2005 年 8 月 3 日 星期三 【晴】

《搬》

豪玩左4日(啤酒節x網聚x買禮物x生日聚),今日飛甩左alex係屋企...幫姑姐搬房~_~"



怕
怕眼淚
要怕自己的眼淚
還怕別人的眼淚
更怕女孩的眼淚
最怕自己重視的女孩的眼淚
不過...寧可妳在我面前哭,
總好過背著所有人抽泣...
乖啦乖啦,笑返先似妳架嘛~>w<

--------------------------------------------------------------------------------

讓我把神偽善的面具也摘下來吧! 卡爾

>>August 4, 2005 at 11:50:00 PM GMT+8

2005 年 8 月 2 日 星期二 【酷熱】

《生日會@自助餐》

繼尋晚心情直插谷底,今日回升唔少~~

冇錯,同小賴慶生,去尖沙咀食自助tea~

人物有主角小賴,大佬tony,hiddie,alan,tony2號,主子,偉哥,欣欣同自己...一行9人約左2點係尖沙咀恆生等...

人差唔多到齊,爆笑事件發生:

一向以風度(?)同準時見稱既主子竟然未到,所以本少爺就打比佢

"喂,你係邊呀?到左未呀?"我問

"我朝早去左補習囉..."唔夠訓既主子好明顯九唔搭八地回應

"喂,我地到齊喇...你係邊呀?"我再問

"呀?我咪係旺角恆生囉..."

"................"我默然~哀悼,再回應,"我地約左係尖沙咀恆生喎.........."

之後..........全場爆笑XDDDDDDDDDD

等埋大佬,人齊,係陸大盈小姐既帶領下,好安全又驚險地突入果間XX酒店~

2點幾,未入得,大家已經開始互9亂入,好彩抵得住,不過對佢地用黎亂入我既對象就....=___=慶幸主子終於從沉睡中甦醒XD,第一個遭殃,當然係全日都心不在焉既偉哥啦XD

3點正,入得...D野都好食,不過略嫌款式例牌左D...

互9亂入繼續,個個都會中招,就連唔多熟既tony2號都比我同主子狂入;
不過小賴誤中主子果下...真係睇到我同hiddie拍晒檯囉,如果係櫻桃小丸子既角色,主子果時應該滴汗加滿臉黑線;
要數...全場最易入都係偉哥仔,鬼叫佢夜晚有約咩?但當佢開始把玩緊把餐刀之後,被入度下降好多;
當然唔少得明搞gag既大佬啦,最令全場爆笑,名句不斷XD
欣欣呀...好靜呀今日,不過同小賴拉拉扯扯,果下好正XD
hiddie,由於比人分薄左,加上尋日得罪佢,我少入左好多架喇~
alan哥今日同佢少講野,但一講到歌影視,果然係佢強項...

呢場爆笑自助TEA係我地為小賴送上生日禮物果下開始落幕,大家吹多陣水就走LU~

而小賴生日禮物,就係hiddie尋日千辛萬苦揀到既CAP帽,同埋2個TONY揀既裇衫一件
本來我揀,可能係西野FIGURE,又或者係處女座聖衣神話架,不過比hiddie ban晒T^T
下年有機會送過比你下~~

之後一大班人係吵吵鬧鬧之下,過左海港城行

阿偉哥係我同hiddie強硬態度之下迫走左(為佢好咋),不過之後hiddie不斷話:"佢就咁走左,好可憐..."但又迫人走喎=_="

欣欣同小賴拍住黎行,真係絕襯架姐XDD

行緊時,主子又被hiddie狂攻,多口既我為左拯救主子,又搶住入XD司空話齋：我覺得無言有一種吸引雌性打佢ge神力,我覺得呢下又講得我幾中喎XD

不過連比人/狗係咁打/咬左3日,都咪話唔傷,2蚊2蚊,唔洗下次再見妳,我手臂都已經紋到條紫龍喇=_="

最後行到6點幾7點,各位鳥獸散喇~~

9點幾10點返到黎,散晒

BYRAN／BRIAN／小賴，生日快樂呀！你一係學HIDDIE話齋,要記既就記,唔值得記既好忘記晒佢;一係你就同我醒醒定定堅持到底,繼續努力,終有一日能夠感動佢的話,我都會感到開心,你企邊一邊都好,我都撐你架！下年生日有機會再玩過啦～

今日名句:"一睇書我就會諗起你喇..."by小皮,05

>>August 9, 2005 at 11:17:58 PM GMT+8

2005 年 8 月 1 日 星期一 【陰】

《凋謝》

當自己血肉模糊的雙手在分不清是血還是泥濘中猛搥，眼淚彷彿在告訴自己盆中的植物那可笑而偏偏又與主人殊途同歸的命運，真諷刺。

--------------------------------------------------------------------------------

你是不空白的一張紙
我是一張質量還不錯的透明膠
我在你身上緊緊貼了三年後
被撕下來了
我身上會有你的痕跡嗎？
強行除去這些痕跡我還能有當初的粘性嗎？
一切
都是不可逆的

以前的我已經死了…被我所心愛的人用我對她的愛殺死了…

>>August 6, 2005 at 11:36:52 PM GMT+8

2005 年 7 月 31 日 星期日 【颳風】

《網聚後感》

懶,所以轉自小靈x司空日記


　早上11點，學完結他，諗住搵埋住同一區既李壞一齊出發，點知佢話要訓，咁唯有睇下無言２蚊盈係邊，同佢地一齊，跟住就５個人咁向會展出發。

　　去到灣仔，食完野，買完飛，當時已經點幾，好驚趕唔切陳某既簽名會，好在有司空係個度排定隊（救星！），入到會場，由於本人記憶出現慣性問題，將司空個樣同月之住人個樣變左同一個樣…好對唔住…所以我一睇到司空之後係成個人呆左…不過你冇見過我，點解會知我係小靈！？（神乎？不是人也。＝口＝）買到火鳳拎到籌，就去等陳某。期間竟然俾我地見到小孟同山無陵，…服飾幾好架。不過我覺得有一樣野都幾過份，有Ｄ人竟然拎到陳某既畫，但係就阻住其他人既時間（＼”／因為我冇）！拎完簽名之後，去天下個度等青蛙等人，不過又唔多想等，所以就去到火狗工房度買左十五二十先（＝　＝＋），再返到去天下，見到青蛙，睇真Ｄ，唔係青蛙喎，再睇真Ｄ，真係隻死青蛙！

（＝”＝）行行下，見到同學！同小月月講左，之後佢就人影都唔見埋（Ｔ︿Ｔ早知唔講）跟住係咪去坐低呢？（已經出現記憶問題）

　　坐低冇耐，整理好個袋既物品，青蛙就話再出去行下，都好，反正我未買到死亡筆記，就拖埋小子走。行完文傳又去左創意大笪地睇下，我睇中左Ｄ化妝盒，佢話係歐洲貨喎，不過我覺得都幾貴下，冇買到。買左一條蝴蝶頸鍊。跟住青蛙買左隻貓，小子買左隻鞋。
　　見到蘇蘇，一身學生妹既打扮（好似係校園迷糊大王＝．＝？），嗯嗯，吹左兩句，佢就同返佢既ＦＤ一齊。由於青蛀要買水，所以我地決定返去搵番眾人，點知返到去，咩人都唔見，打電話一問，先知原來去左ＭＥＧＡ　ＳＴＯＲＥ，青蛙返左黎之後就同佢去ＳＴＯＲＥ既門口等眾人喇。

　　黎到門口，蘇蘇黎左，子木黎左，李壞同佢細佬之後都黎埋，大家齊齊睇左一齣搞笑而又無聊低能既鬧劇，眾人都到齊，離開會場去醫肚（雖然我冇胃口）。

　　去到個度，個個都食完野，青蛙就拎左支筆出黎（ＸＤ勁好玩！）不過好似除左青蛙玩之外，點解冇人玩既？好鍾意司空插入個句冇人（ＸＤＤＤ）！

　　食完玩完當然就係四散啦，司空同無言已經唔見左

--------------------------------------------------------------------------------

差唔多12點零至出門
唔…
去到中環大概12點8,9倒?之後記起好似話小靈同小月都去, 哈…
我當時就諗…佢地應該去左排簽名law卦
抱住搭單心態希望佢地幫我排隊, 於是就打比無言啦…
點知無言話佢帶左佢地去咬野…灰晒
東立多人排到痴線, 兜左成個牽至搵到龍尾, 好驚排唔到簽名(鬼叫你訓咁晏), 跟住排下排下眉頭緊皺ge本少爺就見到無言帶住兩隻寵物出現啦(當時有d咁ge感覺)
可能我比較可怕, 叫佢地尖過黎時, 佢地好似好驚, 搞下搞下都尖晒隊
排到門口有個好好心ge伯伯問我地係咪淨係買火鳳同簽名, '係!'
之後我地take左籌就去左第樹簽名
排左ok耐, 因為阿老大白痴到同人簽完名畫埋公仔…成百人阿大哥…最後佢因為太慢決定齋簽…
簽到我時我問佢畫<火鳳>有冇咩參考…
點知佢答我<三國志>(陳壽)…bear一聲
不過我諗佢實記得我個簽名, 因為我照木弟提議叫佢書脊另一邊簽「城下一聚」……

攞到陳老大簽名真係幾開心, 因為本來以為冇

目的達成之後漫節ge其他事我略帶過: 首先買阿kai ge15,20啦, 幾好睇的
之後join番青蛙大隊, 見到兩個眼鏡女, 好似係傳說中盈同兩蚊, 不過我0係豪俠會多, 唔多識…
見到小子真開心, 簡直係整日最美妙ge事, 因為佢還番套vcd比我…小子同上week一樣英俊
子江冇帶樹熊出現, 帶左另外個frd, 好似叫cece?
之後行一陣又坐, 坐到累又行, 去mega store係超廢的, 講起都火把
最後竟然見到百年難得一見ge蘇姐, 同埋親愛ge子木姐, 仲有李壞同李壞細佬
李壞細佬好似我一個同學, 不過瘦好多…好明顯李壞平時搶晒細佬d野食啦, 佢細路真係好好靜…

最後離開會展一樣去左食野, 今次dservice正常左好多, 樂靈同青蛙則不斷毆鬥, 惹來不少歡呼同打氣聲
食完飯大家鳥獸散, 我同無言再行左行灣仔二手書攤
總括而言今日　　好　齊　　人　呀！齊到有ｄ可怕…

--------------------------------------------------------------------------------

除左個迫字........唯一感慨就係肥谷...陳某幅相...對手...

呀呀呀,仲有經典的"城下一聚"!!!

另,可惜見唔到2個人...一個原來我唔記得約XDD;另一個就...返緊工= ="

能否找到昔日的溫馨,香氣與餘溫?

呀呀呀…話咁快就8月

p.s.比衰狗2蚊"咬"到紅鬼晒T_T

>>August 3, 2005 at 2:16:45 PM GMT+8

2005 年 7 月 30 日 星期六 【雨】

《呀?》

某某的穩重,比不上
某某的風度,比不上
某某的認真,比不上
某某的細心,比不上
某某的專一,比不上
某某的才華,比不上
某某的完美,比不上

但自己原來還有點點優點被欣賞,被掘出來,可幸

還是搞不清細心和體貼的分別…

不過…我點都叫贏左某某(!?)XDDDD

>>August 1, 2005 at 11:24:43 AM GMT+8

2005 年 7 月 29 日 星期五 【乍寒還暖】

《偶然的Pre-ad舊聚》

今日本打算完成阿童約定,帶佢去清水灣玩下,可惜落雨=.,=
今日本打算搵小靈拎返份生日禮物比佢,咁我欠佢既三個承諾就只剩返一個酒類甜品,可惜唔記得搵佢=.,=
今日本打算搵小皮拎果2本大口仔比佢,順便見下呢個幾個月都冇見既小妮子,睇下佢點,可惜都係冇咩mood去天水圍搵佢=.,=

最後,呀...應該話尋日已經決定,出荃灣拎書比阿星~
去過好多次荃灣,但就係第一次搭巴士去,好彩識落車
阿星比想像中早到,佢都記得帶書比我,感動T^T
之後就同佢去食野,係荃灣行下,同埋等阿fish~

估唔到今日有機會見埋阿魚,呵呵~
同星行下吹下水,講下漫畫動畫,正!
之後去左機鋪hae左陣,比阿星帶我四圍兜左陣
最後阿魚終於到喇...仲連埋佢果個男朋友添
一黎到,氣氛好怪囉,而且佢男朋友散發出陣陣殺氣,
搞到我同阿星狂走同狂滴汗,佢好恐怖= =|||
之後成功帶佢地去到荃豐,我就同阿星落mk搵肥alex喇
行左陣,阿星要上堂閃左,之後我同alex食左飯先返~

估唔到,今日可以一次過見晒pre-ad英文堂既3個朋友
除左肥堅,.ray哥同alex,呢班朋友就係最早識果班
好記得,亦好懷念日日lunch後鋤dee既日子,優遊自在=w=
今日罕有地一次過見返大家,
阿星,仲係果個阿星,
阿魚,仲係果個阿魚,
肥alex,仲係果個肥alex,
不過阿水,已經唔係果個阿水喇...
佢地3個都唔知道,而家佢地每叫我一聲阿水,我就有唔知點既感覺
阿水阿水!!! 阿水阿水... 阿水阿水......
(阿煩呢?)
阿水阿水!!! 阿水阿水... 阿水阿水......

不過點都好,有機會的話,今個暑假都要同剩返既carol或者阿roy聚一聚先~

今日好開心自己同主子plan既故事得到阿星既助力同肥alex既認同=v=
有左阿星幫手,我地就不愁冇資料...雖然有既就英文居多=_=
有肥alex幫手整理,故事同人物設定可以更完整同仔細,而且水瓶既苛刻同勁力係我呢隻山羊同主子呢頭金牛所冇既,不過大前提係佢先要同我地得到某d共識先= ="

夜,夢,醒,訓唔著...
又係果個懸崖既夢,角色又換左,不過呢次係咪發得太遲?

2點on返line,同主子係咁研究西野最終勝利,到某小孩既耕耘問題,到愛情等價觀,到見到中意既人心跳加速既問題,由心理學至物理學至哲學至語用學...開始唔知自己up左d乜之下,終於又有返睡意,原來主子係好一部催眠機器XDDDD

雨停,昏睡

今日名句:"一定係你(阿星)係中間,搞到我同阿水溝通出現障礙啦~~"by fish,2005

p.s.本打算模仿sactle筆觸寫呢篇日記,但一開始寫第一句"當太陽和煦微光滲入眼簾輕輕叫喚著我從那迷茫的虛夢中回到殘酷而又必需面對的現實"之後,我就冇心機寫落去喇~XDDD

p.s.2王貽興你本《路中拾遺》究竟出左未?T^T

p.s.3主子,今日阿星比左本正書我做參考,遲下拎比你睇下~~

>>August 1, 2005 at 11:15:03 AM GMT+8

2005 年 7 月 28 日 星期四 【晴】

《你...?》

窮途末路之時 我急需的是你聲音
每當天色昏沉 你就像太陽為我暖身
對於朋友 你的細心 已足夠花去半數時間
尚有精神娛樂大家 從沒離群

情路段段不幸 你用辦法沒有上心
慣於利用經驗 叫身邊的人勇敢
對於情感 你很有心 卻未曾聽過你埋怨
為了打救旁人幸福 沒時間傷心

感激你 最開心的人 陪伴著我每個無眠夜深
用你笑聲 修補我不幸 過濾失落重獲信心

只不過 誰為你認真 習慣了悲哀中救傷的你
沒法放開 開心的責任 抱著心事無人問 壯烈犧牲

每當落淚之前 你可找誰聽你說話
每當熱鬧之後 你最想誰為你留下
記得有天 你失了蹤 我頓時驚覺我未能夠
像你一半有耐性 為旁人操心

多得你 最開心的人 陪伴著我每個難渡夜深
用你笑聲 粉飾了天地 告別失望無懼氣溫

只不過 誰為你著緊 習慣了悲哀中救傷的你
沒法放開 開心的責任 抱著心事無人問 壯烈犧牲

若你想哭 即管放心吧 我不會過問
你可盡情在我肩膊哭泣 做個凡人





"因為我都係覺得你地重要D…"
這是我今年為止聽過最感動的說話…多謝妳。>3<

>>July 28, 2005 at 10:37:22 PM GMT+8

2005 年 7 月 27 日 星期三 【晴】

《書評》

昨日至今夕，一口氣ko了好幾本書了，忍不住要評評。

先來的是李敏和阿圖說力的《宋雨日－－黑夜女巫》，久違的第二集，不過可說是比上一集更遜色。故事鋪設越來越像金田一，由出現一個又一個的受害者，到主角登場，陷入險境，最後逃過大難，在眾疑犯面前揭開兇手真面目等等，就連金田一例行兇手畏罪自殺也抄得十足十，枉我等了一整年，你倆竟交一個普通的殺人事件出來？上一集的驚嚇和懸疑性去了哪裡？就連上一集宋醫師專業詳細解剖過程，到了今集竟三言兩語交待，人物性格變得更迷糊，眾多新角的性格卻像漫畫般誇張得要命，就算如何吹噓今集的資料搜集詳細真確，也難教人代入，相比第一集以香港為背景，而且一步一驚心的氣氛營造，劇情節奏上集也掌握得較好，最最最難接受的，就是錯字別字連篇，看得我不禁哂笑，哪門子來的校對？比我對可能更要專業啦！總而言之，今集絕對失望。不過最尾卻為下一集佈下了一個饒有趣味的餘韻，希望下集回歸香港，宋雨日解救男友的危難，可以好看些。

之後是李伯衡的《迷路》，本以為是一本較複雜的書，怎地我三小時竟看完了。故事有趣在於每一回都有兩個結局給讀者選擇，跳去之後不同的篇章，一共有十六個結局。但我就覺得劇情內容略嫌簡單，就算最有趣的一個也只能給六分而已。總論而言，這書教會我選擇(雖然最後我十六個結局全都看了)，但選擇了，便不能再後悔，書如人生，人生得似書中作出抉擇。作為一本實驗作，可謂不過不失，不過我認為可以更進一步精雕細琢。

最後是溫瑞安闊別十四年的新作的《少年四大名捕之說無情誰是無情》，這一本，無疑看得出溫老真的回來了，同時也證明溫老的筆也真的老了。說故事說道理是溫老最擅長的寫法，不過最難忍受也是他離題九萬丈的寫法，本是簡簡單單查一單案子，卻東拉西扯說了一大堆人物無關痛癢的事跡，又帶出他那些憤世嫉俗的道理云云，五年前，初看溫老的書，我會看得熱血沸騰，但五年後還是這樣故步自封的唱著老調子，再看看他的序文後記如何吹噓自己的才情，如何緬懷昔日過去種種風光，不禁慨嘆一聲：俱往矣。我敢說，現在的老溫如果沒有那些拖拖拉拉的劇情，沒有那些累贅的大故事小道理，他便不能寫出一本簡單而又好看的武俠小說。現在惟一好看的，就是他千方百計千辛萬苦堆砌出來秀麗典雅的字辭，確是賞心悅目，卻也只能賞心悅目，未能如古龍般以境著意抒感寄情的那種神來的藝術之筆，難怪過去產量如此多的他，總及不上金古兩大名師。這本少年四大名捕，就連他昔日著作《神州奇俠》也比不上。

另外《埃舍爾魔鏡》和《魔法的故事》也幾乎看完了，不過是資料工具書，難作評價；而sito的《斬神》看到第四本了，也開始看《蘇菲的世界》，這星期是名副其實的閱讀周。

────────────────────────────────────────

英語三國志
作者 firewolfer (雪泥狼爪)
劉備: newbie
孟德新書: medicine 書
孔明: homing
姜維: Gary
駱統: norton
曹丕: chobit
徐庶: tracy
馬騰: martin
馬超: marcel / mature
孟起: monkey
伯符: buff
公謹: cocaine
司馬: cyber
張飛: jeffery
趙雲: chewing
馬謖: mask
小喬: secure
魯肅: lost
奉先: foxy
呂蒙 lemon / raymond / layman
法正 fxxking / fetching
呂布: label
孟優: menu
龐德: panda / pointer
左慈: George
辛佐治: New George
顏良: anna/unlearn
龐統: pointing
伯約: bjork
雷薄: Reebok
貂嬋: deuce
太史慈: tasks
甘寧: claiming / cleaning / coming
的盧: Dettol / dino
高順: cushion
孫堅: skin
孫權: squid
陸遜: lotion
荀攸: sun oil
李典: lady
徐盛: tracing
祖茂: joe's mom
關平: cramping
魏延: iron
樊稠: franchise
蘇飛: sophie
張角: triangle
蔣欽: jam
公孫瓚: constrain
程遠志: change
黃蓋: wenger
于吉: yogurt
馬良: Malone

>>July 28, 2005 at 11:40:04 AM GMT+8

2005 年 7 月 26 日 星期二 【晴】

《聚》

今日同水水出去mk行街買mp3，佢掃左部creative zen,正!

順手買左今期四大名捕小說少年篇,正~

今集開始係少年無情lu,一流


要受風之流，才暖。
要以雪之魄，自溫。
要愛花之魂，始艷。
要用心之靈，去聽。
他已在路上。他上路了。
他正用心去聽、去聆、去分辨、去吸收各種各式的聲音。

「他」是誰呢？
這位少年原名盛崖餘，
日後，江湖人稱之「無情」
「四大名捕」之首。

雙足不動十指微揚已是可捲起
江湖上、武林中的八方風雨、八面驚雷

今日名句(接上文):"車...吹到咁勁,咪又係差佬一個~!!XDDDDDDDDDD" by水水,05

p.s.終於吹完/補返星期日心入面想講既野..寫完先發現同本身想寫既野有d距離,即係又變左"肺腑之言"...=.=
再p.s.睇晒神州奇俠蕭秋水第一部,八王子01+02,埃舍爾魔鏡,開始睇緊宋雨日2同迷路=v=

>>July 26, 2005 at 10:24:25 PM GMT+8

2005 年 7 月 25 日 星期一 【清涼】

《日記．日記》

今日昆返阿童陪我出金鐘打左個白鴿轉,之後落銅記食tea,封神完全版1,2入手,yeah~!!

唔...

看看~

這日記人氣過千了...轉眼自己已換了日記好幾個月了

雖然開始時仍不是寫什麼什麼

但身邊的人有哪個仍堅持每天寫日記？有哪個仍希望把自己的事自己的感覺感受告訴身邊人？

看看?

唔...

現代人類的末日死亡先兆：http://waxy.org/random/images/weblog/love_your_job.gif

>>July 26, 2005 at 10:19:30 PM GMT+8