2004 年 11 月 23 日 星期二 【晴】

畢業禮
就這樣完結了................................................................

今日玉怡生日
祝她生日快樂呀~

>>November 24, 2004 at 5:54:22 PM GMT+8

2004 年 11 月 22 日 星期一 【晴】

今日返公司實習下環境，其實都有野做0架...幫佢整個新的powerpoint，隻眼成日都無離開個mon，仲要對住個開個powerpoint再加兩個網頁就hang機的電腦囉...都有點累..

不過同佢講0左星期三同星期五唔得閒，乘機抖番下先，下星期先正式返工。

五點半放工，出了荃灣，因為聽日係西瓜生日，我地四個就出0左去阿咕介紹既餐廳食飯，都幾好喎，又平又抵又好食，係食雲南野0架，個南瓜餅好好味。

唉
佢地三個，無一個會睇我dairy ，我最好的幾個朋友都無睇，真係灰。
西瓜話之前有睇過，但係太多字，話我講下風講下月又大一版..咁唔寫咁多囉.....人地寫得細緻之嘛。

之後我提議我地幾個玩secret angel...
係18-19/12去wild camp之前，我地要抽個守護者出黎，然後暗中或明示對佢好好，然後自己又要寫低對佢做過d乜野喎，到18號0個日開估，然後俾番個守護者睇，睇下佢feel唔feel到，哈哈，開估之後就送番份禮物俾守護者。

我地幾個講得好開心，雖然慧豬有事做要走先，但係我有幫佢抽0架...真係期待18號的來臨..不知那個是我的angel?

To my angel:
我要surprise~
最好就係一d我一直好想要既野...
其實我好想手攪的音樂盒
仲有好多天空之城的產品...
或者天空之城個機械人記事薄
或者是新出的龍貓電話繩..(有星星0個個)
仲有打爛了的winnie the pool 玻璃樽(因為西瓜送俾我0個個打爛0左)
或者係唔見了的狸貓筆...

最想要的
還是最後0個兩樣..
因為回憶
是買不了的...


聽日畢業禮...
好期待~~~

忽然間有d掛住錢~
你畢業未?
未同你影相~

>>November 23, 2004 at 5:12:45 PM GMT+8

2004 年 11 月 21 日 星期日 【晴】

22 號
心情好
陽光普照有野做~~

yeah...
我搵到工做喇...
今朝十點半去了葵興sec in
見個大老闆，感覺都幾nice.....
然後我個阿頭就問我下午得唔得閒一齊去d學校睇下佢地做d乜野...
十二點半見完，一點就要食埋飯返去同阿頭去學校...
事情快得令人不敢相信...
不過個阿頭都幾好傾...
明天開始上班了

隻畢業ter ter真係好腳頭呀~
哈哈哈~~

搵到份關於media的工，又可以寫下新聞稿，做下leaflet咁，令我感到很有希望，同埋又近喎，搭車都係3蚊~我個department得我一個，所以發展潛力都好大。

總之一句講曬，今日好開心，即時致電各方好友通知佢地呢個消息。

經過將軍澳，記得有次行完山經過話有座山可以上山採藥.....仲有得飲茶.....
好似好耐lu...

五點半係將軍澳的小學離開，然後join慧豬一齊係黃大仙搭地鐵返青衣，青衣城新開了一間cafe，叫LedoXXX，杯cuppicino都ok... 只係我地兩個成日講野都太忙形。

今晚個天空好靚，好似一塊深藍色的玻璃........只要有夢想，總可以見到晴朗的天空作為奬勵~

>>November 22, 2004 at 5:13:19 PM GMT+8

2004 年 11 月 20 日 星期六 【颳風】

今日好開心呀..............

好似好耐都無見過我d莊員...上次齊人d應該都係helen婚禮，今日我約0左我地莊d人一齊返去影畢業相。因為驚24號佢地個個返工，都未必趕得切返黎。

今朝約0左十點荃灣等，我地今日去川龍飲山水茶呀，好開心，由上莊講到落莊，今日終於可以做到喇，今朝都有6 個黎飲茶，vincy、terry、阮美同frankie，然後阿john開七人車上去，幾舒服呀。

對唔住John大爺...其實我今日已經好早到0架喇，下次都係約你遲d，唔駛要你等我地。

我地坐車車上到去川龍，都好多伯伯黎喎，仲有d行山人仕添。我地搵0左個位坐，沖0左茶就拎了第一round野食...d野都好味，感覺上比出面茶樓新鮮，我地食食食，又有好味的麻蓉包，好好味，我地第二round見到d咩新鮮出爐既我地就要，又有豆沙酥餅，又有新炸的春卷，咸水角等等。哈哈，我地而家飲茶，不再需要好似以前係點心王咁，一粒蝦餃幾個人分...諗起0個時係點心王食野，唔知點解又食得好開心，雖然無咩錢，但係最重要的是同莊員一齊有傾有講，好容易就渡過快樂時光的感覺，而家叫佢地去點心王佢地都未必肯啦，山長水遠黎川龍飲茶，仍然是依舊的嘩哈哈，講下笑下，好開心，食完每人都係34蚊，仲要加埋50蚊泊車錢，真係幾抵。

食飽飽，大約十二點，佢地聽下我既見工趣聞，同埋聽下我講去 patagonia睇褸的趣聞後，好快就到0左poly..

好開心呀，我d莊員送0左隻畢業公仔俾我，我幫佢改0左個名叫畢業ter ter，因為佢地個個都話隻野似我，一樣咁笑同著唔落件衫....隻畢業ter ter好得意0架，我好鐘意佢，以後我會好好愛錫佢啦。

好攪笑，阿john仍然是俾donna 串到唔出聲，講句..我今日唔同你影相喇..哈哈哈，以前上莊0個時都已經係咁...

我地都係周圍影，我地好嗜，又要影埋0個d跳起影既相，而最特別既就係上0左中牆，成班坐曬係度影。之後terry仲攪到我對高跟鞋斷0左爭，好彩有個萬能的福利幹事係度，先攪番好對鞋0乍。真係要多謝我地萬能的福利幹事。

唔知點解，其實我都好想同所有莊員一齊畢業...可能一齊著袍影，你話幾咁好，當然，有很多事，也不是在我們掌握之中，佢地有d怪我地上莊無點同佢地影呀，但我好記得我係返0左去三次同佢地影相，不過算啦，我都知佢地鍚我，所以陪我去多d地方影，影幾耐都無話累。多謝你地。仲有嫂嫂呀，唔舒服都黎，我幾驚佢暈倒，好彩無0乍，總言之，其實我同大家一齊，做咩都好，都會覺得好開心。

今日其實我都見齊十個莊員既(除0左係上海的alex之外)，不過唔係係同一時間見，所以都係無法影張靚靚莊相。

睇怕，呢個願望都要等24號，或者alex下年返黎畢業時先有得影喇。
alex，我等你返黎呀

>>November 21, 2004 at 5:13:52 PM GMT+8

2004 年 11 月 19 日 星期五 【微冷】

今朝早一早起身去青衣城同屋企人飲茶...
我又無起唔到身喎，幾勁，可以陪下婆婆飲下茶，傾下計，其實都幾開心...

然後行0左去長發等小玲，點知係樓下個公園都等0左好耐吳小姐先到...雖然個公園陽光充足..又可以望到針山同大帽山，不過都令我等佢等到有點恰眼訓(不過算啦，因為平時自己遲到開，成日要人等，今日就試下等人的滋味。)

然後我地係長發搭49X去沙田..中途撞到周家威同佢好似樣的女朋友，可惜我黎遲半步，只有小玲見到佢地。

今日因為有個朋友屋企人好需要骨髓移植的人，佢地係沙田新城市擺0左個好大型既抽血CENTER，所以我就去幫下手，我同小玲因為都好少行沙田...係沙田廣場迷路，沙田真係好鬼死多人，我又唔係成日去，結果我地搵個噴水池都兜0左好遠路先去到。

今日肥仔都有黎做義工，抽完血，阿敏又未到，所以唯有行住先啦，我地係幾個商場中穿插，但係行黎行去都係係度兜圈﹐因為唔認得路，好容易行番回頭路，今日就係咁行黎行去，好累。

小玲對D化妝品好有興趣，之後等埋阿崔同阿敏，我地四個人就走0左去睇戲。

之前RAIN講「公主復仇記」幾好睇，本身我對呢D講賤男人既戲無乜興趣，不過佢地想睇，就陪下佢地~哈哈，聽講台灣真係有D類似既真人真事發生過，真係慘呀。

套戲都幾好睇....
個劇情幾好....

不過睇睇下見到隔離個女仔同我做埋同一個動作....唉。

吳賢祖話「你有無聽過真正既王子係唔會令公主傷心的，令你傷心0個個，係仆街!」

但我覺得唔令你傷心0個個，又點會係你鐘意0個個，只有無付出過的人，才不會傷心，有付出的，那怕一天沒見，一句說話，也可以令你流淚、傷心。他有能力給你快樂幸福，也有能力令你傷心悲傷。

不過我都好讚成，呢個世界有太多仆街~

然後故事以一句說話終結: 呢個世界根本沒有公主，只有巫婆....呢個世界根本沒有王子，只有扮王子的仆街.....

可能好多人愛既反面就係恨，會想很多事令別人也得不到幸福，但這又何苦?其實套戲入面，阿嬌都有自己唔好的地方，感情是雙方的，情變也不是一朝一夕的事，鬼叫佢鐘意0左個花心的仆街。

我不是公主，也不要變成巫婆，我只想做一個平凡人，一個俾另一個平凡人愛著的人...
就好似 Notting Hill 入面個公園度，有一張長椅，那個會永遠坐在我身旁的平凡人

而我亦相信總有d唔想做仆街既人生存係呢個世界上，爭在你遇不遇到吧了。

講起 Notting hill ，好記得入面有一句好令人感動...就係係書店，Julia Roberts同 Hugh Grant講
「But dont forget...
I am just a girl...
standing in front of a boy
Asking him to love her....」


P.S. 今日又有事發生了，希望我身邊的朋友仔會體諒大家多一些，彼此的距離又會短一些...大家退一步，不是更好嗎?

>>November 21, 2004 at 5:10:39 PM GMT+8

2004 年 11 月 18 日 星期四 【颳風】

今日本身都幾開心...不過最終又因為一件事令我心情很差...

今日去0左吳祥川搵小玲放學，吳老師而家係吳祥川做實習老師，今日天氣很好，萬里澄空，可以係屋企樓下清楚咁見到大帽山山頂...沿住條路，穿過四周長滿樹、長長的樓梯...呢度都變0左好多，返到學校...D人都唔識Lu....李煜煇見到我都唔同我打聲招呼..太可惡了，SIR SIR仲係係教員室好努力咁教人英文，入到prefect room，同dprefect講句:「HI，我係N年前既head prefect呀~」竟然無人理我，我都係畢業0左三四年0者...不過經過個球場，好舒服。經過雨天操場，見到miss wong又教人跳舞喇....每年十一月開始..學校既PE堂就會教學生跳舞..實在太開心了...好懷念呢。以前我都好鐘意咁去玩..玩到六七點先返屋企。

然後同小玲出0左去葵芳行..又去0左miss fields食曲奇餅同飲熱朱古力...好舒服..呢個時候新都會仲要播「yesterday once more」，呢首係小玲以前參加歌唱比賽拎冠軍的歌...好懷念以前中學的生活...

小玲係台上的歌聲...我仍然依俙記得:

When I was young I'd listen to the radio
Waitin' for my fav'rite songs
When they played I'd sing along
It made me smile
Those were such happy times and not so long ago
How I wondered where they'd gone
But they're back again
Just like a long lost friend
All the songs I love so well
Ev'ry sha-la-la-la ev'ry wo-ho-wo-ho still shines
Ev'ry shing-a-ling-a-ling
That they're startin' to sing so fine
When they get to the part
Where he's breaking her heart
It can really make me cry just like before

It's yesterday once more

今日真係好似yesterday once more的感覺...

之後出0左旺角...
搭42a返屋企..因為同vincy傾得太開心，拎0左本記事簿出黎睇山霸王d資料，vincy話同我一齊參加呀，不過就係因為咁，自己跌0左本記事簿都唔發覺...本簿，有我好多莊相，同埋一枝好鐘意既狸貓筆，支筆..陪過我考會考....a-level同埋大學生活....因為支筆係我同西瓜一齊買的..好有紀念價值，0個日我見到佢放係筆袋度看不見天日，咁不如帶佢周圍走..結果就咁唔見0左。

返到屋企，個站長打黎叫我去長亨拎番本記事簿，我去到發現全部野都係度，只係唔見0左支筆，其實搵番本野都已經係不幸之中既大幸...但係點解好見唔見...只有支筆不翼而飛?

為0左支筆唔開心..好白痴呀可?

咁支筆真係有好多回憶....

點解喜歡的東西不可以留在身邊??

可憐既筆，可能而家係架巴士度俾人踩住、或者俾掃地阿嬸執0左去...或者俾個乘客執0左去掉...希望佢而家係俾另一個執到，對佢好好咁用佢啦....

唉
我有走番去問個站長，不過佢話無...其實我都有諗過去架車搵下...不過架車又走0左.....我都有諗過問下佢個乘客個電話，不過算啦...我對於自己的無能為力感到有點無奈...

或者我同佢既緣份己盡...

究竟萬物與萬物之間的緣份又是誰定的 ?

我除了笑住咁同佢講byebye
我仲可以做d乜?

>>November 19, 2004 at 5:10:33 PM GMT+8

2004 年 11 月 17 日 星期三 【晴】

今日起身時，不知今天是星期三還是星期四.....
好想快d到星期五sec in...
不過佢打黎話大老細未返
所以改0左星期一...

今日都係無所是事，但係係屋企個感覺係幾好既，我都好驚遲下無呢種咁悠間既生活了...alex係上海又去絲路﹐又去四姑娘山大風大雪咁露營，真係好想去，如果有錢，一定飛去搵佢，不過係屋企一個人靜下﹐做下自己想做的事，好似執下野，寫下野，遲下返工忙又無時間的了。
活在當下，珍惜現在的感覺與一切。

夜晚同阮美玩msn，前幾日我換電話時又玩呢個sms懷舊之夜，就係上莊0個時主席成日send黎0個d"馬年好運去行山，廿二旅協E-G ban" 既短訊，我send俾阮美然後又叫阮美send俾我，因為我驚換機會無0左以前D message，後來好彩唔會無0左0者，所以由上莊到落莊d message我都無刪...我好多都唔捨得掉...因為有時唔開心時睇下個人都會開心d，哈哈，我真係咩都唔捨得掉，唔多掂。

今晚我地兩個又玩呢個movie懷舊之夜，佢有好多珍藏的movie，由組莊到暑假，成日係counter，所以成日拍埋d傻仔movie....睇番真係諗起好多攪笑白痴但又好令人回味的記憶...睇番，其實我地咁多個入U 之後變化都好大.....最大的就是alex同強仔，以前個look真係.....一絶!!!
仲有frankie個溫拿頭...哈哈哈....

仲有以前住hall，alex成日唔肯起身...我地係佢肚脯玩遙控車，仲有好多好多...好好笑...

咁樣睇番..
住hall0個年真係幾開心，尤其是第一年，自己莊同下莊都好多人住，成個hall都係旅協人，好開心....

我記得一齊打乒乓波..一齊打邊爐...有時會走去痴下糖水同甜品...好開心..

但那時的自己..也不知道這些便叫幸福吧?

所以幾時都珍惜當時擁有的，是最好的事。不要讓生命有遺憾與空白的地方...


很怕
有一天燒d牒壞曬...
然後所有相同movie都無曬.................

>>November 18, 2004 at 7:45:13 PM GMT+8

2004 年 11 月 15 日 星期一 【微冷】

今日好凍，開始有d冬天的感覺...
冬天..好快就到喇...

我其實都覺得係係d好信賴既人面前先會缺堤，當年我alevel放榜，Geo考得好差，我都打俾我個friend喊，其實不為甚麼，好似咁辛苦既alevel終於完成0左，好似一直緊張的心情放鬆下來，所以就情緒失控，但你知唔知我對住佢喊0個個人竟然係電話的另一邊對我說，我仲未訓醒呀......你遲下先啦好唔好...真係激死我，呢個就係琴日對住我喊0個個女仔，亦即係我識0左16年的朋友喇....0個一刻，真係灰。

琴晚好好訓，今日又凍喎，令我想起以前係中學，呢個時候就會著冷衫返學，夏季校裙輕輕的感覺加上溫暖的冷外套，那種感覺很中學，哈哈。

下午又去見工，係荔枝角，不過今次份工好似有d恐怖同呃人的感覺，成間公司得兩間房，然後見我0個個人又係咁叫我個名，問我如果有二百萬會做d咩喎，鬼咩，我呢世人都無諗過自己有二百萬，或者係發達!!所以佢呢個問題，絶對係考起我，不過算啦，我都唔打算係度做...個feel完全唔0岩~

之後約0左西瓜去睇佢份生日禮物，所以我就跳0左上架41A，原本打算返poly坐下，但係最終都係尖沙咀落0左...

佢份工，都唔知咩工黎0架，返朝七放夜晚七點，成十二個鐘0架，佢都係返placement0者，駛唔駛咁盡呀?有時見佢咁，都覺得佢辛苦，所以我行0左陣就去半島扮濶太入去行下，順便等佢，見到佢著制服0個樣，好攪笑。七點鐘，佢終於放工喇，然後我地一齊搭地鐵到葵芳睇衫。

因為佢想買件衫做生日禮物，睇黎睇去，見到件nike幾靚，不過都唔0岩佢去英國著0架喇，遲下買件freeze俾佢啦(不過今日經過開mountain hardware，好似執0左咁既)，我又睇中0左件衫，呢排都無得買衫，費事我呢個註米大蟲又亂洗錢啦，但係成日都係著0個幾件又係一個問題喎....
所以有時買0左都唔敢著住...真係慘呀。

我地倆個好耐都無一齊行街喇，雖然時間短d，但係我都好開心...因為同佢一齊行街傾計很舒服..

我地係 catalog見到d送俾人用的音樂盒仔，好靚，其實我細個好鐘意d透明既音樂盒...細細個，要自己攪先發聲0個d...但係而家少0左古老的音樂盒賣喇，西瓜話lemon係美國去迪士尼0個時買0左個咁既音樂盒俾佢，好開心呀....唔..我都好想要一個....不過呢d唔恨得咁多...哈哈~

好事..要繼續來~~

>>November 16, 2004 at 6:01:07 PM GMT+8

2004 年 11 月 14 日 星期日 【晴】

今日我都幾開心......

今朝早去見工，感覺上個工作nature都係我想做0個類型，即係寫下稿，攪下活動呀，同埋同傳媒工作有d關係。

或者，我真的很難成為一個記者的了，但我不會灰心的。今日睇書，人生十大成功元素: 堅毅、認清目標、機遇等等...

機會來的時候，我們要做最好的準備，然而人生有太多事，是不在我們控制之內吧?

佢叫我星期五sec in呀，如果返到都幾好，又近喎，半個鐘就係屋企返到去。

然後下午有一份好神奇既工見我去見，就係無啦啦有個agent打黎，佢連我個名都唔識就打俾我介紹我一份sales and marketing既工俾我，仲話有10K添..係金鐘見工，好恐怖咁，都唔知會不會俾人呃。所以我係主席的"勸誘"下唔去in lu

主席兩點打俾我，好耐都無見佢喎，佢呢個月真係忙到爆燈，唉，佢連畢業相都唔得閒同我影呀，真係慘呀。所以好難得佢打黎搵我食lunch喎，我又真係咁0岩未食，所以就過0左海搵佢喇。

佢仍然著住件昊日，真懷念，而家得番佢係好似以前上莊咁著番莊衫周圍走，好想搵日都咁著先，可能自己而家好少著得咁sporty，除0左行山0個時，但係去camp平時都會帶昊日衫去。

同佢食0左米線，都ok 喎，陪佢行0左陣賣行山衫的鋪頭，time square0個頭又真係有好多喎，0個patagonia sale睇見我著suit，好似覺得我地平時好少著呢d衫咁，哼，可惡，不過佢d款都幾靚，但係好貴囉，不過佢話patagonia係發明freeze0個個，幾勁呀。不過唔知係唔係真的。

然後我地就去0左人民書社度坐，都幾舒服，同埋d野飲都幾抵，大大杯，又有書睇，正...
嫂嫂出到黎，可以同佢傾下計，原本諗住同佢傾下密計，不過阿frank 係度就算啦，遲下約埋阮美我地幾個 女仔去傾密計啦，哈哈哈。

不過朋友仔因為d事唔開心...唉，見到佢喊成咁，我都好心酸，不過傷心起上黎，又真係好難控制既，諗起自己，之前會不會太誇張嚇親d朋友仔呢?

其實d傷別人心的男人，自己會否也會因為傷人心而不快樂的? 見到她這樣，真的不想她受傷害。

不過她說見我是死敵，見到我會哭得更厲害...令我在想這個問題...其實又真係，有d人係某d人面前又真的特別容易，可能是信任或者因為....其實我也不知道0個原因。你們又有沒有這樣的朋友?(唔係男朋友喎)

她應該已經沒事吧，冷靜過後去找他吧，一定會仍然珍借你的。

>>November 15, 2004 at 6:07:27 PM GMT+8

2004 年 11 月 13 日 星期六 【晴】

今日約0左s屋企人返poly影相....
原本攪到好似好煩咁
不過今日黎到...
其實都ok...

朝早同舅父、姨媽同阿媽飲茶..舅父同姨丈送0左紥太陽花俾我，好開心喎...太陽花好靚，影相應該幾好睇...

然後等埋表妹，我地就出發喇。

阿媽今日好似都好開心咁..佢地話黎到可以感受下大學D氣氛，連我表妹都話好想入大學，見到佢地開心，咁就好喇。

聽日有兩份工見，一份係葵涌，一份係金鐘...要加油~~~

希望好事陸續來^ ^
盡人事以聽天命...
不用過份擔心明天
但願如此

>>November 14, 2004 at 3:56:48 PM GMT+8