2007 年 12 月 24 日 星期一 【晴】

不變的習慣，0000正式開始子夜彌撒，大約點半左右就完！今年有個驚喜就是杜神父做主祭，嘩！我們有沒有10年沒見了，不過那時候的我跟他沒有什麼堂區的事務接觸，不過咁耐無見，見到他都是很開心的，尤其是他的廣東話~~~

望完彌撒本來打算去火星仔度訓，不過最後都係上咗趙兄度，因為他說那麼晚就不要一個人回去了！而且他是一個人住的，結果我就好老實咁上咗佢度訓！呵呵！以前常去他家是因為要學小提琴，之後大家都開始忙，所以我的小提琴也繼續放在家中的某一角落！

兩條友吹咗一陣水就打算各自修行，點知比我發現到有隻小強在客廳走來走去，結果我就好老實咁走咗上張Chair度叫屋主，最搞笑係個衰仔唔信有小強，最後就當然小強在逃走過程中當場死亡！而我就好有人性咁讓屋主今晚訓廳！

訓到第2天10點幾左右就起身，梳洗完畢就同埋趙兄在大快活食早餐，然後就各自回家！

PS: 今日係火星仔生日，呢度係地球來的，咪再成日講埋D火星話啦！

>>June 17, 2008 at 8:00:42 AM GMT+8

2007 年 12 月 23 日 星期日 【雷雨】

今日係2007年的平安夜，同以住一樣本公司係會收早的，呵呵！不過今年比較特別，就是雖則本公司收早，可是我還是要正式的跟阿Tart請下午假，原因是我家肥仔揀咗今日過大禮。對丫！原來不經不覺下個月他們就結婚了，真係轉眼間咁就一年多了。不知道未來阿嫂是否仲很懷念阿哥在巴黎落塔下的求婚呢？

回正題，基本上今日我們都係半工半玩的心態去等待Lunch的來臨，想起昔的Christmas party…我和Rebecca都會在開始之前起碼半個鐘落去Canteen霸定D靚位比我們的好同事，想起昔日的日子真的很開心，最重要是那時候的同事可能工作上不是做得那麼好，但起碼態度上都是有責任的。

阿Tart今朝一返到來就好輕鬆，可能是我在毫無改變的條款下跟他續約，其二是今日呢個日子如果佢都要發癲的話就真係好有問題！對了！我只不過是用了七分鐘的時間和他討論續約的問題。那當然跟他談論之前我已經和寶貝GM研究過！其實一開始已經知道他無意再比額外的Benefit我時，就已經知道不需要再浪費時間去討論了，與其繼續浪費時間兼被他on hold invoice的risk去比較，我寧願乾手淨腳去解決就算，拖泥帶水唔係我做事的style~~起碼日後彼此工作時他應該不會那麼煩… ﹝這只是我一相情願的想法﹞

好趕咁1230就閃，去到青衣大約1330，上咗阿哥車就直接入屯門碼頭，因為我們拜託了黃主任和黃太幫我們買生果籃！之後我們就向天水圍出發！照理上過大禮應該找一些年長的同輩做的，但可惜阿哥得我一個妹，所以呢個責任就落在我身上！

落咗車，阿哥好醒咁拎個車仔比我推D野上樓，嘩！原來都唔少野的，又酒、又果籃、又中西餅，總之就一堆野啦！上到去因為我唔知邊間屋先係未來阿嫂，唯有一出𨋢就大聲說：Aunt，我來啦！哈哈！而Aunt就梗係早早咁開定門比我啦！

入到屋原來未來阿嫂D親戚大部份都係晒度，最搞笑我自我介紹果時話：大家好！恭喜晒，我係我阿哥個妹﹝？？﹞好彩Aunt都好醒咁話我係VVN的未來姑仔！之後各大長輩就好努力咁將我拎上去的野分返另一袋比我當回禮，然後我就用返手推車推返出𨋢口同阿哥佢地回合。哈哈！矛錯！其實阿娘和黃主任他們只不過是在𨋢口等我！不過因為習俗的關係他們不方便入屋。

做完送禮仔就落樓下美心酒樓開飯，好Yeah~今次都算是第一次見到未來阿嫂的舅父和阿姨！感覺都好似好好人，我仲見到未來阿嫂的表姐的媽媽！哈哈！未來阿嫂的表姐和他老公做咗我鄰居，所以有時佢地仲會買雪糕比我食！真開心！

食完個Lunch / Tea，阿哥就車返我們出去，而我就返咗屋企換衫，訓咗一陣就又返入屯門，因為每年最乖都莫過於呢一次的子夜彌撒~~~

>>June 17, 2008 at 7:41:40 AM GMT+8

2007 年 12 月 22 日 星期六 【晴】

今日我返咗入屯門，因為今日是慶祝火星仔2歲生日的生日會，所以我呢個契媽晨咁早就去到﹝其實都好似係下午4點幾了﹞，但去到之後才知道原來個生日會成7點幾先開始，唉！早知就唔咁早去到啦！仲要係佢地不家咁煮野食！好香丫！搞到我鬼咁肚餓。到最後火星仔阿娘終於肯拎包薯片出來，呵呵！而我就好好人咁比咗幾塊火星仔食，見到佢個嘴咬下咬下真係好鬼cute！呵呵！

因為要等齊人的關係，到7點幾先開始，火星仔阿娘去大快活叫咗D到會，咁自己就唔洗整咁多野，而呢個火星仔就最鍾意蝦佢阿媽，一邊食綿花糖一邊食飯，真係激死我！到最後唯有到我出碼抱咗佢坐在一旁乖乖食完飯先玩。最初都好地地，後來佢一見到公公就開始撒嬌要抱訓覺，今次真係難為了公公了！主角訓咗！所以我們的切蛋糕儀式也要順延了，而大家的話題都離不開火星仔另一個契媽譚小姐的終身大事。哈哈！衰D講句，有譚小姐在，我永遠都唔洗擔心呢個話題會放在我身上，呵呵！我真的愛死你丫譚小姐…

唔知過咗幾耐火星仔終於訓醒了，而我們就用呢個速戰速決的做法馬上搬蛋糕 + 唱生日歌！因為果時都已經成10點幾了。至於我就食完蛋糕再坐了一會就撤退，畢業我一走車就會好煩~~~

PS：火星仔又大一歲，要乖乖地咪成日激我地丫！

>>May 22, 2008 at 9:23:16 AM GMT+8

2007 年 12 月 21 日 星期五 【晴】

雖然Graduation camp完咗，但後遺症也隨即送上。就係雙腿由膝蓋以下的地方都腫咗，結果成個星期都要著對波鞋返工。仲要用壓力帶紮著雙腿令佢消腫！所以我決定由即日開始半年內都唔會再行山！

呢個星期有乜搞作，就係要請我寶貝GM食飯，因為我出咗Gratuity，其實一直以來「他」都無放棄過我，也因為有「他」才令我有勇氣一直留在這裡。其實想一想並不是自己沒機會轉返出去，而係我捨不得。因為這裡有我最開心的回憶、有「他」和跟「泉」的擦身而過！哈哈！我會唔會想太多了！

講返呢個星期，星期三除了Lunch跟寶貝GM食飯之外，夜晚仲約咗Rebecca and Kevin，哈哈！真想不到我會跟Rebecca那麼夾，還想不到她其實是2個小女孩的媽媽。其實呢餐飯都無乜特別，不過如果無咗Rebecca在的話，我想我一定沒有什麼話題和Kevin說，畢竟以前我跟他都不會常會閒話家常。

星期四和Bravo的同學仔食飯，而今次的飯局係阿ma’am Kwok約的，成餐飯都莫過於講返Grad. Camp的事，尤其是同阿ma’am講Josephine係因為聽到D野覺得唔舒服而Quit的。之後就講返我地每次都會講的人物 – 大Joseph，哈哈！佢簡直係我地Bravo的經典。

PS：今日係詠詩的生日，生日快樂丫！祝你越來越青春無敵、靚爆全場、仲要搵到份好工同埋個好歸宿！

>>May 22, 2008 at 9:24:45 AM GMT+8

2007 年 12 月 15 日 星期六 【颳風】

晨早7點幾聽到D staff話有morning call，所以我都乖乖咁自己整理一下就等order。始終自1都算醒訓的人，雖然昨晚斷斷續續都訓，但精神比之前好了很多很多了。今日是呢個camp最後一天，完成埋今日的行程我就會是一個半條的P/O。為咗呢半條真係經歷了很多事，但我慶幸有班好同學。

可能因為經過我們集體抗議之後，今天3個Section都有一餐豐富的早餐，就係腸蛋麵。呢一餐都算是我們這3日最豐盛的一餐。食完早餐就正式出發，不過出發前大家可以將其他一些無需要的物資留底，以一個教輕鬆的背包完成埋今日餘下的旅程。而我們Bravo最後只有4個人Quit咗。而其他人和我一樣一起過埋呢一段較為輕鬆的山路，加上我們今日有3個人rejoin我地，所以體力上都算可以互相幫助。

今日的行程是由獅子山郊野公園去到梨木樹那邊，相比昨天的路，今天的路完全對我們是不大問題。而大家都用了一個郊遊的心態去完成，中間還留咗個亭度睇馬騮，哈哈！但行到咁上下我叫停，呵呵！原因是我的膝頭原來已經因為磨損而腫咗，怪不得好似比火燒咁的感覺！而我的包包就梗係放咗比我D好同學啦！睇完馬騮我們就繼續行程，而我就沿路同阿寶一起打打鬧鬧，仲同咗D行山的遊山吹咗一陣水。

唔知係咪因為我地實在行得太慢呢？最後AT派咗阿Jack / 小蜜蜂和Ray哥在中間接我們，其實係迫住我地行！結果我們就一口氣咁直去到終點，那時都已經是4點多的事。那一刻的感覺是 – 終於可以返屋企沖澡！頒發證書、ATOC致詞、各自收拾行裝離開直昇機場已經5點幾了。而今次的3D2N的Graduation camp也正式告一段落。

返到屋企放底晒所有野就第一時間洗白白，那時候才知道自己的背脊起晒敏感！原因很簡單，每日都出汗出到成身濕晒，仲要背著那麼重的包包，氣都疏唔到！之後就乜都唔理上床補眠！反正明天都請咗假！

>>May 16, 2008 at 8:04:37 AM GMT+8

2007 年 12 月 14 日 星期五 【颳風】

做左廿幾年人，通霄讀書、通霄玩樂已不是什麼一回事，但通霄行山又真係做左廿幾年人的第一次，由昨晚11點開始行到第二天的九點幾，都算是我其中一個突破！仲要係著住對接近無鞋底的鞋都算是叫做一個經典和奇蹟。

我們由每個人一支小電筒開始行到第二天天亮熄小電筒，那一刻雖然仍是雄心壯志，但其實每一個人的心也開始會問自己現在自己是做什麼呢？到現在我仍會問自己到底是為了一口氣或是自己真的享受這種團體的生活，事實上我並不是喜歡、但也不是反感！只是有時候想見多D事和認識多D的人，不過是否只能用這個方法呢？這一點我有所保留！阿哥講D野並不是完全錯，也可能因為這個原因我才會去做。最起碼我做過而最後的結果不是那想像的一樣，那時間他就再沒有藉口了。這個也是為什麼我要在這裡『挨』的原因。而入咗OCTC咁耐我又真係認識到一班好伙伴，大家一齊Training、一齊為Passing Out而努力！雖然最後可能各散東西，但彼此也曾一起面對這些經歷。講咗咁多廢話都係時間回正題…

我忘了我們是什麼時間到達另一個check point，我只知我們行了一少段距離時已經躺在路邊休息，對丫！每一個人都背著起碼5-15kg的包包行咗成晚，都咪話唔累！去到西貢report，小蜜蜂同Jess見到我對鞋都問咗一句：「你搞咩丫？」哈哈！我都想知。結果我對鞋就成為了大家觀賞的一個景點！最後佢地商討過後派咗Peter過來同我研究吓究竟我可否繼續行下去。本來他要我去鞋鋪買過對鞋，但之後打電話比阿哥商討過後之後就叫阿娘拎對波鞋比我，因為如果著對新鞋上山仲慘過著對無底鞋行上去，而我就在沙田join佢拎鞋！最搞笑最後Peter都忍不住講咗句：「前世欠咗你倆兄妹！」哈哈！真鍾意呢句話！最後我就先離隊落沙田等阿哥拎對波鞋比我。

由西貢落返沙田都要成個鐘，所以當我去到沙田換咗件Tee之後就收到阿哥電話。連麵包都無時間去買就上咗阿哥車，返去大本營同佢地會合！本來他們叫我1330在馬鞍山郊野公園等他們，不過因為我能在他們出發前會合到，所以我就直接返大本營和他們一齊繼續攀山了。而出發前我只好匆匆忙忙咁食咗幾塊梳打餅就走。

昨天我們由麥理浩徑第三段開始，而今天的旅程比昨天更辛苦，因為我地要行到去差不多獅子山郊野公園那邊！聽起來都會嘩一聲！我地由11點幾出發，去到另一個check point時已經差不多5點半。途中我們都是不斷地休息同休息。而因為我唔係full U的關係，所以當所有人戴晒帽時我仍然都無戴上任何ACC的野，而又也許因為自己太輕浮兼駁嘴，結果比Dickson Sir當聚罵咗獲！果下真係全場靜晒！而我就梗係好唔憤氣啦！不過無辦法！大家食咗個lunch再休息一會就又再出發！

可能因為天黑，而大部份都路都是要攀山的，所以大家的意志都急降，加上又無訓過覺兼好好咁食過一餐，所以大家的心情都已經躁底！當我們去到大老山基維爾童軍營心情已經去到谷底，加上我們休息的地方D風大到好似十號風球咁，所有的意志已經熄滅。結果我們Bravo就有人提議QUIT。而人就係好簡單，當有人提出這個意見時就好容易會和議。這一刻我想起阿榮昨天的話：「希望你們明天這個時候都仍能保持現在這刻的氣勢」最後因為我們差不多成隊人要Quit的關係，令到在基維爾童軍營的Staff都好唔高興，覺得我們好似搞事咁！其實佢地有無想過我們男同女的比例接近1：1，group equipment女仔都要一起幫手去揹，17個人由昨天的十點一起行到今天這一刻，食唔飽、睡不夠！雖然你們曾經說話由基維爾童軍營去燒烤場大約是半小時至一小時的時間，但這是你們認為的時間，實際上我們是否真的只需要用半小時至一小時的時間就能去到今天最後的一個Check-point呢？後來可能因為我們在基維爾童軍營吹風吹得太耐，結果我同Carol都開始有D想嘔的徵兆，最後我同Carol就跟咗小蜜蜂車落山，而其他人就好慘咁在基維爾童軍營繼續面對那些Staff。

雖然落到燒烤場，但我都已經沒胃口去食任何東西。只是躲在camp site內補眠！當然無可能熟睡，但起碼都可以休息一會。而當我躺在營幕裡時就聽到有人在營幕外說：「呢！最旁邊果個咪就係XX個妹lor！」天啊！洗唔洗咁丫！果刻我完全覺得自己入左動物園比人欣賞中。

>>May 16, 2008 at 7:36:43 AM GMT+8

2007 年 12 月 13 日 星期四 【微冷】

上星期好急速咁飛咗轉台灣，而呢3日將會是我人生中另一個第一次！就係行足3D2N的山，係呢3日我將會同Bravo的teammate一起與樹和草玩遊戲﹝其他是它們看著我們被玩多D﹞。而呢3日也將會挑戰大家心、身的情緒和體力。

今日是28th OCTC + 9th RITC Graduation camp的第一天，集合地點：西貢！而阿哥好好人咁車埋我入西貢，雖然背包有我4分之1的重量，但因為背包並不是太適合我的身形，所以背起來都幾吃力！去到西貢同D Teammate一齊互相check下有無missing item，之後就一齊去食返個快飯，然後就搭車上山準備「殘酷一Camp」

一開始大家有個briefing，之後就分隊出發！而其他等待的隊伍就玩《送水》遊戲，至於我就留在下面留守大家的背包，因為我發現我對Boot的底已經開始脫落！天啊！行都未行就已經破。第一關玩完就到第二關，因為上次NJ天雨關係取消了，所以今次Show-no就要補返，最好彩係我前面係Carol、後面係Karen！所以我都好安心去行，仲要係分到咁上下我地3個走在一起，上山上到一半就見到小肥，唉~~~又係玩虫！好彩我都有D心理準備！上到咁上下見到馬路就見到小蜜蜂，結果佢好好人咁比咗支AA超能膠我，因為我對鞋個鞋~Z已經開始無咗上半PART了！之後就CHECK Equipment，然後就全世界向目的地出發！而中間發生咗段小插曲就係大Joseph以腳傷為理由Quit咗！呢個都好！起碼我地大家唔需要再為佢擔心！不過有佢的存在又確實帶咗好多歡樂比我們！

我都忘記了由幾點開始行了，總次最後去到目的地的時候已經係零晨X點的事，大家休息一回就會起Camp site遊戲，而我就好不幸咁爆咗眼鏡，唉！黑仔王！好彩最後Josephine借咗佢副眼鏡比我，如果唔係就真係咁戴CONS。

呢個check-point見到阿榮，打鬧咗幾句！最搞笑係佢見到我對鞋之後佢話未爛晒可以繼續行！哼！行咪行！怕你咩！結果我地由天黑行到天亮！

>>April 29, 2008 at 9:19:30 AM GMT+8

2007 年 12 月 8 日 星期六 【晴】

其實今朝一早起身都無去D咩地方，因為Loading的問題，所以我們會早D去機場Standby下午2點幾果班機！結果check-out完就拖埋個:琤h食阿宗麵線兼買吓D手信，其實今次來台灣都真係無乜手信要買返去！因為而家好多時香港都已經可以買得到了！唔知仲乜呢排的方向感奇差，結果又行咗幾個大圈先搵到間阿宗麵線！但因為我忘了Kinki唔食內臟，所以呢碗野對佢無乜好感！

食完野Hea咗一陣就搭車去火車站，原來去到台北車站都要行一段好遠的距離先去到巴士站，咁當然離不開拖住有返咁上下重量的『阿仔』啦！去到車站附近就已經有的士佬招手，但安全起見就緊係搭返國光巴士啦！

大約一個小時就去到機場，之後去counter做standby！原來昨天金馬獎頒獎典禮，怪不得呢幾日個loading咁full啦！Oh no！登記咗我地就去左食返個靚Lunch，首選burger king，哈哈！雖則香港都可以食，不過在台灣食的感覺係抵D的。除咗食Burger king我地仲叫左個紅燒牛肉麵！食到咁上下就返counter睇下有無位！叮噹！最後都有位比我地上到機，不過就好趕咁跑入閘，因為距離起飛時間只剩下半個小時左右，仲要抵死到差D行錯路入境，哈哈！

因為班機太Full，所以我同Kinki要分開坐，不過成功、平安咁返到來就算啦！反正都只不過是個多個小時的時間。返到香港大約5點幾，之後我地就各自回家，畢竟明天都仲要返工！

以前成日聽D同事講收工飛台灣HEA兩日，今次終於完全體會到呢種感覺！

>>April 29, 2008 at 8:59:14 AM GMT+8

2007 年 12 月 7 日 星期五 【晴】

今天一早起身，係飯台度食咗個小早餐就開始今天的行程，基本上今次的台灣之旅我無咩目標，而Kinki就將會大破財！哈哈！因為佢要掃Game + 漫畫！本來打算去食阿宗麵線！不過因為太早還未開門。所以我們決定轉戰去「鼎泰豐」！其實我之前來台灣都未食過！

打的去到信義路總店果間，最搞笑係司機叔叔記錯街口，結果佢落車問旁邊的小販檔！個姨姨二話不說就叫我們落車，哈哈！因為間野就係在前面幾間鋪的距離！去到好彩咁唔洗等位就入去！我們一口氣叫咗個紅燒牛肉麵、小籠包、炸豬扒和炒菜！正丫！食包包！我地又打的去另一個地方係專買漫畫和Game的！﹝JoeJoe推介﹞但因為果個地方好似難民營咁的樣，所以司機叔叔停咗車我地都仲未知道原來已經到！

可能因為尚早的關係，所以唔係全部鋪頭都開晒！但好彩Kinki最後都買到佢想買的野！臨走前買咗2杯野飲！來到台灣點都要飲返杯珍珠奶茶！之後我地就轉戰101、三越！好彩呢度我尚記得路點走！好正常咁去果度的誠品、之後行吓三越、NEO19！原來NEO19有間Nike shop，所以我地就走咗入去行返個圈，因為根據我上次的經驗台灣會比較多女裝的籃球鞋，而最後我同Kinki都睇中咗一對MJ的籃球鞋，不過因為我家已經有2對，所以我就叫Kinki買咗佢！哈哈！﹝後來發現原來泉都買咗呢對波鞋丫！﹞仲同個sales好好傾，佢問我地係咪學生，我就應佢係，結果佢介紹咗好多地方叫我地去行吓！哈哈！臨走前佢仲送咗2支Nike原子筆比我地！好搞笑！期間Kinki話我仲乜點人話我地係學生，而又根據我的經驗講自己係學生通常都會有SO D！因為果D人會因應你係咩身份而介紹D乜野比你！至於小禮物就係提外話啦！哈哈！我係咪好醒呢！行完Nike我就去咗上一層食火鍋！本來打算返西門町先食，但因為考慮過食完又去士林的話就會食唔落，加上呢間野Celis推介過，所以就去試吓！不過都唔平！around HKD100/head。但就真係好好味！

食完野我地仍在呢區度逛！到咁上下就返飯店放底D野就再去士林夜市！去到士林食咗蚵仔煎、士多啤梨、飲苦瓜汁和燉排骨！途中我買咗2盒黑糖餅！可能因為我地都算晏食野，所以都唔係食咗好多野，行到差不多凌晨一點我地就打的返飯店了！

>>April 29, 2008 at 8:40:05 AM GMT+8

2007 年 12 月 6 日 星期四 【晴】

想一想我今年都算飛得幾多，3月去美國、10月去日本、12月去台灣！哈哈！以前在公司都未飛過咁多！反而身份唔同就飛得咁爽！其實最主要的原因是找到個伴而已！

好匆匆忙忙咁出機票、訂酒店、研究行程﹝其實最後係無plan過﹞，因為唔想請多日假，所以決定收工先飛！本來我地打算飛1810果班機！點知去到counter佢唔肯幫我地做，仲要我地搭遲一班機！天啊！下一班機2055先起飛，結果我同Kinki就馬上打電話返公司求救！不過最後我地都係被迫咁搭咗下一班。唉！Counter D人唔係做唔到！係佢地唔肯做！火都起！結果我地決定返公司HEA到咁上下先再返機場入閘。

因為果時都8點幾，所以上機前買咗個外賣先上機！休息咗一回就到台灣了！出咗機場就去住國光號出返台北市，然後再轉捷運去飯店！不過最後我行錯路搞到行咗個超級大圈先去到成都大飯店！唉！真無奈！本來打算打的去士林，但問過COUNTER的人佢地話而家12點幾去到都可能已經收晒！所以最後在附近的店舖食完野就返去訓覺。

可惡！如果搭到之前果班機的話去到就可以去士林了。

>>April 28, 2008 at 8:42:59 AM GMT+8