2006 年 4 月 20 日 星期四 【晴】

今日係我的貓家姐牛一，雖然大家都已經很久沒見，但幸好彼此都有聯繫…

在此祝她學業和工作順利、每天開開心心、身體健康、早日回來…

>>April 24, 2006 at 3:45:28 AM GMT+8

2006 年 4 月 19 日 星期三 【晴】

繼上次Lover來我公司interview後，第2個來我公司的居然是「他」，哈哈！希望「他」成功啦！益下我都好嘛！同埋我好似無乜好朋友做埋同事…嘻嘻！

因為「他」搭唔到廠車的關係，所以今日我都無同佢食早餐，預到咁上下時間就去Lobby睇吓見唔見到佢…好彩果時已經係9點幾，如果唔係實比好多同事見到我同「他」傾計，不過最後都係比人見到，更好彩係果個係熟人兼口密…唔洗驚！傾咗一會就散水。我返office做野，而佢就去做written test…

而今日係我其中一個副老闆「阻住」生日，本打算下午先切蛋糕的，不過下午唔齊人…所以10點幾就去咗Canteen食cake，之後先返公司做野…最搞笑係為了讓副老闆去Canteen，佢地居然攞住大信封叫佢去Canteen傾野！哈哈！果刻嚇死佢，畢竟本部門人手短缺！到最後就緊係比咗個大Surprise佢啦！食完cake就返公司做野了！

到11點左右佢終於做完個written test，所以我就又蛇咗去搵佢，仲帶咗佢入office扮new joiner巡視本公司一圈，哈哈！我叫佢自己行去經過我個位睇吓係咩樣，點知佢怕比人發覺唔制，哈哈！其實我地公司D人本身都成日行來行去，都無乜問題！行咗一個圈就送咗佢搭車，我就又返上Office。

到Lunch就同埋「阻住」佢地去聯邦食Birthday Lunch，新開的都ok…係D位好迫！最抵死係我同阿七都好夾咁話去買返張Mark 6…7個人食都係＄390，都算平的！下午返到公司就乖乖地做野，畢竟成朝都掛住玩。

6點鐘收工追廠車，今日的節目真係非常豐富丫。夜晚約咗「展翔」開飯，7點左右就到咗吉之島，我又唔想周圍行兼想攞埋罐coke就上咗佢屋企Hea咗一陣，問吓佢今日test咗D咩！之後先一齊去杯渡Join埋阿康就殺過去開飯，我地今
晚去食「大排檔」，哈哈！唔洗問緊係我提議啦！返正有人和議，而且我們都有8個人，咁多人又可以食得多野！前前後後我地叫咗8餸一湯，每人都係＄45，抵丫！仲叫咗2支啤酒，而我今次好乖咁一滴都無飲，呵呵！原因係個頭痛咗成日，都係介一介酒好D…成餐飯都係無無聊聊咁吹吓水，而我又好衰緊講返「綠寶橙汁」同「金寶綠水」的故事，而今次的主角係Focus咗去「大覽聰」身上，哈哈！同上次一樣，我地又走咗去超級市場搵「綠寶橙汁」，而我就在中斷離隊，因為要在10點鐘前返Church join埋阿哥返九龍，如果唔係就要自己搭車…到最後阿康打電話話比我知佢地去咗吉之島入面的supermarket先找到，而「大覽聰」都好豪氣咁買咗一條6包請大家飲，哈哈！

人越大就越想搵返小時候的回憶…

>>April 21, 2006 at 11:26:21 AM GMT+8

2006 年 4 月 17 日 星期一 【晴】

很久都未試過連續放4日假期，本來會同SDR佢地去南丫島郊遊的，不過最後都取消咗，無所謂啦！反正呢個假期我都係用咗3分2的時間去同周公子大戰800回。

講返個假期，仲有另外果3分1的時間用咗去邊？有一半就陪阿娘行吓街、另外一半就留在家死埋份Assignment，經過上次一戰…自己都唔想再重演多次，因為真係虛脫…

返工的第一日唔洗問簡直生不如死啦！畢竟天光先訓、天黑才起來。結果返到公司的狀態渾渾噩噩，好彩阿姐仲放緊假未返，如果唔係就真係唔知點頂佢…

Joe Joe今日send咗個website比我睇，係一個關於可樂罐的網站…睇完發覺自己儲果D可樂罐簡直係不外如事（唔信？）你地自己去睇吓啦！http://www.hkbeveragecollect.com/soda.htm

好耐都未試過7點半前就回到家，哈哈！連阿娘都話仲乜今日咁早，原因咪就係「唔洗應酬阿姐！」

>>April 19, 2006 at 8:44:31 AM GMT+8

2006 年 4 月 12 日 星期三 【暴雨】

今日係我直屬老闆的last day，感覺…都無咩特別！反正一直以來都係有事先搵我、無事就懶得理我。雖然其他同事都已經知道我老闆走的事，不過佢地同我一樣，心裡有數就算。

Lunch同自己Team的同事食Buffet，慶祝阿Jan升職兼阿七轉Title…計埋今次呢間野我一共食過兩次，上次係我在兩年前同成個IMD一齊去果度慶祝中秋節。機場員工＄98位，原價好似係＄128… 食物同水準都唔好期望咁高，而我最滿足的都係狂食佢D士多啤梨，仲點埋巧克力醬，真係Very好味！感覺就好似食緊呢個巧克力火鍋。

成個下午都無乜心機去做野，份Assignment又無咩靈感去寫，本打算問人的，不過眼見個個都咁忙就放棄了。之後就收到我老闆的Good-bye message，結果就好多人都走去同佢傾幾句，搞到我老闆想Pack野都Pack唔到！

By the way，唔知係咪真係我同自己D同事坐得遠或是其他原因，好多時佢地私底吓搞的活動我都係唔知的，就算知都唔可以做D咩！感覺好似被孤立咁！反而我同另外果邊的同事關係仲好D，佢地有時搞活動都會問埋我一唔一齊去。唉！總之個感覺好複雜啦！

>>April 13, 2006 at 10:17:45 AM GMT+8

2006 年 4 月 11 日 星期二 【晴】

連續三個星期每個星期都係返四日工，真係Very開心。不過放埋呢個復活節假後就無乜長假期了。唉！幾時都係覺得做學生的假係放得最多的…

公司依舊都係好忙，加上GM、阿姐又會放假，所以有好多野都必須要在他們放假前完成，若不就要等多成個星期。至於我份Assignment就仍然處於找資料的status中，不過開始feel到自己的structure有D離題，所以都係有搵個時間問吓人先。（目標：假期前完成…）

在公司突然聽到阿姐好大聲咁話：「吓！咁快？咁好啦！一陣一齊食飯」，至於我阿姐為什麼有咁大的反應是因為我老闆明天Last day，如果唔係因為佢咁大聲的關係我都唔知丫！（又會咁突然的）

Lunch我同埋SDR佢地一齊出咗機場食飯，最搞笑係佢地話搵日約我老闆一齊食Lunch當Farewell喎！而我就有D幸災樂禍咁話：「好丫！你地約到的時候告訴我一聲吧！」不過我老闆明天Last day呢個消息都已經很快便通晒天了…

夜晚返咗屯門同阿康and Panda Wawa食飯，開飯之前就去咗試吓對波鞋size，感覺上腳眼個位好淺，但就真係幾舒服！都唔知點好！我們去咗美食廣場開飯，都很久沒去那邊食飯了，之後在吉之島逛了一會就搭車返九龍。

近來D精神指數有D問題，明明很眼訓的，但就唔係好訓得著…都唔知搞咩！

「別人的女朋友」終於考完mid-term了，所以安排旅行呢個咁神聖的任務就交比你啦！

>>April 13, 2006 at 3:47:41 AM GMT+8

2006 年 4 月 7 日 星期五 【晴】

呢排唔知發咩癲，越夜越精神…搞到第兩朝先身要生不如死，明明前陣子好正常的，1點都唔夠就比周公子急Call，唔知係咪周公子開始移情別戀呢？

好彩今日係星期六，昨晚成3點幾先訓，今日都可以訓到12點半先起身…左搞右搞都唔知搞過D咩就出門返學，在到City U都成一點九…Join埋Tracy就在Canteen開飯…食飽飽就去上『喃囉佬』的堂。

好辛苦咁唔比自己釣魚乖乖咁聽書，不過唔知係咪因為佢好趕呢！每個PPT Slide都係好『那過』咁translate返中文比我地聽就『飛』，唉！咁好心佢就唔好講啦！終於挨到放學就去咗Library搵書做assignment，點知去到咩書都搵唔到。可能係因為個個都要做assignment，D書都比人借晒。唯有打電話比「別人的女朋友」求救，好彩佢在UST搵到D書係岩洗的。

之後我地就約在九龍塘MTR等，然後再過金鐘添馬艦睇【My neighbor Totoro】…本來係同阿康睇的，不過佢好慘咁比老闆叫咗返大陸做野！所以我就搵咗「別人的女朋友」陪我睇，反正「我們的男朋友」都無空應酬我們…呵呵！

真係估唔到有咁多人睇，有情侶、有一家大細，最搞笑係坐我們前的的父女係日本人…今次播呢套野都係播返日文版，咁當然有字幕啦！不過翻譯成點我都唔敢講，總之有D鏡頭明明係有對話佢就無翻譯到，同埋詞不達意！最搞笑係我同「別人的女朋友」話：「早知佢唔出果句野我就開我部電話講出來啦！」（快D走丫bombom巴！有隻粉紅色的怪物追緊我地丫！）

成套戲大約播87分鐘，之後我就同女朋友一齊拍拖行去銅鑼灣，交埋電話費就去我們的「老地方」開飯…「老地方」越來越貴，由＄20一個宵夜加到＄25一個餐，普通一個Set都係＄30，所以我同女朋友都叫咗個＄30的套餐，一路食就一路睇金像獎頒獎典禮，記得我們上次又係在「老地方」一齊睇叱吒頒獎典禮，哈哈！感覺上好似覺得我地兩個在家無電視睇咁…

食飽飽就行吓銅鑼灣，順便睇吓有無我睇中咗果對運動鞋，不過行咗幾間都無…所以就決定各自打道回府！

>>April 10, 2006 at 3:52:24 AM GMT+8

2006 年 4 月 6 日 星期四 【綿綿細雨】

呢排在公司真係忙到嘔，想take a break、想行開一會都唔得，每日對部PC對足8個鐘，仲係要日日都對住D只有65%的Excel file去做Checking，真係日日變「斗雞」…

今日返到公司，坐都未坐就又比人叫咗去做D又係好Waste time的野。就係Check返晒公司D Extension line係邊個人用緊之餘，佢的Cost centre又是什麼！因為佢地發覺有張New world的payment成年都未比過＄，結果為了方便他們對數，咪又搵我去做。真係火都薄I要怪就怪果個阿姐不知所謂，今日有個好同事爆料，佢叫佢班細連影印都搵埋我做，頂丫！你無野丫！洗唔洗掃埋地丫！大家都係同一個Division，點解另外果兩邊的Manager＋Staff都好清楚一個AO的Work duty係D咩！但呢個女人唔知都算，仲搞到班細真係以為有咩雜務都搵我，師奶！你估我日日返到公司真係發呆咩！好彩班細有D都好體諒我，所以佢地自己做返，如果唔係真係死都唔掂。

其實有時叫我去做唔係問題，問題係果樣野值唔值得去做、係咪做完之後學到D乜野！同一個Division，唔同的老闆有唔同的做事方式，但為什麼我去年只是短短的三個月已經獲益良多，但今年已經做咗成9個月都唔知自己學過D咩！都唔係話學唔到，學到好多『洗人唔洗本』、『不知所謂的處事手法和態度』……



呢個月都會成日見到小鵬哥，呵呵！忘了對上果次見佢係幾時，不過無論點都好…很開心他今次在我和「別人的女朋友」需要的時候來陪我們，雖然彼此的距離還是很遠，但感覺將會很近！

>>April 7, 2006 at 3:36:51 PM GMT+8

2006 年 4 月 4 日 星期二 【晴】

今日係清明節，對於呢D唔係在正日先拜山的我又有一日假期可以在屋企同周公子大戰15個鐘…老實講丫，而家每天訓到5個鐘都已經很好了。

點半鐘就比阿康的電話叫咗起身，因為佢今日攞2張龍貓戲飛比我。收到佢電話都好衰仔咁懶得幾分鐘床先去刷牙、洗臉，然後就行去電鐵站搵佢。去到仲見到子健傾咗幾句…

之後就打電話比阿娘問佢食唔食野，結果左搞右搞都搞到成3點先落去下面食Tea，我地去左笑江南食…都OK的！之後我就返1座，整吓D野就睇返上個星期未睇的電視，睇咗一陣就又比周公子急Call。所以我又走返上床同佢繼續開戰，一戰就戰到差不多八點。之後就起身返阿媽果邊開飯，睇埋套金三珣大結局先返屋企，再打吓Game，然後沖澡訓覺…

前前後後，我想無15個鐘都應該訓咗12個鐘。呢D咁的生活真的很久都未試過了，就算星期日放假都好，都係會比阿娘有事無事叫醒的！

>>April 6, 2006 at 5:06:29 AM GMT+8

2006 年 4 月 1 日 星期六 【晴】

今日本來打算返屯門探吓契仔的，不過「別人阿媽」呢排好忙，加上我返咗入去又要趕返出九龍食飯，所以最終都係選擇留在家見吓周公子。

訓到2點幾就比阿娘吵醒咗！呢個女人近來都唔知又發咩癲，一躂就火！最慘次次都係發在我身上，唉！唔通呢D就係女人的共通點？結果好無奈咁起身吸塵。佢成日都話自己有幾忙幾唔得閒，根本有很多事情都係佢自己搵嚟搞、搵嚟做，又無人攞住支槍對住佢的，煮一餐飯都話好辛苦？咁其他果D每日都要煮幾餐飯的唔通死咗佢咩？你又唔想出街食、但又唔想煮，咁你想點…？

5點半就同埋老豆、阿哥同女朋友出車過鑽石山廣場同阿婆佢地食飯，預祝阿婆生日喎！去到見到D人都未到，所以就同埋女朋友閃咗去行街，順便睇吓買唔買到對波鞋，可惜最後無晒果隻款。之後呢個女人又打電話來，唉！咁人地買緊野唔通叫人地唔好買咩？咁唔等得咪唔好等囉…

去到見到黃諾B，佢今日都唔知仲咩咁High，點玩、點整佢都無發脾氣，呵呵！不過再大多少少都開始無咁好玩，因為呢個小女孩D脾氣都幾大同固執。講講吓原來表姐的男朋友買波鞋有Discount，Yeah！等我搵日去試吓個Size先再話比佢知先，經濟低迷，慳得就慳！

食完飯就各自散水，臨走前同咗BB玩多咗一陣…

>>April 4, 2006 at 11:02:36 AM GMT+8

2006 年 3 月 31 日 星期五 【晴】

難得有DD時間，就Reply返D Message先…

To「秋生兄」：哈…多謝你丫！我想在HD之中都只有你這位男同學仍有Keep contact…我有時都有睇到你MSN果個Blog的，不過因為懶的關係所以無留Message…我都知做野好辛苦，不過只是自己唔復氣，尤其係做埋D無意味的工作，根本就咩都學唔到…至於你本【小寶神功】睇成點呢？有無教你什麼解決的方法？

To「豬麥兜」：邊個話男仔唔可以喊喎，你夠膽講話你由細到大都未喊過？（講大話變肥豬兜…）其實我唔係唔鍾意呢份工，只係唔鍾意我老闆的做事、處事手法，呢個世界唔係佢話點就可以點的，如果得的話董伯伯就唔洗人迫落台啦！最氣的是佢又唔想一想佢次次都係咁做野，受難最多的都係「去做的我」。

>>April 4, 2006 at 10:44:49 AM GMT+8