2004 年 11 月 12 日 星期五 【晴】

今天又是一天的影相天.....

今日已經約十一點係青衣城出發...但係我都係例遲，睇黎我都要改下呢個遲到的習慣，一陣間連見工都遲未死?點解阿媽會生成我咁鐘意訓覺....

小玲又話有花既，攪到我鬼咁開心，點知原來都係無....>.<不過算啦，今日約0左7B的姊妹一齊影相，當然還有周家威同田雞啦，係青衣城JOIN埋小玲、阿敏同RAIN，然後我地就出發去CITY...路程同上個星期一樣...去到CITY有周威係紅門恭迎我地，我同阿敏換完衫，田雞都到0左，嘩....今日田雞著西裝黎喎..識佢咁耐都未見過佢著得咁"四正"..聽開佢追緊女仔...終於有番條慧根係度...果然係大個仔..哈哈。

以為田雞同周家威都有成長啦，點知田雞仍然係行路唔理我地...仍然未學識風度兩個字。而周家威就玩我地送俾佢既公仔花...當枝花係平衡桿咁..仍然好似以前咁鐘意玩雜技(以前佢成日表演點"咬"隻腳放落個頭度)，唉，點解我中學D男同學係咁攪笑0架.....不過好耐無見佢地，仲係咁玩得，好開心....

我地係CITY影完就去0左POLY，我地幾勁呀，著住袍搭火車，好懶...然後我地去0左MAIN BUILD 14樓飲茶，好掛住佢D香芒雪花卷...阿柯同阿崔係呢個時候亦都放0左工黎到喇，佢地兩個都好俾面，扮得好靚咁黎，又買0左兩樣好靚既耳環同手練做畢業禮物，好開心....

但係佢地兩個一有相影就唔理人，係咁影係咁影，好似拍沙龍咁囉....我地影0左好多地方...很累呢，不過好耐都無同班姊妹聚下...好開心呀...

然後我就去睇周杰倫演唱會，本身好想同阿柯佢地食飯0架，不過最衰就唔到時間，下次實同你地食，小玲唔好嬲呀...

約0左強仔同阮美一齊睇周杰倫，呢次係我第三次睇周杰倫演唱會喇，第一次helen一齊睇，第二次同學幫手排，今次我就打電話打到手軟先買到飛，但係今年好似無以前0個兩年咁難買飛。小孩佢好遲去紅館買都買到呀，唉，我都唔知咁辛苦打黎為乜...

鐘意睇周杰倫演唱會，除0左因為鐘意周杰倫d歌之外，更鐘意佢彈琴既樣，真係幾型0架，最重要的是睇佢演唱會氣氛好正，我同阮美都嗌到喉沙...但係今年因為佢唱d歌我好多都唔識唱，仲要encall得兩首歌....所以好唔開心...佢都未唱可愛女人...黑色幽默....同埋新牒既外婆...好唔開心呀，點解今年encall得咁少?都係第一年睇最好睇....

雖然其實佢同個南拳媽媽鬥彈鋼琴0個part好正...都有唱簡單愛..開不了口...安靜同我新碟最終意0個兩首慢歌...擱淺同借口..但係encall多幾首開心ｄ嘛。

都係第一次個感覺深刻ｄ．．．

唔知以後仲會不會睇佢演唱會?

>>November 13, 2004 at 5:46:39 PM GMT+8

2004 年 11 月 11 日 星期四 【晴】

其實有時都覺得自己的日記...
太多口水...
多謝各位讀者
不嫌棄小女子...的長氣及愁善感...
仍然對我關懷備至~

>>November 12, 2004 at 8:05:18 PM GMT+8

2004 年 11 月 11 日 星期四 【晴】

今日我好開心~~~
哈哈
好的事
真的一浪接一浪....

今朝收到個電話叫我去見工
下星期又可能會展有得返
好開心...
其實是我這個人太容易滿足嗎?
易滿足也是一件好事吧?

然後就去0左同慧豬跑步...
好舒服...
青衣海邊的風....
還有一切熟悉的人和事，她說我們已經由讀書跑到而家做野了
我們會否跑到結婚?
哈哈
我想會是你比我快一點吧。

我地講講下，青衣運動場有人練緊足球
佢把烏鴉口話我會食波餅
點知跑跑下真係有個波"醒"0左落我隻腳度...
烏鴉口.....
又唔見佢同我講快d搵到野做或者有個好男朋友...
頂...

佢話拍拖之後會發現自己另外一面，有d人平時好似好堅強咁，但可能會變成好脆弱都不定..(咁似阿邊個邊個既?)，有d人好似好感情用事，拍拖亦可以好理性...但我認為，太理性的愛情應該不是很好的吧.....

呢排有好多令我開心的事發生，希望呢d開心的事會繼續黎...

聽日睇周杰倫
好期待...

聽講細k星期日同玲芝兩個去深圳玩...兩個女仔，要小心d呀...

>>November 12, 2004 at 7:04:55 PM GMT+8

2004 年 11 月 10 日 星期三 【晴】

今日睇jobDB都見到幾多工喎，人又開始有些動力了....哈哈，我要努力...

夜晚本身約了肥仔還大背嚢俾我，佢問我出唔出黎行一陣喎，而家出街成日都係夜晚黑，其實都無辦法，咁d朋友仔個個返曬工，係得夜晚得閒之嘛，好想好似以前住hall咁，想幾時出街就幾時出街，想幾時出去食飯就出去食飯，想幾時買衫就幾時買衫。不過，其實也沒有說現在的生活是不好的，只是不希望自己的生活方式令別人不開心。

肥仔同埋佢個同事一齊，我自己係銅鑼灣行0左一陣，買0左個PN的胭脂，好靚0架....雖然貴0左少少，不過放落自己塊面度的，又唔係買好多，所以就豪一次啦。

然後肥仔開他公司的七人車黎，我地去0左西環間菜飯度飯，我地搵0左好耐先搵到，原來西環都好多斜路同埋樓梯....終於都搵到佢喇，但係個感覺好似無以前咁正，以前好似好味d同大碟d~

肥仔同佢同事都好留意套西楚霸王，佢話成日俾老細問典故問到口啞啞喎，所以我又同佢解釋多一次呢個歷史典故喇，不過自己都好似好多野唔係好記得。

然後佢個同事送我地去銅鑼灣之後就開埋架車返屋企。我地行0左一陣，Ivan打俾我喎...(大家知不知Ivan係邊個，哈哈，之唔係強仔囉...)，佢話今日上堂遇到個好串既同學，自我介紹時竟然話自己叫同學得喇。真係串呀...然後佢都出埋黎...我地去0左阿貓地攤飲野，搵唔番上次我地0個本昊日口水薄添...(聽講，廿四屆去荔枝窩食豆腐花，仲見到我地當年係口水薄留的言)，肥仔成日掛住同d訓曬覺既貓貓玩，d貓唔知點解好終於走埋黎聞我個大背嚢...唔通有陣原野味?哈哈，後來frankie因為拎野俾vincy(vincy好慘呀，而家返朝九晚九)，所以frankie都黎0左，我地坐0左陣，都無傾到d乜野就走lu....

frankie今日好似好頹咁，打俾佢把聲好似死0左咁，有時見佢做野好似好辛苦咁，但係又好少講喎，有時出黎傾計，佢都係無乜出聲....(不過，原來佢今日病0左)。雖然我地莊而家都成日見同埋成日坐低傾下計，但我發現近來的話題好似變0左呢排d site呀工程呀有咩發展，大家諗住轉咩工，咩工有咩前景，幾時儲錢，幾時結婚咁.........其實大家生活得快樂嗎?好似不是時常提及一些更深入的感覺...其實我都有時唔開心好想即刻打俾你地0架...不過見到面時又好似無0左0個種感覺之嘛....可能傾計都要講TIMING..

好想好似以前咁...得閒係HALL落樓下或者係Counter，去7-11買支啤酒就走出海旁傾計，將所有生活的煩惱、感覺也可以好坦然咁咩都講...個感覺好舒服..可能係而家少0左D咁既環境同氣氛啦，個個傾多陣都話眼訓.....幾時可以不醉無歸咁傾天光?

>>November 12, 2004 at 7:04:03 PM GMT+8

2004 年 11 月 9 日 星期二 【晴】

呢幾日都係係屋企無聊
又再次回到我每晚也想的問題...
明天我做甚麼好呢??
唉...

星期六日都約0左人影相
星期日約了家人影
但係好似好煩咁...
其實我都係想開開心心影相0者....
點解都好似攪到阿媽咁煩咁?
我不明白...
還是我不明白她的苦衷?
唉....
佢好似覺得我D莊員係壞人咁
點算??
我D莊員唔係壞人黎0架
點解叫我大個要小心識朋友喎....

如果我說
有些時候我做的行為
其實沒有目的...
只是隨心中的感覺而行
你
會否相信?

原來阮美講得0岩0架
人有很多東西做的時候
會少d野諗...
"忙"-心之死也
只有那些拒絕成長的小孩子才會不相信
helen婚禮後的幾天
因為太累了
可以好好的睡
不用眼光光等天光了

>>November 10, 2004 at 5:49:11 PM GMT+8

2004 年 11 月 8 日 星期一 【晴】

係呀
細k
我今日對腳仲痛緊.......
但係我連續三個星期都返去影相
我而家越黎越覺得影成日實在累人

>>November 9, 2004 at 6:01:19 PM GMT+8

2004 年 11 月 6 日 星期六 【晴】

今日真的累死了.........................

昨天五點幾先訓，今朝一早又要起身返去影畢業相......今日同慧豬、阿咕、玉怡同蓉蓉影畢業相，好似好耐都無聚過咁，今年阿咕、慧豬同我都一齊畢業，玉怡就好感觸咁話如果佢第一年讀到，佢就可以同我地一齊畢業，其實佢唔讀hotel唔駛出placment既話，其實佢都今年同我地一齊畢業啦。下年佢要去英國讀書...我要儲錢同參加她的畢業典禮了。

因為昨天太累，再加上腳上傷痕累累，今天又要再度穿高跟鞋，真的想死，不過難得五人聚頭，傾下計心情又好番好多，尤其是心情煩躁的我在青衣城見到慧豬拎住兩朵公仔花，佢話另外一支特登送俾我，我真的很感動。結果我今日成日唱住:「太陽像個大紅花...」然後係佢地之間舞動，攪到玉怡要打我地支花，哈哈...好開心...

我地影完 city影poly....我地係都會廣場食country road...d set lunch又幾抵0架喎，d野又好味。我地只係食佢d沙律同甜品都已經飽死0左。

同佢地影完玉怡就要同錢妮妮佢地影，然後我就同0左肥肥同埋佢d同學一齊影，阮美都有返黎呀，不過佢同希雯影。

之後我同肥肥d同學去0左尖東飲野，vincy今日打黎問24號有無得齊莊影大旗相，我同佢講其他人返曬工喇，邊有人同我地影喎，佢好似好傷心咁喎，唔，為0左我個好莊員，等我盡力攪攪個大旗function的。

今天返到會，見到錢錢同阿B、franco同超，錢錢特登係上海返黎，難得撞到佢一齊影相，然後大家傾到一個令人髮指的問題....真係激氣，完全是爛仔的行為.......不過，既然佢烚我d莊員，我不會不出聲....費事d人以為自己0岩曬。

之後錢錢同超走0左...
我同阿B同franco同阮美傾0左好耐，好耐無同佢地傾計lu... 可能因為係上莊..又真係好多野講，佢地倆個又咩都講得，個感覺好舒服，好開心，彷彿又回到了以前做member的感覺，始終係度識既人個感覺真誠很多，一直也很珍惜在這裡的人和事，也很珍惜與這裡的人相處的感覺，原來franco搵工都好多波節0架喎，我地大家雖然而家傾的話題已由功課同學變成搵咩工，點計劃將來等，但係那種真誠的感覺是不變的。

同阿b傾開，原來佢有個fd去西藏高山反應死0左....真恐怖，好彩當我身在四千多海拔高的稻城時沒有堅持要繼續行0者，都唔知點解而家自己會咁怕死，是因為塵世間太多東西令我留戀不捨嗎?
那為甚麼你還要周圍去自助旅行?
傻瓜....
個天唔會俾你死0架嘛
係唔係?

>>November 9, 2004 at 5:59:38 PM GMT+8

2004 年 11 月 5 日 星期五 【晴】

今朝早一早係hall 醒來送了肥妹返工然後返入小孩房訓(因為我去了hall屈蛇:p)

十一點起身開始係咁執同化妝，因為今日係廿一屆副主席helen新婚擺酒的大日子，小女子都有幸做下姊妹，其實有朋友結婚真的是很開心的事，上次阿錢結婚其實我都覺得好開心，今次大攪又有另一種感覺。

Helen都算係我入大學以黎第一個識而且熟的人，多得佢唔少啦，一入dept o camp就俾佢玩...又俾佢踢入會同踢去赤洲o camp遠挑同資料組...我仍然記得佢同錢錢一齊呃我話遠挑一d都唔辛苦，結果我就係大嶼行行到夜媽媽，對住阿B喊住講:「我唔行喇.....嗚嗚...」，同隊的所謂隊長-程志遠，組員-黎嘉澍，一到南山個campsite就入營訓覺，得番我一個人應付member suki....還有她搵我上莊， 同阿徍打俾我問我上莊開會既感覺等等...其實係旅協的生命入面，她的確帶給我很多回憶，還有當年新莊第一次開會時，因為覺得旅協規柜多多好煩的我，不去拿第一次開會的議程，結果腫了一隻腳的她周圍找我，又走去圖書館，又走去canteen找我，結果我笑嘻嘻的食著雪糕走上去，但她沒有罵我......只是錢錢罵了我一句:「你覺不覺得你很任性 ?」﹐我明白那次是自己優柔寡斷矛盾的性格令我攪到事情這麼糟，我不是不喜歡旅協，只是有太多的憂慮，結果那次之後我上莊我每一次也盡全力，因為我不希望自己再是那一個優柔寡斷，拖泥帶水的人。咁樣講講下，她也算是在大學初期生活很密切的人，雖然她當了差後很少見面，但見面了還是有很多東西說，可能是因為我們某種的特別感情吧。估不到她這麼快結婚，今天真的很感動，我第一次見到她那麼幸福.....不再努力扮演甚麼也自己撐下去的女孩子了。


我同carol出門口，點知行落街以及由hall行去火車站的路我已經俾隻鞋KO0左我，我都話高跟鞋絶對是我的天敵...好痛呀... 好似俾人切0左個踭或者有把刀裝0左係隻鞋度...唉，行到去酒店到企到成晚都算係咁。

我地去到帝京酒店，係1180房集合，間套房又幾靚喎，我地成班姊妹已經開始又係度玩化妝，helen就著住套掛...都幾隆重呀。Simmy做伴娘，佢好靚呀....set埋個頭簡直perfect~

我地一點半開始玩新郎，個新郎哥都幾玩得，佢d兄弟有d都幾撐佢0架喎，不過佢老公好衰，俾第一封開門利是的時候我們收下沒有當場數，結果原來0個個得十蚊係入面......佢仲話:「都話d女人蠢0架喇....」激死我地。不過算啦，今日開心就得。

我地落去採排同開始恭候d人入席，今日都擺好多圍，有成30幾圍，成個dining hall都係我地既。差不多八點到我d莊員先到。佢地個個都讚我今日著得靚呀...哈哈，今日都好多旅協人到，計埋我地姊妹就有三圍，大飛哥、七號榮同細JOE都有黎...舞完獅..入席...勁多唔識的親戚點名...真係一頭煙....做姊妹都幾辛苦0架喎。又無得同d好莊員傾計喎，不過好彩後來都有坐係旅協枱到食飯(我幾驚忙到無得食)。

開席喇，新郎哥一入場就唱首「一生只愛你一個」，好似演唱會咁，但係全間房暗曬，新郎哥唱住「一生愛你一個」，其實聽下d歌詞又幾感動...如果有個男人肯一個女人唱這樣的歌..也真是一件蠻幸福的事。聽聽下都好感動，自己都不期然流下眼流，世上是否真的有可以負托終生的人?

然後就由新郎哥講下野就食野喇，都幾好味丫，不過可能係我太肚餓喇，佢地話唔好食喎，我就覺得幾好味喇。因為我地係咁多屆最細0個屆，所以俾人分開曬坐，真係慘呀。

之後我地就幫手攪遊戲環節，呢個環節係由阿超同家明做司儀，但係家明講兩句就要睇稿囉，笑死我地，我地0個幾圍都好嘈呀，細Joe就癲0左咁，飲到塊面紅曬，仲要隊大飛哥飲白蘭地.....之後千杯不醉曾藝超又挑細 joe機，細joe飲到唔小心打爛0左隻杯添呀。d白蘭地真係難飲。

我地散席之後都唔捨得走，又成班旅協人影曬相咁，十足廿屆廿一屆廿二屆春茗咁，又要莊合照，又要咩遨遊組合照，老鬼合照咁，總之好開心.......其實如果嫁個旅協人(我指某位莊員)，擺酒叫好多屆黎，其實都幾開心0架喎。又可以癲d，不過今日都係隆重為主，始終擺酒係大人的事而不是一堆朋友的聚會。

今天很累呀....不過很開心....之後同0左d莊員一齊去cafe傾計，同大家一齊的感覺最舒服，佢地又好鍚我，見我拎咁多野又幫我拎喎，我為自己係廿二屆為傲，因為有時睇見其他莊，其實都未必一定個個0岩玩，我地十一個，都算有緣了。哈哈，抵我平時都咁錫我d莊員。

雖然現代女性也很獨立，但不可不否認女人最大的幸福是找到一個最有安全感的歸屬，誰人可以令你內心的空洞得到一點實在的感覺?今日見到helen咁幸福，在此希望她在以後的人生裡即使有不如意的事，也會可以兩個人一起渡過。

今日聽到兩首歌，也是令我很感動的平凡歌曲:

鄭伊健 一生愛你一個

(男)喜歡你我最清楚這感覺
從前你是你　從前我是我
現在縱使不清楚我最愛你什麼
尋覓你　留住你　全憑直覺
其實我真的相信愛情的直覺
從前尋遍這天邊海角
不經意等到心中愛情主角
愛你一個　像是浪漫愛歌

想你一生也愛我一個　想你心意屬我
期望你跟我　長路也走過
准我一生也愛你一個　准我相信直覺
請將一生的幸福也付托給我
常在你心裡　愛著我

(女) I just say once more time
How much you need me
Can I still love you forever and forever.....

李克勤 當找到你

我想所有下雨天 我可這樣凝望你
我想跟你明日昨天 一起吻晨曦
我心一向沒變遷 我不當是遊戲
世間爭先要新鮮 我只要你

難數清愛你幾多 只知每日更多
而你是燃亮這生的歌
靈魂再沒還欠甚麼 當找到你
如若話別日子不知怎過

我想於世上每天 你准我在旁伴你
我想跟你同行互牽 一起笑和悲

這雙肩膞為你堅 有風有浪仍護你
世間爭先要新鮮 我只要你

我想世上每一個女孩子，如果有一個這樣真心的人在身邊，也會感到自己是世上最幸福的人。

helen結婚d相 :
http://community.webshots.com/user/22etaa2

>>November 6, 2004 at 9:02:55 PM GMT+8

2004 年 11 月 4 日 星期四 【晴】

今日都OK忙碌0架....

強仔下午打俾我，原來佢黎幫大家樂攪工程喎，佢好似形容得個青衣城好靚咁，我就落0左去陪佢行一陣，之後我地一齊搭地鐵，我就拎住兩袋野，去0左hall搵小孩喇。

因為今晚我打算係hall度屈蛇，小孩住埋呢個sem就走，我又難得因為helen結婚有個藉口出黎訓，所以就去0左屈蛇喇。

又來到這個熟悉的地方，又有好多野變0左，我唔理個實Q，扮曬學生咁混入去(因為而家hall大閘都要duo學生證。放低d野係小孩度，然後我地就出去尖沙咀join肥妹食飯，因為肥妹生日(上個星期)，所以我地兩個就請佢食飯，因為我呢排太想食小籠包的關係，所以我地就去0左翡翠拉麵小籠包到食，唔，人就好多人排隊食喇，但係佢d野麻麻地好食0者，個小籠包未無我想食0個d咁好味(我想食台灣鼎泰豐既蟹粉小籠包)，d拉麵都麻麻地，個蘿蔔絲酥仲要有蔥添...真係浪費了個酥皮咁脆。

之後肥妹話請我地食糖水0架，佢聽到我講話屈蛇，佢又想黎喎，所以我地就諗住去芝麻綠豆度食，但係去到門口我地發現自己真係太飽，所以都係無去食。

我同肥妹兩個係樓下等小孩拎d證俾我地時，係門口，風吹過，有我們熟悉的街道，我們二人似乎也覺得這個地方已經不再屬於我們了。

上到去carol仔都玩化妝，肥妹幫我試了個，但我勁驚聽日唔識自己化囉，佢好慷慨咁借0左d化妝品俾我，然後傾0左陣計就訓覺喇。小孩好似好擔我無地方訓咁，小孩媽媽果然好照顧女女呀。雖然今日黎hall大家都無得好似以前咁傾計，但係係hall訓，都幾舒服，我又再次看到那個可以看到日出的海。

返到hall，有很多回憶，但很多事很多人也成為了過去，成為了陌路人，人生的經歷，就是要不停的相識、相處到分開嗎?

>>November 9, 2004 at 5:55:10 PM GMT+8

2004 年 11 月 3 日 星期三 【晴】

如果呢個世界真的有神..
可不可以指引一下我的路........?

不知甚麼原因的辛苦
也不知如何訴說
只有我自己在這沼澤中活埋嗎?

今天的逃走
令我感到完全失去面對的勇氣

>>November 4, 2004 at 7:05:42 PM GMT+8