2005 年 10 月 16 日 星期日 【陰】

禮拜一... 最唔鍾意禮拜一!
因為要返學, 上我最唔識o既電學...
最鍾意就係禮拜六, 因為個感覺o係返工等放工!
今朝返工三心兩意, 返公司先好, 定係直接落地盤好...
最後要去到九龍塘站先決定度, 就係直接落地盤!
行緊去地盤o既時候見到我最唔想見o既人,
我唯有扮見唔到, 行快d...
但轉個頭入到去就見到佢, 佢叫我過去,
唉... 都諗到無好o野, 結果因為好少o既o野嘈起上o黎...
我覺得好佢地好煩... 以前我都好忍得o既,
但係自從同佢地做o野之後, 我d脾氣差左好多...
如果佢唔小我, 我都無咁火... 最後我話你有咩唔妥就同我老闆講啦!
講真我又唔係同妳打工, 點解我要受你氣呢!
過左陣打返公司問老闆o野, 老闆就話o岩o岩想打比我!
講左兩句, 佢都明白事理...
3點鐘就趕住走, 因為要5點鐘前上網搞d o野!
但係5點鐘又要趕去九龍城, 搞到成6點7先走...
實遲到啦! 搭小巴又唔識叫落車... 結果落早左3條街!
返到去都7點3lu... 放學打比慧姐, 不過佢無聽我電話!
再打比EVA姐, 佢話我近排唔睬佢喎! 呵... 我專登打比妳架!
傾到落左車, 有線入... 轉左過去都無理番佢添!
Sorry呢... 不過邊個入線就唔好講喇!

>>October 17, 2005 at 5:04:12 PM GMT+8

2005 年 10 月 15 日 星期六 【晴】

無聊的一天... 11點就起左身,
成日唔係食o野就打機, 再唔係就睇電視,
11點先online......打日記!
今日無溫書添, 好似過多兩、三個星期就考試...
唉...... 宜家12點幾, o岩o岩先記得我未燙衫添!
聽晚放學先燙啦! 打機打到我傻左......
努力d... 勤力d... 努力d... 勤力d... 努力d... 勤力d...

>>October 16, 2005 at 4:10:24 PM GMT+8

2005 年 10 月 14 日 星期五 【晴】

無驚無險... 又到星期六!
雖然每個星期六我都選擇唔落地盤,
但係今日實在太多o野要我去睇!
11點鐘o係公司出發落地盤, 坐公司順風van...
不過好塞車, 塞左半個鐘先由旺角去到紅磡!
去到要o係棚頂做o野, 企起身又唔夠位企...
唯有要蹲低o黎做, 一蹲就蹲左成兩個鐘,
落到地對腳都軟晒, 點解我要做埋d咁o既o野架!
搞到兩點半先去食飯, 食完又要返去睇住班人...
做到6點先走人, 本來禮拜六返半日架嘛!
返到屋企無人... 阿媽去左聽唔知邊個o既演唱會!
唯有自己食自己啦! 食完就打PS2... 一打就打到12點鐘!
打完本來想打日記, 點知細佬打緊機!
成點鐘都仲打緊, 日記都無打度我就上床訓lu...

>>October 16, 2005 at 5:23:41 AM GMT+8

2005 年 10 月 13 日 星期四 【晴】

琴晚已經諗好今日唔落地盤開會, o係公司做文件o野!
點知... 返到公司坐唔夠半粒鐘, d粉人又打o黎...
"Sunny... 你仲未落o黎?" "快d落o黎啦!"
"唔掂呀! 你快d落o黎搞掂佢..." "今日開會仲唔見你!" 等等...
唉... 我真係好頭痛! 近排唔係係咪比較黑仔!
o係地盤唔多順境, 好多o野我睇漏左而發生問題!
11點3落到去, 做做做... 度尺... 行來行去...
Lunch飯都無時間食, 就做到3點鐘先走!
出到旺角新世紀先食我o既Lunch... "Delifance"
食左個下午茶餐, 都幾貴下...
今次第二次食, 第一次係同Carrie小姐o係8號風球下食o既!
返到公司都成4點, 做到成8點先走...
去左旺角賣電話, 問左幾個街邊檔, 講到口水都乾先多幾十皮...
雖然d錢唔係我o既, 不過多幾十都好過無啦!
然後就去左先達People買Nokia3230, 點知勁多人...
就去左去旺中買, 點知佢地話無貨, 佢地check到先達有,
又要行番過去等, 等等等... 等左成半個粒先輪到我!
本來想買棗紅色, 點知花花地, 就轉左買黑色...
試左成3、4個字, 就決定買... 搞掂晒都成10鐘lu...
飯都未食, 真可憐! 去到月台等火車...
先面條友邊講電話邊講粗口, 一句說話加成3、4個粗口形容詞...
好討厭... 真佩服佢... 句句金句...

>>October 14, 2005 at 4:25:09 PM GMT+8

2005 年 10 月 12 日 星期三 【晴】

今日覺得好煩, 成日都係聽電話...
唔係電話響就係要打電話搵人,
好大壓力, 搞唔掂d o野! 人又搵唔到...
真係想死呀! 神呀... 救救我吧!
下晝落左地盤, 本來諗住6點鐘走人...
但係有條煩人係咁打電話o黎追我o野!
頂頂頂... 都唔知佢點解要咁趕, 真係想xyz%#@佢...
o係佢o既不斷電話轟炸下, 6點放工我都無返屋企,
我選擇左返公司, 返到去都6點8...
做做做... 做到8點半頂唔順就返屋企...
行到半路阿媽打o黎, 問我o係邊!
我唔記得左打返去話遲d返添... sorry...

>>October 13, 2005 at 3:36:50 PM GMT+8

2005 年 10 月 11 日 星期二 【晴】

今朝晨早要出城, 不過係九龍城!
夾少少o野就搞到11點, 搭小巴返公司...
哈... 不過我偷左陣懶! 去左People買電話比阿媽,
不過無返貨... 買唔到!
返到公司打左封信, 就搞到點幾先食飯!
去開以前食開果間, 坐左陣有對講英文o既人坐係我隔離...
唉... 又係搵我做翻譯, 突然間要講起奶茶o既英文,
我就好順口講左Milk Tea, 佢竟然明喎!
都唔知佢係真明定假明! 但我見佢飲得好似幾好飲咁...
下晝成4點半先o係公司走, 去到地盤行個圈又放工!
夜晚要上英文堂, 好彩無約魚...
不過就諗起今年要考會考, 又開始緊張喇!

＊我想同一個人講對唔住, 我覺得我咁做好賤格囉!
不過我控制唔到我自己, 希望妳早d發現到,
之後做d o野阻止我咁做啦! Sorry......

>>October 12, 2005 at 5:05:11 PM GMT+8

2005 年 10 月 10 日 星期一 【晴】

今日假期... 放假一天!
但11點就醒左無訓lu... 起身睇左陣電視...
做緊賤精先生, 阿嬌真係好得喎! 有楚楚可憐o既感覺!
唔知點解... 近排眼淺左... 睇到d感動場面就......
睇完就煮o野食, 但自己一個... 好可憐咁!
食完就開始打PS2, 打打打... 打到5點就停左手!
入房on左陣line, 都係唔得, 個心唔多安落...
就羅左科電o既notes出o黎睇同做下,
睇睇下就到7點... 沖完涼食埋個飯盒睇埋個"翻身大少"又入番房!
唉... 又繼續溫... 遇到條數識計個答案但唔識寫計o既過程...
都唔知問邊個好, 最後搵表妹幫手...
佢唔知係咪掛住同男仔講電話唔得閒理我, 唉... 心淡啦!
搞搞下又搞到10點幾... 計過少少數都用咁多時間... 唔多掂!
一日又咁過左喇! o岩o岩check過日曆, 要到聖誕先有假放呀!

>>October 11, 2005 at 2:57:02 PM GMT+8

2005 年 10 月 9 日 星期日 【晴】

今朝早起左, 因為約左師傳9點3 o係金鐘等...
8點7先出門口, 但竟然9點3準時去到!
住大圍幾好, 去邊都好近... I love 大圍!
等埋師傅就轉巴士上山, 好緊張!
因為去d有錢人去o既地方... "香港木球會"
o係果度睇左半個鐘o野, 有錢人俱樂部環境都好d...
留左一個鐘就要走lu... 又要辛苦工作lu...
搭巴士去銅鑼灣再轉隧道巴返旺角,
未返公司前就係旺角行左陣睇電話,
我睇中左部電話比阿媽, 千幾蚊希望佢會開心啦!
偷左半個鐘頭懶就返公司做o野, 做到成點先去食飯...
下晝場就落左九龍城廣場, 搞到4點又要趕去紅磡灣!
出得街多, 皮膚都黑左d, 唔知係咪黑d好睇d呢?
6點鐘又放工趕返學, 今晚係我最唔鍾意上o既電學...
不過成堂都好比心機聽書, 仲派左assignment過兩個禮拜交!
要勤力d鑽研下先得喇! 越o黎越多o野唔識...
放學送到屋企無留o野食比我, 我就食左幾塊薯片就算數lu...
11點幾先入房online, 宜家12點半o岩o岩寫完日記!
想早d睡, 聽日遲d起身... 休息到夠先得!

>>October 10, 2005 at 4:45:56 PM GMT+8

2005 年 10 月 8 日 星期六 【晴】

嘩... 今朝好早9點幾比阿媽叫醒...
不過我都係無即刻醒度, 阿媽每5分鐘就叫一次!
10點頂唔順要起身lu... 因為今日要去掃墓!
好耐無gel頭喇! 唔... 都幾好睇!
搞到10點9先出門口, 臨出門口前阿媽話下晝帶我去做GYM...
嘩... 我都未去過, 都唔知要帶d咩o既!
搭的士去到沙田寶福山... 嘩... 我見到有條好長好長o既人龍!
原來係等搭扶手電梯上山! 駛唔駛咁多人呀! 去咁多次都無見過咁o既!
當然我同阿媽無選擇到等啦! 因為行樓梯都係果幾百級...
行到上去腳仔都軟埋, 搞掂晒表妹阿姨都未o黎!
阿媽等唔切表妹就去左做GYM先...
12點幾表妹先o黎到! 佢地真係勁啦! 要我lee個大少等!
到佢地上到o黎轉個圈就走lu! 係新城市行左陣就同大表妹、阿姨去做GYM!
二表妹因為未到18歲, 所以無得免費玩! 要一個人孤伶伶返屋企先!
我未去到就已經好緊張, 因為我太細膽喇!
登記都要比100蚊Locker按金, 好彩我有預備姐...
換衫時真係唔慣d人赤條條係我面前行來行去,
好彩我睇唔到佢地d重要部位姐...
好心佢地就唔好懶大方, 著番條三角啦! 我好介意唔小心睇到架!
1日免費會員可以玩1堂健康舞... 表妹就幫我報左2點瑜珈,
不過後尾就改左4點跳健康舞, 表妹就同阿媽玩瑜珈先,
我阿同阿姨去左玩腳踏機, 玩左成9個字消耗左450個卡路里!
d機真係幾先進喎! 真係大鄉里...
之後玩左d健身器材, 仲同阿媽玩跑步機... 跑左成功兩公里!
真係腳仔都軟呀! 我好耐無做過運動, 如果唔係有表妹佢地陪我實唔試玩!
到4點就跳健康舞! 嘩... 表妹仲話係初級! 我都跟唔到o既...
跳到成個傻佬咁... 原來跳舞係咁難! 睇電視好似好易咁!
好彩無人識得我姐! 唔錯... 幾好玩! 不過有d人跳得勁誇張囉!
4點10就落堂, 換衫走人lu... 不過d人又係赤條條囉! 眼冤囉!
做完運動好肚餓呀! 成日食左少少o野咋!
之後同表妹佢地去左新地市麥記, 食完行左陣, 之後去埋百佳買飯比細佬就返屋企lu...
宜家好鬼"支力"添, 又有少少肚餓添! 餐麥記都唔知當Lunch定dinner好!
轉頭睇下有無零食先! 食完早d訓... 聽日仲要早起呀! 真係唔想做...

>>October 9, 2005 at 2:42:13 PM GMT+8

2005 年 10 月 7 日 星期五 【晴】

Today Saturday, 話咁快又一個星期, 真開心返半日...
朝早返到公司諗住做paper work,
點知成朝做左少少, 電話就聽左好多個...
一心諗住星期六唔駛落地盤,
點知大地盤唔駛落, 個個細地盤就要我落去睇睇...
無晒mood, d文件o野真係有排都做唔晒喇!
仲要出門口前接到太子打電話返o黎搵我,
叫我星期一幫佢去地盤同個師傅翻譯英文...
唉... 佢就同仔女去澳門玩! Oh! My god...
我驚同鬼仔溝通唔到喎! 好驚添...
o係地盤做到點幾, 個心好想返公司開O.T.
但個肉體唔聽話要返屋企... 最後我咁懶緊係返左屋企啦!
沖完涼食完麵就開PS2 o黎打, 打到7點食完飯盒又繼續...
唔得喇! 我要勤力d溫下書... 如果考試唔掂就死喇!
唔知有無人識physics呢? 我想搵免費補習呀!
不過... 我諗都係要靠自己架喇! 唉......

>>October 8, 2005 at 3:18:27 PM GMT+8