2005 年 8 月 10 日 星期三 【晴】

放工行返屋企時撞到阿楷, 佢就叫我上佢屋企,
佢話轉頭一齊行返我屋企樓下"羅"車喎!
佢姐係想我陪佢行姐... 真係夠朋友喇!
同佢邊行邊傾, 佢又講起阿臻...
我終於有機會講我同佢散左,
佢講左佢o既想法我知... 點解個個都係咁覺得o既!
上到佢屋企, 當然第一時間同佢細佬打機啦!
打左兩舖, 就要陪阿楷去"羅"車lu...
返到屋企見到阿妹, 佢好耐無返o黎喇!
兩歲幾真係好得意, 佢跟左我入房,
見到我個手機, 就同我講睇姐姐... 睇姐姐...
因為我之前比佢睇過我同阿臻張相,
所以每一次當佢見到我個電話就話要睇姐姐...
我話佢知無左喇! 哈哈... 但係佢又唔明我講咩...
最後我都比左佢睇! 如果佢係我個女就好lu... 可惜佢太曳喇!

>>August 11, 2005 at 2:57:49 PM GMT+8

2005 年 8 月 9 日 星期二 【微雨】

今日會考放榜, 唔知佢考成點呢?
今日會考放榜, 我就諗起我以前o既情景,
8年前, 我仲未識諗, 淨係識玩,
所以成績唔多好, 得個幾分...
唉... 如果所有o野可以重頭o黎過就好喇!
可惜... 無可能啦!
夜晚6點半先返到公司,
個同事兼朋友叫我去食飯,
本來諗住唔去, 點知最後都去左...
仲要同佢女朋友一齊食! 唉... 就"羅"景喇!
之不過睇見佢地都相處得幾開心,
我都覺得"蹬"佢地高興...
我都希望我將來仲有機會拍拖啦!
我開始對感情o野有少少害怕...
希望奇蹟快d出現就好喇!

>>August 10, 2005 at 1:24:32 PM GMT+8

2005 年 8 月 8 日 星期一 【酷熱】

今日一起身就覺得好累,
真係好想放長假......散下心!
下晝去左地盤, 做到7點先走...
唉... 我真係第一次做地盤要成日咁遲走!
返到大圍, 又上左阿楷屋企"羅"o野比佢...
之後... 緊係打番兩舖機啦!
打打下... 佢講起我女朋友(ex.)
我只係答佢哦... 唔好講佢... 係喇係喇...
我好想講比佢知我散左,
但係... 個時太多人係度... 我講唔出口!
我覺得唔知點咁... 好似呃緊佢...
我諗係時候搵個機會講佢知,
我唔想人地突然講起佢,
我唔知比咩反應人地好...
我諗我係時候要醒醒喇!
唔好諗埋d不切實際o既o野喇!

>>August 9, 2005 at 3:24:39 PM GMT+8

2005 年 8 月 7 日 星期日 【清涼】

今朝一落到地盤就同人嗌交!
唉... 我以前都唔係咁o既!
係佢太煩? 定係我心情唔好呢?
食完Lunch返左公司,
坐左兩個鐘又落返去,
因為真係好多o野做!
6點半放工就返屋企...
去到大圍就上左阿楷屋企同佢細佬打機,
打左一舖, 阿媽就打o黎叫我出新城市,
完來阿媽叫我幫佢買書,
嘩... 買5本書埋單要成7舊水...
真係貴呀d書!

>>August 8, 2005 at 2:27:35 PM GMT+8

2005 年 8 月 6 日 星期六 【清涼】

今朝訓到12點先起身, 都訓得唔多好...
出到廳, 阿媽同細佬已經鎖緊門出去...
姐係又得番我一個孤伶伶係屋企,
食完阿媽煮定o既麵之後就無咩做lu...
悶到4點鐘就出左去搵阿媽同大表妹佢地睇電話,
介紹左部電話比大表妹, 唔知佢諗成點呢?
跟住就同阿媽去買定飯盒今晚食...
返到去沖完涼食完飯就係梳化訓著左,
好眼訓好眼訓... 就係咁訓左半個鐘...
今日過得好平凡, 成日都胡思亂想...
我已經叫自己唔好諗唔好諗唔好諗唔好諗唔好諗 x100...

>>August 7, 2005 at 1:04:06 PM GMT+8

2005 年 8 月 5 日 星期五 【清涼】

今日算係我工作上比較輕鬆o既一日,
可能係星期六o既關係啦!
朝早同老闆出左地盤開會,
開完會就一齊去左飲茶,
飲完茶就差唔多兩點, 咁就放工lu...
放工o既一刻... 好似同平日唔多同咁!
好似一日裡面仲有好多時間剩o既感覺!
就係咁... 我就開始諗起佢...
返到屋企沖完涼就開始睇一星期o既"尋秦記",
睇睇睇... 睇到差唔多6點...
睇完o既一刻, 我又開始諗起佢同好掛住佢...
可能平日我工作忙而可以暫時放低佢,
之但係今日... 我逃避唔到...
我諗起好多以前一齊o既日子...
我知我應該向前看, 之但係我暫時做唔到...

>>August 6, 2005 at 1:36:40 PM GMT+8

2005 年 8 月 4 日 星期四 【清涼】

琴晚諗住開冷氣會好訓d... 結果都係咁!
唔知係lee排精神緊張, 定係......
今朝收到阿臻o既sms, 我好意外...
其實妳都無做錯到, 唔駛覺得自己對我唔住o既!
話唔定係我唔多好, 係我o既錯呢!
話咁快就過左5日, lee個禮拜我真係忙左好多,
日日出去地盤仲多過係公司,
聽電話次次都比人講d唔好聽o既說話,
所以我係返工o既時候都無咩時間去諗私人o野...
可能係上天o既安排掛啦! 我都唔知忙好定唔忙好!
下晝我竟然忙到3點先去到第二個地盤,
去到先食我o既lunch, 之不過我都係食左個餐蛋治...
我都係第一次咁咋! 又忙到7點先散場...
再係咁... 我將會...... 係咁先架喇!
返到屋企, 發覺自己黑左,
隻手好似有兩隻色咁... 唉......

>>August 5, 2005 at 3:25:06 PM GMT+8

2005 年 8 月 3 日 星期三 【清涼】

今朝唔駛講又"札"醒左...
仲要6點幾添, 訓醒訓醒訓醒訓醒...
都唔知係咪有病...
唔開心... 今朝又比人地話...
頂佢地個肺... 哼......
下晝又去左兩個地盤,
仲要等左成大半個鐘先有車,
搞到我差唔多6點先落到去,
做到7點先係地盤走...
真係唔開心呀!

>>August 4, 2005 at 2:09:51 PM GMT+8

2005 年 8 月 2 日 星期二 【酷熱】

今日又"札"醒... 頂頂頂...
條頸又訓得唔好, 頸緊緊咁...
人黑起上o黎咩o野都唔好o既!
今朝11點出左公司去中環,
下晝諗起想食麥當奴,
就去左食lu... 不過得自己係中環食...
中環d人真係唔同d, d人都靚仔靚女d o既...
食完就搭船去左紅磡, 搭船o既時候...
諗起佢, 因為曾經都搭過! 不過...
去到做做做... 聽聽聽... 講講講...
就係咁就去到6點幾喇! 諗住一早返公司做o野!
點知... 諗左好耐都係返左屋企...
比魔鬼打贏左天使...

>>August 3, 2005 at 3:22:51 PM GMT+8

2005 年 8 月 1 日 星期一 【酷熱】

今日又7點醒... 真係唔知自己做咩...
今日勁黑仔... 勁唔開心...
朝早晨早已經要落地盤,
仲要幾廿萬樣o野同我講,
做lee樣做個樣... 咁都未算最慘...
最慘係比個安全官做到我無戴安全帽,
唉... 好彩佢影唔到相同無帶筆...
如果唔係要罰成$1500蚊...
後尾比佢罰左出地盤門口用大聲公提人戴帽,
頂頂頂... 罰企左10分鐘, 我都係講過1句o野,
因為佢走左去, 又好彩無咩人出入...
頂頂頂... 好似罰小學生咁...
搞到我係個心度用xyz*%#@咁咀咒佢...
就係因為佢, 本來已經唔好o既心情, 就跌到落谷底...
下晝就去左第二個地盤, 等左成兩個鐘先等到我想等o既人出現,
唉... 差唔多成6點先返到公司...
返到公司又係咁做文件o野, 做做做做做.... 做到差唔多9點先走。
唉... 走o既時候先覺得自己寂寞, 又開始諗o野...
我真係覺得自己身心疲累喇!

>>August 2, 2005 at 3:28:31 PM GMT+8