2005 年 7 月 20 日 星期三 【晴】

跟大家分享......

兒童時的56樣無聊事情

1.玩米缸，將手插入米缸裡面o既米裡面篤下篤下。
2.在百貨公司入面篤扶手電梯旁的吊牌。
3.地下有階磚時，特登隔一格一格o黎行(不可踩界，要完全在格內)。
4.用錶面反射陽光，照o黎照去。
5.跳樓梯(愈多級愈勁)。
6.行路上高起左地方(例如高起左o既長條型石博，好似玩平衡木咁行法)。
7.鋪張紙在硬幣上面，然後用鉛筆係上面油，油返個形出o黎。
8.食完瑞士糖之後，將糖紙包番個原本四四方方果個形出o黎。
9.超級市場踩住架購物車o黎行。
10.踩水"tum"，係好特登果隻。
11.吹口水波。
12.搣牆上的乳膠漆或牆紙。
13.係平滑o既地面上面"冼"下"冼"下咁行。
14.整濕o的紙巾，掟上學校廁所天花頂。
15.食完綠箭香口膠，一定摺返成張包裝紙，再放返入個大套入面。
16.響課室玩俄羅斯輪盤，將玩粉刷霑滿粉筆粉，放係風扇上面，等個風扇轉轉下，轉得快個時飛出o黎，睇下個粉刷中邊個。
17.放膠袋(當風爭甘放)。
18.去後梯執咸書睇，張睇完的咸書撕開飄落街。
19.貼張龜仔紙嚮o的同學。
20.踩人地個影。
21.狂踩人地對白飯魚，尤其是大肥仔果o的。
22.用幾條橡筋射。
23.掉人地門口的拖鞋落街。
24."蚊"消防喉，射水落下面個球場，睇下射到幾遠。
25.擇水彈。
26.用氣鎗射街上的途人。
27.玩千揪，"fing"到咁上下就飛出去鬥遠。
28.落樓梯時坐係o的扶手上面"sir"落黎。
29.在自動梯行相反方向。
30.把"誤投信件"或沒有用的宣傳單張，胡亂放入其他的住宅信箱。
31.坐地鐵時，抓緊中間的扶手，地鐵一開動博命繞住轉(自轉)。
32.在月台上鬥快跑。
33.帶玩具返學。
34.用圖釘弄穿學校壁佈板。
35.亂按人家的門鐘，然後鬆人。
36.明知過了三歲，仍然不買票，"捐"地鐵的入/出閘機。
37.用改錯水(很舊的有一個掃那種)附送的天拿水，搽在手上。
38.在井字型公屋中間的大天井中放紙飛機，或者放紙青蜒，看看誰放的紙青蜒最慢由廿幾樓落到地面。
39.煲蠟。
40.把汽水罐靜雞雞放在校車的車輪下攝住，開車時把它壓扁。
41. 圍閹。
42.呵尿時出力射走 D 屎積。
43.將紙碎或者紙飛機撒落街。
44.將bubble紙氣泡逐粒"鏈"爆。
45.o係屋企走廊玩"壁虎功"。
46.走到開動緊電風扇面前:"呀~~~~~~~~!"
47.用間尺好似 "搖搖板"咁彈起舊擦膠。
48.寶貼當泥膠,用間尺整pizza。
49.係屋企撩鼻屎然後抿落牆。
50.將 d 擦膠碎用尺切粒粒。
51.膠水搽係手/筆盒上 , 等佢乾之後成塊 met 出黎 ~。
52.洗手時用手頂住個出水位,用d水去射周圍d人。
53.同隔離位鬥快開哂筆盒d機關。
54.飛拖鞋。
55.特登將飲完的紙包飲品吹脹然後放在地上，大力地踩爆佢。
56.用泥膠塞電制/電話插蘇。

你有幾多樣中左呀?

>>July 21, 2005 at 8:44:46 AM GMT+8

2005 年 7 月 19 日 星期二 【清涼】

話說細佬搵左份暑期工
返正在我office隔條街
星期一第一日返工
身為二家姐, 早上我就約左佢食lunch
問問佢做咩返呢份工, 又傾下偈
行左過金鐘果邊食
食完仲可以行陣great, 都幾開心

尋晚相約家姐同阿妹去剪頭髮
間salon 係家姐剪開
所以就去啦
但都冇得3個一齊坐既.....
全程都係分開...好可惡

今晚難得放工就返屋企
陪daddy mummy 食飯同睇<我的野蠻奶奶>
好似都好耐冇試過喇
真係件賞心樂事呀!!

~最愛跟屋企人相處~

>>July 20, 2005 at 3:28:21 PM GMT+8

2005 年 7 月 17 日 星期日 【晴】

今天晚上, 跟馬食飯分享
我覺得係神同我地一齊的分享
好興奮,令人鼓舞
謝謝你的分享同激勵
好想講......真係好愛你呢~
上帝都很愛你呀, 你要加油
繼續尋求...
仲有要一齊實踐!!

>>July 18, 2005 at 4:05:30 PM GMT+8

2005 年 7 月 16 日 星期六 【清涼】

回來了!4天的十六堂青年使命大會
感受很深..很深重...
到現時也未能平伏

開了的眼界---宣教工作
有嶄新領受的幾篇道
跟不同堂弟兄姊妹的交通

不要忘記上帝這幾天跟我的說話&感動
還有狠狠地打了我的

要分享得著的有很多
有興趣互相分享可以找我傾偈

而我今次亦決定將一切的得著
化作行動做出來

委身、能力、智慧
從來都自覺只有點委身
父啊,請你給我多一點信心、智慧
還有更大更大的委身!!

>>July 17, 2005 at 12:35:40 PM GMT+8

2005 年 7 月 13 日 星期三 【晴】

Daddy 生日快樂呀!
daddy 係早前已經同我講今年係佢57歲生日
第3次新舊曆同一日
但因為我今晚要入camp
所以尋晚提早左一日慶祝

放工一跳上火車就即訓
一醒已經係大埔墟喇
好在今日係要去粉嶺
一間daddy mummy酷愛既上海鋪

九點幾返出沙田
一家6人難得去shopping
鬧出好多令人發笑既場面
先有daddy係第4卡火車話要用電話搵坐係第3卡既mummy
細佬話要換去daddy 那對連"趙薇都唔要"既波鞋
然後好似上左身咁自扮戲中人既對白表情
其實又真係著到爛晒既...
到去了royal sporting house
家姐對住個sale問"有冇一d 波鞋係for行路....for老人家行路既鞋......."

加入我對大家既無限感情
好覺得...成家人都係無聊之鬼、歡樂之星

見到daddy神氣到要著住對新波鞋離開新城市
我付錢都唔知幾咁樂意

>>July 14, 2005 at 5:09:31 AM GMT+8

2005 年 7 月 11 日 星期一 【晴】

今晚約好釵釵、edith、美儀、軾儀、小同小云食飯
我地試左新城市新開既印尼餐廳
食物既味道同款式都唔算好多
但可以坐響一個好多cushion既位
就加左唔少分數
再者,今晚都唔至在食咩既

食下傾下....傾左好多....
亦都聽左唔少唔同類型既野
不過我覺得我地太遲開始食喇
都未係傾到好多野就11點
而且聽日又要返工
o係搵唔到去邊食糖水既情況下
今晚既聚會要等下次再延續

>>July 13, 2005 at 5:48:04 AM GMT+8

2005 年 7 月 10 日 星期日 【晴】

今晚係最後一堂九型性格
牧師話性格大體上唔會大變
但係可以提昇,提昇方法係透過靈修
當中講到要搵到適合你性格既靈修方式
先可以有更理想既提昇
有點inspiration....
難怪有時硬銷自己果套
d 組員都唔太work 啦
要好好從呢個方向探究先

今日值得一提係.......
我5點半準時離開公司
5點8已經見到有個型男企左係度等我喇
wah......好cool 呀!!!

>>July 12, 2005 at 4:30:14 PM GMT+8

2005 年 7 月 9 日 星期六 【酷熱】

今天的小組係個祈禱會
好想多d同組員操練禱告
雖然人唔齊, 但有時覺得人少
分享可以深一d,長一d, 也好!

晚上去了嘉英爸爸的安息禮拜
看見嘉英很叻,很堅強
但她的堅強也看得我有點心痛
知道還是要更多的在禱告上支持她!

回家難得有偉佳陪伴
簡單地分享了他的小組近況...etc...
很好的分享....但好快就到我家樓下
要等下次有機會再分享了!

>>July 10, 2005 at 3:46:19 PM GMT+8

2005 年 7 月 8 日 星期五 【晴】

細佬今年重考bio 同英文
成績係2個D,呢幾日都找了點時間跟他傾傾jupas揀科
記得上年我都好著緊的睇晒所有佢揀過既科
搵晒2年既mean 同lower quartile....
經過一輪研究同考問佢既preference
一向做事都唔太aggressive的我
精心同細佬com好左一個我地大家都滿意既排位
自覺都穩紮穩打...幾保守架啦
點知.......唉........
知道冇u offer既一刻
我好記得自己down 左一整日

今年今日....又叫做com好左另一個排位
上帝呀....求你保守!!!

>>July 10, 2005 at 3:48:03 PM GMT+8

2005 年 7 月 8 日 星期五 【晴】

返工又開始忙喇...不過反而覺得個人精神d
唔駛百無了賴丫ma
真係一條辛苦命

呢個星期放工比返工忙
要抽返多d時間留係屋企
家姐,阿妹,媽咪先後都病左
要快d好返呀!
呢排天氣熱左,比較容易整病人
大家都要小心身體呢~

>>July 9, 2005 at 3:11:38 AM GMT+8