2005 年 1 月 31 日 星期一 【乍雨乍晴】

唔知係唔係前晚吹左成琴風，
攪到成晚頭痛又瞓得唔好，
今朝勁唔想起身返工，
但我同自己講仲有三日就放大假，
唔可以咁懶，於是都起左身返工，
點知係我狀態咁差既情況底下，
遇上我人生中第一次被人性騷擾，
今日十點幾有個變態佬黎左學校話拎課程資料，
當時得我一個人係接待處，
但個變態佬又唔坐底，係咁用手抓自己何B仔，
我開頭以為佢真係好痕，所以先忍唔住，
點知之後伸埋隻手入褲自摸，
個時我已經唔理佢，
點知佢用手提電話係咁影我相，
個時已經好好好驚，
佢又咁鬼死大隻，如果我大叫都唔知佢會點，
佢影左我幾張相之後又繼續自摸，
當時我忍唔住走左入課室求救，
D男人即刻走出去，點知個變態佬已經走左，
D人追都追唔到lu，真係嚇死人喇，
佢地仲話我做乜咁遲先出聲，
因為原來見到變態佬個時真係會驚到唔知點算架!!
之後我仲驚到手震，連字都寫唔到，
但我好醒咁出左張notice 貼係牆上面，
"本校已安裝廿四小時監察系統"



爛船: MI MI..................我都好想搵你架，但你又話無假放，不如我地上慧儀屋企拜年呀!!??

>>February 1, 2005 at 2:48:13 PM GMT+8

2005 年 1 月 29 日 星期六 【暴雨】

今日係我最喜歡o既星期日，
因為可以瞓晏d，
我今日成點先起身，
足足瞓成十二個鐘，非常滿足，
今日hippo佢地有野做，唔得閒陪我，
所以我乖乖地留係屋企，
琴日係公司print左申請公務員o既form，
因為我知道入境處請人，
我好俾心機咁填完足足六頁o既application form，
但我上網睇郵寄地址既時候順便睇多次個要求，
個體能測試真係好高要求，而我明知一定唔得，
平時跑多一陣都氣喘，更可況咁多項目，
諗諗下.............入學堂時要晨早起身，又要早瞓，
日曬雨淋，曬到黑晒點算呢? 仲要有雀斑就難攪啦，
又無得扮靚靚，又成個男仔頭咁，沖涼又唔可以沖好耐，
仲要成班人一間房，無私人空間，無得full mask，
又唔可以用twins star o既被，又唔可以抱住大熊熊瞓，
成星期先返屋企一次，簡直係非人生活......................




諗諗下都係唔係好岩我!!!

>>January 30, 2005 at 10:06:50 AM GMT+8

2005 年 1 月 24 日 星期一 【晴】

今日放工後約左d friend去尖沙咀食飯，
因為dannis仲有幾日就去美國training做迪士尼，
順道幫佢預祝埋二月頭o既生日，
我同亞琪、亞ming佢地仲plan定下星期放新年假去旅行，
一係返大陸，一係去澳門..........唔知攪唔攪得成呢?
食飯之後成班去左打麻雀，
但我未夠十二點就瞓左lu，
因為第二日要返早嘛!!!!!!!!!!!!






肥雞: 你地陪左我成日已經好好架喇，不過我都仲想要多d新衝擊--------------點解我地買唔到古巨基演唱會飛架?????????????????/

>>January 26, 2005 at 2:38:40 AM GMT+8

2005 年 1 月 21 日 星期五 【晴】

人多就多是非，
依間公司真係愈來愈複雜，
最怕o既辦公室政治!!!!!!!!!!!!!!!!!

>>January 22, 2005 at 11:31:49 AM GMT+8

2005 年 1 月 15 日 星期六 【乍雨乍晴】

今日收到一個小學同學O既message，
佢話我地間小學將於出年停辦，
我突然覺得自己好黑仔，
因為我幼稚園讀過兩間，
我畢業無幾耐兩間都已經"摺"o左，
依家小學又"摺"埋，
唔知幾時到馮梁結、粉嶺明愛呢?
弊....................我估浸大唔會掛!?

>>January 15, 2005 at 4:14:05 PM GMT+8

2005 年 1 月 8 日 星期六 【晴】

今朝七點幾已經俾家姐個伴娘嘈醒，
因為家姐要化妝set頭，而我地除左打扮下之外，
當然要準備d道具黎對付班兄弟啦，
班兄弟黎開門之前，家姐已經著好褂，
無神神d亞嬸要我遞碗飯俾家姐食，
然後又要講"家姐食飯"，攪到好似d古代人暫頭咁，
要人講d咁肉麻o既野，攪到我三二一即刻淚如泉湧，
我喊攪到媽咪又喊，無幾耐班兄弟就拍門接新娘，
我地班姊妹當然唔係咁容易開門啦，
d殘忍野當然唔少得食檸檬、廿四味、掌上壓等等，
我o既姊夫(好唔慣............)讀完好肉麻o既愛的宣言之後，
爸爸就係房度拖家姐出黎，估唔到爸爸都會喊，
今次係我第一次見到爸爸喊，
攪到原本好堅強O既家姐都忍唔住，
咁感人O既場面，我們班姊妹、媽咪、亞嬸、姑姐同亞女麻都喊埋一份，
不過出左門之後，去到男家屋企就無咁既場面，
之後再去到尖沙咀酒樓，家姐一向都話男家D親戚好串同好現實，
當日見到既真係咁，串到當煎佢兩巴，當然我無同番家姐講，
費時佢唔開心，加上佢自己同姐夫都唔知佢D屋企人有幾衰，
不過佢地兩個開心就得喇!
雖然依兩日好辛苦，但都好開心!!


自從家姐結婚後，我患上左"嚴重婚姻恐懼症"，雖然我依家只得廿一歲，
但已經為我帶來好大O既陰影，又多野攪、又辛苦、如果唔鍾意佢D屋企人就更更麻煩，
所以都係唔結婚好D!

>>January 13, 2005 at 7:28:28 AM GMT+8

2005 年 1 月 7 日 星期五 【晴】

家姐今日結婚，女家係大埔明星設宴，
琴晚已經有好多三姑六婆上左黎屋企通頂，
又整湯圓又多習俗，嘈到我成琴無得瞓，
到左早上十點幾，家姐又要上頭，
有個叔婆家姐梳兩梳，又講左成大堆我唔明o既鄉下話，
又後個化妝師幫我們化妝set頭，
四點左右我地就塔車去明星酒樓，
哥哥係婚宴上飲酒左，攪到我地"呢咁hed"，
又拉埋d表哥去飲酒, 又係度講d九唔塔o既野，
又後阿"女麻"同佢女朋友揤左佢番屋企，
亞"女麻"話哥哥係咁話佢自己好高興，
無神神又喊，又話細妹結婚，
返到屋企仲嘔落地毯同張床度，
真係難委佢女朋友同亞嬸佢地係度清潔，
但家姐知道後不知幾興奮走入哥哥間房睇佢，
個個都估唔到哥哥點解會咁激動，
但我地無理咁多，因為第二朝家姐就出門，
要早D瞓........................

>>January 13, 2005 at 6:37:56 AM GMT+8

2005 年 1 月 5 日 星期三 【晴】

心情好差，唔好攪我!!

>>January 7, 2005 at 4:23:21 AM GMT+8

2005 年 1 月 1 日 星期六 【晴】

今朝八點半已經俾屋企人鏟醒，
我以最快o既時間換左套靚裙、化妝同set 頭，
因為今日係家姐o既大日子，
平時有咩喜慶日子，爸爸一定好緊張，
但今日佢一反常態，非常平靜，
夠晒鐘仲慢條斯理咁選擇tie，
家姐十點係尖沙咀文化中心註冊，
但我地九點十五先出門口，
我地十點先落車，我同哥哥、媽咪行就好快，
點知爸爸仲慢慢等綠燈先行，都唔知佢做乜，
去到o既時間，得女家證婚人未到，真係笑死人喇，
好彩都趕得切，家姐讀誓詞個時口窒兼讀錯，
之後佢話原來讀個時真係會驚，真攪笑，
之後家姐、亞陽、亞陽爸爸同我爸爸四個人簽完名之後，
張結婚證書就完成，註冊官宣佈佢地已成為合法夫婦，
我走過去叫左平生以來第一句"姐夫"，
亞陽不知幾~U，叫番我做"E仔"，
家姐從此就要叫徐太，老幾多...........................
之後家姐問點解咁遲，我話爸爸反常慢吞吞，
佢話爸爸可能唔捨得喎，
今日註冊都已經唔捨得，咁下星期擺酒出嫁o既時候點算呀，
佢會唔會喊架，死啦，我又咁眼淺，會唔會成家一齊喊架!哈哈...................

>>January 2, 2005 at 8:54:30 AM GMT+8

2004 年 12 月 25 日 星期六 【晴】

南亞海嘨.................好慘!!
大家真係要捐錢呀!!

>>January 2, 2005 at 8:28:33 AM GMT+8