2006 年 10 月 15 日 星期日 【晴】

今日又返咗公司，因為今日是最後一天出或改機票的日子，之前出咗套去日本的機票打算改去台灣，畢竟去台灣會方便兼容易過去日本。難得山長水又遠咁返到去就當然約吓我D好同事食返個靚飯先，不過今次就不是大圍開飯，只是圍內8字頭的一起食而已…

研究了很久終於決定去東涌食泰國菜，本來打算去機場的，但因為要避開『面面』，所以一致通過去東涌。我們一共七個人（我、Wells、Jack、Nick、Christy、Tommy）叫咗2個餐再加其他餸。最巧合是隔離台居然是Security的同事，他們還跟我打招呼，哈哈！原來我在公司的人緣都不算太差！

成餐飯都離不開講是講非講前景，之後就一起搭車返公司！本來打算在Reception登記，後來懶得行過去便跟埋他們上去…比咗份Form Staff Travel的同事我就返去L3繼續騷擾他們工作，而今次我並沒有打擾到我可愛的GM，哈哈！其實他是出咗去工幹，所以我更加自由咁出出入入。

改完機票便乖乖咁打道回府了！！！！！

>>January 10, 2007 at 10:53:53 AM GMT+8

2006 年 10 月 12 日 星期四 【晴】

不經不覺原來我都已經放咗兩個星期假，呢兩個星期都唔係好記得自己做過D愉野，總之每天天亮時睡覺，太陽下山時起床…有得訓就盡訓！

不過今日就約咗Rebecca一齊返公司出埋D機票，因為再唔出D機票就無得再出，因此也順通約埋盧總一起食返餐靚飯！約咗Rebecca大約12點係青衣地鐵站的月台等，呵呵！她今日帶埋細妹一齊出來，不過唔知係咪今日早起身，所以細妹見到我時都唔係好采我！但對於童心未泯的我就當然不會擔心，哈哈！畢竟本帥哥個人咁『Nice』~~Yeah！

大約12點半就去到聯邦酒店，坐了一會就見到盧總！他今天的樣子比上次我返來和ITSC食飯的樣子較為精神，最搞笑是他今日打的Tie和我昨天剛買的Jacket顏色非常之襯！成餐飯都係無無聊聊講吓大家和其他人的近況，而我和Rebecca最關心的都莫過於我呢位大老闆的去向啦！可惜最後都係問唔到D咩！

唔洗問呢餐就當然是老闆結帳啦！呵呵！多謝老闆！之後我和Rebecca還有細妹就一齊搭埋順風車返公司，真係好！有免費午餐之餘還有便車坐，我想成個部門都無乜邊個夠膽咁做。

返到公司就上去Staff travel填form，然後就走返落去3樓同D同事聯誼吓先，剛巧Kenneth他們又過咗來KA整埋D手尾。期間細妹成為IMD的小明星，每個人都走過去跟她玩耍…完全當咗3樓是遊樂場一樣，哈哈！自從928之後，大家有多久沒想今天一樣熱鬧和大聲地笑呢？

我們大約留到四點半左右就收到Staff Travel的電話話我們的機票已經準備好，所以我就和Rebecca一齊上去攞埋張機票就閃人。而當Rebecca搞緊機票的時候，我就帶埋細妹去人事部那邊拎返D糧單，同我估計的一樣！人事部的姊妹團見到細妹就不停咁送上糖果和哄騙小孩的說話。哈哈！留咗幾分鐘就同埋細妹一齊搵返Rebecca，呵呵！之前行得太快忘了跟Rebecca說我帶走咗佢個女，不過佢都好醒知道我都不在就估細妹跟咗我去『浦』！整好晒所有事就一齊搭返車散水了。

雖然Rebecca已為人母，但我和她的關係比同事更好，感覺好像兩姊妹一樣什麼都可以跟她說、什麼都可以問她，而她每次都會很樂意給我一些意見，並不會因為大家是同一個職位而互相猜忌。能夠在同一個部門找到這些知心的好友，真的要謝恩！

>>January 8, 2007 at 9:19:48 AM GMT+8

2006 年 10 月 7 日 星期六 【晴】

連續行幾3日，都咪話唔累！所以今日決定同阿娘訓晏D先起身Check-out！而今日的行程很簡單，主要都係留返係浦東區。

浦東區有咩行呢？『東方名珠塔』！『金貿大廈』！我們訓到差不多11點先起身，Check-out埋間房就開始向我們今日的目的地進法…我們搭公車去到陸家嘴站落車…表哥話如果想睇埋成個上海的景上『金貿大廈』好過『東方名珠塔』，之後問過阿娘佢話兩個都無興趣！之後係附近行咗一陣同埋映吓相，然後才過『金貿大廈』那邊到此一遊！點知去到見到有另一間「蘇浙匯」，而且我曾經上網見過呢間「蘇浙匯」的評語都不錯…所以就同阿娘係呢度再食多餐…

上到去同一級食府的格局一樣，而且他們安排了一個靠窗的位置給我們…呵呵！因為那時都差不多兩點，所以我們決定散叫一些R菜…而我就梗係以『蟹粉』的食物為主，包括『蟹粉小籠包』、『蟹粉生煎包』、『蟹粉小棠菜』和『蟹粉津白』…哈哈！連落單果位小姐見到我全『蟹粉』都不禁問我是不是很喜歡吃『蟹粉』，無辦法啦！山長水又遠來這裡唔食返餐『蟹粉』宴又點對得住自己！

呢餐午餐食咗二百蚊左右，最搞笑當經理見到我比多咗幾蚊時就馬上同我講唔洗比咁多。哈哈！其實我都只不過係比多幾蚊，而且負責招呼我們那位姐姐又好好笑容，所以我覺得比多少少都係值得的。

食完嘢就係附近行多一會就坐捷運去『徐家匯天主堂』，哈哈！其實來呢度最主要都莫過於因為小鵬哥的關係，本來打算入去參觀的。但門口的大叔話今日入面有結婚儀式，外人不得進入。所以我們只呆了一會就返酒店攞行李，因為阿娘話想行吓附近的「八百伴」…

其實我對呢間「八百伴」唔係有太大的興趣，不過阿娘話想去行吓咪去囉！行到咁上下就搭捷運返龍陽站那邊搭「滋浮」返機場，但因為我肚餓的關係係附近一間KFC食咗我的晚餐。後來阿娘又話不如搭去機場的旅遊車，結果問人之後搵到個車站。呢D環境附近就梗係有D的士佬同你講價，不過安全起見我同阿娘都覺得信唔過…後來等了一會發覺可以上唔到機就打算返轉頭搭「滋浮」，點知行到一半就見到架去機場的旅遊車，而個司機都好殲咁打燈叫我們返轉頭上車，結果我同阿娘就連人帶行李一齊走返去車站上車，當時我都擔心會追不到飛機，因為據我所知尾班機是差不多時間的，如果真的追不上今晚就要留在機場。

搭咗差不多成個鐘終於到機場，馬上去Counter搞check-in，當時先發覺原來呢班是最後返香港的飛機，真好彩！過了一會就同阿娘入閘，幸好我們預早入閘。因為大陸過海關的waiting time真係不能想像。

去到閘口就直接登機，想映多張相都唔得…成架大機都唔知有無10個客人，所以入到去D空姐姐姐都叫我們自己揀位坐。然後就派Dinner，呵呵！有我最鍾意的Haagen-daza雪糕食，真開心！

返到香港成個人都輕鬆晒，始終都係自己地頭嘛！之後就坐通宵巴士去青衣再轉村巴返屋企，洗埋白白都成3點幾了。



其實今次係我同阿娘兩個人第一次出門，仲係要搭飛機果隻。雖然很多行程都係無計劃去做，而且仲行到腳都軟。但總算是一個經驗，而且我知道她今次肯跟我一齊去上海最大的原因是想陪我一起去散心，畢竟呢個長假無人知道會放幾耐！

>>January 7, 2007 at 4:48:21 PM GMT+8

2006 年 10 月 6 日 星期五 【晴】

本來阿娘打算今日又join果D Local Tour去其他地方，不過比我reject咗！呵呵！我都知join local tour唔洗自己去plan咁麻煩，不過既然山長又水遠咁來到無理由日日都睇山睇水卦…

一朝早就同阿娘係附近一間叫「泰和」的餐店食早餐，入到去先知道原來佢係專比人嘆荼兼食Buffet的地方，而收費就係收你叫D咩茶的價錢…其實初時我都唔知係食Buffet的，只是覺得坐了一會不對勁咪周圍走一走才發現原來是食Buffet的…加上他們安排了一個獨立的包箱給我們…所以感覺上都不錯！

就係因為呢個早餐係Buffet的關係，所以我們決定將今日的行程押後！食到差不多一點就返咗酒店休息一會才出發去豫園…

豫園都是上海其中一個旅遊景點，我和阿娘在人多擠迫的地方周圍逛，之後仲去食咗好出名的寧波湯圓和南翔小籠包！兩者之間我覺得湯圓比較好味，而小籠包雖然它很平，但味道就真的不是想像中咁好…行完豫園就去埋上海老街，最後在我堅持的情況下係一間豆腐坊食豆腐花，後來才知道呢間咁不顯眼的小鋪的豆腐都幾出名！

本來我話打的返人民廣場那邊，但佢又話唔好喎！結果我地又由豫園那邊行返去人民廣場搭捷運去搵野食…一行就又行咗成個鐘有多！好彩今日在酒店其中一位BOY佢教我去東方路間「蘇浙匯」時比返張好Update的地圖我，哈哈…結果我就用果張地圖去搵野食…

其實行到返步行街那邊我都知阿娘頂唔住，不過無辦法，誰叫佢話要行…最慘就係去到浦東區那邊又唔知行咗幾耐先搵到間「蘇浙匯」！總之一句到尾，今日一天的運動量等於我好幾個月…

「蘇浙匯」係公司其中一位同事介紹我去的，雖然上海有好幾間「蘇浙匯」，不過因為我出發前忘了問他到底那間好食的，所以我就是旦去咗呢間！係menu度胡亂咁點咗4個餸，最好食都係個牛柳，其他果D都係一般而已…食完飯本打算搭公車返去酒店，點知等咗好耐都無車我咪走過去睇水牌先知道原來尾班車係夜晚7點。所以最終同阿娘打的返酒店…

>>January 5, 2007 at 7:15:10 AM GMT+8

2006 年 10 月 5 日 星期四 【晴】

因為前一晚無訓，所以昨晚一回到酒店就早早搵周公子，養好精神今日要映多D相…大約7點左右就起身，之後就出發去體育場那邊搭旅遊巴去周莊一日遊…

可能因為我們昨天很早就已經買好車票，所以我地個坐位係司機的後面。可能始終都無乜安全感，成程車都無乜點訓過…大約坐咗一個鐘頭多就到了，開咗腳架係附近映吓相…阿娘今日終於肯映吓相了。

可能因為昨天餓到阿娘有D怕怕，所以當她一見到有餐館就話要食野先…係出面一間好唔起眼的餐館食咗我們的午餐，之後就行入去旅遊區 – 周莊…入去之前我忘了阿娘唔識講普通話，仲派咗佢去問人點入周莊，結果比門口個細路問我地係咪中國人，點解聽唔明國語！頂丫！乜而家有法律規定一定要識聽咩！

入到周莊果然是一個遊客區，非常多人…我同阿娘就順著一潮方向邊行邊睇兼映相，最搞笑D人見到我拿著支腳架就話我好專業，嘩哈哈！周莊很像以前的漁村，咁當然有很多建築都係後期修復的…之後誤打誤撞就睇吓一D以前一些名人的故居…我們由10點差不多行到3點多就返去之前落車的地方，因為仲有成個鐘先開車返上海，所以我就自己走咗去附近映吓D低能相…而阿娘就坐在一旁休息…

大約6點左右就返到上海，之後我地就搭地鐵去王家沙食飯，點知去到食乜都無…而且態度仲非常之差，最後食咗個乾晒水的小籠包和排骨炒麵就走，然後匆匆咁帶阿娘去附近一間好出名的地方食生煎包…途中仲飲咗杯好難飲的木瓜奶。

因為食飽飽的關係，所以我們就決定慢慢行去外灘那邊。其實係阿娘話要行…行咗成個鐘多終於到外灘了，但因為人太多…而我又唔放心就咁放個腳架去映相，所以都係好求期咁映咗幾張相就返酒店…畢竟今日阿娘都行到好累。

>>December 27, 2006 at 3:53:18 AM GMT+8

2006 年 10 月 4 日 星期三 【晴】

做咗成年的KA人，都未坐過KA的Flight，都咪話唔羞家！鬼叫『佢出豉油（機票）、我出雞（酒店）』咩！不過好彩今次比我搵到間平的酒店…所以先出到Trip…KA一日有成16班機，所以我都好【老定】咁去上機

成晚無訓就係成咗度個schedule，點知度咗成晚都係完全無收獲，結果決定過到去先算！去到機場以為趕唔到0900果班機，不過去到check-in counter佢話無問題，所以就急急咁同阿娘入閘…成功到上到機，入到機艙發現我和阿娘坐3人的座位…起飛不久，前坐的外國女人已經把她的椅子向後靠，仲係調教到最後果隻。雖然本帥哥身形矮小，但都不至於有那麼多的空間讓她靠吧！結果我好辛苦咁由窗口的位置爬到坐走廊的位置…

1130左右就到機場，出到閘就去搵「滋浮火車」，同事話有機票在手去搭會平D，而且8分鐘就出到市區，點都要去試一試…上到火車就望住個顯示板，最高速的時候係開到430，但坐係車入面的我就完全唔覺得自己好似飛起咗咁！到站之後就去搭Taxi去酒店放低D行李…途中比我見到同事介紹的「蘇淅匯」…

去到Novotel就check-in and比＄，在房度想一想之後就行程就出發…

首先就去咗上海體育場買明天去周莊的車票，本來打算搭Taxi，不過阿娘話搭MTR，結果係毫無方向之下就去搵地鐵站…行咗好多冤枉路終於搵到啦！買咗飛就落去月台等車，其實我都唔係好識睇佢果幅地圖…只知道去到火車站就要轉車。等咗好耐終於有車啦！之後就搭去火車站，點知落到去發現為什麼要出咗閘先可以轉車，結果唔理，跟人行！行咗好耐先去到另一個站，又買咗車票就落去等車，呢個站同之前在浦東站的環境完全唔同…感覺好似係羅湖等車的Feel，好辛苦咁先迫到上車，而且人又多，我只好抱著阿娘…因為怕比人介袋！終於去到「上海體育館」的站，落咗車就去搵「上海體育場」，點知行咗成大個圈先搵到。本來我想去西糖的，不過阿娘話去周莊好似吸引D，所以就決定明天去周莊…人民幣140位車票都唔算平丫。

買完車票就要想一想下一站去邊！在張幾年前的地圖上研究咗好耐才決定去「新天地」，其實我知道阿娘已經肚餓，不過我又唔知附近有D咩食，所以唯有挨住先啦！我成日都主張搭Taxi先，不過阿娘想`鑪所以要坐公車，拜託…我點識落車丫！又搵咗好耐才搵到個公車站，不過因為唔知坐咩車結果都係搭Taxi！

去到「新天地」都已經成4點幾，行咗一個圈就搵咗間餐廳食返個High Tea先！叫咗個Pizza和公司三文治，唔知係咪因為肚子餓，所以覺得味道也不錯。

食完野就係「新天地」行咗一陣，本來想搵阿哥好幾年前在呢度食過的上海餐廳，但行咗一個圈都搵唔到。之後阿娘又提議行去「人民廣場」，睇地圖好似幾近，但其實都行咗成個鐘，途中經過一間賣【包】的小鋪頭，見到門外咁多人等佢出爐，結果我又等埋一份。買咗個「湯肉包」都只不過係兩毫子…怪不得我之前的人個個都係半打、一打咁買走…如果唔係因為酒店無微波爐，我想買多個曼頭的。

經過「香港廣場」，見到有麵包店就走咗入去買2個麵包，哈哈！可能今日餓襯阿娘，買定個麵包穩陣D…去到「人民廣場」附近見到間串燒店，買咗3串，點知有一串係未熟，不過其他兩串都唔見得有幾好，有乜理由係凍的。

在「人民廣場」附近又入咗間商場裡行一陣，在Food court果層見到有「永和豆漿」，就決定在果度飲返杯豆漿和「小籠包」食…味道一般！之後就去行步行街，不過行咗半條街就決定返酒店，因為今日行咗成日，而且昨晚我和阿娘都無訓就上機，加上明天又要早起身！

初時阿娘話坐公車回去，結果比我打銷咗佢呢個念頭而搭Taxi回去…

9點幾返到酒店，洗完白白再想一想明天的行程就睡。

>>November 25, 2006 at 7:42:14 PM GMT+8

2006 年 10 月 3 日 星期二 【晴】

自從Lay off咗之後，感覺好似無離開過KA一樣…因為關於那裡的最新消息都是沒有間斷過，跟當初我調到SDR果邊的位置一樣…

呢排係屋企無乜野做，而且自己又唔係好甘心個上海之旅泡湯，畢竟在KA都做咗成年，居然連港龍航空都未坐過就始終唔服氣。結果到最後居然比搵到間每晚都只不過是大約三百多塊的酒店（Novotel Atlantis Shanghai），其實最初都打算Book呢間的，而且有Staff card的話每晚仲平多一半…anyway, 三百幾蚊都係我能力範圍之內，所以就馬上訂咗間房…咁當然有其他的Condition我要去遵守啦！就係一經訂下就無得取消…

又因為搵到酒店的關係，所以我今日就馬上返公司兩套去上海的機票，順道約埋班同事一齊食返餐靚飯先。我們今日去咗上次和『西門爸爸』食果間餐廳度食飯，今日都差不多全部人出晒來和我一齊食飯，有Maria, Cathy, Joejoe, Nick, Jack, Wells, Penny, Roy, Kitty, Nikita, Toby, Tommy and Christy…其實今餐飯都係大家出來吹吓水，無咩特別！講吓呢排的轉變、發生過D咩事！對我最驚訝的係原來GM想搵我返去做多幾個月，因為佢話佢需要AO幫佢做野！所以當我今日約佢地食Lunch時，個個都以為我係返去做…哈哈！點解次次我都係最後先知果個來的，不過呢D野聽完就算！因為我始終覺得人地剛裁咗你出來，邊會咁順手又比返個位你做，你當佢係傻仔定佢當你係傻仔！

食完飯我就同埋佢地一齊返KA，而我就上Staff travel果邊出飛…填好咗D Form就搵同事幫我出飛，而呢段時間我就走返落去3/F玩…為免比GM發現我返咗來，所以我好乖咁只係留在ITS果邊，順便問吓D同事上海有乜好去處！玩咗成個鐘就收到電話張機票已經準備好，所以我就靜悄悄咁去攞埋張機票就返學。

點知一去到巴士站積仔就打電話來話GM搵我，唔係卦！今日趕時間喎！結果好無奈咁又返上公司同GM傾咗陣！其實佢最主要都係想問吓我想唔想返去幫佢手，老實丫！跟佢都唔錯，因為呢個係一個好易服侍的老闆，而且又無咩架子兼又肯比我去嘗試做…但今非昔比，所以我都有同佢講我會繼續去搵野做的！哈哈！唔知呢！對住佢個感覺好簡直，唔需要轉彎換角去同佢講野，一切都可以簡單直接！不過今日見到佢個樣好似老咗幾年咁！可能係因為佢自己親眼睇住成個部門的改變…傾到咁上下我就閃，最搞笑係臨走前我千叮萬囑他有咩新消息都唔好打電話比我，哈哈！因為本帥哥後天就飛咗去上海旅行…

好趕咁去百年度打算換D人仔去旅行，點知原來百年4點半後就唔【唱】＄，咁矛辦法啦！唯有明天又過多來一次！好彩明天都要過海返學，如果唔係真係求期去銀行搞咗佢就算！最後係附近行咗陣街就返學！

其實如果真係比我返IMD做都好，起碼我可以讀埋個Degree，畢竟現在好多工都唔會準時收工兼放假就放假…

>>November 11, 2006 at 7:31:33 PM GMT+8

2006 年 10 月 1 日 星期日 【晴】

唔知點解，自己比人『裁』咗之外，覺得有時D野都幾「邪」！以前成日都話最好公司『炒』，仲要係Immediately果隻，因為有『賠』；以前成日都話返工要對住D飛機、返到屋企又要聽住D飛機聲，開始有點『煩』… 結果…

係屋企訓咗2日，每朝起身感覺都唔知點咁！其實並不是無野做，只不過係自己唔想做！當一個人的時間多咗，就會將D野【拖得就拖】，到最後可能因為咁而要【臨急抱佛腳】…

今日係公聚假期，夜晚返咗屯門同「展翔」佢地食飯賀哥哥下星期牛一。我地今日去咗屯門Golf club內的餐廳食，初時都以為係D咩高級食府，點知去到先發覺原係只不過係普通的餐廳，叫D小炒之類的R菜！

人物：壽星仔、趙道、阿康、阿睿、曾生、鄒姐、我、盈盈和OD姐妹，我都忘了叫咗幾多野食，總之一齊人就開飯！估唔到呢間野都幾好食，但就唔係咁好坐，可能因為我地坐果個位比較迫啦！同埋呢間野D咖哩都唔錯，唔知仲咩呢排愛上咗咖哩，當然太辣的我還未接受得到啦！

大家食到10點就散水，本來阿睿打算載埋盈盈返家，但後來我們發覺咁一來一回，而某D人又要自己搭車較麻煩，所以最後我同盈盈搭LRT返去接阿B先再搭車回家…

嘻嘻！我又承機同契仔玩返陣先回家…本來打算食糖水，但後來因為飽的關係結果都無食到…

>>November 4, 2006 at 6:31:15 PM GMT+8

2006 年 9 月 27 日 星期三 【晴】

港龍裁員近二百人 (明報) 09月 28日 星期四 (轉貼yahoo.com.hk)

港龍航空宣布，裁員191人，涉及離職服務金約3000萬元，另有200人由港龍轉往國泰工作。港龍將裁減174名香港職位，另17人來自海外辦事處。佔公司全球總人數3,847的5%。港龍表示，架構重組後，港龍航空部分部門包括市場推廣、收益管理、營業及分銷等會由國泰航空集團集中統籌管理，集團亦會支援貨運、工程、信息管理及財務等其他職能。港龍的機組人員及本港的機場員工將不受影響，約有200名港龍員工被轉往國泰工作，他們的年資及薪酬不會改變。

此外，國泰航空亦恢復招聘，將提供46個額外空缺予港龍員工申請。港龍表示，受影響的香港區港龍員工可獲得離職及服務金，金額相等於離職時月薪的三分之二再乘以年資，最低為兩個月薪金，但不設最高上限。此外，他們亦可享有按比例計算的本年第13個月薪金、全數代通知金及個人的公積金供款。員工倘選擇不接受轉職輔導服務，可額外獲得一個月薪金。

港龍行政總裁鄧國杰表示，平均工作6年的中層員工原本的離職服務金約為14萬元，但現已增至40萬元，而一名基層人員的離職服務金亦由5萬多元，增至14萬元。他亦透露，現時沒有再裁員的計劃。



各位先生、女士、大朋友、小朋友：

我想很多人都想知但又唔敢問以上的裁員計劃有沒有影響到我，就趁係呢度等我交代吓啦！The answer is 『YES』！即時收拾細軟閃人…意味係我是那174人之中其中的一個，呵呵！

其實一開始已經預咗，所以有D野已經拎咗返屋企。當天的上午每個人都係不停咁映吓相玩吓，反正System比人Lock起晒，都做唔到野！而我同Rebecca呢2個待裁的員工仲夠膽走落去食返個早餐，哈哈！

食完Lunch就同埋Rebecca一齊去見人事部，除咗我和她，仲有另外一D部門的AO，一行7個人齊齊收信…其實果吓都有D失落，雖則話預咗！但估唔到係我對上兩個經理都要即炒，唉！仲有係陳生（當初第一次請我入KA做的老闆），佢居然都無得留底，我們SDR Team大部份人都覺得可惜。

而SD Team和INF接近全部都過晒CX，ITS呢邊就extend半年…係呢度最開心的都係有班好同事和好老闆，雖然唔係全部…但起碼大部份的都對自己好。而某人當知道我收到信之後都有打電話比我，嘻嘻！放心喎！雖然係想喊，但我係叻仔一定忍到的…

本來無打算拎咁多野走，後來阿娘打電話來話阿哥入來車我喎！咁就乜都攞返晒返屋企，只不過係難為阿哥係機場等咗我接近2個鐘。矛辦法啦！拎住咁多野行出門口仲唔比D記者捉住咩！所以就坐加納豆車去機場，加上我又要等埋我封Reference letter…就搞到咁晏。

其實阿哥同阿娘都已經安慰我，但始終都係唔開心的，前頭茫茫！



【對人歡笑、背人愁！】



【Staff Card】



【加納豆】



【和GM的親密照】

>>November 4, 2006 at 5:24:41 PM GMT+8

2006 年 9 月 25 日 星期一 【晴】

好耐無見過「西門爸爸」了，所以趁未比人裁之前同佢食返餐靚靚午餐先。唔經唔覺佢都去咗HKE做咗成年了，時間過得真係快、又係時候去放飯！

今日有我、Rebecca、西門爸爸、陳力奇和「阻住」…我地今次無去再飲茶，反而去咗東堤灣畔地下的「Aviator」食Lunch，價錢都係Around 40-50左右…包埋湯同茶，不過飲品除了汽水其他一律加＄10…所以我地個個都無加。

同以往一樣，我都係做「食」果個，因為佢地講D話題好多我都係搭唔到嘴的…其實我地今日的話題都離不開【裁員】和【肥雞餐】，其實對於我都無乜所謂，反正如果佢要裁你的話，你都無權去選擇D咩野！加上呢行好細，來來去去都係果班人，除非你埋到堆，否則你一係做自閉仔、一係做比人玩果堆，呢個就係現實中的社會現象…

後來講開之前有個同事因為辭職而令到「阻住」好唔滿意，其實Rebecca都只不過是問一問，但「阻住」就好大反應兼勞氣，結果Rebecca都好無奈咁快快地結束呢個話題。

其實係我的角度，呢個世界好簡單…人望高處！既然其他地方比到我想要的野，為何我還要留在這裡呢？而且係某程度上「人」係自私的，倘若所有事情都可以用「情」去界定的話，呢個世界就唔會有咁多事發生！所以我都要去學習下如何做一個「冷血」的人！

>>November 4, 2006 at 5:18:27 PM GMT+8