2005 年 4 月 12 日 星期二 【雨】

今天落的雨比昨天還要大...
何時才天晴?
天文台都呃人0既...

今日全日都係公司做野，下午去了找肥妹食飯，已經有一排沒有見她了，她仍然容光煥發...
因為星期六陪不了她，所以唯有平時下午多D去搵佢食LUNCH喇...
我地傾0左都一陣計..內容都係講佢玩雷利同埋成長
如果我十一月無去睇周杰倫，而家應該同肥妹,FRANKIE,VINCY佢地一齊係雷利玩LU..
唔知黎緊既ASSESSMENT WEEKEND係幾時...
感覺上肥妹也成熟了很多，亦更懂得考慮別人
我覺得自己可能同佢地一樣不太懂得關心別人，但我近來見到佢同小孩都成熟0左
我都為這兩位朋友感到欣慰~
自己都要努力呢~

可能我真的不大懂得考慮別人
很容易忽略其他人
眼中只有某些人
生活圈子不夠大
見的世面太小
但我還算是過得快樂的~

雖然對於前景，對於生活，有一點的迷惘...
肥妹說:你不可以老是拒絕成長的...
或許是吧...
拒絕成長
拒絕接受現實
拒絕妥協
拒絕面對生活的粗糙
是有點任性及不夠現實、成熟

但我認為
一個人
他待人處事可以變得成熟
思考層面可以更加廣闊
但不一定要變得世故
我只是希望自己不要給這個物質的社會變得勢利
讓懽力令自己變得不擇手段
謹此而已矣
也並不是不知道自己要成長
思想要變得更成熟...

那天拿了本polylife黎睇，有一篇編輯的話寫得幾好...
你在以往的日子許下了多少個願望 ?
如果一生中只要十九次在新學年許下願望的機會，筆者還有兩次
而我已經沒有了
筆者說
每個人在畢業時也應該帶走點甚麼
但做甚麼也好
要對得起自己

我也帶走了許多回憶
在人生的路途上
不論選擇是甚麼
不論結果會如何
也是屬於自己的一次冒險及經歷
雖然這種冒險只有一次機會
但做甚麼也好
最重要的是無愧於心
對得起自己

>>April 13, 2005 at 6:11:52 PM GMT+8

2005 年 4 月 11 日 星期一 【暴雨】

今日竟然落雨，唔知星期日會不會下雨?
我有d想去行山...
希望快d天晴啦~

今日下午同andy去了寧波度解決d好煩既問題...真係好煩呀...
不過因為andy佢又遲走，所以佢請我搭的士去呀..哈哈，真好~
但係之後走時俾佢玩我...係小巴叫我按鐘叫架車停，我反射動作地用手向上按，結果係...上面得冷氣風口位...
shit...
而死人andy就係咁笑....
我唔要日日都過愚人節...

今日放工同0左alex、donna出去...自大哥哥去0左夏威夷之後我都無見過佢...我地去0左睇旅遊的書，後來donna 放學出埋黎，佢地買0左幾本，我就無買，因為都係想慳番d錢，係綠野遊踪見到本<<理工情書>>，見到「理工」兩個字就好有興趣，當大家睇緊 <<在天堂遇到的第五個人>>時，我竟然花40蚊買本係一堆被遺棄的書堆中找出來的特價書...內容也是講理工內發生的戀愛故事，我想係大學，無乜邊個唔會唔忙住戀愛，只有白痴如我才會自己一人在後欄看日落...
看著書內一切有關poly的特有地方名詞..感覺也很親切...發現原來自己都好鐘意 理工大學的每一個角落...每一次經過poly，在腦海也會閃出大家的身影..不過現在這些身影也成為這個紅磚的陌路人了......過幾十年後，那個鐘樓仍然會見證著我們時間的流逝嗎?

幾時我0個科都可以吐氣揚眉...一畢業出黎就好多人爭住請 ?好似社工建築測量酒店咁..睇落好似專業d?
其實係我自己無用，寫野不夠其他人好而已..

後來我帶了他們去一休度食..其實之前也覺自己有點融不入他們倆的話題...可能我沒有太多的假，也沒有太多的金錢...也沒有太多的時間....沒法可以好好參與你們的討論...

後來唔知點解我講起理想的生活，donna也很讚同香港的女仔好現實，但這種現實也是必須的...我感到自己有時真的太天真...天真到有點過份...老是不願意相信現實的殘酷。

其實我很害怕...
很害怕跟大家的距離越來越遠...
其實我不是一個很容易相信其他人或不慣依賴其他人的人
但我的莊員教我怎樣為之唔好死撐，亦唔好成日一個人撐...
有誰不想依賴其他人多一點?
但依賴得多，又會怕大家遠離我...
究竟我是一個怎樣的人?
可能我對大家的感情也有點畸形，我也知道大家也有自己的生活...
或許有一天
我們出來的聚會
也只談工作，談樓談人工談車談子女
仍會看到大家天真的笑容嗎?

其實我已經漸漸學懂不依賴大家那麼多...

不知為何中學的老朋友又不會給我這種感覺，可能大家對大家的認同已經很深了...

alex說有些時保持天真也是一件好事，我說我害怕當我不斷追求很多很多，當我有一天累了..回頭看發現了不見了自己...天真是不可以拾回的，當大家仍有機會天真，仍有機會任性的話，那不防任性一下^ ^

但太天真好似又跟這個世界...
有點格格不入..
我希望我的天真..不是白痴的天真...而是對這個世界仍有一絲憧憬的赤子之心...

>>April 12, 2005 at 5:58:23 PM GMT+8

2005 年 4 月 10 日 星期日 【晴】

今日又係星期一...
琴晚不知不覺地睡著了也不知道，今朝起身時仲以為係星期日...起身喇.......

今日係公司都係咁啦，無乜特別......

夜晚同肥妹小孩同阿嫂傾計...其實我真係好鐘意夜媽媽同大家傾下計，因為好似會講得多D深入少少既野，唔會好似平時咁嘩哈哈，不過有時就係因為咁而好夜訓，所以有陣時，選擇，也要付出代價。

跟小孩談了很多有關人生的事...有時感到自己真的是一個頗沒用的女人，當身邊的人可以在想很多人生大計時，或者可以說:多謝你呀，一直在我的身邊支持我...但自己卻連一個會永遠在我身邊照顧及愛護我的人也沒有....說甚麼女人只有兩條路..我想其實沒有太多人有選擇權吧?

近來的心情也是有點忐忑不安，不知為著甚麼事而害怕著，我有點害怕自己每天在浪費自己的時間，但又不知自己想做些甚麼....有點想進修..不過現在的環境還不不能讓我這樣做...

有沒有可以解釋我內心深處莫明奇妙的不安感是甚麼?
是跟身邊的人關係不穩定嗎?
為甚麼幾個月前煩的事而在仍有點煩?
我實在覺得自己有點衰...

想起
在同一個澄空下
在同一個清潭的倒影下
有池中暢游的魚
有天上的陽光與白雲
也有我倆的身影....

曾經以為同一個人的距離很近很近
但後來才發現原來彼此的心
是這麼的遠
從此
我也迫自己不再相信你
也不再相信自己的感覺
也不想再跟你太接近

一切的時間
是那麼的慢
亦是那麼的快...

是的
現在一切
已經很好

漸漸的
我會習慣的了

>>April 12, 2005 at 6:01:27 PM GMT+8

2005 年 4 月 8 日 星期五 【晴】

近日因為眼訓加懶，所以無乜點寫日記，一次過update幾日，希望大家會有心機睇啦~

今日朝早要返工，真係超辛苦…唔鐘意咁早起身呀~
係公司大掃除..執好d野，公司真係好多垃圾…
下午約了慧豬去拎回鄉咭，然後因為想慳番d錢，所以我就提議去慧豬屋企煮麵食…
好野….去到仲有慧豬煮俾我食，又唔駛洗碗….
實在太多謝你喇…豬豬~

我地傾開旅行d野，對於太多不定的因素…我實在感到很不安…亦都有點想不理他們…
我排除萬難..
同阿媽嘈完
同阿頭爭取放放假..
再加上呢兩個月努力帶飯儲錢…
出少d街..
約少d你地(唔知大家又覺唔覺呢?)
都係為０左要實現自己的願望．．．
去其他地方我可能無咁執著．．
但係０個度係西藏．．．
唔係四川北京歐洲日本．．．
實在很想跟大家一起去．．
不過自已又好似有ｄ去得勉強．．
唉
我都唔知．．
如果大家唔去可不可以早ｄ單聲我知?
我唔鐘意ｄ人吹完水又唔係認真的．．．
唔係我咁辛苦黎都唔知為乜，我會覺得自己好傻仔的!!

所以夜晚見到大哥哥係美國返黎，我都有同佢講我既憂慮．．如果就唔到佢既尼泊爾行程，咁我未唔勉強去囉．．．其實無所謂，不過要俾個心理準備我囉．．．
不過大家傾完都唔係咁灰．．不過alex都唔想我咁辛苦．．．但係為０左自己像夢一樣的地方，我會肯努力的～

同你傾完，個心都安心ｄ．．．
努力儲錢呀

>>April 9, 2005 at 7:02:51 PM GMT+8

2005 年 4 月 7 日 星期四 【晴】

今日同玉怡出街，都好開心～

>>April 9, 2005 at 7:14:03 PM GMT+8

2005 年 4 月 6 日 星期三 【晴】

今日睇古巨基演唱會...
好開心～

好開心的背後:

估不到我諗住遲下update...就已經落0左去下幾版....
我真的有點懶....

我想...如果你們有緣看到我這段話..那我也無話可說...
其實一直以來...也對這個演唱會..不是沒有興趣，但心想要排隊...好似上次周杰倫咁就覺辛苦..買到未買，買唔到未算...
所以我無乜點追求過睇...
因為那一晚...
聽見你很興奮地說: 去睇古巨基演唱會...心想...你跟誰去?
很想很想很想很想很想很想知道
你跟誰一起去?
朋友?新識既女仔?抑或女朋友?
其實係邊個又關我咩事...
好想去睇
只係因為一種你去睇我都去得的心理....
所以今天我
也沒有想像般興奮....

之前你興奮地跟我說著這個演唱會的一切
我說我也想看
你說
我跟你一起去吧
那一刻
真的....
有一...點...點的感動...
其實你可以由得我
我講完我會收手的
不一定要說
跟我一起去的說話
很傻吧...
竟然因為一句說話而感動..........

當我身邊的朋友不停地鬧我...
不停地叫我放手
而我
竟然仍然不由自主地想著你
真的
是不由自主的
可以選擇的話
我也想選擇不想念你...

結果
最終
今天晚上...
坐在我身旁的人
不是你...
雖然我有一點傷感
但我仍然落力投入這個演唱會
沒有你在身邊的演唱會
也可以很投入吧
沒有你在身邊的生活
也可以很開心吧?
其實你也不算是在我的身邊生活吧
我們沒有天天的見面
沒有天天的聯絡
只是一個星期數次的網上對話
算是甚麼?
只是我一廂情願吧了.....

當古巨基唱第一首歌
竟然係<<必殺技>>
其實我真的有點想著你
估不到後來跟你談起
你也記得這一首歌是開場那一首歌

你近來又　再有空　我在防備　別發功
能勉強戒絕心痛　但喉嚨還在痛
你在懷舊　我也懂　還稱讚我夠上進
但可惜那時你都不相信

我道行都低估了你　我以為　撐得起
一句為甚麼不找找你
我練到　再倔強　再絕也　也永沒法比

求你別要　如從前　純熟地碰我（求你別說　仍能如　良朋地對我）
而我問我　為何還　能夠碰傷我（而我問我　為何還　能對得起我）
不要讓我　一敗塗地　輸得更多　ＯＨ．．．
求你別說　錯過我　其實亦愛我
何以技癢　放過我　你已彷彿有神助
一關心我已經（一講起你已經）　等於　再殺死我

你未提及　我也知　既是前度　沒法子
如這聖伯納得意　分予你當玩意
數十年後　我也知　如果見你我願意
像一關過完　再單打一次

>>April 24, 2005 at 5:48:39 PM GMT+8

2005 年 4 月 5 日 星期二 【晴】

今日又要返工喇．．．
不過都係正常，我只係想訓晏ｄ．．係唔係好衰?

今日下午時同同事食食，佢俾０左份報紙的專欄俾我睇，入面有段野，睇完之後都幾有共嗚．．

詳細係一個讀者問究竟人世間的愛是甚麼?為什麼要愛其他人或者他／她已經不想去愛其他人了．．．
然後個專欄作家係咁答佢：
不論你的愛你覺得值唔值得．．．但係你感動過的每一件事，流過的一滴淚，也是有過你生命的痕跡，生命，有時候只為這樣子而存在．．．
人總不能外求其他人的愛，而最令人滿足的自己的內心
內心的滿足從自己的生命中昇華．．．
這樣一個人才會更完整

>>April 10, 2005 at 12:44:02 PM GMT+8

2005 年 4 月 4 日 星期一 【晴】

近來
在努力中...
近來有點想逃避
但好像又不太容易讓我逃避...
有點希望站在有風吹的地方
目極而視
忘記人間煩惱無數
但
即使站在最藍的天空下
煩惱又是否可以輕易忘卻?

那天玩了一個遊戲
四個字之中選一個
我選了「路」
他的解釋竟然是「路者，各足走也，喻意兩人各走自己的路，不能同屬」

明天
又要上班......

>>April 6, 2005 at 12:26:17 AM GMT+8

2005 年 4 月 3 日 星期日 【晴】

今日天氣個天好藍
天氣好好，有鱗狀雲添呀...

今日係公司嬲0左D同事，哼，你地唔駛旨意以為一包朱古力就可以KO我呀，衰人....
今日係公司躁底，除0左俾同事激親外，仲有臨放工時0個邊先話個FILE唔得呀...激死人

夜晚本身諗住去跑步，但係因為慧豬話條水晶忽然間變得好混濁，所以我就陪0左佢出去旺角淨化條月光石..

夜晚返到屋企同小泰利係ICQ傾下計，唔知點解，每次自己同你地傾開人生，前途，總覺得自己有點無用及遙遠，我沒有你們可以考的專業資格，也沒有你們的職位升降預視...
自己好似無乜目標，無乜奮進，讀完出黎，都好似有d混沌.........
甚麼是完美的人生?
有錢?
有樓?
有愛你的人?
有穩定的工作?
我也不知道....
感到身邊的人也在不斷追求自己理想中的生活，自己好似無乜特別想追求..
你渴望甚麼?
我也不知道
如果我只是想跟令我快樂的人在一起，直到有一天身邊的人意興欄柵，要漸漸遠離的時候，那我也算珍惜過跟我生命中相識的每一個人..我都唔知自己在說甚麼
很想尋找回憶中最藍的天空，讓我的心安靜下來...讓我在最接近窮蒼的地方，感受上天給我的路向.....

身邊的人盡為不同的事而忙著，為著儲人生的十萬元，為著儲基金，為著結婚，研究生小朋友，為著去外國讀書見男朋友而努力，而自己，好像沒有甚麼值得努力的東西…..為著自己而努力麼?我卻找不到方向…

以前讀書的時候，只要乖乖地背好d書、寫essay、做十年past paper 、考試、alevel，論文、只要俾心機，總有d渣拿，不用想太多的將來，因為船到橋頭自然直…但是現在…好像沒有一定的答案，也沒有一定的前路…你選擇了A是正確?還是選擇B是正確的?應該及時行樂還是先苦後甜呢?怎樣走怎樣看也像如履薄冰…不是太看到前景似的….

現在每走一步都好像要深思熟慮似的…

不知為何，我們要比從前更應節制及更有安排．．．工作要有安排，要為將來升職、人工、地位而安排，金錢要安排，休息要安排，連拍拖都要安排，要事業有成有樓有車有錢有工人有．．．．其實點解連感情附出都要有安排?我也不明白為何我們不可以好像從前一樣隨心呢?是因為我們有多了責任，不可以隨便冒險了吧?
「難道還要捱苦?」這是我朋友近來跟我說的一句話．．．
從來沒有覺得自己很苦，我認為每一個人也有自己的命運，要捱的人其實比較幸運，起碼他的人生會有更多東西刺激他思考世上的一切，不會好似一個住得舒服的白痴．．．
點解這個世界越窮的地方，會有更堅強的思想家出現?因為沒有了物質，我們才會更了解生命的一切．．．

唉．．
一諗到咁就覺有ｄ辛苦．．為每步的營營役役而感到疲累及辛苦．．．
可能你會說，社會上每一個人也是這樣生存著，你不妥協，是自找麻煩的表現，但社會上個個人也營營役役為的是甚麼?有更好的生活?有多的錢及安全感?
真的嗎?誰又保證你捱完後一定有美好陽光?
誰又保證你辛苦儲來的錢不會給兒子敗去．．．
其實一切
只係一個選擇
生活的素質
不在乎你享受幾多物慾
而係你內心的堅忍與韌度

呢個社會已經好令人疲累．．
為甚麼大家不可以在有限的環境下輕鬆一點?

>>April 12, 2005 at 6:04:26 PM GMT+8

2005 年 4 月 2 日 星期六 【晴】

今日天氣都出奇地好，不過今日我無得跟FRANKIE佢地去行山，因為我要去拜山

因為琴晚又太夜訓的關係，所以今日起身時也是超級痛苦...
今年一齊拜山的親戚好似又少了，不過我地屋企，姨媽同舅父一家一定會去，由公公在十幾年前離開開始，也是只有我們幾人...

跟我同年的表妹今年結婚，聽說嫁到太古城，我講起HELEN結婚的派頭、VINCY個朋友請D親戚去夏威夷觀禮後，好似踩到表妹條尾，即刻話乜你識D朋友咁有錢既咩?車，我有個好莊員住1800尺既寶翠園添呀，咩呀?你未聽過寶翠園?咁你見識多D先啦，我先無你咁拜金主意...

拜完山就食埋d燒肉，D舅父除0左又捉住我講咩公司好呀，咩工有前途外，佢地竟然係度概嘆自己已經老喇，D仔女都大曬﹐大到好多人都唔得閒黎，見到佢地徐老的背影，也不禁令我感到自己也應該好好做些甚麼保護這個家，不過我太無用了，出黎做的又不是大公司，又不是豐厚人工和福利，也好似沒有甚麼專業或前景...沒法好好為這個家努力...

之後去0左荃灣的老人院探婆婆，她剛搬進來，我還沒有探過她，想不到去到見到間老人院都幾簡陋，她的活動範圍只有一張狹少的床，她的身體也瘦了一圈，她口中念著要回家，我看見她這樣心頭也不禁一酦....看著她手顫的雙手拿著我們給她的雞蛋，真的有點想哭，不過又不可以在那麼多人面前這樣，最衰你個孫我無用，唔可以俾多D你地..

唉，看見老人家睌景淒涼，而她口中常問，我幾時可以返屋企，而我媽媽就跟她說，要是醫生不用你再食藥就回家吧，但我知道她患糖尿，根本沒有可能不用吃藥，媽媽是在沒有辦法的情況騙她，但她這樣就不可以好似公公一樣，在自己的家離開了..

以前小時候已經係婆婆度住，我想沒有了她倆老，可能我同我細佬已經變0左街童，雖然佢煮的東西不好吃(最記得佢試過烚隻蛋白是半生熟的蛋俾我食，結果我食到嘔)，不過仍很喜歡她做的年糕，她做不到的時候總叫我幫她手，不過近幾年因為年事已高，已經沒有整了，而屋企其他人，亦唔多識整，所以近幾年新年也吃不到親手整的年糕了...

曾說過老了的時候要跟咕慧豬等一起住老人院，睇黎我地都要儲多D錢，搵間好D既老人院先得...

之後去0左搵係荃灣拜山的阿嫂，我地行0左陣買0左幾件返工的夏天衫，夏天快來了，睇怕我都要努力減下肥，要告別月巴呢兩個字...

去完荃灣班男人打黎話行完山，叫我地早D入沙田食飯喎，好啦，今期玩去和輋食大排檔，今日阮美話俾人CHER爆0左，但係吊手岩附近D香港杜鵑開得好靚，我都好想睇呀，聽講馬鞍山的杜鵑好出名，點解次次行吊手岩我都唔得閒0架?

不過睇番D行山網，人地俾三星0乍喎，但係班友仔已經話行到死0左，我地都真係老喇...
詳情 http://www.wildtrekking.net/hill/goldwall/goldwall.htm

不過阮美又拗柴，你要小心D先得0架..快D好番呀~

今晚去0左張根記食，有梓晴、主席、強仔、肥仔、阿嫂阮美同我，0個日打俾黎嘉澍佢明明撩交嗌話唔黎0架，今日又屎忽地出現﹐可惡....成日恰我...以後唔打俾你!!

阿JOHN話呢度既軟殼蟹好出名，我地仲叫0左雞、蟹肉海鮮湯、炒千牛肉同埋我最鐘意食的九肚魚，其他的唔係好記得了，邊個記得的請提供...

今晚食飯都好開心，我地成日串黎串去，我鐘意串到阿john話以後唔同我講野喇...哈哈
不過唔知點解今日肥仔咁勁，平時都唔飲酒既，今日飲0左兩罐...我今日好乖..無乜點飲，因為terry唔係度嘛..

食完仲有我係美心買的CHEESE CAKE..幾好味0架..係BLUE BERRY來的

食完都只係九點，因為我地六點就話食飯，但係因為0個度太多人，所以等到八點先有得食，返到屋企仲有得睇浪漫滿屋，如果有人同我唱三隻小熊就好喇..哈哈

原來佢首主題曲既歌詞都幾正...不過最衰我唔識韓文....

因為我地去到和輋佢地都未到(邊個叫我早d0架?可惡)，我同阿嫂去0左單車徑度行陣，大家講起身邊人對金錢的價值，我都覺內心的富足遠比有樓有錢好得多...

>>April 4, 2005 at 12:23:05 PM GMT+8