2006 年 3 月 2 日 星期四 【颳風】

今日Rebecca放假，所以我呢個『遲到王』都不得不早少少回公司。不過起身不久就想起阿總經理昨天離開時鎖咗佢間房門，所以就算我咁早返到去都係無用，結果左搞右搞都係同平日返到公司的時間差不多。

點知個衰佬差不多成9點半先返到公司，頂！早講啦！等佢放底D野之後就敲門入去攞杯幫佢沖咖啡，臨出佢房門前佢突然問
「你落幾多咖啡粉的？」
我話：「兩匙囉！」
「係咩？成座山咁高果D定係平果D丫？」
我話：「唔記得啦！仲咩丫？好苦咩？」
「總之就輕手D啦！」
我話：「咖啡唔苦邊叫咖啡o架，咁加多兩粒糖比你囉！」
當然講完呢句話就即閃啦！哈哈！沖完咖啡放返入佢間秀時佢突然啪咗張枱一下，嘩！果吓真係比佢嚇死丫！但好彩唔關我事，因為佢的視線都係Focus咗在佢個Mon上…

唉！都唔知係咪太耐無幫佢做過野，今日突然收到總經理封Email幫佢reschedule一個會，差D做錯野！好彩最後都搞返掂，如果唔係就真係大件事。在果個Moment個心真係跳咗出嚟！至於個壓力指數就梗係極高啦！

因為Rebecca放假，SDR佢地都好好人咁搵埋我一齊食Lunch，因為過機場架HAS Shuttle Bus好多人，我地就決定等過Regal果間車。點知呢個『加納豆』又打尖，而我呢D咁無大無細的就梗係好大聲咁話佢啦！等咗好耐架車終於到啦！但都係上唔到，結果我、神哥、Jack、Steve and Timmy就好瀟灑咁「打的」過機場，仲要係佢地架Regal車前上車，哈哈！型爆丫！至於『加納豆』就梗係比佢D Teammate寸啦！活該！

因為今晚要上埋Tutorial的關係，所以都差不多成10點先放學。放咗學就打電話比穎風睇吓佢係邊，呵呵！剛好佢同佢D中學同學在銅鑼灣，結果我就走咗落去叫佢陪我去食返個Dinner先。行咗幾間餐廳，最後我們走咗去Muji對面有間叫『南國』的米線鋪食野，而佢D同學仔就去咗第2度飲野先。食到11點半我就打道回府，而佢就返去搵返佢D中學同學繼續飲野！

>>March 6, 2006 at 6:07:30 AM GMT+8

2006 年 3 月 1 日 星期三 【乍雨乍晴】

剛踏入狗年先一個月，就已經流年不利。早兩天要去開會，到今日阿姐又Pass一D吃力不討好的工作給我。我真係好懷疑一個Administration Officer最主要的Work Duty是什麼？

至於阿姐又比D咩工作我，呵呵！勁囉！

第一：搵晒全公司的Telephone Directory之餘，仲要入返晒Division、Department、User-name and Title。今次仲唔睇電腦睇到眼都花，咁入法！真係唔知幾時先入得完。

第二：在不久的日子，E-procurement果邊會Pass一D叫Computer Resource Request Form比我跟，係做D咩野？就係當公司任何一個人要買或Install一D關於PC上任何一種事務時就要填呢份Form，而我就要收晒D Form落Record。而係我的角度就係我識唔識入果D PC Hardware / Software名稱都係一個問題。所以阿姐決定要睇晒2004年的CRRF做Self-learning，睇完份Hardcopy再睇返個Excel File去學習如果Fill-in D information。總之一句到尾：「在以後的日子，CRRF將會死在我手中。」

放工前將呢件事話咗比信任的人聽，佢都話有無搞錯！呢D野唔係一直都由XXX去跟咩，同埋AO有乜理由要做埋D咁的野！（唉！我唯一可以講的咪就係同人唔同命囉！）

>>March 3, 2006 at 3:58:51 AM GMT+8

2006 年 2 月 26 日 星期日 【暴雨】

晨早起身就右眼「眼尾跳」，『左吉右兇』…唉！唔係卦！剛過咗正月咋喎！9點前返到公司就見到有人留咗Voice Mail比我，唔洗問咪又係阿姐…就係差果幾秒就接唔到佢個Call，唉！算啦！

之後就收到Memo先知道ITS成個Department在星期5收工後會飛去上海上Training，最慘就係佢地D Flight Booking、Hotel Arrangement、Date and Participants都未決定到係點樣，所以我都無同佢地Arrange Cash，反正又唔係第一次比Finance罵Short Notices！

到下午4點鐘比人叫咗去開Internal Meeting，其實我去開的作用並不大，只不過係比人出賣咗去Take Minutes，頂！我Take Minutes唔係問題，問題係我識得Take and understand你地講D咩的話就唔洗係度做AO啦！結果唔理佢地講D咩我就不停咁寫，但寫咗D乜？我自己都唔知！個會差不多開到6點半先散，老老實實丫！成個會我覺得係得個M同個AM互相討論，而我地其他人就好似坐係度陪坐咁的Feel，而我就更加在唔知發生咩事的情況下繼續Take我的Minutes。到最後仲比佢地擺埋上台玩，結果我的耐性開始急落，忍不住駁咗我老闆一句。

到返到個位開Email account仲火，班衰仔又突然Send封Email過來後日要出Duty Travel，所以又要馬上幫佢Arrange Cash果D Form。好唔好彩果隻『加納豆』又係D非常時期走過來整我，結果好唔好意思咁向佢發咗句脾氣，四周D人都Feel到我D火都唔敢走過來惹我…做…做…做…做到7點幾就匆匆咁趕去油麻地開飯。

其實開完呢個會個人係好忟，感覺上自己都唔知係度做乜，乜都唔識、乜都做唔好，之前都或許會在INF果邊有返少少的自信心，但現在連果少少的自信心都無晒！簡單一句：「成個廢人咁留係度！」

>>February 28, 2006 at 10:46:17 AM GMT+8

2006 年 2 月 25 日 星期六 【晴】

呢個星期好似無乜大事發生，都係過著D返工、放工；返學、放學的日子。相比起來唯一的大事都莫過於阿邦佢地匆匆的來、匆匆的去，不過要集齊我們6個人一起又真係有D難度的…所以對住佢地都要唔好要求咁高了。

兩個月之後就又要考試，照理上都係時候準備溫吓書，不過對於記憶力有限的我，都係一日拖一日，加上自己又仲未想好用咩Topic做我果兩份加埋成1萬字的Assignments，唉！天啊！寫100字都有難度啦！

其實真係想不通為什麼讀書要交Assignments兼要考試？有D野識又識、唔識的就算讀咗都未必明啦！唉！

To「別人的女朋友」：有「人」（戴金絲眼鏡果個，哈哈）向我投訴你的日記沒有公開我們那天6人行約會的事宜喎！呵呵！我都知你近來好忙的，又要陪子霖、又要準備Test，所以當你有時間就一次過補返比佢啦！如果唔係有「人」會呷醋話你心中只有子霖無佢丫！

差D唔記得補返幾張相上來，以下就是本帥哥最近期的Office Desk...
【龍貓區！】

【可樂區！】

【玩具反斗城！】

【加埋我...】

>>February 27, 2006 at 4:07:30 AM GMT+8

2006 年 2 月 18 日 星期六 【晴】

今日晨早7點幾就起咗身，哈哈！幾勁！其實係迫於無奈先會起身，因為今日係阿哥的收綠禮（是什麼東西？其實我也不知道！），而我在不知道什麼情況下做咗佢介紹人，所以晨咁早就要同佢一齊返贖世主堂。

9點10分就返到屯門準備，今次真係繼子夜彌撒之後，我完完整整咁望一台彌撒…老實講！其實我都唔知我呢個介紹人要做D咩，總之人做乜我就做咩！呢台彌撒大約在10點45分左右就完，在樓下見到詠詩同盈盈…不過因為各有各野要做所以打咗個招呼就各自各精彩。後來因為阿哥架車比人塞住咗，所以就決定同阿娘、阿哥去小巴黎開飯。

今日都算有很多奇景，小巴黎得10個人左右，而且D態度仲係奇好果隻，比著平時佢采你都傻。食飽飽就行咗一陣吉之島，之後我就同阿娘返置樂睇吓有D咩買，而阿哥就返贖世主堂攞車。真係唔好玩，在置樂買野果然係又平、又正、又抵丫！同九龍簡直差得遠丫！而且款式又多，想要乜就要乜！＄5有5個成個『滑鼠』咁大的曼頭。

大約1點多就返九龍，回到家整咗D野就去找周公子，畢竟今朝咁早就起身，昨晚又勞動咗咁耐。本打算見一陣周公子就起身做Assignment的，星期三要交，一隻字都未寫過，但最後都敵不過周公子的引誘，結果一訓就訓到6點幾。馬上起身換衫搭車返屯門，無錯！又係屯門…因為今晚約咗【展翔】食開年飯。

今晚我地去咗景峰的「大戶人家」開飯，有鄒姐、阿康、子健、阿睿、子聰、阿婷、黎氏姊妹、趙生和我，後來仲有隻因被我罵了一獲而來的熊貓華華，哈哈！問你怕未！

食完飯就各自散水，因為明天仲要返工…之後就同趙生一齊行去吉之島，唔知係咪因為個人累呢？無乜意識去睇路就行，兩次都係趙生拉返我轉頭我先發覺原來身後有車，哈哈！

今日收到份龍貓2006年的Calendar同埋一罐可口可樂，呵呵！多謝你地丫！至於呢兩份禮物我都好唔客氣咁放在公司，嘻嘻！搞到成張枱好似玩具反斗城咁，!不過我鍾意丫！嗶哈哈！找天帶返部相機返公司映返張相先，到時先Upload上網比你地睇吓丫！

至於今日映的相我已經Upload晒去http://spaces.msn.com/acyng/，有興趣者自己去睇啦！如果開唔到就留言比我！

>>February 22, 2006 at 8:24:12 AM GMT+8

2006 年 2 月 17 日 星期五 【晴】

隔咗咁耐，我們6個今日終於齊人啦！嘻嘻！如果加埋小鵬哥的話就簡直係天下無敵。唯一美中不足的是他們每次選擇回來的日子都會撞正我和『別人的女朋友』最忙碌的日子，所以就算想抽多D時間陪吓佢地都有心無力…

昨晚在公司搞到成個Training都已經有D散晒的感覺，初時真的有打算去接阿邦機的，哈哈！不過最後都係放棄咗！反正今晚都會見到佢啦！都唔差在果少少的時間…

12點幾就起身換衫兼食Lunch，唉！如果唔係因為今日要Present份Proposal真係打算走堂的，返到學校都無乜心機聽阿Sir講野！加上佢講書講得好慢，搞到我由本來好精神都會比佢搞到好眼訓，所以最後都係決定去找一找周公子。結果一見就見到落堂先起身，哈哈！雖則都訓咗個多個鐘，不過我仍然都係覺得未訓飽。

上完Lecture就上Tutorial，一開始阿Sir就話Present完份Proposal就可以散水，好Yeah！Present完之後就同埋D同學仔傾一傾某D Point就趕去會穎風、阿邦、寶龍哥、子霖和『他的女朋友』…『別人的女朋友』今日都算唔話得啦！為咗佢地搞到腳都軟，哈哈！不過我知道『佢』心甘情願的，對不對？

之後就同埋佢地一齊走咗去大排擋開飯，哈哈！在香港已經很少地方有大排擋了，經濟又抵食…每人除返都係＄47，好味丫！食飽飽就打道回府了…

對於阿邦個New Look我無咩Comment，但我始終都係鍾情於佢戴「金絲眼鏡」；至於寶龍哥依舊都係保持佢的Style – 浪子；最後就緊係不得不說『別人的男朋友』啦！感覺上佢開朗咗！成日同阿邦和穎風古靈精怪，或許是因為他開始明白這個遊戲規則！相比子霖的轉變，我發覺穎風已經不是以前的他…該怎麼說呢？以前的純真、孩子氣慢慢的從他的身上消失。到底是他的腳步走得太快、還是我從一開始就停了下來…

>>February 22, 2006 at 7:04:47 AM GMT+8

2006 年 2 月 16 日 星期四 【晴】

今日8點前就已經返到公司，哈哈！係咪好勁呢？鬼咩？誰叫Organizer話0815就到公司Set Up今日Training的事情咩！咁咪唯有自己抵唸D早D返來公司…唉！

時間差不多就打算落Lobby睇吓HP D人到咗未！時間剛好，我一落到樓下就已經見到他們了。之後我就同埋佢地一齊去MP-Hall準備Set Up過一會的Training。預期說是Training，倒不如說是透過遊戲去表達一些道理。

今日的Training包括GM＋DM＋PM＋AM＋Supervisor，咁當然因為人數不足的問題有幾個AP。我今日除了做咗呢個場務之外，仲做埋呢個客席攝影師，哈哈！其實今日最主要都係玩Game，而同一個Game會玩3次。聽起來會覺得好悶，但其實你會發現到他們一次會比一次的進步，果然係Core Members。雖然在成個過程中我沒有參與，但旁觀者清嘛！呵呵！

除了我做了這個客席攝影師之外，HP都仲有個Staff會同我一樣都係做Back Up，哈哈！所以我地都好合拍咁佢拍Movie時我就映相、佢映相時我拍Movie。不過唔知係咪我地狼得很，一個AM已經搞到5部Camera中3部無電。如果到下午時我同Lily都要慳住咁用。大部份的時間我都留在MP-Hall，間中都已閃返上Office整吓D野。你估我真係咩都唔洗做咩？

最搞笑係在Race 2完畢後有個Discussion，HP的人想請一個同事出去幫手Mark底D notes，二話不說就話請著紅色衫的同事出來…結果成場望住我。咪玩啦！我仲未學識分身喎！結果由我最德高望重的GM自動幫我頂咗呢個任務，呵呵！

玩完2次的Race，到最後的Race 3睇到他們比之前Race 1 and Race 2的時候有明顯的進步，後來睇埋個Final Result。我們小勝電腦大約4-5%的Revenue，哈哈！好厲害丫！

臨頒獎前就一定唔會少咗我地果個咁德高望重的GM發言啦！佢仲公開多謝咗我幾句丫！嘻嘻！不過我將呢斷多謝的Movie cut咗出來，呵呵！費是班人又有野講啦！呢D野！自己知好啦！其實阿姐都有公開多謝我，不過我還是喜歡我阿公多D…嘻嘻！

>>February 21, 2006 at 9:53:59 AM GMT+8

2006 年 2 月 15 日 星期三 【晴】

忙咗成個星期、受了成個星期的怨氣，就係為咗明天個Training…如果唔係為咗呢份工可以比我準時收工兼有早走、有遲到的生活，我想我早已離開這個地方。但細心一想，我只是對某一個人不滿而已…

對住呢個人就連那一點點的自信都會被粉碎，大家彼此的工作手法不同，就認為我辦事不力和效率低，到最後辛辛苦苦完成了份工作之後，換來一句：「做得咁慢，已經無用啦！」唉！都唔知自己為乜？

呢個問題反反覆覆問過自己很多次，但事實終歸事實…既然要留在這裡，就要接受這裡的一切，包括你不喜歡的人和事。記得Lay曾經說過：「既然我們XX只不過是一個名字，那不如在這裡解散吧！………如果不解散的話，那就繼續走下去。」

我不知道我可以走到什麼時候、也不知道走下去的目的是什麼？但我知道在這個Moment我並沒有太多的選擇…為了同一個人讓自己哭了三次？值得嗎？

>>February 21, 2006 at 9:26:12 AM GMT+8

2006 年 2 月 13 日 星期一 【晴】

星期日先過完中國的情人節，事隔兩日又到西方的情人節…今年的情人節過得比較特別，哈哈！就係走咗去搵24K剪頭髮…都Book咗佢成3個月啦！

今日返到公司就派咗D巧克力比同事，哈哈！以前在IVE經常都會同D同學仔互送巧克力，今年本打算自己整的，但最後都係放棄咗！畢竟昨晚都要返學。買咗3種唔同種類的巧克力，有2種係自己未食過的，另外就係一大包Kitkat…仲以為得我一個會玩晒D咁的野，點知返到去知道原來SDO果邊的Heidi都會在情人節派巧克力比朋友的，哈哈！結果一人一邊…

早走咗10分鐘，因為要追1735果架E33返屯門，點知架S1行到拖地咁！仲比架E33爬埋頭，搞到我又要等多15分鐘。好彩返到屯門都係1830，時間剛剛好！上到去真係奇觀丫！計埋我都係得3個人，比著平時真係人山人海、迫都迫唔入。7點半左右就搞掂個頭，嘩！頭髮少咗舒服晒！

打電話比阿康佢仲係銅鑼灣，所以我就在吉之島行咗一陣，後來『別人的女朋友』話咗個好消息比我聽，哈哈！好Yeah！我們6個很久都未聚過啦！同『別人的女朋友』在大會堂用電話傾咗成大半個鐘，呵呵！唔知『別人的男朋友』個樣變成點呢？

8點半左右Join埋阿哥就去搵地方開飯，唉！咁的日子，成條街都係人…好彩之前手多多在【小巴黎】攞咗張飛，結果去到的時候剛好到我們了。食飽飽就在附近再行多一陣就去食甜品，之後就搭返52X打道回府了。

>>February 21, 2006 at 8:17:34 AM GMT+8

2006 年 2 月 12 日 星期日 【晴】

哈哈！原來又成個星期無打日記，其實都唔係無野打的，只不過因為呢個星期都會忙著搞星期五個Training，返到屋企都累到眼睛都張不開了。再說！每次當我要趕學校的Assignment時，公事上的事務就會奇多，唉！

講返今日（其實係上星期一），因為Timmy在Annual Dinner上中咗現金獎，所以難免被我們屈返一餐…結果Lunch又有著落了！今日除了SDR齊人之外，仲加埋我、加納豆、Simon、Gaius，而人數太多，結果要將兩張圈枱拍埋一齊，感覺上有D怪怪啦！

成餐飯的話題都離不開昨天他們跑馬拉松的事宜，16個人一人一句都已經好嘈了，而且仲有果隻加納豆就更加嘈。哈哈！我今次好醒咁無同佢一齊坐，如果唔係又比佢整我一獲！

食完飯返到公司又要繼續我的工作，夠鐘就閃水返學。唉！今個SEM完全都唔知阿Sir講乜，結果忍無可忍走咗落去行吓Great睇吓有咩巧克力明天返公司派，如果不經不覺行咗成半個鐘有多先返上去繼續發呆。

>>February 21, 2006 at 3:32:42 AM GMT+8