2006 年 5 月 7 日 星期日 【晴】

因為今朝訓得唔係咁好的關係，所以今朝起身果吓都咪話唔辛苦。因為要追車的關係，所以都行得很快，點知入到地鐵站有個人從我身後走出來。嚇我一跳，好彩原來係大覽聰。真係晨早流流嚇一嚇乜都醒晒。

原來佢每月的第一個星期一都要返早去開會，呵呵！我又唔忘了他轉了工，結果在地鐵站內傾咗一陣就各自各返工。嘻嘻！識佢咁耐都未見過佢打Tie著~`衫，Yeah！以後有人無得著Causal Wear啦！等佢Feel吓返工無得著Causal Wear的苦處。

返到公司差D唔認得自己張枱，可能之前公司滅虫的關係，成張枱都有很多小蚊子，加埋我放咗兩日假的工作，唉！真係想就咁開部PC打封辭職信就算。結果用了半個小時走清理、分工先見到張辦公桌的樣子。其實有很多工作他們是可以自己做的，不過最後佢地選擇留待我回來先做，無辦法！誰叫管理層整壞規舉，我呢D做細用咩身份去投訴。

做做吓經過Rebecca張枱見到加納豆，原來佢地講返上星期有人在加納豆房內的White board畫咗架輪椅，旁邊仲寫咗句「小心下次坐輪椅」之類的字。加納豆就話係我做，而Rebecca就話唔係我，因為我放咗假之餘D字跡又唔似我。不過加納豆點都話係我，唉！我雖然貪玩，但唔會玩呢D咁的野。總之今次就「啞口無言」，其他人或許我唔會點在乎，但果個係加納豆，我心中的半個爸爸…

Lunch同Rebecca、Florence、Nikita出去機場食飯，然後下午就專心搞晒所有的CRRF，積咗成個星期多。連阿姐見我咁都費時找我！而因為D文件太多，所以我佔用了前老闆張枱做野。下午都撞過吓加納豆，不過都係比佢寸。唉！算啦！對住佢唔想再講咁多野！

做到6點半左右終於清咗上星期的工作，明天開始又要繼續做、做、做！

>>May 8, 2006 at 4:07:56 PM GMT+8

2006 年 5 月 6 日 星期六 【晴】

本來今日打算返屯門的，不過昨晚太夜回家，而契仔阿媽又好似唔得閒，加上今朝姨媽打電話來話同阿婆飲茶，所以就無返屯門之餘仲11點左右就走咗身過「星河明居」飲茶，老實講丫！今朝因為想清走晒D notice，搞到成3點幾先去訓。

其實今日飲茶都唔係好多人，有阿婆、阿公、姨媽、姨丈、四表姐，仲以為我可見吓隻黃諾B，聽阿娘講佢隻野如果在家悶就打電話比我阿娘講電話，唉！呢隻野雖則好鬼得意，不過當要固執起上來，連我都頂佢唔順！呢個阿娘又在姨媽前亂講野，不知所謂，以後真係連DD都唔可以比佢知！怪不得阿哥成日都話D阿媽級最鍾意自編、自導、自演、同自跨！

食到點幾就同阿公、阿婆返我屋企，因為佢地話想上來坐吓喎！不過我就好無孝心咁走咗上床補眠，由3點左右就眠到8點幾到阿哥打電話來話開飯，老實丫！果刻真係寧願唔食。

食完飯睇咗一陣TV就返屋企，做返晒成個星期未做的野、未睇的TV…唔知係咪因為成個星期都慣咗夜訓，搞到成3點幾先訓得著，仲係成晚醒果隻。

其實今日SDR佢地約咗飲茶的，不過我要過阿婆果邊，所以無去到！嘻嘻！唔緊要啦！下次再有機會的。

>>May 8, 2006 at 4:09:32 PM GMT+8

2006 年 5 月 5 日 星期五 【晴】

終於考晒試，戰況如何？不知所謂，仲衰過上一科，完全唔知自己寫咩！其實有D問題真係出得好直接，不過我呢D選擇性去溫書的人就當然唸都唔洗唸就唔揀果條啦！

據之前的經驗，每次都係考完試果刻先發病的，不過今次唔知係佢D菌太勁定係我抵抗力差，考試之前一日的衝刺期居然發燒，搞到個人都唔知係度做緊D咩野！成個人都好似轉來轉去咁，結果滿腦子空白的狀態去考試…

考完之後都唔想再去唸，打電話比「別人的女朋友」睇吓佢同Chris映完身分證証未，點知佢居然無帶自己張身分證，所以佢只好陪阿Chris入去整。哈哈！每次見到阿Chris真係越來越愛死佢，連呢個做開「別人男朋友」的我都唔敢同佢爭，因為佢真係太好了。如果穎風有佢百分之一我都已經心滿意足，不過「某人」現在都不知幾風流快活，多我一個唔多、少我一個唔少！Right？

過咗銅鑼灣Meet完佢地之後就周圍咁行咗一陣，「EM效應，有遲無早」！到差不多八點先齊人，我今次去咗佢地一致認為很好味的泰國菜食野，訂咗台都要等多半個鐘。我地7個人都點咗8-9碟R，因為係慶祝Maggie同小盈子的牛一，所以我地除咗5份，每人都係＄96…抵丫！之後因為個個人都很累就各自各散水…

阿Chris佢地送咗份「臭迪」的床舖、床枕比「別人的女朋友」，哈哈！果然係非常貼心的東西，最搞笑係在送禮之前我同阿Chris研究緊份禮物如何去包裝！結果都係決定「管他了！」

返屋企前過咗5座同阿娘吹咗一陣水，唉！都唔知係佢過份緊張定係壓力太大，同D朋友傾多兩句就問埋D無聊野，好彩我無介紹佢比人識，如果唔係搞到好似賣女咁，以後都係唔好話最多野比佢知！

>>May 8, 2006 at 4:05:20 PM GMT+8

2006 年 5 月 3 日 星期三 【晴】

今日仍然都係放緊我的Annual Leave，早幾天在網上同之前人事部陳生聊天，先知道原來佢在我家附近的商業大廈返工，仲比佢見到我好多次0830左右在地鐵站，哈哈！因為本公司的Office hour係0830開始的…

結果今日約咗佢一齊食Lunch，佢都好醒咁打電話叫一叫我起床，哈哈！畢竟我地都好似無約到實際時間。呵呵！以為佢無咁快行到過來，點知落到樓下已經見到佢，結果比佢寸咗句。咱們都已經有大半年無見了，之前我返公司做咗一個月左右佢就Resign咗！成餐飯都係無無聊聊咁吹吓水，然後就同埋佢一齊行返佢公司，而我就好唔客氣咁跟埋佢上佢Office視察環境。

又收到佢張咭片，哈哈！「員工聘任經理」，如果唔係因為在佢公司的話我一定好唔客氣咁大笑。

講真丫！如果唔係因為陳生的話，我都無可能入到現在的公司，雖然有很多事、人都唔同了，但每天對著咁的工作環境都已經不錯。

>>May 8, 2006 at 4:04:51 PM GMT+8

2006 年 5 月 1 日 星期一 【溫暖】

本來今日係請咗Annual Leave的，不過早幾日收到阿姐的email，唉！呢友唔知真係忘了我放假定係佢唔當我放假係咩一回事，總之就在佢放假時搞掂D野比佢啦！加上今日有新人返工，所以我都係決定消假一日。

昨晚訓得唔係幾好，所以今朝起身都係經過一輪的戰鬥先離開我張床，返到公司發覺有幾座山咁等緊我去清理，唔係嘛！我只不過係無返工兩日而已，洗唔洗咁丫！呢個都仲未係問題，問題係今日返新工條友No-show，果下真係火都薄I不知所謂，唔返工又唔出聲，早講啦！本帥哥我今日放假的，總之返到公司忟到連D同事都唔敢惹我。

Lunch同Christy佢出咗去食飯，不過我開飯之前去咗銀行搞返上次無打到出來的Balance，入到去見到咁多人咪問下門口果位小姐我Check返D Balance係咪都係重新排除，點知條友都好似無乜心機咁理我，只識講「排隊啦！排隊啦」結果一排就排咗我35分鐘有多，去到個Counter真係忍不住問果個人，下次遇到D咁的問題係咪都要排隊，點知果個Teller話其實唔洗的，下次可以直接去某一個窗搵人幫你check就可以。唉！好彩之前叫Christy幫我叫定野食，如果唔係就真係餓死。

成個下午都不停咁清我枱的工作，連去搵『加納豆』的時間都無，佢今日終於放完佢的大病假回來了，呵呵！唔知點解感覺佢殘咗咁！最搞笑係佢朝早叫我幫佢沖水，我到下午5點幾先走去問佢係咪要水，哈哈！因為成日都係好忙，加上成日同D人去開會，我都費事走入去。

到後來都差不多收工先走咗過去同佢傾咗一陣，順便問吓有無順風車坐，哈哈！雖然係九龍塘，不過車費都平D，Yeah！阿Chris聽到我咁講都頂我唔順，呵呵！矛辦法！其實係加納豆果車度真係想訓的，不過好似有D衰，死忍到去九龍塘。相返如果果個係我GM的話，我想我2話不說就會訓…呵呵！

>>May 2, 2006 at 4:40:42 PM GMT+8

2006 年 4 月 29 日 星期六 【雨】

轉眼間又到考試的日子，昨晚同小虫和翠思在電話講吓D PPT，大家都覺得果個Moment係明白個topic講咩，不過大家都有同一個憂慮就是唔知點apply返個case，唉！

本來打算早D起身再睇多次的，畢竟由第10課開始就無再去睇，但結果都係受不了周公子的誘惑訓到成11點幾先起身，之後打電話比翠思約咗個地方開飯，哈哈！「食」對我永遠是最重要的。

差不多1點去到又一城Food court，翠思買佢最愛的吉野家，而我就去咗食KFC的巴辣雞飽，嘻嘻！很久沒吃過了！上Food court之前我走咗去銀行打簿，點知部機『哄哄』聲，幸好最後本簿都退返出來，不過就無晒中間D數，只有最後個Balance，所以決定找天去銀行搞搞佢先！

食到咁上下我地就行返去City U，在Hall出面再睇多次D notes就入試場受死，估唔到『That’s why』都會返來監考喎！用咗10分鐘去睇吓D問題，之後先再去睇個Case，最後先開筆答問題，其實自己都寫得最亂，D英文仲差個小學生果D，不過時間關係算吧啦！因為我晝埋圖的關係，所以第3條並不是寫太多文字，而時間又已經夠了。唉！總算考了一科，之後到EB仲死！比咗D範圍同無比無乜分別。

考完試就打電話比佢地睇吓盈盈果邊的婚禮搞掂未，本來打算去元朗食大榮華，不過後來他們打電話給我說內部裝修無得食，所以就決定返屯門，而我就由九龍塘搭車回屯門。我地去咗景豐附近食泰國菜，之後就一行7個人去仁愛堂打保齡球。因為個個都唔想咁早返屋企，而我地就Call埋子揚同趙道。初時因為D人未到，只有我、孖聰同OD妹，所以我就落場打咗一Round，哈！比人撞彩有『全中』，後來阿康、阿睿和其他人陸續到就開始我們的男子戰。最搞笑的係佢地見到今日在婚禮上一個女子，而呢個女子仲同趙生有D小插曲，哈哈！當呢位女子出現的時候，班衰仔的球技馬上急降，都唔知係咪！

打到11點幾就去食甜品，食食吓佢地先同我講尾班車係11點20分，果時已經時11點30分了，結果好衰仔咁叫阿睿載返我出九龍，而最慘係大覽聰，點咗佢上車之後要出咗九龍先載返他回來，一段15分鐘的路程搞到佢成個鐘後先返到屋企，呵呵！無辦法啦！誰叫本帥哥惡死！

>>May 2, 2006 at 4:40:07 PM GMT+8

2006 年 4 月 29 日 星期六 【晴】

今日有兩個我生命人最重要的人的大日子，更巧合的係呢兩個人的名的有一個「盈」字


首先就祝「別人的女朋友」牛一快樂，大個女啦！為了唔好比阿邦同寶龍哥佢地睇低，我地要比心機丫，Te Amo！

祝你生日快樂...
祝你生日快樂...
祝你生日快樂...
祝你生日快樂...

然後就梗係祝我第二個親愛的白年好合，永結同心啦！

由相遇、相識、相愛、到結婚呢個階段，中間都會遇到很多困難。或許並不是每件事情都可以用最好的方法解決，但只要彼此心中有愛，就算多困難的問題大家都可以牽手解決...

祝你們開開心心，除咗請人飯，萬大事都唔好搵我啦！哈哈！

>>April 29, 2006 at 4:47:26 PM GMT+8

2006 年 4 月 27 日 星期四 【乍寒還暖】

今日請咗個靚假留在家準備星期日的考試，老老實實！在屋企咁耐，其實每日都係Hea吓Hea吓咁。睇咗1個鐘的書就走咗去休息返2個鐘，再唔係就去找吓周公子…一個字『爽』

雖則星期日考試，但今日都係走咗出尖沙咀同公司的同事食飯，當然啦！在下雨天仲叫得的郁的同事都莫過於係我最喜歡的Teammate – SDR，而且今餐飯係同Serena farewell，點都要去食！畢竟Serena對自己都好好，仲教我很多做事的手法…所以無論點我都要去。

佢地揀咗尖沙咀一間叫「牡丹庭」的中菜館，好彩之前曾經去過亞太廣場，所以今次唔洗搵餐死！去到的時間就叫到Stephen、Yan、Serena、Rebecca到咗，因為佢地坐Kenneth車，所以就快過其他人到，而車主就緊係搵位泊車啦！過了一會，William、Anson、Ricky、Jack、Timmy、Steve、Terence and Kenneth都到埋！Yeah！開飯喇！我地叫咗個2千幾的Set Dinner，D野都幾好味、份量都唔弱，而我同「神哥」又不忘先來就鬥嘴，幸好中間隔住個William，如果唔係分分鐘會打起上來，哈哈！講笑咋！我地呢D係文人來的。

成餐飯都很開心，個個都有講有笑，無分上司和下屬，總之笑聲不斷！雖然我都唔係很多時候可以插嘴，但我很喜歡這種感覺。而且今晚飯我發覺我們3個女仔的口味都差不多，以壽包為例，個個男仔見到二話不說就抽起個鹹蛋王，因為佢地個個都怕膽固醇高，而我們3個就不斷咁話佢地浪費晒成個壽包的精髓！

好彩留咗肚食甜品，咁大個女，真係第一次食到D真係用芋頭煲出來的『芋頭西米露』，超級好味！D芋頭又好粉，Yummy！我地由7點幾食到10點幾就各自各回府，而Kenneth就好好人咁載埋我回家，嘻嘻！不過真係估佢唔到呢間野有咁多外國人幫襯。

返到屋企又係半發呆、半溫書的狀態去迎接兩天後的考試…

>>May 2, 2006 at 4:39:21 PM GMT+8

2006 年 4 月 23 日 星期日 【晴】

自從放完個Easter Holiday，每天都可以好早咁收工然後回家，哈哈！連阿娘都問「乜你呢排無野做咩？」答案就梗係唔係啦！只不過有D野都係決定留返第2日先做…

今日Lunch同埋SDR佢地一齊出左東涌和Brandon食Farewell Lunch，估唔到今次到佢啦！仲係走得咁快果隻…其實我今日有帶飯的，不過Brandon對我又不錯，所以都係無食到盒飯。大不了咪再留返Tomorrow…

追到6點鐘果架E21，上到車先發覺無位坐…天啊！已經又累又眼訓，結果好無奈咁企咗成個鐘多的巴士先返到屋企。食完飯打算回家溫吓書，點知阿娘又開城市論壇，唉！仲講到自己好似好慘咁，但佢又唔唸吓究竟係佢將D事複雜化定係佢自己想得太多，呢個答案就只有佢自己先知啦！

>>April 25, 2006 at 8:02:48 AM GMT+8

2006 年 4 月 21 日 星期五 【晴】

返埋今日就又要考我SEM II的試，唉！都唔知自己呢兩個SEM學咗D咩！只係知道返學、交Assignment、同考試，呢咁的生活也是我最不想過的生活。

上埋呢堂的EM就唔洗再上「喃囉佬」的堂，完咗堂Lecture的時候就轉課室上埋堂Tutorial…呢個SEM就可以收工。因為之前堂Lecture放早咗，所以有成15分鐘的Break先再上Tutorial。在轉緊課室的期間，我同小虫走咗出課室行過圈，點知比我見到前無線新聞報導員 – 李璨榮，哈哈！最搞笑係我出咗門口望住佢、佢又望住我，不過因為果個Moment我仲未想到佢叫咩名，所以就扮晒睇唔到咁行咗去搵另一個同學翠思，之後就發生咗一件好搞笑但又好樣衰的事件…

我：「喂…我見到個前無線新聞報導員，不過想唔起佢叫乜名」
翠思：「係…等我昅吓，呢方面我好熟的」
結果我地兩條友就行返去Tutorial room又昅多次，翠思都認得佢係乜水，不過結果都係講唔出個名，後來我行行吓忽然想起就轉頭同翠思講
我：「我想到啦！係李璨榮」
翠思：「係丫係丫…哈哈！李璨榮…璨榮…璨榮…璨榮…」
當翠思不停咁自言自語地叫緊人地個名時，當然人已經不知不覺站在翠思後面，見到咁的情況，我就緊係閃開啦！後想我打過眼色比翠思，佢都好醒咁Feel到發生咩事，二話不說就向前跑，而我果時已經抱著肚子大笑…哈哈！

之後我其他同學都見到李璨榮，仲傾咗幾句，原來佢在我隔離的Classroom上堂…

上完堂就行咗一陣Taste就打道回府，本打算找一找周公子的，不過後來左搞右搞又開飯，所以最終都係無訓到…

>>April 24, 2006 at 3:43:51 AM GMT+8