2005 年 12 月 31 日 星期六 【乍雨乍晴】

Yeah！Happy New Year！祝各位今年可以！搵多D！Work Hard, Play Hard and Sleep Hard！哈哈！老實講，本來打算趁呢個假期在家乖乖咁溫吓書，不過最後的結果係家就有在、但書就無溫…睇咗成個Lecture都唔知自己睇過D咩！

今年的1月1日我依舊都是同「別人的女朋友」一齊過，哈哈！但今年並不是為咗睇「叱吒頒獎典禮」，而係為咗慶祝「別人的男朋友」生日，可惜阿男朋友今年不在香港，所以我呢個後備情人就梗係出場啦！呵呵！

約咗佢5點幾在IFC等，因為聽聞果度的聖誕燈飾整得幾靚…之後就等埋佢的同學他比返部無電的Notebook佢，哈哈！然後就殺過去皇后像廣場果邊映吓相，仲係聖誕樹掛咗張許願咭祝福「別人的男朋友」…

之後就坐「叮叮」去銅鑼灣，本來去IKEA找阿Chris，去到先知原來佢今日放假，所以我同女朋友就順個便食吓個＄9熱狗餐，嘻嘻！都幾好味喎！我地仲食埋＄3的爆谷，勁抵丫！食到咁上下，我地又行吓Sogo…

到差不多10點就去返我地的『老地方』開飯，嘻嘻！咁岩開始播緊「叱吒頒獎典禮」，咁就睇到11點就閃人。因為我要在「叱吒頒獎典禮」散場前到灣仔會合阿哥，如果唔係就要自己搭車回府。

去到灣仔都仲未散場，所以我就同女朋友好浪漫咁行吓海旁兼映吓相…哈哈！不過果度都幾風涼水冷，吹到不似頭形。

阿哥佢地差不多12點先散場，之後就出車回府，返到屋企就繼續睇埋套「叱吒頒獎典禮」就去找周公子了，唉！放埋明天就又要等到年尾先有長假放…

>>January 10, 2006 at 5:48:30 AM GMT+8

2005 年 12 月 30 日 星期五 【晴】

放咗幾日假，出咗好幾日街；返多幾日工，又放多幾日假…呢D生活有好有唔好啦！好的就係唔洗將D野迫埋一齊做、唔好的咪就係搞到個人比平日更心散、更唔知自己每日想點？

今日在公司都無乜特別，成個Division好多人都放晒假，而我跟果2個Managers都開始放假，所以呢個week都可以話頗休閒。早果幾日去見一見我個仔…嘻嘻！係契仔…感覺？還好啦！只不過個衰仔叫咗幾聲話我好嘈住佢訓覺…

又要同2005年講聲再見，回想返呢年入面我做過D咩？錯過D咩？又得到D咩呢？最大的變化都莫過於由一個全職學生變為一個全職上班的人；之後就係處事的態度，正所謂『事不關己、話知佢死』；其三的應該係有多不切實際的想法…

穎風曾經說過：「愛跟夢想一樣，都是需要冒險才能夠實現的。再多的擔心都是藉口，只是記住---你喜歡她⁄他。這就夠了！」不過我反而會問：「地球不是因為你才轉，你愛上一個人，但那個人一定要愛上你嗎？」

有時候情願像零一樣，追求賽車帶給他的滿足感、有簡單但幸福的生活，或許就沒有那麼多的顧慮…因為他說：「人類…看似堅強其實軟弱，但說他軟弱卻又堅強無比。無論哭得再傷心，該睡的時候還是會睡、肚子也會覺得餓！」

話雖如此，但零也有說過：「有時候活在回憶裡，也是一種溫暖」

>>January 10, 2006 at 4:19:59 AM GMT+8

2005 年 12 月 29 日 星期四 【晴】

今日返到公司，同事們已經不停咁話今天是大家的Last Day…無錯！係今年的Last Day…也因為大部份的Manager放晒假的關係，各人的心情都蠻Relax，除了我…因為我的總經理居然取消了今天的假選擇返工，搞到我要Serve佢…

可能因為佢都放咗幾日假的關係，所以都無乜閒情去理我…而我都依舊好努力咁完全我手上拖了很久的工作，不過到最後都係唔知仲咩左搞搞右搞搞咁就過咗一日了。之後就坐巴士出旺角Meet穎風，哈哈！我地話點都要在2005年之前見一見先…將近假期，所以旺角相比平日更加多人，加上今日著住皮鞋，都唔係行得很舒服…很有默契咁行完兆萬就行潮流特區。我終於見到今年最新的Totoro Calendar，嘻嘻！上到3/F經過師傅間鋪時見到佢無開門，咁就在門外睇吓佢呢排有咩新野，不過都係得個睇字，畢竟佢賣D野都唔係平野的…當講完呢句話之後，師傅突然係我地兩個後面走出來，真係嚇一跳！好彩佢聽唔到之前果句野…

在鋪入面同師傅吹咗一輪水，阻咗佢做一輪生意之後。我就同穎風去開飯，本來師傅提議我們去唔知邊度邊度食的，不過我地兩個落到樓下的時候就決定去食『吉野家』，哈哈！如果比師傅知道實殺死我地兩個…無辦法啦！除了『老地方』，『吉野家』都是我們的最愛…Yeah！

食飽飽就行咗一陣波鞋街，之後就打道回府，因為我地兩個都蠻累兼周公子急Call。

>>January 3, 2006 at 10:28:02 AM GMT+8

2005 年 12 月 28 日 星期三 【晴】

放咗幾日假，出咗好幾日街；返多幾日工，又放多幾日假…呢D生活有好有唔好啦！好的就係唔洗將D野迫埋一齊做、唔好的咪就係搞到個人比平日更心散、更唔知自己每日想點？

今日在公司都無乜特別，成個Division好多人都放晒假，而我跟果2個Managers都開始放假，所以呢個week都可以話頗休閒。放工之後就去見一見我個仔…嘻嘻！係契仔…感覺？還好啦！只不過個衰仔叫咗幾聲話我好嘈住佢訓覺…

仲有幾日又要同2005年講聲再見，回想返呢年入面我做過D咩？錯過D咩？又得到D咩呢？最大的變化都莫過於由一個全職學生變為一個全職上班的人；之後就係處事的態度，正所謂『事不關己、話知佢死』；其三的應該係有多不切實際的想法…

穎風曾經說過：「愛跟夢想一樣，都是需要冒險才能夠實現的。再多的擔心都是藉口，只是記住---你喜歡她⁄他。這就夠了！」不過我反而會問：「地球不是因為你才轉，你愛上一個人，但那個人一定要愛上你嗎？」

有時候情願像零一樣，追求賽車帶給他的滿足感、有簡單但幸福的生活，或許就沒有那麼多的顧慮…因為他說：「人類…看似堅強其實軟弱，但說他軟弱卻又堅強無比。無論哭得再傷心，該睡的時候還是會睡、肚子也會覺得餓！」

話雖如此，但零也有說過：「有時候活在回憶裡，也是一種溫暖」

>>January 10, 2006 at 4:19:03 AM GMT+8

2005 年 12 月 24 日 星期六 【晴】

等咗咁耐，終於可以放返幾日長假期了…呢2個星期在公司都無乜點停過手，堆晒D野都未做完，最討厭係自己唔想拖到過年嘛！不過照現在咁睇，都幾難唔拖到過年了…

難得有個長假期，點都要好好咁同我最愛的周公子談返段長情先…一口氣咁見捉佢15個鐘，然後落咗惠康掃吓貨。返到屋企先知道阿娘唔返來煮飯，求期咁食咗個麵包就繼續再去找我的周公子…由6點幾見佢見到9點幾就起身，因為食完麵就要趕返屯門望子夜彌撒…

本來我預計的時間是剛剛好的，不過老豆突然返咗來霸住個廚房，搞到好遲咗煮野食…之後仲要好黑仔咁去到車站送車尾！結果差不多成11點半先返到去，有時覺得個子小小都幾著數，哈哈！起碼可以比我涉位坐…Yeah！

好奇怪！想來想去都唔明白為什麼會是孫神父做主祭，更加想唔明係佢講果段道理是想告訴人他常被人欺負或是其他？唉！總之一句到尾，唔知佢想講D咩！望完彌撒就同一行9個人殺上『別人』屋企開始我們的Christmas Party！其實都唔算什麼Party，只不過是打吓PS2和睇吓VCD…他們玩到4點幾就各自散水回家。而我呢D九龍人就當然賴死唔走啦！呵呵！可能之前訓夠了，所以當佢地走晒之後我仲有精力睇埋套Harry Potter…勁丫！睇到6點幾想吵醒主人家去飲早茶的，不過為免聖誕流流發生命案…我都係乖乖咁入房訓覺！

早上9點幾就同埋佢一起落去食早餐，之後我就自己返聖堂望埋台聖誕彌撒！嘩！好勁丫…果然當一個人訓夠的話係唔同D的…

返到屋企就收到阿敏的Call，所以沖咗個澡、換咗衫就又出過去…本來打算行吓尖咀的，不過後來因為大家都肚餓所以就搭船過灣仔『老地方』開飯。唔知係咪呢間野的師傅唔同咗呢？感覺無以前咁好味…食飽飽就過咗銅鑼灣行咗一陣街，到差不多10點幾就打道回府了。因為都開始Feel到周公子急Call的徵兆…

>>December 30, 2005 at 3:54:11 AM GMT+8

2005 年 12 月 20 日 星期二 【颳風】

人返工、我返工，越返就越『那西』…正常的Office Hour應該係返0830的，不過近來的我是0830先開始出家門去上班。返到公司個樣仍然處於一個未睡飽的樣子就要開始工作，好彩的就平安渡過，唔好彩咪又比人捉到錯…

可能是因為Holiday Mood的關係，個人都無乜心機去做野，嗱嗱臨咁做咗D野就交比老闆，畢竟仲咁拖落去的話就真係要等出年佢地放完假返來先埋到尾…點知做做吓野阿姐突然話取消個Annual Leave，因為美國大罷工喎！天啊！我等咗咁耐佢居然唔放假，唉！不過佢都算巴閉啦！日日返11點幾，居然同我講將佢呢幾日的假轉到Compensation Leave遲D先補放返…開始覺得自己每天返0930都唔係好過份，起碼我都會留在公司做到1930先放工…

最抵死係阿總經理趁我身邊D Manager去晒開會的時候走出來問我返工到現在覺得點？學到D咩？係果個Moment真係好想同佢講，感覺非常之好，學得最多的都莫過於幫人攞手袋、搵水杯蓋、攞衫、入電話號碼、甚至係幫某人Forward D Assignment比佢的同學，最近的新玩意仲有就係每3日幫某人淋花…最後梗係咩都無講啦！畢竟我仲未想死住，但成日都會想，倘若有一天我真的打算離職的話，或許我會好直接咁出封Email比Everyone知某人教過我D乜野！

>>December 28, 2005 at 3:46:20 AM GMT+8

2005 年 12 月 19 日 星期一 【颳風】

今日是IMD一年一度的Christmas Party，本來我應該受總經理之命去做呢個Event的Organizer，不過最後我以考試為理由把呢份咁沉重的工作交咗比Rebecca…哈哈！今次真係辛苦晒佢啦…

但後來我呢個滿腦子都是鬼主意的總經理知道我將個Ball拋咗比Rebecca，佢就唔洗我負責日期、時間和場地問題，而叫我負責準備遊戲果個部份…唉！救命丫！結果我又將個Ball拋咗比我最喜歡的『加納豆』先生，可惜因他下個星期放大假，所以佢只能幫到我的就是搵人幫我搞掂佢…哈哈！勁丫！

基本上呢個Week已經開始感覺到Holiday Feel，但這絕不代表我呢個星期好休閒，反而係忙到飛起…連溫書的時間都無。鬼咩！我2個Manager埋呢個week就放假，佢地仲唔快手D搞掂D野比我再比D Manager簽名…因為我一日的工作量相等於昔日一個星期的工作，想停一會的時候都無…

終於挨到6點了，用最快的速度去【變身】，然後就等埋我呢個鬼馬的總經理出車去我們的目的地 – Moody Restaurant（都唔明點解要編我跟佢車）…同我預計我一樣，在車度咪又比佢狂寸，真係激氣丫！乜我好鬼好蝦咩？

去到之後就由Kenneth帶領我們玩咗兩個Game，第一個係由一個人試食一隻調味料然後用面部表情做比另一個人睇，由佢去估，結果我又被我個無良總經理點咗出去。第二個Game係我們比指示自己的Department Manager畫一條龍出去…哈哈！至於畫巧係點…大家自己幻想吓啦！玩完之後就開始今日的晚餐…雖則款式不多，不過近來都唔係有咁好的胃口，所以都係無乜所謂…

食食吓野又唔知咩原因比總經理罷上台，不過算吧啦！反正佢唔玩我一獲好似對不起自己咁！食完野就開始抽獎，哈哈！人人有份、永不落空！玩到10點就散水，唔講都唔記得明天其實仲要返工的…都話呢個星期完全有濃厚的Holiday Mood…

>>December 26, 2005 at 3:59:05 PM GMT+8

2005 年 12 月 16 日 星期五 【晴】

終於Exam完隻野豬果科了，正所謂古語有云：『出外靠朋友』呢句話真係Very好丫！嘻嘻！因為如果唔係有我D好的同學仔坐在隔離，我都唔知自己可以答到幾多條問題了…在此真的多謝我D好同學丫。

考完個試只能說可以暫且放下其中一份工作，因為仲有份Assignment Report未搞掂，應該係話做都未知要做D乜…所以考完之後就同埋D同學仔殺去『中央』睇吓可以搵到D咩資料！我地由5點幾搵到差不多成7點幾就各自散水…

出到『中央』發覺成條電車路停晒，之後我就自己行去銅鑼灣幫阿娘買野時先知道原來D農民同警方有衝突，仲好似搞到好大件事咁…不過對於我呢D咁懶得去理的人就一於依照我的行程。初時據聞只是銅鑼灣地鐵站有出無入，所以便行去灣仔坐MTR，不過行到去時連最後的3個閘口都封埋…咁無辦法啦！唯有繼續向金鐘方向行啦！

途中見到好多警察都處於備戰狀態，最搞笑的係有個警察見到咁多途人企在一旁等睇戲的情況時，佢忍無可忍在個廣播器話：『走啦！而家唔係拍戲，無野睇丫…』哈哈！

除了聖誕和除夕，都無乜機會好似今日咁在條軒尼斯道的馬路中心打橫行，如果唔係因為無相機係身，呢咁的大搖大罷的場面一定會映底佢…

返到屋企都成8點幾9點了，睇返新聞先知道原來今日下午D農民無跟原先的路線遊行，怪不得搞到成個灣仔區和銅鑼灣區處於緊張的狀態啦！

不過老老實實丫！D農民都算係咁啦！起碼無做D過激的行為，而香港的警察都唔弱，大家互相尊重和體諒…一班只想發表他們的意願，而另一班只不過是想維持香港市民的安全…

最後就係在此多謝在暴動其間打電話來問津過我的兄弟姊妹們…

>>December 23, 2005 at 5:15:08 PM GMT+8

2005 年 12 月 15 日 星期四 【晴】

哈哈！原來我又差不多成10日無打日記，嘻嘻！鬼咩！15和16號又要幫「人」搞大事，17號又考試…根本都無停過。而公司呢排的Workload又唔知仲乜咁奇多！想有時在公司做吓自己野都唔得…好…都係回正題

15/12：晨咁早就開Internal Meeting，所以成個上午都無乜點做過野，加上星期二果日又傷風病咗無返工，所以本來打算放下午的假都要取消，畢竟D野放到成座山咁高，而阿姐上午又放假下午先返，我都費事下午走咗去啦！做到6點幾就閃人搭車返屋企換衫、攞衫返屯門。由機場返荔枝角再入埋屯門都只不過是8點幾，都算係咁啦！

同Ann姐、詠詩佢地食完飯都10點幾，食埋湯丸、左搞右搞都搞到成兩點幾先訓，而我呢D咁山長水遠的人就梗係留返在Lover’s Home啦！因為第二日都要早起身。

16/12：7點幾就起身，唔知又搞D咩咁就搞到成10點先出發去中環，樓下個的士司機都咪話唔慘，等咗我地成半個鐘。初時都擔心會唔會塞車，不過好彩最後都準時到達。雖然參加活動的人唔算好多，不過勝在個個都開開心心。

最慘的都莫過於我比詠詩出賣啦！下次一定要捉住佢唔比佢走先，搞到我擦傷咗手婉，比人感覺好似割脈咁，Very樣衰！

在中環玩到12點幾就一起去「喜悅飲茶」，之後我就搭『叮叮』去中央溫吓書等返學…本打算在Library訓吓覺的，不過比D工作人員成鬼日叫醒咗！真係丫！唔心人休息吓咩…

結果都係在嚴重的睡眠不足的情況吓，都係咩都溫唔到。等到夠鐘就閃人返學，唉！明天仲要Exam，都唔知點死…

To my loves：由相識、相愛到結婚...彼此雙方人都必須經過很多困難和付出才可以一起走到最段的一個階段。或許在未來的日子裡大家都要面對其他的問題和困難，但只要彼此心中有愛，什麼的困難、什麼的問題都可以解決的。總之好似穎風話過：「我們是你最好的朋友，願意支持你做任何事。但卻不願意看你受到任何的傷害，我們寧可冒著失去朋友的危險，也會全力阻止！」

>>December 23, 2005 at 6:52:25 AM GMT+8

2005 年 12 月 12 日 星期一 【晴】

唔係係咪太夜食咗D蚌，搞到本來已經唔係幾好的胃又消化唔到，結果肚痛痛到凌晨4點幾就起咗身，想一想…好似訓咗2個多鐘頭而已。在張床滾來滾去都訓唔著，最慘係屋企無晒麵包，想食藥都食唔到…

結果訓吓、醒吓的情況下，終於到鬧鐘響了。想咗好耐都唔知返唔返工好，畢竟上個星期都已經請咗個Sick Leave，但眼見自己咁的情況，返到去都未必頂得順，所以都係決定Send SMS比同事幫我請半日假。

起身瀉咗3次個肚終於好返D，所以決定再去訓多陣就返工。但隔咗一會佢又痛過，唉！無奈地請埋下午，到3點幾爬咗起身食咗盒Lunch Box就順便食埋D藥，好彩屋企仲有藥。一個鐘頭唔夠又走返上床找周公子，一訓就訓到「女朋友」收工上來。總括來睇，今日都應該訓咗15個鐘，怪不得個人開始有D清醒的Feel。

食完飯，本來打算溫吓書的，不過最後左搞右搞都係無溫過，睇埋套「隨時候命」就洗白白了。仲以為今日訓咗15個鐘應該會可以溫夜D，點知洗完白白又比周公子急Call，所以最後我都係決定見周公子了…

>>December 14, 2005 at 11:12:48 AM GMT+8