2008 年 7 月 28 日 星期一 【晴】

透唔到氣啦！頂唔順啦！你地一個二個可唔可以比我靜一下，我真的連氣都吸唔到

>>July 29, 2008 at 1:39:37 PM GMT+8

2008 年 7 月 27 日 星期日 【清涼】

7周年相識紀念日照理上應該是開開心心的慶祝一番，可是我實在受不了、受不了、受不了…所有的事實都一下子壓下來，連氣都呼不起來了！受不了啦！出去同GM食飯之前終於在公司躲了一回狠狠的哭了一場，結果 – 成功沒有被發現…可是問題還是要解決。一波未平一波又起，是在考驗我的能力還是打擊我的自信？或是我早已覺得堅固無比的保護牆？你們可不可以從我的角度、我的身份想一想嗎？

>>July 28, 2008 at 9:59:34 AM GMT+8

2008 年 7 月 25 日 星期五 【清涼】

因為身體不適，昨晚等埋阿泉之後11點幾就乖乖上床搵周公子…一訓就訓到今朝10點幾，醒的時候覺得個人不太對勁，成個人都很累、頭又痛、身體超熱、D骨酸痛…唉！打敗仗了，仲要係半嚴重果隻。

因為成身酸痛，結果係張床度磨到三點幾先肯起身，馬上洗咗個白白等個人舒服D，之後就好似成條死魚咁躂咗係張床度郁都唔想郁，後來到四點半就被阿娘迫咗我落去食野，落到街感覺到個人想暈咁的款…後來打電話比「別人的女朋友」同佢講我今日發燒改聽日先入書展！最初同她講時嚇了她一跳，因為她知道我應該是很不舒服才改期的。

返到屋企再食粒退燒藥 + 傷風藥就繼續補眠…一眠就眠到九點半，好耐都未試過訓得咁爽，咁當然中間都收到D電話和SMS，哈哈！感覺好WARM~~

為了聽日有精神入書展，今晚都係要早D訓先！各位晚安了…

仲有2日~~~

>>July 26, 2008 at 2:33:33 PM GMT+8

2008 年 7 月 24 日 星期四 【酷熱】

今日好乖咁係公司飲足八杯水，並不是因為太得閒無野做，而係打敗仗 – 傷風！其實前天的夜晚都已經開始有D頭痛，個人熱熱]以為是因為天氣酷熱所以無乜點理，加上呢幾日又唔係好夠訓，挨到星期五終於撐不住了…

昨晚已經開始狂流鼻水，一點前就乖乖上床訓覺，最後起身都係賴床搭遲咗班車！仲要黑仔到追唔到轉返公司的Shuttle Bus，原來司機個鐘比正常的時間快咗！怪不得早咗開車啦，可惡，搞到我又要等多15分鐘先有車返公司，最衰的係今日阿tart係公司，完全比佢捉到正。不過佢成朝都不停咁聽到我狂流鼻水 + 打噴嚏的聲音，所以怕死的佢非必要都唔會同我講野。咁都好，反正我都唔想同佢有任何的communication，就算係今日係佢生日都係咁話…

落樓下買咗份奶油多，之後就返上公司食咗粒Panadol打定底先，好辛苦咁挨到Lunch就補眠，差D訓到唔知醒起身，後來同同事傾咗一陣野先記得自己仲未食Lunch，又走咗去Canteen買咗件蛋牛治！成個星期日日都出咗街食飯，唔係我約咗人就係阿娘唔得閒，而幸好JoeJoe今日要去醫院探阿婆，可以收工直接返屋企…

聽日同埋「別人的女朋友」去書展，希望唔好咁多人啦！

仲有三日就7年了…

>>July 25, 2008 at 9:11:24 AM GMT+8

2008 年 7 月 22 日 星期二 【清涼】

點解而家D老闆可以咁LOW B、咁唔用腦㗎？唔怪得之自己其下的人都不相百仲啦！不知所謂，搞到我做咗成日的嘢都係得個『吉』…

>>July 23, 2008 at 9:52:44 AM GMT+8

2008 年 7 月 21 日 星期一 【酷熱】

今日是西門爸爸的生日，上星期就已經約咗他今日一齊食飯，呵呵！因為成個星期他只有今天有空閒，除咗西門爸爸，我仲叫埋Lancy和GM一齊食，人多D開心D嘛…同埋他們本身又互相認識，都矛乜所謂。

因為Lancy仍要戴義支，所以我們決定都是留返在Dining Room食，唔洗問又係我發板食乜啦！叫咗個上湯白菜仔、菜心龍利球、我最鍾意食的脆皮雞和福建炒飯。臨食飯之前同Toby傾咗一陣搬位的問題，唉！個個都係為自己，鬼唔知面壁好辛苦咩，但無可能個個都對住海景卦。煩！

之後就Join埋Lancy一齊落去開飯，而行去Dining Room途中她都同我訴吓現在工作的問題，唔多唔少都係關係佢老闆，咩都要report比老闆，少少野都要！令到個staff好大壓力，唉！其實我都唔明白，Manager咁樣做唔會增加自己的work load咩，點解而家D Manager咁唔信自己的人、咁怕事？結果我叫Lancy同GM講，哈哈！因為我相信我的寶貝GM一定有辦法或意見比到我地的…但Lancy覺得她同GM的關係又唔係熟到咁，而且GM又識佢老闆，好似唔係咁好。但我呢個衰仔就好無品咁話：「怕什麼？我夠成日係GM面對講阿TART啦！仲要有咁誇講咁誇，哈哈！」

食飯時大家都係吹吓水，講吓D無聊野！而我就不停咁做衰仔叫Lancy同GM講，而Lancy仲講埋我同佢之前的對話，哈哈！笑到西門爸爸面都紅，咁係丫嘛！我最高峰的時候是一個星期過去搵GM伸咗三次，所以我唔覺我有乜問題。反正我而家的態度都係括出去的…

其實呢間公司有四個人在我心中佔了一個很重要的地位，第一個是Stephen，當初肯比一個interview in到不知所謂的人入來開開心心咁玩咗三個月；第二個是Rebecca，我師傅 – 由暑期工到後來一直幫我最多、教我最多的人，仲會聽吓我講心事的人；第三個是西門爸爸，當初Rebecca放產假的時候，他成為了我背後的supporter，每次遇到D問題或比其他同事整古的時候，他都會第一時間出口幫我，還有…他會跟我一起分享零食的人；而第四個就當然是我的寶貝GM啦，無論何時何地他都是我的支柱，只有他讓我可以做回一個小朋友、也只有他讓我在不開心的時候哭或是發脾氣、更只有他讓我一直活在被保護和安全的世界中…

>>July 24, 2008 at 8:48:30 AM GMT+8

2008 年 7 月 17 日 星期四 【酷熱】

為了慶祝6-7月的壽星仔生日，展翔決定在今日搞返個飯局賀一賀佢先！雖然阿康是今次飯局的主角，但最終的搞手都係由他去安排，哈哈！矛辦法啦！誰叫我們呢個團矛野叻，最叻就係推三推四兼關人懶理…

好爽咁訓咗12個鐘，原來阿娘出咗街，唔關得咁鬼靜啦！之後睇咗一陣TV就去煮個米粉食吓先，然後上網睇吓之前仲未睇的「向世界出發」兼玩吓MSN。其實本來今日唔係好想出去食飯，因為昨天已經出過MK，今日又再出有點兒辛苦，不過阿康的生日飯又唔可以唔到。加上又叫咗火星媽湊埋阿B出來，唉！算吧啦！都係乖乖咁換衫出門…

7點左右就去到譚魚頭，因為我都唔知今日有幾多人開飯，所以閃咗去第二度等埋阿康先入去。後來收到Call就乖乖浦頭，而火星仔一見到我就梗係好HAPPY啦！呢個仔越來越爛玩了，不過都係呢段時間最好玩。計埋火星仔今餐飯局都有12人，剛好一圍…人物有：阿康、OD + OD男朋友、阿婷 + 阿婷男朋友、雷生、哥哥、趙道、我和火星仔一家三口。而成餐飯我就同火星媽研究咗一D問題，哈哈！識咗咁耐果然明白我要考慮的Point在where，I love you~~~

之後抱咗火星仔去睇巴士，呢個仔由細到大最鍾意就係睇巴士，等我下次教佢睇飛機先，到時佢日日都要佢阿娘帶佢入機場就搞笑！差不多10點就結帳散水，因為個個明天都返工唔會再有下Round，而阿康就送到我返葵芳。途中同佢講開操兵D事，連佢都話想像唔到我地倆兄妹會有咁的一日，呵呵！仲同佢講咗其他事，結果佢話我好似將所有的事變得奉旨咁，哈哈！矛辦法啦！咁習慣咗就好自然對其他人都係咁，不過我會留意返呢樣野的！嘻嘻！

>>July 22, 2008 at 3:14:55 AM GMT+8

2008 年 7 月 17 日 星期四 【酷熱】

總是覺得呢個星期過得很慢，原因可能是很多工作要做但就無心情去做！唉！算啦！反正你越緊張的事，到最後往往都不是你心中想要的事…到最後可能仲會比人耍一輪都係乜都做唔到，就算你話我衰仔我都係咁話。

因為發惡夢，所以8點幾醒咗一次，返工都唔會咁準時！平靜咗一輪之後再補眠，之後就起身梳洗準備返meeting，執緊包包的時候阿娘話要搵埋D相比佢拎去晒相鋪，結果搞到成12點半先出到門口，去到奧運站都成1315了！急速咁幫新丁爸爸買咗個魚柳包就閃人，臨走前見到羅嘉良、胡杏兒、曾華倩、呂方係奧海城宣傳新戲…望咗一眼就閃人，因為已經遲到了！

去到陳守仁見到班RC剛完左Open Formation，等佢地閃散先入去，梗係啦！完全未上武裝之餘仲好衰仔咁聽緊MP3，哈哈！怪不得D人成日都話Officer係最惡死。正打算上完武裝係下面HEA一輪先上去時，就被新丁爸爸捉咗我上去Staff Room，洗唔洗咁趕丫？

好彩而家D小學班房有冷氣，如果唔係實熱死我！HEA到阿哥返來就改埋份C&C，但改到一半我就好衰仔咁走咗去聽阿哥同班RC上Normal Safety Precaution，意思係當用Rifle時一般的安全措施要點做…上完堂就落去做Practise，不過未落去之前又比話佢地拉凳嘈到拆天的問題，同以往一樣我話完都係矛人理過我，幸好今次有個SWO係度捉吓佢地D response…

難得今日我有帶相機，咁就落埋去cover playground映吓相，而我都趁機映吓D無聊相，之後差不多時間就上返去班房整咗D嘢、寫低咗D嘢就聽到班RC上返來…而做Miscellaneous的時候又係一遍死寂，而今次就到偉大的OIC出聲話咗幾句，答案仍是 – 靜、靜、靜…最後我唔知仲乜心血來潮咁做咗個決定，就係叫阿KI搵SWO過來，而呢個決定我事前絕對沒有同任何人商議過。

SWO過到來就梗係問我咩事，結果我就以P/O的身份問我眼前的SWO幾個問題 – C&C邊個教？教完都係無Displine、無Response！次次起身拉凳都好似拆天咁！由3月到而家返都完全唔覺佢地有乜進步過！而呢個時候的SWO就只會不停咁應我一句「No Excuse, Ma’am」，之後我仲要好衰仔咁話：咁阿SIR，而家交比你，我同阿 Sir出去先…

過到隔離Staff Room，新丁爸爸完全被我的舉動嚇壞了，因為他完全無想過我會無端端咁叫過SWO過來問，仲要係個SWO係本家阿哥！哈哈！新丁爸爸嚇到面都紅晒…而果下我才想一想係咪做錯咗呢？係咪真係好似玩大咗呢？但係我的角度，我果個Moment只有一個想法，難得今日SWO係度，點解唔搵SWO教？點解次次都要Officer去出聲話？好似阿Sir話3月到7月都好似仲係乜都唔識咁？如果今次再唔執返次，咁又係唔係拖到唔知幾時呢？所以我才有呢個大膽決定…

不過唔做都做咗，最多下次在action前再想一想！當阿哥由RC班房返過來的時候，我都覺得奇怪點解好似聽唔到有鬧人的聲音，原來阿哥話教上個星期已經教過，咁今次就無需多講，就係罰 – RC每人三十下掌上壓、義務幫手的ROY都要罰四十下、CPL就要做六十！Oh NO！真係唔好意思丫…我都估唔到阿哥今次咁重手。

最後完咗Close Formation就大懲罰，最慘的都莫過於兩個CPL同阿ROY，SORRY丫！所以之後就決定請返佢地食TEA，不過Lawrence居然好好人咁幫我地比咗錢，真係唔好意思丫…

食完Tea就同埋Lawrence、Roy和新丁爸爸行去MK，而我就去開記問師傅拎幾粒褸扣，因為屋企件短袖衫爛咗粒褸！之前成班人會HEA到7點幾先散，難得今日早散，新丁爸爸又要返屋企陪阿娘食飯，所以我就打電話比「別人的女朋友」陪唔陪我，幸好佢今日得閒，所以我地就係花園街行咗一陣，最初打算搵師傅放底個袋，不過見唔到佢…衰仔次次搵襯佢都係唔係鋪頭度！去搵緊「別人的女朋友」時想起新丁爸爸星期四飛，結果打電話比佢提佢自己趁呢幾日買定D必需品…

同「別人的女朋友」行到八點幾就去食D野，本來想食米線，但超多人…最後我地去咗食泰國菜，同佢傾咗好多嘢！包括近來發生的事，而她始終都覺得有D嘢做咗先算，但現在的我還是沒有足夠的信心去做，同埋我始終都有很多其他的問題會連帶出來，與其是這樣，我寧願什麼都不做，或是等泉來決定吧！反正我近來也能常見到他…

食完飯就行返去再睇吓師傅係唔係度，個衰仔今次就真係係度啦！放底咗個袋就行潮流特區，見到我在日本買最新果支鉛芯筆，嘩！貴成陪，真LOW B~~~我無Discount都唔洗咁貴！係師傅度HEA到佢收鋪我地就打道回府了…後來等車時同新丁爸爸傾咗一輪電話，都係討論吓今日對班RC的事，唉！作為一個Officer咁做係無錯，但做的手法應該可以再好一點，幸好那個是自家阿哥，如果唔係對方會點呢？Officer唔係永遠是對的，最怕就係錯咗都無人敢話比你知！

PS：新丁爸爸在尖沙咀見到架白色的林寶堅尼Gallardo，佢仲好醒咁幫我映咗張相！好醒丫你…真係估唔到香港都會有人楂佢呢件車，哈哈！最衰睇唔到車牌，如果唔係入面果個可能係穎風都唔定！

>>July 21, 2008 at 3:31:36 PM GMT+8

2008 年 7 月 17 日 星期四 【晴】

今日西門爸爸問我有無興趣過去幫佢手，直接跟佢…但個offer就唔係咁吸引，一來放Labour Holiday + OT、二來人工又唔話太吸引；不過最大的問題係我同西門爸爸的關係太熟了，我怕如果真係跟著佢大家的關係會改變，這是我最不想要的東西，而且如果我真的做得不開心，我都不知道走唔走好！所以最後都係放棄吧！

自從上星期比阿tart擺咗上神枱，星期三同對面公司的人開完個會之後，呢幾日都無乜心情做野，應該係話完全唔想去做！而阿TART呢D時候就梗係唔會留係本公司打座啦，唉！對住佢真係唔需要有任何的歸屬感…因為唔想做野，所以睇返以前D相。每一張相都帶給我無限的回憶，雖然都發生過很多不開心的事，但起碼不會像現在一樣個心 – 是麻木的！

因為身邊的朋友都很忙，但為了維持彼此的關係，『等待』已成為我的生活中的一個『習慣』，而對於嚴重需要安全感的我就當然很不喜歡這種『習慣』，但咁可以點呢？

我希望近來的感覺只是自己想太多而已，也因為怕受傷害，所以一直以來我都逃避著，那當然我曾經都有向好的一方面去想過，可是到最後往往都找不到自己想要的東西，結果都是會選擇放棄的…畢竟我始終都覺得開始的感覺永遠是最好的，而且日子耐咗是否仍能保持著這份美麗的『承諾』呢？與其是說『承諾』，倒不如叫這是一個虛幻的『謊言』吧！而『路的盡頭』還有人在嗎？

放工直接返咗屋企補眠，發咗個夢！原來到最後我還是被遺漏的一個…



呼吸很輕 寂寞很深
世界只剩 漸漸變弱的雨聲
2人　沉默著
你不肯說 我不敢問
你的眼睛 吐出了透明的話
忽然 我發現你的臉好陌生

明明是兩個不同的角色
愛情卻給我們一個腳本
你要的不在我這　我的你不懂的
兩人在互相拔河

明明是太多不同的可能
結局卻給我們一種選擇
要分開卻捨不得
兩人彼此都忘了　要什麼
﹝兩人是不一樣的 我走了﹞

>>July 18, 2008 at 3:53:33 PM GMT+8

2008 年 7 月 12 日 星期六 【乍寒還暖】

雖然較咗鬧鐘1030起床，但最後都係磨到1130先肯離開張床，沖咗個澡先出門口入屯門！點知落到去Miss咗葵芳車又要等多15分鐘，在等緊的時候同火星仔阿娘講咗一陣電話。結果差不多1330先入到屯門，之後阿康、火星仔 + 火星仔阿娘就陪我去咗目黑壽司度開飯，但因為佢地都食咗野！所以我叫咗個海鮮烏冬，而佢地就叫雪糕！

成餐飯除了同火星仔玩之外，就講吓D無聊野，仲有就係交換禮物環節！真搞笑！明明今日係阿康的生日，但他居然準備了生日禮物比我…不過大家識咗就來廿年，都唔會計呢D野！其實真係識咗佢咁多年都真係無乜點送過禮物比佢，難得今次在Agnes B又見到個幾得意的相機，算啦！就豪一次比佢‧

康生！生日快樂~~~

至於我份生日禮物就係他搵人在日本迪迪尼買返來比我的，一份係用來紮頭髮的臭迪、另一份係大頭臭迪糖果盒。但我依然都係好無品咁問咗佢一句：「乜你唔係送龍貓比我咩！」哈哈！食完飯就同埋佢一齊去睇吓D電話Plan，因為之前CSL收咗我Roaming charge，真無奈！無接電話都要收我錢‧行咗成個鐘最後都係得阿康自己轉去PCCW，本來打算轉3…但阿康話收得唔係咁好兼本SQN的人大部份都係3，所以為了讓自己有個清靜的環境都係唔好轉住…哈哈！反正我一開始已經標明自己不是一個好人。

不過其實最大的原因都是自己放不開，始終有些東西習慣了就不想改變，不論是對人或對事。當然呢個世界每日都不停地轉，終有一天你都會因為環境而去改變，但如果我不是在一個安心或能依靠的情況去變的話，我情願維持原狀！

同阿康轉完台就行過去置樂搵陳主任，順便拎埋D手信比佢。傾到五點半左右我就搭車去大欖會合班RC…落咗車打電話比新丁爸爸，打算在門口同班RC打個招呼就閃…點知個衰人又唔聽電話，結果好無奈咁自己行入去自動浦頭…

今日大約有廿幾個RC一齊BBQ，大部份的人我都開始認得D樣，但名就真係叫唔出…雖然無再落大雨，但始終都係濕漉漉 + 焗的感覺，所以我就唔係咁想去郁！在半威迫的情況吓叫新丁爸爸燒咗2隻雞翼比我食，之後佢就被點名出咗去玩，而可能因為Lunch時飲咗杯汽水個胃又唔係咁舒服，所以我就穩守大本營幫佢地看野兼燒吓其他野食…哈哈！我又可以利用呢個時間發呆…

雖然只是接觸了呢班RC三個月左右，但對住佢地真係可以好簡單咁相處，一些很簡單的遊戲已經令大家的臉上掛著無限的歡笑，也許這就是做小朋友的好處…而我仍然都是愛躲在自己的世界裡！看來就算是對著一班小朋友，原來我還是會覺得怕、怕他們看到我的軟弱…

不過最好笑都莫過於我聳擁班RC的妹妹一起欺負新丁爸爸，哈哈！映相會無咗佢個樣、問爸爸攞錢買Ball玩但找返的錢就比我…真係好搞笑！矛辦法啦！誰叫有人應承咗我可以食殘廢餐結果自己走咗去玩，仲要同我講佢食到好飽…其次就係燒咗隻辣的雞翼比我，所以有仇不報非本帥哥也~~~

大約2130就End UP，不過左搞右搞成2200先行到出巴士站…去到路口見到佢地過馬路就馬上叫Stop，因為我無記錯有D巴士係唔洗過馬路的。但最後因為我咁樣突然叫Stop令到大家都有D徬徨，結果叫咗其中一個RC上52X，因為他去深水鶠K而我就馬上行去另外個站睇水牌，原來大欖呢個站出入九龍都在同一個站…不過因為咁搞一搞差D有幾個RC突然衝咗上52X，幸好最後他們上不到，如果唔係我都唔知點同家長交待！但果一刻真係比佢地嚇一嚇~~

之後就有D小朋友就上962過海，而有14個RC就跟我同新丁爸爸‧上到車我就用電話問新丁爸爸佢之前有無Check過回程的巴士站，結果佢反問我一句：「你覺得我無check」而我就回返比佢一個YES的樣子！最後在呢個Moment大家都無講任何野…後來新丁爸爸話其他佢有check，只是他覺得我熟悉屯門所以無發表任何意見！原來我怪錯了他…

那一刻我想到另外一些事，他說得沒錯！屯門真的是我熟悉的地方，但其實有很多事情總會變的，包括一個巴士站！沒有check巴士站的人其實是我，不過我就把所有有事推晒去他身上。真的很討厭這樣的自己…真的很討厭這樣怕事的自己…

>>July 17, 2008 at 4:31:17 AM GMT+8