2004 年 10 月 12 日 星期二 【晴】

今日好累呀....

返會展，同樣都係九點鐘返工，但係我8點先出門口囉，但係如果我返以前份工，我係要七點三出門口，搭地鐵真係好快既，只係無得坐...係地鐵到好多人，好似成個地鐵都係人，多到好似一塊塊砌圖咁，係上面望落去真係可以用人砌出一個圖案，真係眾生皆苦。

一個人唔知點解要行得咁快，腦中想著又是另一樣東西，一個人返工的時候不知是不是太空閒，所以特別多野想?見到香港站國泰的新廣告寫著「 往前行....沒有觸不到的天空」，但我很想話俾國泰知，往前行是觸不到天空的，因為天空永遠在你的頭上，不在你的前方，你認為只要努力在社會中便可以摸到最美麗的藍天，但其實，只有你抬頭，不對自己失望才可以看得見那片最美麗的澄空。


好快返到去，已經見到好多鬼佬排隊，今次電子展都幾大型呀，好多外國人黎，同我part0個個女仔讀緊IVE，剛剛中七畢業，不過個感覺好似同我差不多。我俾派去hall 5派小冊子，都幾開心喎，又唔係好悶，因為成日有不同的外國人問路，佢地好多都好鬼馬，hall 5前面有福好大既紅外線測溫度既"芒"，只要有人 經過，都會見到佢地全身熱既分佈，好似farnkie最鐘意既鐵血戰士有同樣的function，d外國人個個經過都玩，但係又傻仔到唔知個cam係邊，有個仲無啦啦扮死，訓係地下添，笑死我。

不過企成日都幾累0架，今日係度撞到好耐無見既andrew，估不到佢仲認得我喎，佢好似又瘦0左高0左同型0左，佢做緊engineer呀，有時見到佢地d讀engineering既人又容易搵工，好似一畢業已經係一個專材咁，但自己就好似乜都唔係咁，講真，語文又有咩專業?除0左教書之外...諗到咁又覺得有d灰，不過我知道，終有一日我都可以做到自己鐘意做既事。

andrew都算係我半個莊員，如果當年佢無quit，唔知而家會不會好熟?有時候，做唔做到莊員都係一種緣份， 邊個同邊個一齊，唔同邊個一切也是一種緣份，但這種緣份由誰決定?由天，由人定由自己呢?

之後我個好莊員肥肥黎搵我喎，因為佢公司都要黎睇，佢等埋我放工，我地就去0左搵terry，因為佢地今日BSE同學聚會喎。

出到尖沙咀，竟然撞到我慧豬，佢對住部出閘機發脾氣，原來部機夾住佢張飛，攪到佢想出又唔得，想搵人黎整又無職員理佢。係佢忟緊既時候一嬲就咩都睇唔到，terry同肥仔見到都嚇0左一嚇，不過我見怪不怪，因為我同佢係同一類人，我好施施然咁幫佢拎番張咭出黎，佢就出到閘走0左喇。 事後肥肥同我講話佢好似我 ，梗係啦，我地好朋友黎0架嘛，可能以前同佢一齊既十幾年因為大家都係同一類人，所以都唔覺有咩問題，別人會覺得我地好似神經失常咁，其實只係小事一棕0者，不過個情景，又有d攪笑。

陪佢地行0左陣街就返屋企，去青衣城阿咕又咁0岩係city放學，所以我地就係青衣城行0左陣，希望佢會快d開心番啦...過多幾年，我們不會在意那些無聊人對自己做的事了，最重要的是自己不要同流合污，做番自己未得囉，如果做人成日因為其他人點做而自己又跟住做d自己唔鐘意既事 ，到最後，你發現你不見了自己，咁未仲損失得多。

今日好累呀
早d訓先
聽日都係搭巴士
有得訓

聽日約0左玲芝食飯喎
細 k黎嘛?

>>October 13, 2004 at 4:51:37 PM GMT+8

2004 年 10 月 11 日 星期一 【炎熱】

今日我又去0左行山，真係好似日日都出街咁，好似唔係咁好。

因為肥妹話想train下，又要唔好咁辛苦，又要舒服，我就同0左佢去南丫島，都好耐無黎lu...自上次自己上莊時遨遊組同佢地一齊出隊，唔知仲記唔記得d路呢?

今日好hea，十一點先俾佢叫醒0左，然後一點先去到中環，好肚餓，食埋野就兩點，去到碼頭，原來成三點先有 船去索罟灣，我地唯有行下IFC先啦，入面真係好大好靚喎。

之後坐船，13蚊，好貴...
坐船我地兩個都有傾0左好多野，去到索罟灣，就開始行喇，碼頭前既空地就係當年遨遊既大合相位。一路行，唔算好記得路，好彩都唔係好難搵，我地係咁上呀上，去到當年撞到個押尾帶番個member返落黎0個位肥妹就話要抖，記得當年有個member 肚痛，唔係，係有個遨遊組成員頂唔順頭暈要落山，我地幾個就帶番佢落去，d人影好似係我身邊經過，但好快又消失了。一切當年的事，也只有笑著訴說吧了。

我地都係hea上﹐上斜我都辛苦0架，慢慢下，又好快去到直昇機場，呼..好大風呀，好舒服。肥妹似乎都好鐘意呢度喎，我地影下相，傾下計，當年既倣鎚石，咩元陰石，九曲地洞，我都唔記得點入去lu...我地行下傻仔郊遊俓，之後就落番去素罟灣lu..落到去，我認得當年散0個位就係係呢度，阿frank仲昆0左我話行去榕樹灣好近，攪到遨遊後仲要行多個山先去到榕樹灣。

當年都有一個咁靚既日落，諗起0個時既自己因為形象關係，又係幾惡既....

今日肥妹同我講話覺得我以前無咁聽人講野，而家會包容0左多d...係咩?乜原來以前佢同小孩都覺得同我溝通唔到既咩?唔，不過唔緊要啦，我已經學習緊無咁頑固。

之到黎食豆腐[花，凍既，好好味，老板娘見我地食得咁開心，請我地食0左碗熱既，嘩，原來熱既仲好味呀，好滑，真係入口即融，好味...

然後我地就搭船去香港仔，我記得當年阿heidi 隻手整親添呀。去到香港仔就搭車去旺角。後來我地係佐敦落0左車，好耐無去澳洲牛奶公司食添，好掛住佢d抄蛋同厚多士...後來行一陣，又見到d好grant既裙，因為要幫helen做姊妹，所以都係買條啦，試試下，又幾靚喎，佢話全部都係得一條，然後我就買0左，好貴呀，我返part time的錢就咁無曬...仲可能著得一次咁大把，christine幾時結婚呀?咁我就可以著多次的了~

不過有friend 結婚好開心，有得做姊妹就仲開心，仲要全部姊妹都係旅協人 ，我諗緊如果到時到我結婚時可能好多姊妹， 因為我ｄ好朋友實在太多，一陣間成廿個未好唔掂?哈哈，不過咁快諗結婚做咩丫，遲下先算。

今日睇分秒必爭又聽到首moon river，不過係泰文版，我已經聽過法文版同英文版，越來越喜歡這首歌。

今日一口氣send０左十封信出去，希望下個星期有工見喇，上次同班舊同學食飯話我會有好事降臨，希望係關於返工０架喇。

死梗喇，聽日返八點九，而家已經三點，都係快ｄ訓。

>>October 12, 2004 at 7:02:32 PM GMT+8

2004 年 10 月 10 日 星期日 【晴】

咁又一個星期了
每次到星期六日就開心
因為有得同d莊員行山
到星期一就有d驚
因為又一個星期了
一個月只有四個星期
好快又一個月兩個月三個月
然後一年....

今日無乜特別
下午要到灣仔會展briefing
因為我星期三至星期六係0個度返電子展的part time
如果大家得閒係港島都可以去探我0架
哈哈
聽講玲芝係會展隔離間grant hytt做
等我搵佢放工食飯先...

個briefing都ok啦，係入面見到個幾靚既年輕女子，我想和我差不多，或者大我少少掛，但係已經係入面既攪手，負責呢個展覽既planning，佢仲識得多國語言，真係好勁，我係度諗點解人地都係廿幾歲，但係人地就可以用自己既design但我就仲係傻下傻下?我都要努力先得。我想學西班牙文，希望我今次唔會好似我上次學法文同日文咁，學0左個初級就無興趣學埋落去喇，不過都要等我搵到份隱定既工先，我有好多野想做，都有好多野想幫媽媽買....

之後搭叮叮去0左行銅鑼灣，其實我幾鐘意搭叮叮，又平又舊，好似坐係上面就返去五十年前既香港咁，如果新界都有就好喇。行city super，見到個樽，忽然間心血來潮，想整一樣野，希望自己可以keep到，不過keep得到又未必係一件好事，唔緊要啦，一切隨緣。

之後就約0左小孩媽媽同強仔去旺角，幫強仔買電話，後來原來肥妹都出黎喎，我地幾個出到黎，又要強仔陪我地破費食飯添。因為返會展要著黑色西裙，但我0個條又係灰色，所以又要俾錢買喇。去0左旺角間G2000試，都唔靚既，之後就去0左尖沙咀間mastina， 途中係partline見到間賣公仔既鋪頭，好想有個畢業公仔呀，如果有人送俾我就好喇，我同強仔講0左想要邊隻款喇，哈哈，莊員們，難為你地了，你地唔駛送花俾我0架喇。

係mastina都買到，小孩有VIP咭，真係平好多呀，等我唔駛貼錢打工先啦。後來我地幾個就行下行下就去到厚福街，見到間日本野拉麵好似幾好食咁，就入去食喇， 我叫0左個牛肉拉麵，小孩同肥妹叫0左個香蔥拉麵，強仔要0左個咖喱牛肉拉麵，好好味....

有肥妹係度真係會嘈d，佢話玩冰上曲棍球喎，不過俾小孩笑佢香港有幾多冰可以俾你玩，我地講起雷利，雷利個training camp 同周杰倫演唱會撞0左期，點算呀，我打得好辛苦先買到飛，我唔想唔睇。聽講佢個training camp 都幾激，肥妹話想行山train下喎。

食完都十點lu，一齊行返去佐敦，睇0左陣野，然後就搭地鐵返屋企。

唔知點解今日諗下諗下，又覺得五年係好長遠既事，五年之後大家會不會改變 ?即使生活變，環境變，對大家既心又會不會變?仲會希望開間cafe嗎?如果佢地結0左婚，仲邊有錢同前鋪後居朝早返工，夜晚看鋪的生活?唔，五年前我讀中六...其實d中學同學都無乜點變丫...只係變得更加成熟而沒有變得更加世故，希望五年之 後大家仍然會記住呢個承諾，我好好記性0架...

>>October 12, 2004 at 6:19:08 PM GMT+8

2004 年 10 月 9 日 星期六 【晴】

今日好開心
因為有得行山
好似好耐無行山....
可能係因為前0個幾個星期都係beachbeach同獨木舟...所以比例上少0左行山。
今日去大嶼山既水城劍閣，仲以為係hea野添...(不過可能對於以前既我地黎講都係hea野)
點知綑邊綑到六點幾呀....
主席係度嗌曬救命呀...
我返到屋企都覺得很累...膝頭、腳同眼都覺得累呀...難道真的不復當年?

Frankie因為怕人遲到，所以約0左八點半東涌等...今朝七點肥肥打俾我，我仲訓緊，佢話我答佢我出門口喎，我都唔記得，乜我會咁樣既咩?睡夢中說的東西又怎可以計數?之後阮美同主席都打俾我(今次俾我用到激將法，主席今日為0左啖氣，幾準時呀。)但係我都未醒，因為琴晚返到屋企太夜喇...哈哈﹐我好懶...

八點先出門口，搭錯車，攪到成8:45先到，得主席一個係度，強仔仲勁，八點俾我地嚕醒，都係因為琴日睇得太夜啦。去到東涌食埋野，買埋公仔麵就出發。搭車去水口村，落蘿箕灣開始行，蘿箕灣個camp site好似狗嶺涌0個個，有toilet有水源，不俗。

我地行行重行行，帶隊(frankie同強仔)0個個見到今日班member 咁hea(當然係我、主席、阮美同肥肥啦)，見到陰位就抖抖，佢都有催我地行0架，0個時0既我地成日以為今日條路係hea0既...不過呢度都幾靚，好舒服，有d芝麻灣feel，又有好多好似石室既石洞俾我地訓同涼，好大風0架...勁爽，我地去到穿洞石，平時係相見得多，都幾得意喎，之後有個生死位幾驚呀，一跌落去就係海洞...過0左0個個驚險位就見到水城喇，氣勢不錯，但影相又影唔到，各位想睇就自己去啦。過0左水城，就會見到劍閣，過呢度都有d難道0架，要係條好斜既隙度壁虎落，一跌又係成日損曬加跌落水。過埋呢度，過多陣就會見到茶果洲同埋塘福，當你以為就快到喇，但原來唔係喎。

好肚餓呀，食野先喇，咦..又有人唔記得帶煲黎?好彩今次唔係我0者，點算呢?買曬丸同公仔麵...好彩阿frank有個超細兜兜都可以煮得野食，只係細0左d0者，不過我地都用我地既智慧將d丸切細同將個公仔麵一分四，仲用麥記既紙袋裝住d麵，好攪笑，亦都好wild...

好鐘意係d海風同石上飲凍野同食公仔麵...d野飲好似會好飲d，哈哈，平時我好少食公仔麵同飲咁多甜野，但係係山度飲，特別有雅興。好舒服~

食飯既時候傾傾下又傾到我地既大計，哈哈，就係開間cafe，呢個係我呢十年既目標，其實呢個wild的cafe係我同某d莊員既腦中已經出現0左好耐，不過曾經有人話過我又無個出色既大廚係度又點會成功之嘛，我地幾個傾得好開心，諗緊係邊開，點設計，有咩服務...同埋大家要係五年內儲到錢然後一齊開...好期待那一天...好想快d有錢開就好喇...我要努力賺錢，遲下學整咖啡先。

食完野其實都四點，我地又起行，但原來條海岸線係勁長0架，好累呢....太陽都下山了。

澗水過，原來成個海都好淺水，好似海下咁，好靚好舒服...我地係海中心行都無事，行到出去，又係水口村，搭車去東涌，佢地去食飯我就返屋企lu...

今日行下行下，唔知點解忽然諗起赤洲的石同綑邊，自己第一次參加既旅協活動就係去赤洲玩，第一次帶freshmen的也是赤洲，還有芝麻灣，那時的自己，已經離我很遠嗎?

我想應該不是吧....

我會keep住行山0架..

前日慧豬打俾我話自己好似無咁嗜好同專長，問我有咩玩或者學好..
我好慶幸當人問起我既啫好時
我會諗都唔諗咁答佢
「行山.....」

p.s.因為今日既憧憬，我今日去買0左第一張自己買既六合彩..平時自已唔鐘意一切有關馬會的事，因為我唔鐘意賭博，但今日為0左我間cafe，我就博下啦。^ ^

>>October 10, 2004 at 4:44:25 PM GMT+8

2004 年 10 月 8 日 星期五 【晴】

今日阿媽返0左大陸，我同細佬都出0左街:P

本身令朝同肥肥去行山，因為自己起唔到身，所以佢同佢d fd行lu..

小玲打俾我，但係我夜d又約0左人喎，攪到我陪唔到食lunch添，不過都好彩我無去青衣城，返到屋企細佬話青衣城琴晚有凶殺案呀，幾驚呀，住0左青衣17年，從來未聽聞過有d咁既野發生，個人夜媽媽係青衣城俾人係後頸插0左一刀之後失血過多死0左，好彩我一兩點從來都唔係0個頭出現0者，因為返屋企都唔順路既。寧靜的小島，開發之後發生了這些事，以前又點會咁多複雜既人住係度?

五點半約0左細K..我雖然遲0左一個字，去到人來人住既旺角地鐵站，點解唔見佢既芳踪既?打俾佢，原來佢係金鐘......唔緊要啦，後來佢俾0左份粉紅色既禮物，好好味....同佢行旺中，因為自己下個星期返會展要買件黑色既螻同suit..又要破費了...佢都想買袋，見到個幾靚0架，不過細0左d...我地行下行下都行0左好耐..強仔放工黎到我地唯有轉移陣地去潮流特區喇，細k 同我地夾埋糖就走喇，我都夾0左成30蚊糖，好似好多添...

強仔買0左條錬，然後我地去0左油麻地百老匯睇戲，睇2046， 掃0左少少野食，之後就去睇戲喇，係戲院個 toilet 有人叫我:「小姐你好。」我嚇一嚇，望真d原來係劉嘉敏，數下手指，自從佢係吳祥川畢業之後都有五年無見，佢同以前無乜分別，都係咁白咁瘦，只係電0左頭髮，以前同佢地0個form d 人都玩得好熟，成日係prefect room玩到七八點先返屋企，我仲記得因為我請佢食一粒跌過係地下既黑加倫子糖攪到要寫信同佢道歉，仲攪到阿sir以為我寫情信俾男仔...時日如飛，轉眼間來到今天，人不應時常愐懷過去，只是當人愈大，經歷愈多，你會發現有更多捨不得放下的過去....除非有一天我們為此而解脫，或者讓你遺憾的人活在你現有的生命中，那麼，帶點唏噓的愐懷是改變不了...

她...
曾經也算是一個很熟的人
然而
現在
她的臉及背影竟然那麼的陌生..
我們曾經活在同一個天空下嗎?
那些好像觸摸不到的時光..
或許
我應該明白
像她一樣既熟悉又陌生的過路人
只會不斷地在我的生命中增加...
或許
再見面
一個笑臉
或者一聲問候已經很多
還可以剩下甚麼情意呢?
究竟要這樣在生命的洪流中撞到一個人
又要儲多少的緣份?

2046幾好睇丫
除0左有木村..
仲有好多關於時間的感概...

開往2046的列車，沒有一個人願意回來
去了2046的木村想離開..
在列車上愛上了遲鈍的機械人...
其實2046就是作家周慕雲的心聲
2046代表了過去
當一個人經歷愈多
他只有更多放不下的過去
因此很多人也希望回到過去希望的日子
永不回來
然而
過去總有要拋下的時候
當作者想拋下時
他愛上了一個女孩
希望為她放棄過去
但可惜那個女孩也心有所屬．．
想回到過去逃避又逃避不了
在現實中又是有更多得不到的愛
人生就是這麼荒謬嗎?
章子怡不顧一切地愛上梁朝偉不算是幸福
王菲不顧一切走去尋找一個也喜歡她的人才算是幸福．．．
因為她的犧牲是有回報的
而梁朝偉
即使很努力地穿插在不同的女人中
但在他的深心處
最愛的人始終是拒絕他的張曼玉
他終究 擺脫不了過去．．．

「回憶是潮濕的．．．．」

「原來愛情是有時間性的
太早識佢或者太遲識佢
個結果都唔會係咁。」

你們會只想我作你們的過路人嗎?

>>October 12, 2004 at 5:47:33 PM GMT+8

2004 年 10 月 7 日 星期四 【微冷】

日日都好似出街咁....咁樣日子好似好快過，我要再努力d先得....

今日起身寄0左幾封信，之後幫細佬拎部字典機去尖沙咀整，今日阿咕同肥仔都話返poly還書，既然有自己識既人返去，我就有個藉口俾自己返一返去。

好耐無返poly，上次同小孩食飯自己返0左黎，好似經過一個階磚，一個building，一個podium，腦海中都會自動浮起好多人既笑臉，那些以前在這個校園好熟既人，而家可能見到面都相對無言。上次真係會眼泛淚光，但今次已經無。

由a core條長樓梯開始行上去，poly既天空仍然是 像一個四方框，不過都好藍，行到鐘樓，記得有一次放學係度撞到terry，我跑上去迎接他，景物依舊，人面全非，不過自己曾經珍惜過讀書的日子，已經足夠。

經過7-11，以前最終意叫人記我食雪糕，因為有人請食甜既野會好開心囉，而家已經無lu，係樓梯到見到joey、joe同阿wing，阿wing好熱情咁同我打招呼，個感覺覺得好似遊牧人回到家鄉的感覺。

同阿太傾0左陣計，又同阿wing、gladys傾0左好耐，看見他們的困惑，想起自己都曾經經歷過，今次返黎，都係因為聽得太多，所以想睇下佢地，希望自己對呢度仲有感覺時，就做d野吧。記得曾經有個老鬼同我講，旅協對於佢黎講只係人生一個階段，一個過客，現在回想不應該太過緊張，但我跟她說，我反而覺得自己原來曾經為過一個地方一些人如此不問回報地附出，不惜一切不理其他事地投入，我覺得當時的自己很幸福，因為在意，所以才會著緊。我們這些小鬼說得太多，也只是一種關懷，不是一個命令，真正的滋味還是由他們自己去體會。不過著不著緊，不同人有不同意見吧。自己的生活好像仍然未離得開這兩個字呢。

同佢地講起人與人之間的關係，我跟他們說人與人之間，可能就是因為你一時的怯懦，一時的 猶豫而造成更大的問題，拖泥帶水的甚麼也不說，以為別人可能也是放棄時就自己先放棄，這是最愚蠢的事，不竟我們不是同一個人，我們不會知道對方的真正想法，可能有時說出來只係爭一些的勇氣，但可能已經知道對方既想法，不論個結果是喜是悲，對於自己黎講都係一種解脫，說完自己都覺得驚訝，自己可以說得出口，你自己又做得到咩......要坦言相對從來不是一件容易的事 ，但乘自己還有機會講就應該講吧，他們還有選擇權，落0左莊就講咩都係癈話。

因為傾得太耐，攪到陪不到阿咕返屋企，對唔住呀，肥仔係會度玩魔術玩得好開心，估不到阿wing同steven玩魔術都有一手喎，有緣份遊戲，又有特異功能電話震震，希望留係旅協counter既 ，永遠都只有歡笑。

>>October 8, 2004 at 7:50:09 PM GMT+8

2004 年 10 月 6 日 星期三 【晴】

又有一排無寫日記，其實係因為我想寫番之前漏寫0個D ，如果大家細心的話，係會見到我中間加插0左D新既，哈哈。

今日上網見到好多工，好開心呀。希望快D搵到份新工。

琴晚同阿咕傾0左好耐，覺得自己係應該有信心的~

然後我下午去0左灣仔見工，其實都係一份part time，都好呀，有份part time 賺下錢先。返四日，都係企呀，我諗應該都會辛苦。

然後就一個人，原本諗住行去銅鑼灣，但點知行錯方向，之後見到個好靚既海，不期然跟住行，行行下frankie打黎，今個星期日去行山喎，好呀，好耐都無行，又唔想跟廿四屆行三大，唔係因為佢辛苦，而係因為自己已經行過!所以都係行過第二度啦，我地決定行個老少咸宜的水城劍閣，你唔好話，都要去大嶼山0架，我下一個目標就係羅漢塔，我一定會行到的....

行行下就夜晚喇，夜晚見到對面海，諗起以前成日見住既維港夜景，記得有一次同alex唔知做乜(好似係佢打完波之後)，我地買0左支啤酒，由尖沙咀行番去hall，條路跑又跑過，上莊時又成日黎呢度吹水到天空泛起白色的藍光，我地兩個就咁一直行，去到天僑就停落黎，傾0左好多將來事業同上莊既事，原來alex都記得好多0架喎，0個次真係幾開心，最開心既係即興既感覺。吹吹水到天光，呢種生活真的很令人懷念，現在自己想夜晚出街都要拎premit，一點返屋企都俾人閙，真係沒有了以住的天高海闊。

好掛住以前個hall，好掛住黃埔既夜景，以前自己唔開[心會一個人行去0個度(又唔知點解自己會唔驚0架喎)，然後次次都會有個莊員打黎問我係邊，係大學三年，甚麼也得不到，就只有一班值得我珍惜的莊員。自己曾經諗過如果可以係度同自己鐘意既人行下海旁都已經好開心，不過而家已經無乜所謂lu。雖然以前自由自在任性妄為的生活一去不復返，但那種感覺，永遠都會係我心中，這個會是永恒的。

甚麼才是永恒呢?近來常常想著這個問題，好像甚麼也捉不住似的。近來當俾人問我為甚麼成日不在家時，真的很想說一句，以前返學，所有的朋友也在學校，我們可以係上堂，食飯，一齊行返屋企時知道對方的近況，但現在呢?我也很想返回以前簡單的世界， 那個只有大王下村，返學行返屋企，一朝早有慧豬叫我一齊返學 ，上文學堂聽miss講大學的生活，嘈阿sir唔做past paper，放學去自修室，大家講既話題只係邊個阿sir同邊個miss d野，邊間大學好既生活! 但不能回頭就是不能回頭，我也有屬於自己的年代，只想做自己這個時候應該做的事，就這麼簡單。

我仍然希望自己永遠咁簡單
複雜的事請別煩我

如果凡事也像行山一樣簡單
只係付出努力就可以
即使條路再斜再高
自己肯行
行得再慢
都可以用自己雙眼
迎接最美麗的景色
感受俾風擁抱的感覺
即使迷路
搵個識睇地圖既一齊行未得囉
點解而家唔可以?
點解人與人之間有那麼多複雜的關係?
我對於這些關係
感到很疲累
幸福是勇敢的人才可以得到
可惜我不是那一種人

>>October 7, 2004 at 6:48:24 PM GMT+8

2004 年 10 月 5 日 星期二 【晴】

今日好開心呀~

今日下午就同阿柯去0左荃灣間physical玩，個跑步機同hall0個個都唔同既，自己跑跑下停落黎喎。都係唔跑lu...

之後有得沖涼，焗桑拿，仲有野外定向睇添喎，點先可以做到呢個editor呢?

之後我地就返0左去青衣城打邊爐喇，因為阿崔早放，所以就可以早0左食，我地唔去稻香改0左去敦煌Lu...慧豬早放工，所以我地幾個入去吹住水先，之後阿崔，rain同維茵都黎0左，其實今日餐飯係為0左慶祝維茵入到懲教處而食的，不過都好齊人呀﹐加埋阿婷同小玲，文 科班平時玩開0個班都齊了，八個人，因為小玲唔知隔時改0左時間，攪到佢睇完戲先黎，我地都食到七七八八，小玲"ber"我呀，好驚，希望小玲大人有大量啦。

食得好飽，大家都好似出曬黎做野咁滯，大家既話題竟然是做咩工同講男人...唉，幾年前我地都仲係講緊a-level,講幾時先有拖拍同讀邊間大學好....咁就三年喇，我一直憧憬著的大學生活就這樣過去了。不過講起有d連樣都唔記得的舊同學既近況，諗起以前集會同上堂的趣聞 ，真的很好笑。

我地由六點半食到十點半，氣勢強勁呀，不過真係好飽，後來玉怡都黎0左，佢係半島成日要加班呀，真係辛苦呀，我地影0左張大合照，咁就散喇。

返屋企時阿柯話無阿敏同我地一齊返去好唔慣，唔緊要啦，仲有我嘛~

>>October 7, 2004 at 7:03:53 PM GMT+8

2004 年 10 月 3 日 星期日 【晴】

今日我又做0左件傻仔野....

因為有份工10月4日deadline，當我寫好封信時才驚覺原來星期六下午同星期日係無人收信的，所以今日我自己親自拎封信去。

係國際兒童基金會既development coordiator，我係銅鑼灣坐叮叮去跑馬地，跑馬地都幾古色古香0架喎，我記得以前春茗黎過helen屋企經過既路。

藍塘路....60號，一見原來係一條斜路，好驚呀，點解要行斜路，60號不會行到上山頂掛。好彩佢係山腰，佢係一間好似民居既古舊兩層building入面，我一入到去見到好多人係度數錢，有好多月餅罐，寫住英國、美國、加拿大等...好多地方，有個男人眼望望我，我又眼望望佢，佢問我做乜事呀，我話黎遞application letter，佢都好似有d驚訝，然後問我申請咩工，交0左我封信俾個女仔就叫我走lu...間機構個感覺幾好，好想係呢d機構度做，唔知自己有無咁既福氣係度做呢?又或者佢已經請0左人，連見既機會都未必有....唉，不過唔緊要，自己鐘意既野係要爭取的。

然後行落下面，見到間糖水鋪，不期然就走入去，間野叫滿屋，人不多，但個老版娘同員工都幾warm，佢介紹0左個雪烚原隻豐水梨，好味，好潤~好舒服的下午...如果第時有機會係呢度返工就好喇~

>>October 7, 2004 at 7:16:32 PM GMT+8

2004 年 9 月 30 日 星期四 【晴】

未寫完0架
遲下再寫過~

>>October 5, 2004 at 7:08:07 PM GMT+8