2005 年 10 月 6 日 星期四 【晴】

終於平安渡過埋我第三日standby duty，
三日都無call到出機，真係好運到爆炸，
計埋之前三日假，total 放左六日假，
仲多過人地放Annual Leave，哈哈................
今日去左沙田睇<小企鵝、大長征>，
d企鵝真係好得意架，不過佢地好慘架，
幾個月先食一次野，又有暴雪，好易死，
最慘係成日都要"企"..................哈哈
好彩我唔係一隻企鵝o者~

由於聽日飛加拿大，所以又買左乾量，
仲有雜誌同VCD，今次我仲會帶埋notebook去，
哥哥問我去幾多日，帶咁多野睇唔睇得晒，
我話如果你全日都留係酒店，一日都已經K.O.晒喇~
希望係東京同加拿大都會見到friend啦!!
咁d日子就會快過十倍架喇~

>>October 7, 2005 at 1:36:19 PM GMT+8

2005 年 10 月 6 日 星期四 【晴】

今日係我standby duty o既第二日，
由於今日亦係聰表哥結婚大日子，
爸爸媽咪一早去左姑姐屋企，
而哥哥亦幫手做兄弟去接新娘，
屋企一早無晒人，
我驚住公司會call我出機我又唔知醒，
所以一早起身然後開住房門瞓，
如果十點幾起身，公司都無打過o黎，
我曾經check過電話響唔響，
但又ok喎...............結果到二點幾都未收到call，
一千個好好彩，我又唔洗飛，
又可以多一日假，又可以去聰表哥婚宴，
真係開心到飛起。

大概六點半我地一家人已經去到尖咀皇上皇，
我地把握最好o既時間，成日走上去台影相，
我同d表兄弟姊妹又勁影相，
至攪笑係我有個超級可愛o既姪仔，
只有歲幾o既佢，簡直係個小演員，
叫佢笑就笑，錫就錫，又識做戲，勁可愛....................
而中途我地亦玩左個遊戲，
係鬥快打出新娘讀出調亂o既電話號碼，
眼明手快o既我，當然羸左個遊戲啦，
上台講番幾句祝福語，就成功取得一張惠康禮券，
哈哈...............以後仲有邊個夠膽話我遲鈍!?

聰表哥同佢老婆已經拍拖十年，
今日終於結束依段愛情長跑，
步向佢人生o既另一段路，
兩位主角致詞時都忍唔住喊，
我真係覺得結婚依樣野係好神奇，
當中有好大o既力量，
就算一個幾堅強o既男子漢都頂唔住，.
um..............一個字"勁"~




珊 & 殘︰其實有時我都咁同自己咁講，不過總係覺得有d不被認同，聽到你地咁講，我舒服好多...................多謝~

>>October 6, 2005 at 4:59:54 PM GMT+8

2005 年 10 月 4 日 星期二 【晴】

依兩日放假都係去左睇戲、行街同勁食野，
為左增肥，依兩日都係去左食我最鍾意o既野，
豆大酸辣湯麵、Italian Tomato o既 cake、
佐敦澳洲o既蛋治加奶茶、韓式泡菜鍋.........good~
為左 stay outport個時無咁悶，
費時成條懶蟲咁幾十個鐘留係酒店度頹廢，
所以係adidas買左運動衫，
等我係酒店都可以去做gym，
又可以for第日學瑜珈個時著，
我一定要迫自己做下運動，
一來係酒店好悶，兩來條腰成日痛，
睇o黎依份工真係幾體力勞動，
唔怪得知d師姐成日話整親有後患，
又話要去做massage啦!一定要keep下喇~

雖然好多friend話做空姐無用、學唔到野、無前途，
開頭聽到都幾唔開心，不過依家諗下諗下..................
如果唔係做依份工，我又點會係短短兩個月內，
去過福罔、大阪、東京、芝加哥、布里斯本、溫哥華、格杉機呢!?
我又點會有機會見咁多野、知咁多野呢!?
又點會有咁多時間俾我瞓覺、shoppinng同放咁多假呢!?
又可以做多d facial、運動，
唔知係我自己想講d說話令自己開心d，
定係依份咁"無前途"o既工，岩晒咁無用咁懶o既我呢! ^ - ^



今日我係standby duty，只要到下午兩點四十分都未收到call，咁我就唔洗出機，多一日假，仲有三個鐘，好緊張呀!!!(11:44am)

好緊張呀, 仲未有電話呀!!仲有三十分鐘我就自由喇~ (14:10)

YEAH !! 唔洗飛，呃多一日假~

>>October 5, 2005 at 7:35:27 AM GMT+8

2005 年 10 月 1 日 星期六 【酷熱】

做咩都總會俾人講，
唔係唔接受別人o既意見，
只係令我回想起家姐講o既"三爺孫"故事，
領會到如果人地係要講你，
咩都可以俾人講，
其實所有野都可以好直接，
唔好諗到咁複雜，
已經覺得好煩，唔想再去回應，
點解唔可以簡簡單單，
香港人...................放鬆D啦!
可能唔放鬆O個個係我~

>>October 2, 2005 at 7:23:30 AM GMT+8

2005 年 9 月 23 日 星期五 【驟雨】

琴日同阿東去左大中迎囍飲茶，好好味、 不過有d貴，
之後係大中行左陣街，終於決定係IT買個對鞋，
係b+ab睇中件衫，不過唔係好值，所以都無買到，
之後我地去左大衆書局買書，為我聽日飛七日而準備，
今次買左兩本<三萬呎高空xxxxx空姐日記I & II>，
阿東拎左本財經界奇材o既書黎睇，
嘩...............依d咁深奧o既書，我一定睇唔明，
之後去JUSCO買左條金未來O既皮帶俾爸爸，
最後買左袋零食、同租左兩隻VCD返屋企睇，
又可以係屋企食晚飯，
雖然只係平淡的一天，但已經好滿足，
幾時都話在家千日好!!!

>>September 24, 2005 at 9:58:51 AM GMT+8

2005 年 9 月 23 日 星期五 【驟雨】

終於飛完我OJT後第一程機--->溫哥華，
出發當日正係中秋節正日，
而我今年O既中秋就好孤獨咁係東京渡過，
雖然只係中秋節，但已經覺得好慘，
當人人都係香港同屋企人、朋友一齊慶祝O既時候，
而我只係一個人對住部唔知佢講咩O既電視機，
當阿東打俾我O既時候，眼淚又好似雨水咁........滴滴滴，
佢之後仲影左香港O既月亮send俾我，
都唔知話佢攞景定贈慶，
明知咁樣我會觸景傷情架嘛............
之後因為有少少發燒，食藥之後就瞓左lu，

第二日我就飛左去溫哥華.............好凍，
個度d屋好靚，真係有d紅色樹葉o既樹，
由於時差，即使係當地o既中午，我都瞓左，
因為個時已經係香港o既零晨，而且飛到好倦，
我瞓到六點幾出身，好彩我早有準備，
飛之前係香港買左本小說..<別離曲>-張x嫻著，
睇o黎我唔應該睇依本書，因為都係講異地分離，
一邊睇，一邊自己對住好大o既房，瞓係好大o既床，
反而令我覺得更加寂寞，電話又收唔到，
打唔到返香港，個時真係諗左好多野，
諗最初點解想做空姐，但真係諗唔到喇，
可能因為可以四周圍去，不過原來即使再吸引，
得一個人o既時候，唔可以同身邊o既人一齊分享，
真係好難去投入、去享受.........................
同d師姐叫左外賣食，到十二點既時間我又再瞓，
點知半夜又出左身，繼續睇埋本小說，
不過平心而論，對佢o既作品愈來愈失望，
睇完成本書都無高潮，而且同之前作品有d相似，
之後一直瞓唔著，只好扮瞓覺，到六點終於又瞓著，
第二日十一點幾起身，準備出發返日本lu...............

返到日本好開心，因為Karen都到機，
佢第二日係日本off，而我夜機飛返香港，
所以我又去左佢間房一齊"full" mask同瞓覺，
我地傾左好多野，我同佢講我覺得依份工好寂寞，
特別係外國，我唔同佢，佢有學識，空姐佢只當玩下，
做一年半載就投入商界做女強人，而我...........
空姐依份工已經係我o既夢想，依家已經做左，
所以真係好似無左個目標咁，但廿二歲係我o既黃金時期，
我點可以咁快就唔知自己既目標，點可以咁快就想停，
好彩Karen問左我一個問題令我諗番起一樣野，
我想做空姐除左因為可以四周圍去見識外，
仲可以淨多d錢俾屋企，爸爸已經辛苦左大半生，
唔好忘記佢已經五十五歲喇，我大個左，佢都老左，
佢都養到我咁大啦, 都係時候到我做乖乖女喇，
同埋我記得未做空姐前，我話如果我做到，
之後去到酒店無野做o既話，我會..............hehee
同我一齊讀中學o既同學仔應該記得我仲有一個好傻o既夢想，
唔知仲有冇人記得呢!? 雖然係好少人o既夢想，
但既然依家成日到機係酒店無野做，不如就俾d野做自己喇!..
依樣野仲難過in空姐，如果真係可以實現，
簡直係一個天大o既奇蹟，人間o既神話，哈哈

>>September 23, 2005 at 4:58:53 PM GMT+8

2005 年 9 月 16 日 星期五 【颱風】

琴日約左阿琪、ming、東、fat去琪屋企打邊爐，
但因為亞FAT個friend踢波時整親腳，
所以得番我地四個，食淨好多野，
阿琪養左兩隻兔兔，但好似狗狗咁，
好大隻，又active，有隻兔兔仲識"dum"地，
仲要好大力，真係俾佢嚇死
之後又去左阿東屋企打牌，
終於見到奀豬喇，全黑色，
又係好active，佢成日蝦寶寶，
我同寶寶玩佢又要走埋o黎，
勁醋..............又成日咬寶寶條尾，
攪到寶寶終於發脾氣打交，
真係慘呀...............
我地打通頂，朝早先返屋企，好倦..........


琴日我同媽咪講我中秋節正日要飛，
所以唔可以係屋企做節，
佢就話唔緊要啦.................
我話: "o下! 咁我唔洗做節呀?!"
佢話: "你想做咪聽晚食飯囉.".............
點知今晚..........................
爸爸唔返黎食飯，
哥哥收夜，
媽咪走左去幫社區中心攪中秋灘位，
屋企真係有煮飯呀.........不過得我一個食...........灰!!
唔制呀!........................聽晚得一個人係東京賞月炸!
無得食燈籠、玩月餅!!

>>September 17, 2005 at 11:18:23 AM GMT+8

2005 年 9 月 14 日 星期三 【晴】

今日約左Tracy, Janis, Karen唱lunch K，
唱完之後去左行街，
不過我地都覺得依家唔係咁鍾意行香港，
好似覺得日本D野好D，
死啦, 我地不停刺激外地消費，
之後去ITALIAN TOMATO食tea，
佢地話如果聽日stand by唔洗飛，
一係就去沙灘、一係打麻雀，
死啦, 我地只係飛左一個月就已經咁閒，
咁樣好似唔係咁好喎，
我地飛到去外國已經淨係瞓、食同行街，
睇黎係香港都要學番d野去充實下，
食完tea之後已經五點，
岩岩阿東放學，
佢落左朗豪坊搵我睇戲，
我地睇左<魔法嬌妻>，
好好睇，好sweet，Nicole Kidmen好靚，
之後再係ITALIAN TOMATO食飯，
本來想去阿東屋企睇佢新寵(狗---名叫奀豬)
但都係回家lu，因為要趕住睇<妙手仁心>..................

>>September 15, 2005 at 3:35:01 PM GMT+8

2005 年 9 月 12 日 星期一 【晴】

琴晚約左成班好姊妹去飲野，
我地好耐好耐無見喇，
因為何鳳鳳終於由英國返o黎，
其實我覺得大家都無乜點變，
只係英國O既生活太悠閒，
佢O既反應比以前更加遲鈍，
不過依然係癲癲地、傻傻地，
我地去O左大埔墟一間新開o既Bar，
因為高興得濟，我比平時飲多少少，
之後再去附近一間甜品店食糖水，
其實大家都有好多野想講，
不過因為低能、HIPPO第二日要返工，
何鳳鳳又有時差好眼瞓，
所以我地玩到一點幾就走lu，
之後再約又唔知要幾時喇，
大家依家d時間咁難就，
不過今晚真係好開心.................^-^

>>September 13, 2005 at 3:05:17 AM GMT+8

2005 年 9 月 11 日 星期日 【晴】

最後一程OJT飛完喇!
今次飛布里斯本可以話係最精彩，
琴晚回程仲發生一件令我畢生難忘O既事.....................

首先講下飛去布里斯本先啦!
我一直都好想去澳洲，
今次有機會去真係好好好開心，
飛左一程通宵機，
但我O既師兄姐話會去黃金海岸玩，
雖然好倦，但我都堅持一齊去，
我地塔左個幾鐘火車去到，
原來澳洲O既黃金海岸真係好靚架，
同香港O既假黃金海岸跟本比唔上，
好大浪、沙好幼、好熱鬧、好乾淨，
簡直好似去左世外桃園一樣 ，
D外國人好熱情、好隨便，
好想同身邊所有人一齊分享，
夜晚返到酒店附近O既唐人街食飯，
我地係其中一間餐館食飯，
所有菜單、侍應都係中國人，
但偏偏坐係身邊O既都係外國人，
個感覺好怪，原來海狗係英國O既生活就係咁，
返到酒店瞓醒第二日早機返日本，
返到日本原來Keran都到機，
個晚我去左佢間房一齊瞓，
瞓醒一齊去左行街買野食飯，
之後我就準備六點幾機回機返香港，

不過係琴晚回程O既班機，
發生一件令我畢生難忘O既事，
D senior話佢地做左十幾廿年都未試過，
佢地話我真係好黑仔，
(依件事唔方便係度公開)
(除非新聞都有播啦)
但因為依件事班機要延遲三個鐘起飛，
返到香港已經零晨點幾兩點，
公司安排左d車接送d客，而我都跟車返大埔，
到屋企已經零晨四零，
依件事令我成晚都瞓得唔好，
不過真係仲刺激過拍戲，
最感動o既係機長o既一段話....................

>>September 12, 2005 at 7:40:01 AM GMT+8