2004 年 10 月 23 日 星期六 【晴】

今日去0左行雙城峽，又係係越野雄心睇到既，我發現個網有時都幾昆水...好似上次個鬼怒坑咁。

九點鐘係荃灣等，今次我地都有terry、frankie、強仔、john、donna同佢個外國朋友，當然仲有我同肥妹啦。由城門水塘開始偷入去，行條超長既樓梯落到去，個景都幾靚0架，之後行行行，其實都好hea，然後去到一個位，係網上睇係有路，但去到竟然變成水塘既一部份，我地游水先可以過到去，所以唯有放棄，剷番上條山路度，出番大圍走....

今日行山時都唔知做乜... 同阿john 傾計時差d趺落山，然後發緊呆時又俾棵橫生的樹照頭撞到應一應，真係眼水都標出黎，大量眼流不自覺地流下，也不知道是因為太痛還是為了沒有眼淚的心情而宣洩........或者甚麼也不是，只係係度發癲。

隻眼...已經腫0左同變青0左.....唉，好似俾人打腫咁..我..究竟幾時先可以好得番?

夜晚時去了旺角同helen佢地傾婚禮d野，佢莊都有好多代表，仲有其他旅協既姊妹咁啦，今日阿超同家明都有去行山，大家的裝束也是一樣的，果然係旅協人呀!

走時阿超約0左friend係青衣，所以同埋我一齊返屋企，我地都傾0左好多野...估不到自己同上莊同下莊感情都幾好...都有d可以真心傾計的人，希望十幾年後，我們仍然會一齊行山，在山上一齊感受風及有講有笑....

我終於發現....
看清了...
還只有自己留在那裡嗎?
還是快點離開吧...

>>October 25, 2004 at 5:35:32 PM GMT+8

2004 年 10 月 22 日 星期五 【晴】

今日都無乜野做，下午心血來潮去了慧豬間新屋坐，而家去佢屋企竟然要搭車。佢間屋而家整齊了很多，佢間房幾舒服，又可以有自己的天地，好羨慕。

夜晚約0左鄧榮康同阿柯食飯，我地去0左荃灣和民食，叫0左都ok多野，阿柯仲話要叫清酒飲，佢真係ok 飲得，同佢地傾0左好多野，鄧榮康好似比以前成熟了，其實我地都畢0左業三年，變是很正常的吧，那麼我又有沒有改變?可能是認清了很多現實的粗糙及無奈吧，我也不知道叫不叫成長了，但這種成長，是需要代價的吧?

聽日行山...精神呀~~~

>>October 23, 2004 at 3:44:39 PM GMT+8

2004 年 10 月 21 日 星期四 【晴】

今日天氣好好...
行黃竹角咀
應該也蠻舒服吧?

琴日同alex同MSN傾計傾到好夜，但係今朝又唔眼訓喎。九點起身，阿媽先同我講話可以唔去...
你而家去行山囉..
真係
人地已經集合0左喇

不過今日都好開心，是很難得的family day，每次拜山d親戚也很齊人，大家傾下計，表哥個仔已經有我隻小腿咁高喇，我都好少見到佢地，自己成日星期日走去行山，陪屋企人既時間係真係少d，所以今日唔去行山，得到另一樣野也是很好的。

表妹好鐘意同我玩，是不是我太過大細佬呢?佢而家七歲，諗番自己七八歲時已經要照顧細佬周圍走，究竟那段日子，自己是怎樣長大的?我己經記不起了，不知不覺又來到今天。

>>October 23, 2004 at 3:19:33 PM GMT+8

2004 年 10 月 20 日 星期三 【晴】

今日...
唔好提
頹...

不過夜晚同阮美去佐敦整頭髮，好攪笑，竟然撞到terry..
今次個頭
應該可以keep耐d掛...

聽日行黃竹角咀
我都好想去
不過要去拜山...
唉
想起了上年的黃竹角咀
我同阮美同the 皮主席一齊行
都幾開心
仲有迷路
還有親手接過香港最古老的石頭
第一次出咀的心情..
今年都好想去
可惜時不利兮...
唯有將這個願望留番下年
唔知仲有無力行
唉.............
旅協d活動
好似離我愈來愈遠

>>October 22, 2004 at 10:32:29 AM GMT+8

2004 年 10 月 19 日 星期二 【晴】

今日.....
唉....

係屋企聽見九份發生車禍，有五個香港人死0左...真係慘，去旅行發生意外，開心既事變成唔開心，你唔好話唔驚。其實諗番去雲南都幾驚...出發前其實已經開始擔心，因為唔想就咁客死異鄉，我仲有好多野想做。唉....0個日都係天雨路滑，係虎跳峽發生了塌方(即係山泥傾瀉)，身在其中的我，真的在想如果我地遲少少入黎，我們可能已經俾d石頭壓死0左，個天係唔係真係唔會咁易俾我死?我都唔知...0個一刻真係好驚..好想返香港，返到屋企人的身邊。雖然我返黎時大家話我講得誇張，但係係架俾石頭壓到好似汽水罐既車骸，連入面d人變成點都不敢望，離生死只係一線，0個種感覺永遠唔知點形容，幸好，個天真係對我都不錯，讓我平安回來，雖然我仲有好多好遠既山間地方想去，不過希望每次都係平安回來，也希望我關心的人永遠都平安，幸福。

夜晚執野時竟然唔小心打破了自己一直珍惜的星星樽，呢份係中五時玉怡送俾我的禮物，上面有好得意的pool拎住個西瓜咬，唉.....因為拎d書出黎，唔小心將佢推0左出個櫃，「0彭」的一聲，玻璃同d星星全部化成碎片散落在我的腳旁，我雖然很傷心，但竟然哭不出來，可能因為哭也沒有用吧，我只有用最深的無奈哀悼這個很有紀念價值的禮物，我一粒一粒咁執起，一共有一百二十三粒星星。

希望可以買番個一模一樣的吧...

聽日終於有得去明報見工，雖然只係written test，但係我都好開心，要加油!
做個pro 的文化人!

>>October 20, 2004 at 6:55:15 PM GMT+8

2004 年 10 月 18 日 星期一 【晴】

今日係alex既生日，係度同佢講聲生日快樂先(雖然佢都睇唔到)
琴晚想打個電話佢俾，但係又唔識點係香港打長途電話，平時係大陸打番香港就識0者，打番大陸真係唔係好識，真係傻仔曬...唯有係MSN同佢講算啦~

今日起身，唔知點解朝早起身硬是沒有甚麼衝勁的，兩點同rain行街，佢講0左好多佢係公司既唔開心事同d衰老板既事，好似大家都已經有了不同的生活及新圈子，出到黎都係講返工d野，其實我都唔係想咁，不過人大0左，除0左返工，好似都無咩好講....但係知下朋友們的生活如何，也算是分享的一種，起碼知道她的世界發生了甚麼事，這樣人與人之間的距離好像會少一些。

和她傾開，講到現在的生活好像很乏味，她返機場，成日輪更，好似朋友及自己的世界也狹窄了，成日都係返工放工，也不知道人生是為了甚麼。所以我時常說有些人成日都本末倒置了，成日以為賺了錢然後才有資格做自己想做既事，但我認為如果要等到自己好有錢先做，那時候可能自己已經沒有了這個雄心壯志做了，又或者自己捱捱下時死0左呢 ?所以我地有咩開心既，就做0左先，可能係有d自私，但人生在世也如果做到沒有了自己，那賺了錢沒有了靈魂又是為了甚麼?

所以醉裡且貪歡笑
莫問今朝酒醒何處!

大家都要找多些自己想做及喜歡做的事充實生活呀。

>>October 19, 2004 at 6:27:26 PM GMT+8

2004 年 10 月 17 日 星期日 【晴】

今日...都係咁啦
係屋企搵工囉

近來見到邊個，都係問我，你搵工搵成點呀，我都係答佢，都係咁啦，send0左好多信但未有人覆...我有好努力咁搵呀﹐大家唔洗擔心我。

不過好開心既係，明報打俾我喇...話星期四上去...好開心。嫂嫂都話俾我聽飲食男女都請旅遊記者，我要成為寫作界既專材!!!

夜d既時候阿咕打俾我搵我去跑步，唔知點解好懶咁跑呢，不過每次跑都係吹水多，去到青衣運動場，跑0左幾個圈，大家一齊傾下計，幾舒服同開心。

近來自己又少0左野諗，其實咁樣幾好丫...
現在的心情好似星期天的大海一樣平靜

夜晚search search下聽番古巨基既跳飛機
呢隻歌係中七時其中一個同學的文章
因為0個次題目係寫一首歌詞
我寫了<<沒有煙抽的日子>>，拎得幾高分
另外高分既就有維茵既跳飛機，她寫的style完全和我不同
她寫的輕鬆，明快。我寫的沉鬱，悲涼。
那時我已經在想
為甚麼自己的文章老是不能輕鬆點?

跳飛機的歌詞是這樣的，但她寫的是長大後不能像以前般快樂地玩跳飛機這些簡單的玩意

跳飛機
作詞：黃偉文　作曲：林健華

季節盡了　蟲兒會飛
氣壓低了　雲霞會飛
只有我　深愛你
沒有飛的勇氣　遠離
我似被困　無人客機
進退失據　在高空三千公里
你不肯愛我　也不肯放我
若我先擺脫你　像跳飛機

就算　遺忘如何去飛　都必須掙開你
就當　遺忘如何怕死　深呼吸一口氣
你都不信我會飛　不信我會飛
但我知　我捨得你
就算　遺忘如何去飛　都必須掙開你
就當　遺忘如何怕死　深呼吸一口氣
你都不信我會飛　不怕我跌死
讓我飛　不必想你
(讓我飛　伸開雙臂)

愛到盡了　毫無轉機
痛到哭了　還支撐得多少公里
太多的重擔　太少的氧氣
若我先擺脫你　像跳飛機


聽番首歌，懷念以前鐘意唱歡樂今宵同愛與夢飛行的他，那年..應該只有中二...

其實我最鐘意古巨基的是<<永遠永遠>>

世界太細吧 人少不免自閉一點 不信愛戀
永遠太遠吧 如此繾綣亦有一天 叫歲月耗損
別自負地談甚麼永遠 就怕撐太遠 途中竟擱淺
別自虐地談甚麼永遠 就怕講太遠 情長氣短

多麼美麗終消逝
誰人值得以約誓去狠狠記低 多魔脆弱的關係
誰人用一切發誓也將失去一切 怕晚節不繼
恕我愛得節制

多麼美麗終消逝 誰人值得以約誓去狠狠記低
多麼結實的關係
回頭像摔破約櫃碎得多徹低

那個會愛著誰一世 就像恨誰又怎會恨到底
只得嘆謂深不見底

"那個會愛著誰一世 就像恨誰又怎會恨到底......"
我最鐘意呢句..

>>October 18, 2004 at 6:49:53 PM GMT+8

2004 年 10 月 16 日 星期六 【晴】

今日都幾開心~

今日我同肥妹、vincy同rachel一齊去玩風帆
我同vincy、rachel呢個雲南三人組又可以聚一聚。
十二點係西貢集合，不過因為我唔知醒攪到遲到
rachel而家搬0左去長發，攪到無人陪我叫我起身一齊出門口添。

去到西貢食車仔麵，然後就行去西沙灣，原來係巴士站後面有個水上活動中心，我都係而家先知，行入去既時候見到d好得意既狗仔，有隻好細隻0乍，然後有個一兩歲既細佬仔又唔驚咁走埋去喎，隻狗仔企起身同個細佬仔玩，個比例係好match0架，個情景真係好得意~好可愛。

行到入去，見到都好多人一齊玩風帆，見到個婆婆差不多六十歲都黎玩，勁~
40蚊一個鐘，仲有個教練教我地，都幾好呀，我地用d係trainning既風帆，細過"珊珊"用0個d好多，不過對於第一次玩既我，都已經好難學。

上到隻風帆，好難平衡，攪到成日跳落水，不過個教練幾好人同埋教得幾好。Vincy好有潛質呀，佢企上去都好穩，我就成日跳落水喇，我地學埋逆流轉向，咁就可以自己出海，出海個感覺好舒服，我地玩0左三個鐘，都幾好玩，幾開心。

之後我地就去石澳BBQ，上年強仔生日又係去石澳燒野食，今年又係。石澳好遠呀(對於住青衣及當時係西貢的我)，不過算啦，鬼叫0個度叫做交通方便咩。frankie佢地今日負責買野食，我就七點半先到，今日JOHN JOHN 開了他的新七人車黎﹐等埋我地先入去喎，好野，有車車坐，架車好靚，開門同關門都係自動0架。今日好似有人唔係咁開心，雖然佢話無事，不過我都希望下次會攪到個令個個都開心既活動。

今日我地燒野食都幾齊人，除0左身在上海的alex之外，都齊了，不過主席隔時唔得閒黎，唔緊要啦。我地唔知點解次次聚埋就好嘈，今日肥妹同小孩都有黎，佢地話我地燒野食好嘈，好似個個都燥狂，哈哈，但係我又幾鐘意呢種嘈的感覺，熱鬧d嘛，因為donna係度，所以阿JOHn又俾人串到無聲出喇。今日都幾開心...

今日強仔同frankie佢地下午去行港島個張保仔洞時發生了事，唉，強仔下次小心d喇，希望以後行山大家都平平安安。

>>October 18, 2004 at 8:12:27 AM GMT+8

2004 年 10 月 15 日 星期五 【晴】

今日係返會展既最後一日
今日肥仔都有一齊返呀，幾開心
唔知點解
返會展個感覺都幾好...
雖然企得辛苦，不過做d外國人既盲公竹，又幾過癮，今日仲有個香港人讚我普通話好添呀，平時都好少人咁同我講。

本身今日諗住帶部相機返黎影下個紅外線探熱LCD mon(即係d鬼佬好鐘意玩0個個) ，但係出門口時又唔記得0左，今日公司平時一齊派野既女同事同男同事係 短短四日之間熟0左好多，又影曬相咁，我都無特別想就去堆佢地堆，可能真係自己老啦，覺得佢地太細個...原全唔0岩channel.

因為佢地熟0左，所以成日吞pop，攪到我都成日吞POP，走0左去打電話俾玉怡，我同佢講好似同佢既[世界遠0左好多，她說自從她返了PLACEMENT之後就同所有朋友的世界遠了很多，佢而家係半島返好似都幾辛苦咁，不過佢有得賺貼士好開心喎，仲有半年就做完，你要加油呀，同玉怡都傾0左好多野，我現在愈來愈覺得人生是不應該想太多的，想得太多只會令事情更複雜，自己想做咩就做，想鬧邊個就鬧，無需顧忌太多，雖然講好容易，但對於我來說做得到其實都幾難，傾下傾下又一個鐘，佢咁就幫我賺了個鐘頭的人工了。

之後突然心血來潮想做一樣野，做0左lU，亦唔理其他野，原來來做就去做的感覺是很舒服的。

LUNCH時同肥肥一齊食，佢係入面真係識得好多人，有個人仲同佢講話覺得佢著番D制服好親切。佢係個會展都好似會有人同佢打招呼咁，幾勁。不過有D人以為我係佢女朋友，好攪笑。

有時都會想，我平時係唔係對佢地太好呢 ?咁佢地D女朋友誤會就唔好啦。不過點會呢，每一個莊員都好似我的家人一樣重要，對自己屋企人好，有咩問題?

琴晚ALEX打0左個長途電話俾我，聽到佢把聲好開心喎，仲要係長途電話，我都好掛住佢，佢去絲路D相好靚，我都好想去呀。

唔知點解返到黎屋企好眼訓，訓0左一陣
而家又攪到咁夜先訓喇
聽日仲要去玩風帆...

>>October 16, 2004 at 7:31:44 PM GMT+8

2004 年 10 月 14 日 星期四 【晴】

今日係強仔既生日，係度同佢講聲生日快樂先...

今日好唔開心，心情差到極點，唉....

今日其實都好hea..因為我個 partner同其他d女仔同送野既男仔熟0左，所以就hea0左好多，都好丫，今日無咁累。

因為我去抖既時候放低0左個貼住piglet的水 樽係d書後面，點知返黎時成個紙袋唔見0左!!!我個水樽呢?0個個人又放低我放係入面既guild book，但係水樽就唔見0左，我好緊張咁問身邊的人有無人見過，但無人話見過，我連清潔d阿嬸都問過，但係都無....嗚嗚....我連d垃圾筒都逐個去睇，唔理d男人成堆咁食煙走埋去裝，但係都見唔到，最衰唔可以找垃圾，因為０個度係會展．．．可惡呀，邊個變態連有人飲過既水樽都拎，佢又唔係新唔係靚唔係特別．．．但對於我黎講，佢係陪我係大學圖書館溫書，出咁多個camp同遨遊的東西，當年佢好新既時候我買０左個大水樽送俾carol，買０左張貼琉璃的貼紙貼０左好多pool上去，多０左隻piglet覺得得意就貼上去。雖然佢而家殘０左，但我都無諗過唔要佢，嗚嗚，佢會不會俾ｄ人既煙灰淹埋０左?定係俾人求其咁掉係唔知係邊?可憐的水樽，我地咁就永別喇．．．．唉．．．．

攪到我今日成日都無心機，派埋又笑唔出，但係又要笑喎，真係心情差到極點．．．．
邊個咁衰呀，你要紙袋，我俾十個你丫，點解要連入面ｄ野都拎埋?睇你都唔會珍惜佢．．．
珍惜的東西，可能因為太在意，所以才會特別容易失去。
又或者，過多幾年，當我買０左個新既，我會唔記得原來自己曾為失去過它而傷心過。
唉．．．．．．．．．．．．．．．．．

它重要，是因為它代表了那些一去不復返的經歷吧?

好彩後來見到阿崔，臨走時細ｋ又黎搵我，心情先好番ｄ．．．
日日都有人黎探我，其實又真係幾開心既，呢個展覽真係幾大型，咁多我識既人都黎睇。

同細ｋ放工，去design galary睇０左陣野，佢入面ｄ野都幾得意，只係原來有個好似壽司既野我唔知佢係計時器，白痴。

走lu﹐本應該搭車返屋企，但唔知點解又唔係好想咁早返去，結果我見到架103就上０左車，返０左會．．．

見到steven，不過佢地都走，攪笑的是我發現佢地無鎖好個櫃，其實又係佢壞０左個鎖唔知０者，佢地走０左，又得番自己一個係counter，其實有時幾鐘意自己一個係０個度，因為好似counter又屬於自己一樣，睇下花薄．．．然後樂仔見到我，走埋黎傾計，幾鐘意咁樣返黎就見到幾個老鬼傾下計，以前自己都係咁．．．然後竟然見到第七屆既鐘漢同科哥返黎，加埋delect同第十屆既周小玲，我都未試過係counter見過delect，原來佢地舊既老鬼都有contact０架喎。同delect傾０左陣，原來佢當年有上過大莊，佢話旅協不及大莊做事快速，只係因為大家也為興趣而聚埋一齊，所以會少ｄ留意點開會有效ｄ。但係周小玲講話覺得係旅協同大莊個感覺會唔同ｄ，因為呢班人真係會真心ｄ同埋會keep得耐ｄ。真係覺得十年前上莊既老鬼雖然做事方式未必相同，但係旅協個精神係一樣０架．．．．我最想保留的，就是這種大家是long lasting朋友的感覺，我們相識，不是Hi-bye，不是敷衍，不是過路的暫時性朋友，而是拿個心出黎的朋友．．．有好多人同我講過我一齊行山的friend 出黎做野既時候就會散得就散，但我也很想證明俾佢地睇，我地唔係０架。delect佢地星期日都仲有行山，幾好呀，希望我第時都係咁。
之後鄧兆基上０左黎，好攪笑，好似好耐無點同佢傾計咁，而家又可以好似佢地未上莊前咁，好free咁傾計Lu..

傾傾下又好似好夜咁，走喇...唔知下次得閒返去又係幾時lu..

走時見到個師妹捉住我，估不到以前學校仲有人記得我～你地既新生活又就黎開始喇，我都係，另一階段又開始了。

ｐ.S. 今日肥肥打俾我話我聽佢病０左，但我又不可以一心二用，收０左佢線喎，對唔住呀，希望你快D好番~

>>October 15, 2004 at 5:58:38 PM GMT+8