2006 年 2 月 11 日 星期六 【晴】

今日又係好開心咁訓到三點幾先起身，之後發覺對眼有D唔妥，入到洗手間睇一睇原來連另一隻眼都變咗做雙眼皮…嘩！搞咩丫？不過都好，點都好過一隻單、一隻雙…哈哈！

之後就等埋阿娘起身就去咗長沙灣果邊食粥，好抵丫！＄8.5有一碗大大的艇仔粥丫，食食吓就收到01601B/T的電話，終於Firm到今晚食飯的事宜。結果就開始效法EM效應即場Call人今晚有邊個到…

今日都唔係有太多人出來，只有我、卿卿同伊婷…阿璇就因為佢媽媽整咗湯丸所以要回家食飯、Bebe就約咗人…因為要等伊婷的關係，所以卿卿就陪我行旺角睇吓有咩巧克力岩心水，本打算自己整的，不過我星期一要返學，所以都係決定買現貨…在星際果度揀咗好耐終於揀岩咗2盒，三十幾蚊先有18粒（拆咗先知！）…不過一年一次就算啦！差不多九點半伊婷先到，我地去咗『水道橋』食，3個人叫咗個2人前餐原來係唔夠的，如果4個人就可以叫2個2人前就多D野食！下次都係搵夠4個人先…本來食完打算去食甜點，話晒今日都係「元宵節」。不過伊婷又要趕住去下場，所以都係各自打道回府了。

>>February 14, 2006 at 7:59:48 AM GMT+8

2006 年 2 月 10 日 星期五 【晴】

好Yeah！忙咗成個星期，終於又到星期六…由今朝2點幾直訓到12點幾，真係非常滿足，雖則都未夠15個鐘…不過有10個鐘都已經算好啦！起身換完衫就準備返學…

去到九龍塘大約兩點左右，就決定去Canteen食返個叉燒飯先。嘩！學校的Canteen果然平好多，一個叉燒飯都係＄14.5，抵丫！平時在機場都要成＄40…食飽飽就乖乖咁開始上堂。今堂都大約知道阿Sir講緊D咩！不過都係果句，我隻手寫的速度始終唔夠佢把口快，當我寫完第一張Slide的Notes佢就已經講完第三張Slide，唉！不過算啦！點都好過咩都寫唔到…

上完堂就同D同學在學校傾咗一陣Project，今個SEM大件事啦！3月要交兩份Assignments，Individual之餘仲係每份5000字，天啊！點寫丫！500字都嘔唔到比佢啦！慘不忍睹、慘絕人寰、慘無人道…Anybody HELP？

傾完Project就去MK Meet穎風，因為我早到的關係，所以自己行咗一陣波鞋街，睇咗咁耐都係覺得對Air Max靚D，不過個價錢仲靚，差不多要成千蚊…完全係Out of my budget！所以都係得個睇字。

7點幾就在朗豪坊Join埋穎風就行街，行到差不多8點半左右就去金太郎食壽司，呵呵！都幾好食！＄10有3件三文魚壽司，抵丫！食完就緊係繼續我地個Shopping啦！之前比穎風睇過阿哥從北海道買回來果兩隻日式Donald Duck在潮流特區都有得賣，最平果間都要成＄168，而阿哥佢地為返每隻都係＄50-60…所以都唔係太貴！

11點幾就去咗『石磨坊』食湯丸，哈哈！話晒明天都係中國的情人節，咁就預早食湯丸…不過在等緊位的時候突然有班人走出來，過一陣就見到Neway的人追出來，原來有班青年人去Neway玩完無結帳就走…被人捉住果個就扮晒係路人咁慢慢行，點知比人認得個樣…不過Neway的人都幾爛口，個經理追出來捉住某個人時就話：「你唔好x走丫！」嘩！之後見到第二個著藍衫的人走出來開始手指指了…之後係點我就唔知啦！

好乖咁12點左右就返到屋企，洗完白白、玩咗一陣MSN就找周公子了，感覺好似虛缺咁！

>>February 13, 2006 at 7:39:27 AM GMT+8

2006 年 2 月 9 日 星期四 【晴】

阿哥佢地一連五天的北海道之旅終於在今天完結，而我呢D最關心的都莫過於我的手信啦！哈哈！先貼住幾張上來先... 其他的可以瀏覽的MSN Space的相簿....

多謝阿哥 + 女朋友... 佢地仲砌咗個龍貓音樂盒比我...呵呵

【北海道的手信！】

【情人節禮物！】

>>February 10, 2006 at 5:21:03 PM GMT+8

2006 年 2 月 8 日 星期三 【晴】

連續忙咗3日，連自己都唔知道究竟忙的是什麼，總之就每天回到公司都會有好多野要做…不過今日就比較清楚D，起碼知道自己要開兩個會…一個係同HP來Training的同事；另一個係Department的Internal Meeting。

朝早就Follow Up返下午開會的事宜，打電話問Facility and Administration果邊先知道原來我接咗D『蘇州屎』，怪不得突然Pass咗成份Job比我啦！搞到我晨咁早就比人XYZ…唉！呢個阿姐…好地地D野差不多要埋尾時突然又話改日期，小姐…你咁改一改D野又要重新做過的！仲會影響到全個Division同埋阿公（GM）！真係完全想不通！比人XYZ完都係要繼續做，所以成朝又不停咁Check返晒D野！

Lunch時同阿公玩咗一陣，哈哈！阿Jack同民仔今日同阿公出去食日本野，佢地個樣好搞笑！好似叫佢地去受死咁！比著我有得去實跟埋去食，日本菜喎！仲搞笑係返來問返佢地食成點時，佢地話阿公對佢倆一個住長州；一個住坪州好感興趣！哈哈！

下午個會大約1530開始，不過我開到Around 1615左右就閃咗。因為我要開Internal Meeting，之後到1715左右先再返去…其實除咗Internal Meeting，呢個會我要In Charge果Part係最後果部份，都唔明叫我咁早上去開仲乜。

同HP果2位的Trainer大約傾咗果日Training的Set Up and Equipment是怎麼樣之後，就同埋佢去實地視察…送走完佢地之後就返公司做返頭先傾過的野。E.g：畫個Setting Plan、equipment arrangement之類的事。差不多成7點幾先走…

去到青衣站打電話比阿明睇吓佢走得未，點知佢無聽…咁就唯有我先去旺角Join咗果2個男子先…但行到咁上下阿明就Call我，所以我就在MTR站等埋佢…

我地4個人去咗女人街果間食『水道橋』，哈哈！醒喎！我想食呢間好耐了…我地4個人叫咗2個2人前，D野都好好味！嘻嘻！趙生下星期要返大陸的廠房做野，4條Itinerary佢果條就真係差咗DD…要在琛圳上機之餘仲要平均每天搭5-5.5個鐘的車程先去到個目的地…星期日晚出發，星期三晚先返到琛圳。今次真係有苦自己知啦！我唯一可以做的就係送你一句話：「Good Luck！」

食完野當我地離開間鋪頭時先想起我地未食個甜品，哈哈！結果4條友走返入間鋪度食完個甜品先再走過…旁邊的客人都唔知發生咩事咁望住我地！食飽飽就過咗Muji睇野，之後就打道回府，返到屋企都11點半了…

時間剛好，我返到屋企洗完白白阿哥就返到屋企，呵呵！好Yeah！有手信攞！佢同女朋友之前幾日過咗北海道睇雪際，我都睇過D相，好靚丫！佢地砌咗個好大的龍貓音樂盒比我，仲有個小擺設同埋一串串的草餅。阿哥今次都有買「白之戀人」巧克力同巧克力奶回來…至於佢有咩收獲？都離不開Donald Duck的…嘻嘻！

多謝阿哥＋女朋友

想知個龍貓音樂盒係點？詳情可瀏覽以下網址：http://spaces.msn.com/acyng/

>>February 10, 2006 at 2:55:15 AM GMT+8

2006 年 2 月 5 日 星期日 【晴】

雖然本帥哥初四已經啟市，不過公司到今日先比較齊人。唉！又要等到復活節先有長假放了…講返昨天，返咗屯門同鄒姐佢地食Lunch，本來是食Dinner的。不過中間有D溝通上的誤會，所以改咗食Lunch。食完飯就同阿康、子健行咗一陣，之後就過咗置樂買返D零食才過去睇吓我個契仔先。

呢個仔都係無乜點變，仍然都是食飽就訓、訓飽就食，搞多佢兩野就喊到拆天咁。之後就同佢阿媽傾咗一陣計啦！自從個仔出咗細我地都好少Long Talk！唉！有時婆媳之間的野就真係好難講，不過聽到Vincent叔果句野就真係笑爆嘴。在佢屋企呆到5點幾就搭返車返屋企了，唉！好累丫！呢幾日都無乜點訓夠…

回正題，今日Lunch約咗西門爸爸食飯，哈哈！好耐無見佢啦！正當打算出發時比人叫住咗，咁咪唯有叫Rebecca同George出去先。後來在車站見到Ricky，呵呵！不過當我們去到的時候西門爸爸都未到…大家都係無無聊聊咁吹吓水、講吓呢排公司有咩新聞…食到2點左右就散水。

今日在公司由朝早忙到收工，都唔知仲咩突然咁多野做，咁可能因為有一半時間做咗D私人事務而無停手。準時1730收工返學，唉！今個SEM仲大獲，一開始就唔知道阿Sir想講的係D咩…仲話3月就要交2份Individual Project，5000字＋Presentation，無野丫！

>>February 8, 2006 at 3:12:20 AM GMT+8

2006 年 2 月 2 日 星期四 【晴】

今日係神哥生日，首先祝佢牛一快樂、快高長大、身體健康同埋早D嫁得出啦！哈哈！不過真係想不到佢揀女朋友時最重要是將來結婚肯生BB，因為現今的都市人很多都寧願養寵物都唔想養小朋友…他都算係我身邊的朋友肯話會將來養小朋友的男性朋友…

今日在公司都係無乜心機做野，個手提鬧鐘唔知仲咩今朝無響到，幸好自己到7點45分時醒一醒，如果唔係真係直訓到尾…Lunch同埋SDR佢地去食日本野慶祝神哥四捨五入就『3字頭』的生日，哈哈！我話過會爆佢出來的…之後就同佢和Rebecca去揀蛋糕，因為有人話要吹蠟燭同切Cake先似過生日喎！行咗幾間，結果就在美心揀咗個Cake…

返到公司突然收到Email，盧總要同成個ITS開大會，鬼咩！搞到咁鬼亂，個Manager又唔識做人！趁佢地開緊會的時候我就走咗落去同埋SDR一齊切Cake…嘻嘻！雖然ITD佢地個個對我都無乜點，不過我始終都係較喜歡SDR果邊！對住佢地咩都可以講，尤其係可以大家互相駁嘴。我同神哥由Lunch鬥嘴鬥要食Cake都仲鬥緊，結果Rebecca佢地都話我地似兩兄妹鬥來鬥去都鬥唔完。哈哈！可能因為佢又係有一個阿妹，而我又有一個阿哥卦！不過鬥還鬥，我地兩個有時都會好正經咁傾吓計的…正所謂動靜階且嘛！

因為今晚係公司一年一度的Annual Dinner，所以大部份的同事都會放下手上的工作一齊出發去會展。而我就同神哥、Serena、Rebecca一齊跟Kenneth的私家車。我就因為要攞D大月曆比『別人的女朋友』的媽媽，所以我先下車…

去到會場就找打緊牌的同事，哈哈！夠鐘就入去就坐，我今年同埋SDR一齊坐，哈哈！最搞笑係佢地居然留咗個靚位比我，雖則可以望住正台，但就係夾咗係個Manager同AM之間，真係咪玩我啦！結果Serena好好人咁同我調位。每張台都有5個人會攞到Table Price，而我就好好彩攞到其中一份，就係Sogo的 $100 Coupon。而Stephen、Serena、Mandy、神哥同Timmy都攞到獎！Timmy仲好勁咁攞埋公司的第6獎（iPod + 現金卷…）

後來GM過來同我們敬酒時我見到佢頭上有D紅色彩紙，咪叫佢過來我幫佢整走佢，點知佢個衰樣話比我知我好似點佢咁！真係丫！下次唔鬼理佢…食完Annual Dinner就打算回家補眠的，不過神哥佢地聊去唱K！呵呵！結果我又受不住一齊去。真無奈！都唔知自己無咩吸引力定係樣衰，我叫埋個同事一齊去時佢話NO，後來神哥叫時佢就YES（條件係佢請…）
。搞到我比人寸！唉！

其實都唔係好多人去唱，因為我唔知佢地想唔想ITS果班人一齊去，所以我無出聲。後來我、Nikita、神哥、Simon、Heidi和Steve一齊去咗銅鑼灣Red Box唱K，哈哈！神哥都係注定比我地幾個四捨五入都仲係『2字頭』的後生仔女玩殘佢…到最後因為玩到無MTR，所以就搭小巴打道回府，洗埋白白就搵周公子，唉！又要返學啦！

唔知係咪自己變咗？定係比佢地寵壞咗呢？感覺上眼前的好似有2個人咁，簡單D講就是『人前一個Feel、人後一個Look』。別人眼中睇的是否和我所感覺到的一樣呢？不過就算佢真係咁我都無辦法，但在呢個環境內，我沒有選舉的權利。總之有D野！我都唔知應該點講！只概望我身邊的人開開心心就已足夠！

>>February 4, 2006 at 4:23:37 PM GMT+8

2006 年 2 月 1 日 星期三 【晴】

好想哭，這次是我第2次在公司有呢種感覺...

當閉上眼睛的時候，眼淚會自動的無聲流出來...

到底人是為了什麼原因而去活下去？它的目標是什麼？意義又是什麼？



無意間找到 My Love My Fate 的國語版，雖然歌詞無Janice果首咁到味...但阿桑都唱得不錯的！

My love，晚安 就別再為難 別管我會受傷 想開 體諒 我已經習慣 不然又能怎樣？
這個城市太會說謊 愛情只是昂貴的櫥窗 沿路華麗燦爛 陳列甜美幻象 誰當真誰就上當
竟然以為你會不一樣 但憑什麼你要不一樣 因為寂寞太冷 虛構出的溫暖 沒理由能撐到天亮
前進 轉彎 我跌跌撞撞 在這迷宮打轉 死心 失望 會比較簡單 卻又心有不甘
這個城市太會偽裝 愛情就像霓虹燈一樣 誰離開之後 卻把燈忘了關 讓夢作得太輝煌
以為能夠留你在身旁 但是誰肯留在誰身旁 一首情歌都比一個親吻更長 這就叫做好聚好散
別說你對我感到愧疚 別說你會永遠想念我 我很知道孤單這條路怎麼走 請你不要安慰我
My love，晚安 別放在心上 我只受了點傷 只是受了點傷

>>February 2, 2006 at 1:30:41 PM GMT+8

2006 年 1 月 31 日 星期二 【晴】

大年初四，本帥哥正式啟市…好乖咁無乜點懶床就起身，不過到最後都係唔知點解搞到遲到先出門。或許是因為要行的路程遠咗啦！又要用多幾分鐘…

返到公司，D同事已經發揮他們的團結精神各自搵食…而我就只是走咗去問隻加納豆攞利是，其他人都係自己主動派比我的。呵呵！唔知呢…走過去問人攞感覺上有點兒怪怪咁…

本來打算同Rebecca出去食Lunch的，後來盧總突然興起話一齊食開年飯喎！結果就跟埋盧總、三黃蓮蓉、阻住、加納豆、Yan同Rebecca一齊去Moody食飯…哈哈！我今次唔洗跟盧總車啦！不過到最後在食飯果時都係坐咗盧總旁邊，唉！早知就唔趕隻加納豆走啦！成餐飯都係我同加納豆係度吵鬧，盧總有時會加把嘴、有時會坐在一旁賤笑…哼！

之後就等食Dinner，今晚同ITD的同事去尖沙咀食鹿鳴春當Farewell Rex喎！佢包底＄1500，所以我地今餐都食得幾豪…有北京填鴨同雞鮑翅，果然有咁的價錢就有咁的Quality，其他餸都好好味…食到好飽，下次帶阿娘來食吓先。不過呢間野都幾難找…

大家食到8點幾就比D伙計用甜點暗示我地閃人，咁我地都好好人咁坐到8點幾就各自散水，而因為我食得好飽…所以就在海港城行咗一陣先打道回府…

>>February 2, 2006 at 9:40:21 AM GMT+8

2006 年 1 月 29 日 星期日 【晴】

大年初二晨咁早就起咗身，原因是今朝買咗飛睇『春田花花同學會』的早場…如果唔係我邊會咁早離開我張床丫！不過昨晚都掛住睇now.com，所以都係訓咗幾個鐘…

同阿娘、阿哥和女朋友一齊去旺角百老匯睇戲，去到旺角見到少有的冷清，哈哈！可能是因為D人仲未訓醒的關係啦！10點就入咗場，睇到11點九左右啦！成套戲都OK的！不過講D野就有D無理頭，當笑片都唔錯！尤其係『POINT』和『TNIOP』的分別，哈哈！想知點解就自己買飛去睇吓啦！

睇完戲就去咗稻香飲茶，之後就回家小休一會…到4點幾就等埋阿哥回來先再出車過阿婆家食開年飯…講開阿哥，佢發脾氣暗示我地要佢女朋友自己搭MTR返佢舅父度食飯，不過佢又唔想吓有咩理由要我地3個人自己搭成個鐘的巴士入馬鞍山食飯呢？我地有叫埋佢女朋友的，係佢自己唔比人跟埋去咋，咁無得賴我地喎！同埋阿姨佢地都有派埋比女朋友啦！怕什麼？

6點半就齊人到海港食飯，上菜上到亂七八糟…第一度菜就上翅，先至係乳豬…一係就唔上菜，一上就有幾度菜…搞到食得好趕咁。最搞笑到最後就上燒餓和發菜蠔…唉！

黃諾B無見一排又鬼馬咗，最專注就係阿哥攞部PSP出來打機的時候，其實我地都唔知佢識唔識打，總之有D畫面比佢睇吓就得啦！因銘就大個咗好多，成日都攞台面D碟玩…

食到9點幾就散水了…今年的收獲比上年更少，真係一年不如一年丫…

>>February 1, 2006 at 7:07:40 AM GMT+8

2006 年 1 月 28 日 星期六 【晴】

今日係大年初一，恭喜發財…希望大家今年身體健康，最緊要就係搵多D、賺多D！昨晚阿哥女朋友都有在家送舊迎新一齊睇【林海峰是但嗡發花癲篤笑騷】DVD！哈哈！正丫！

訓醒打算過老豆果邊拜年，點知起身先知原來老豆話今年唔去拜年喎！唉！又少咗百二蚊…食完個Lunch就出車去『圓玄學院』拜太歲…之後就去咗奧海城飲杯野就過海霸返個靚位睇花車巡遊。我地大約7點半左右去到…好彩今日Air-Cadet有出Services…哈哈！乘機問吓邊個位易睇D…

接近開始，有D本來封咗的地方都開比市民，所以我地又周圍搵返個靚位…我就比人攝吓攝吓就攝咗去欄杆前，哈哈！阿哥、李氏夫婦、同埋其他ACC的一行7-8個人企咗去我後面，佢地個個都攞晒D長鏡的相機，非常Pro丫！

巡遊8點半就行到出來，最靚的都係Disneyland and Ocean Park的花車，而因為係國泰做Sponsor，所以佢架花車第一架出…仲大派CX的飛機公仔，我本來搶到3架的…不過到咗手比人搶咗兩架走。後來馬會經過時我又比攞到D紀念品…哈哈！雖然都係D我唔會用到的Coupon，不過都好過無丫…

睇完巡遊就去咗銅鑼灣開飯，食飽飽就打道回府了！

PS：哈哈！估唔到我今年收的第一封利是係Peter仔比我的，哈哈！好開心丫！真係完全無想過佢會派利是比我的…

>>February 1, 2006 at 7:07:32 AM GMT+8