2005 年 4 月 1 日 星期五 【晴】

今日放假..有得訓番餐，實在太好喇...
對於成日夜訓的我..
實在是最好的休息~

今日整天也是跟7b朋友仔的聚會，下午帶柯去吃澳洲牛奶公司，她也說很好味呀，不過今日0個度超多人，好快就趕我地走喇~

之後同佢一齊行尖沙咀，睇見好多夏天衫都想買，最煩既係要諗返工的衫，不過d衫太貴喇，為0左個旅行，我一定要努力儲錢，雖然都未必有得去..........

本身今日同阿崔慧豬同玉怡一齊睇哈爾，因為我想等埋我的angel，所以就要等佢放工七點後先睇，但係半島d人太衰喇，無啦啦調0左佢聽日返七點再加今晚又OT....好慘呀佢，我亦好慘呀，無得睇.....阿崔同慧豬下午睇完都話勁好睇，不過我的angel話下個星期放假一定陪我睇，我知你不會呃我的^ ^

夜晚食飯時都有好多人黎，連田雞，鄧榮康同rain都有出黎，加埋小玲阿柯阿崔阿敏同我，我地就8個人浩浩蕩蕩咁去0左霸王山莊食飯，平時係poly都係下午黎過呢度食，估不到夜晚都幾好味0架喎，我地食賽螃蟹、小籠包啦、黃金蝦啦，仲有好多，好好味，亦都傾0左好多，大家的世界好像已經很不同，其實真係傾計的時間不多，可能即時你地在生活上遇到沮喪的事，也不能好像以前一樣即使給你們安慰及支持，不過希望大家見面時，仍然可以與心相對，學阿柯話齋:「你們不用在我們面前逞強!」她自己說這是十級感動的說話，但大家都聽到滴曬汗....

之後玉怡放工，我地轉0左去paris吹水，佢地講下追女仔的情況啦，阿柯又講埋d好攪笑的東西，甚麼早有預謀的「澳門之旅」，又有甚麼認真考慮將來的生活，仲要約田雞去韓城!
攪到鄧榮康話佢咁多時間諗埋呢d無聊野，但係大家好似咁樣傾下計，感覺好開心..........
不過聽完鄧榮康講話出面識的女仔唔係Gucci就係LV，真係覺得我地好似有d蠢，點解個個都唔識要求呢d野 ?

不過如果愛情因為這些而滿足，又算不算是真心?
不過總好過蝕桌...
係我地幾個蠢0者...

之後就一齊搭地鐵返青衣喇，聽講田雞仲要跟旅學會去赤洲....車，你搵我帶你去都得啦，跟人玩荒野求生，小心渴死呀...

download0左張學友的<<小城大事>>，聽落真的很感動...
佢的聲音，好像觸及著人類最深的靈魂
觸動著每一個人的心
因為有心
所以才會感動人

今日係海港城行街時見到有人表演彈琴
竟然唔係彈蕭邦而係古巨基的愛與誠
點解四周圍都係古巨基0架?
最憎古巨基

>>April 4, 2005 at 12:23:13 PM GMT+8

2005 年 3 月 31 日 星期四 【雨】

今日係愚人節...........希望大家無俾人玩啦~

係公司趕制leaflet，都ok啦，不過下午約了小孩，所以乘機走了出去....

返到poly，係podium上撞到d廿五屆的人，他們也很靦腆地打了個招呼，記得以前係poly見到上莊或下莊，通常都係好開心咁走上去打個招呼，或者係我俾人打下個頭，然後我同佢地打交..哈哈，現在已經沒有呢支歌仔唱了...

不過，仍然讓我在poly見到個熟悉親切的面孔，就係資料組既Goretti喇..實在好耐無見佢，大家見到面都幾開心，佢去打壁球黎喎，實在太健康了...

見到小孩，今日佢好似唔係好開心咁，不過都希望佢聽日玩得開心啦，太耐無見，陪佢傾陣計...

小孩媽媽好像也成長了不少，給我的感覺是，你成熟了，亦為身邊的人想多了一點，這實在是一件值得為你高興的事~

不過跟你談了很多，最開心的仍然是可以坐在poly的後欄看著夕陽，一起談天的感覺........

>>April 4, 2005 at 12:23:30 PM GMT+8

2005 年 3 月 30 日 星期三 【晴】

三月的最後一天..又出糧喇，實在太好，對於財赤的我，實在是一個好消息

今日心情麻麻...琴天的煩惱仍然未有澄明的感覺....
唉

今日返工...整既野又俾阿頭串，佢硬係要打沉我先開心
不過我都唔理佢咁多，個design係我既，我鐘意點就點...
既然design得出黎，就要有一點自信

不過整天對住部電腦﹐隻眼都有點累...

下午老闆請飲茶，講起d隱閉青年，公司近來又請0左個新enginner返黎，感覺上好似年輕的老年人(我指佢的生活，平時就放工返屋企)，同其他人又好似好難溝通咁，對比呢d人，感覺上自己好似患上過度活躍症咁...

原來老闆以前教過書，亦帶過學生行雙鹿，仲話帶d學生行時有個學生差d係四疊潭溺死...好彩佢救得番，真係好恐怖呀，都話溯澗真係一個高危險性的活動，自己上年行0左兩次雙鹿，不過兩次的心情已經很不同


睇番中六七時的日記，感到當時的自己很容易為成績及朋友唔開心
那時候的時光，實在太少誘惑及無奈...
一起上課..然後文學堂聽miss講下大學的生活，放學一起到自修室，實在太令人懷念
當時的自己，仍然很白痴，對這個世界仍是抱著一副不肯認輸及好奇的心
我仍然珍惜這樣的自己...
因為我害怕在某個時候我回頭，會發現自己已經失去了最寶貴的赤子之心...
想玩就玩，想靜下來便靜，因為時間及時機不會等待你
我不想令自己的人生後悔，亦不想失去任何一個快樂的機會
因為我知道，快樂不是容易得到的，有機會做自己想做的事，為甚麼不去追尋?

不知玉怡是否記得，我以前曾經係自修室忽然間悟出的一句話:
「未到時候擁有的，我們是不應該擁有的。」
不知當時的自己受了甚麼刺激而作出這樣的假道理，但現在的我卻感到自己時常太悲觀了，我擁有的應該好好追尋...
一切的時間性，只因為人為因素........

>>March 31, 2005 at 6:34:50 PM GMT+8

2005 年 3 月 29 日 星期二 【雷雨】

今日係梓晴的生日，係度同佢講聲生日快樂先~

夜晚同阿媽講起旅行的事...
佢竟然同我想的一樣..
反對..
她今次只拋下一句:「你好自私」然後就唔再采我.....

心裡很難過
因為明白與她的想法永遠不能拿到和諧，永遠也沒法做她心目中的理想乖乖女..
難道要我成日留係屋企，咩錢都唔洗，只係俾番曬屋企先叫孝順?
我都唔知
上年又係咁
今年又係咁

其實今年本身都諗住唔去的了，但係咁0岩又夾到時間又問0左阿頭又咁多人去，我只係怕自己將來未必再有這樣的體力及心情去西藏.....

這些是我的藉口嗎?
可不可以不要我背負那麼多?
很辛苦..........

很羨慕那些可以從心所欲的人
我也沒有這樣的選擇權嗎?
我也不知道......

算啦
看來
我也是沒西藏無緣

>>March 30, 2005 at 5:52:17 PM GMT+8

2005 年 3 月 28 日 星期一 【晴】

今日又要返工喇...
今朝仍然是遲起身...唉~

今日返工都好hea...今日 andy話係假期期間唔見0左個電話，而且都係買番部一模一樣的，哈哈，等佢之前仲話我傻仔丫拿~

夜晚因為遲到的罰款太多，多到夠我地食自助餐，所以我地就去0左京華酒店食喇..個自助餐又出奇地好味，有魚翅湯飲，d士多啤利朱古力火煱都好正...

係間餐廳到見到waiter要企成晚，好似無停手咁，都幾慘...

一間公司的人傾下計都幾開心，不過食完都成十點半lu，然後就返屋企喇...

唔記得講...
原來個新同事LINA以前係住係康豐的，即係我附近，再加上原來佢以前讀陳溢，中學讀八三喎，仲要同我同年添，呢個世界實在太細喇...

可能自己落街時，都見過呢個女仔，而自已0個時，亦都有想過讀保良，但都唔知點解後來選了東華三院，可能一切暝暝中自有安排吧

>>March 30, 2005 at 4:59:07 PM GMT+8

2005 年 3 月 27 日 星期日 【晴】

今朝訓到十一點幾，天氣又異常地好............
好想行山呀~~~

結果訓覺童軍孖寶兩個係咁怒訓都唔起身，我同阿嫂就自己煲煻水同埋炒蛋蛋食~~

後來佢地起身食埋野，我地就出番去喇.....

最攪笑既係阿FRANK係度玩紙巾當風爭...真係十個無聊呀...

見到主席同雯雯成日都無啦啦打架同嗌交．．主席又成日串人，感覺上雖然好攪笑，不過又洋溢著一種幸福的感覺．．．．

出到沙田，我同阮美行０左陣馬莎，然後我就坐E42返屋企喇，都唔明點解一架咁貴既車都會有咁多人搭０架??

返到去執好曬ｄ野係度睇＜＜中國旅遊＞＞，見到有ｄ中文字想起了一篇古文，以前朗朗上口的名篇而家都只變成一個印象．．．這樣令我感到有點害怕!!!

我已經慢慢忘記以前ｄ文學．．．唉．．．現在的我，除了行山同玩，好似甚麼也沒有做過!!!

當阿嫂之前又問我會否仍考慮做記者．．我真係唔識答佢，我只係知，自己唔太鐘意做太商業化﹐即係只懂賺錢而不顧其他人的工作，但記者．．．我又怕那急速的生活及壓力不適合我．．
我自己都唔知．．．
唉．．
不過我想做好自己本份，保持著自己對萬物思考的觸感．．轉不轉到工，或者轉工會否是好決定，那還是靠命數及運氣．．．

所以我決定，呢排都係玩少ｄicq，睇番多ｄ書好ｄ．．．

不知不覺又到四月．．．
和小孩說起論文，又想起上年自己做得好辛苦．．．看著那個天資不足的論文，自己也實在有愧於最後一年的學生生涯!如果俾我再黎過，我想懸空一切擾亂我情緒的事，專心地做好我的功課．．．

這一年讀書的人又就快畢業﹐估不到自己也快畢業接近一年了．．．
回想起由畢業至現在上班的一切，我腦海裡，竟然沒有甚麼值得高興及值得回憶的事．．．
連frankie問我點解上年暑假無乜點行山，我都答唔到佢，因為都無乜印象。
而今年
我已經沒有暑假了
可能是我太貪玩．．．我要認清自己的目標，才可以有氣力走前面的路

不想生命的時時刻刻白過．．．．．．．


還有．．．E-mail收到了一封這樣的信，自己對於此內容，也深表讚同~

「曾經看過一篇文章，大意是有人問一位女士，為什麼會選擇她的先生託付終生。如此好事的問法，大概是不少人都覺得，她和她的先生在一些大家看得到的部分並不是那麼合適。結果她給的理由非常簡潔，那就是：「他會逗我笑！」這篇文章的本意，大概是想說，夫妻合不合，很可能只是一個小小的理由，但是對當事人來說，可是一個天大地大的原因。

這篇文章讓我印象深刻，最主要的原因是，她的理由居然和我差不多。我和我的另一半，就外在條件和家世背景，都不算是別人心中理想的一對，『婚姻前途』也不被看好。而我從認識他到決定嫁給他，內心深處一個支持的理由，就是『他會逗我開心！』這個理由對很多人來說，很可能是一個可笑而渺小的理由，但是它真得對我很重要，結婚十多年後，更讓我相信自己當年會這樣堅持，實在太有遠見了。我的另一半如何逗我開心，說起來，實在不足道，也許對別人來說，也沒有什麼好樂。例如，下班回家時，門一
開，他會對著我伸高右手，精神抖擻地喊一聲「嗨！」。讓我覺得，他很開心看到我，我當然也覺得很樂。這個戲碼，每天都在上演，但是他樂此不疲，我也天天開心。他取悅我的偉大事蹟中，一直令我難忘的，就是當年補度蜜月時，我們參加歐洲十國的旅行團。行前，他就說要我送一份禮物，那就是每到一個國家，我可以選一件禮物，因為他要送我的，叫做『十國大禮』。

後來選了那些禮物，我自己都忘了，但是一直忘不了他鄭重宣布送我『十國大禮』時的神情，很認真，但是有點搞笑。

他另一段取悅我的大功，就是在我懷孕時，為了幫我度過害喜的痛苦，他決定每天做一件事讓?痗}心，有一次是講個笑話、有一次是唱首歌、還有一次是跳了一段民族舞蹈。其實他的恆心不夠，並沒有做太多事，但是已經夠我到現在想起來，都還要忍俊不住想笑。或許是
胎教成功，也或許是耳濡目染，我們的兒子如今也以搞笑為樂，每天都很努力地找笑話給我看、講笑話給我聽，而且還會唱歌自娛娛人。今年上國中的他，現在逗我開心的本事，和他爸爸已是旗鼓相當，兩人一搭一唱，常讓我樂不開支。

先生說，家裡有兩個人都努力逗我開心，我應該是最幸福的人了。他說得一點也沒錯！上天其實沒有對誰小氣過，只是我們通常太大方，生活裡一定有足夠的滋味，我們卻常忘記了咀嚼。


我不怕我錯過了

只怕我珍惜的人錯過了我」

>>March 28, 2005 at 5:57:45 PM GMT+8

2005 年 3 月 26 日 星期六 【陰】

今日我又去CAMP 喇...
呢個復活節，我都係怒去CAMP ，但係上年復活節..我做過D咩呢??

今日都係HEA去水浪窩....
下午三點半先係沙田集合，仲要搵0左好耐都唔識點行去小巴黎到..我同阿嫂同肥肥係咁講:「沙田呢個鬼地方，人又多，路又煩。」

我地去百街同街市買埋野食就出發(注意，沙田間百街同樣多人度想推架車仔都推唔到，好辛苦。」

搭299，佢竟然係我地買曬野同埋上0左車之後佢先落雨.....有無攪錯~

係車度肥肥係咁話阿欣食飯飽得滯病0左，笑死我地....

去到水浪窩，好似真係n年前的前景營之後就無再黎過，行0個條長命斜，好辛苦呀...


我地起0左營之後肥仔就係度訓..而D雨，竟然好似愈落愈大........最後阮美黎到，我地最終靠兩把雨傘同兩棵樹兩條營繩，起0左個臨時的避難所打邊爐............

真係屋漏兼連逢夜雨呀........

雖然人少少，不過大家傾下計都幾開心，大家講起佢地同而家0個個第一次吃飯的地方及趣聞，好得意~

然後阿FRANK黎到，雨都停0左，我地轉0左入營傾...

不過今晚都係實現唔到阿嫂既願望，睇星0架喇........



不過唔知點解，次次去親呢個CAMPSITE都好似唔多開心咁...唔...........
我都唔知點解會咁，可能你地都俾我激親啦...

還有．．．為一年前自己的愚昧而乾杯!

>>March 28, 2005 at 5:51:47 PM GMT+8

2005 年 3 月 25 日 星期五 【晴】

今朝起身，好似比琴日更大風同濕..一開營門，已經只係見到D霧........
行出D睇下...嘩..完全睇唔到D路...又大風又大霧又凍.好惡劣呀...

攪到哈比人想走添，不過佢琴晚訓唔著好慘呀...

我地最終訓到十二點幾都未見D霧散(上次黎明明好好陽光好舒服0架嘛)，煮個好味的早餐，都係早閃早著...
我地行出去，完全係睇唔到路，同埋覺得自己係身在仙境中咁囉...........仲有呀，D風大到吹到郁我....

我地行番落東涌，沿途又扮下樹精玩下，一路行都幾開心，我見落山梗係跑幾野，點知佢地又跟我跳黎跳去，終於出事!

咕嚕佢拗柴呀......真係慘呀，見佢痛到眼淚到標埋，但係我連包腳都好似唔多記得..好彩有二男一女幫我地手，仲好好人咁幫我地拎走四袋垃圾!!!!後來仲借埋支行山杖同埋幫咕嚕咩個袋落山，實在太感動喇....

果然鐘意行山的人係唔同D....

今次攪成咁..令我都有D後悔帶你地黎D咁艱辛的路，下次都係馬哈爾夫好D......話曬我地得幾個女仔，都係我成日唔識死啦，對唔住>.<~~

不過今次同咕嚕、哈比人同埋精靈王一齊去既旅程，其實真係幾開心同好玩~

如果無咁凍就好喇

>>March 26, 2005 at 6:39:20 PM GMT+8

2005 年 3 月 24 日 星期四 【陰】

今日同哈比人、咕嚕、精靈王一齊去WILD CAMP ，最衰樹妖無黎啦。

我地本身話一點係長發等，但係最終我地都係遲到既，入到東涌都成兩點幾，買埋野出發都成四點幾喇...

今次佢地個個都買0左個大背囊..所以我地幾個睇黎好似好PRO咁...

去到伯公坳都差不多五點，影下相行上去，我地都行十步抖一抖0架D黎0架喇，不過精靈王好強勁，係咁行係咁行都仲有氣，勁呀，相反咕嚕就差D喇，不過我都覺得好辛苦，點解上次好似輕鬆咁多既?唔通個袋重D真係會辛苦咁多??

我地一路行都已經好大煙霞，不過都照上喇，上到爛頭營都成七點喇，好鬼死大風同凍!!!拿拿聲搵個無咁大風又偏僻少少既石屋擋一擋風，見到成個機場的夜景，好靚呀........

起完營之後打邊爐，我地完全係肚餓都暈，原來平時好文靜的精靈王肚餓時係會變傻0架...哈哈哈，我地完全無等佢滾就拎黎食...D腸仔，好容易俾貪心的咕嚕搶去!!!

食飽，但完全唔覺得暖D...仲好凍，簡直拍得住冬天上黎時既感覺。

夜媽媽哈比人發生0左件事，不過我應承過佢唔講既!!
仲有咕嚕係度唱三隻小熊....熊爸爸、熊媽媽...實在太恐怖了...

夜晚拿拿聲入營，只係申對手出黎煮糖水食...有龍眼肉0架，好正，不過俾我唔小心打翻了一半...>.<對唔住呀~

仲有呀，哈比人同咕嚕買0左個可以拉埋一齊訓的睡袋..實在太勁喇....我訓埋入去都夠位喎~

然後我地又傾下計啦，都傾0左好多野，原來哈比人有咁多野係我地唔知既，不過又實在太攪笑喇....其實大家都d咁得意又開心的回憶﹐都幾好丫~~

夜晚勁凍，我俾露水打中我塊面令我乍醒了兩次....

>>March 26, 2005 at 6:24:58 PM GMT+8

2005 年 3 月 23 日 星期三 【晴】

死啦..天陰陰...難得的假期會否因為天氣而無得去camp??

今日係公司都好holiday mood..後面0個兩件又於曬假，攪到我鬼死咁悶..公司得番阿頭同lina(新來的女同事)，食飯時發現原來佢都係讀poly...點解全公司d人都好似讀poly咁??

食飯時阿頭又迫我學車既款式同埋logo..我仍然將寶馬同Benz調轉...點解咁0架?
之後阿頭講起flora個仔仔成曰沈迷online game...
然後flora話都唔知個仔諗乜..
steve話，我最憎人就成日都估人地諗乜...你應該幾時都當人地係一張白紙咁去了解，如果你真係想去了解佢的話...

放工肥仔打來，我找他拿了爐，然後又去荔景join frankie哥...
一齊出了旺角毅誠睇野，見到d露營用品，又真係會上0左身咁，人都精神d
肥仔買0左本去西藏旅行的書...一想到可以同你地一齊去旅行就十萬個開心...好開心好開心好開心好開心~~~
因為我覺得..可能過0左今次，都唔知會過幾時先會再有機會。

但係肥仔好似因為去唔成丹霞山，所以好頹...我地星期日一攪個camp 一齊玩啦..所以你唔好唔開心...

後來阿咕同慧豬都出黎join埋我一齊買大袋同埋睡袋..見佢地咁有興緻買行山野，我都好開心...佢地買0左個可以拉埋一齊的睡袋..真係羨慕死人...

之後仲一齊去打邊爐...好開心呀﹐因為我地又可以一齊食飯，平時好似好少機會咁..聽日出發去camp ..好期待喎...

行完毅誠之後打俾阿嫂..佢竟然撞到剛分道揚鑣的肥肥...原來阿媛同主席都係旺角喎...真係有緣呢~~哈哈

今晚真係上0左身，係咁睇西藏之旅的資料...買0左本<<中國旅遊>>，個topic係瘋行西藏，原來個女記者去西藏時炒車差d死..
佢個序係咁寫:
「旅遊既誘惑實在太大，往往令旅行者變得善忘。
出發前的雄心壯志，使人忘了旅遊只是生活的一部份，並非全部。......
直至發生災難....有幸生還的旅行者才有機會醒覺:人生還有許多更有意義的理想要實現，身邊還有許多關心自己的人來不及回報。
下次出門，別忘了提醒自己:輕鬆上路，平安回來!」

願你我在西藏的路途上...也可以平安回來!!!

我不要再有虎跳峽的恐怖經歷.............

哈爾移動城堡今日做喇..始終都係無法今日去睇添~

P.S. 田雞哥哥..對唔住囉..不過你可唔可以唔好成日咁串?

>>March 28, 2005 at 5:50:21 PM GMT+8