2004 年 10 月 24 日 星期日 【晴】

忙死了~~

神呀, 請給我多一點時間, 好嗎?

>>October 27, 2004 at 3:42:36 AM GMT+8

2004 年 10 月 21 日 星期四 【晴】

同hall B朋友仔們煮飯食, 好開心! 一齊食飯o既感覺很好, 好有一家人feel........

今晚有 :

1.)鹵水雞翼(Phoenix整o既)
2.)腸仔炒蛋(我整o既)
3.)豆豉鯪魚油墨菜(都係我整o既......... ~^.^~)
4.)罐頭沙甸魚
5.)「潺」菜鹹蛋肉片湯(妳整o既, 好好飲........ ~^.^~)

>>October 24, 2004 at 11:55:23 AM GMT+8

2004 年 10 月 19 日 星期二 【晴】

Sing con, 不過不失啦。阿man臨尾「哈碌」, 以為首歌完左就冇繼續彈落去, 佢個狼狽樣好攪笑。跟住達哥有一兩個位唔夠聲, 但大致上都ok。表現得最好都係自己, 完全冇犯錯, keke!!

不過同另外o個隊比, 我地就真係好得多啦!
佢地竟然唱「真的愛你」, 總之我地都唱「光輝歲月」啦!

多謝每一位尼捧場的朋友們~~
有你地o既支持, Instant一定會繼續努力, 繼續即興!!

我地真係一次比一次流灘啦! 想當年我地準備uop時, 用左成兩個月時間練習。之後o個幾次就越來越短。今次我地竟然夠膽死出show前一日先練, 下次再出show, 唔知會係點呢?

P.S : 片段擺左上share file, 喜歡的話自己download尼睇啦~~

>>October 23, 2004 at 5:47:53 PM GMT+8

2004 年 10 月 18 日 星期一 【晴】

聽日係老豆大人六十大壽, 作為兒子o既我, 絕對冇理由一d表示都冇架, 所以今日一早起身就去左屯市買禮物, 我仲捉埋妳陪我一齊去添。

最後用左唔夠一個鐘o既時間, 買左一個銀包。原因係我發覺老豆大人o既銀包都好似好耐冇換啦(成6年幾), 希望佢鍾意啦~~

同妳一齊去左小巴黎食lunch, 跟住就返嶺南, 準備上三點堂..........

上完堂之後, 休息左一陣就出去尖咀同老豆and屋企人食飯, 之前順便去GPA拎跆so o既so-t........

去左新港中心間稻香食夜晚飯, 個個都尼齊晒, 有成十二人。一家人一齊食飯o既感覺真係好開心。我仲開心到飲左兩支大啤, 走o既時候仲有d暈暈地, 真係水皮!! 冇法啦, 成N咁多個月冇飲酒...........

老豆收到份禮物之後好開心, 仲話聽日就即刻換左個銀包佢。太好了!!

我同阿達最後都係決定左玩sing con, 仲遇埋冠熙同阿man。十一點幾返到嶺南之後我就去左band房同佢地一齊練歌。由於時間極度緊迫, 我地都只係諗住「食老本」, 玩番uop玩過o既歌。最後揀左"Radio"...........

跟住達哥又話我地假假地都係一隊band, 唔改番個名好似好樣衰。不過諗左好耐又唔知改咩名好喎。冇理由叫「hall B band」架, 想笑爆人個咀咩?? 諗左好耐, 最後阿man諗到用「Instant」做我地隊band o既名。真係笑死, 因為呢個名勁襯我地!! (大家唔知instant點解就查下字典啦 ^.^)

>>October 23, 2004 at 5:31:25 PM GMT+8

2004 年 10 月 17 日 星期日 【晴】

尋晚十二點幾就訓左, 原本諗住今日可以早d起身做下正經野, 結果都係成十點先起身。都唔明自己點解可以咁好訓? 其實自己真係好討厭訓覺。試諗下, 如果一個人可以好似部CPU咁, 日日開住唔駛休息o既, 你話幾好? 假設一個有九十歲命o既人每日訓六個鐘, 咁佢有二十二點五年係用左尼訓覺, 呢二十二點五年真係可以做到好多野...............

一點鐘返到嶺南傾ISM353 present, 因為個個都準備得唔太好(包括自己), 最後半個鐘都冇就散水, 擇日再傾過。可惡!! 不過自己都有責任o既..........

下晝上堂, 夜晚同hall b o既朋友食飯, 頗為平淡的一天..........

P.S : Wallace叫我同阿達哥組band玩sing con初賽, 話因為今年得一隊band報名, 仲要係屎到嘔茄 o個隻, 如果冇其他band報名的話, o個隊band就當係自動勝出, o係決賽o個日出show, 所以希望我地砌低o個隊。但係星期三就要出show, 都唔知應唔應承好?? 話就話我隨時ready, 但都要練番一兩次架, 唔係就真係醜死鬼..........

要好好考慮下~~

>>October 23, 2004 at 5:12:48 PM GMT+8

2004 年 10 月 16 日 星期六 【晴】

睇左一段好恐怖o既片段.........

一場boxing比賽, 兩個選手互相「腳駁腳」之後, 其中一個斷腳。
但唔係非一般o既斷腳, 佢係o係「上五寸下五寸」o個度斷開.........
跟住o個個人仲要唔知, 當佢嘗試企番o係度時, 卻因為隻腳斷左而訓左落地。

睇完之後驚左好耐.........

我以後打free-fight都唔敢同人「腳駁腳」, 雖然大家都有護具.............

>>October 19, 2004 at 2:55:37 AM GMT+8

2004 年 10 月 14 日 星期四 【晴】

今日有兩樣好緊要o既事情, 第一係E-commerce midterm, 第二就係跆拳隊o既體能測試。

今朝要上九點半堂, 但係我就訓到九點五先起身 -_-"。最後只係遲左兩個字到BU321........

成朝都冇咩心機, 好想今日快d過, 好想快d到夜晚.........

之後上FM堂, 成堂都集中唔到精神, 太多野諗了!! 又諗今晚midterm o既野, 又諗體測o既野。個心好亂.............

上完堂返房訓左個幾鐘, 兩點幾食d野之後就去library溫書, 作最後衝刺........
最後當然係溫唔晒啦.........

六點三開始midterm, 覺得自己冇咩戰意咁, 有大約十五分鐘我係o係度發呆............

好不容易先過左兩個鐘, 終於都考完。但係緊接住就係體能測試, 老實講, 真係好擔心! 因為自己真係冇咩點刻意操過。而且之前幾日又訓得唔好.........

體測大約八點九開始, 一共有五個部份 : 引體上升, 掌上壓, sit up, 圍住嶺南跑圈, 同埋跳繩。

最後自己o既成績係29分(pass要25分), 不過不失啦。引體上升只係做到兩下, 掌上壓十八下, 呢兩part都係below average。最好o既就係sit up, 爆燈拎到十分。

呢個體能測試其實我都覺得幾騎呢。女仔o既體能比不上男仔就係人都知, 但係呢個test對女仔o既要求就遠遠低過男仔好多好多。例如跑圈, 男仔要跑三個, 女仔就只係兩個; 男仔要做20下掌上壓先叫做pass, 女仔10下就ok, 仲要係容易d o個隻; 男仔要做50下sit up先pass, 女仔20下就得。老實講, 咁樣o既體測標準, 比我o既感覺就係 : Nicky教練只係想谷班男仔, 但又唔想做到咁唔fair, 所以先求其定得d女仔o既要求咁低。唔係又點會出現女仔個個都咁高分o既情況丫(最低o個個都有31分)? 打死我都唔信D女仔fit過D男仔好多呀...........

Anyway, 講咁多都冇用, 鬼叫我係男仔咩! 有得揀, 我都想做女仔, 我都想打女子賽...........

體測完左之後同妳去富泰買野食, 巧遇阿paul, 佢今晚fail左體測, 好唔開心, 同佢傾左個幾鐘。

四點幾訓~~

>>October 24, 2004 at 4:24:31 AM GMT+8

2004 年 10 月 13 日 星期三 【晴】

黑色星期四~~

今日要負責HRM203 o既present, 要做o既野只係角色扮演, 將job interview o既過程演出來。
正正因為個present係咁"hea", 而且呢一兩個星期都有好多野要做, 所以自己都唔係太認真咁去準備。同兩個groupmate阿熙同阿傑只係傾過兩次。結果就出事啦.........

我地三個都misunderstand左份工o既job nature, 所以interview o既時候所問o既問題亦都變得同份job風馬牛不相及, 結果比幾個同學仔插到一棟都冇!! 更激氣o既係, 阿傑o係我地被插o既過程中, 野都唔多講句, 由得我同阿熙o係度招架。後來佢終於肯出聲答問題, 點知佢「語出驚人」, 答左d唔係道理o既道理比人聽, 結果...................。真係頂佢個肺, o係度累街坊..........

雖然Dr. Wong話我地個present唔錯, 仲話我地犯o既錯對分數影響唔大, 不過見到d同學仔們咁唔滿意, 自己都過唔到自己o個關。拎到高分數固然緊要, 但我更希望我能夠做到最好。平心而論, 今次我真係冇盡力去prepare........

谷住成肚氣返hall, 點知又因為小事同妳吵架, 自己仲發脾氣踢野。
發脾氣發得多, 不過今次咁大脾氣都真係好耐冇試過, sorry呀!!

聽日E-commerce midterm, 但而家都未溫晒書.........

勁down的一天~~

>>October 17, 2004 at 1:51:22 PM GMT+8

2004 年 10 月 10 日 星期日 【晴】

妳不自量力的性格, 有時真的令我很擔心和無奈~~

>>October 12, 2004 at 2:56:47 AM GMT+8

2004 年 10 月 8 日 星期五 【晴】

今晚係嶺南跆拳隊同poly跆拳隊交流o既日子。
上年都曾經去過同一個地方交流, 但係就慘敗而回。
除左bobo之外, 個個都損手爛腳(包括自己)。
所以今日, 美其名就係交流, 其實係要為嶺南爭番面子.............

記得舊年我地得八個人去poly, 但今年我地o既人腳就多很多了。有成16個
當然同poly比, 我地拍馬都比唔上, 人地o既跆拳隊, 我諗保守估計都有過百.............

操練時間原本係七點半至九點半, 但因為我地入poly運動場要攪d手續, 所以遲左三個字先開始。
做左一d熱身運動, 大約八點三就開始打free-fight.............

free-fight次序基本上係由輕磅開始打, 而我o係team入面係比較重磅o既, 所以等到頸都長都仲未到我。時間一分一秒咁過, 去到九點鐘都只係得大約一半人打左free-fight, 心入面開始有d心急.........

大約九點廿五分, 蘇承禮走到我地嶺南o個邊, 同Nicky講話只可以打多一場。o個時仲有我, 阿基, 俊文未打, 尾二o個場打完之後, nicky走到我地當中, 問邊個未打o既想打最後一場。因為阿基weekday要o係銅鑼灣上堂, 冇咩機會打free-fight, 而且自己星期二同君濂打時又整親寬骨, 左手o既舊患又未好番, 蔡師傅亦曾經叮囑過我要好好休息, 所以都諗住自己唔打, 比個機會阿基。但係nicky似乎屬意想我打最後一場, 雖然阿基主動舉手, 但nicky卻問我ok唔ok。其實自己都好想打free-fight, 因為類似o既交流機會唔多, 如果錯過左就要等好耐先再有機會。最後我都企左出尼..........

打之前Nicky同我訓話, 講番搵我打最後一場o既原因, 係因為我o係team入面係高帶, 希望我能夠打場好o既free-fight比班細o既睇, 叫我盡力而為。當然o既我真係少有地好緊張, 可能因為呢場free-fight唔係一般o既free-fight啦, 唔單止係為自己, 呢場仲係關乎到嶺南o既面子, 而且班細o既仲睇住我..................

見到自己o既對手了, 係一個國際館o既紅黑帶, 佢矮過我而且腳又短過我, 至於磅數方面, 我估計大家差唔多。

o係裁判o既示意下, 呢場壓軸戲開始了。對手一開始就嘗試出turning-kick得分, 但佢自己反而失平衡訓左落地。之後佢又嘗試上我頭, 結果上頭不成, 反而踢中我頸位, 令我覺得有d呼吸困難。但唔知點解, 佢又失平衡向後跌。試探完佢o既實力之後, 我就開始發威。結果成個上半場大部份時間我都佔優, 佢被我打得喘不過氣來。一分三十秒好快就過去了..........

不過自己體力真係好唔掂。半場休息時已經覺得有d累了。細心地聽著nicky教路, 佢叫我控制呼吸, 唔好做無謂動作浪費體力。仲有話我上半場打得唔錯......... ~^.^~

第二round開始, 我打得略為保守, 因為要保留體力, 結果初段比對手取得主動權。但唔知點解, 佢好似成日都企唔穩, 好幾次出完腳踢我之後, 佢都會跌落地。之後 o既戰況如何, 我已經唔太記得了, 因為臨尾一分鐘我真係好疲倦。我只係記得自己曾經出過一次dobule turning拎左佢兩分。第二round o既一分三十秒, 真係過得好慢.........

終於都打完, 總括而言係打得算幾好。自己同對手o既攻勢係六四之比(nicky講o既)。而且自己o既心理質素同意志都極佳。不過卻比nicky批評我有些地方做得唔夠好, 例如埋身時做o既野都係唔夠多, 仲有犯左大專盃時o既毛病, 就係唔懂得留力。好彩對手o既體能都唔好得我幾多, 如果唔係臨尾o個一分鐘我肯定會捱打。仲有比heidi話我打o既時候個樣太野蠻, 好唔禮貌......

不過我真係好開心。因為總算冇令人失望。Ivan事後同我講, 話睇我打o既時候睇得好開心, 因為見到我係咁壓住個對手尼打。仲有臨走o既時候, 有個poly o既黑帶埋尼話我好勁, 比著係佢都未必夠我打。聽見佢咁講, 真係有點飄飄然..........

其他人o既表現大部份都幾好, 其中阿龍同阿邦更加有驚喜o既演出。今次真係幫嶺南爭番唔少面子(另一方面亦都係落poly面, 有好幾場free-fight, 蘇承禮睇到頹晒)。

難忘的一個晚上~~

>>October 16, 2004 at 7:58:00 PM GMT+8