2004 年 11 月 8 日 星期一 【晴】

今晚的跆拳ilp係我今個sem的最後一堂(其實下星期仲有一堂, 不過要去high table)。
過埋今晚, 就要等到下個sem先有機會打free-fight。
所以雖然我好多野做(FM midterm未溫晒), 但都堅持要返拳.........

打左兩場, 第一場對阿基。老實講, 打之前已經知道自己應該會贏。
因為自己free-fight經驗同埋狀態都比阿基好。
最後亦都一如所料, 贏12-6。我仲用左一下hammer kick上對手頭。係我打free-fight以尼o既第一次(之前全部都係out-to-in所得o既)。
今個semester, 覺得自己好像突破左好多, 攞分方法唔似以前咁單調, 打法亦都略為多元化左。
希望可以繼續有進步~~

第二場對阿龍, 輸5-6。不過係輸o係自己手上。
自己一共foul左四次, 同埋打得唔太認真, 有小小玩玩地野咁...........
不過算啦!
o個腳out-to-in上頭又係唔錯, 連續三場free-fight我都有上頭得分, 做得幾好!
要努力練多d上頭腳, 始終冇幾多個colour-belt會有防頭意識(包括自己)。

仍然有好努力做gym, 不過冇咩點跑步, 因為真係唔係好想跑! 上校長斜o個度真係好惡頂!
但謝教練又叫我最好圍嶺南跑, 唔好玩跑步機喎!
有d矛盾~~

>>November 13, 2004 at 9:28:03 AM GMT+8

2004 年 11 月 6 日 星期六 【晴】

尋日極級唔舒服, 一點就訓左, 一訓就係十個鐘, 成十一點幾先起身..........

去圖書館途中巧遇教會o既朋友們。點解?
因為佢地今日攪outing, 其中一個活動就係尼嶺南食lunch同遊覽下咁...........

個個一見到我都問我去左邊, 做咩咁耐都唔返尼教會。結果我要將我o既答案重複N咁多次。
放心啦! 我一定會再返尼o既, 不過呢排真係好忙..............

去左圖書館溫書, 點知只係溫左兩個鐘又開始唔舒服, 仲集中唔到精神。
無奈地返hall........

返到去又訓過, 唉! 今日好多時間就係咁訓訓訓訓左去啦!

成個weekend做得好少野..........

>>November 10, 2004 at 2:09:45 AM GMT+8

2004 年 11 月 5 日 星期五 【晴】

好揀唔揀, 今日先尼病........
可惡!!

結果今日o既工作效率o係好低。
希望快d好番啦~~

>>November 10, 2004 at 2:04:04 AM GMT+8

2004 年 11 月 3 日 星期三 【晴】

星期四, 係校隊操練o既日子。例牌都會操到死, 今晚都唔例外..........

可能因為之前幾日做gym操得太勁, 加埋星期一同三都要踢波, 今晚操左只係半個鐘, 我居然「賣老抽」! 好彩不斷拉筋之後已經好得多, 仍然可以應付之後o既操練........

但亦都可能係因為自己勤力做gym o既緣故, 覺得自己今晚o既意志同耐力好過之前好多, 再加埋同我做partner o既Patrick, o係我每次倦o既時候都鼓勵我, 好幾個踢腳練習都捱得過去。真係要多謝Patrick!!

比謝教練讚我今晚練得唔錯, 不過d動作都係做得未夠好.............

----------------------------------------------------------------------------------------------------------------------------
許燕華 : 唔使客氣, 我成日都串你, 比你串番一兩次又有咩所謂呢, 係咪先? ~^.^~

>>November 4, 2004 at 5:35:34 PM GMT+8

2004 年 11 月 2 日 星期二 【晴】

生日~~

Vava送了一個親手做的相架﹑一個蛋糕﹑一個銀包﹑一個散紙包﹑仲有一個powerpoint message, 入面有佢o既錄音....
聽過Vava的一段錄音, 第一次覺得好好笑, 但第二次再聽時卻覺得十分感動, 仲忍唔住流馬尿.......

多謝每一個同我講生日快樂的人~~

----------------------------------------------------------------------------------------------------------------------------
夜晚同hall b o既兄弟們去左元朗打比賽, 由於星期一我地輸左, 所以今晚只係能夠爭季軍........

對手都係hall b人, 有冠熙, larry, 師父同gary等等...........

展豪話要將今晚比賽o既人球獻比我, 聽落有d老土, 但又幾攪笑喎!
結果我地真係入到一球。冠熙佢地都好老實不客氣呀, 送左七個入球比我 @_@
最後我地輸一比七, 真係輸到「七個一皮」........

比賽過程 :

開波只係一分鐘, 因為我嚴重犯錯(控甩左sammy o既回傳球), 比對手輕易射入。
中段時間再輸多球, 但係上半場臨尾我地追成一比二。
可惜下半場開波初段我地輸多兩球, 之後就兵敗如山倒。
最後輸一比七...........


之後同Vava去左元朗食日本野, 可能尋晚訓得唔好, 食飯中途我居然瞌眼訓........... -_-"

---------------------------------------------------------------------------------------------------------------------------
呢期愛上左做gym, 每當有空閒時間, 就會去gym房做下運動。

做gym, 唔係因為要交功課比nicky, 亦都唔係因為要拎咩比賽冠軍, 純粹只係我鍾意左做gym!!
一直以來都冇人可以迫我做我唔喜歡o既事情。

「犧牲享受, 享受犧牲」我仍然未真正地做到, 努力學習中!!

>>November 6, 2004 at 3:17:14 PM GMT+8

2004 年 11 月 1 日 星期一 【晴】

尋晚已經好早訓架啦(其實都成一點半), 但今朝居然訓到十一點起身, 真係可惡!!

上下網, 食下野同溫下書, 好快就已經到三點鐘上堂o既時間...........

一早已經諗好今晚唔返拳, 費事因為整親而影響星期三比賽時o既表現, 所以落堂之後就去左成龍做gym, 一做就做左個半鐘。由於自己係空肚做gym o既緣故, 做左九個字左右就開始有少少頭暈.......

做完gym之後幫師兄弟們搬野, 返到hall已經成六點幾..........

極級肚餓, 好想快d食飯, 但三樓o既兄弟又未叫飯住喎, 咁arm撞到阿達哥, 原來佢都好肚餓, 太好了。於是我地兩條友就去左富泰食飯。呢個時候, 只係夜晚六點四十五分左右.........

同達哥傾左好多野, 佢仲講左好多野比我聽, 主要都係同佢女友有關。佢仲叫我保守秘密, 唔好講比任何人聽。

八點幾返左hall, 沖完涼就開始做功課同溫書。

十二點, icq開始忙個不停, 很多人send message同我講「生日快樂」。波波係第一個.........

兩點幾訓~~

>>November 4, 2004 at 10:12:10 AM GMT+8

2004 年 10 月 31 日 星期日 【晴】

今日朝訓到十點左右起身, 梳洗下執下野就返入屯門。約左muso o既朋友仔們唱lunch k。十二點半左右就去到neway.........

美其名就話係MUSO re-u, 但實際只係得六個人去(我, 達哥, sybi, 波波, 許燕華, Winnie)

N咁多年冇唱K o既我, 好多歌仔都唔識唱。更什的是, 原來達哥都N咁多年冇唱K。結果全場大部份時間都係班女唱多, 我地夾埋唔知有冇十首...........

o個個死人許燕華兩度挑我機, 可惡!! 算, 我原諒你!!

多謝各位唱生日歌比我聽~~

四點幾返嶺南, 上左一個鐘頭o既computer network, 就同hall b o既兄弟出發去元朗, 參加BBA攪o既足球比賽..............

對手係MIB莊o既其中幾個莊員再加hall d幾個男仔, 當中好似有3-4個係校隊。至於我地, 雖然大家都係hall b人, 但比賽前我地完全冇練習過, 加上好多人都唔太識踢波(除左阿聰係校隊之外)。所以, 去球場o既途中, 自己都打定輸數。心諗今晚輸少就當贏, 能夠打和就真係偷笑, 更加唔期望會贏波..............

Vava尼左捧我場, 好開心呀~~

但最後o既戰果卻出乎意料之外, 我地能夠o係60分鐘內迫和零比零, 只係o係射十二碼時輸二比三, 實在雖敗猶榮!! 全靠每一個人o既拚勁, 再加埋自己救出左幾球射門(kekeke......... ~^.^~), 先至可以「化腐朽為神奇」!! 比實後就連對手都讚我打得好, 真係開心死人啦.............

之後睇左一陣尾場o既比賽, 然後成班人去左富泰食飯.............

今日過得好開心.........

>>November 4, 2004 at 9:44:28 AM GMT+8

2004 年 10 月 29 日 星期五 【晴】

今晚同教會朋友仔們食飯, 都好耐冇見佢地啦! 鬼咩, 自己衰lor, 成日都唔返教會...........

係銅鑼灣先後巧遇Brian同Samuel.........

極級搞笑!! AUAU見到Brian之後第一句就話 : 「你個friend好似陳鍵鋒喎!」

去左一間cafe食夜晚飯, o個度係由一對情侶拍住拖開o既, 除左佢兩個就冇其他人。
座位亦都得好少(唔過廿個)。
o個度o既野食真係幾好, 尤其係甜品。簡直係極品!!

傾左好多野, 當然亦都包括小組o既去向。

十點幾散~~

P.S. : 相識咁多年o既Riccal, 居然問我今年幾多歲。當我如實講出時, 佢o既反應係勁surprise, 仲話以為我仲好細個。其實我都係細你十個月之嘛, 你以為爭幾多呀??

真係唔知開心定唔開心好~~

>>December 19, 2004 at 10:24:53 AM GMT+8

2004 年 10 月 28 日 星期四 【晴】

朝早ISM350要midterm, 還可以啦! 測驗o既形式係做50條MC........
真係好多謝Andy o係之前o個晚花咁多時間講一次課文o既野比我聽.........
老實講, 呢科叫Computer Network o既科目, 對於一D冇玩開電腦o既人尼講, 真係幾惡頂!!
所以次次上堂我都頹到爆..............
不過過到midterm, 考試又唔知點好。考試要寫essay架, 真係唔知點算...........

上FM堂, 極級留心, 好耐都未試過咁比心機上堂..........

下晝準備present, 原本一切都順利, 點知臨走前發生左d意外。個死人printer又發神經, 激到我死!

夜晚要present, 不過不失啦! 因為自己只係負責abstract o個part, 冇咩位好比人插........

>>November 2, 2004 at 1:23:57 PM GMT+8

2004 年 10 月 25 日 星期一 【晴】

今日有機會同Nicky傾番一D跆拳隊o既問題, 唔錯唔錯!
有D地方大家o既睇法唔同, 互相傾下未嘗唔係好事。如果唔係盞加深誤會........

夜晚返拳, 今晚揀左同Patrick打。少有地好緊張, 仲攪到有D胃痛, 因為o係我心目中, Patrick係一個好難應付o既對手, 佢體能遠遠好過我, 而且佢o既腳又快又重。亦都係因為咁, 今晚我打得都幾消極, 下下都打埋身, 因為驚比佢出到腳。第二round開始自己打得放少少, 嘗試度arm距離取分, 中段仲一個左腳out-to-in上左Patrick頭, 拎到3分, 當堂開心到high左。因為打左咁耐free-fight, 都係第一次拎到3分。亦都係靠呢一腳, 令我最後贏出, 險勝15比14。

>>October 27, 2004 at 3:41:46 AM GMT+8