2006 年 6 月 21 日 星期三 【綿綿細雨】

今日係我期待了很久的日子…
今日係我實踐訂下諾言的日子…
今日係我第一次和朋友出門的日子…

矛錯！小子的『尋足跡之旅』正式開始…

因為昨晚整理行李、雜項都搞到3點幾先訓，4個鐘頭多就起身準備出門。臨出門前都要上一上網睇下台灣的天氣，不過都係有雨…打比『別人的女朋友』夾一夾時間就出門了，而我好醒咁上到佢搭果個MTR，哈哈！呢條東涌線一星期搭咁多次，有咩可能唔知佢D時間丫。

8點幾就去到東涌，之後同埋『別人的女朋友』和Nigal去搭S1，仲見到幾個同事，不過大家的心態不同，而我當然係幸災樂禍樣果個啦！去到機場就去搵旅行社果D員工攞機票，但因為未夠鐘Check-in，所以就同佢地去咗蕉葉食返個靚早餐先，而我都好醒咁帶埋公司staff card出門，哈哈！

初時都擔心緊阿豬果塊車頭燈比唔比Hand carry，不過好彩都比我地混到入去，可能因為我地個樣細卦，斷估都唔會走水貨啦！入到禁區在Disney專門店睇咗一陣野先去上機。因為我地2個人的關係，所以係窗口位！『別人的女朋友』一上機就開始補眠，而我可能還處於興奮狀況，所以訓唔著。

起飛啦！果下的心情真係有D緊張…飛機比原定時間早咗到達，而我地就好合拍咁直去Counter辦理落地簽證，不過因為之前我已經在公司攞定D Form填好晒，所以好快就搞掂同埋過埋關，哈哈！感覺非常都好…其實當我地過緊關轉頭望時，見到落地簽證個counter D人排到成條龍咁長的隊，呵呵！呢D係咪叫做「行得快、好世界」。去到輸送帶就已經見到我地D行李，Yeah！出閘啦！不過可能因為我地早的關係，所以出到閘仲未見到小謝…係呢度介紹一下先，小謝係阿豬台灣的朋友，而他知道我地兩個女仔自己去台灣，所以就好好人咁做我地的導遊，哈哈！

等到點幾就未見人，我同『別人的女朋友』都有D唔知點算好，因為其實我地係未見過小謝的…好彩到最後見到個著住TRD衫的人走來問我地係咪聰的朋友，Yeah！無死啦！

上到車佢首先帶我地去桃園縣一間小攤檔食「Donut」，聽他說這間店舖下午一點半才開檔，他女朋友來了4次先有食到1次。所以我和『別人的女朋友』都既期待而又緊張。好彩去到之後就已經見到該攤檔剛開鋪，Yeah！好開心丫！其實佢D「Donut」很普通，只不過係加沙糖而已…但就真係好好味丫，一D都唔油膩，仲有似熱狗的三文治（我揀咗青瓜沙律味），正丫！食完野小謝就去咗附近的車行攞埋D零件就車我地過宜蘭縣…

【按圖放大】

老實講，由台北過宜蘭縣都需要大約2-3個小時的車程，而幸好我們到達那天有條通往台北市到宜蘭縣、全世界排行第四的『雪山隧道』正式通車，所以小謝就利用呢條隧道載我們過宜蘭，而車程不只不過需要30-45分鐘，但呢條隧道都蠻多規定，例如隧道內最高時速限70公里，最低為50公里，跟車距離50米…嘩！今次真係難為了小謝，畢竟他的車速開到140都面不改色。而我去到中斷都受不了周公子的呼喚訓咗一陣…

大約5點幾我們終於到達宜蘭縣了，哈哈！不過天氣很糟，下大雨…最後小謝唯有把車停放在一旁幫我們打電話給民宿老闆叫他來接我們，誰不知原來我們停泊的地方和民宿只有一個轉彎位之隔…所以就算下著那麼大雨，我們也沒有變落湯雞。因為我們本來訂咗果間房被其他人用咗，所以民宿老闆翁先生upgrade我們住另一間大房，放底晒D野就正式開始我們的『宜蘭之旅』…

真奇怪，剛剛下大雨，放完行李下樓後就天氣晴朗…不過都好，起碼映相都方便D。唔講唔知，原來小謝都算係個宜蘭人，哈哈！咁咪同周生係同鄉？因為小謝太久沒到宜蘭，所以我們轉了很多個圈才來到『冬山親水公園』。

原來每年的7月都是宜蘭的「童玩節」，他們會有很多水上的遊戲、表演之類的活動，所以『冬山親水公園』內有很多設施都拆晒為「童玩節」作準備，故此我們入到去都唔係有太多野睇，反而見到好多工人和木板，哈哈！在園內行咗一陣就去『羅東夜市』搵野食了…

【按圖放大】

泊好車我們就走去『羅東夜市』，途徑一間買牛舌餅很有名的店舖，所以我地就走咗去買咗幾包做手信…之後就去搵周生介紹的店舖食羊肉，而我地仲食咗碗魯肉飯…呵呵！很滿足…可以天氣太熱，所以我地都無咩胃口，之後經過一D類似冒險樂園的地方就走咗入去睇下，尤其係D夾夾公仔機…睇睇下就比小謝要我地做下運動，就係『射籃球』…天啊！對於我和別人的女朋友呢D好日都唔郁下的人真係不知開心定無奈，結果我地就吊著無咩力的手離開，除了小謝…

打完籃球就在附近再逛了一下，買埋明天回台北的火車票，然後就回民宿，畢竟小謝明天還要回台北和上班，所我們也不想打擾小謝太久。我們把其中一件行李放到他的車上，然後就自己再回夜市那邊逛。好好彩咁比我地找到翁先生介紹我們去食『粉圓』的店舖，所以我和女朋友就走咗入去食返碗先。『粉圓』類似珍珠奶茶果D珍珠啦，唯一不同就是它中間還有一粒紅豆，所以食起上來好有口感…

【按圖放大】

食完之後我們就去找周生牌雞排店，經過周生間小學門口就順便映返張相…後來我們走了差不多半個小時都找不到，正當想放棄的時候才發覺原來我們早過走過了，應該係話地圖無錯，只不過無想過雞排店的牌轉咗樣，所以我們才發現唔到。

傳說中的老闆娘果然很熱心和健談，她一看到我們就已經猜到我們是因為周生的關係而來的，呵呵！乜真係有樣睇咩！唔洗問就梗係叫咗塊炸雞排和石榴綠茶啦！嘩！雞排真係好好味丫！怪不得個小子每次來除了即場食2件之外還會外賣多幾件走。而石榴綠茶我也是第一次喝，味道也不錯…嘻嘻！同老闆娘一邊映相一邊聊天，不說不知道其實咱們是第一次見面，哈哈！其實內容都係離不開周生的，呵呵！聊到差不多12點我們就回民宿，臨走前還答應過老闆娘明天回台北前再看一看她…

【按圖放大】

>>July 24, 2006 at 9:57:25 AM GMT+8

2006 年 6 月 12 日 星期一 【晴】

嘩.. 原來我都有成個月無打到日記…鬼咩！由旅行前忙到現在都未停過！有時係度唸，咁辛苦都唔知為乜…其實詳情都唔係好記得，畢竟都隔咗咁耐，總之一句到尾，盡寫啦！

呢排最主要的工作就係為咗期尾的旅行而作的最後準備，而今日就約埋阿康和別人的女朋友一齊去MK睇吓有無D咩資料係關於我地今次個Trip的。為咗呢個Trip，我地都搞到很多年…好彩到最後都能夠達成。因為今次並不是一次普通的旅行，而係為了一個承諾而去的旅行，哈哈！講到好深咁…唉！總之明的人就會明、唔明的人點講都無用。

放咗工就去搵謝生配Content lens，呵呵！因為去旅行戴『Con』方便D嘛！謝生好好人咁比咗對試戴裝我玩幾日，不過因為我對眼係屬於易乾果類形，所以謝生都話我最好戴8個鐘就好轉返眼鏡。搞完『Con』就去『西門町』開飯，哈哈！阿康都忍不住話我下星期都去TPE，都唔明你點解仲要食台灣野，呵呵！我呢D叫專一（穎風：你今年好似已經不是專科一年級啦喎）。

食飽飽就去咗商務睇吓有D咩書有用，不過最後都係空手而回，而阿康都無咁好氣采我地兩個，哈哈！行完書店就各自各散水，因為其實我地兩個都有很多東西都係未準備的，Yeah！幾勁！

>>July 18, 2006 at 9:11:27 AM GMT+8

2006 年 6 月 8 日 星期四 【颱風】

大事一：公司為星期一搬位而作最後準備

大事二：國泰航空公司正式收購港龍航空公司，對未來的前景尚未有明確的指示

大事三：態度衰衰格格，但又讓人不得不對他又愛又狠的戚少爺Happy Birthday

大事四：半年之前因為被Hacker入侵，而比人Delete咗的Blogs終於可以重新面世，不過都唔知用返舊果個定新果個。舊的Blog是在寶龍哥生日時開的，而且個id number又幾靚（221339）；不過新果個的Blog是在穎風生日那天開的，至於個id number都有我和他的數字（231096）所以很難去取捨。我今天又開多個，嘻嘻！都係因為別人的生日而開，那就是戚少爺，整好之後再比大家睇下。

轉眼間呢個Blog都已經寫了一年了，係呢年入面發生了很多事，不論是我、穎風、別人的女朋友、子霖、小鵬哥和其他朋友，每個人都為自己的生活和目標努力，有人會不斷進步、有人會選擇站在原地、也有人不斷沉醉於昔日的時光…

我最多 原諒你 在那櫥窗外走過
留下我 面對比我愉快的百貨
原諒你 在這一年 開心比我多
我一個 敵不過 耀眼燈飾太多

忘記了忽然一周年 卻似失戀一萬年
那燈飾以為我開心一點
誰也在未分手之前 趁快樂痴纏
原來這夜不見 我早已 沒緣份
做你的戀人一周年 卻似失戀一周年
那燈飾以為我開心一點
全世界甚麼都痴纏 我卻未脫險
但求回家總可以 忘記你盡努力睡眠

無可否認，在呢一年入面穎風為自己的將來而努力的確是我應該要學習的地方，但問題是他已經找到他的目標，那我呢？在某程度上我覺得自己也算是一個蠻現實的人，雖然有人說倘若肯嘗試的話，或許會成功。但當你知道這件事是追求不到的話，那又何必要浪費力氣去實踐呢？倒不如選擇用另一種方式去面對…

曾經有人問過我，到底喜歡那一種男生？想了一想…嗯！最好是「有Lay的聰慧、有太朗的赤子之心；穎風外冷內熱的性格、有零為了追求他的夢而堅持；還有偉易的深情、還有小鵬哥愛護家人的心」哈哈！能符合以上條件的…我想那個「他」只能在夢中出現，再說…就算真係有呢個人的出現都未必睇中你，所以這也是我那麼喜歡睡著的另外一種原因。

不管穎風、子霖、別人的女朋友或是小鵬哥，我只是希望他們開開心心、健健康康，老實說，找到一份喜歡的工作很難，而且找到一份自己喜歡，甚至拿到滿足感的工作更難，所以好好把握現在自己擁有的東西，包括親情、友情和愛情！

最後一句：「風…牛一快樂！月底見！」

>>June 16, 2006 at 8:50:05 AM GMT+8

2006 年 6 月 6 日 星期二 【綿綿細雨】

因為公司呢排要重新編排過D坐位，前前後後都搞咗成半年先搬到位。基本上成個relocate間位間得最好係阿姐果Team，唉！成個IMD，都無乜邊個係可以Flight得羸佢。最慘都莫過於我地條Team，坐晒GM門口出面之餘，仲突左2個人在另一邊，結果決定我同AM會坐另一邊。其實對於我都無咩所謂，反正SDR果邊又唔係唔識，呵呵！今次係攞正牌同佢地玩，而Rebecca同我之間只不過係一個位之隔，本來她係原封不動的，不過阿姐話我離佢太遠，所以叫Rebecca同我對調，講真丫！你咁問到，人地好意思唔肯咩！同埋都係差不夠5步的距離，都唔知有咩分別。

後來同埋佢一齊去開會傾搬位的事，當佢知道Rebecca個位已經available的時候就叫我下午快D將D野搬咗過去先，結果成個下午我就進行我的搬遷行動，用咗Around 2個多小時搬晒的張Desk的野（尤其是玩具），略略咁整理一下張枱、望一望個鐘，糟糕！忘了追廠車返學，結果咩都唔理就攞包包走人，走咗幾步才發現忘了拿手機，又跑返返公司攞手機，幸好最後都追到最後一班廠車過CX轉車，若不然就真係麻煩了。

唉！今次真係比人玩死…最唔方便是小女今日要穿裙子的…

>>June 13, 2006 at 7:18:36 AM GMT+8

2006 年 6 月 3 日 星期六 【乍寒還暖】

自從分咗家之後，我家兩佬的關係越來越白熱化，總之就『事不關已、話之你死』，不過當對方企圖走入我方的領土的時候，戰事一觸即發。

其實事原係由昨天開始，因為昨天我同阿哥都唔返屋企食飯，以之前的經驗就係阿娘係唔會煮的，加上佢又弄傷條腰骨，咁老豆咪費事佢搞咁多野就打電話回家問有無飯食，無就佢自己食。

咁阿娘就覺得，老豆只係擔心有無飯食，又唔去想一想佢整傷咗條腰行都行唔到，又點落街自己食。幸好屋企仲有幾隻糭，如果唔係餓死都無人理。

到今日，老豆在6點幾果時又打電話問阿娘有無飯食，咁當時阿娘已經開始煮緊飯，而我、阿哥同女朋友都在房打機。到老豆返到屋企阿娘就開始罵他什麼都唔理，只係理自己有無飯食。而老豆就為佢自己去辯護，結果你一言、我一語，兩個又開城市論壇，而呢D咁的時候我地就梗係唔會走出來調停啦！到最後老豆講咗句「以後唔洗煮我飯，我唔會返來食！」然後就走咗出街。

對於早已習慣的我，都已經無咩感覺。反而係呢個阿哥之後係度做世界仔同雙方單價去討論問題發生在那兒，仲在言談間有意咁寸吓我。Cher~~~聽佢地吵鬧聽得最多又唔係你、真真正正放時間在家去關心吓、睇吓你屋企人果個又唔係你，次次事後就係度扮專家，好心你檢討咗你自己先講人啦！樣樣野都係睇表面，根本有很多事情自己都唔清唔楚就去決定事情的結果，不知所謂！

>>June 13, 2006 at 7:03:23 AM GMT+8

2006 年 6 月 1 日 星期四 【乍寒還暖】

又到咗Happy Friday，本來今日係去睇詹瑞文的Show，不過最後都係無去到。（為什麼？有人送埋飛都唔去？）是因為今日SDR搞咗個「Farewell and Promote dinner with Stephen」的飯局，話晒當年都係因為Stephen比機會我，我先有機會入KA做AO，所以無論點都好，都一定要去捧場的！

講返下午，昨天是我GM的生日，但因為他放咗假，所以我地IMD今日先同佢慶祝。Rebecca之前已經落咗Order訂一個足球蛋糕，哈哈！因為IMD呢排有足球比賽。個Birthday Party大約1530在GM房舉行，大部份人都走埋入佢間房唱生日歌，在呢一刻我覺得原來我大老闆間房係咁細。唱完歌就梗係分蛋糕啦！而我就好唔客氣咁搶咗Simon果件，yeah！因為佢果件有很多士多啤梨，嘻嘻！

在我半玩、半搗蛋的情況下終於分晒D蛋糕，而我就見到仲有2粒士多啤梨無人要，正當我想叉埋落去的時候，居然比『神哥』搶咗，仲係兩粒都搶晒。有無搞錯！真係唔XYZ我就唔係度做AO，結果驚動咗站在一旁的大老闆，而佢就梗係好似睇戲咁望住我地兩個。哼！『李CW』…我話過我會為呢兩粒士多啤梨寸足你一晚。

到今晚的晚餐，我地今次揀咗去尖沙咀的『避風塘蟹皇料理』，呵呵！又係尖咀，無辦法啦！方便各位食完就閃嘛！Lunch的時候大家一齊商討送D咩比Stephen，畢竟Stephen在公在私都對我們很好，一個好上司！也因為這個原因，Rebecca要跟Kenneth車，而我就當然最大機會跟GM車果個啦！幸好最後Rebecca同我交換，呵呵！雖然話收咗工，不過我都係有得揀都唔想揀我GM的車（Benz都唔揀，沒水準！）

我、Kenneth、William、Simon、Mandy首先去Habour City會合埋Bethia就一齊揀禮物，結果行咗幾個圈，終於決定買條Tie and Tie夾比Stephen。本來我地揀咗條藍色的，不過因為條Tie爆咗線而又無貨，所以我們只好揀過另一種顏色。買完禮物就匆匆忙忙咁去飯店。

我地有18個人，訂咗間房分兩圍。本來我係坐GM果圍的，幸好佢剛接個電話，所以無留意我走咗去邊，呵呵！就係因為咁我坐咗隔離台，而咁岩『李CW』又坐在我旁，哈哈！今晚又有排嘈！

唔知係咪因為分開咗兩圍的關係，兩圍有兩圍自己的話題。到之後向Stephen敬酒的時候大家圍在一起，呢個感覺先叫做『Team』，也因為呢種的感覺，讓我喜歡和他們一起做同事…

大家玩到10點幾就各自各散水了，而Kenneth都好好人咁載埋我回家，嘻嘻！

我已經Upload晒D照片去MSN Space，有興趣者自己去看吧！

>>June 13, 2006 at 6:37:01 AM GMT+8

2006 年 5 月 31 日 星期三 【乍寒還暖】

呢個星期的節目非常豐富和充實，除咗星期一留在家食飯之外，晚晚都出咗街。咁當然某D日子是因為返學的關係啦！講返今日，早咗起身，不過仍然都係遲咗返工，因為返工之前要攞咗張相機單比阿娘叫她幫我收貨…

收工之後就落MK，會埋「別人的女朋友」一齊去銀行中心睇吓仲有無位去旅行，咁當然同預期的一樣好多酒店都已經爆晒，畢竟果段時間剛好是電腦展。雖然「別人的女朋友」和我一樣都很想那幾天去，但無奈夾唔到就係夾唔到。其實有時候會想，不知道到那天「他」會不會『回家』一躺，那我不就是會見到「他」嗎？Yeah！（神經病！）

回正題，去到旅行社就殺過去Neway City唱K，嘩！我都忘了上次唱K是什麼時候的事了。今日都好齊人，有我、穎風、「別人的女朋友」、少爺、阿邦、寶龍哥、小鵬哥和特別嘉賓【零】，哈哈！見到零真的太意外了，今次穎風唔讓位都唔得，Yeah！我地仲一齊合唱同一首歌差不多5次，勁丫！咱們由差不多8點唱到11點半先散水，唉！如果唔係因為明天要返工的話，我想我們會繼續唱下去的。

呃！下次叫埋蘇醫師和偉易先！

>>June 2, 2006 at 3:59:03 AM GMT+8

2006 年 5 月 30 日 星期二 【乍寒還暖】

放埋今日，就要等到9月 – 10月先再有公聚假期。展翔呢排唔知仲咩咁好動，一放假就會搞gathering，大家食吓飯又好、游吓水又好、甚至shopping都好，總之就一群人出來Hea吓、玩吓、吹吓！

最初的planning係去放火的，但因為天氣不穩定，所以就改咗去MK的Café吹水、之後去太古溜冰、然後去Ruby Tuesday食Dinner，而我呢D懶人就梗係食飯先到啦！不過到最後的節目係去MK的Café吹水，然後去shopping，最後過尖咀一間叫Delaney's The Irish Pub食飯。

呢間野同Friday差不多，不過佢係食愛爾蘭菜。我地叫咗4個主菜和2個小食，每人各叫一杯飲品，而我呢D懶人想都無想就叫咗杯Gunner，味道同A-club差不多。阿康同OD叫咗杯啤酒之類的野、OD妹就要Snowball、哥哥果杯好似薄荷巧克力的飲品（仲係好甜果隻）、阿睿就係Long Ireland、子揚果杯仲搞笑（山楂茶和酸梅湯的混合版）、聰就同我一樣都係Gunner（只是大細之分）…

我地由7點半吹水吹到9點幾就結帳，在離場之前子揚攞咗粒一放入水就會發光的小東西出來，個樣類似冰塊咁，連坐在旁邊的外國人都忍不住問我們這個小東西在那兒買的。哈哈！

原先打算各自散水，後來他們又提議去尖咀碼頭果邊食雪糕，邊食邊行星光大道。唔知係咪佢地太興奮呢？之後又話再落Pub飲野繼續吹水，哈哈！個個都好似明天唔洗返工的Mood，本來我都打算跟埋去的，不過最後都係放棄打道回府，因為feel到自己有點兒累了。

話雖如此，返到屋企都係掛住上網，睇返之前未睇的視頻。昨天和「別人的女朋友」講開偉易，哈哈！雖然衰衰格格咁，但又讓人不得不喜歡他，尤其是常偷笑的樣子，難道這就是我們常說的『男人不壞、女人不愛』嗎？

>>June 1, 2006 at 8:43:10 AM GMT+8

2006 年 5 月 29 日 星期一 【乍寒還暖】

因為昨天請咗假的關係，今日返到公司都預咗有排做，點知比我預期的工作少了一點，咁當然之前未做完的工作仲有很多，但起碼新的工作都未致於整死我先。

呢排都唔知仲咩，夜晚訓得唔係幾好，個腦不停咁轉來轉去成晚醒，所以每天起身都係費盡九牛二虎之力離開我張床，加上天氣又濕又熱，搞到個人都懶洋洋咁！

Lunch留咗在公司搵周公子，之後先同Rebecca閃落Canteen食Tea…點知在下面見到阿姐，結果要勞煩Rebecca幫我買野食，而我在坐在一個偏僻的角落等食。放工時差點追唔到架廠車返學，因為有份form要在放假之前submit。

今日隻「野豬」好準時咁返到學校，而我的專注力也好乖咁維持咗個半鐘，之後就開始發呆了。放咗學就打電話比「別人的女朋友」開飯，我地今次沒有去咱們的老地方了，去了食越南菜，食飽飽就在銅鑼灣行咗一陣就各自打道回府了。

哈哈！「別人的女朋友」話早知明天食公聚假期的話，今晚就去唱通宵K！咦！呢個提議都幾好喎，不過通宵K係要多人先好玩的，如果唔係好快就唔知有咩歌可以唱了…

PS：臨走之前同佢一路行維園、一路傾計時講開Blog呢樣野，我話我或許會開多個Blog，因為我怕萬一有一天呢個Blog D野無晒的話我就慘了。點知「別人的女朋友」馬上話我唔可以放棄呢個Blog，因為開返呢個Blog的日子係一個非常值得紀念的日子。這時我才想一想，係喎！我差點忘了這個Blog係我送給穎風的生日禮物，哈哈！糟糕！呢咁重要的事我居然忘掉了…到底是我已經沒有這個心，或是我已不經不覺放下這個夢？

>>June 1, 2006 at 6:24:11 AM GMT+8

2006 年 5 月 28 日 星期日 【乍寒還暖】

因為阿娘昨晚又整傷條腰的關係，所以今朝早臨時臨急咁請咗個Special Leave同佢去睇醫生，其實老豆今日無工開佢可以同阿娘去睇。不過都係果句啦『唔會指意佢』！

晨咁早就起身send email返公司請假，之後再訓多一陣就同阿娘過海搵林醫生。呵呵！林醫生今次幫我有仇報仇，仲狠狠咁教訓了阿娘一獲…最經典的都係佢果句：「你唔理自己身體狀況去照顧你阿媽，結果你而家傷咗就到你個女照顧你，咁最後邊個照顧你個女？」Yeah！真係愛死林醫生丫！

最後林醫生幫阿娘啪返好D骨（因為佢移咗位），叫佢在家休息2個星期。不過咪話我衰，要我阿娘佢肯呆在家休息2個星期的機會率接受0%…雖然本公司最大的好處係『我要放假就放假』的福利，但用得多都唔係幾好，所以我今次都表明態度，倘若她再不理勸告的話繼續【過度活躍】，我不會再請假管她的，仲要馬上出返張機票去旅行，留返呢D咁吃力不討好的工作比另外果兩位無咩貢獻的男子。

同阿娘去睇完林醫生之後就由香港區過沙田區深佢阿娘，呢頭講完叫佢回家休息，出到門口咪又要去醫院睇阿婆。我都無咁好氣了！去到威記坐咗一陣就到探病時間，不過都唔係留咗好耐就打道回府。

本來約了「別人的女朋友」去唱K的，因為佢今日剛考完她的Exam，不過最後因為她的同學生日，所以我就回府了。

夜晚落街食飯又比阿哥寸，頂！我點知你同人傾緊計，就算係你坐另一邊都得，一定要坐梳化咩！成日都話我態度唔好，你自己又好好咩！係出面就死狗、返到屋企就亂咁吠，不知所謂！成日都話你咁樣我點帶你出街，你自己檢討吓你何時帶過我出去丫！咁巴閉的話咪一齊食飯丫！次次就搵我著數！火都嚟！

>>June 1, 2006 at 3:46:47 AM GMT+8