2007 年 3 月 2 日 星期五 【晴】

今朝7點9就比鬧鐘叫醒咗，因為今日衰人伯伯帶我去三藩市中心玩…我們大約8點半係我間motel出發，之後就去Supermarket買早餐食‧我當然揀我最愛的Green salad啦！仲配埋橙汁，Very HEALTHY…呵呵

2007 年 3 月 1 日 星期四 【晴】

成個星期咁辛苦，無非都係為咗今日呢一鋪賭局是Win or Lose‧最初打算是明天才飛SFO，不過最後因為Loading問題所以改咗今日試下上唔上到飛機，得就得…唔得的這個SFO之旅可以放棄了‧

今朝差不多成4點先去搵周公子，訓咗2個鐘左右就起床返工‧而我呢D為了方便自己就梗係著咗套Causal Wear返工啦！老老實實，雖則不是放了很多東西係個喼度，但以我的身形和身高去比較，拎住呢舊野都有點兒吃力！途中仲比呢舊野差D搞到我在街度趴低‧

返到公司唔洗問就梗係清埋我手上的工作，而蛋躂最擔心都莫過於做invoice的commitment，連早餐都無食…成朝就係咁不停地做、做同做‧做到連Lunch都仍然在做…比著平日呢D事一定無可能發生，但為咗今日呢個賭局唔可以放棄的…

2點就匆匆咁send埋D野比蛋躂就搭HAS去機場，去咗Counter check-in，原來staff係要去另一邊的counter waiting的，結果就走返去比staff的counter搞埋D手續就周圍行吓，順便搵野食開飯，畢竟今日成日都無食過野落肚…

差不多3點半就返去staff counter睇下有無位，等咗一陣就收到通知…我可以上機啦！Yeah！匆匆咁一邊入閘一邊打電話通知女朋友和其他人告訴他們我會離港一星期…入到機倉才知道原來自己係坐三文治位，Oh NO…不過唯一慶幸是我前面個位係無人坐之餘，旁邊2位都係女仕…

可能因為太多人了，所以班機都Delay咗成半個鐘先起飛，初時都唔覺得有D咩問題，不過坐到5個鐘左右就Feel到有D唔對勁，喉嚨成日都很Dry…結果要成日飲水從而要經常去洗手間，搞到我成日都要叫醒旁邊的姐姐讓路比我出去，但唔飲水又好辛苦‧唉！原來坐長途機都並不是咁輕鬆…

坐咗成12個鐘頭終於arrive to SFO啦！果吓真係有點鬆一口氣的感覺。而臨落機前我同旁邊的姐姐傾咗一陣，哈哈！她以為我係去SFO讀High School，結果我同佢講唔係… 佢仲好好人咁同埋我一齊出去過關，可惜之後我們失散咗了！因為我們排過關果條隊伍不是一樣‧而當我排緊隊過關是突然聽到前面有個男人把聲好熟之餘仲係講廣東話的…結果我一望原來係李克勤丫！呵呵！雖然是這樣，我仍是保持我昔日的態度‧就是我們大家都是一個等緊過關的普通人，只是那一刻我只會猜他是不是和我一樣坐同一班飛機來SFO…

到我過關啦！其實我都很擔心佢會唔比我入境，但一聽到我話係在Dragonair做野，好快就已經打印比我過了‧哈哈！呢個就係大公司的唯一好處…出咗閘就搵電話找衰人伯伯來湊我，嘩！估唔到出閘都要用成個鐘先出到來，原因是等行李等咗好耐…

衰人伯伯是我祟德書院的師兄，不經不覺他來了SFO都已經有7年了…而他是我在中學時期所剩無幾仍有聯絡的同學仔‧其實我地都已經無見成10年了，但感覺都係同以前一樣無咩點變…本來他打算直落三藩市帶我周圍玩，不過因為我仲未搵旅店，所以我們決定先返Sunnyvale那邊找咗旅店先再出去附近行吓…其實最初打算住係佢家的，但佢未婚妻唔係咁鍾意，所以為免他尷尬我決定自己出去住旅店，問咗第一間要成USD80-90/night，所以我們決定問第二間…呢間就平D，計埋Tax around USD70/night…所以我們就決定住呢間，雖然有點兒殘舊，不過旅店都只不過是一個訓覺的地方‧所以我都沒什麼所謂 (呵呵，我份人咁nice)…

放底D行李我地就出咗去D電話公司睇下有無一D SIM Card形式的電話Card，之後我們去到一間Shopping mall的電話公司買到SIM Card，不過要成USD27/20mins‧呢一刻我完全覺得香港的電話費係very cheaper！買完SIM Card我地就係呢個shopping mall度行咗一個圈，仲食咗杯大雪糕…呵呵！好好味，然後就開車去食Sushi…真係估唔到在USA有Sushi食‧可能因為外國人食的份量大，所以就算係Sushi定食都唔細…食完之後我們就到附近的Supermarket買咗支大水，因為自從由飛機到現在我經常覺得很口渴…可能是因為這邊的天氣比較乾燥，仲有一樣不得不提的是當這裡的太陽下山後，溫度可以由20度趺到10多度左右…

2006 年 12 月 24 日 星期日 【晴】

因為詠詩的父母返咗大陸旅行，所以我昨天就閃咗去佢屋企住宿一宵，呵呵！因為今日晨咁早就又要返聖堂見證契仔的第一件聖事嘛！

好準時咁返到贖世主堂，霸咗個靚位就準備儀式的開始，今日的軒軒非常靚仔，仲型過謝霆峰，呵呵！今日的領洗儀式除了有軒軒之後仲有曾老師的千金 – Sophia都一齊領洗，哈哈！我都係第一次見到Sophia咋，仲抱咗佢陣，不過就重量一D都唔輕，不過唔怕啦！BB大大吓就會瘦的…

成個儀式發生了一段小插曲，直頭係可以用驚險來形容…果位Aunt真係要反省吓啦，小朋友梗係會郁來郁去的，你突然衝上台仲將人地個仔倒轉，果吓反應慢D都唔知點算，真係不知所謂！仲嚇壞了我們的小王子…

成個儀式軒軒都好合作，挨到尾段見佢想訓而我們又唔比佢訓的幾慘，哈哈！矛辦法啦！呢D情況就梗係要影多D相嘛！如果唔係你大個咗點知度果日我地咁多人來見證你這個咁重要的時刻呢！

望完彌撒我們就去咗金沪庭開飯，而我們的話題都莫過於剛才的驚險時刻，簡直係全場嘩然！食完飯我就返九龍，本來打算同女朋友出街的，後來因為時間唔係好Match所以我就打道回府了，老老實實，本帥哥1月2號就考試，但又係乜都無溫過…

今日係軒軒一歲生日，希望佢生生性性、大個仔要聽教聽話啦…

>>April 1, 2007 at 3:53:07 PM GMT+8

2006 年 12 月 23 日 星期六 【晴】

仲有大約一個星期，2006年就正式結束…係呢一年入面我做過D乜野？達到過D咩的目標呢？其實對我來說這一年發生了很多事，最大的都莫過於比人Lay Off咗！D人成日都話大公司人工高、福利好、唔會無得做、最怕你唔做。但經過今次呢件事，我想這支歌仔都已經唔會再成立了。

講返今日，今日係平安夜，但我大約下午的時候都已經返咗屯門。因為今日同我的寶貝契仔慶祝他一歲的生日，雖然他正日是明天，不過早慶祝好過遲慶祝啦！而且雖則他不太明白今天是什麼日子，反正就是有一大班人當佢係明珠咁同佢玩啦！臨去佢屋企前我首先去咗吉之島同埋盈盈一齊去買野兼拎蛋糕，之後才再返碼頭那邊準備開生日會。

當嘉賓來得七七八八時就開始切蛋糕的儀式，最搞笑係中間唱生日歌時有一個爛Gap，呵呵！食完蛋糕有D人就先走，因為今晚仲要留返D精力望子夜彌撒，而我就繼續係人地屋企消磨時間之餘繼續同契仔玩。磨到上下時間就返契仔屋企，之後再同阿Ann、盈盈、詠詩佢地在吉之島開飯，行一陣街再返聖堂準備彌撒。而因為今年又係人山人海，所以我就走咗去前排同阿康、子昌佢地一齊坐…老老實實，每年我最準時都莫過於就係望子夜彌撒。

望完彌撒去咗詠詩返屋企訓，因為8個小時之後我又要返多次聖堂望多堂彌撒，而呢場彌撒就是慶祝我的寶貝契仔正式成為天主教的一份子，矛錯！就是他一生人第一樣聖事 – 領洗。

>>April 1, 2007 at 9:48:24 AM GMT+8

2006 年 12 月 16 日 星期六 【晴】

大約九點幾起身，之後等埋其他ITSC的同事將他們的行李放到的的房間裡然後出發，因為他們今天會搭飛機先回香港，而我同阿娘就留多一日…因為放埋明天我的頹廢假期就正式結束了。

大約10點在西門町附近的一間小攤檔食了我們今天的早餐，然後就正式出發去淡水。原來由西門町坐捷運去淡水都要成個多個小時，好彩到後期我地有位坐…今次係我第一次來到淡水呢個地方，而今天的天氣比昨天好好多，雖然多雲但有陽光。而我呢D型人就梗係戴返副型爆的太陽眼鏡啦！

因為今日是星期日，所以淡水都蠻多人。我們一邊行一邊映相、仲一邊食野，唔經唔覺我地都行咗成個大半晝，所以大約4點左右就回程，而回程之前我、Cathy、Joe同Christy就去咗買義美蛋糕返香港做手信，咁岩就係做緊Discount，所以好抵丫！之後我就打電話比小謝睇吓佢方唔方便來接我周圍去，不過因為他有事要做。所以我就同阿娘決定跟他們先回飯店，然後我晚一點再出去行士林夜市‧

返飯店之前我們去咗西門町食返碗好出名的『阿宗麵線』，之後他們就出發去機場，本來我打算同阿娘行去火車站，不過最後都係放棄咗，在西門町度行咗一陣，食咗鴨肉偏，不過因為我唔識叫所以最終只食咗一碗米粉，好白痴丫！然後就去咗Mos Burger買咗個牛肉Rice Burger，最後就搭車去士林夜市。而因為我出錯閘口，結果要問人先搞得清行邊個方向。

去到士林就帶咗阿娘行新士林那邊搵野食，結果決定食鐵板餐，可能係因為之前食得多野，所以都幾飽。然後就去買我最愛的蜂蜜苦瓜汁，呵呵！想起之前「別人的女朋友」飲咗一啖個苦瓜臉我就不自覺地笑出來。食飽飽就周圍咁行，好彩上次小謝帶我來時我仲認得D路，哈哈！不過呢度條條大路四通八達就算迷路都唔洗怕。行行吓我找到上次小謝帶我食果間好好味的『葫椒餅』，不過阿娘話佢好飽所以得我食，而今次我好叻咁咬開少少睇吓舊肉係邊，如果唔係就好似上次咁食咗成大半個飽都仲係食緊飽，之後有半威脅的情況吓叫阿娘試一啖，點知條友試完之後成個『葫椒餅』都搶埋我，哼！又話飽。不過算啦！行行吓我又買咗一杯士多啤梨食，真係好好味丫。然後我又帶咗阿娘去小謝之前帶我去過食『排骨燉湯』的地方‧食完呢餐真係好滿足丫！而臨走前我又買多杯紅蘿蔔苦瓜汁，Yeah！

返到西門町又行咗一陣就返飯店休息了…而臨訓前我又睇咗一陣『花樣少年少女』呵呵！

>>April 3, 2007 at 3:27:13 AM GMT+8

2006 年 12 月 15 日 星期五 【雷雨】

星期三除了返公司Handover之外，我仲出咗2套機票同阿娘趁返工之前飛多轉台灣先…呵呵！連「別人的女朋友」都話我厲害，次次都係話飛就飛，呵呵！不過今次除了我同阿娘一齊之外，仲有我一班好同事…

因為昨天我要去睇林海峰的Talk show，所以我遲一日先飛去台灣跟其他人會合，而今日除了我和阿娘之外，還有Maria和Wells…我們坐最早班機出發，去到台灣再打電話比小謝來接我們，不過因為塞車的關係我們在機場等了一會才見到小謝…不過今天的台灣天氣不是太好，整天都下雨‧跟我上次和女朋友一齊天朗氣清的日子簡直差一大節…

本來我打算Book返上次住果間萬事達飯店，不過最後因為貪方便所以就同ITS佢地一樣住返成都飯店，我們去到西門町那邊都已經下午2點多了，之後小謝因為有事要做所以先走，今次真係辛苦了小謝了…而我們就Join埋其他ITSC一齊去食台灣牛肉麵，哈哈！上次和女朋友一齊來台灣都無乜點食過呢D野…

食飽飽我們就出發去九份，今次都算是我第一次坐捷運，呵呵！對了，今次除了有我們HQ的ITSC，還有台灣同事Anderson…別名叫巴斯光年…呵呵！可能因為下雨的關係，所以都比較冷…而初打算坐旅遊巴上去九份的，但因為走咗車所以我們就決定搭的士…

上到九份我帶咗他們去其中一間店舖試食麻薯，之後仲食埋魚丸…可能因為上次的經驗，今次的台灣之旅我都唔敢食得太多野…適可而止，相反阿娘就乜都想食…唉！算啦，本時佢都好少會食到呢D野…

係九份行咗一個圈，最後Anderson帶左我地去行一個叫別有洞天的樓梯，又黑又直…最搞笑係上到去先發現原來有另一條比較舒服D的路都係可以上到去的，突然有D被騙的感覺，不過都係開心的…

不過因為今天的天氣不好，所以我們去咗一間店舖食芋圓望出去的景色都唔係太清，最抵死係我地留咗張KA的Card片係呢間鋪度…呵呵！

行完九份我地就返飯店休息一會就再出發去西門町那邊食火鍋，之前聽小謝講過在台灣食火鍋是食到你唔想食，經過今次之後我認同了…其實佢好似自助的形式，比一個價錢任食，而我都係保持適可而止的態度去食，因為上次同女朋友來台灣一開始不停咁食煎炸野，結果食咗2日就食膩咗！所以今次都係唔好食得咁盡好D…食完野我地就搭車去24小時的誠品睇書，不過最後我們都覺得無乜野岩睇，所以逗留了一個小時左右就撤退。

回飯店商討明天的行情，而我呢D電視王就發現到有套戲由Ella主演叫『花樣少年少女』的電視劇，哈哈！我都幾鍾意睇Ella做戲，所以都睇咗一陣才乖乖上床搵周公子…

>>April 3, 2007 at 3:32:21 AM GMT+8

2006 年 12 月 14 日 星期四 【暴雨】

Yeah！之前好辛苦咁打電話用credit card的積分換咗3張今日睇『林海峰是但嗡踎低噴飯』的talk show票。自從軟硬一出，阿哥就好似發咗癲咁有關於他們都DVD or CD都通通買回來。哈哈！其實也蠻不錯，起碼我可以借來睇…

首先在屋企搭船過海，去到灣仔打電話比阿哥和女朋友才知道他們在會展搞緊D野無咁快出到來，所以我就係附近搵吓有乜地方去開飯。最後決定去咗「三六九」，唔到開飯都唔記得自己今日都無食過野，叫咗小籠包、鱔糊、湯年糕和炒菜…匆匆咁食完就殺過去會展。阿哥埋完單就出來問為什麼食咗幾樣野要成300蚊，呵呵！咪玩啦！你個鱔糊都已經要98蚊啦，仲有其他白飯和加一小費，呢間野係咁上下啦！

入場之前每人派咗個膠飯盒，哈哈！坐咗一陣映吓相就開始了，林狗從中間出來，行咗一個圈先上台…成個talk show都唔錯，阿哥同女朋友笑到想噴飯，而我就唔係有太大的反應。可能個腦有唸緊好多無謂野！

睇林狗的show，都莫過於有很多金句帶走，「超低能、勁搞笑！」而台上面分別放了九隻唔同顏色的熊仔，代表林狗今次的talk show開九場…

完咗show之後，我、阿哥和女朋友就走咗去前台映相，之後我就同佢地分手。因為我約咗個朋友拎野過台灣，哈哈！矛錯！本帥哥明天又飛台灣丫。

返到屋企都成2點幾，洗完白白就pack埋D野就上床搵周公子了…

>>February 20, 2007 at 4:19:17 PM GMT+8

2006 年 12 月 12 日 星期二 【晴】

今日除了返公司出機票之外就是返去處理Handover的野，矛錯！想咗幾天，問咗很多人，結果都係決定回去。雖然都預咗唔會再有以前的生活、唔會再像以前一樣可以依靠其他人，但總不能一直等下去，畢竟不經不覺都已經頹了兩個月了。

返到去的感覺沒有像之前一樣那麼興奮，反正就像放了兩個多月的長假期現在正式上班而已…離開了兩個月的工作，大致上都知道是關於D乜野，總之就係做返一D以前一直都唔鍾意做的野，而唯一有少許的不同就是我100% Under GM…雖然日子不會長，但總好過身邊無人無物打孤獨戰‧而且我在這裡習慣了有人讓我依靠的工作環境…

無論點都好，我會好好的珍惜這一份得來不易的工作，不管是對GM或自己，現階段我都想Pass埋我個學位先再打算…

>>April 2, 2007 at 4:02:13 AM GMT+8

2006 年 12 月 11 日 星期一 【颳風】

兜兜轉轉，莫非真的又能重新開始？

>>December 11, 2006 at 8:13:19 PM GMT+8

2006 年 12 月 10 日 星期日 【颳風】

自從開始讀Diploma的時候，就已經無返過崑崙了！想不到今天返去其實是想舊老闆寫封Reference letter比我去apply USA Visa，哈！感覺「好衰仔」

晨早起身就打電話問吓Gobby趙生在不在公司，然後就起身出發回到一個曾經給我無限歡樂的公司。雖然仍記得門口的密碼，但我選擇按門鈴入去…想一想我都好像有四年沒有上過來了！

趙生一見到我都係問吓我的近況，哈哈！當他知道我在KA做過到比人Layoff也很驚訝！最surprise的是「電王 – 梁生」今日也在公司。其實認識梁生的人都知他是一個比較惡的人，但每次見我他也會笑著跟我打打鬧鬧。

同趙生傾咗一陣就去搞埋封信，哈哈！不過呢封信都寫得好誇，返咗工唔夠一個月公司就fully support我去美國旅行，如果我係個領事館我都未必信啦！而係搞緊呢封信的時候，我就入咗房同Gobby傾吓計！不知不覺Gobby都係崑崙做咗八年了。而我們的話題居然不是果四隻野，而係關係工作上大家會面對的事！哈哈！可能真係人大咗！講的話題都比較正經D…

搞完封信就落去下面開飯，而他們對我在Airlines公司做的事都很好奇！最抵死係趙生講咗句「崑崙真係唔錯，連食飯都包埋」…哈哈！

食完飯趙生他們就出去開會，而我就繼續留係公司上吓網，同Rebecca研究緊點樣去apply Visa，之後就閃人返學…

趙生對我真係好似他的細姪女一樣，只要我開口，他都會盡量去幫我！所以…真係好多謝妳~

>>February 8, 2007 at 10:31:56 AM GMT+8