2005 年 12 月 10 日 星期六 【晴】

今日係慶祝鄒姐牛一的大日子，雖不是正日。不過我們「展翔」的活動總監已經在個多個月前就已經計劃好晒時間、地點和人物的事宜，勁丫！辛苦晒你啦！阿康！抵鄒姐咁錫你的…

昨晚溫書溫到3點幾先訓，本打算早D起身再溫過的，不過最後都係失敗，直訓到12點幾。起身左搞右搞、睇吓D Notes就換衫入屯門碼頭找Lover攞野。佢識著我呢D咁的朋友真係幸福啦！做埋速遞公司…

在佢屋企呆咗1個鐘就去屯門西鐵站等埋兩位少爺就一齊出發去我們今日的目的地 – 大榮華。今次的飯局都算齊人，計埋主人家都有16個，不過張枱就係12人的，幸好我地個個都好Fit…

我們大約叫咗15-16個餸，都咪話唔豪！當然一定會叫佢最著名的『豬油飯』和『走地雞』！果然名不虛傳，好好味！不過我個胃又唔係咁舒服，所以都無乜胃口，同埋劉生成餐飯好似開喇叭咁，真係好似子健話：「成枱餸都無乜邊碟無佢D口水…」

忘了講今日有邊個，有主人家鄒姐、阿康、阿睿、子健、孖聰、趙兄、婷＋男朋友、OD＋男朋友、OD妹、曾生、劉生、子揚和我。今次都算繼阿康、阿睿生日後最齊人的一次，大約食到九點幾就殺返屯門去阿聰的新屋踩場。其實初時打算去埋食甜品的，不過個個都飽到唔想郁。

阿聰設計新居有3大原則：一、入門口唔可以見到張床；二、張床要對著電視機；三、張床唔可以對著廁所。哈哈！勁搞笑！最勁的都莫過於佢張King Size的床，不過講真，倘若第時我搬出去住都會打算買King Size的床的，呵呵！

大家坐到十點半就散水了，我本來打算坐66X返屋企的，不過阿哥臨時打電話來話佢要載「女朋友」去西鐵站，所以順便接埋我返去。

返到去都11點幾了，洗完白白，Upload埋D相就去溫咗一陣書，不過最後都係訓著咗…

>>December 12, 2005 at 7:11:45 AM GMT+8

2005 年 12 月 7 日 星期三 【晴】

呢間公司除了人工低、福利少之外，最好的好處都莫過於呢個部門可以準時收工兼且有時可以做吓自己的私人事，包括做功課、打機同埋寫日記…哈哈！也因為這個原因才讓我選擇留在這裡…

今日係星期四，約咗我的「西門爸爸」一起食Lunch，不過Rebecca突然請Sick Leave，所以就只有我、「西門爸爸」、「阻住」和Ricky去東涌食「嚤囉街」，哈哈！第一次去呢間野食，真係估佢唔到有咁多人…食物都OK啦！但價錢就拍得住機場…

同以往一樣我都係得一個食字，因為佢地講的野我都唔明，但就真係好鍾意「西門爸爸」叫我做「小朋友」，嘻嘻！感覺很親切…

食到2點就散水，「西門爸爸」話佢聖誕會出Outport做野，不過今次就會帶埋個女，咁都算有返D人性啦！成日都等個女在家好慘的…

>>December 12, 2005 at 3:52:30 AM GMT+8

2005 年 12 月 6 日 星期二 【乍雨乍晴】

今日的生活仍然是在公司趕功課，不過呢份係第2份功課，original的assignment其實老早就搞掂，係果隻「鬼」唔知仲咩要我地交埋份Draft比佢，咪玩啦！晨早燒晒啦。結果就好樣衰咁度返5份Draft出來…唉！

因為Rebecca放假的關係，所以我又做咗成個IMD的AO…不過可能個病樣真係太病啦！個個見到我咁的樣都費事叫我做，所以佢地都會自動自覺攡返份野自己搞掂，而我就可能食咗D傷風藥搞到個人呆呆滯滯咁…都咪過唔辛苦。

Lunch time都懶得出去食，在Canteen嗱嗱臨咁食咗個杯麵就返上公司搵周公子，不過經過GM間房時就比佢叫停咗，原來佢Fax咗好耐都Fax唔到份野，結果我就要放棄我的小睡時間同佢搞咗份野先，搞咗好耐對方個邊的電話終於接通了，唉！唔睇份野由自可，一睇就把鬼火。原來係佢自己D私人事務…早知就唔洗咁著緊訓醒先算。搞完佢份野咩都唔理啦！二話不說就抱著我的小飛俠找周公子。

訓一訓果然好好多，雖然仍時一個未睡夠的狀態，不過都已經好好了。收工準時咁去搭廠車去九龍塘交功課，然後就同Tracy去行吓Great…之後等埋條虫就打道回府。

睇完套『隨時候命』，咩都唔理就上床找周公子了，因為真係很累丫…

>>December 8, 2005 at 8:00:43 AM GMT+8

2005 年 12 月 4 日 星期日 【乍雨乍晴】

屋企部PC唔知仲乜鬼明明Connect到但就上唔到網，氣死我！最慘仲係要死埋D趕交功課的日子，唯有晚晚等阿哥訓咗先有得用佢部腦上網。因此搞到做唔切令到『女朋友』凌晨3點幾仲同我趕緊功課…

呢個星期都無乜特別的事發生，公司的Workload都係差不多，一係就無野做、一係就忙到水都唔得閒飲。而呢兩個星期六都走咗去中央搵吓有咩書係可以做到份功課的Reference，不過次次都空手而回。為咗要獎勵吓自己，所以晚晚都走咗去我和穎風最愛的『老地方』開飯，然後就行返去天后坐102巴士回家。

趕咗兩晚通宵終於搞掂咗份唔知自己寫咩的Assignment出來，唉！但因為仲有很多野都未整理好，所以就決定把公司D事務都放在一旁，全心整掂我份Assignment先，佔50%的…都咪話唔貴丫。

搞到成4點半個心開始有D驚做唔切的感覺，對上果次有呢種感覺好似已經是兩年前了。那次是因為考唔到試的關係，幸好最後都得以解決。到5點幾的時候收埋「神哥」果篇Recommendation就可以Print out了，「神哥」都算唔話得，比我趨佢快D幫我改，而佢今日仲係放假的…

Print完之後就咩都唔理攞袋衝去CNAC的FAM Bind埋份assignment，而Materials就當然是我D好同事Support啦！最後幸好都趕得到架廠車，如果唔係就真係左轉右轉、有排先轉到去金鐘。

在此多謝所有為我呢份自己都唔知係咩的Assignment出過任何力的朋友們兼好友們…多謝…多謝各位來賓！

>>December 8, 2005 at 7:27:49 AM GMT+8

2005 年 11 月 30 日 星期三 【晴】

昨天忘了開返個Clock Alarm，結果今朝一訓就訓到8點，思前想後都係請返個Sick Leave先，返正自己都要睇醫生，畢竟個胃都真係漲到好辛苦…

1點幾就起咗身，打電話比阿娘先知佢過咗Lover果邊…所以好求期咁煮咗個杯麵就落街睇醫生兼去埋銀行開返個e-banking的Login account，哈哈！因為自己入錯password搞到比人lock住咗！以現在的經濟狀況，看來真的要想吓辦法先！

真奇怪！樓下醫生次次都唔同，今次撞正呢個就真係認真麻麻，不過算吧啦！最緊要係D藥要Work！返到屋企本來想做吓份assignment的，不過坐唔夠幾分鐘又比周公子急Call，結果又走咗去見佢！訓到阿康打電話來先起身出門去旺角，因為佢今日陪我去換MP3，無計啦！成日都Hand機！

首先我們去吉野家開飯，之後就去Broadway，點知個Sales好X寸咁話：「Apple D機成日都會Hand機，根本就唔係D咩大問題」吓？你係唔係Sales來的，咁的野都講得出，如果我係來買機的話睇吓你係咪咁講…真係不知所謂。之後佢話佢地無貨無得換，如果搞到我同阿康要去返尖沙咀。妖！早知就一開始落尖咀無咁『興』，又係佢的CS講去邊間Broadway都得的，今時咁的服務態度就真係…

去到尖咀，點知佢地又話要海洋中心果邊的分店，有無搞錯！想點丫！無奈咁同阿康由金馬倫道又行返去海洋中心，搵咗一陣就搵到啦！點個個哥哥話佢試過無問題，所以唔肯換喎！真係想爆粗，早知就唔搞咁多野！如果唔係因為表哥送的話一開始賣咗佢算…

臨走前同阿康去食糖水，佢都好有義氣咁陪咗我咁耐…真係辛苦晒你丫…

返到屋企又係咩都無做就躂咗落張床找周公子…

>>December 2, 2005 at 8:15:53 AM GMT+8

2005 年 11 月 30 日 星期三 【晴】

終於完成了我第一份的Presentation，真有無驚無險…唔知係我對事情的態度改變了，定係我實在太頂唔順佢地的做事手法。已經做埋份稿比佢地，點知都係無人覆Email，大佬…得唔得都出句聲丫！

Present完之後就同條虫過咗CityU的Library搵料寫assignment，星期一就交啦！乜都無寫過。從未試過對住份功課係一隻字都寫唔出…點知搵咗個幾鐘都係無收獲，所以就決定散水去開飯。本來想食吉野家的，不過成9點幾都唔想食咁大碗飯。去緊開飯的時候收到鄒姐的電話，真係唔聽好過聽…比佢連環炮轟咗十幾分鐘，仲係得佢講無我講，真係火都嚟！我都唔係掛住對喇叭出街的人，乜都要話比你知咁我同D三姑六婆有咩分別，而且「事不關己、話之佢X」。早知就咪請埋佢，就算你真係估中咗又如何，頒個獎登埋報比你好唔好？氣死我啦！

關心人有個限度的，好聽D咪同你講聲「多謝」，唔好聽的真係叫你「收聲啦！」

唔止咁丫！11點幾又收多次佢的電話，講來講去又係講果句，咪玩啦！你估我真係24小時同佢一齊咩？就算係呢D都係人地的事，唔通佢去邊同做緊D咩野都要同我申請咩？唉！

>>December 2, 2005 at 7:58:51 AM GMT+8

2005 年 11 月 26 日 星期六 【晴】

唔講唔知原來今年我和阿哥一齊畢業，咁當然大家的Award完全唔同啦！佢地仲搞笑到原來晨咁早就已經約咗今日映相，只不過我唔知…唉！次次都係咁，你估我而家「隨時候命」咩！本帥哥都有Appointment的…

10點幾就比人吵起來，因為約咗阿公、阿婆、姨媽、姨丈11點半在PolyU的14/F飲茶，唉！我個15個鐘的美夢又被粉碎了…BB同埋姨媽一齊來，呢隻野無見咁耐又寸咗好多。好似以下的對話咁：

事原是我表姐教我姨媽（佢婆婆）搭MTR再轉火車過來Poly U
姨媽：唔係嘛！拖住呢舊野仲叫我轉咁多轉過去，搭的士啦！
BB：婆婆我唔係一舊野丫！我係人嚟的…
姨媽（無佢咁好氣）：係啦！知啦！叫你一聲大佬好未
BB：我唔係大佬丫！我爸爸Michael先係大佬…
【各人被吹漲中…】

哈哈！勁搞笑丫！除此之外，我同阿哥仲同佢改咗個花名叫「扮晒野」，呵呵！因為次次叫佢幫手做野時佢就扮呢扮路、扮鬼扮馬…最激死我就係成日都扮晒要去洗手間，點知帶到佢去的時候又唔係有喎！所以之後我都費事采佢，大不了咪由佢賴lor…

由1點幾先開始映相，表哥、表姐們之後陸陸續續咁到，大約映到4點幾就打道回本府稍作休息，而表哥和表嫂就去行街之後先再Join食Dinner…呢隻BB去到我屋企又乘機搬晒我D玩具出來，搞到阿媽又送咗D比佢，連我D「叮噹」的漫書都被佢搶晒，哼！過份丫！

哈哈！乜我個樣好缺MP3咩？仲咩突然咁多人送MP3比我的，表哥佢地送咗部iPod nano比我當畢業禮物，想過不如賣咗佢，不過難得佢地一份心意我又唔想咁做，至於另一部Samsung我又覺得好好用喎！所以…呵呵！都係留返自己用啦！

>>November 29, 2005 at 3:19:54 AM GMT+8

2005 年 11 月 25 日 星期五 【晴】

搞咗成個星期，結果好『那西』咁交咗份BRIA的Proposal…連自己都唔知寫咗D咩！不過算吧啦！反正隻「OK108野豬」都唔會理我地明唔明佢講咩！（「OK108野豬」呢個名的由來是因為佢每堂起碼都會講108次OK的，至於野豬…哈哈！自己幻想吓啦！）

唔洗問今日上堂都係去咗找周公子，近來真係極度的睡眠不足丫！我呢個月都好似無乜邊幾日係訓足15個鐘（唔開心丫！）上完一堂唔知上過D咩的堂之後就同D組員傾吓星期3 Presentation的Run-down，粗略咁講咗大家會Present D咩都已經講到人地連Tutorial都上完…

最初的schedule係會同條虫去Library搵料做assignment，不過佢因為唔舒服的關係所以取消，而我呢個阿娘就預咗我地唔返屋企食飯就連飯都唔煮出咗街。至於穎風就仲搞笑，Aunt唔記得過＄比佢，搞到佢唔敢出街…哈哈！所以無辦法啦！就自己搭『叮叮』去中央睇吓有無咩書係可以寫到我份Assignment…

急速咁scan咗幾本書，點知無咩用，反而圖片就很多…唉！唔經唔覺咁就在Library玩咗2個鐘就閃人，因為人地要關門…九點幾，決定行返去『老地方』食我很喜歡的台灣野…嘻嘻！如果唔係因為長沙灣果間摺咗，分分鐘每個weekend都會去咗果度開飯，哈哈！

食飽飽就行返去天后搭102回家，經過維園見到有小型賽車，哈哈！D車細細架好得意丫！記得呢D車仔以前在IVE時見過的…

>>November 29, 2005 at 2:34:28 AM GMT+8

2005 年 11 月 24 日 星期四 【晴】

今日係我的Lover牛一，不過昨天已經同佢食咗飯，嘻嘻！呢咁的日子費事同人爭啦！又大一歲！要生生性性啦！咪成日打我條Direct Line騷擾我先得ka！嘩哈哈~~~

講返今日，今日是我在KA第一次玩呢個走火警的日子，本來在上星期要上個Briefing的，不過我掛住問野唔記得咗上，最搞笑連Rebecca都忘記，所以我地兩個都算吧啦！

11點幾就問吓邊D同事會「走」，點知成個INF＋ITS只有我一個會走（PS：其實我係一定要走，鬼叫我係佢地的代表咩！＝代表去受死！）。Nikita見到就好有義氣咁陪我，後來連埋Rebecca果邊的SDR＋SDO都唔多過20「走」。而我就好衰仔咁求期報咗個數比Security就算。成個走火警演習都唔超過5分鐘就玩完，問你怕未？非常無聊兼Low B…

>>November 29, 2005 at 2:01:55 AM GMT+8

2005 年 11 月 22 日 星期二 【晴】

又畢業啦！挨咗成年終於都攞到張Higher Diploma的證書，相比現在…無論對工作和讀書的心態都完全唔同，起碼無咗個『Heart』先…原因是什麼？連我自己也不知道！

本來約咗Be Be九點半在紅館的，不過佢又遲到…所以我就去咗找我D同學仔，見到阿德、德媽、Joan、Amy和吳媽媽…映咗幾張相就比人趕入場了，不過我怕Be Be佢無嘉賓票，所以就叫佢地入去先…等到成十點幾先見到佢地，同佢好急速咁映咗2張相就要入去，如果唔係要坐遲到席就非常樣衰…

今次的Run-down都好快，1030開始到1145左右就完畢，最搞笑係其中有@個Department的人無代表出席，射燈射到果個位時係無人起身的…而我覺得佢今次的策略係大包圍咁去，我仲以為因為BA咁多人會分幾Part去起身，點知一次過起晒，所以都幾震撼的。

出到去再同D同學仔映吓相就去尖東開飯，其實都無咩心情去映，因為又多人又熱。唔洗問咪又係去『港晶』唱K…我地唱Happy Hour時段（1300-1900），唱到咁上下我地5個（Polly、Namie、Joan、Vicky and me）無聊到玩百萬富翁。到6點幾就收到「別人的女朋友」的Call，所以就走先去MK繼續我的2nd Round…

去到MK就去咗Neway City唱K，哈哈！你地無睇錯，仍然都是去唱K兼又係Neway。而今次我地都算係最齊人的一次，全部浦晒頭同我慶祝，哈哈！有子霖和女朋友、寶龍哥、阿邦、穎風同埋迷死人的小鵬哥，在此真係要多謝「別人的女朋友」（為什麼？…嘻嘻！你地睇下以下的對話就知，我Copy咗女朋友的日記過來）

女朋友：發覺愈來愈懶，.咩都唔想諗，咩都唔想做，食D咩？唔想諗。哈哈！好懶…有人幫我做曬、決定曬，你話多好呢！哈哈..
阿邦：噤就係廢人一個啦.....
女朋友：我仲意廢呀......唔得咩??
阿邦（無奈中）：得...大小姐話得就得啦！如果係找到個噤既人，而佢又頂得你順就得啦！
女朋友：你放10萬個心都得啦！都唔知幾多人對本小姐我好！例如.....
阿邦：你想話！子霖、小可~
女朋友：哈哈！勁w！不過仲有好多你唔知既。呵呵！仲有少爺同阿震呀
阿邦：見到你開心番，我都放心。嘻嘻！最緊要你地2隻野開開心心就夠啦
女朋友：乜我地有唔開心咩？我只係大壓力之嘛！諗通左就無野啦
阿邦：果然係叻女喎，希望你一直噤進步同睇到你一路噤變就好啦
女朋友：洗乜講，嘻嘻！放心啦！我唔要你地擔心我家喎，有咩野！一定會第一時間話你知既
阿邦：我地絕不能失去你嘛
女朋友：聽日靚仔畢業呀！你無論點都好，都要捉埋穎風去，你知佢近來噤！靚仔已經好唔高興
阿邦：風個死仔又係幫唔落既，放心啦！聽日我一定會班齊馬噤到~~
女朋友：好！你快D找佢地，同我同佢講聲，我好掛住佢~~
阿邦：你幾時變得噤黏身家，哈哈.....
女朋友：傻啦！我一向都掛住大家，我都好掛住你ka.....成日，信我！哈哈
阿邦：信你就奇......
女朋友：信啦！.哈哈


你放心啦！如果子霖對你唔好的話我一定會爭返你回來的…嘻嘻！（子霖：你唔會有呢個機會的…）

不過「別人的女朋友」就要小心D啦！哈哈！下次再唔記得歌詞的話我同小鵬哥都保你唔到的…你又唔係唔知『子霖發火，非同少可；就連阿邦都閃埋一旁…』講開阿邦，差D唔記得多謝佢的SMS，呵呵！唉！如果穎風有你一成的細心，或許所有的事會簡單多了…雖然生活艱難，但慶幸在我生命中有你們和我的朋友們。仲有就係我真係好鍾意你戴金框眼鏡的Look丫！簡直是可以用一個字去形容（路人甲：是什麼？…我：「型」囉！）。嘻嘻！我相信穎風應該無反對的餘地，對不對？（穎風：……【無言以對】）

我地玩到10點幾就結帳，行咗一陣街就打道回府了。整埋D手尾都搞到成2點幾，咩都唔理就馬上上床找周公子，因為真係好眼訓…如果唔係因為明天有新人返工的話真係有D衝動請返個假先…

>>November 25, 2005 at 6:05:12 AM GMT+8