2005 年 11 月 15 日 星期二 【微冷】

今朝又晨早過銅鑼灣, 不過我又遲到喇!
銅鑼灣唔知點解比我感覺唔同d, 日日落去行下都幾好咁...
不過我邊有時間咁得閒, 如果老闆再比job我, 我實推架!
2點鐘先返到旺角食lunch, 之後返公司趕工做太子o既o野!
唉... 都唔知個師傅寫咩, 搞唔掂! 唯有即call個師傅返o黎解話,
等到成4點幾佢先上o黎, 同佢對一次條數, 佢又做得唔清唔楚!
佢又不負責任, 叫我幫佢做手尾, 搞到我勁勞氣, 係公司大大聲咁話佢!
我諗我d同事都無見過我咁, 但我真係頂佢唔順, 唔鬧唔得...
結果淨係同佢對數都對到6點幾, 對完我又要自己由頭執多次,
跟住仲要打番晒出o黎, 今晚之前要send比人!
本來今晚要返學o既, 結果我放棄左無返,
今次係返IVE咁耐第一次無返咋! 又無得睇女子手球隊練習添!
阿媽9點過d打o黎, 問我放學未, 我話我多o野做無返學呀!
無理由佢會lee個時候打o黎架, 原來佢o係阿姨度走o既時候,
唔記得"羅"埋晚飯一齊走, 諗住叫我上去"羅"...
唔"羅"又無飯食喎! 做到10點鐘我最後一個走,
又係我最後鎖門, 夜晚一個人o係公司都幾驚架...
行緊去阿姨度o既時候, 個熱情o既同學仔又打o黎,
問我做咩唔返學喎! 又話我無返, 驚我唔知考試果d o野,
又問我做咩唔返, 又話我咁辛苦呀咁! 所以打o黎了解下...
我真係頂佢唔順, 都放左學成半個鐘啦! 佢對我都幾有心喎!
收線時仲話唔阻我休息喇! 星期一見啦咁... Oh! My god 呀!
"羅"完飯表妹仲提我28號去迪士尼, 我會記得架喇!
電視都有賣廣告啦! 去迪士尼做足準備, 玩得開心至醒得你呀嘛...
返到屋企都成11點鐘lu... 食完飯睇埋阿旺洗埋碗都成12點喇!
打埋日記都成12點9喇! 隻眼仲好"支力"添... 真苦命呀!

＊勁多人都話我黑左好多呀! 連宜家唔係成日去o既餐廳d人都係咁話...
但我又唔覺o既, 出得街多都會黑d o既咩?

>>November 16, 2005 at 4:50:47 PM GMT+8

2005 年 11 月 14 日 星期一 【微冷】

唉... 今日勁唔多開心! 朝早已經多o野架啦...
成點鐘先去食飯, 點知返到o黎太子就搵我幫佢做o野!
頂... 佢4點幾就要搭飛機去北京, 但我就要幫佢做手尾...
個project我又無跟開, 唔知頭唔知路, 仲要我聽日send比人添!
我即刻頭都大埋, 點做呀! 勁唔開心, 覺得勁煩! 好唔想做呀!
再係咁我真係就o黎會傻... 我頂唔順咁多o野做呀! 我想放棄喇!
差唔多7點我先o係公司走, 如果唔係今晚要返學, 我諗我真係要開夜呀!
我仲帶埋d o野返學校做, 聽朝又要出去開會, 我真係唔知點死比佢...
所以連日記都係o係學校打埋, 爭取時間呀嘛!
個頭又開始痛喇! 頂頂頂......
上緊堂做緊公司o野o既時候, 係前兩行個男仔真係佩服佢...
佢竟然可以o係度上網睇鹹片, 3個鐘頭唔停咁睇!
我真係頂佢唔順, 雖然大家都係成年人姐, 但都唔駛咁大膽呀嘛!
仲有個位好熱情o既同學仔, 今日問左我勁多o野, 問我個名點寫...
又睇住我做公司o野, 仲比成包糖我請我食添! 係咁咁簡單呀?
我都唔知點面對佢好! 唉......

>>November 15, 2005 at 3:49:14 PM GMT+8

2005 年 11 月 13 日 星期日 【晴】

今朝要早d起身, 因為約左師傅9點o係銅鑼灣等...
不過我都係遲左3個字, 近排真係懶左好多!
搞成朝... 都解決唔到d問題... 但d人又要係咁追我...
唉... 我覺得好難做人呀! 順得哥情失嫂意...
下晝就過左紅磡, 睇左班師傅一陣, 咁o岩公司車送o野o黎!
我就跟順風車返公司lu... 點知個頭就開始痛, 我就小睡左陣...
返到公司個頭仲痛, 搞到我都無心機做o野!
我又無頭痛藥, 唯有食左粒感冒藥睇下掂唔掂... 點知都係唔得!
捱到6點幾, 點知收到個IVE同學電話, 佢一開口就叫我中文名!
頂... 好熟呀! 我鍾意人地叫我Sunny多d喎! 又問我返到未...
返到去, 佢話知道我今年考英文會考, "羅"左本2004年o既參考試題比我!
嘩... 普通同學有無咁熱情呀? 我真係驚驚地囉! 我鍾意女仔架喎...
阿sir講書, 我就訓覺, 可能d藥力發作! 但我個頭都仲係咁痛!
訓左一粒鐘, 我淨係覺得勁"支力"囉! 好眼訓...
好難先捱到放學, 返到屋企又要沖涼食飯, 又要睇阿旺同打日記...
要返學個幾晚d時間真係唔多夠, 起碼成點幾先訓o既!
不過今晚會早d喇! 因為個頭痛, 都唔知咩事! 唉......

＊下面個測驗幾準架! 大家試下啦...
(不過得英文, 第一格寫自己名、之後3格寫自己喜歡o既人)
http://www.doctorathome.com/love/love.php?e=4s4spleegfg54--bj-yb4s

>>November 14, 2005 at 4:20:35 PM GMT+8

2005 年 11 月 12 日 星期六 【晴】

好慘呀! 今日要返工, 不過我無準時返去!
校左個鬧鐘9點9, 點知10鐘先肯起身...
搞掂晒都搭半喇! 食埋阿媽煮o既早餐, 11點先出得門口!
返到去11點半, 我諗住會有人返, 點知無人... 要自己開閘...
今日o既工作係包裝, 包成廿幾支長過人o既燈!
拆相、搬燈、剪包裝紙、包燈... 又要起身、又要蹲低...
搞到點幾太子返o黎, 佢話做咩lee d o野唔搵人做喎! 唉... 我放心唔落囉!
整花左就大鑊喇! 佢入左office一陣, 就搬左相A4紙走!
哈... 太子都要返o黎偷紙走! 包完都成3點幾... 腳仔都軟呀!
之後就坐番埋位做文件o野! 做做做... 做到5點幾就走人lu...
未試過鎖閘, 好驚熄漏o野添! 希望無啦!
返到屋企無人, 沖涼、食阿媽煮定o既晚餐就開始睇電視...
連續睇左兩齣電影... 第一套"肢解狂魔"... 一個人睇都幾驚架!
第二套就係"赤裸特工", 唔好睇到赤裸就以為3級喎! 其實都無o野睇o既...
睇完都10點幾lu... 入房online... 今日比"大"表妹欺騙左! 心淡晒啦!

＊下面個測驗幾準架! 大家試下啦...
(不過得英文, 第一格寫自己名、之後3格寫自己喜歡o既人)
http://www.doctorathome.com/love/love.php?e=4s4spleegfg54--bj-yb4s

>>November 13, 2005 at 3:21:56 PM GMT+8

2005 年 11 月 11 日 星期五 【晴】

咁快又到禮拜六lu... 不過無咩感覺... 因為日日都多o野做!
做到禮拜幾都唔多知, 真係無咩樂趣lu...
Lunch太子請飲茶, 聽講遲多個幾月會請個part time女仔返o黎做o野!
哈哈... 係時候搵d妹妹返o黎啦! 公司都無咩年輕人...
下晝要繼續開工, 因為勁多o野做無得放半晝!
不過5點鐘就走人lu... 去左新城市搵阿媽同阿姨...
阿姨買個金壽桃送比人, 我都係第一次見人買咋!
買完經過佐丹奴, 終於見番好耐好耐無見o既中學朋友...
可惜佢忙緊, 無講到o野... 只係眼神交流左一陣咋!
不過佢都好似唔同左, 成熟左好多... 已經唔同以前咁細路女lu...
之後上左阿姨度食飯, 表妹佢地通知我28號去迪士尼,
不過得6大張免費飛! 哈... 唔駛錢我實去架! 請假都要去呀!
諗諗下... 去埋香港果個, 仲爭美國果個未去過咋!
所以... 我已經諗緊淨番果個會同老婆仔去lu...
但我好似諗得太多喇! 宜家連女朋友都未有...

>>November 12, 2005 at 3:49:20 PM GMT+8

2005 年 11 月 10 日 星期四 【酷熱】

下晝去左銅鑼灣禮頓中心, 我像曾經o係上面d寫字樓做過!
我見我等o既人未到, 就睇下d公司牌, 但已經唔見左間公司lu...
唔通執左... 不過就算無執, 我都唔會上去探人啦! 因為當初係佢地炒我o既!
諗起個時, 我已經係第二次比人咩... 係比人咩果一刻真係好down!
不過宜家又覺得個時經濟不景, 好多人都係咁!
同埋如果唔係當初佢地唔要我, 我宜家都唔會進步左咁多!
所以佢地放棄我係佢地o既損失... 其他都係一樣... "希望在明天"
本來6點鐘o係地盤走想返公司架! 點知都係一個懶字... 唉!
返到大圍一個人行百佳, 買左好多o野食呀!
不過諗落自己o係屋企都無咩時間比我食o既... 希望唔會買返o黎擺啦!

>>November 11, 2005 at 2:51:11 PM GMT+8

2005 年 11 月 9 日 星期三 【晴】

今朝7點9準時起身, 因為約左老闆9點同個師傅落地盤睇o野!
唉... 都好耐無試過咁準時返工! 越返就越遲...
不過無人出聲... 無咩所謂啦! 同師傅落左銅鑼灣睇左成朝o野...
遲d我諗都要成日去添呀! 不過都無所謂o既...
係正SOGO阿隔, 都無咁悶嘛! 起碼有o野睇先啦...
食埋Lunch就返公司做o野, 作封英文信都作左我成個鐘!
又唔係長, 係唔知點用d生字姐... 讀左咁多年書, 都好似唔多掂咁! 真失敗...
做到成7點半就走lu... 其實仲有好多好多o野做架!
不過... 過左6點就係無心情做lu... 放左工上左阿姨度食飯,
上到去3個表妹同細佬已經食緊lu... 8點鐘之嘛! 咁都唔等埋我...
唔知表妹佢地係咪真係去海洋公園呢... 佢地成日都係得個講字!
不過我今個月7折咋! 我覺得幾抵呀! 唔去就浪費左個優惠喇!
今晚決定早d訓! 11點半就覺得"支力"喇...

>>November 10, 2005 at 3:29:49 PM GMT+8

2005 年 11 月 8 日 星期二 【酷熱】

朝早真係唔想起身, 好辛苦、好"支力"...
成身都好似手軟腳軟咁... 唔知係咪琴晚果d藥o既問題呢!
今日好唔開心, 諗左好多o野, 全部都關於工作o既...
我d唔好o既時開心時唔開心o既情緒返左o黎!
我覺得好大壓力呀! 我真係唔想做喇! 真係無精力去諗o野!
1個人做3個人o野, 又無人幫到手, 我真係唔知點算好...
但唔做屋企點算呢? 我唔食... 個個都要食... d細佬又無咩出息!
唉... 我唔想做大仔! 但已經無得揀lu...
究竟我自己係咪睇得自己太重要呢?
如果"佢"係度就好lu... 唔知佢宜家去左邊度呢?
如果佢睇到我o既感受, 返o黎教下我點做啦......
Lee幾日我都覺自己講o野好似好燥咁, 唔知點解好容易就發脾氣!
但好似無人體諒到我咁... 我唔介意做衰人, 但我希望你地真係會識諗囉...

>>November 9, 2005 at 4:39:37 PM GMT+8

2005 年 11 月 7 日 星期一 【酷熱】

嘩... 今朝真係無覺好訓呀! 5點幾先上床訓, 雖然好快訓著!
但係到9點幾就有電話打o黎, 本來我好想熄電話, 但我知做人要有責任o既!
轉個頭又訓番, 但10點幾又有人打o黎! 到12點幾我個fd又打o黎!
真係訓完好似無訓過咁! 又訓唔番, 唯有起身啦!
頭好痛, 又有黑眼圈, 無人o係屋企, 自己煮o野食... 真可憐!
仲要琴晚o係地盤感親, 搞到喉嚨勁痛! 唉...
食完眼禮拜一晚o既"阿旺新傳", 睇完入房online!
4點鐘就出去銀行轉錢, 轉完返樓下商埸剪頭髮...
返到屋企... 個寬頻電視師傅到左, 搞到6點幾先走!
原來我屋企真係勁多垃圾, 唔多掂! 我換埋衫出門口都成6點9 lu...
返到去7點5, 遲左成大半個鐘! 成堂電腦堂都無咩教...
出左出睇人打排球, 仲睇有幾次添! 琴日篇日記都係o係上堂打!
打完o岩o岩好放學, 勁"支力"呀! 上到巴士就訓著左,
架車過左站都唔知, 遲左一個站落, 好彩行番轉頭都唔係好遠姐!
都未試坐車訓過龍o既... 真失敗! 唔知係咪訓得唔好, 今日成日都好燥咁!
返到屋企沖涼、食飯、 睇"阿旺新傳", 之後入房打日記!
真係開始頭頂唔順, 周身痛! 開一晚通宵, 訓10晚都補唔番呀!
通宵錢真難賺呀! 辛苦命呀......

>>November 8, 2005 at 4:32:57 PM GMT+8

2005 年 11 月 6 日 星期日 【微冷】

今朝勁忙, 返到公司9點幾就收到電話...
九龍城個地盤叫我要落去睇睇o野! 我迫於無奈應承左...
跟住10點幾, 紅磡個地地又打o黎叫我落去!
嘩... 我仲約左下晝兩點睇新地盤架! 我一個人—日點走3個地方呀!
11點幾我先開始去第一個地盤... 搞掂都成點幾, 食埋飯都差唔多兩點...
然後又要趕去銅鑼灣, 係九龍城都唔知搭咩車,
結果過左海要行兩、三個字先到怡東商場... 自己一個人睇左個幾鐘,
就決定返公司"羅"部notebook今晚去九龍城開通宵...
部notebook鬼死咁重, 仲要"羅"埋返學添! 抄晒d files落notebook都5點幾lu...
結果我放左紅磡地盤o既飛機! 唉... 我真係好忙呀!
夜晚返學, 仲要測驗添! 不過我都有出貓, 應該無問題掛!
放學就約左慧姐食飯, 佢提意去西九龍中心KFC... 我當然無所謂啦! 有人諗埋...
我仲不知不覺講左好多秘密比佢聽添... 仲有d好私人o既o野都講埋!
唔知點解我咁信得佢過o既! 哈... 可能佢似家姐o既關係啦!
不過... 希望佢唔好唔覺意咁講左出o黎啦! 唔該晒!
食完送埋佢搭地鐵, 我就搭小巴去九龍城開夜lu...
o係小巴打比EVA姐, 點知佢11點就已經訓左! 嘩... 平時佢都無咁早架!
11點幾就到左, 得一個師傅o係度, 仲有兩個未到...
我就陪佢等, 仲要等埋政府d人... 12點幾終於開得工, 我就o係地盤office做文件o野!
做做做... 做到成4點幾班師傅就搞掂晒! 我都無諗過咁早o既!
本來我想直踩到8、9點, 但師傅話"你返去先啦!"
佢o既一句話, 我就搭的士返屋企, 搭左成60幾蚊... 好貴呀!
搞掂晒沖埋涼都5點幾, 終於可以大覺訓喇! 真係好好好"支力"呀!

>>November 8, 2005 at 4:07:55 PM GMT+8