2005 年 1 月 12 日 星期三 【乍雨乍晴】

今日天氣忽然間又凍0左好多，得十度0乍...
不過我又好鐘意呢種凍的感覺...
越凍個感覺好舒服....
一種清爽的感覺

咁快又到星期四，唔知點解..今日無乜心機做野...

琴日係屋企搵番個麥0麥袋仔，以前特登買野換的...我諗住放係屋企好浪費..所以拎去袋MP3啦...點知返到公司想搵番黎袋MP3時，搵黎搵去都搵唔到...究竟有甚麼出了錯?是我太淪盡..還是因為我不應該將喜歡的東西太張揚呢...?

唉.........我諗0左好耐都諗唔起點跌...

公司勁多野做...網頁又要趕，但係其他野都仍然勁多野做...做完都無時間做網頁喇...點一個星期趕起?

唔理佢喇...
見步行步?

做到好悶添.......

夜晚打俾慧豬傾計，去到屋企樓下都行0左落去青公再行番上黎，以前傾計可以好容易見面，而家就唔得喇..但係係青衣的萬家燈火下...那些樹曾經見證著我們趕住返學，邊行邊溫書的生活...而家棵樹都不知不覺咁大棵了...我們仍然可以在這個長大的地方逗留多久?

凍的時候好似特別脆弱..
脆弱的時候又要特別多野驚...
一個人可能始終都有個死敵...

今日係收音機..
聽到李克勤的新歌<<節日>>
覺得幾好聽~

>>January 13, 2005 at 5:25:38 PM GMT+8

2005 年 1 月 10 日 星期一 【晴】

首先，要係度講聲呢排我無乜野唔開心，生活豐足，日子好快過....
成日要d朋友仔擔心我
真係過意唔去...

今日係公司好多野做....聽日要去同PCCW D sales開會，之前又俾0個邊個markting 大到..真係激氣..聽日唔可以衰...

係公司整埋網頁d野，唔......我要整個靚靚網頁出黎...

之後唔想返屋企住
同阿崔去0左行陣葵芳，對於轉了新工的崔，似乎都好鐘意自己份新工，你要加油呀....

夜晚睇凹凸容醫，勁核突，真係有d想嘔的感覺，我覺得整容，係呢個世界最恐怖的手術之一...

呢排放工覺得有點悶添..
想1出街不過又無錢...

>>January 11, 2005 at 5:05:13 PM GMT+8

2005 年 1 月 9 日 星期日 【晴】

好彩有慧豬幫手
我先可以好快咁整好個powerpoint..
唔該曬你呀...
不過因為咁我又浪費了一個星期日了
我唔要過無聊的星期天
我要行山呀
行番d激野先....
不過又唔知會否因攪年宵而無得行...
成個星期無行山...唉..行又成日行番d hea 山，咁唔多掂喎

今朝早去了官塘的聖潔靈攪個talk..
然後又返公司開始整網頁d野...

唔知點解
呢排成日覺得自己唔多掂
好驚自己唔夠料完成工作..
尤其是整個powerpoint俾個中大傳理系.(可能因為大家讀既野差不多範疇，當然佢勁d啦)問我個powerpoint係唔係有好多錯字..(因為我照crop，無心機好細緻咁睇個內容)，我就覺得好似俾人"大"度，自己唔多掂咁..

不過今日阿頭又係個中大女仔面前(因為佢想搵佢做part time speaker..)讚我都好幫到手..我都幾開心，不過唔知佢講既係唔係真..話曬sales出身的人講野都係唔好信曬好d..

今日係公司攪網頁d野﹐時間真的好快過....

本身同慧豬睇英皇耀保良，不過因為怕阿媽又話我唔係屋企食飯，所以慧豬都係搵0左第二個陪佢，唉，佢地咁free，真係好呀，想一星期幾時唔返屋企食就唔返，我就唔係成日可以，我會否變成阿婆的生活?

夜晚去了找小玲拎番d野﹐佢竟然成日係屋企自閉唔講野，唔係我打俾佢，佢未變成自閉仔?
唉
不過我對呢個朋友仔好失望囉..連好朋友仔的生日都唔記得....唉..記得田雞都唔記得我....心淡>.<

>>January 10, 2005 at 9:45:08 PM GMT+8

2005 年 1 月 7 日 星期五 【微冷】

首先，好多謝阿嫂幫我找了<<願>>的歌詞，唔知點解，我覺得d歌寫得幾好...
想相聚誰便與誰相聚，想開心便隨心...想永遠也不怕天高地厚，在人世間闖盪，歌詞雖然簡單，但卻道出了一些很平凡但未必可以成日做到的願望...
其實我也有想過大家可能過多幾年，可能出國的出國，結婚的結婚，我的願望只是得閒可以同你地行下山，想幾時見你地就見到，想每年有人陪我睇長咀日出...咁樣又算不算奢侈?

其實明白人生總有散聚，要求那麼多幹麼?有心情的便做，意興欄柵了，景物依舊，人面全非，同一件事，己經沒有心情再做了..那做與不做，見不相見，又有甚麼所謂?只要活在當下..好好享受身邊的一切....用手，感覺風在手掌流走的味道，用眼，記著這一刻的背影及臉龐，用心，好好記著這一刻的感覺，我想，人生也沒有甚麼遺憾了。即使有，也要笑著..然後繼續向前吧..

星期六，所謂的短週..也是要返工..........我要加油~~
其實唔係唔鐘意返，只係有點累，想訓下覺。

朝早去了協和電視台開幕，之後同肥仔去了深水步睇貨(Frankie係打俾佢未訓醒...)，我地又去了公和食煎釀豆卜..好好味，每次黎都有食一牒同豆花一碗，好滿足，還記得第一次黎的感覺...不過而家淨番肥仔陪我黎lu...
係深水步睇完就去了九龍灣，佢有d獨家的吹氣公仔，幾得意呀...

夜晚約埋其他人一齊出黎傾野，Vincy強仔都有黎，我地去了大家樂食，又火煱，又有翅食，好開心...

之後去了cafe傾埋入貨d野，不過我又要返屋企趕埋個powerpoint...有無OT 計0架???

唔..
唔想做...
好似以前做功課咁....

又再次為大家送上一首歌...

曲: 張國榮
詞: 林夕
編: 杜自持

你說你 從來未愛戀過
但很珍惜 跟我在消磨
我笑我 原來是我的錯
裂開的心 還未算清楚
如此天真 竟得我一個
付出的心 你收不到麼

如果你知我苦衷 何以沒一點感動
誰想到這樣凝望你 竟看不到認同
明知我心裡苦衷 仍放任我做好夢
難得你這個朋友 極陶醉 但痛

你笑我 為何沒答一句
像不開心 心裡在想誰
我說你 為何沒法猜對
未得到的 從未怕失去
如此相親 竟不算一對
從不相戀 怎麼可再追

>>January 8, 2005 at 6:52:18 PM GMT+8

2005 年 1 月 6 日 星期四 【晴】

今天又是平淡的一天...

今日要同公司d人食飯，經過上次的教訓後今日執正d啦，點知原來只係公司自己人食，阿頭仲要係屋企帶埋PS2過黎玩...

今日攪埋個marketing plan，攪埋個校園錄像比賽d野，阿頭無啦啦叫我搵個記者返黎講咩叫傳媒，搵唔到就要我去講，無啦啦變0左學校講talk d人，感覺好攪笑...不過後來佢都搵0左個中大傳理系的人黎講，傳理系..cu...我覺得poly D人活潑d。但係可不可以唔好要我放工時整埋個powerpoint俾佢 ?

今日同carol傾開，阿頭叫我整個網頁，一個星期...真係有d難度...不過佢叫到，無理由做唔到..唉，睇黎都係要買本書研究下點upgrade自己用電腦畫野 software的技巧。真係諗到頭痛...

夜晚入將軍澳鴻星食飯，佢地玩下PS2，玩下啤牌，傾下計，都幾開心，不過d野食就麻麻...然後我就跟車返屋企了...

呢幾個星期都要睇年宵d貨係邊度入，好似無乜時間行山咁，我個茶壺咀之旅，好似永遠都行唔到咁.........

夜晚睇電視見到陳奕迅出黎唱歌，雖然好耐無聽過佢既歌﹐但係佢一唱仍然覺得佢唱得好聽﹐我諗真正的喜歡，不會那麼容易因為少接觸而淡忘吧..其實喜歡甚麼，不喜歡甚麼，是否有一定的元素??

我聽到佢地成日唱「願」呢首歌，但係又搵唔到歌詞...

這樣的話，聽住另外一首歌先..

<<數你>>

曲.編 蔡德才
詞 林夕

想 從幽幽的眼圈
逐公分那樣轉 為你點算著疲倦
願歲月難被我數完
地老天荒能轉多少個圈

想 從撕開的戲飛
逐分鐘掛念你 是哪一套最回味
從每日然後每星期
你我一起能看多少套戲

無奈肉眼看不到 用兩手摸不到
怎麼計算亦難料沉迷程度

同偕到老還餘下多少步
還能捏著你抱緊幾秒鐘擁抱
誰又會知道 憑每下心跳繼續數繼續數
只願延續下去數得到蒼老

想 從洶湧的髮埋逐公分看下去
直到擁抱著沉睡
命與運埋在你手裡 你那些掌紋有多少愛侶
誰願意知道 憑每下心跳繼續數繼續數
數著何時眼淚才能被看到
還能與你再聽幾多音樂
還能伴著你再跳幾世洩獄R

其實我知道 迷上你 一分一秒煎熬
一次傾慕 只願容貌讓我數得到蒼老
一秒煎熬 一寸傾慕 數著何時望到彼此也蒼老

>>January 7, 2005 at 5:56:47 PM GMT+8

2005 年 1 月 5 日 星期三 【晴】

今日真係超累...
咁就星期四喇
點解時間會咁快就過?
一日兩日三日一年兩年三年
唔俾細 k提起
都唔覺那次長咀行錯路已經是兩年前的事了

兩年前
我仲上緊莊
讀緊書
剛剛認識細k你地呢.......
一切又是那麼近
又那麼遙遠.....

自覺自己與那時沒有太大分別..
但係睇番d相又覺自己個樣好似有d唔同...
在時間的洪流中
我們一點一滴在無知中改變...
不變的希望會是那對世事萬物好純真之心吧..

昨天返到屋企都兩點，整埋d野都四點...
第二朝七點又要起身，因為七點九就要出到葵興
今日要返大陸呀..好眼訓呀。

去到葵興，坐老闆Johnny架車，老闆娘，又係叫aster..加埋steve同andy就坐車去上水轉車，以為可以係火車訓，點知佢地係咁傾school TV D野，我又唔好意思訓...

去到廣州，present 0左我設計既網頁..好大工程呀，唔知攪唔攪得掂﹐好似好多野都未做好，阿頭無話過我，不過佢叫我下次可以準備得好d，好驚佢覺得我唔掂都唔出聲，不過自己都要俾心機d，都係少d出街整banner，因為一出0左去我又唔係好想返公司...

之後食飯時我講起d好味既野好似好開心咁..咁唔係辦法，唔可以俾人發現我咁好玩...

唔知點解
講少0左幾個月普通話，真係會差d，上到去都唔係講得咁好
其實我對於今日自己的表現不是太滿意，又是我自己在給自己壓力嗎?

有時
我就是覺得自己太喜歡撐了

其實不是喜歡
而是生活上
沒有太多可能讓我依賴的人...

身邊有咁多人關心我
其實已經好夠~~
多謝各位想了解我的人...........


今日返到黎隻腳好痛呀...............
又一個星期
我要加油了...

唔知點解
唔係好想到月尾..
唔想咁快離開22呢個數字...

好想暑假請假去四姑娘山既雪山露營........
一定好開心同好舒服

>>January 6, 2005 at 5:14:23 PM GMT+8

2005 年 1 月 4 日 星期二 【晴】

聽日要返大陸...
唔知個網頁idea阿頭buy唔buy?

好緊張....

下晏去0左旺角整mic牌
然後同肥肥行0左陣街
陪佢選下呔...
佢話我睇中0個d都好浮誇..

之後同阮美去0左焗油
又將我d頭髮變番直...
真係勁呀...
阮美都整得幾好睇
新年前剪多次先

之後我地返0左poly新can 樓上傾年宵攤檔d野
希望大家多d係新年去到香港仔支持我地喇
尤其是係港島住既人呀....
大家都傾得好開心
真係要多謝阿嫂咁落力啦

之後我地仲去瘋人院食，都好耐無黎呢度食lu....
不過我地傾到好夜
食到一點
返到屋企都兩點......

聽日仲要七點幾返到公司...
所以都係講住先
遲下先講

>>January 5, 2005 at 7:24:25 PM GMT+8

2005 年 1 月 3 日 星期一 【晴】

不知不覺又來到星期二
琴日都仲好HOLIDAY MOOD ，唔想返工....
不過今日都幾好
一朝早同個師傅去0左香港仔

今朝早Carol仔黎見工，仲諗住有得同佢一齊食lunch添，點知自己又要一早入香港仔。

去到香港仔，諗起阿frank同阿嫂(拿..俾你出下場喇...)，點知主席病0左，而個師傅又請我食飯，所以唯有同阿嫂搭車去紅磡轉車探佢，一路傾下計，都幾開心呀，去到邊都有d friend陪我，哈~~


返到公司，d同事唔知點解今日六點半就走，仲叫我一齊走，成間公司一齊放工，感覺都幾好...佢地仲係電梯度拎我個同事黎講笑，攪到其他人忍笑忍得勁辛苦...

今日，我好乖咁自己返屋企食飯...

夜晚打俾d莊員約聽日出黎傾年宵攤位"雞雞地"既事，估不到連阿john都病埋
從來未見過佢病得咁嚴重，希望佢快樂好番...

>>January 5, 2005 at 7:02:32 PM GMT+8

2005 年 1 月 1 日 星期六 【晴】

零五年的第二天
都好舒服...

本身今日去行山
但係琴日先行完，唔行喇，我想訓覺多d。肥仔行完打俾我，好似好清好靚咁喎，佢話連蝻蛇尖都睇到，幾誇張呀~~不過我諗行吊燈籠應該都好舒服同好靚..........

黎嘉澍因為我入0左長咀唔同佢倒數嬲0左我呀....johnjohn唔好嬲我喇，雖則我知你都唔會睇我dairy...我幫你慶祝番生日丫....

今日訓到一點..然後係屋企執野，好似成日都好忙無係屋企好好咁執野咁。執完野落0左長發去慧豬屋企同埋阿咕一齊吹下水...

好開心好幸福喎，三個一齊坐係度睇電視，好似一齊住咁，好舒服.....訓係阿咕度，仲正 ^ ^哈哈。

又有暖暖蜜糖水同碗仔翅，真係正呀...

得閒咁樣聚下，感覺都幾好丫....

昨天的心理休息加上今天的身體休息

身體與靈魂也得到完全的假期.............

>>January 4, 2005 at 11:32:28 AM GMT+8

2004 年 12 月 31 日 星期五 【乍雨乍晴】

今朝早應該六點半俾家明佢地叫0左起身，好眼訓同好凍呀………..
唔知有無零度呢??

我地成班人今年唔上山頂，都唔知點解以前會上山頂既，梗係俾d老鬼昆喇。
我地去0左海邊，個天已經泛起紅光，我地都爭d俾風吹起，但係絶對影響唔到我地欣賞日出的心。我地幾個肩並肩咁坐著，一齊睇住個太陽慢慢從海面升起，又一年喇…..已經睇0左四年長咀日出………..今年好似第一年睇既咁靚，咁令人感動。

最感動的是，在我身邊仍然有一班好莊員在身邊，第一年睇見個咁靚既日出，0個年上莊，學到好多野亦好開心，希望今年同樣呢個咁靚既日出會同樣為零五年帶來好運。

好彩我最終都有黎，肥仔講得0岩，去camp都係睇景同埋見下你地，係我唔應該諗咁多….總之，開唔開心，唔試過又點會知?

睇完我地又訓番覺，好眼訓呀，我地訓到十二點之後就起身煮野食。

廿一屆今年好多人黎，連Franco同阿榮阿良都黎，我地有傾有講，幾開心。係旅協真係識到好多人，有太多的回憶，有太多的事，有太多的人，然而，不同人會因他們不同的人而對某些地方特別想去，雖然大家都係去同個地方，但是大家懷念的東西會不同，呢d就係因為大家已經遇上不同的人帶來不同的經歷，這些經歷形成不同的文化及回憶．．．．．．．

我地大約一點半行番出去，成個西貢都好清，連馬鞍山都見到，四週都是銀藍色的大海，無邊無際。

如果唔係咁凍，又點會有高壓槽帶來萬里無雲的天氣?所以話有得必有失，如果唔係因為咁凍睇到，可能個日出又無咁令人難忘．．．．

出到去大灣士多，個老闆話今日七點佢起身睇溫度計得四度，我諗長咀應該再低幾度．．．．．

好舒服的一天
坐大飛出去都好舒服．．．．．．

希望下年仍然有這種心情，這樣的人，這樣的日出．．．．．

>>January 2, 2005 at 4:17:09 PM GMT+8