2008 年 7 月 11 日 星期五 【溫暖】

今日的心情有點兒反覆，因為今天是我最後一次以【家人】的身份被JAZZ載到我想去的地方、因為今天過後JAZZ再不會屬於我們了！我明白阿哥為什麼要放棄JAZZ，也很明白阿哥的感受，可是當真真正正看到司機位是另外一個人的時候，那一刻真的想衝過去把他從你身上拉出來！

因為陳守仁今天不外借，所以我們就去了將軍澳培智學校返Meeting！都係果句，有得揀都唔會來呢度。最後一次出車，就算遲到我都是選擇跟車返去！因為阿娘要我拎湯出去比阿哥，所以阿哥就去青衣站接我。短短半個鐘的車程同阿哥傾咗為何要放棄JAZZ！畢竟它跟我們都已經相處了五年了，所有的風吹雨打都一起經歷過，甚至在公路上爆呔都試過。阿哥同穎風一樣都是愛車之人，所以JAZZ的保養和維修都是返原廠度做，絕不馬夫！

當JAZZ去到培智，停定之後…那一刻真的不想下車，可惜有個CPL已經乖乖地站在我面前歡迎我，我不得不下車回禮！唉！落咗車就上班房，見到King SIR和新丁爸爸很努力地改券中，咁我就好體貼地拎日本買返來的手信比他們享用。吹咗一陣水就做返我呢個閒人的角色，映吓2/3 FLT CDD的情況。

本來安排了新丁爸爸上Hiking，結果轉了做PT…OH NO！那月尾新丁爸爸飛咗BJS果個星期時，我同班RC做什麼？當班RC做完PT之後，就將他們交比本SQN最偉大的「鬼見仇」SWO﹝哈哈！就係本家阿哥﹞同RC來返個操兵訓練！都唔知係阿哥收咗火定係點，King SIR、新丁爸爸、Roy、Kelly和我都滿懷希望咁聽吓SWO點鬧人，可惜身在1/F的我們居然什麼都聽不到，結果Roy同Kelly都忍不住走落去八吓咩情況！

根據新丁爸爸的話：SWO在場，果然不同！因為聽聞上星期班RC的Drill好似都是不知所謂的。完咗今天的Meeting就搵咗新丁爸爸幫我同JAZZ映返D相，之後趁矛乜人就偷偷在架車內換返件TEE！然後就出去附近的茶餐廳食TEA，而阿哥就交車比人！嗚！唔開心丫！

食完TEA就去尖沙咀買禮物比人做生日禮物，老老實實，識佢咁多年都真係好似無送過生日禮物比佢！而新丁爸爸話佢都想行街就陪我一齊去尖沙咀。因為之前已經在Agnes B睇中咗部相機，以為係玩一次就玩完，原來是入傳統菲林的相機！都OK喎！可能貴咗少少，不過有D野唔係用錢去衡量的！

任務完成，就同新丁爸爸行去City Super搞搞陣，而我就好無品咁送咗個袋比佢拎，呵呵！因為今日個袋都唔知仲乜鬼咁重‧雖則新丁爸爸個袋都好似唔輕…之後經過CD店，就走咗入去睇咗一陣碟，可惜矛乜心水！搞怪完之後就在Food Court食野，哈哈！明明之前食咗個Tea，但都係唔夠飽咁！結果又強迫新丁爸爸同我share咗個Dinner，不過我又好無品咁搶咗個烏冬迫佢要食飯‧不過佢咁的size都唔洗怕肥啦！呵呵！其實如果唔係因為新丁爸爸跟著來，我想我買完東西後又會跑到停車場發呆 + 胡思亂想 + 靜靜的哭一場吧！

食完飯都成10點幾，所以就打道回府…返到屋企整埋D野都成兩點幾先訓。

>>July 14, 2008 at 1:57:19 PM GMT+8

2008 年 7 月 7 日 星期一 【綿綿細雨】

昨天睇都市日報，其中一篇的內容大約是話現在的學生因為壓力太大導致會情緒出現問題，而來源是來學業、家庭或經濟三方面，當遇到情緒的問題是大部份的人會選擇用睡覺的方式的逃避﹝佔73.6%﹞，打機及不理會各佔51.8%，會主動尋求幫助有12.9%！而根據專家的分析，青年人缺乏支援，會把情緒的問題帶進成人階段，引發更多的社會問題…

看完之後我想一想，我是從什麼時候開始覺得每天要睡15個小時才足夠？我想15個小時這個標準應該是在7年前訂下來的，但愛睡覺這個問題應該是在更早的時候就已經發生。不管是以前或是現在，每天要面對的事情越來越多，有很多東西自己很想做得好，可是最後也會因其他的因素而達不到自己心中想要的結果！唯一可以肯定的，現在的我已經不能用睡覺這個方法去逃了，我想是因為周公子已經覺得我煩、覺得我悶、覺得我厭了，所以他開始離我而去吧！再說，我的累是身體的累或是心靈的累？這個問題…只我自己最清楚…﹝胃痛中…>.<﹞

對於每個我所有認識的人，我都會界定他們是某一個身份，而這個身份會因時間、相處而有所轉變！記得穎風說過：「這世界上有很多笨蛋，別人對他好，他反而會害怕。﹝問：怕什麼？﹞ 怕如果有一天你不再對他好了，他就會非常非常的難過，所以他就會故意說，我不想跟你作朋友…」 對丫！也許因為我很在乎我身邊每一個朋友，所以當他們作出一些我認為受傷的事，自我保護系統會馬上啟動，從而逃回屬於自己的世界。是不是因為人越大，承擔的東西也越來越多！雖然馬爺也說：「人生跟下棋一樣，不走到最後，是永遠不會知道結局的」 可是有多少的人有勇氣一個人走下去？而在盡頭還有人在等著我嗎？

什麼時候當我想好好去保護我身邊的人時，原來是自己不知不覺在傷害著關心自己的人！或許我就像穎風說的一樣吧…傷得太多總會很容易就害怕！寶貝GM常跟我說：「想哭的時候就要狠狠的哭出來，那有人像你這樣的笨總把眼淚收回去。」 話是說得沒錯，可是我就是不想流眼淚…就正如我之前所講的一樣，已經哭夠、哭煩、哭厭了！再說... 說完又沒辦法解決問題的！

每天都要自己早點睡覺，可是每天都弄到自己要挎下來才去睡！到底昔日瀟灑和帥氣的我躲到那裡？

今日收到個消息，雖然之前曾經聽過他們就有這個計劃，但想不到當差不多遺忘的時候突然告訴我一切已成事實。那一刻好像把所有不好的事情都湧晒出來，是在考驗我的應變能力或是考驗我可以承受多少？

事實就是這樣，即使世界將我們遺忘，我們確實不能在一起。不論是今天的消息，還有已離開了我們年多的「您」。其實到現在每次我到「您」家的時候，我仍然會覺得第一個迎接我的是「您」。當天「您」突然的離開，完全沒有給我再一次抱「您」的機會！到最後「您」還是從我的身邊走了，雖然那一天的我完全覺得把自己所有的眼淚收回去，我不要「您」看到我哭的樣子、也不要其他人看到我流的眼淚...

>>July 9, 2008 at 2:58:57 AM GMT+8

2008 年 7 月 5 日 星期六 【颱風】

離開過後終要回來面對…有些事情可以去選擇，可是也有另外的事情選擇了你，就算你用了一輩子的時間也沒有辦法去逃避！除非你選擇離開…但其實自己也很清楚，如果真的要走到這一步的時候，是不是真的可以什麼也不管就離開呢？

今天又有人問了我一個問題：「你最近一次好開心咁笑係幾時既事？」對丫！為什麼我想不到是何時呢？是在日本的時候嗎？好像不是！但如果問我最近一次想喊係幾時的事？這個問題我看比較容易回答！

>>July 6, 2008 at 5:34:35 PM GMT+8

2008 年 7 月 4 日 星期五 【酷熱】

今日會坐6點幾機返HK，所以我們仲有半天在新宿進行最後破產之旅。照樣係酒店食早餐，今次我地過咗新館那邊食，都係Buffer Breakfast，不過感覺上矛之前在25/F果度咁好，但都唔錯，我都幾鍾意食佢地D粥，可能是因為D米好味都關係…呵呵！

食完野就出發去高島屋那邊的Disney store再幫人買多支360度轉頭的臭迪筆 + 臭迪公仔，之後就再去埋Tokyo Hands買上次睇中咗的A5 File，不過今次黑色剩返一個，無咗個深藍色。同事要咗個黑色，而我就揀咗剩吓的白色…最初打算買多個返來送比YY，不過矛理由揀個紅色比佢！怪怪咁！買完野見仲有時間就再行多轉Yodobashi Camera，同事最後都買咗架車同Honda車廠，而我最後最後都無矛買到果2盒法拉利Lego，一來買咗唔知放係邊、二來買咗都唔會開出來砌咗佢，同埋我最想買果副Lego係米高舒麥加果副…唉~~~看來這次的破產之旅我的目標完全達不到。

買完玩具就去Supermarket行咗轉，買咗2盒蕃茄仔返HK。之後就返酒店將手上的野塞埋入阿仔度就出發去JR站坐AE去機場，都唔明點解明明今次唔係買咗咁多野，但阿仔都好似唔輕咁，不過同事仲慘，因為佢除咗要拖住佢個仔，仲加多三大袋野。好順利咁終於去到JR站，好彩唔洗點搬搬台台，因為比原定時間早咗半個鐘，所以我們就在新宿的JR站休息一會，而我就梗係走咗去便利店買返支野飲先…HEA咗一陣就去月台等車，而月台的哥哥不停咁趕我去車後面，都唔明點解。結果好懶咁行咗幾步佢都好無奈咁唔再理我地，但後來車來到再知道原來月台哥哥成日趕我地去後面是因為架車唔係停在月台的最前，而係停在車中間…不過唔緊要，總之上到車就OK！呵呵！

係車上開咗昨天買的蕃茄仔食住先，之後映吓相、吹下水咁又過咗成個鐘到機場…原來JL唔同CX入去Counter之前會scan Baggage，所以較平時快很多！做左Check-in，之後就梗係去去閞飯啦！同事想食飯，但我想食烏冬，結果我地揀咗food court昨為我地今次旅程的Lunch…而在日本是是旦旦搵間食烏冬的餐廳都已經好好味，同HK果D真係矛得比！而呢度的Food court仲有樣得意的野就係你落咗order之後佢會比部機仔你，之後就可以返位度等。當食物準備好的時候，部機仔會又震又響，真係方便到震 – 100分！

食完個Lunch就入禁區，順便睇吓仲有無D乜要買，無意中比我見到阿哥好鍾意食果隻提子糖，貴就貴D…不過最後都係買左最後果2樽比佢，仲有買多咗盒叮噹罐的菓子比「別人的女朋友的細路」！然後就排隊等上機，唔經唔覺都排左好耐先入到機。而今次我坐路口位，但唔知點解覺得呢程機好似坐咗好耐咁…在機上我叫了一杯梅酒，哈哈！難得今次同事無阻止我飲酒。酒我並不是不飲，只不過現在的我飲少少塊面都會紅得好過份，所以在外我寧願被人笑我不懂得飲好過飲完之後失態！想一想我唯一一次飲到半醉的事是18歲在崑崙返工果次，不過果次自己知道開始醉，但仍可以平安地由荃灣過到柴灣阿姨的屋企，勁！呢杯梅酒都幾好味，入口時梅的味道首先走出來，之後才到酒精的味道，但再細味一下會有種甜甜地的味道在口中，感覺唔錯！最搞笑飲完之後同事話我好似化咗妝咁的樣，哈哈！放心！一杯的梅酒我才不會那麼容易就醉…

平安抵港，可能同一時間幾班機一齊Landing，結果連E道都排長龍！出到去都要等咗10分鐘先見到阿仔出來，雙手將它抽起放底時才發現阿仔無咗個【LOOK】，仲要係放底果下差D搞到我PK！本來打算出左出去返JAL court問，但又怕出咗去佢地唔認數，結果打電話比老黎，佢話Baggage附近一定會有航空公司的人企係度做backup。好彩最後都比我搵到佢，而果個職員都懶得聽我講就同我登記咗先，之後佢話會有人來我家收返個:痚絢𡞲蛂I

然後就飛快咁閃人，因為要追尾班車返屋企！返到屋企第一件事就梗係洗白白，然後拎晒D野出來分裝，好彩聽日係星期日唔洗返工！所以搞到兩點幾都唔怕第二日唔知醒，呵呵！

回顧今次的日本之旅，簡單上來說我最想買的銀包、玩具和錶一樣都買唔到，唉！不過今年已經飛日本第三次的我其實又真係無乜特別的東西想買，加上日元咁貴！就算我想買果D都已經買不起了，但無論點都好，離開一下都好！雖然今次的旅行我唔覺得自己有放鬆過D乜，但起碼離開一下、靜一下都唔錯！

PS：有人說我一年飛三次日本很過份，但我想話比大家知道我有朋友一年飛12次日本都係咁！

2008 年 7 月 3 日 星期四 【酷熱】

因為有人昨晚一個小小的玩笑，搞到我成晚都訓得唔好！﹝仲連帶埋同事都無覺好訓，因為我打字的聲音吵著她﹞對上呢種害怕的感覺是發夢見到GM不要我，還叫我以後都唔會搵佢，那次真係成個人醒晒，應該係話喊醒晒。想不到我還會因為一個小小的玩笑令到自己咁樣，看來以後出Trip都是要避免開電腦，根本就沒有好好的讓自己靜一下…

回正題~~~

同昨天一樣八點多起床，之後去咗另一間和食的餐廳食我們今日的早餐。日本人的和食早餐可以揀粥或飯，配埋煎三文魚 + 麵豉湯之類的野，不過因為今天我們會過築地市場食壽司，所以都係唔好食咁飽了…住新宿的好處就係唔洗點轉車，好多時都係一程JR就搞掂。

去到築地市場就唔再好次上次咁排隊食旅遊書介紹的店舖，反而去返第一次同同事食的壽司店。起碼呢度唔洗食SET兼自己想食乜就食乜…唔洗問一開始就梗係點三文魚、海膽、帶子、牡丹蝦，之後見到有蟹膏壽司就再點埋兼且叫多個和牛壽司！不過可能師傅忘了我們點了和牛壽司，所以等了很久都沒來，幸好最後佢都記得比少咗野我地！而我地就好興奮咁一啖放咗入口而忘記映相，呵呵！食飽飽就在魚市場行咗一陣，去返阿娘好鍾意食魚仔果間店舖一口氣就買咗十包，勁！之後就去上野，本來想開Locker放底D野，但Full晒…唯有辛苦D揹住去買零食。可能今日是平日，好難得上野無水洩不通的情況，照舊去咗間玩具店睇完玩具之後先去菓子店買零食，不過今次無乜特別的零食想買，結果是是旦旦咁亂執了一大袋就打道回酒店…臨走之前又經過Yodobashi camera，所以又走咗入去搵吓同事想搵的Game，點知今次真係比佢搵到，看來她這次的shopping trip應該可以完成目標…

因為成身汗，所以返到酒店沖咗個澡先再出發返新宿的Yodobashi camera睇吓有無我想買果隻錶，結果都比我搵到，不過同事話型就真係好鬼型，但跌的機會率都好鬼高，同埋Function又唔係話咁多…所以最後都係矛買到，唉！乜Mood都無晒…之後就去新宿太子酒店上面有¥100店睇吓有無D乜野執都好。而買完野好多鋪頭都收工，所以我地就去咗昨天食不到的SA-BU SA-BU店食返餐先…

上到門口個哥哥話Non smoking area要等一個hour，如果Smoking area就可以馬上入，為免waste time，結果我地揀咗smoking area…坐定定之後發現呢間野同上次我們在台灣食果間的style好似，我地叫咗個醬汁 + 豬骨湯底！當所有野放晒係枱時我地倆個都話完全係台灣果間野，不過價錢就差很多了…醬汁那邊比較咸，而豬骨那邊就好好味，所以我們大部份的時間都係食豬骨湯底那邊，而牛肉同豬肉都係非常之好味，最後我地食咗4盤牛肉、2盤豬肉，不過大家唔洗咁驚訝！因為一盤牛肉和豬肉都係得幾塊，仲要切到好薄果隻…好快咁就過咗90分鐘，之後結帳回酒店…而返酒店之前去超級市場行咗個圈買咗盒蕃茄仔。

上房前再去Family Mart度買多幾包零食，因為上次在日本買咗D薯片好好味的…返到房就梗係拎晒D野出來Show Off兼映相啦！之後就洗白白，然後上網check吓email…而同事就終於忍無可忍叫我有乜email就好快D reply晒，哈哈！

Check email才知道13號的BBQ撞正Drill training，新丁爸爸問取消好唔好，但之前已經reschedule過，如果cancel對班RC唔係咁好。為免今晚又令到同事無得訓，唯有叫Phoebe calls 新丁爸爸叫佢返到屋企好馬上上網，幸好都唔係等咗好耐。同佢傾咗一陣都係決定keep going，因為第一次搞就取消會令RC好失望，再問埋聽日家長日D野就放新丁爸爸去訓覺，而我都好快咁整埋D野就訓了…

對於呢個新丁爸爸，我都不知道應該用什麼身份、什麼心情和什麼的態度去面對他，無疑Operation EXP佢一定多我很多，但Manage方面好似弱咗D。可能真的像阿哥說的一樣，這就是一個Officer和一個NCOIC的分別，如果兩者都做得不好的話，會令到幫你做野的人很混亂~~~又或許是我理的東西太多了，一開始就不應該管那麼多…

2008 年 7 月 2 日 星期三 【酷熱】

因為同事忘了日本時間快香港一個鐘，所以教錯鬧鐘，幸好最後佢無端端自己起身，如果唔係我都唔知我地兩個會直訓到幾點了。用最快的速度梳洗之後就直上25樓食Buffet Breakfast，其實今次個package咁貴的原因都包括埋酒店provide的早餐…

基本上款式唔會話太多，都係蛋、沙律、火腿、豬肉燒賣、麵豉湯、麵包等東西，不過可能個肚都係唔舒服，所以我都係揀返D清淡D的野食‧從25樓望出去是日本什麼政府大樓之類的高樓大廈，好似Lego玩具咁！食飽飽就正式今日的破產之旅。

首先我們 去了新宿高島屋的Tokyo Hands行咗個圈，見到有個A5 Size的Flip File好靚，不過最後因為懶得拎所以矛買到，之後經過Levis見到有sales就入去又行咗個圈！睇中咗件Tee不過out of sales，所以對返HKD成700幾蚊件，不得不放棄啦！之後就行咗去伊勢丹睇吓Agnes B 和 Burberry有無Sales，但仍然都是我睇中咗的都係不在減價範圍裡，佢減價果D款唔係好師奶就係唔岩我Style，唉！完全無奈…

睇到差不多一點就搭JR去池袋，首先去無敵家食返個靚Lunch，幸好我們早到，因為隔咗一陣就出現人龍。無敵家的拉麵湯底比較濃、而D麵又粗又大碗、D叉燒又厚，所以我食到一半都已經投降了，加上一開Ball我就好狼死咁不停飲湯，飽晒…

食完拉麵見到對面有間¥100店，入去買咗D零食，之後見到Adidias有Sales，唔洗問就梗係走入去啦！最後買咗件金色星星的Tee，呵呵！型丫！而同事都買咗2件Tee比佢男朋友同自己。買完Tee就直去Sunshine City的Disney store，找不到上次來東京買的彈身史迪仔筆，反而有新的360度轉頭的臭迪筆，而同事有discount，所以就掃咗D貨做手信！然後行過隔離的龍貓Shop睇吓有乜新野，不過最後都係無收獲‧可能近來來日本真的密咗D！呵呵！行完之後我記得上次呢度有間在上次在美國整熊仔的Build a bear shop，最後見到同事整我又忍不住再整多隻，只不過今次我入綿花的情況比上次更加多多多，哈哈！想起阿泉上次在台灣整Bear Bear時佢都係不停咁塞綿花入去，話Bear Bear要同佢一樣有Muscle！Low B…同事整咗隻柔道熊仔，而我的款式同上次在美國整果隻一模一樣，都係空軍制服。整完都成6點幾，之後行埋池袋的0101和Parco，因為同事想買HEM袋，最後仲比佢買到剩返一個的粉紅色袋，我都睇中咗個，唉！Out of SALES again~~~

買埋袋就返新宿再搵吓書上介紹的火鍋店，在火車站問人間火鍋店係邊，果間野在太子大廈7/F，不過D日本人就叫咗我地去太子酒店，正當放棄唔再搵間火鍋店的時候我唔覺意咁台頭見到上面有間有個:捰r的餐廳，叫同事望一望就話搵咗咁耐咪就係呢間野…結果就走上去，但因為離Last call時間只有1個鐘頭，所以門口的哥哥唔比我地入去，呢D就係日本人的執著。好無奈咁走，而走之前有個哥哥比咗張Card片我地，上面寫著如果我們下次惠顧會有9折。最後我們去咗上次Winnie介紹的咖啡屋食咖哩飯，我仍然都係點咖哩豬扒飯、而同事都是點咖哩漢堡扒飯！今次見到呢間CoCo屋有一包包的咖哩，結果我買左1盒6包的Gift Set，今次應該唔會在香港都有得賣卦。

食飽飽差不多10點就返酒店，之後洗白白，然後整理埋吓今日買的野，點知比我發現原來買咖哩的Gift Set比分開一盒盒買更貴，而它貴的地方居然是在個禮品盒度，唔開心丫！以為個包裝靚D就可以咁，可惡~~

之後上網check吓email玩吓MSN，雖然拎部notebook好辛苦，但又真係好鬼方便。之後在MSN收到個消息！我只能說每個人都有保護自己秘密的權利，我不知道【妳】的話什麼時候是真、什麼時候是假！可是有些事情是絕不可以隨隨便便的說，尤其是自己的身體！我不怕【妳】直接跟我說事實，但我怕【妳】耍了我一個圈才說事實，這是絕不可以亂開玩笑的，因為我真的會怕，還是【妳】希望把我的害怕建築於【妳】快樂的身上是很開心的事？再說，如果一句對不起就可以解決所有的事，那要警察來做什麼？

到底是不是我太執著、太認真？到底是不是我不應該在乎任何的事、任何的人？

2008 年 7 月 1 日 星期二 【晴】

本帥哥現在身處日本的東京，哈哈！矛錯…我又飛咗啦！不過今次是自己full fare package，所以都幾心痛！因為都唔平的，加上日元的匯率又唔底，雖則撞正大減價，但都要慳D洗！加上最大的原因係想自己好好咁靜一靜！或許有些事情是避免不了，可是現在的我確是想逃避一下‧

可惜旅程開始前就有些阻滯，一來自己腸胃炎發作，個肚成日痛，完全係郁都唔想郁、二來第一次搭JAL就遇到Delay、三來搭AE出Town居然早咗一個站落車，搞到要行去第二度搭返JR去新宿，好辛苦咁終於搵到間酒店，仲要係遇到一個好好人的香港姐姐專登走過來指比我地睇間酒店係邊，呢間野的招牌拍得住台灣間成都，行過都睇佢唔到！結果咁搞一搞成7點半先在酒店Settle down晒D野。

之後就出去新宿附近行吓仍未關門的鋪頭，本來想搵昨天在旅遊書上介紹的Sabu-Sabu店，不過搵咗好耐都唔知係邊，最後發現到我第一次在池袋食果間「天狗居酒屋」，所以就上咗去果度食！而呢間居酒屋最好一樣野就係有non-smoking area！GOOD~~~同上次一樣，我地又係一開口就點咗6樣野食，哈哈！有餃子、牛肉、喬麥麵、壽司、豆腐和蜆，Very 爽！

好快咁樣KO完我們的晚餐就在附近Window shop咗一陣，之後就經過藥房買咗支綠茶就返酒店，上網check吓D email就訓了！

PS：本帥哥今次好勇咁拎埋部Notebook出Town，哈哈！係咪好Professional呢？矛辦法啦！因為如果在呢間Hotel用佢的PC上網要比¥¥的，如果係咁我寧願自己辛苦D好過！

2008 年 6 月 28 日 星期六 【晴】

為什麼又是這樣？為什麼每次我決定了的事你們永遠都要我去放棄？每次都叫我不要再繼續下去？為什麼你們總是要這樣？你們一開始的時候不是在支持我嗎？但每一次、每一次、每一次都是這樣！從以前在公司到現在的ACC，我已經很努力去找一個讓自己接受的理由，我已經很努力去讓自己投入做好每一件事情，就算自己有多不喜歡也好、有多累也好、有多討厭也好，我也很努力的完成自己應該有的責任，可是你們總是在我說服了自己的時候叫我離開、叫我放棄，你們到底想怎樣？

是不是每一次都要把我迫到一個沒感情、沒想法、沒自由的人一樣，你們說我該去做一我不可以做二，想也不可以，是不是要這樣我才可以平平靜靜的去過我日子，是不是？我不想再為這些事情而哭，我不想再為了這些東西流眼淚，我已經哭煩、哭夠、哭累了！

有些事情做得越多，效果反而會越差！分開了就是分開了，有多少的人可以像Nicolas的父母一樣和諧相處？有多少人可以忍受到這種生活？如果我有得揀，我一定不會再留在這裡！

>>June 30, 2008 at 3:45:48 PM GMT+8

2008 年 6 月 27 日 星期五 【溫暖】

同我之前想像一樣，成晚都矛訓過！一來是公司有D野未搞掂、二來是個枕頭太高了﹝搞到條頸好痛﹞、三來是本身自己是一個醒訓的人﹝尤其是在陌生的地方﹞！所以雖然偉大的OIC確保了我可以訓足15個鐘…不過…唉！算了！都係乖乖起身好過，因為如果咁的情況下賴床一定又會頭痛的。

Roll call time – 0715，之後就Barrack check﹝好似軍訓果D去檢查你的營 / Equipment / 制服等的東東，那一刻慶幸自己果時在AT不用這些訓練，呵呵！﹞聽佢地講Barrack check起碼都要睇幾轉，所以Officer就可以唔洗咁早出動！今次個camp total有三十幾個cadet！分咗三間房，而我就有跟埋他們一齊出去搞事，順便睇吓會唔會映到D搞笑的野！雖然之前NCO已經Check過幾次，但最後我們at least都re-check左2次先免強收得工。但想一想其實班細路都好辛苦，因為他們起身的時間一定比我們早的！

做完Barrack check + 食早餐就做open formation，不過做open formation之前Jason殺咗入來，仲要係好無奈咁佢企正我地staff room的門外，結果一開門就暴晒光！D野亂都不在話下，最主要的原因都係為什麼Staff room是男女同房。其實有幾個原因，一來大家要discussion會比較方便、二來如果staff夾埋班細路一齊訓D床位安排又有難度、三就梗係我地將D野亂放都唔會比班細路知！哈哈！不過既然都比Jason發現咗，都廢事理佢！唯有下次在arrangement上再研究得仔細D…

今朝的Open formation會包埋升Colour，around 30-40分鐘左右就完成，而我的責任就梗係做吓呢個攝影師，映吓D衰野！不過可能全世界都未訓醒，所以Performance就真係有點慢3拍的感覺，而我就好努力咁不停搵D野搞吓令自己唔好發呆！

做完Open formation就同Jason映埋張group photo就開始CDD，但未開始之前NCO就罵吓人，免得班細路係度遊雲！而我就映咗一陣相，同OIC交待咗一句就自己閃咗去沙灘靜一靜，哈哈！我想成個camp我都是佢最無奈和最矛辦法的一個。

因為呢幾日都落雨，今朝仲有雷暴！所以成個沙灘都是濕漉漉的，而因為尚算早的關係，成個沙灘除咗救生員之外就是我，搵咗個位坐一陣﹝濕都唔理﹞！那一些片段一下子湧晒出來，而這一刻想起佑爸說的話：「人真奇怪？想忘掉心事，就跑來看海；飄在海上，卻反而老是朝著有心事的方向航行！」怪不得人總是說要忘記比喜歡更難！為免令自己再胡思亂想，就起身周圍映吓相！之後聽到有行雷聲和一大舊黑雲向這方向飄緊過來，就行返上camp site！

後來收到消息有個細路個心唔舒服，研究了一會就通知家長，可惜最初找不到！到聯絡到的時候才知道家長在深圳，結果就Call白車送去長州醫院！那時已經是Lunch time之後，YY和Sam負責陪個細路。而OIC和我就馬上去碼頭接另一個細路女！天氣又焗又無風，臨返Camp site前去買咗罐寶礦力保吓先，因為咁樣一來一回我件Tee已經濕晒了！我完全覺得出的汗可以等於一罐的寶礦力。而沿路OIC就要report比OC入院的細路的事情，因為當他們去到長州醫院不久就已經要call直昇機送去東區尤德醫院做檢查，畢竟長州醫院沒有檢查心臟的設備，所以最後由YY負責跟Heli出去。

湊咗個細路女返到Camp site就交咗比NCO，而OIC就借咗件Sqn Tee比我，嘻嘻！這個時候就梗係馬上洗返個白白先，個身實在又臭又【痴立立】，然後我地兩個就乘機偷懶留在Barrack休息兼吹水！直到差不多5點左右就準備降旗和Dinner的事，本來今晚是安排了BBQ的，不過天公不造美，加上果度D燒烤爐生晒誘咁，所以通知營的負責人請他們幫手把燒烤食物煮熟佢。而我們就落去睇吓班細路操成點！因為King SIR和Derek都已經入咗來了，也幫我們用200蚊左右的價錢買了20多個白飯，原因是camp site的廚房沒有為我們準備白飯！真無奈~~

落到去完全有驚喜，因為他們今朝連普通操搶的不是太好，到現在居然可以有少少花式的效果，看來這個camp的mission可以完成！OIC應該老懷安慰了。

而因為我部電話借咗比YY的關係，所以我就要等到YY回來才出camp返屋企。如果等得太夜就會留多日，幸好最後YY大約7點半左右就返到來，加上陳SIR和Winnie又入埋來，哈哈！1-4 flight的OIC齊晒人丫！大家講咗一陣今日發生的事，而我就同Winnie聊咗一陣天，到2030就閃，因為我要搭2100的快船回家。呵呵！而各位officers就開始練Sword Drill，本來OIC叫我下午班細路練緊CDD時一齊練吓Sword Drill，不過不愛Drill的我、怕Drill的我、為免比OIC捉到我話柄的我就梗係say NO~~呵呵！好醒丫！

呢個OIC都算唔話得，陪埋我行去碼頭，不過有人就好黑人僧咁夜麻麻點條錯路我行囉，真係好想一腳就踢佢落海！如果日光日白我一定唔會比佢點的。

今次的長州之行本來想自己早D出Camp，行吓附近的環境！因為對上去長州都已經係N年前的事，但因為有D突發的事件所以我留在camp site，或許下次天氣好一點走入來行吓都好！

大約半個鐘就出到中環，之後就再等2200的船返屋企！為免自己會訓著所以不停在碼頭附近行來行去，行到差不多夠鐘先入閘！返到屋企阿娘第一句就問我：「仲以為你會留多日」我才不要，一來矛衫換、二來呢個星期已經嚴重的睡眠不足，點都要回家好好咁洗返個白白和睡返個靚覺！不過最後搞埋D野都到成兩點幾先去搵周公子。成個膊頭和腰都好似唔係自己咁的感覺~~~

>>June 29, 2008 at 4:46:40 PM GMT+8

2008 年 6 月 26 日 星期四 【乍寒還暖】

阿TART呢兩日又唔係公司，結果D野又on hold！下個星期一會launch新的network / system，唉！Follow晒instruction最後preview都係乜都睇唔到，看來這個Project又係危險！

本來打算昨天會好早就去搵周公子，畢竟之前那天只在公司睡了半個鐘，不過因為今晚要入camp，所以at least都要搵左D 野出來放晒係張床度先，最多放左工乜都唔理就返屋企先Pack野，順便洗埋白白！但今日Lunch約左OPS-Shirley開飯，所以就算幾累都要出去！順便去銀行換錢，不過唔知係唔係因為星期五的關係，銀行超級的多人，搞到我等咗成45分鐘！好匆忙咁去join返Shirley和JoeJoe佢地，本來打算唔食！不過JoeJoe佢地話唔好，結果要我食咗碗米粉！

返到公司以為可以好HEA咁等收工，點知Check到有野要做！結果就忙足成個下午，仲要成5點左右先收到老闆email話佢下星期放兩日假！果吓真係火都起，下星期launch新的network / system你先放假，都唔知係咪玩野！仲要佢唔係講到放假，只係話佢自己out of office！頂！想點丫？

但因為今日要返屋企拎包包入camp，所以最後都係決定乜都唔理準時收工閃人，反正星期一係唔係都會爆穫！返到屋企馬上洗白白、之後pack野入包包，然後搭船去中環碼頭！途中食咗Panadol打底，因為有D頭痛！

我們今日搭2030的船入長州，因為我得一件Blue polo，所以我就著左Corp tee！哈哈！扮細路，結果Elva見到就借咗佢件Blue polo tee比我！上船前同Kinki講咗一輪電話，咁岩見到傳說中的Jason，我地SQN的第2大人物！不過我果時都仲未知佢係乜水！

2030係慢船，起碼要45分鐘！不過近來天氣不是太好，而間船又矛冷氣！有點焗的感覺。係船度KO埋我份晚餐，之前拜託了「新丁的爸爸」幫我買吉野家牛肉飯，不過始終矛乜胃口只係KO左半個！而成程船我地幾個Staff就開左個briefing研究吓呢3D2N的arrangement！而在差不多上船前我被迫要同佢地映相，結果我唯有躲在班小朋友中！而家D NCO真係好鬼惡！人家一個病態仲要迫我。

由長州碼頭行去Camp Site around 10-15分鐘，不過帶頭的NCO揀左條山路，仲要行得好快，結果一開Ball就好似要勞役他們的感覺！而藥力發作，我都怕自己頂不住，因為真係太焗了！好似連新鮮空氣都沒有。

做Officer有做Officer的好處就係去到之後可以上Barrack安置自己的東西，哈哈！而笙笙也好醒咁開晒冷氣，雖然成個camp我以補眠為最主要的任務，但其實自己也有心理準備的就是訓唔訓到呢？放底咗包包我就落去映吓相，聽下佢地個briefing！其實今晚最主要都只係安排房的分配，之後Bryan會同佢地睇一D關於CDD的Video~~~而Elva、YY、「新丁的爸爸」和我就走咗出去食宵夜！哈哈！本來打算食甜品，不過找不到結果就食夜粥！可能地區問題，4個人4碗粥和一碟炸一兩都只不過是70蚊！抵！不過D粥就有小強和偏鹹！

食完野我地今次行另一條路返CAMP site，嘩！呢條路舒服好多，沿著沙灘行起碼矛咁焗先啦！十二點幾返到房，大家好HEA咁樣研究埋明天的安排就各自做自己的事和訓覺，而我就因為已經在家洗左白白就直接換衫搵周公子。

>>June 29, 2008 at 7:52:23 AM GMT+8