2006 年 12 月 8 日 星期五 【晴】

因為鄒姐下星期生日，所以「展翔人」今日決定開返個「生日飯局」賀一賀佢！而地點就在尖沙咀的「悠悠」。

下午返咗City上堂，之後就去咗Library搵吓有乜reference book for my assignment，然後就殺過去尖咀Join咗「哥哥」去行陣街街兼陪佢去買衫衫！我們首先去柏麗大道睇咗幾間Sport House都找不到他想要的褸！最後我們都係決定行去專門店睇吓有無！

其實款式他一早已經睇中咗，只不過是欠「買」呢個行動咋！去到專門店就已經見到件褸了！哈哈！唔知點解男仔咁鍾意著背心褸，莫非他們的手臂真的那麼壯？買完褸就到他陪我去映吓聖誕樹！然後就過返去新港中心那邊和其他人會合。

今晚飯局有鄒姐、OD、OD妹、Phine、阿睿、孖聰、子揚、我和新婚夫婦劉生和劉太！呢間野的感覺好似和民，唯一美中不足是我們坐的是長方形枱，要談天說地就比較不方便。也因為這個原因，我們就算分了兩堆人一樣各有各聊！而我們這邊的話題離不開近來最流行的「Wii」…呵呵！

食到咁上下劉生就開始派「紅色炸彈」，老老實實…收到果吓都唔知有咩感覺，總是怪怪的！倘若說跟他不認識又不是、但一定不是熟絡果隻！最搞笑係連Lover、阿明和「哥哥」都收到！而最後主人家說「以上名單由阿康提供」，呵！阿康今次做咗罪人了…

食完飯就無無聊聊行咗一陣就各自散水了。

返到屋企唔洗問第一時間就梗係搵阿康問吓佢仲咩出賣晒我地D名，結果佢講咗句「我點知佢唔Scan過先派！」唉~~~無奈！

>>February 8, 2007 at 10:17:43 AM GMT+8

2006 年 12 月 7 日 星期四 【晴】

轉眼間又到12月了，不經不覺已放了兩個月的假期了，原來當一個人前路茫茫的時候真係會「頹」的！呢個感覺一D都唔好，雖則每個星期仍然要上學，但始終都覺得總是缺少了些什麼的一樣！

雖然離開了KA已經2個月，但其實個心始終都放不下！今日係Christy和阿Jack的last day，所以我又走回去跟他們食飯！訂咗台去天廚，所以他們在東涌那邊接埋我一齊過去！

今餐飯都好齊人，最surprise的都係見到阿Jan，因為他今天入咗expo睇IT展！而我們的話題都離不開那幾樣，公司最近的事和其他的是是非非！

食完飯我就同Christy和阿Jack去機場拎甜品，後來他們入咗禁區映相，所以我就係出面行吓！雖然之前行機場都行咗無數次，但今次有點空洞洞的感覺…唯一的解釋就是我仍未放得底。

行行吓見到某些香港隊的運動員出閘，包括乒乓孖寶…本來我打算走過去映吓相，不過人太多了，最終我都係放棄咗！除了他們之外，我仲見到無線體育報導員 – 伍家謙！哈哈！真係估佢唔到原來都幾「壯」…

等埋Christy佢地就一齊返公司又食過，成個下午就係咁係公司玩到日落西山下…

>>January 30, 2007 at 3:42:51 AM GMT+8

2006 年 11 月 23 日 星期四 【晴】

明天係盈盈生日，識逢這些日子我地呢D至蜜朋友就當然唔會約她正日去慶祝啦！加上我呢排的Schedule咁open，去邊都矛問題…

最終決定今晚入元朗開飯，唔洗問我地就梗係食日本野啦！本來打算食「田中」，因為聽人講那裡大件又抵食…但湊住阿B的關係，所以我地去咗隔離果間叫「酒泉」，其實兩間都係食日本野的…

今晚飯局除了有壽星女、契仔、工人、詠詩和Frankie…哈哈！估唔到Frankie都有來…（因為呢個係後補日記的關係，所以我都唔係好記得食咗D乜），呢間野味道又唔會話太差，可接受啦！5個人都只不過是食咗4百幾蚊，都OK！成餐飯都係講吓D無聊野，正所謂有詠詩係度就包無悶場…

食完飯我地就返去壽星女屋企切蛋糕，詠詩HOME-MADE的「Blueberry cheesecake」，Yeah！而我呢D就梗係等食啦！嘩哈哈！問過吓點整啦！不過為免傷害無辜我都係乖乖咁做「試食官」算！呵呵！

經過我們幾位的評審之後，一致通過係「成功」的，最好一樣野就係佢唔係整得太甜，岩晒我心水！「詠詩…如果我係男人一定娶你做老婆！」

我食到大約11點半就撤退，因為要搭尾班車出九龍！

今日名言「一個蛋糕最重要係睇個Dimension而不是個高度，因為咁樣才不會讓人覺得你整的蛋糕寒酸！」以上名言轉自詠詩姐語錄

>>January 30, 2007 at 3:16:58 AM GMT+8

2006 年 11 月 17 日 星期五 【晴】

今晚同咗High Dip的同學仔去尖咀食飯（人物有我、Polly、Namie、Joan、Mandy、Vicky），自從畢咗業我就返KA打工，而她們就報咗OU的一年學位課程！估唔到轉眼間她們又畢業，而我不知不覺在KA做咗成年多DD，最後仲Lay off埋！

放咗學就打電話問吓她們的位置在where，本來約咗她們在海港城，點知去到之後佢地原來又走咗去美麗華那邊。其實今餐飯只不過是想借Vicky而開的飯局，因為她報考咗女警，而且仲入埋Final round。真係估唔到！

行咗幾個圈終於決定去尖東那邊食『韓國燒烤』，想一想我有幾耐無食過呢？最後我們揀咗間每位Around 100蚊的餐廳開飯。唔洗問一開始她們就梗係向食物出發啦！雞翼、什扒、煙肉、香腸等…總之有幾多就拎幾多，而我個人最欣賞都莫過於個沙津，哈哈！因為佢用的生果係富士鑿果…正！

因為大家都已經有工作，所以我們的話題都是關於工作上的人和事，有好笑的、有生氣的、有無奈的、也有心淡的…總之將大家心中的想法完完全全地說出來，咁當然包括我Lay Off果日啦。

我們大約食到差不多11點就閃人，其實呢間野話就話有時限，但最後都係可以繼續燒、繼續講！騎各自散水的時候就係尖東水池旁映埋張大合照…

>>January 11, 2007 at 3:28:32 AM GMT+8

2006 年 11 月 16 日 星期四 【晴】

今日收到以前一個同學仔的email係關於「九型人格測試」，那當然測驗出來的結果並不是百份百準確，各位還是要運用自己的判斷力來判斷自己是哪一型人。不論你是哪一類型的人，也會有其他類型所擁有的某些特質。而我的基本形態是屬於「第六型」，自己就覺得某方面講得幾準確，你們呢？

http://geocities.com/gadogry/e_test1.html

第六型 -- 忠誠型（"I don't like being afraid, it scares me."）

深層動機：認同 表面形態：靠近 應對手法：反應

深層動機和表面形態都屬於"移向" (move toward)，形成第六型人和環境緊密的聯繫。他們很需要安全感，而希望融入群體裡來得到安全感。

第六型的人忠誠、負責、喜歡群體生活。他們很需要信任﹐在感到安全的群體裡會很溫和、好玩、很會關心身邊的人。而在其他地方會顯得比較防衛、拘謹。

因為他們對自己有很多疑慮，不喜歡受人注視，所以未必是出色的領導者。他們很需要一個可信任的群體或者一個明確的敵對目標來集中自己的注意力。

他們小心謹慎，警覺性很高，很會察覺危機出現，而面對危機也很懂得處理。例如他們可以很敏銳地看出別人言行舉止背後的動機。可惜第六型的陰謀論作風也會讓他們跨大危機的可能性，甚至會擔懮不存在的危機。這形成不健康的第六型人的行為變得極端。他們有總會被迫害的念頭、常質疑、否定身邊的人。當他們發覺(或者開始懷疑)被背叛，會變得更惡劣。

其他關於第六型的資料：
最渴望：安穩, 有保障
最恐懼：缺乏安全感
最難達到的美德：勇氣 (Courage)
最難克服的執念：猜疑 (Doubt)

跟第六型的人相處...
1.要對他們真誠，坦白；如果你在行動中顯露到你在掩飾自己的動機，他們一定會猜疑並拆穿你。
2.聽他們的忠告和意見，不要聽到一半就說明白，了解，他們會不信任你。
3.他們會經常提出一些問題，來安撫他們內心的猜疑；要小心處理這些問題，及不厭其煩的向他們解釋。
4.不要把他們弄成眾人焦點，他們會渾身不自在。
5.跟他們相處/合作，你越顯得焦慮他們就會越放心；這樣他們才會相信你有心理準備去面對問題/困難。

如果你是第六型...
1.奉行"陰謀論"不是壞事，但要知道自己驅使自己這樣想的，究竟是要幫助解決問題，還是純粹出於恐懼?
2.學會讚賞。第六型的人會因為怕會讚壞人而不太敢欣賞別人。
3.問題出現了，不要把焦點放在"是誰的錯"，嘗試先考慮"問題所在"，這樣才能有效地解決問題。
4.學會信任。只要你能做到這一點，就算世界本身沒有改變，你也會覺得身邊一切安全得多。

>>November 17, 2006 at 5:10:32 PM GMT+8

2006 年 11 月 11 日 星期六 【晴】

忍咗成個星期，就來爆啦！所以搵咗隻熊貓去傾吓計，而佢都好有義氣咁聽我講咗一輪。好多人都話講咗出來會舒服D，但唔知點解就算我講咗出來自己都會不停咁去想…唉！就來痴線啦！

本來打算12點左右就返到去，不過最後走咗班船，結果要坐村巴去葵芳再轉巴士…最後返到屯門都成1點半，而熊貓好有義氣咁等我開飯…因為好耐都無食過小巴黎，所以我地就決定先去小巴黎開飯，行陣街先再去飲野吹水。

有時同熊貓去傾計都幾舒服，對住佢唔需要顧慮咁多而將自己的感覺完全表達出來，由工作講到返學的事，乜都講！或許他不能給我一些指示，但起碼他會嘗試從我的角度去想這件事…並讓我覺得他真的有那份『心』去聽我說的話…

曾經看過一篇email，內容是

一個普通的朋友從未看過你哭泣。
一個普通的朋友不知道你父母的姓氏。
一個普通的朋友會帶瓶葡萄酒參加你的派對。
一個普通的朋友討厭你在他睡了後打來。
一個普通的朋友找你談論你的困擾。
一個普通的朋友對你的羅曼史感到好奇。
一個普通的朋友在拜訪時，像一個客人一樣。
一個普通的朋友在吵架後就認為友誼已經結束。
一個普通的朋友期望你永遠在他身邊陪他。

一個真正的朋友有雙肩讓你的淚水濕盡。
一個真正的朋友有他們的電話在通訊錄上。
一個真正的朋友會早點來幫你準備並且為了幫你打掃而晚點走。
一個真正的朋友會問為什麼現在才打來。
一個真正的朋友找你解決你的困擾。
一個真正的朋友可以威脅你說出來。
一個真正的朋友會打開冰箱自己拿東西。
一個真正的朋友明白當你們還沒打過架就不叫真正的友誼。
一個真正的朋友期望他能永遠陪在你？

其實一個人或許有很多「朋友」，但並不代表「永遠」，但「知己」卻可能是代表「一輩子」的事，因為它會選擇包容你的一切。而我慶幸自己交到很多「知己」，正所謂歌都有得唱：『知己不會隨便分手，只會隨便的享有。特權密友、拖不到手、 也會幫手。知己可以無限分手，然而分開不久，亦隨傳隨到，這種摯友，誰又忍心踢他走！』

>>November 17, 2006 at 9:54:35 AM GMT+8

2006 年 11 月 10 日 星期五 【晴】

因為呢排無工返，所以變相返學係讓我可以Take a break的地方…有時係度呢，倘若在這個環境下生活而令到精神有問題係一D都唔出奇，尤其是對住呢咁的所謂的『家』

今日都唔知仲咩，按錯制搞到部手提無再響，結果一訓就訓到12點幾，嗱嗱臨咁起身換衫，順便Print埋份application letter今日拎去寄埋佢…已經時間無多，那個所謂的阿娘當差不多想出門口的時候，打電話叫我拎個【吉】的飯盒比佢去裝野，唉！唔知係我地真係唔夾定係佢覺得順手，因為佢去開食野的餐廳是靠碼頭，而我今日是坐村巴出城，一來一回又要幾分鐘…已經遲緊到，又要我行多轉…果吓真係忟到爆，因為走咗架村巴又要等多15分鐘…

原本仲有時間返到學校買野食，而家可以乜都唔洗食。遲咗成半個鐘先返到去，加上今日係presentation堂，全世界見到你遲到。上完堂本來打算同埋另外的同事傾吓我地下星期6 presentation的野，點知佢地嫌我和小虫無點準備就話唔開會，臨走仲講咗句「咁星期二先傾，不過到時唔好兩手空空」，果吓真係想問佢咩意思，因為其實上堂時我聽到其中一個人話佢今日趕時間要走。咁點丫！你要走咪出聲，洗唔洗咁講野！當佢地走咗之後我忍唔住同小虫到底係我想得太多定係佢地有手咁講，結果小虫都覺得佢地唔知仲咩事，好似講到我地兩個次次乜都唔做咁！其實由上次份assignment開始已經覺得有D唔妥，搵極佢地都搵唔到，咁好自然搞掂自己果Part就算，有時上堂問她們有咩Idea時又話唔知，只係自己兩個去discussion，鬼唔知到combination果個好辛苦咩！做完又要自己去交埋份野，我都無出過聲啦！如果唔係因為仲有2個SEM就完的話，真係想搵過其他人去夾，反正大家都已經咁唔滿意…如果真係唔滿意咪講出來囉，自己圍內比說話出來算係點？玩辦公室政治？

後來忍無可忍打電話比別人的女朋友呻咗一陣！

>>November 13, 2006 at 7:50:38 PM GMT+8

2006 年 11 月 9 日 星期四 【晴】

自從搬咗屋，出街指數比以前住荔枝角的時候更少（唔計返學）...一來又山長又水遠出城；二來一出一入的交通費都唔少；三來怕咗屋企的女人…

今晚約咗盈盈食飯，不過因為佢要返屋企湊仔，所以我地決定係佢屋企食，都好！等我玩吓契仔…下午老豆打電話來本來問我今日會唔會出街，不過當時本帥哥還在和周公子大戰，所以阿娘就同我接咗個電話仲話咗比佢知我今日會出街，結果伍生就叫我同佢去MK拎Order…頂！我出街都唔代表我順路啦！而且我又唔係同佢住，又要我專登咁拎返份野比佢，一個字 – 煩！加上我都有我要去的地方，你估一來一回咁易，不過那個自把自為的人已經代我回覆咗我都矛辦法，唯有入屯門之前先由屋企去MK先拎咗Order。

搭村巴出返葵芳，然後轉MTR去MK，之後再搭58X返屯門（車費：3.5+6.8+10.7；車程需時：20分鐘+20分鐘+90分鐘）

今日都唔知仲咩，明明平日班次好密的58X等咗20分鐘先有車，而我仲係在旺角火車站等，眼見3架59X已經開走，果吓真係想問司機幾時去開車…後來旺角度又塞車，結果差不多用咗個半鐘先返到屯門（計埋等車的時間）。老老實實，我今日的行程係打算去中環碼頭映相，然後同埋盈盈一齊在香港區搭車返屯門。但結果我要放棄去中環碼頭的行程，如果唔係我的車費會比以上的價錢仲多…

差不多成八點半先去到盈盈家，同契仔玩咗一陣就開飯。呵呵！好彩佢都認得吓我，因為佢見到我無喊之餘仲比我抱，因為據我所知佢離遠見到某D人已經喊定先，哈哈！而我和人地阿媽都覺得關乎樣的問題。

食完飯就一邊睇TV一邊同阿B玩，佢個百厭仔，成日攀來攀去，停吓都唔得，最怕係佢乜都放入口咬，所以睇少陣都唔掂。因為睇埋無線的頒獎典禮，所以在佢屋企留到11點才走，唉！仲要返荔枝角拎返入野比老豆。而好無奈咁落到去又等咗成15分鐘先有車，仲乜今日搭車就咁。

由屯門搭58M去荃灣，再轉MTR先去荔枝角再返去青衣，然後轉村巴返屋企（車費：7.8+4.6+3；車程需時：45分鐘+20分鐘+（10分鐘等車和開車）+10分鐘+15分鐘）

係荃灣又等咗成10分鐘先開車，之後打算打電話叫老豆落去拎野，果時先發覺原來部電話無電，結果一換電部電話就馬上顯示我有幾多個Message，唔洗問就梗係叫『屋企人』的訊息啦！去到荔枝角就見到那個所謂的老豆，其實我知佢想罵我，但無奈有時又要我去幫佢去做野，所以只好唔出聲。不過我今日晨早講過我約咗人食飯唔會咁早出返九龍比野佢，過咗無幾奈就又要那個自把自為的女人打電話來興師問罪，又問我係邊、又問我比咗野老豆未、又話而家搬咗就好心咪咁夜返之類的說話，唉！其實我唔覺得搬咗呢度有機危險。再者，我點知部電話無電，唔通我每分鐘都望住部手提咩，到時唔知係D人當我係傻仔定我係傻仔！唔洗問，返到屋企又比佢罵多次。係果刻我突然覺得同老豆住有一個好處就係佢理唔到我，所以就算我幾點返、去做D咩都唔需要同佢交代，但現在的情況不同，去那裡、做D咩都要報告，仲要睇佢面色…唉！真係要比心機儲錢，早搬早走…

我始終都係覺得如果佢真係咁等唔切或怕我夜返屋企就咪叫我去攞份野啦！佢地又唔會去想一想佢另一個仔去咗邊，做D咩！據我所知你地個寶貝仔11點先係西貢放火，仲放到唔知幾多點先返屋企…

大家都係同朋友出街，何解待遇差咁遠？

講到呢度各位可能事件已告一段落，但我話比你知，錯！第2日起身又比人X多獲，內容都係差不多，又話我唔去幫老豆、又話我出街出得夜、又話左、又話右，總之佢覺得有咩唔滿意都去X…現在的問題唔係我唔肯幫佢去拎，問題係何解要一個山長又水遠的人去拎，拎到仲要係好唔順路咁比返佢。何解唔搵另一個同佢一齊住而且當時在家中上網的人去同佢拎…

所以聽到呢D咁的指責，『無野講』！

>>November 13, 2006 at 7:28:11 PM GMT+8

2006 年 11 月 5 日 星期日 【晴】

雖然下面仲有幾篇日記未後補，不過都係果句，有拖無欠！因為呢排真係好火丫，狂躁指數簡直係直上雲頂！乜都唔順、乜都唔滿意、仲要比人寸！火都薄I

Send咗N封application letter出街，結果有2間公司可以interview。

一間人地係因為比面我阿哥的關係先比個機會我去IN，老老實實！我唔係咁鍾意咁，就算佢真係請我的話我都未必會做得開心！呢個都係另一個原因，最重要係一收到佢叫我Interview果個電話已經無乜興趣去IN。鬼唔知你地係義務團體D人好忙咩！咁我果日真係要返學嘛！仲要係Lab堂，計分ka小姐！叫佢改早D又唔肯，頂！如果唔係真係怕阿哥阿支阿左我就真係直接同佢講我唔來！結果唯有IN完之後嗱嗱臨搭隧巴由宋皇臺返金鐘，好彩佢唔係IN我好耐，所以返到去都可以上多45分鐘的Lab堂，其實最主要都係阿Sir肯mark返我的attendance！

未去IN之前同阿娘略提過佢時間安排的問題，點知條友扮醒咁打電話去問阿哥可唔可以叫果邊改時間，唉！我就係唔想出人牌，講極佢又唔明，搞到阿哥以為我巴X閉咁！本身已經唔係好想入去做，佢仲搞埋咁多野，真係越幫越忙多事幹，好唔鍾意咁…IN之前已經心裡有數，因為人地的Requirement我根本就唔適合，但唔去又唔得。IN到最後果個人都忍不住講咗句佢地今次想請的人係D咩，同埋佢地係識我阿哥…講到呢度都知道結果啦！不過佢唔請我都好，反正我就係唔鍾意係D同我阿哥有關的地方工作…

另外一間係航空公司，哈！我始終都係貪圖佢D機票，雖然規模比較細，但都係航空公司丫。而結果就係成個interview需時大約10分鐘，連我帶來的certification都無睇（頂！早講丫，拎到我手都軟），問咗D好普通的問題，仲要係我不停咁問佢野先IN到10分鐘，唉！超無奈！本來打算搭船返屋企，點知阿娘又要我返咗荔枝角先，咁樣又要用多我十幾蚊交通費…Give me a break? OK?

>>November 13, 2006 at 6:42:35 PM GMT+8

2006 年 10 月 24 日 星期二 【晴】

唔知係咪因為呢排係屋企『呆』得太久了，整個人都好『頹』的樣子，今日終於忍無可忍咁打電話比卿卿約她們今晚出來聚一聚。而卿卿都好快咁分頭行事通知其他人『今晚有飯局』。

因為我很少會主動找她們出來聚會，所以卿卿也很體貼咁知道我近來在家悶到發荒就二話不說咁話『今晚見』！所以我成日都話識到呢D咁的朋友，真係三生有幸！雖然今日能夠出來的同學仔不多（我、卿卿、伊婷、阿璇），但我們都係約照會、飯照食的心態去旺角開飯。因為我和卿卿最早到的關係，所以我們就在附近找一找有什麼地方可以坐得比較久一點的餐廳。最後都係決定去Pizzahut…

成餐飯都係聊吓東聊吓西聊吓大家的近況之類的事情，其實當初每個人都沒有預料到畢咗業都已經3-4年，但彼此的關係和感情仍是那麼好，我想這是我們在FD裡面得到最多和最寶貴的東西。

>>January 11, 2007 at 2:31:47 AM GMT+8