2004 年 12 月 30 日 星期四 【晴】

今日是2004 年最後一天了
唔開心的零四年
bye bye 喇...

今日一朝早入大圍鄭榮之度睇個膠板點整，好凍呀，聽講今日係四十三年最凍的除夕，今朝出門口都幾凍，本身諗住出長咀，但係d莊員有d都淆底唔知去唔去。

去完鄭榮之然後就去旺角拎banner 再送去協和，感覺都幾好丫，幾舒服，之後我去0左英昌拎番阿John盞燈，順便行去佐敦食澳洲牛奶公司，可能今年生日都未必黎食lu..哈哈，然後我就約0左frankie拎fly，然後就返公司喇。

返到去阿頭寫完諭文叫我執一執再幫佢釘裝埋，好忙呀，不過又勁多人打電話俾我，阿frank又話驚出到咀得零度，又約0左阿John，可以同佢倒數，terry又提議去大帽山睇霜，好似無乜人想去長咀咁，其實原本我都諗住唔去，不過又有少少想好凍咁過一個元旦，所以我最終都決定去………

肥仔同強仔好好﹐六點我先講俾佢地知我去，佢地竟然六點都話陪我去….好感動…好多謝你地我永遠做d咩都支持我。佢地即刻返屋企執野，我就極速咁返屋企執野，幾勁呀，我一個袋裝曬營、fly、爐、cookset、三個睡袋，簡直去camp既野全部有齊。幾勁，不過最勁既係我唔駛我自己拎，哈哈。

去到西貢，阿b佢地趕住搭八點半班車走，我地自己莊就去0左麥噹噹食野，然後去惠康買野食，買完就搭的士出發喇。

個司機勁好吹，又話之前東灣有對情侶俾人扑頭喎，真係恐怖，我地去到北潭坳，撞到班人，佢地又係入長咀喎，所以佢就話同埋我地一齊行喇。

我地幾個開始行都有d凍，不過又OK喎，阮美個冷帽look好得意，我地幾個傾下計，行下又行下，好快就到赤徑。

去到大灣，因為我講錯野，攪到行錯路添，哈哈。不過我地去到大灣，個沙灘好靚呀，再加上一個好光既月亮，照落去個海度，就好似一塊銀色的玻璃，真係好靚。大灣永遠也是我心目中最美麗的沙灘。

不過今年我地無辦法係長咀倒數喇，只係係大灣過東灣時倒數，最攪笑有人部機俾風吹跌，令我想起紅花嶺0個次都係咁。我地唱下歌，咁就到長咀，去到0個度都成三點了，肥仔一起個營就訓，我地飲埋湯，再飲埋酒食埋蛋糕就訓喇，其實黎到長咀，都唔係好凍0者。

P.S. 聽講今日阿嫂病0左，希望佢無事喇。

>>January 2, 2005 at 3:59:06 PM GMT+8

2004 年 12 月 28 日 星期二 【晴】

又一年喇
時間過得很快
我有點想知道
上年這個時候的自己
快樂嗎?

今日仍然眼訓
holiday mood依然....
所以下午出了旺角整banner D野
當我搭地鐵發緊呆的時候
係葵芳站見到個男人坐係月台度
熟口熟面...
原來0個個係frankie，佢又見到係車廂中的我喎
呢d可能就係緣份喇
如果我坐低0左，無去0個個車廂..
無望出去..
可能就同frankie擦身而過...
感覺好得意
結果佢請0左我去大角咀食午飯

夜晚同男人同強仔睇功夫...
我覺得幾好睇....
不過勁唔似周星馳d style...

之後係廟街食煲仔飯..
兩個男人又講埋d好得意既話題
次次都有新野
今次佢地講緊阿元華招聲東擊西係唔係有用...
點解個個男仔都係用呢d招0架...-_-;
真係........

就快又31號
今年都唔知出唔出長咀好
但係有d莊員係度
我唔應該覺得寂寞..........

>>December 29, 2004 at 5:49:29 PM GMT+8

2004 年 12 月 26 日 星期日 【晴】

今日
又是超級開心的一天....

今日又出街...真係放假都勁玩...

十二點約0左班莊員唱 k lunch..起身打俾佢地，點知方梓晴仲未起身，仲俾neway個電話我，叫我打電話去...肥肥又剛起身，vincy同強仔都係..點解我d莊員個個都咁爛訓??不過我地去銅鑼灣唱..frankie實唔會遲到...仲叫我上埋佢屋企搵佢...唉

不過我都遲到，因為要買埋d未買既聖誕咭俾佢地，哈哈。

去到佢地好似好耐無唱K，其實我都係，最攪笑既係強仔只係拎住支咪夾嘴型，笑死我...

唱完我地又去行街，今年我地既聖誕已經唔駛踩單車，行山，過0左個好城市的聖誕節...

然後我地就去筲箕灣拎車同買野食喇，今日又有得坐車車，買完野食就坐車車入去深水灣燒野食...

係車度聽到好多海嘯的消息，感覺真係好得人驚，最驚就係去旅行時遇到意外返唔到黎，可能好多人都永遠見唔到，好唔捨得...唉，不過命運要黎，又有邊個可以改變，只要有所愛的人在身邊，我覺得已經足夠...

去到我靜雞雞入0左更衣室寫埋我未完成的聖誕咭，我以為好快寫完，同埋佢地傾下計又點會發現我唔見0左，點知過0左一陣肥肥就打黎...問我係邊，frankie、terry同donna都打黎...不過我唔聽佢地電話，結果肥肥send短訊黎話好擔心我...仲燒埋燒賣同雞翼俾我...好感動呀，我仲聽到terry 同frankie把聲係更衣室門口，一出去見到frankie，原來佢係度等我.......

有你地呢班好莊員係身邊，真係上天給我一個好美麗的禮物.....多謝大家對我咁好，可以同你地一齊過聖誕，我覺得好實在，因為你們是實實在在在我生活中可以讓我觸及的人.....今日影相時我話影多幾張，因為驚唔係成日齊莊，然後DONNA話，唔駛啦，成日都齊0架0喇，我望望大家的背影，心諗，又係喎....^ ^

強仔燒一陣又要趕出去返工，阮美黎到，我地抽埋禮物先俾強仔走，我地以抽身份證的方式抽，勁攪笑，Donna抽到強仔既眼部按摩機，佢即刻戴上眼，成個青風俠咁，笑死我。

阿John上年買聖誕樹俾阿嫂抽到俾人講足成年，阿嫂個阿媽問幾時可以掉棵野，笑死我地....今年阿John抽到肥肥既超人特工隊公仔...阿John係咁話唔要..但肥肥又話好得意喎。因為我唔想出現上年阿frank買恐龍玩具的情況出現，我叫最有可能買無聊野的Donna記住唔好買無聊野喎，結果佢見到肥仔同阿frank份禮物都係咁話我點解唔叫佢地唔好買無聊野.......哈哈，咁我覺得你最有可能丫嘛...

阿frank份禮物係一個膠鎚同埋掛相的浴簾，而阿Johb同Donna 都係杯牒，阿john0個份強仔抽到，donna0個份肥仔抽到，而我就抽到 vincy個相簿..好靚0架..好開心，而frankie就買0左個衰衰地既公仔，佢地話可以俾Brian用喎，因為佢好大個心口，所以我地叫個公仔做「程志遠」，哈哈。而阮美就買0左Mask，俾阿frank抽到，最無聊既都係terry，佢買0左個要種既盆栽...頂.....

而我就買0左頸巾，好貴0架，諗住莊入面多男仔，所以選了條 中性d既，好暖0架..我要佢地戴去長咀，點知俾阿嫂抽到，總之選個顏色鮮艷d既，同埋佢今年生日都收過頸巾，所以總之買手套喇。

一路折一路拍movie ，遲下又變成珍貴的片段..........

我地傾埋買莊褸事宜，今日廿二屆常務會既議程都傾到七七八八，好野，新年買新莊褸....

玩到十一點，好開心，我地坐johnjohn0架車出旺角然後同terry坐42a返屋企..

希望將來的聖誕節
仍有機會齊莊出席
大哥哥alex你捨得返黎未呀???
好掛住你..

>>December 28, 2004 at 5:52:20 PM GMT+8

2004 年 12 月 25 日 星期六 【晴】

今日又同阿咕同慧豬去玩喇...

我地今日去0左南丫島行山，兩點幾船入索古灣，勁hea ，然後上山，佢地話好難行喎，不過上到去好大風，好舒服...我地傾0左好多計...好開心...

好多情侶黎行山，慧豬問我會不會第時都係咁，我曾經想過，仲想可以係灣仔攪個露營婚禮，不過而家已經無乜點諗lu，哈哈..

我已經唔記得曬d石係邊，而且佢地都無乜興趣睇，真係無癮呀....特登帶你地黎睇0架嘛...

我地之後出0左中環，去0左皇后像廣場影相，今年第一次出黎睇燈飾，都ok靚丫，然後我地諗住行去天后，經過金鐘時有煙花睇呀，係政府大樓樓下d煙花，感覺好得意，因為平時都係係尖沙咀睇既多。

我地去0左天后間又一店食上海野，幾好味，又有小籠包食，好開心....

因為要等玉怡放工的關係，我地又行番上灣仔搭船過海，去到尖沙咀，好似唔係好多人0乍喎，我地搵0左個地方坐，因為玉怡十二點先放工呀，點知佢打黎，話佢可能要加班喎....

結果我地幾個就去半島搵佢﹐佢個樣好似好唔開心咁....唉，見到你咁我都好唔開心...俾0左張咭佢，佢又要返去做野喇，我仲俾買最後一份angel的禮物...希望你鐘意...

同你地一齊過聖誕，幾時都咁開心同舒服.....

係銅鑼灣，我地三個手牽手行街的時候，泰國發生了大型海嘯，天災令很多愛對方的人分開了，我感謝，此刻我最珍惜的每一個人，仍然在我的身邊....活在我的生命中...


大家又估邊個最快結婚...慧豬今次以大熱門姿態勝出...上次angel佢輸0左，今次俾你威番喇
我都好想你幸福，好想做你伴娘...

不知五年後我又會在做甚麼?

希望慧豬會快d開心番...

記得以前中學時候有一句詩....

「跌跌撞撞，摘下了現實
放下，很苦
再上途」

今年的聖誕節
不知為甚麼
就是有一種淡淡的苦澀...
平常不覺
但當一切感覺沈澱下來的時候
那種苦
卻慢慢的爬上舌頭..........

>>December 29, 2004 at 4:58:29 PM GMT+8

2004 年 12 月 24 日 星期五 【晴】

聖誕快樂...........

今日同阿柯阿崔同rain出街，買0左好鬼死多野，無錢喇.........
點解會失控0架........

不過一齊都好開心，食下飯...然後竟然影貼紙相喎，我都好耐無影咯...

之後rain要返早，我地三個又去了 cafe度坐，傾0左好耐計...
唔
我聽見阿崔的事蹟，覺得她很勇敢...要加油呢...

有時
就係好似買大細咁
邊個知道個結果會係好定唔好?

或者真係由個天去定啦...

>>December 28, 2004 at 4:11:05 PM GMT+8

2004 年 12 月 23 日 星期四 【晴】

今日係平安夜，祝大家都開開心心
好幸福咁過啦...

今日一朝早又要入大埔喇...
行落去坐49x入沙田再轉火車，好遠呀....

阿Paul (我同事)住係沙田，勁快就到.....

我地搭的士上去匡智松嶺學校，見到個IT人，阿Paul果然 pro好多，起碼可以解答到個老師d野，我地傾完野差不多十二點，然後我地就坐車返公司。

因為間學校好近大埔中心，我又回到呢個曾經好熟悉的地方，曾經有一個月日日都行呢條路，今日我已經以第二間公司的身份再來這裡，感覺輕鬆了很多，但這種感覺又好特別，又搭番平時放工一定搭的75x返城門轉車，我竟然以為所有x車都經城門既添..俾我個同事事笑我添。

之後steve(我阿頭)叫我地兩個去拎位食聖誕大餐，好開心呀，仲以為無得食添。去到葵芳好多人，我地見到意粉屋叫我地，我地真係好似拎頭獎咁衝出去....唉，不過我地白等了兩個鐘，都估到公司d人無咁早出到黎，平時叫食飯叫好耐d人先肯行，成日要做埋d野先...今日公司兩個enginieer出0左去，結果要放棄佢地喇。

同公司d人食飯都幾開心，阿頭竟然話我係佢食野既入室弟子，可惡呀，然後公司d男人又玩我喇....好慘呀﹐點解我去到邊都係俾人玩既??不過個感覺幾好。

返工，好似以前返學咁，新環境，新人物，現在生活接觸得最多的人就是他們，我要將他們變成好似以前D同學咁.....我覺得這種改變也不錯丫...

食完飯三點幾，我地就放工喇..好野，我返0左poly放低d野，今次真係真真正正咁放低喇，我終於可以不拖不欠地完結....感覺好像輕鬆了很多...

返到poly，一切仍然很熟悉，但一切又漸漸的陌生，想起第一年係poly過聖誕，就係同helen一齊溫書(因為未考完試)，之後仲有資料組印衫，幫carol同肥仔慶祝生日，肥仔仲走0左去學車要靠個電話黎吹蠟燭。第二年聖誕係hall度過，第一年住hall最開心，最多人，第三年好似都係hall度過，夜媽媽買支啤酒俾去alex房吹水的時光，已經那麼遠了....現在，我又回到這個地方，身份及感覺已然有點不同，但相同的時，那曾經在這裡享受過快樂生活的自己及記憶.......

之後同肥肥行街，其實我好眼訓，不過又好想同佢行陣，係平安夜仲有佢陪我，真好...我地行完旺角我就見埋主席同阿嫂，見佢地好寧靜地過，雖然簡單，但卻很幸福，其實很多事只要簡簡單單在一起，這種感覺已經夠了...

然後我就返屋企食飯，見到阿媽好開心，其實我都好開心......其實平時真係忽略0左佢...其實雖然這樣平凡地過，但我卻感到很溫暖......

又一年............

>>December 29, 2004 at 4:29:49 AM GMT+8

2004 年 12 月 22 日 星期三 【晴】

咁快又到23號了
不過今天仍然要返工...
希望聽日會可以早少少放...
不過早少少放未又係咁..

今日約0左星島d人
然後又要去青衣工業村度咪，再出大埔，本身我唔去大埔0架，但係個老師又死都要我去，d sales又唔得閒理佢...然後我就要單一匹馬咁上去，間學校仲要係半山，我成六點先去到，個老師見我好似無乜料到都有d怨恨，咩0者，話0左我唔係sales，唔清楚0架啦，都話聽日先dem到俾你睇咯，又唔理人.....唉，傾到六點幾，天黑黑，然後坐車去了又一城買莊員份禮物。

肥仔五點幾打俾我話係旺角hea緊諗住搵埋我，但係又要同屋企人食飯，所以我都係自己一個人出去行下，好彩後來有慧豬黎陪我。

一個人行下行下，frankie打電話黎，閒談幾句，收線之後過了很久，佢又突然打來問我係邊，睇下我做咩呀...好開心呀，其實我好想同你地每一個講:「好掛住你地呀....」不過又講唔出口，知道你地關心我，其實已經足夠...好多謝我身邊咁多位細心的朋友...........

有你地係我身邊，其實已經足夠.............

在聖誕節這個美麗的日子，我希望身邊的人也可以得到幸福...........

>>December 23, 2004 at 5:53:45 PM GMT+8

2004 年 12 月 21 日 星期二 【晴】

今日唔知點解無乜心情返工......
有唔想返
不過其實又唔係唔鐘意份工....

今日下午去了旺角拿banner...
然後一個人行左陣街
雖然周遭的聖誕氣氛很強烈，但那好像不是我的世界一樣，走著走著，只有我一個人活在自己的世界裡面嗎?其實聖誕也只是一個節日，為甚麼要特別去慶賀? 連25號都唔想出街...

見到d 衫，唔想買
見到d 禮物，都唔想買...

現在的生活幾好丫
沒甚麼要求
沒甚麼渴望
沒甚麼想改變的事
平靜地
一天又一天

返工又返工
忙的時候
甚麼也不記得
是一件很正常的事


琴晚想打埋個日記
都俾人話
仿佛要寫下自己的感受
也是一種奢侈與right time

>>December 23, 2004 at 3:23:18 AM GMT+8

2004 年 12 月 17 日 星期五 【晴】

雖然俾公司d人咁講我
令我心情有d低落，但絶對影響不了我的心情，因為今日我同阿咕、慧豬同玉怡一齊去wild camp的大日子...玉怡咁辛苦先請到假，我地要玩得盡情d.....

我既朋友仔話我dairy成日都講好眼訓
睇到佢都好眼訓
所以我今次唔可以再講眼訓...

今日訓到十一點幾起身執野之後約0左係青衣城等，慧豬同阿咕都遲到，而我係旱有地準時，結果我自己一個人係青衣城等囉...

佢地黎到都差不多一點，阿咕個裝束好似好pro咁喎，真係估唔到...我地食埋野就出發去東涌，我地幾個雖然平時唔係成日見，但係一見就好多野講，阿咕同慧豬依然好似以前中學0個時咁，成日打架...我地係東涌已經見到好多人去camp，但係無一個女仔好似我咁大個袋囉...唉，鬼叫得我一個人有大背嚢咩....

我地係百佳買完野好似已經好多野食咁..又係肥妹團呀，點算呀?我地去街市買埋d打邊爐料，然後就出發喇。不過呢個時候已經差不多三點半了。

我地一路行一路係玉怡個voice mail留言，但係估不到仍然係酒店返緊工的她聽完之後竟然好感動，好彩佢今日唔駛OT0者，我地俾慧豬拎蛋，點知佢真係打爛0大兩隻!佢真係淪盡...都係因為我有d咁既朋友，所以先會攪到我自己都咁淪盡。

我地入到去都好多人，所以我地就選尾二個營位，費事俾人嘈同嘈到人啦。

好野!阿咕班0左個腳架返黎，我地可以成日影相.....起營又影，整野食又影，幾開心，貝澳個日落好靚.....

七點幾，我去車站等貓巴士接玉怡，然後我地就開始打邊爐，好多野食，食到飽飽，我地又開酒飲，無錯，當然係我叫買0架喇...不過好少酒精含量的。佢地個個都話幾好味。

Secret Angel遊戲終於揭中喇，好緊張，我地首先估下邊個係自己個angel，然後又估下其他人的angel係邊個，哈哈，我係最多人估我係佢angel0架﹐所以我係angel of angel，佢地話遲下頒個奬俾我，而慧豬就無人估佢，梗係佢平時唔夠關心朋友仔啦。

原來我個angel係玉怡，我真係估唔到，因為我都唔覺佢有特別關心過我!!可能佢返placement忙到死啦，等我仲阿咕添，而我保護既人亦係玉怡，0個日特登走0左入去長洲買佢份禮物，但係結果佢開度...白走一趟..後來去tata店買0左個音樂錢箱，佢好似都好鐘意咁﹐我幫隻長頸鹿改0左個名叫笨笨呀，因為佢係鈍鈍吐兒harse個朋友仔，哈哈。

我地今晚有得一齊睇星星，仲有得一齊訓一個營，本身我地都傾緊計，但係傾傾下我都好眼訓，漸漸聽不到她們說甚麼了...

>>December 22, 2004 at 4:16:15 PM GMT+8

2004 年 12 月 17 日 星期五 【晴】

唉...
我仲以為今日放短週
點知俾公司d人刮我...

好討厭呀
我上兩個星期六都有返，又無人同我講過邊日係長週，邊日係短週，而家竟然同我講上個星期係我自己自願返去??

你擺明玩野同恰我0者.............
好激氣
仲話要扣我人工，你扣囉...八婆...佛口蛇心..

唉
我會不會過不了試用期?

>>December 19, 2004 at 4:46:06 PM GMT+8