都Off，所以自己攞返晒D野自己做，哈哈！咁證明呢D野佢地自己係搞得掂啦！不過如果唔係因為阿姐開口埋口都話搵我去做的話，班衰仔就唔會咩叉都比晒我啦！唉…

放工就搭廠車過馬鞍山，因為今晚過阿公家食飯…好難得兩個舅父都咁早在家喎，嘻嘻！食完飯我同G舅父閃咗入房睇電視，哈哈！因為出面開家庭會議，呢咁的時候就梗係有得閃就閃啦！免得傷及無辜嘛！

>>October 21, 2005 at 4:16:46 AM GMT+8

2005 年 10 月 18 日 星期二 【微冷】

越來越覺得都唔知自己返工為乜、學到D乜同做咗D乜…日日返到去都唔知自己想點，做的野又唔知係點。雙比舊年在SDR果邊真係差得遠，起碼人地果邊真係做返D關於Administration的工作，但呢邊似Personal Assistant多D…其實係某一個人而已...

今日返到屋企終於有D時間睇返「別人的女朋友」的日記，見到佢咁開心真羨慕丫，尤其係呢段野：【睇番個衰仔既野！哈哈！真係好攪笑！笑到我係hall都笑左出來~~「死仔包」，勁無記性。不過最攪笑都係佢又一次拖佢既兄弟落水，哈哈！好鬼好笑....竟然係到扮明，笑死我！你進步得有幾多都好，我都唔相信你會明家啦！唔好扮野，你已經被我捉到啦！哈哈！不過真係好扺死~~哈哈！就係喜歡你噤可愛！呵呵！再又再睇埋佢兄弟個D，阿風哥就好啦！Sweet到死噤既樣，真係呀！你睇住有「人」唔高興.......... 】

To「別人的女朋友」：你放心喎，就算無咗穎風我都仲有小鵬哥和阿邦撐我，Right！畢竟我在穎風心目中都無乜影響力的，呵呵！

>>October 20, 2005 at 3:12:54 PM GMT+8

2005 年 10 月 17 日 星期一 【晴】

又一次連續一個星期無寫日記了，無辦法啦！日日返到屋企都好似虛脫咁…而且公司而家後面個【吉】位有人進駐咗，都唔係咁鬼方便打日記了。再說丫！因為阿姐一句話搞到我要幫佢D下屬做野，真係「啞子吃黃連」…

15/10：忍了成個星期，終於等到砌線啦！哈哈！晨咁早咁過咗中環，初時真係怕得要命，因為佢地話砌線唔會打麻醉針，所以會好痛的。上到去等咗半個鐘終於到我啦！何醫生的手勢真係不錯，雖然今次整一隻牙都要成2K，但就真係唔係好痛，至於腫就一定會有的…她說我的傷口都埋得唔錯，嘻嘻！砌咗線個口都無之前咁緊，起碼可以張大D個口先啦！Yeah！

之後就搭叮叮過北角做速遞就返灣仔同埋阿康、阿睿去我和穎風最愛的「老地方」，食飽飽我就又搭叮叮返學了…咪講少，呢個阿Sir的英文真係唔得，聽到都唔知佢講咩，又快又講得唔好聽喎！後來放Break問佢時佢仍然都係用一個超快的中文解釋去答我，真係小喇叭！難道他認為我隻手會寫得快過佢把口嗎？

16/10：臨時決定去Disneyland，嘻嘻！因為有Free Ticket…臨出發前「做足準備」，最搞笑係D人一見到架Disneyland車就馬上衝晒入去，因此就益咗我，哈哈！因為Disneyland車平均4分鐘一班，而東涌就10分鐘，呢班走咗就都無所謂…結果第2班的Disneyland車無乜人，我打橫訓上D梳化都無人理我。幾勁！

1000入到去，Skip咗小鎮大街直衝去攞「巴斯光年的Fastpass」，然後就去排Space Mountain，用咗15分鐘都唔夠就玩得…一個字「正」丫！後來因為Fastpass未夠鐘所以再玩多次…哈哈！Then就夠鐘閃咗去玩「巴斯光年」，都OK的！係有點兒無聊，後來因為D工作人員無收到我張Fastpass，結果又益我入去再玩多次，不過我都唔明點解又係無人收。

之後就去映吓相，見到Donald Duck只需要等15分鐘就又衝咗去排隊映，哈哈！如果「別人的女朋友」見到一定唔捨得走，後來見到花木蘭果隻「木需」無人排隊我咪又走埋過去映，呵呵！然後就去睇「Festival of the Lion King」，嘩！D表演者全部都係唱Live的，怪不得個個都高度評價啦！睇完就又趕去睇「The Golden Mickeys’Fantasyland」，呢個show仲正…如果唔係因為我坐咁邊的話一定映得仲多相。睇咗2個show就去玩埋旋轉木馬和Winnie the Poon就趕返去1500睇巡遊，因為站得太近了，所以D相張張都好大…最無奈係映映吓無Memory，要馬上換Card…

睇完巡遊就去阿璇的餐廳食野，哈哈！食飽飽就去隔離睇埋個Disney 3D動畫，今次的主角仲要係Donald~𢡟I而且呢個3D動畫我覺得係咁多個之中最正，哈哈！唔知「別人的女朋友」睇完之後會唔會唔捨得走呢？

大部份要玩、要行的地方都去晒，所以就開始返小鎮大街睇吓有咩岩買，順便咁攞咗好多公仔映相，哈哈！因為買唔起…睇中咗隻介指，不過都費時叫「人」買啦！只係買咗小小野比「別人的女朋友」當作獎勵她近來咁乖咁上堂和讀書的小禮物啦！

19點幾就返睡公主城堡霸定個靚位2000睇煙花，坐定咗之後就睇吓有D咩相係可以Delete，哈哈！因為張512和128都已經Full咗…D煙花都唔錯喎！睇完就去小鎮大街攞埋份禮物就散水了…

點知就衰收尾，在MTR找咗好耐都找不到張128SD Card！唉！今次係第一次用就已經唔見咗，最傷係入面D相無晒，果刻真係想喊，無奈環境唔容許…唔知係咪因為今日太開心，所以上天要比返D懲罰你呢？唉！總之就真係好唔開心，到最後仲要比阿娘寸我搞到佢無得睇相，就連「別人的女朋友」都無得睇佢最愛的Donald~𢡟I真係Sorry丫！

唯有尚在的相可以去呢條link - http://hk.pg.photos.yahoo.com/ph/annangcy/my_photos

17/10：昨天去完Disneyland，今日返工簡直都請假，連續2日假期都無乜點訓過。

18/10：昨天夜晚仲返埋學，今日個樣殘到連自己都唔想睇到。越來越覺得阿姐都唔知當我係乜，居然叫我幫佢『攞手袋』…無錯！係『攞手袋』，原因是她開緊會，又趕住過機場！就唯有叫我『攞手袋』比佢…OK！都算，到下午佢去開會唔記得攞手提電話又叫我去攞比佢，頂！OK！再算…最過份係佢唔見咗個水杯蓋都叫我去幫佢搵，你無野丫！你估我真係唔洗做咩！你D下屬乜叉野都比我做，仲燒埋去Rebecca果邊！唉！我個名也因為阿姐的關係而響起來…越整越臭…

>>October 19, 2005 at 4:27:22 PM GMT+8

2005 年 10 月 11 日 星期二 【晴】

連續放了5日的假，都咪話唔爽。畢竟每天都讓我大訓突訓，疲倦？訓…無聊？訓…悶？都係走咗去訓。哈哈！總之有得訓就訓，不過訓還訓，自己都好乖咁夜晚返學，嘻嘻！小鵬哥…今次抵讚吧！我唔會好似D『人』咁成日走堂的，呵呵！

今日第一日返工，仲以為會堆到成枱野，點知水靜河飛。最後只用咗唔洗兩個鐘頭就清晒要做的野，唉！不過都好，反正臉腫腫搞到唔係咁舒服。最搞笑係D人見到我咁的樣以為我比人『蝦』，個個都話同我出頭，連果隻「加納豆」都搞少咗我，呵呵！唔通我個樣真係咁【死】？

今晚要上到十點先放得學，可能在廠車上訓咗一陣，所以成堂都無乜點找過周公子（勁丫！），不過就有D跟唔切阿Sir講乜，看來真係要睇吓書先得…

「別人的女朋友」呢排都好乖喎，呵呵！看來子霖的威力真係非同小可，哈哈！比心機丫！

>>October 13, 2005 at 3:30:31 AM GMT+8

2005 年 10 月 8 日 星期六 【晴】

今日好乖咁起身返聖堂，無乜原因…可能是因為明天自己都放假吧！只不過是無帶琴返去拉，畢竟臉腫腫都唔係咁舒服。最尷尬係比人捉咗去搵趙爸爸【問診】，真係唔好意思！嘻嘻！如果唔係因為我咁怕牙醫我都會找趙爸爸睇牙的…

之後就同鄒姐、阿康、子健和大快活開飯，唉！要佢地坐係度等我食咗咁耐真係唔好意思！我已經盡快咁【吞】落去的，不過佢唔夠湯所以有D乾…之後就自己行晒成個吉之島的麵包店買定D麵包回家做Back Up，因為有時夠鐘食藥但又無野落肚，所以今次醒水買定D乾糧先…買完野就順便過埋老家買『河粉』，本來想買『檬粉』的，不過佢今日無貨…回到府都5點幾了，而因為阿娘湊咗兩個長老過來，所以我都唔敢再去惠康入貨打道回府先。

阿婆不停咁重覆問我們問題，而果D問題來來去去都係果幾條，最無奈係你唔鬧得佢，因為佢自己老人痴呆都唔知自己問過D咩！怪不得阿公真係比佢搞到佛都有火…

PS：今日係聰聰生日，呵呵！大個仔啦！要生性做人啦！咪成日出夜街啦！比心機賺錢請我食飯，知道未丫？嘻嘻！

>>October 9, 2005 at 4:18:31 PM GMT+8

2005 年 10 月 7 日 星期五 【晴】

因為整咗牙面腫的關係，阿娘居然叫我唔好返學留在家休息喎！哈哈！不過最段我都係好乖咁返咗學，雖然返到去都唔覺自己聽咗D咩書，但總好過連人都唔到丫。再說…我答應了小鵬哥要乖乖的…呵呵！

放學時打電話比阿娘，之後就過馬鞍山開飯…唔想左轉右轉火車過去，所以就唯有打電話問人點搭巴士，到最後要勞煩阿豬~𢡟I真係唔該晒丫！原來個巴士就在統一中心樓下，搞到我行來行去到最後都只不過是我放學的地方的外邊，唉！

去到馬鞍山廣場又係去維園餐廳開飯，而因為牙痛的關係都無去据扒了。但就用一個非常之慢的速度去【含】飯，都未試過食飯食得咁斯文…之後就同埋阿娘送埋兩位長老返屋企，阿娘有阿娘佢招呼兩老，我有我入房睇Harry Poter…搞晒所有野回到府都有11點幾了…

PS：哈哈！真係估唔到G舅父除咗越來越可愛之外，仲係咁怕死的人，哈哈！聽阿娘講話佢近來好乖咁介口仲多食水果，嘻嘻！咁咪好，咁後生就有糖尿病，到老果時我問你點算…

>>October 9, 2005 at 4:05:46 PM GMT+8