2005 年 7 月 25 日 星期一 【晴】

又係現場轉播0既時間喇，阿coe而家係日本仲有三個星期唔夠就返黎架喇！佢係0個邊0既生活都還可以啦，食住都ok啦，不過就訓得少d喇，日日因為好早出門口，好夜先返，又要準備第二日用0既野，日日訓得幾粒鐘，真係聞者傷心，聽者流淚！唯一0既樂趣就係等星期六日出去行0下街，可以shopping一番！唔知佢返到黎係肥左定瘦左呢？

>>July 26, 2005 at 6:40:04 AM GMT+8

2005 年 7 月 10 日 星期日 【晴】

大家好！我係阿東，而家由我現場轉述阿coe 0既情況俾大家聽，今日係阿黃劍coe離開香港係日本training 0既第九日，真係有d唔慣！佢係0個邊0既生活好好，不過都係有d唔慣咁啦。今日，佢就要開始連續五日 0既emergency training，如果炒左就要執包袱，不過大家唔駛驚，佢咁冰雪聰明人見人愛車見車載，一定會pass 0既！我地係呢度0既，既然幫唔到佢0既，就係度同佢打氣加油啦，加油........................努力呀...........................大家一齊叫：加油努力啦！我相信有你地0既支持佢一定感受到0既...........................yeah！

>>July 11, 2005 at 4:02:03 PM GMT+8

2005 年 6 月 30 日 星期四 【乍寒還暖】

今晚我地一家五口、加埋姐夫同亞東七個人一切食飯，
依餐係我去日本前o既"最後的晚餐"，
爸爸請我地去明星食飯當餞行，
家姐俾左封大利是我，媽咪都有俾利是，
仲有平安符放係銀包，
返屋企再揤埋行李，所有野都攪掂晒，
終於都到依一日，真係唔想去，
不過既然個個都咁支持我，
我一定會俾心機，一定會撐住架喇!!
八月十二日再見!!

>>July 1, 2005 at 3:21:25 PM GMT+8

2005 年 6 月 29 日 星期三 【乍寒還暖】

今日係香港training o既最後一日，
我地大家都唔係好想去日本，
因為知道比係香港training更辛苦，
大家都好驚，唔想捱，
不過只要捱過，我地就可以自由喇!
所以同自己講，頂住呀!!
為左令大家開心d，我地決定去到日本第一日，
即係未開始training前一日，我地會去行街，
因為開始training之後，我地一定忙到無時間去，
就算有都要溫書，如果fail就大大獲喇!!

今日約左亞奶、達達、亞雷、東、hippo、楓楓、
肥雞、大佬、毛毛、嘉輝食飯，
當係去日本之前o既最後晚餐，
真係好開心，不過又好唔捨得，
雖然只係去短短四十日，
不過咁大個女都未試過離開屋企咁耐，
真係好唔慣，明知咁辛苦，
而且去到病左、或者唔開心都無朋友、東、屋企人係身邊，
又無人照顧、 又無人傾訴都幾唔開心，
希望可以捱得過啦!


* 多謝肥雞咁忙都整張卡俾我、好靚呀!!!!!!!!!!!!!!!!!!!!!!!! 我想話我真係鍾意飲有氣氣水架~

>>June 30, 2005 at 3:39:18 PM GMT+8

2005 年 6 月 24 日 星期五 【晴】

仲有一個星期就去日本喇，
非常之唔想去，好似送死o既感覺，
好驚pass唔到emergency，其他都驚，
不過又諗，如果pass唔到都好呀，
佢炒我咪當請我去日本旅行囉，
不過又要搵過第二份工喎...........
都係唔好諗咁多，盡o左力先算，
依幾曰一得閒就買定去日本要o既用品，
用o左好多錢，好窮，唔夠錢去日本用，
依家training得咁少人工，又要還學費同找卡數，
真係要慳d再慳d，去日本唔可以shopping喇! ~_~
已經揤o左少部分o既行李，要帶好多野，
好似搬屋咁，仲有好多o既書，重死人喇!
不過..........唔知仲可唔可以放多隻公仔呢!?
平時係屋企一定要攬住隻大bear架嘛，
去到日本宿舍個環境已經好陌生，
如果瞓覺又無野攬住真係會好驚架喎，
點算呢!?
我一走o左，亞東肯定玩到癲晒啦，
又無得成日打電話返香港，
點算呢!?
唔係屋企成個幾月，哥哥會唔會攪亂晒我d野呢!?
東京千葉上星期岩岩地震，而宿舍就係個度，
真係..............."大吉利是，吐口水講過!"
無事..........................

>>June 25, 2005 at 11:59:20 AM GMT+8

2005 年 6 月 21 日 星期二 【乍寒還暖】

連續上左四日emergency堂，前所未有o既辛苦，
雖然已經pass 晒香港o既test，但emergency會去到日本先test，
因為個度先有飛機mock up centre，依part係我最驚，
因為如果依part fail，就會即刻由日本返香港，
而個trainer真係好嚴，佢嚴到好似好唔鍾意我地咁，
咩都投訴一餐，依四日我地個個做homework做到無得瞓，
點知都話我地做得唔好，有幾個人佢話會加緊留意，
如果唔比心機會fail依d人..................點知我係其中一個，
個刻真係好hurt，攪到咁辛苦做咩，捱到死下死下，
我依四日每日都瞓得四、五個鐘，真係辛苦到喊，
不論讀書、做野，我都未試過因為辛苦而喊，仲要唔止一次，
連媽咪見到我做到咁夜，佢都不禁講野句，
"做以前份工咪幾好，做咩攪到自己咁辛苦!"
其實我都有問自己，點解人有理想!?達成又點!?
現實同想像點解咁唔同!?其實我可以平平淡淡咁做份文職，
準時收工、無壓力，老闆對我又好，點解我要轉工呀!?
明知自己唔鍾意自己一個人，依家飛去第二度自己瞓一間房，
係酒店一定好驚，環境又陌生，點解唔到係香港呀!?
有病、唔開心，都唔可以即刻見到屋企人、朋友，
又唔可以成日見男朋友，電話又少傾，
又危險，成日有氣流，墜機，點解要搵命搏!?



睇到你地O既留言，好多謝你地! 不過...................其實我一D都唔叻!!

>>June 22, 2005 at 3:49:02 PM GMT+8

2005 年 6 月 15 日 星期三 【颱風】

終於pass 晒香港o既test喇! 全部都九十分以上，good !!
雖然有人fail左test，不過公司問過日本公司，
最後都俾佢pass, 所以全部人都可以去日本training，
琴日介紹我地去日本o既training centre同宿舍，
仲有vidoe影左個實況俾我地睇，
個宿舍好靚，一人一間房，每間房都有露台、
獨立洗手間同浴缸、書台、床、衣櫃......................
我地o既早餐同晚餐都係宿舍食，全部都係自助餐，
個vidoe仲影左好多野食，有壽司、冷麵、魚生、甜品................
我地個個都一致贊好，不過師兄話當我地日日都係咁食就會食到厭，
個training centre有好多模擬機倉，像真度有八十五，
仲有一個化妝間俾我地學化妝，原來男同事都有儀容堂，
教佢地好好保護皮膚，我地o既材料仲要係shiseido o架，
又有全身鏡學行路o既儀態，好似好好玩咁，
不過全個宿舍o既staff都唔識講英文，只有我地o既舍監識炸，
如果放假去街，之後迷路就慘喇，打返去都無人救到我地，
所以我地決定打定個地址同電話放係銀包裡面，
咁就安全得多喇!!!..................

>>June 16, 2005 at 7:26:40 AM GMT+8

2005 年 6 月 12 日 星期日 【晴】

係香港o既local training有四個大test,
passing mark係85分,
好彩頭兩份pass左,
但有人fail 左，個instructor仲暗串，
攪到d同學仔喊，
我真係覺得好衰，攪到我地咁大壓力，
聽日同後日仲有兩個，我真係覺得好辛苦，
辛苦在要背好多野...................
希望我可以捱埋之後個兩個test,
如果pass到，兩日後就知去唔去到日本training,
之後放三日假俾我地揤野prepare去日本，
依家真係又辛苦又大壓力..........................

>>June 13, 2005 at 2:05:00 PM GMT+8

2005 年 6 月 10 日 星期五 【晴】

今日放假，但無出街，
因為後日有test, 唔夠時間溫書，
所以好乖咁留係屋企，
不停背costoms, immigration, quarantine, rounte information.....................
唔同國家o既resident, non-resident, crew既duty free allowance有幾多，
飛機, 氣流, 風速, 溫度, 時差計算, terms......................
真係背到喊，由朝到晚都係度溫，
仲慘咁讀BU個時，真係無諗過要讀咁多野，
我又再一次低估O左依個職業.............................

>>June 10, 2005 at 5:03:38 PM GMT+8

2005 年 6 月 7 日 星期二 【晴】

今日返工要帶好多好重o既書，
真係重到拎唔到，今日仲要去禁區office上堂，
所以我同d同事推機場o既行李車仔，
我地仲將架車推埋上無人駕駛，
諗住如果比人話先唔推上去，
(因為車仔係唔上得無人駕駛架!)
點知俾公司o既manager見到，
我地就俾公司話.........................
"如果比機管局抄牌，公司就好大件事!!"
真係唔好彩，好彩聽日唔洗帶咁多野炸!!
下次真係唔敢再博喇....................^-^

今日上堂好悶，教我地咩況何下有氣流、
飛機型號、去咩國家填咩Immigration form、地理..................
雖然我知依d野好重要，但真係無諗過做空姐都要識依d野，
不過唯一令我有興趣o既係，師姐話飛去美國有機會見到北極光，
因為唔係成日見到北極光，佢飛o左咁耐都係見過幾次，
而飛去澳洲就可以見到"大堡焦"&"大峽谷"，
佢話真係好靚，佢都建議我地頭幾次飛帶埋相機，

之前都好擔心pass唔到個training，
又多野讀，又多野背，
不過依家好期待北極光、大堡焦同大峽谷，
我要俾心機，我要pass training，我要飛...................

>>June 8, 2005 at 1:39:08 PM GMT+8