2005 年 4 月 1 日 星期五 【晴】

IELTS考試, 不過不失啦。
listening有7-8分聽唔到, reading一如以往唔夠時間做,
writing最騎呢, 要我地睇一幅chemistry o既圖, 跟住寫150字essay。
當堂呆左! 最後求其寫左d野就算.....

下晝考speaking, 第一part覺得自己講得幾好, content夠而且都幾fluent。
考官問我係自己學校讀書最有趣係咩時, 我仲乘機sell下嶺南o既博雅教育, 講左好耐。
不過第三part就衰到貼地啦, 考官問我一d社會問題, 結果content唔夠之餘, 仲係咁「食螺絲」。
真係虎頭蛇尾啦!

之後去左香港仔剪頭髮, 仲有食左個雞軟骨拉麵。

夜晚7L班gathering, Linda Ng都有去, 夾埋有成15人左右。
去左「客家好棧」食, 食得好飽, 而且好開心。
大家好耐冇見, 有講有笑, 轉眼就過左兩個幾鐘頭。
家亮一如以往經常口出狂言, 笑到我地死咁滯。
不過餐飯都唔平, 每人$90.....

之後一班男士去左篤波, 我地開左兩張枱, 我同軍佬仲有arto一齊玩, 之後阿lam尼到join我地, 亦都玩埋一份。玩左個幾鐘, 終於等到機會同軍佬「撕片」。打左兩局, 第一局因為自己一次失誤放生左軍佬, 比佢拋離十幾度, 雖然自己力追, 最後都係輸左。第二場就輪到我o既世界, 贏左廿幾度。最後大家平分秋色.........

今日玩得好開心, 不過就洗左好多$$啦!
早餐:$20, 午餐$25, 食拉麵$30, 剪頭髮$80, 晚飯$90, 篤波$100。
洗錢真係容易.........

>>April 4, 2005 at 7:02:59 PM GMT+8

2005 年 3 月 31 日 星期四 【晴】

下晝, 去左理工大學o既視光學診所驗眼。
其實今次檢查係老豆半年前幫我預約的, 原先都冇打算去,
之但係聽講要去o個度檢查去排期排好耐, 而且又唔係好貴($100)。
而自己又好耐冇驗過對眼睛, 所以就去左啦。

成個驗眼過程為時個半鐘頭, 得出尼o既結論就係, 我對眼好健康。
不過呢個半鐘就真係好難頂, 因為真係好悶, check到中途我仲訓著左。
而且呢間視光學診所係for poly學生係度實習, 所以成個檢查過程都會做兩次。
d學生做完之後, 佢地阿sir會再做多一次。所以實際o既檢查時間, 可能一個鐘都唔駛.........

不過因為要做瞳孔檢查, 佢地幫我滴左d放大瞳孔o既藥水,
攪到我之後o既時間都盲左咁, 睇唔到近野之餘仲要對眼好怕光,
結果成個夜晚想溫IELTS都有心無力, 連食飯夾送都有問題。
慘情!!

>>April 3, 2005 at 4:39:11 PM GMT+8

2005 年 3 月 29 日 星期二 【晴】

星期六就係考IELTS o既日子, 但係我今日先開始prepare........
下晝去左library做listening, 一做就做左三份, 好淺!
40分滿分, 我最高可以拎到34分.......
聽日仲要操reading同writing, oral就到時執生啦!

來緊幾日又有飯局.........
星期六同7L朋友們仲有Miss Ng食飯;
下星期一就MUSO re-u; 又要洗$$了。

>>March 30, 2005 at 4:48:14 PM GMT+8

2005 年 3 月 28 日 星期一 【晴】

今日, 極級放肆。
原本要上3堂, 但係我走左兩堂半.......

原本今朝要上8半同10半, 但尋晚冇返到hall, 今朝又唔想咁早起身,
所以就一口氣走晒d堂! 今朝一訓就訓到10點........

之後仲慢條斯理地o係屋企執野, 聽下歌, 仲去左商場間日本料理歎個豬軟骨飯先起行。
返到嶺南, 已經兩點幾........

六點上SM堂, 但我六點十一就走左, 因為........
我想睇七點播o既「氣象萬千」。

好耐都冇試過咁放肆啦~~

>>March 30, 2005 at 4:47:18 PM GMT+8

2005 年 3 月 27 日 星期日 【晴】

復活假的最後一天...........

訓到十二點先起身, 梳洗一番之後就同mum, 仲有舅父, 幾位阿姨等人去灣仔飲茶。
一飲就係兩個多鐘頭........

受dad所託, 要幫佢買電話, 所以臨返home之前去左smartone行一趟。
最後幫dad揀左Nokia 3100。雖然個款就outdated左d, 但係勝在function唔太多同埋夠平($790), "arm"晒佢老人家用。

夜晚係屋企, 同屋企人食飯, 仲有睇下電視, 打下application letter, 傻哉悠哉咁過。

四日假期咁就完, 真係快!
聽日又要返學了。
不過尼幾日, 除左搵到一筆外快之外, 又好似冇咩特別野做過。
有點浪費~~

>>March 28, 2005 at 4:17:53 PM GMT+8

2005 年 3 月 26 日 星期六 【晴】

復活假的第三天........

因為尋晚打麻雀打到high左, 攪到五點幾先訓得著, 仲要訓得唔係太好, 結果十一點幾就醒左訓唔番........

梳洗一番之後, 同教會朋友仔們食lunch傾下計, then就返屋企。
傻更更o既自己, 因為太耐冇返屋企, 竟然o係出門口之前唔記得帶屋企鎖匙,
結果要等老豆返尼先有門口入..........

今日過得好平淡, 係屋企執下野, apply下工。好快就到夜晚開飯o既時間。
mum整左好多"送", 好好味, 食得好飽!!

之後係咁睇電視, 又上下網。
兩點幾先訓.........

>>March 28, 2005 at 10:50:04 AM GMT+8

2005 年 3 月 25 日 星期五 【晴】

今日日頭平平淡淡咁過, 五點幾同VAVA一齊離開嶺南........

夜晚同屋企人去左食上海菜, d小籠包同啖啖麵極級好食。
埋單$709, 老豆請.........

阿差佬哥哥約我今晚打麻雀, 原本都唔想去, 一來唔想自己成日夜訓或者通頂。
二來同佢地打麻雀, 通常我都輸多贏少(咁多次夾埋我輸左$4xx比佢地)。
但係佢地個個都好勁, 同佢地玩真係好鬼好玩, 最後我都係應承左........

10點就開始我地o既大戰, 打左十二圈, 三點半左右就打完, 真係好快!
D麻雀呢期同我好好朋友, 除左第一圈我輸少少之外, 其他時間我都由頭贏到落尾。
又海底撈魚, 又降上自摸, 將佢地打到落花流水。
最後破紀錄地喪贏$1,128, 咩仇都報晒!
美中不足o既係未試過自摸十番, 拎唔到o個七百幾蚊jackpot, 如果唔係贏得仲多。
不過算啦, 有時做人又唔好去到咁盡........

>>March 27, 2005 at 4:03:49 PM GMT+8

2005 年 3 月 24 日 星期四 【晴】

前日軍佬打過比我, 約我今朝一早去踢波。
其實我都好想去的, 之但係一來尋晚打完通宵麻將, 二來我一早已經plan好今日同VAVA一齊過。
所以我又冇出席到啦!
哎哎! 7L o既活動我一次又一次缺席, 真係怕有一日佢地會唔記得左我。

今日同VAVA訓到兩點幾先起身, 一齊去左嶺南個足球場睇校長盃。
今日hall b對hall a, 大部份時間都係冇紀錄。之但係我地去到o既時候hall b就即刻有波入啦。
最後hall b贏左一比零。
之後同hallmate去富泰食lunch, then就返左hall。

夜晚同VAVA去左元朗食日本野, 食到我極級鍾意o既三文魚子壽司, 仲有甘海老刺身!
埋單$2xx......

>>March 27, 2005 at 8:09:17 AM GMT+8

2005 年 3 月 23 日 星期三 【晴】

Apply左馬來西亞航空o既一份job, 花左不少時間o係度諗點打封cover letter。
希望有機會interview啦!
雖然呢間airline唔係我心目中o既first choice......

今日有好多第一次,
我第一次走左narrating HK堂lecture, 不過只係走左半堂。
亦都第一次上足media ethics lecture, 因為Lisa今日教社會責任論。
朱維德同學同我講過, 成科media ethics冇咩好學, 唯獨是社會責任論要pay 多d attention。
所以縱使Lisa講野幾咁悶, 都死頂晒成堂lecture。

夜晚返拳, 兩個星期冇操o既我, 顯然狀態麻麻。
仲要打soft-fight時先後不幸要同兩位教練打, 結果靠意志力死頂。
終於捱過左!
不過同Heidi打o個場, 真係好精彩。
Heidi師姐仲一路打一路傻笑。
佢事後話, 同我打打得好開心喎! 因為大家都互有攻守, 咁先係一場似樣o既搏擊。
聽見佢咁講, 我都好開心。因為咁樣證明左我唔係D乞人憎同悶蛋o既選手。
練完之後大家一齊去富泰食飯, 有講有笑, 十分開心!

難得尼緊四日係紅假, 所以今晚約了細ray同hall b朋友們打下牌。
頭四圈贏了$32, 尾四圈贏了$162, 不過有一半$$都係由VAVA度尼o既。
所以實質所收o既, 得$100左右。
不過唔緊要, 最緊要大家玩得開心........

>>March 26, 2005 at 8:31:24 PM GMT+8

2005 年 3 月 22 日 星期二 【晴】

今日做左一件我入左大學以來一直未做過的事, 就係去seminar。
呢個seminar係由哲學系攪的, 佢地請左一個姑娘返來,
share佢面對未期病人o既經驗, 唔知點解, 我好有興趣想聽下。
咁arm o個段時間又唔使上堂, 所以就去左了。

姑娘分享了佢點樣同未期病人去溝通, 亦都share左一D未期病人臨終前唔同o既反應。
有D人態度很正面, 有D就好負面;
有D係無牽無掛, 欣然面對「那天」的來臨, 有D就滿懷恐懼;
當中有一兩個病人o既反應, 聽來令我地覺得有D好笑。(好似好衰咁)

聽姑娘分享的時候, 亦令我想起一些事情。
回想起自己唯一的一次面對未期病人o既經驗, 就係舊年去加拿大探betty時。
老實講, o係面對佢o既時候, 我真係唔知講咩好。
因為除左講一d鼓勵o既說話之外, 我地真係冇咩可以做到。
睇見佢辛苦o既樣子, 但又無能為力。
這就是人的軟弱。

同時亦諗起一句說話.......
「人世間最痛苦的事情, 莫過於掛念已經死去的人。」


今日只需要上一堂, 所以我用左d空閒時間尼做左好多野。
apply左幾分工, 跳繩跳左1000下, check下email。

仲未放假, 已經好有holiday mood.........

>>March 26, 2005 at 8:50:48 AM GMT+8